Tuanga 36
Te eeuanga tei orongaia mai na roto ia Iosepha Timeti te Peroveta, kia Edward Partridge, i vaitata i Fayette, New York, Titema 1830 (History of the Church, 1:131). (Akara ki te upoko o te Tuanga 35.) Kua karanga mai te Peroveta no runga ia Edward Partridge e “e tu akarongo meitaki tikai tona, e koia tetai tangata maata o te Atu” (History of the Church, 1:128).
1–3, Kua tuku te Atu i tona rima ki rungaʼo ia Edward Partridge na roto i te rima o Sydney Rigdon; 4–8, Ko te au tangata katoatoa tei ariki i te evangelia e te kautaunga, kia kapikiia ratou kia aere ei tutu i te evangelia.
1 Te na ko maira te tuatua a te Atu, ko te Atua, Tei Ririnui o Iseraela: I na, te karanga atu nei au kia koe, e taku tavini e Edward, kua akameitakiia koe, e kua akakoreia taau au ara, e kua kapikiia koe kia tutu i taku evangelia mei te reo o te pu ra;
2 E ka tuku au i toku rima ki rungaʼo ia koe na roto i te rima o taku tavini ko Sidney Rigdon, e ka rauka ia koe toku Vaerua, koia te Vaerua Tapu, koia katoa te Akapumaana, ko te ka apii ia koe i te au mea au o te basileia;
3 E ka akakite oki koe i te reira ma te reo maata, i te na ko anga e: Hosana, kia akameitakiia te ingoa o te Atua teitei roa.
4 E teianei ko teia te kapikianga e te akaueanga taku e oronga atu nei kia koe no runga i te au tangata ravarai—
5 E ko ratou ravarai te ka aere mai ki mua i taku nga tavini ko Sidney Rigdon e Iosepha Timeti, Tamaiti, ma te ariki i teia kapikianga e te akaueanga, ka akataongaia e ka tonoia atu kia tutu i te evangelia mutukore ki te au pa enua—
6 Ma te kapikianga atu kia tataraara, i te na ko anga e: E akaora ia kotou uaorai mei teia uki tangata maro, e aere mai ki vao mei roto i te aʼi, ma te makitakita i te au kakau topataia e te kiko o te kopapa.
7 E ka orongaia teia akaueanga ki te au ereta o taku akonoanga, e ko te au tangata katoatoa te ka ariki mai ma te ngakau okotai tikai, ka akataongaia ratou, e ka ungaia atu, mei taku rai i tuatua atu ana.
8 Ko Iesu Mesia au, te Tamaiti a te Atua; e no reira, e tatua i to kotou taukupu, e ka tae vave ua mai au ki toku iero. Koia ïa. Amene.