Ko e hāʻoku mahuʻinga ai ke fakafanongo mo muimui ʻi he kau palōfita moʻuí?

ʻOku tau poupouʻi ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā. ʻOku fakafōtunga mai heʻenau ngaahi akonakí ʻa e finangalo ʻo e ʻEikí. ʻOku nau fai mai ha fakahinohino, fakatokanga, mo ha faleʻi mei he ʻEikí ʻi hotau kuongá. ʻOku tāpuekina kitautolu ʻaki ha malu, nonga, pea mo ha ivi fakalaumālie ʻi he taimi ʻoku tau fakafanongo ai mo talangofua ki heʻenau faleʻí.

Teuteuʻi fakalaumālie koe

Ko e hā ha faleʻi kuo fai ʻe he kau palōfita moʻuí kuó ke ʻosi fakaʻaongaʻi ʻi hoʻo moʻuí? Kuo tāpuekina fēfē koe ʻi hoʻo muimui ʻi he faleʻi ko iá?

Ko e hā ʻoku mahuʻinga ai ki he kau finemui ʻi hoʻo kalasí ke nau maʻu ha fakamoʻoni ki he kau palōfita moʻuí? Te ke tokoniʻi fēfeeʻi kinautolu ke nau fakatokangaʻi ko ha tāpuaki ia ke maʻu e kau palōfita moʻuí ke tataki kinautolu ʻi he ʻahó ni?

Ako ʻi he faʻa lotu ʻa e ngaahi potufolofola mo e ngaahi maʻuʻanga fakamatala ko ʻení. Ko e hā ʻokú ke ongoʻi ʻoku ueʻi koe ke ke vahevahe mo e kau finemuí?

ʻĀmosi 3:7; T&F 1:4, 37–38; Mōsese 6:26–38 (ʻOku folofola mai ʻa e ʻEikí kiate kitautolu ʻi Heʻene kau palōfitá)

T&F 21:1, 4–7 (ʻOku talaʻofa ʻe he ʻEikí ha ngaahi tāpuaki maʻongoʻonga kiate kinautolu ʻoku muimui he palōfitá)

Ronald A. Rasband, “Ko e Tuʻu Fakataha mo e Kau Taki ʻo e Siasí,” Ensign pe Liahona, Mē 2016, 46–49

David A. Bednar, “Kuo Fili ke Fakamoʻoni ki Hoku Huafá,” Ensign pe Liahona, Nōvema 2015, 128–31

M. Russell Ballard, “Nofomaʻu ʻi he Vaká pea Piki ke Maʻu!” Ensign pe Liahona, Nōvema 2014, 89-92

Carol F. McConkie, “Moʻui ʻo Fakatatau mo e Lea ʻa e Kau Palōfitá,” Ensign pe Liahona, Nov. 2014, 77–79

“Pōpoaki ki he Toʻu Tupú mei he Kau Palesitenisī ʻUluakí,” Ki Hono Fakamālohia ʻo e Toʻu Tupú (2011), ii–iii

“Kau Palōfitá,” Tuʻu Maʻu ʻi he Tuí (2004), 84–86

Vitiō: “ʻOku Tau Fie Maʻu ha Kau Palōfita Moʻui”

2:45

Ko e faiako ‘i he founga ‘a e Fakamo‘uí

Naʻe fai ʻe he Fakamoʻuí ha ngaahi fehuʻi kiate kinautolu naʻá Ne akoʻí mo Ne tuku ha ngaahi faingamālie ke fai ai haʻanau ngaahi fehuʻi. Ko e hā ha ngaahi fehuʻi te ke lava ʻo fai ʻe tokoni ki he kau finemuí ke nau fakakaukau mo ongoʻi moʻoni ʻa e kau palōfita moʻuí? Te ke fakahaaʻi fēfē ʻokú ke mahuʻingaʻia ʻi heʻenau ngaahi talí?

Ngaahi ʻEkitivitī Felāveʻi mo e Toʻu Tupú

Palani ha ʻekitivitī Mutuale ʻe lava ʻo tokoni ki he kau finemuí ke fakaʻaongaʻi e meʻa naʻa nau ako ʻi he lēsoni ko ʻení.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e meʻa ne nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ʻa e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ʻo e uike ní:

ʻEke ki he kau finemuí pe te nau tali fēfē hano ʻeke ange ʻe hanau kaungāmeʻa mei ha tui fakalotu kehe pe ko e hā ha faleʻi kuo fai ʻe honau palōfitá ki he kakai kei talavoú. Lau fakakalasi ʻa e ʻuluaki palakalafi ʻo e “Pōpoaki ki he Toʻu Tupú mei he Kau Palesitenisī ʻUluakí” ʻi he Ki Hono Fakamālohia ʻo e Toʻu Tupú. ʻEke ki he kau finemuí pe ko e hā ʻoku nau ongoʻi ai ʻoku mahuʻinga ke fakafanongo mo muimui ki he palōfita moʻuí.
Fakaafeʻi e kau finemuí ke nau fakakaukau pea vahevahe ha talanoa mei he Tohi ʻa Molomoná ʻoku fakamahinoʻi ai e fie maʻu ke fakafanongo mo muimui ki he palōfita moʻuí. ʻE lava ke kau ʻi he ngaahi sīpingá ʻa e ngaahi talanoa fekauʻaki mo Līhai, Tuʻi ko Penisimaní, ʻApinetai, pe Samuela ko e Tangata Leimaná. Ko e hā e meʻa ʻoku nau ako mei he ngaahi talanoa ko ʻení? Ko e hā ha ngaahi aʻusia ʻe lava ke vahevahe ʻe he kau finemuí ne nau muimui ai ki he faleʻi ʻa e palōfitá?

