E faapefea ona ou iloa pe ua amata ona ou liua?

O le liua o se faagasologa o le olaga atoa o le avea atili faapei o Keriso e ala i le Togiola a Iesu Keriso. E aofia ai se suiga e le gata i a tatou amio ae i o tatou manaoga, o tatou uiga, ma o tatou natura uma. O se suiga maoae lea na faatatau i ai le Alii o se toe fanauina ma se liuga tele o le loto (tagai Mosaea 27:25; Alema 5:14). E mafai ona tatou iloa pe ua amata ona tatou liua i le Alii pe a leai ni o tatou tuinanau mo le agasala, ua faatumulia i tatou i le alofa, ma ua tatou saili e faasoa atu le talalelei i isi.

Saunia oe lava ia faaleagaga

O a ni aafiaga na faateleina ai lou liua? O a suiga na e matauina i lou olaga ao e galue ma le filiga ina ia ola ai i le talalelei?

O le a se faamaoniga ua e vaaia o loo ua amata ona liua ia tamaitai talavou? O le a se mea e manaomia ona latou malamalama ai e uiga i le liua?

O a mau ma nisi punaoa o le a fesoasoani i tamaitai talavou ia iloa ai lo latou liua i le Alii?

Enosa 1:1–19, 26–27; Mosaea 5:1–5; 27:23–37; Alema 23:6–7; Helamana 3:35; 4 Nifae 1:1–4, 15 (Faataitaiga o le liua)

Linda K. Burton, “O Fafine Mausali,” Ensign po o le Liahona, Me 2017, 12–15

Bonnie L. Oscarson, “O Ou Talitonu Ea?” Ensign po o le Liahona, Me 2016, 87–89

David A. Bednar, “Faaliliuina i le Alii,” Ensign po o leLiahona, Nov. 2012, 106–9

“Liua,” Faamaoni i le Faatuatua (2004), 94–97

Vitio: “Faatalitali i lo Tatou Ala i Tamaseko”

Aoao atu i le ala a le Faaola

Na faatuatuaina e le Faaola Ona soo ma tuu atu ia tiutetauave taua e aoao atu, auauna atu, ma faamanuia i isi. O Lona faamoemoega o le fesoasoani ia i latou ina ia liua e ala i a latou auaunaga i isi. O a ni avanoa mo le auauna atu ma le tuputupu ae e mafai ona e saunia mo tamaitaii talavou o e aoaoina?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia ia tamaitai talavou e faia se lisi o mea na i ai se suiga i le aluga o taimi (e pei o le fatu na suia i se laau po o se roanu na suia i se lage). E faapefea ona latou faaaogaina nei mea e aoao atu ai isi e uiga i le liua?
Tusi le upu liua i le laupapa, ma valaaulia tamaitai talavou e saili mo upu ma fuaitau i le Mosaea 27:25–26 o le a fesoasoani ia i latou ia malamalama po o le a le liua. Valaaulia i latou e talanoaina po o a mea sa latou aoaoina e uiga i le liua mai nei upu ma fuaitau.

Aoao faatasi

O gaoioiga taitasi nei o le a fesoasoani i tamaitai talavou ia aoao e uiga i le liua ma le iloaina o faamaoniga o le liua o i latou lava. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

Valaaulia tamaitai talavou e saili i le lauga a Sister Linda K. Burton “O Fafine Mausali” e iloa ai le auala na ia faamatalaina ai “fafine mausali,” ma tusi mea na latou maua i luga o le laupapa. O a nisi mea e mafai ona tatou aoao e uiga i le auala e avea atili ai ma se soo o le Faaola mai i faataitaiga a fafine i le lauga a Sister Burton? Fai atu i tamaitai talavou e faamaea le “Gaoioiga o Uiga” i le Talai Lau Talalelei, itulau 126, ma iloilo poo o le a le lelei o loo latou atiaeina ai uiga faaKeriso. O a mea e mafai ona latou faia e avea ai ma “tamaitai mausali” o e o ni soo tuuto o Iesu Keriso?
I ni nai aso i luma mai, valaaulia se tamaitai talavou e sau saunia i le vasega e faasoa atu le aafiaga na maua e Michele Carnesecca ina ua mai tigaina lona atalii o Ethan, o loo maua i le saunoaga a Sister Bonnie L. Oscarson “O Ou Talitonu Ea?” Atonu e te tusia le fesili “Ou te talitonu ea pe leai?” i luga o le laupapa. Valaaulia le tamaitai talavou e mafaufau loloto i lenei fesili a o faitau e le vasega ia faamatalaga a Sister Oscarson o mea tatou te talitonu i ai. I le faaiuga o le vasega, tuu atu se avanoa i tamaitai talavou e faasoa mai ai molimau o aoaoga a le talalelei o loo i ai i totonu o lenei lauga ua latou talitonu ai. Na faapefea ona latou talitonu i nei mea mo i latou lava?
Valaaulia ia tamaitai talavou e filifili se tasi o lauga ua tuuina atu i le otootoga lenei, faitau se vaega o le lauga, ma faaaoga le faamatalaga mai le lauga e fatu ai ni pepa lautele o i ai se savali o le a taliina le fesili “E faapefea ona ou iloa pe ua amata ona ou liua?” Fai atu i tamaitai talavou e faaaoga a latou pepa lautele o i ai se savali ma lauga sa latou suesue i ai e aoao atu ai e le tasi le isi e uiga i le liua.
Valaaulia tamaitai talavou e suesue le “Liua” i le Faamaoni i le Faatuatua po o mau o i le otootoga lenei ma tusi se lisi o fesili e mafai ona latou fesiligia ai i latou lava e iloilo ai lo latou alualu i luma agai i le liua. Tuu atu se taimi mo tagata o le vasega e faasoa mai ai mea o le a latou faaaofiaina ia latou lisi ma le mafuaaga. Uunaia i latou e mafaufau loloto pe faapefea ona latou taliina nei fesili.
Faaali se tasi o vitio o lenei otootoga, ma valaaulia tamaitai talavou e faasoa mai mea sa latou aoaoina e uiga i le liua mai le vitio. Faamatala atu i tamaitai talavou ni aafiaga na fesoasoani ia te oe ina ia liua atili, ma valaaulia i latou e faasoa mai ni a latou foi aafiaga.

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? O latou malamalama i le auala e iloa ai le liua i o latou olaga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Filifili se mea faapitoa o le a latou faia e alualu ai i luma i o latou taumafaiga ina ia liua atili.
Tusi i totonu o a latou api talaaga ni o latou lagona e uiga i le mea o latou i ai i le taimi nei i le faagasologa o le liua. Ao latou mauaina aafiaga lea e faateleina ai lo latou liua, e mafai ona latou faamaumauina na foi aafiaga i totonu o a latou api talaaga.

Faasoa atu ma tamaitai talavou se mea o le a latou suesueina i le vaiaso e sosoo ai. O a ni o latou manatu ma fesili e uiga i lenei autu? O le a se mea e mafai ona latou faia e sauni ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso e sosoo ai.