E mafai faapefea ona ou maua ni fofo i au luitau ma faafitauli?

O le ola tutoatasi e aofia ai le mafai ona maua fofo i o tatou lava faafitauli ma luitau. O le tele o nei fofo e maua i le talalelei toefuataiina a Iesu Keriso. E silafia e lo tatou Tama Faalelagi luitau tatou te feagai. E alofa o Ia ia i tatou ma e finagalo e fesoasoani ia i tatou. Etatau ona tatou tatalo mo le taitaiga a o tatou sailia tali i o tatou luitau i mau ma upu a perofeta ma aposetolo.

Saunia oe lava ia faaleagaga

Pe na faapefea ona saunia e le talalelei ni fofo ma faamafanafanaga i ou taimi faigata?

O a ni faigata po o luitau o fetaiai ma tamaitai talavou? O a luitau e ono fetaiai ma i latou i le lumanai? O a ni mataupu faavae o le talalelei o le a fesoasoani ia i latou ia taulimaina ma le lelei nei luitau?

O a mau ma isi punaoa o le a fesoasoani i tamaitai talavou e malamalama ai pe mafai faapefea ona fesoasoani le talalelei i luitau o le olaga?

Faataoto 3:5–6; Mataio 11:28–30; Mareko 4:36–39; Alema 7:11–13; Alema 37:35–37; 38:5 (Saili le fesoasoani a le Alii i luitau ma faafitauli)

Thomas S. Monson, “E Le Tuua Lava Na o i Tatou,” Ensign po o le Liahona, Nov. 2013, 121-24

Richard G. Scott, “Ia Avea le Faaaogaina o le Faatuatua ma Mea E Te Faamuamuaina,” Ensign po o le Liahona, Nov. 2014, 92–95

Jeffrey R. Holland, “Peiseai o se Ipu ua Nutililii,” Ensign po o le Liahona, Nov. 2013, 40-42

“Soifua Maloloina Faaletino ma le Faalelagona,” Mo Le Malosi o le Autalavou (2012), 25–27

Aoao atu i le ala a le Faaola

Sa aoao e le Faaola Ona Soo ia mafaufau i tusitusiga paia mo i latou lava ma faaaoga e sue ai tali i a latou lava fesili. E mafai faapefea ona e fesoasoani i tamaitai talavou ia liliu atu i tusitusiga paia ma upu a perofeta ao latou saili i tali o a latou luitau?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia ia tamaitai talavou e tau mai nisi o luitau po o faafitauli o feagai ma talavou latou te tupulaga, ma tusi a latou tali i le laupapa. Fai atu i tamaitai talavou e faailoa mai nisi o mea e le lelei pe le aoga e ono faia e le autalavou e taulima ai nei faafitauli. I le faasologa o le lesona, valaaulia ia tamaitai talavou e tagai mo ni auala o upumoni o le talalelei e mafai ona fesoasoani.
Faasoa atu se aafiaga mai lou lava olaga na saunia ai e le talalelei ni tali po o le fesoasoani mo se faafitauli faapitoa po o se luitau. Valaaulia tamaitai talavou e faasoa mai ni aafiaga faapena mai o latou lava olaga.

