Aisea e avea ai le galue ma se mataupu faavae taua o le talalelei?

Ua poloaiina i tatou e le Alii ia aua le paie. O le atiina ae o le mafai lea ona galue e fesoasoani ia i tatou e saofaga ai i le lalolagi o loo tatou nonofo ai. Na te aumaia se lagona o le faateleina o le taua o le tagata lava ia. Na te faamanuiaina i tatou ma o tatou aiga, mo le taimi nei faapea ma le lumanai.

Saunia oe lava ia faaleagaga

O le a le matafaioi na faia e le galue i lou olaga? Na faapefea ona faamanuiaina ai oe ma lou aiga, i le faaletino ma le faaleagaga?

Pe manatu tamaitai talavou o loo e aoaoina o le galue o se avanoa pe o se mea latou te mananao e aloese mai ai? E mafai faapefea ona e fesoasoani ia i latou ia iloa le tele o faamanuiaga o le galue ma atiina ae se manao ia galulue?

O a mau ma lauga o le a fesoasoani i tamaitai talavou e malamalama ai pe aisea ua avea ai le galue o se mataupu faavae taua o le talalelei?

Kenese 3:19; Kalatia 6:3–5; 1 Tesalonia 4:11; Mosaea 10:4–5 (Ua poloaiina i tatou ia galulue)

Faataoto 31:27; Alema 38:12; MF&F 58:27; 60:13; 75:29 (Aua le paie)

Mose 1:39 (O le galuega ma le mamalu o le Atua)

Dieter F. Uchtdorf, “O Mataupu Faavae e Lua mo Soo se Tamaoaiga,” Ensign po o le Liahona, Nov. 2009, 55–58

H. David Burton, “O Le Faamanuiaga o le Galue,” Liahona, Tes. 2009, 36–40

“ Galue ma le Faalagolago o le Tagata ia te Ia Lava, ” Mo Le Malosi o le Autalavou (2011), 40–41

Vitio: “Faigofie ona Faatonutonu”

3:41

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia tamaitai talavou e matamata le vitio “ Faigofie ona Faatonutonu” ma vaai mo faamanuiaga na e o mai faatasi ma le galue malosi. Fai i tamaitai talavou e talanoaina faamanuiaga ua latou mauaina ona o le galue malosi.

3:41
Valaaulia se tamaitai talavou e faasoa mai se taleni i le vasega ma faamatala mai le mea na ia faia e atiina ae ai lena taleni. O le a le mea na faaosofia ai o ia e galue malosi i lana taleni? Valaaulia isi i le vasega e faasoa mai ni aafiaga na na latou galulue ai e ausia se mea. Aisea e finagalo ai le Tama Faalelagi ia tatou aoao e galulue?

Aoao faatasi

O gaoioiga taitasi nei o le a fesoasoani i tamaitai talavou e aoao ai e uiga i le taua o le galue. I le mulimuli ai i le uunaiga a le Agaga, filifili se tasi pe sili atu e aoga mo lau vasega:

Tuu atu i tamaitai talavou taitasi se mau fesootai e uiga i le galue (e pei o na o loo lisiina atu i lenei otootoga). Fai ia te ia e faitau le mau ma mafaufau i se faataitaiga mai lona olaga po o le olaga o se isi tagata o loo faaalia mai ai le mataupu faavae o loo aoaoina mai i lana mau. Valaaulia tamaitai talavou e faasoa mai a latou mau ma ni faataitaiga na latou mafaufauina. Ua faapefea ona faamanuiaina e le galue o tatou olaga?
Tuu atu i tamaitai talavou taitasi se tasi o mau mai lenei otootoga, ma fai ia te ia e tusi se aotelega puupuu o le mau i se fasi pepa. Fai i tamaitai talavou e faapipii a latou aotelega i le laupapa. Tofi tamaitai talavou tasitasi i se mau e ese, ma valaaulia o ia e faitau i ai ma sue le aotelega i le laupapa e fetaui ma le mau. O a mea ua aoao e tamaitai talavou mai nei mau e uiga i le taua o le galue? E faapefea ona faamanuiaina tamaitai talavou ona o lo latou lava galulue malosi?
I le faaaogaina o le vaega “ Galue ma le Faalagolago o le Tagata ia te Ia Lava” i Mo Le Malosi o le Autalavou, o lauga o loo fautuaina atu i lenei otootoga, filifili fuaitau e uiga i le galue e te manatu o le a aoga i tamaitai talavou. Tuu i tamaitai talavou taitasi se kopi o se tasi o fuaitau. Valaaulia o ia e faitau le fuaitau le leoa ma faasolo atu i le tagata o loo la sosoo. Tuu atu i tamaitai talavou e faaauau seia faitau tagata uma i fuaitau taitasi. Tuu fuaitau i le laupapa, ma valaaulia tamaitai talavou taitasi e filifili se tasi e faapitoa lava le taua ia te ia ma faasoa mai pe aisea e taua ai ia te ia. O a ni mea ua latou aoao mai nei fuaitau e uiga i le taua o le galue? O le a faapefea e le aoaoina pe o le a le ala e galue ai ona faamanuiaina i latou ma o latou aiga, i le taimi nei ma i le lumanai?
Tuu atu i tamaitai talavou ni kopi o vaega talafeagai mai se tasi o lauga ua fautuaina atu i lenei otootoga. Valaaulia i latou e faitau taitoatasi vaega ma vase upu ma fuaitau o loo faamatalaina faamanuiaga e oo mai i le galue. Fai ia i latou e faasoa atu mea na latou vaseina i se isi tagata i le vasega. O a mea ua aoao e tamaitai talavou e uiga i le galue mai o latou aiga? O a galuega e mafai ona latou faia nei o le a faamanuiaina ai o latou lava aiga? E mafai faapefea e le aoaoina o le ala e galue ai nei ona fesoasoani ia i latou i le avea ai ma ni tina?

Fai i tamaitai talavou e faasoa mai mea sa latou aoaoina i le aso. Pe ua sili atu lo latou malamalama i le taua o le galue? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Fesoasoani atili i feau i le fale, fai se galuega faavaitaimi, pe ofo fua atu e galue i se faalapotopotoga auauna atu i le lotoifale.
Faatumu se tasi po o le sili atu o vaega nei i le Alualu i Luma o le Tagata Lava Ia: Galuega faatino o le tulaga faatauaina o le Poto 1, Galuega faatino o le tulaga faatauaina o le Filifiliga ma le Tali atu mo Au Lava5.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.