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí hono mahuʻinga ʻo e muimui ʻi he kau palōfita moʻuí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Vahe ki he finemui takitaha ha taha ʻo e ngaahi potufolofola ʻoku fokotuʻu atú pea kole ange ke ne kumi ʻa e ngaahi ʻuhinga ʻoku tau fie maʻu ai ha palōfitá mo e ngaahi tāpuaki ʻoku maʻu ʻi he muimui ki he palōfitá. Fakaafeʻi ʻa e kau finemuí ke vahevahe ʻenau ngaahi fakakaukaú. Vahevahe ha meʻa fakatāutaha naʻá ke aʻusia ʻa ia naʻá ke muimui ai he faleʻi ʻa e palōfitá, peá ke fakamoʻoniʻi e meʻa naʻá ke ako mei hoʻo fai iá. Fakaafeʻi e kau finemuí ke nau vahevahe e ngaahi meʻa ne nau aʻusiá.
Lau ha konga ʻo e lea ʻa ʻEletā Ballard, naʻá ne fakatatau ai ʻa e palōfita moʻuí ki ha tangata faifakahinohino ʻaʻalo he vaitafé, pea lisi ha ngaahi founga ʻoku faitatau ai ha taha faifakahinohino heka vaka he vaitafé pea mo ha palōfita. Fakaafeʻi ʻa e kalasí ke nau fakakaukauʻi pea vahevahe atu ha ngaahi talanoa fakatātā kehe ʻe lava ke nau akoʻi ai ki he niʻihi kehé ʻa e ʻuhinga ʻoku mahuʻinga ai ke muimui he kau palōfitá mo e kau ʻaposetoló .
Fakaʻaliʻali ha ʻū tā ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá (hangē ko ia ʻoku ʻi he ngaahi makasini Ensign pe Liahona konifelenisí). Fai hoʻo fakamoʻoní, ko e kau tangatá ni kotoa ko e kau palōfita, kau tangata kikite, mo e kau tangata maʻu fakahā. Fakaafeʻi e kau finemuí ke nau hiki ha lisi ʻi he palakipoé ʻo e faleʻi naʻe fai ʻe he kau palōfita moʻuí (ʻomai ha tatau ʻo e ngaahi makasini konifelenisi lahi fakamuimuitahá ʻo e Ensign pe Liahoná ke tokoni ke nau manatuʻi). ʻOku tokoniʻi fēfē ʻa ʻenau moʻuí mo e moʻui ʻa honau fāmilí ʻe he muimui ki he faleʻi ko ʻení?
Tufa ki he finemui takitaha ha kiʻi laʻi kaati siʻisiʻi. Fakaafeʻi ʻa e kau finemuí ke nau lau ha taha ʻo e ngaahi lea fakamuimui taha ʻa Palesiteni Monisoní pea kumi ha sētesi te nau fie hiki ʻi he laʻi kātí ke nau ō mo ia ki ʻapi ʻo fokotuʻu ia ʻi honau lokí pe tauhi ʻi heʻenau ngaahi folofolá. Kole ange ke nau vahevahe ʻenau ngaahi sētesí mo fakamatalaʻi e ʻuhinga naʻa nau fili ai iá.
Huluʻi e vitiō “ʻOku Tau Fie maʻu ha Kau Palōfita Moʻui” pe lau fakataha e fanga kiʻi konga ʻo e lea ʻa ʻEletā David A. Bednar ko e “Kuo Fili ke Fakamoʻoni ki Hoku Huafá.” ʻE lava ke mou lau mo e vahe ko e “Kau Palōfitá” ʻi he Tuʻu Maʻu ʻi he Tuí. Fakaafeʻi ʻa e kau finemuí ke nau kumi pe ko e hā ʻoku mahuʻinga ai ke fakafanongo pea muimui ki he kau palōfita moʻuí. Kole ange ke nau vahevahe ʻa e meʻa ʻoku nau maʻú. Fakaafeʻi ʻa e kau finemuí ke nau vahevahe ʻenau fakamoʻoni ki he palōfitá.

2:45
Vahevahe ki he kalasí e lea ko ʻeni mei he lea ʻa Sisitā Carol F. McConkie ko e “Moʻui ʻo Fakatatau mo e Lea ʻa e Kau Palōfitá”: “Fakatatau ki he ngaahi tuʻunga moʻui ʻa e māmaní, ʻe malava ke ʻikai ongoongoa, hala fakapolitikale, pe taʻe tali fakasōsiale ʻa e muimui ia ki he palōfitá. Ka ʻoku tonu maʻu pē ʻa e muimui ʻi he palōfitá” (Ensign pe=Liahona, Nōvema 2014, 78). Ko e hā ha ngaahi ʻuhinga ʻoku ʻomi ʻe he kakaí ki he ʻikai ke nau muimui he palōfitá? Fakaafeʻi ʻa e kalasí ke nau fekumi ʻi he toenga ʻo e lea ʻa Sisitā MacConkie pe ko e lea ʻa ʻEletā Ronald A. Rasband “Ko e Tuʻu Fakataha mo e Kau Taki ʻo e Siasí” ki ha meʻa te nau vahevahe mo ha taha ʻokú ne feinga ke taʻofi kinautolu mei he muimui ki he palōfitá. Kole ange ke nau vahevahe ʻa e meʻa ʻoku nau maʻú.

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu ʻa e fie maʻu ke ʻi ai ha kau palōfita moʻuí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukauʻi pe ʻe anga fēfē haʻanau moʻui ʻaki e meʻa kuo nau ako ʻi he ʻaho ní. Kole ki hanau niʻihi tokosiʻi ke nau vahevahe e meʻa ʻoku nau ongoʻi ke nau fakahokó.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ‘Ekitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.