O le a le ala a le Alii mo le tausiaina o e matitiva ma e le tagolima?

Ina ua afio mai Iesu Keriso i le lalolagi, na Ia faaaluina le tele o Lana galuega talai i le tausia o e matitiva ma e le tagolima. E ala atu i Lana Ekalesia, ua saunia e le Alii se ala mo i tatou e tausia ai e le tagolima. Ua Ia finagalo ia i tatou e foai atu ma le agaalofa e tusa ai ma mea ua tatou maua mai ia te Ia. “O le ala a le Alii e tausia ai ē le tagolima e ese lava mai le ala a le lalolagi. Ua fetalai le Alii “E tatau ona faia i la’u lava ala.” E le gata ina gauai mai o Ia i o tatou manaoga vave; ae o loo Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva.” (Dieter F. Uchtdorf, “O Le Faia i le Ala a le Alii,” Ensign po o le Liahona, Nov. 2011, 54).

Saunia oe lava ia faaleagaga

Na faapefea ona e saili ia mulimuli i le faataitaiga a le Faaola i le tausiaina o isi? O a aafiaga e mafai ona e faasoa atu i tamaitai talavou?

O a mataupu faavae o le tausiaina i le ala o le Alii e tatau ona malamalama i ai tamaitai talavou? E faapefea i le malamalama i nei mataupu faavae ona fesoasoani ia i latou ina ia avea ma soo sili ona lelei a Keriso?

O a mau ma isi punaoa o le a fesoasoani i tamaitai talavou e malamalama ai pe faapefea ona tausia e le Alii e matitiva ma e le tagolima?

Isaia 58:6–11; Malaki 3:8–10; Mataio 25:35–40; MF&F 82:18–19 (Ala e tausia ai e matitiva)

Iakopo 1:27; Mosaea 18:27–28; MF&F 42:29–30 (O le taua o le tausia o e matitiva ma e le tagolima)

Alema 34:27–28; Mamona 8:35–37: MF&F 56:16–18; 70:14 (O le lapataiga a le Alii ia i latou e le tausia e matitiva)

MF&F 104:15–18 (Tausia o e matitiva i le ala a le Alii)

Patrick Kearon, “Sulufaiga mai le Afa,” Ensign po o le Liahona, Me 2016, 111–14

Linda K. Burton, “Sa Fai Au ma Tagata Ese,” Ensign po o le Liahona, Me 2016, 13–15

Jeffrey R. Holland, “Pe Le o i Tatou Uma Ea o Ni Tagata Aisi?” ” Ensign po o le Liahona, Nov. 2014, 40-42

“Taumafaiga a Tagata o le Ekalesia e Tausia e Matitiva ma e Le Tagolima ma Tuuina atu le Auaunaga,” Tusitaulima 2: Taitaiina o le Ekalesia (2010), 6.1.2

Vitio: “Sa Fai A’u ma Tagata Ese: Ia Outou Fealofani,” “When We Were Strangers,”

3:25

3:3

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faaali se tasi o vitio a le Ekalesia vitio o fesoasoaniga alofa, ma fesili i tamaitai talavou po o a mea na latou aoaoina e uiga i le fesoasoani i e matitiva ma e le tagolima mai le faataitaiga a le Ekalesia. Valaaulia i latou e faasoa mai ni aafiaga na latou maua a o fesoasoani atu i isi.
Fai i tamaitai talavou e lisi ni manaoga faaletino ma le faaleagaga atonu o loo i ai i se tagata.Tusi i le laupapa, “O le a le ala a le Alii mo le tausia o e matitiva ma e le tagolima?” Faasoa atu i tamaitai talavou le fuaitau mai ia Peresitene Dieter F. Uchtdorf i le amataga o lenei otootoga, ma fai i tamaitai talavou e faalogo mo ni tali i le fesili. Valaaulia i latou e faasoa mai ni mea na latou mauaina. E mafai faapefea ona tatou fesoasoani i e matitiva ma e le tagolima ina ia sili atu le ola tutoatasi?

