Te u lava fēfē ʻo ʻai ke mahuʻingamālie ange ʻeku lotú?

ʻOku ʻofa ʻa e Tamai Hēvaní ʻiate kitautolu mo finangalo ke tau fetuʻutaki mo Ia ʻi he lotú. Ko e taimi ʻoku tau lotu aí, ʻoku totonu ke tau fakahā ki he Tamai Hēvaní ʻa e meʻa ʻoku tau ongoʻi ʻi hotau lotó. ʻOku ʻikai totonu ke tau toutou lea ʻaki ha ngaahi foʻi lea pe ngaahi kupuʻi lea ʻoku taʻe ʻuhinga. Te tau lava ʻo ongoʻi ʻa e ofi mai ʻa ʻetau Tamai Hēvaní ʻi he lotu fakamātoato mo e ongoʻi moʻoni ʻi hotau lotó.

Teuteuʻi fakalaumālie koe

Ko e hā ha ngaahi aʻusia mahuʻinga kuó ke maʻu ʻi he lotú? Ko e hā naʻe akoʻi atu ʻe he ngaahi aʻusia ko ʻení ʻo kau ki he fetuʻutaki mo e Tamai Hēvaní? Ko e hā kuó ke fai ke ʻai hoʻo ngaahi lotú ke mahuʻingamālie angé?

Ko e fē ha taimi naʻá ke fakafanongo ai ki ha lotu ʻa e kau finemui ʻi hoʻo kalasí? Te ke tokoniʻi fēfē kinautolu ke mahuʻingamālie ange ʻenau ngaahi lotú? ʻE tokoniʻi fēfē kinautolu ʻe he mahino ʻoku nau maʻu ki he founga fetuʻutaki mo e Tamai Hēvaní he taimí ni pea mo e kahaʻú?

ʻI hoʻo teuteú, ako ʻi he faʻa lotu ʻa e ngaahi maʻuʻanga tokoni ko ʻení. Ko e hā te ke fie maʻu ke ʻilo ʻe he kau finemuí fekauʻaki mo e lotú?

Luke 22:41–42; Hilamani 10:5; T&F 46:30–31 (ʻOku totonu ke tau fekumi ki he finangalo ʻo e ʻOtuá ʻi heʻetau lotú)

3 Nīfai 14:7; T&F 9:7–8 (ʻOku totonu ke ō fakataha ʻa e lotú mo e ngāue faivelengá)

3 Nīfai 17–19 (ʻOku lotu ʻa Sīsū Kalaisi mo e kau Nīfaí mo akoʻi e lotú)

Molonai 10:3–5 (Lotu ʻi he tui, loto fakamātoato, mo e loto moʻoni)

Carol F. McConkie, “Ko e Holi Fakamātoato ʻo e Lotó,” Ensign pe Liahona, Nōvema 2016, 25-27

Juan A. Uceda, “ ʻOku Akoʻi Kitautolu ʻe he ʻEiki ko Sīsū Kalaisí ke tau Lotu,” Ensign pe Liahona, Nōvema 2016, 30–32

Ko e Fakahinohino ki he Ngaahi Folofolá, “Lotú”

David A. Bednar, “Kole ʻi he Tui,” Ensign pe Liahona, Mē 2008, 94–97

David A. Bednar, “Lotu Maʻu Ai Pē,” Ensign pe Liahona, Nōvema 2008, 41–44

“Lotú,” Tuʻu Maʻu ʻi he Tuí (2004), 107–112

Vitiō: “Daily Bread: Experience”

2:60

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoniki he ngaahi meʻa kuo nau aʻusia ʻi heʻenau fakahoko ʻa e ngaahi meʻa ne nau ako ʻi he lēsoni ʻoe uike kuo ʻosí. ʻE poupouʻi heni ʻa e ului fakatāutahá mo tokoniʻi ʻa e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Vahevahe e talanoa ʻi he lea ʻa ʻEletā Juan A. Uceda “ ʻOku Akoʻi Kitautolu ʻe he ʻEiki ko Sīsū Kalaisí ke tau Lotu.” Ko e hā e meʻa ne ako ʻe he kau finemuí mei he talanoá ni ne fuʻu ongo kiate kinautolu? Ko e hā ha ngaahi meʻa kehe kuó ke aʻusia pe ko e kau finemuí ʻi he lotú?
Hivaʻi pe lau fakakalasi ha ngaahi himi fekauʻaki mo e lotú (ngāue ʻaki ʻa e fakahokohoko fakamotuʻalea ʻi he ngataʻanga ʻo e tohi himí ki hono kumi e ngaahi himi ʻoku feʻungá). Ko e hā ʻoku ako ʻe he kau finemuí fekauʻaki mo e lotú mei he ngaahi himi ko ʻení?

