Te u maʻu fēfē ha fakahā fakatāutahá?

ʻOku ʻi ai ʻetau totonu takitaha ki ha fakahā fakatāutaha ke tataki ʻetau moʻuí. Kuo pau ke tau teuteu ʻaki haʻatau moʻui taau, ako pea mo fakalaulauloto ki he folofolá kae lava ke tau maʻu ha fakahā fakatāutaha. Kapau te tau fekumi mo kole, ʻe fakahā mai ʻe he ʻOtuá Hono finangaló kiate kitautolu ʻi he Laumālie Māʻoniʻoní.

Teuteuʻi fakalaumālie koe

Te ke ʻilo fēfē ʻa e taimi kuó ke maʻu ai ha fakahā fakatāutahá? Kuo tāpuekina fēfē hoʻo moʻuí ʻi hoʻo ako ke fakatokangaʻi ʻa e fakahā fakatāutahá?

ʻOkú ke pehē ko e hā ʻoku mahuʻinga ai ke ako ʻe he kau finemui ʻi hoʻo kalasí ʻa e founga ke maʻu ai e fakahā fakatāutahá? Te ke tokoniʻi fēfē kinautolu ke nau ako ke fakatokangaʻi ʻa e fakahā fakatāutahá?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ʻokú ke ongoʻi ʻoku ueʻi koe ke ke vahevahe mo e kau finemuí?

1 Ngaahi Tuʻi 19:9–12; Hilamani 5:30; T&F 6:14–16, 23; 8:2–3; 11:12–14 (Ngaahi founga ʻoku folofola mai ai ʻa e Laumālié kiate kitautolú)

Sione 14:26–27 (ʻE lava ʻa e Laumālie Māʻoniʻoní ʻo tokoniʻi kitautolu ke tau manatuʻi e ngaahi meʻá mo ongoʻi nonga)

ʻEta 2–3 ;T&F 9:7–9 (Kuo pau ke ō fakataha e fakahā fakatāutahá ia mo ʻetau fakakaukaú mo ʻetau akó)

Ronald A. Rasband, “Tuku ke Taki ʻa e Laumālie Māʻoniʻoní,” Ensign pe Liahona, Mē 2017, 93–96

Henry B. Eyring, “Ko e Hokohoko ʻo e Fakahaá,” Ensign pe Liahona, Nōvema 2014, 70–73

Richard G. Scott, “Founga Hono Maʻu ʻo e Fakahaá mo e Tataki Fakalaumālie Ki Hoʻo Moʻui Fakatāutahá,” Ensign pe Liahona, Mē 2012, 45–47

“Ako ke ʻIloʻi e Ngaahi Ueʻi ʻa e Laumālié,” Malangaʻaki ʻEku Ongoongoleleí (1999), 111–13

“Fakahaá,” Tuʻu Maʻu ʻi he Tuí (2004), 21–26

Ongo vitiō: “Ko e Ngaahi Sīpinga ʻo e Māmá: Laumālie ʻo e Fakahaá,” “Ko e Fanongo ki Hono Leʻó”

3:6

4:2

“ʻOku Taki ʻa e Laumālié,” Ngaahi Himi, fika 73

Ko e faiako ‘i he founga ‘a e Fakamo‘uí

Naʻe fakaafeʻi ʻe he Fakamoʻuí ʻa kinautolu naʻe muimui ʻiate Iá ke nau ngāue ʻi he tui mo moʻui ʻaki ʻa e ngaahi moʻoni naʻá Ne akoʻí. Naʻá Ne nofotaha ʻi hono tokoniʻi Hono kau muimuí ke nau moʻui ʻaki e ongoongoleleí ʻaki e kotoa honau lotó ʻi hano ʻoange kiate kinautolu ha ngaahi aʻusia mahuʻinga ke nau ako ai. Te ke akoʻi fēfē ʻa e kau finemuí ke nau ngāue ʻi he tuí mo moʻui ʻaki ʻa e ngaahi moʻoni ʻoku nau akó?