Aoao faatasi

O gaoioiga taitasi nei o le a fesoasoani i tamaitai talavou ia aoao ai e uiga i le ala a le Alii i le tausiaina o e matitiva ma e le tagolima. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

I lana saunoaga “Sulufaiga mai le Afa,” Ua saunoa mai Elder Patrick Kearon, “O loo i ai se aofaiga e 60 miliona o tagata sulufai i le lalolagi i le aso. … E faateia le mafaufau ai i fuainumera ua aofia ai ma le mafaufau pe o le a le uiga o lenei mea i olaga o tagata taitoatasi.” Ina ia fesoasoani i tamaitai talavou ia nofouta ai i faalavelave tau tagata sulufai ma le auala e mafai ai ona latou fesoasoani, faaali atu ia i latou se tasi pe sili atu o vitio i lenei otootoga. O a ni o latou lagona e uiga i tofotofoga o loo feagai ma tagata sulufai? Atonu e te valaaulia tagata o le vasega i ni vaega toalaiti e iloilo le saunoaga a Elder Kearon po o le saunoaga a Sister Linda K. Burton “Sa Fai Au ma Tagata Ese,” ma vaavaai mo mea e mafai ai ona latou fesoasoani i tagata sulufai. Fesoasoani i tamaitai talavou e faia ni fuafuaga e faatino nei fautuaga.
Vaevae ia tamaitai talavou ia tofu paga. Tofi se tasi o tagata o paga taitasi e faitau mau e uiga i le taua o le tausia o e matitiva ma e le tagolima, ma tofi le isi e faitau mau lea e tuuina atu ni lapataiga ia i latou o e le tausia e matitiva ma e le tagolima (mo ni manatu, tagai i mau o loo fautuaina atu i lenei otootoga). Fai atu i tamaitai talavou e suesue i a latou mau fuaitau ona faasoa lea ma a latou paga mea sa latou aoaoina. Fesili atu ia i latou pe aisea e matua taua ai i le Tama Faalelagi le tausia o e matitiva ma e le tagolima. Fai atu i tamaitai talavou e talanoaina ni auala e mafai ona latou fesoasoani atu ai ia i latou o loo i ai manaoga i o latou aiga, uarota, ma le nuu.
Tuu atu i tagata o le vasega ni kopi o le lauga a Elder Jeffrey R. Holland “Pe Le o i Tatou Uma Ea o Ni Tagata Aisi?” Fai atu i tamaitai talavou taitoatasi e filifili se tasi o mau fuaitau na sii mai e Elder Holland e uiga i le fesoasoani atu i e matitiva ma e le tagolima. Fai atu i tamaitai talavou taitoatasi e faasoa mai se mau fuaitau sa ia filifilia ma po o le a uiga ia te ia. I le avea ma se vasega, toe iloilo le fautuaga a Elder Holland: ”Ou te le iloa tonu pe o le a se tulaga e tatau ona outou faataunuu ai a outou matafaioi ia i latou o e e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa faalesoo.“ Tuu atu i tagata o le vasega sina taimi e mafaufau ai i ni auala latou te lagona e finagalo ai le Atua ina ia latou tausia ai e matitiva ma e le tagolima. Valaaulia i latou e faasoa mai o latou lagona i le vasega.
Valaaulia se uso o le au epikopo e faasoa mai i tamaitai talavou ona lagona e uiga i le tausiaina o e matitiva ma le tagolima ma avanoa o maua e tamaitai talavou e fesoasoani atu ai i tagata o le uarota po o le nuu o loo i ai ni manaoga. E mafai foi ona ia talanoa i le auala o faaaoga ai tupe paia a le Ekalesia, e aofia ai le taulaga anapogi, foai agaalofa, ma foai i le Tupe Faaagaga mo Aoga (tagai Tusitaulima1: Peresitene o Siteki ma Epikopo [2010], 14.4). Mafaufau e faaaoga se taimi o le vasega e fuafua ai se gaoioiga auauna atu patino e faatatau i lenei talanoaga.

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe o latou malamalama i le uiga o le tausia o e le tagolima i le ala a le Alii? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Faatumu se tasi o vaega nei i le Alualu i Luma o le Tagata Lava Ia: Taua o le Tagata Lava Ia galuega faatino o le tulaga faatauaina 3 po o mea faatonuina e fai o le tulaga faatauaina o le Galuega Lelei 6.
Fai se faatinoga o le auaunaga mo se tasi e le tagolima.
Mulimuli i le fautuaga a Peresitene Thomas S. Monson ina ia “ tatalo mo musumusuga ia iloa manaoga o i latou o loo siomia ai i tatou… o atu lea ma tuuina atu le fesoasoani” (“Ia Mafuta le Atua ma Outou Seia Tatou Toe Feiloai,” Ensign po o le Liahona, Nov. 2012, 110).

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.