Kau Palōfitá mo e Fakahaá
“ʻOku mau tui ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuá” (Ngaahi Tefito ʻo e Tui 1:9).
ʻE tokoni ʻa e ngaahi fokotuʻutuʻu ʻi he ʻiuniti ko ʻení ke ako ʻa e finemui takitaha ke ne fakatokangaʻi e leʻo ʻo e ʻEikí ʻi Heʻene folofola kiate ia he folofolá, kau palōfita mo e kau ʻaposetolo moʻuí, mo e fakahā fakatāutaha mei he Laumālie Māʻoniʻoní ki hono lotó mo e ʻatamaí. Tokoniʻi e kau finemuí ke nau ako ke manako mo falala ki he folofola ʻa e ʻEikí koeʻuhí ka hoko ha taimi ʻoku nau fehangahangai ai mo e ngaahi ʻahiʻahí pe ngaahi fili faingataʻá—ʻi he lolotongá ni mo e kahaʻú—ʻe fakanatula pē haʻanau tafoki ki he folofolá, lotú, mo e ngaahi lea ʻa e kau palōfita moʻuí ke maʻu mei ai ha fakahinohino.
Ngaahi Fokotuʻutuʻu ke Fili mei ai ʻi he Māhiná Ni
Mutualé
Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. ʻE lava ke fakaʻaongaʻi e lahi taha ʻo e ngaahi ʻekitivitī ako ʻi he ngaahi fokotuʻutuʻu ko ʻení ko ha ngaahi ʻekitivitī lelei ʻo e Mutualé. Ngāue fakataha mo e kau palesitenisī fakakalasí ke fili mo palani ha ngaahi ʻekitivitī feʻunga ʻoku nau fakamālohia e meʻa ʻoku ako ʻe he kau finemuí ʻi he Sāpaté.
Fakalakalaka Fakatāutahá
ʻOku fekauʻaki e ngaahi aʻusia ko ʻeni mei he Fakalakalaka Fakatāutahá mo e ngaahi lēsoni ʻi he ʻiuniti ko ʻení:
-
Aʻusia 1 ʻi he tuʻunga ʻulungaanga mahuʻinga ʻo e Tuí
-
Aʻusia 2 ʻi he tuʻunga ʻulungaanga mahuʻinga ʻo e Mahuʻinga Fakatāutahá
-
Aʻusia 5 ʻi he tuʻunga ʻulungaanga mahuʻinga ʻo e Tauʻatāina ke Filí mo e ʻEkeʻi Meiate Kita ʻa e Meʻa ʻokú Te Fai pe Taʻefai
-
Ngāue ʻo e tuʻunga ʻulungaanga mahuʻinga ʻo e Angamaʻá