Aoao faatasi

O le a fesoasoani gaoioiga taitasi nei i tamaitai o le korama e iloa ai le ala e mafai ai ona maua ni fofo i a latou lava luitau. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Fai atu i tamaitai talavou e mafaufau i se luitau po o se faafitauli lea e ono feataiai ma tamaitai talavou i lenei vaitaimi. Fai atu ia i latou e saili i le faasino autu i le lomiga o le Liahona, o le konafesi sili ona lata mai e vaavaai ai mo ni autu lea e mafai ona foiaina lena faafitauli. Fai atu i ai e saili se tasi o lauga e faatatau i na autu ma faasoa atu ma le vasega se faamatalaga lea e mafai ona fesoasoani i se tamaitai talavou e foiaina ona luitau. Uunaia ia tamaitai talavou e faaaoga le faasino autu e saili ai se fesoasoani i a latou lava luitau.
Fai atu i tamaitai talavou e faitau parakalafa mulimuli e lua o le “Soifua Maloloina Faaletino ma Faalelagona” i le Mo le Malosi o le Autalavou ma tagai mo se fautuaga e mafai ona fesoasoani ia i latou po o tagata latou te iloa. O a nisi faataitaiga o “vaifofo maloloina” e tatau ona tatou sailia pe a i ai ni a tatou faafitauli? O a ni vaifofo o ofo mai e le talalelei a Iesu Keriso?
Faasoa atu le faamatalaga lenei mai ia Peresitene Thomas S. Monson: “Ou tuafafine pele, e alofa lo outou Tama Faalelagi ia te outou—outou taitoatasi. E le suia lava lena alofa. E le faatosinaina e ou foliga vaaia, o au meatotino, po o le tele o tupe o loo i ai i lau teugatupe i le faletupe. E le suia e au taleni ma tomai. Ua i ai lava iina. Ua i ai iina mo outou pe a outou faanoanoa pe fiafia, lotovaivai po o le tumu i le faamoemoe. Ua i ai le alofa o le Atua iina mo outou e tusa lava pe ua outou lagona lo outou manaomia pe leai foi se alofa. O loo i ai lava iina i taimi uma” (“E Le Tuua Lava Na O I Tatou,” Ensign po o le Liahona, Nov. 2013, 123–24). Fai atu i tamaitai talavou e faasoa mai ni aafiaga lea sa latou lagona ai le alofa o le Atua i le taimi o se luitau faigata. Fai atu i tamaitai talavou taitasi e faitau mai se tasi o mau mai lenei otootoga ma faasoa atu pe faapefea ona fesoasoani i se tasi o loo feagai ma se luitau po o se faafitauli o loo taatele i talavou i lenei vaitaimi. O le a le uiga o le ”talitonu i le Alii“ po o le o mai ia Keriso pe a tatou manaomia se fesoasoani? O i ai nisi mau e mafai ona mafaufau i ai tamaitai talavou lea e mafai ona fesoasoani i ni luitau po o ni faafitauli patino?
Fai atu i tamaitai talavou e mafaufau i se tagata latou te iloa o loo tauivi ma ni luitau o le mafaufau pe faalelagona? Tuu atu ia tofu tamaitai talavou ma se kopi o le lauga a Elder Jeffrey R. Holland “E Pei o se Ipu ua Nutililii.” Fai atu i ai e saili mo ni tali o lana fesili ”O le a se auala sili e te tali mai ai i ni luitau o le mafaufau po o le faalelagona o feagai ma oe po o i latou e te alofa i ai?“ Fai atu i tamaitai talavou e faasoa mai se mea sa latou aoaoina ma talanoa pe faapefea ona fesoasoani nei aoaoga i le tagata o loo latou mafaufau i ai.
Fai atu i tagata o le vasega e mafaufau i ni luitau po o ni faafitauli patino o loo feagai ma i latou. Lisi i luga o le laupapa ni meafaigaluega se fa na ta'ua e Elder Richard G. Scott i lana lauga “Ia Avea le Faaaogaina o le Faatuatua ma Mea E Te Faamuamuaina,” ma fai atu i tagata o le vasega e suesue i se tasi o meafaigaluega latou te lagona e mafai ona fesoasoani ia i latou ma o latou luitau. Valaaulia i latou e faasoa mai se mea sa latou aoaoina mai le fautuaga a Elder Scott.

Fai i tamaitai talavou e faasoa mai mea sa latou aoaoina i le aso. Pe o latou malamalama i le auala e saili ai vaifofo i luitau o le olaga i le talalelei a Iesu Keriso? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Suesue mau faatasi ma se fesili faapitoa po o se faafitauli i le mafaufau. Faamaumau i se api o talaaga uunaiga ma tali mai le Agaga.
Filifili se autu i le tamaitusi Mo Le Malosi o le Autalavou latou te mananao e faaleleia atili ai. Ia tausia se api o talaaga o a latou taumafaiga ma mea na faamanuiaina ai i le vaiaso a sau.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.