Aisea e finagalo ai le Alii ina ia ou malosi ma maloloina?

O le soifua maloloina lelei o se vaega taua o le ola tutoatasi. O le puipuia o lo tatou ola maloloina o le a faatagaina i tatou e faataunuu lo tatou taunuuga paia ma sili atu ai ona lelei la tatou auauna atu i isi. O le ala tatou te tausia ai o tatou tino e aafia ai lo tatou ola maloloina faaleagaga ma lo tatou mafaia ona maua le taitaiga mai le Agaga Paia. Ina ia faasaoina lo tatou ola maloloina, e tatau ona tatou usiusitai i le Upu o le Poto, ai meaai lelei, faamalositino soo, ma ia lava le moe.

Saunia oe lava ia faaleagaga

Ua faapefea e le faatumauina o lou soifua maloloina ona faatagaina oe e auauna atu i le Alii ia sili atu le lelei? O a nisi faamanuiaga ua e maua a o e tauivi e ola i se olaga maloloina?

O a faaosoosoga o loo feagai ma tamaitai talavou e mafai ona faatamaia ai lo latou soifua maloloina? O a faamanuiaga o le a latou maua a o latou usiusitai i le tulafono a le Alii o le soifua maloloina?

O a mau ma isi punaoa o le a fesoasoani i tamaitai talavou e malamalama ai pe aisea e finagalo ai le Alii ia tatou ola maloloina?

1 Korinito 6:19 (O o tatou tino o malumalu o le Atua)

MF&F 88:124 (Taiala mo le tausia o o tatou tino ma mafaufau ia maloloina)

MF&F 89 (O Le Upu o le Poto)

Thomas S. Monson, “O Mataupu Faavae ma Folafolaga,” Ensign po o le Liahona, Nov. 2016, 78–79

Boyd K. Packer, “O Le Upu o le Poto: O Mataupu Faavae ma Folafolaga,” Liahona, Iulai 1996, 19–21

“Soifua Maloloina Faaletino ma le Faalelagona,” Mo Le Malosi o le Autalavou (2011), 25–27

Vitio: “O se Tausaga Fou 2010: Soifua Maloloina,”

7:29

Aoao atu i le ala a le Faaola

Na valaaulia e le Faaola i latou sa Ia aoaoina e faatino le faatuatua ma ola i upumoni na Ia aoaoina. E mafai faapefea ona e valaaulia tamaitai talavou o loo e aoaoina e faatino le faatuatua ma tausia o latou mafaufau ma tino ia maloloina? E mafai faapefea ona e uunaia i latou e saili manuia faaleagaga ma faaletino o le ola ai e pei ona poloaiina mai e le Alii?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faatutu faatasi mai se ata o se tamaitai talavou ma se ata o se malumalu. Fai i tamaitai talavou pe faapefea ona pei o latou tino o ni malumalu (tagai 1 Korinito 6:19). Valaaulia tamaitai talavou taitasi e talanoaina ma se isi tagata i le vasega pe aisea e taua ai le tausia o o tatou tino ma mafaufau ia mama ma maloloina.
Tusi i le laupapa “Aisea e finagalo ai le Alii ia tatou ola maloloina?” Valaaulia tamaitai talavou e faasoa mai ni tali ma vaai mo ni tali faaopoopo i le taimi atoa o le lesona.

Aoao faatasi

O gaoioiga taitasi nei o le a fesoasoani i tamaitai talavou e malamalama ai pe aisea e finagalo ai le Alii ia latou soifua maloloina. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

