Sau, Mulimuli Mai ia te A’u
Aisea e taua ai lou mauaina o se aoaoga ma atiina ae ni tomai?

Aisea e taua ai lou mauaina o se aoaoga ma atiina ae ni tomai?

O le aoaoga o se vaega taua o le fuafuaga a lo tatou Tama Faalelagi e fesoasoani ai ia i tatou ia sili atu ona avea faapei o Ia. O le mauaina o se aoaoga e saunia le malamalama ma tomai na e mafai ona fesoasoani ia i tatou e atiina ae ai le ola tutoatasi. O le aoaoga o le a saunia foi i tatou mo se auaunaga sili atu i o tatou aiga, Ekalesia, ma le lalolagi.

Saunia oe lava ia faaleagaga

Na faapefea ona fesoasoani lau aoaoga e saunia oe mo aafiaga o lou olaga? Na faapefea ona fesoasoani ia te oe ia sili atu le ola tutoatasi?

Aisea e taua ai mo tamaitai talavou ona maua se aoaoga? O le a so latou lagona e uiga i aoaoga? O le a faapefea e le aoaoga ma le atiina ae o tomai ona fesoasoani i tamaitai talavou i o latou matafaioi uma i le lumanai?

O a mau ma lauga o le a fesoasoani i tamaitai talavou e malamalama ai i le taua o se aoaoga?

Faataoto 4:7; 2 Nifae 9:29; MF&F 88:76–80, 118; 90:15; 93:36; 130:18–19 (E tatau ona tatou saili le atamai ma le poto)

Faataoto 31:10–31 (O se tina amio mama e saili le poto ma tomai e tausia ai lona auaiga ma le aiga)

Iosefa Samita—Talafaasolopito 1:11–17; 1 Nifae 11:1–6; MF&F 138:1–11 (O faataitaiga o tagata i tusitusiga paia na sailia le poto)

Mary N. Cook, “Saili le Aoaoina: O Loo I Ai Sa Outou Galuega e Fai,” Ensign po o le Liahona, Me 2012, 120–22

“A'oga,” Mo Le Malosi o le Autalavou (2011), 22–24

Aoao atu i le ala a le Faaola

Na faaaoga e le Faaola ia tusitusiga paia e aoao atu ai ma molimau atu e uiga i Lana misiona. Sa Ia aoaoina tagata e mafaufau e uiga i tusitusiga paia mo i latou lava ma faaaoga e sue ai tali i a latou lava fesili. O le a se mea e mafai ona e faia e uunaia ai tamaitai talavou e suesue ma mafaufau loloto i mau?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

  • Faitau faatasi o se vasega Mataupu Faavae ma Feagaiga 88:118, ma talanoaina pe aisea e avea ai le aoaoina o se mataupu faavae taua o le talalelei.

  • Valaaulia tamaitai talavou e vaai faalemafaufau faapea ua tau atu e se uo mai le lotu ia i latou o le a le toe aoga o ia, ma faamatala mai, “O le a ou faaipoipo i se aso, ma o lou toalua o le a tausia au, o le mea lea e le manaomia ai lou faaauau ona alu i le aoga.” O le a faapefea e tamaitai talavou ona fautuaina o ia e faaauau le finau mo se aoaoga? Fai ia i latou e tusi a latou tali i se fasi pepa. Ao mai pepa, ma faitau ma talanoaina tali ma le vasega. I le faaiuga o le vasega, tuu atu ia i latou le avanoa e faaopoopo ai i a latou tali e faatatau i mea na latou aoaoina i le taimi o le lesona.

Aoao faatasi

O gaoioiga taitasi o loo i lalo o le a fesoasoani i tamaitai talavou e malamalama ai i le taua o le aoaoga. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

  • Vaevae vaega o le lauga a Mary N. Cook “ Saili le Aoaoina: O Loo I Ai Sa Outou Galuega e Fai ” i tamaitai talavou, ma valaaulia i latou e faitau a latou vaega ma vase lalo o manatu e taua ia i latou. (e mafai foi ona latou matamata i se vitio o le lauga ma tusi i lalo ni manatu taua). Valaaulia i latou e faasoa mai manatu na latou vaseina i le vasega ma faamatala mai pe faapefea e la latou aoaoga ona faamanuiaina i latou ma o latou aiga i le lumanai.

  • Tofi tamaitai talavou e faitau taitoatasi se tasi o palakalafa e lima mai le vaega “A'oga” o Mo Le Malosi o le Autalavou po o le fuaitau mai ia Peresitene Gordon B. Hinckley ma Peresitene Thomas S. Monson i le amataga o le lauga “Saili le Aoaoina: O Loo I Ai Sa Outou Galuega e Fai.” Fai ia i latou e faamatala i le vasega mea na latou faitau i ai, ma talanoaina pe aisea e taua ai le galue ma le filiga nei ina ia maua se aoaoga lelei. Valaaulia tamaitai talavou e mafaufau ma faasoa mai a latou sini ina ia maua se aoaoga.

  • Vaevae le vasega i ni vaega se tolu. Fai i le vaega muamua e faitau Faataoto 31:10–31, fai i le vaega lona lua e faitau mau i lenei otootoga o loo aoao mai ai e tatau ona tatou saili i le atamai ma le poto, ae fai i le vaega lona tolu e faitau mau i lenei otootoga o loo tuuina mai ai faataitaiga o tagata na saili i le poto. Fai i vaega taitasi e talanoaina mea ua aoao mai e a latou mau atofaina ia i latou e uiga i le taua o le finau mo se aoaoga ma atiina ae ni tomai. Valaaulia vaega taitasi e faasoa mai i le vaega o totoe o le vasega mea na latou talanoaina. O le a faapefea e le mauaina o se aoaoga ona fesoasoani i tamaitai talavou i o latou olaga? O le a faapefea ona fesoasoani le aoaoga ia i latou ia avea ma ni ava ma ni tina e sili atu ona lelei?

  • Faatasi ai ma le faatagaga mai le epikopo, valaaulia ni nai tamaitai mai le uarota e faasoa mai pe faapefea e le mauaina o se aoaoga ona faamanuiaina i latou ma o latou aiga. Na faapefea ona fesoasoani le aoaoga ia i latou ia avea o ni tagata saofaga o le malo o le Atua? Fautuaina tamaitai talavou e fai mai soo sa latou fesili e uiga i le mauaina o se aoaoga.

Fai i tamaitai talavou e faasoa mai mea sa latou aoaoina i le aso. Pe ua latou malamalama i le taua o le mauaina o se aoaoga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.