Ako fakataha

ʻE tokoni ʻa e ʻekitivitī takitaha ko ʻeni ʻi laló ke mahino ki he kau finemuí e founga te nau lava ai ʻo ʻai ʻenau ngaahi lotú ke mahuʻingamālie angé. Muimui ʻi he ueʻi ʻa e Laumālié ʻo fili ha meʻa ʻe taha pe lahi ange ʻe tokoni lelei taha ki hoʻo kalasí:

Hiki e ngaahi hingoa ʻo e kau mēmipa ʻo e Toluʻi ʻOtuá ʻi he palakipoé. Fakaafeʻi e kau finemuí ke nau fakaʻaongaʻi e lea ʻa Sisitā Carol F. McConkie “Ko e Holi Fakamātoato ʻo e Lotó” ke lisi ʻa e founga ʻoku kau ai e Toluʻi ʻOtuá ʻi he taimi ʻoku tau lotu aí. Kole ange ki he kau finemuí ke nau kumi ha ngaahi tali ki he ngaahi fehuʻí ni mei he lea ʻa McConkie: “Ko e hā ʻoku tau lotu ai ki he Tamai Hēvaní? ʻOku ʻuhinga ki he hā ke lotu ʻi he huafa ʻo Sīsū Kalaisí? ʻOku tākiekina fēfē ʻe he Laumālie Māʻoniʻoní ʻetau lotú? Fakaafeʻi kinautolu ke faʻu ha lisi ʻo ha ngaahi meʻa te nau malava ʻo fai ke toe mahuʻingamālie ange ai ʻenau lotú. Te nau lava ʻo fakaʻaliʻali e ngaahi lisi ko ʻení ʻi honau ngaahi ʻapí pea fili ha meʻa ʻe taha ke fakatefito ai ʻenau tokangá he uike takitaha.
Fakaafeʻi e kau finemuí ke nau kumi ʻi he folofolá ha sīpinga ʻo e lotú ʻoku nau pehē ʻoku ueʻi fakalaumālie (kapau ʻe fie maʻu, fokotuʻu ke nau lau ʻa e ngaahi potufolofola ʻoku hiki atu ʻi he fokotuʻutuʻu ko ʻení), pe huluʻi e foʻi vitiō “Daily Bread: Experience.”Kole ange ke nau vahevahe e meʻa ne nau ʻilo mo ako fekauʻaki mo e lotú mei he sīpingá.

2:60
Vahe ki he finemui takitaha ha potufolofola fekauʻaki mo e lotú (hangē ko ia ʻoku fokotuʻu atu he fokotuʻutuʻu ko ʻení). Kole ki he kau finemuí ke nau hiki ha tefitoʻi moʻoni fekauʻaki mo e lotú ne nau ako mei heʻenau potufolofolá pea mo ha sīpinga ʻo e tefitoʻi moʻoni ko iá mei heʻenau moʻuí pe moʻui ʻa ha niʻihi kehe. Fakaafeʻi ke nau fevahevaheʻaki mo ha finemui kehe ʻi he kalasí e meʻa ne nau hikí. Ko e hā ha meʻa ne feakoʻaki ʻe he kau finemuí ʻe lava ʻo tokoni ke ʻai ʻenau ngaahi lotú ke toe mahuʻingamālie ange?
Tufa ki he finemui takitaha ha konga mei ha taha ʻo e ngaahi lea ʻa ʻEletā Tēvita W. Petinā ʻoku fokotuʻu atu ʻi he fokotuʻutuʻu ko ʻení. Fakaafeʻi e kau finemuí ke nau laineʻi ha naʻinaʻi naʻe fai ʻe ʻEletā Petinā ke tokoniʻi ai kitautolu ke tau ʻai ʻetau ngaahi lotú ke toe mahuʻingamālie ange. Kole ange ke nau vahevahe e meʻa ʻoku nau maʻú. Hili ia, pea fakaafeʻi kinautolu ke fakakaukauloto ʻoku nau akoʻi ha taha ke lotu. Ko e hā te nau akoʻí, pea ʻe anga fēfē haʻanau akoʻi ia? Fakakaukau ke fakafaivaʻi ha tūkunga akoʻi e ala fakahoko.
Vahevahe ʻa e vahe 17, 18, pe 19 ʻo e 3 Nīfaí ki he kau finemuí. Kole ki he kau finemuí ke nau lau ʻenau ngaahi kongá pea vahevahe e meʻa ʻoku nau ako kau ki he lotú mei he sīpinga mo e ngaahi akonaki ʻa Sīsū Kalaisí mo e ngaahi sīpinga ʻa ʻEne kau ākongá. Ko e hā te nau lava ʻo fai ke nau muimui ai ʻi he ngaahi sīpinga ko ʻení ʻi heʻenau ngaahi lotú?
Vahe ki he finemui takitaha ke ne ako ha taha ʻo e ngaahi tefitoʻi moʻoni ʻo e lotú ʻoku fakamatalaʻi ʻi he Tuʻu Maʻu ʻi he Tuí,peesi 107–112, pe ʻi he fakamatala fekauʻaki mo e lotú ʻi he Ko e Fakahinohino ki he Ngaahi Folofolá. Kole ki he kau finemuí ke nau akoʻi ki he kalasí e meʻa ʻoku nau akó. Poupouʻi ke nau vahevahe ha ngaahi sīpinga fakatāutaha ʻi he taimi ʻoku nau faiako aí.

Kole ki he kau finemuí ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu e founga ke ʻai ai ʻenau ngaahi lotú ke mahuʻingamālie angé? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:

Fokotuʻu ha taumuʻa pau ke fakatupulaki ʻaki ʻenau ngaahi lotu fakatāutahá.
Fakakakato ʻa e Tuí ʻi he ʻulungaanga mahuʻinga fika 1 he Fakalakalaka Fakatāutahá.

Vahevahe mo e kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.