Ngaahi ʻEkitivitī Felāveʻi mo e Toʻu Tupú

Palani ha ʻekitivitī Mutuale ʻe lava ʻo tokoni ki he kau finemuí ke fakaʻaongaʻi e meʻa naʻa nau ako ʻi he lēsoni ko ʻení.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e meʻa ne nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ai e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ʻo e uike ní:

Kole ki he kau finemuí ke nau lau pe hivaʻi ʻa e ngaahi veesi ʻe tolu ʻo e “ʻOku Taki ʻa e Laumālié” (Ngaahi Himi, fika 73) pea kumi e ngaahi foʻi lea ʻoku nau fakamatalaʻi e founga ʻoku folofola mai ai ʻa e Laumālie Māʻoniʻoní kiate kitautolú. Ko e hā ha ngaahi foʻi lea kehe ʻe niʻihi ʻe lava ke fakakaukauʻi ʻe he kau finemuí ʻoku nau fakamatalaʻi e founga ʻoku fetuʻutaki ai ʻa e Laumālie Māʻoniʻoní mo kitautolú?
Hiki ʻi he palakipoé “ʻOku ou ʻilo ʻoku ou maʻu ha fakahā fakatāutaha ʻi he taimi __________.” ʻEke ki he kau finemuí pe ʻe founga fēfē haʻanau fakakakato ʻa e sētesi ko ʻení. Fakaafeʻi ke nau hoko atu ʻo fakalaulauloto ki he fakamatala ko ʻení lolotonga e lēsoní pea kumi mo ha ngaahi tali kehe.

Ako fakataha

ʻE tokoni ʻa e ʻekitivitī takitaha ʻi laló ke mahino ki he kau finemuí e founga ke maʻu ai ʻa e fakahā fakatāutahá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