Valaaulia tamaitai talavou e fai ni lisi o mea o loo latou faia e tausia ai o latou mafaufau ma tino ia maloloina. Vaevae le vasega i ni vaega, ma tofi vaega taitasi e suesue se tasi o nei mau, vaai mo ni fautuaga e fesoasoani ia i latou e tausia ai o latou mafaufau ma tino ia maloloina: MF&F 88:124; MF&F 89:5–9; ma le MF&F 89:10–16 (afai latou te manaomia se fesoasoani e malamalama ai i le fautuaga i le MF&F 89, tagai Faamaoni i le Faatuatua,itulau 199–201). Tuu i vaega taitasi e lipoti mai mea ua latou maua. Fai i tamaitai talavou e iloilo a latou lisi ma filifili pe o i ai ni mea faaopoopo e mafai ona latou faia e faatumauina ai lo latou soifua maloloina. Valaaulia tamaitai talavou o e e fiafia e faasoa mai ni suiga ua latou fuafua o le a faamanuiaina ai i latou i le taimi nei ma le lumanai.
Afai e manaomia, iloilo faapuupuu le Upu o le Poto e faamautinoa ai ua malamalama tamaitai talavou i le fautuaga a le Alii e faatatau i le soifua maloloina faaletino. Tusi i le laupapa, “Aisea ua tuuina mai ai e le Alii ia i tatou le Upu o le Poto?” Fai i tamaitai talavou e fautuaina mai ni tali. Valaaulia tamaitai talavou e faitau MF&F 89:18–21 e sue ai folafolaga ua faia e le Alii ia i latou o e usiusitai i le Upu o le Poto. O faapefea ona faataunuuina nei folafolaga taitasi i o tatou olaga? (Afai e manaomia e i latou se fesoasoani e malamalama ai i nei folafolaga, fautuaina i latou e vaai i le faamatalaga a Peresitene Boyd K. Packer i lana lauga “O Le Upu o le Poto: O Mataupu Faavae ma Folafolaga”). Valaaulia i latou e faasoa mai a latou molimau i lenei aoaoga faavae po o faamanuiaga ua latou maua ona o le ola i le Upu o le Poto.
Faaali le vitio “O se Tausaga Fou 2010: Soifua Maloloina,” ma valaaulia tamaitai talavou e vaai mo ni mafuaaga e tatau ai ona tatou tausia o tatou tino ia maloloina—e aofia ai mafuaaga faaletino ma faaleagaga. Fai ia i latou e faasoa mai mea ua latou maua. I le avea ai ma se vaega o lenei talanoaga, mafaufau e faasoa atu lenei fuaitau mai ia Peresitene Boyd K. Packer: “E moni, o le Upu o le Poto sa tuuina mai ina ia tausia le vaega faalegaga faaeteete gata, ma ootia gofie o lou natura, i se mataala tatau. Ia a’oa’ e ‘faalogo’ i ou lagona. O le a taitaia oe ma lapataia ma aoaoina ma faamanuiaina.” (“O Le Upu o le Poto: O Mataupu Faavae ma Folafolaga,” Liahona, Iulai 1996). Na faapefea ona faataunuuina le folafolaga a Peresitene Packer i olaga o tamaitai talavou?

7:29
Valaaulia tamaitai talavou e faitau “Soifua Maloloina Faaletino ma le Faalelagona” i Mo Le Malosi o le Autalavou. Fai i ni tamaitai talavou e lisi i le laupapa ni nai aitema o fautuaga latou te maua, ma fai i isi e lisi ni faamanuiaga ua folafolaina ia i latou o e mulimuli i lenei fautuaga. Fai ia i latou e talanoaina pe faapefea e le ala latou te tausia ai o latou tino ona aafia ai o latou agaga. E mafai faapefea ona latou faaaogaina lisi i le laupapa e faamatala ai o latou tulaga faatauaina i uo o isi lotu?

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe ua latou malamalama pe aisea e finagalo ai le Alii ia latou soifua maloloina? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faamaumau a latou mea o loo ai mo se vaiaso ma iloilo pe o latou mulimuli i le fautuaga a le Alii e tusa ai ma le soifua maloloina faaletino.
Faatumu le galuega faatino mo le tulaga faatauaina o le Poto 3 i leAlualu i Luma o le Tagata Lava Ia.
Fuafua se gaoioiga a le Mutuale e aofia ai le faamalositino ma meaai maloloina.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.