Tuanga 70
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 12 o Noema, 1831 (History of the Church, 1:235–237). Ko te akapapaanga tei tataia e te Peroveta, kua akakite mai te reira e e ā uipaanga mamaata tei raveia mei te rā 1 o Noema ki te rā 12. I te openga o teia au putuputuanga nei, ko te puapinga o te Puka o te au Akaueanga, tei kapikiia i muri mai e ko te Apiianga e te au Koreromoto, kua akarakaraia; e kua akatau oki te Peroveta i te reira e ko “te tango o te Akonoanga i teia au rā openga nei, e te puapinga katoa ki to te ao nei, i te akaarianga ki te tangata nei e kua oronga akaou ia mai te taviri o te au mea muna o te basileia o to tatou Akaora ki te tangata nei” (History of the Church, 1:235).
1–5, Kua ikiia tetai au tiaki ei nenei i te au eeuanga; 6–13, Ko tei angaanga i te pae vaerua, kua tano rai no ta ratou tutaki; 14–18, Kia aiteite te aronga tapu i roto i te au mea i te pae kopapa.
1 I na, e akarongo mai, e te au tangata o Ziona, ma te au tangata katoatoa o taku akonoanga tei te atea ke, e akarongo ki te tuatua a te Atu taku ka oronga atu ki taku tavini ko Iosepha Timeti, Tamaiti, e pera katoa ki taku tavini ko Martin Harris, e pera katoa ki taku tavini ko Oliver Cowdery, e pera katoa ki taku tavini ko John Whitmer, e pera katoa ki taku tavini ko Sidney Rigdon, e pera katoa oki ki taku tavini ko William W. Phelps, na roto i te akaueanga kia ratou.
2 E, te oronga atu nei oki au i tetai akaueanga kia ratou; no reira e ariu mai e akarongo, te tuatua maira te Atu kia ratou—
3 Kua iki oki au, ko te Atu, ia ratou, e kua akataonga ia ratou ei tiaki ki rungaʼo i te au eeuanga e te au akaueanga taku i oronga atu kia ratou, e taku katoa oki ka oronga atu kia ratou a muri ake;
4 E ka inangaro oki au i tetai akakiteanga no teia tuanga angaanga nei no ko mai ia ratou i te rā o te akavaanga.
5 No reira, kua akataka oki au kia ratou, e ko teia oki ta ratou angaanga i roto i te akonoanga a te Atua, kia akono i te reira e te au mea te ka piri atu, ae, e te puapinga te ka rauka mai.
6 No reira, e akaueanga taku e oronga atu kia ratou, kia kore oki ratou e oronga atu i teia au mea ki te akonoanga, e auraka katoa oki ki to te ao nei;
7 Kareka ra, me kua maata atu ta ratou ka rauka mai i tei anoanoia no ratou, ka oronga ua ia atu te reira ki roto i taku are vairanga;
8 E ko te puapinga, ka akatapuia te reira ki te iti tangata o Ziona, e ki to ratou uki katoa, mei te mea e ka riro mai ratou ei aronga tuanga kia tau ki te au ture o te basileia.
9 I na, ko ta te Atu teia i anoano i te au tangata tatakitai i roto i tana tuanga angaanga, mei taku oki ta te Atu i iki, me kore ra taku ka iki ki tetai uatu tangata.
10 E i na, kare rava oki e tangata tei matara mai mei raro i teia ture nei i roto i te akonoanga a te Atua ora;
11 Ae, kare oki te episekopo, e kare katoa te mata tei akono i te are vairanga o te Atu, e pera katoa oki aia ko tei ikiia ki tetai tuanga angaanga i te pae kopapa nei.
12 Ko tei ikiia oki ei rave i te au mea o te pae vaerua, kua tau oki aia ki tona tutaki, e pera katoa oki ki te aronga tei ikiia kia rave i te au mea o te kopapa nei;
13 Ae, e ka maata rava atu oki, ko tei akamaataia atu kia ratou na roto i te au akakiteanga a te Vaerua.
14 Kareka ra, i roto i ta kotou au mea o te kopapa nei ka aiteite kotou, e auraka ma te akamoupuku, ko te peke ke aea te au akakiteanga a te Vaerua.
15 E teianei, ko teia akaueanga taku e oronga atu nei ki taku au tavini, ka riro te reira ei meitaki no ratou uaorai me akono ua rai ratou, ei akauruanga o toku au akameitakianga ki rungaʼo i to ratou upoko, e ei tutaki no to ratou tu kauraro e kia tiaki ia ratou;
16 No te kai e te kakau katoa; ei ipukarea; no te are e no te enua, e noatu oki eaa te tu o taku ka akanoo ia ratou, e noatu oki e koea taku ta te Atu ka tono ia ratou.
17 Kua vai akarongo tikai oki ratou ki rungaʼo i tetai au mea e manganui, e kua rave meitaki tikai oki i te mea e kare oki i ara.
18 I na, e Atua aroa ua oki au, e ka akameitaki au ia ratou, e ka tomo oki ratou ki roto i te mataora o teia au mea nei. Koia ïa. Amene.