ʻAi ha kōlomu ʻe fā ʻi he palakipoé mo e ngaahi meʻa ʻe fā ʻi he lea ʻa ʻEleta Lānolo A. Lasipeni “Tuku ke Taki ʻa e Laumālie Māʻoniʻoní” ko e ngaahi ʻuluʻitohi. Toe vakaiʻi fakataha ʻa e konga takitaha, ʻo fakaafeʻi e kau finemuí ke nau hiki ʻi he ngaahi kōlomú ʻa e ngaahi meʻa ne fokotuʻu mai ʻe ʻEletā Lasipeni te nau lava ʻo fai ke maʻu ai ha fakahā fakataautaha. ʻOku ʻi ai ha taha ʻi homou uōtí ʻoku ngāue he tafaʻaki tokoni fakavavevavé, hangē ko e tāmate afí pe ʻōfisa polisi? Kapau ko ia, fakaafeʻi ia ke ne lea ki he kalasí fekauʻaki mo e ʻuhinga ʻo e hoko ko ha tokotaha ʻuluaki tokoni fakavavevave ʻi ha fakatuʻupakē fakafaitoʻo pe fakatamaki fakanatula. ʻOkú ne teuteu fēfē ke tali e ngaahi tūkunga ko ʻení? Kole ki he kau finemuí ke nau aleaʻi e meʻa ne nau ako mei he fealeleaʻaki ko ʻení fekauʻaki mo e founga ke hoko ai ko ha kau ʻuluaki tokoni fakalaumālie.
Mou lau fakataha e ʻuluaki palakalafi ʻe tolu ʻo e lea ʻa Palesiteni Henry B. Eyring “Ko e Hokohoko ʻo e Fakahaá.” Kole ki he kau finemuí ke nau lisi ha ngaahi tūkunga ne nau fie maʻu ai ha fakahā fakatāutahá pe ko ha taha ʻoku nau maheni. Fakaafeʻi ʻa e kau finemuí ke nau lau pe mamata ʻi ha konga ʻo e lea ʻa Palesiteni ʻAealingí pea vahevahe ʻa e meʻa ne nau akó. Fakaafeʻi ke nau fakalaulauloto ki he meʻa te nau fai ke maʻu ʻaki ha fakahā fakatāutahá.
Hiki ʻi he palakipoé ʻa e ngaahi fakamoʻoni fakafolofola ʻoku fokotuʻu atu ʻi he fokotuʻutuʻu ko ʻení. Kole ki he finemui takitaha ke ne lau ha taha ʻo kinautolu pea ʻai ke ʻiloʻi pe ko e hā ʻokú ne akoʻi mai fekauʻaki mo e founga te tau lava ai ʻo fetuʻutaki mo e Laumālie Māʻoniʻoní. ʻAi ke hiki ʻe he kau finemuí ʻi he palakipoé ʻa e meʻa ʻoku nau maʻú he tafaʻaki ʻo e fakamoʻoni fakafolofolá. Fakaafeʻi ke nau vahevahe ha faʻahinga meʻa ne nau aʻusia ʻa ia kuo folofola ange ai e Laumālie Māʻoniʻoní kiate kinautolu ʻi ha taha ʻo e ngaahi founga ko ʻení.
ʻAi ha tatau ʻo e saati ʻi he peesi 112 ʻo e Malangaʻaki ʻEku Ongoongoleleí maʻá e finemui takitaha. Fakaafeʻi ia ke ne toe fakamanatu ʻa e sātí mo hono ngaahi fakamatala ki he founga ʻoku tau fetuʻutaki ai mo e Laumālie Māʻoniʻoní. Fakaafeʻi e kau finemuí ke nau tohi fekauʻaki mo ha taimi ne nau maʻu ai ha taha ʻo e ngaahi ongo, ngaahi fakakaukau, pe ngaahi ueʻi ʻoku fakamatalaʻi ʻi he sātí. Fakaafeʻi hanau niʻihi tokosiʻi ke nau vahevahe e meʻa ne nau hikí ki he toenga ʻo e kalasí.
Huluʻi ʻa e foʻi vitiō “Ko e Fanongo ki Hono Leʻó,” pea kole ki he kau finemuí ke nau kumi ha ngaahi meʻa naʻe fai ʻe he toʻu tupu ʻi he foʻi vitiō ko ʻení ke teuteuʻi ai kinautolu ke maʻu ha fakahā fakatāutaha. Ko e hā ha niʻihi ʻo e ngaahi founga te tau lava ai ʻo teuteuʻi kitautolú? (vakai, 3 Nīfai 17:2–3; T&F 9:7–8). Poupouʻi e kau finemuí ke nau tali e ngaahi tukupā naʻe tali ʻe he toʻu tupu ʻi he vitioó, pea fakaafeʻi kinautolu ke nau vahevahe e meʻa ʻoku nau aʻusiá ʻi ha kalasi ʻi he kahaʻú.

4:2

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino lelei ange nai kiate kinautolu e founga ke maʻu ai e fakahā fakatāutahá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ʻení, te nau lava ʻo:

Fakakakato e meʻa ʻoku fie maʻu ke aʻusia fika 5 ʻi he tuʻunga ʻulungaanga mahuʻinga ʻo e Tauʻatāina ke Filí mo e ʻEkeʻi Meiate Kita e Meʻa ʻOkú te Fai pe Taʻe Faí ʻi he Fakalakalaka Fakatāutahá.
Hiki ha ngaahi ueʻi fakalaumālie pau pe ngaahi ongo ne nau maʻu ʻi he lolotonga ʻo e uiké pea ngāueʻi. Te nau lava ʻo hiki ʻi heʻenau tohinoá ʻa e meʻa naʻe hoko ʻi he taimi naʻa nau muimui ai ʻi he ngaahi ueʻí pea mo e ngaahi tāpuaki ne nau maʻú.

Vahevahe mo e kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.