Tuanga 81
Te eeuanga tei orongaia mai na roto ia Iosepha Timeti te Peroveta, i Hiram, Ohio, Mati 1832 (History of the Church, 1:257–258). Kua ikiia a Frederick G. Williams ei taunga teitei e ei konitara i roto i te Ruru Peresideni Mua. Kua akaari mai te au tataanga tua e i te rauka mai anga teia eeuanga i roto ia Mati 1832, kua kapikiia a Jesse Gause ki te taonga konitara no Iosepha Timeti i roto i te Ruru Peresideni Mua. I na ra, kia kore aia e tinamou rai i te rave meitaki i tana angaanga, kua tukuia atu teia kapikianga i reira kia Frederick G. Williams. Ko teia eeuanga (tataia Mati 1832), kia akaraia ei takainga no te akatumuanga i te Ruru Peresideni Mua, i te akatakaanga tikai i te taonga o te konitara i roto i te reira e te akamāramaanga atu i te tu ngateitei o te reira angaanga. Kua tavini atu a Brother Gause no tetai tuatau, i na ra kua tipuia atu aia ki vao mei roto mai i te Akonoanga i roto ia Titema 1832. Kua akataongaia atu a Brother Williams ki teia taonga tei akatakaia mai i roto i te rā 18 o Mati, 1833.
1–2, Ka mouia ua rai te au taviri o te basileia e te Ruru Peresideni Mua; 3–7, Me e akarongo tikai a Frederick G. Williams i tana angaanga, ka rauka iaia te ora mutukore.
1 Tika, tika tikai taku e karanga atu kia koe e taku tavini e Frederick G. Williams: E akarongo ki te reo o tei tuatua mai, e ki te tuatua a te Atu ko toou Atua, ma te akarongo atu ki te kapikianga i kapikiiaʼi koe, kia riro oki koe ei taunga teitei i roto i taku akonoanga, e te konitara oki ki taku tavini ko Iosepha Timeti, Tamaiti;
2 Kua oronga atu oki au i te au taviri o te basileia kiaia, ko tei vai ua ana rai ki te Ruru Peresideni o te Kautaunga Teitei:
3 No reira, tika tikai, kua akakite oki au iaia, e ka akameitaki katoa iaia, e pera katoa koe, mei te mea e ka tu akarongo tikai koe i te ako i runga i te taonga taku i akataka ia koe, e kia pure putuputu, i te atea e i roto katoa i toou ngakau, i te ngai o te katoatoa e i te ngai muna, e i roto katoa i taau angaanga i te akakiteanga i te evangelia ki runga i te enua o te au mea e ora nei, e ki rotopu i toou au taeake.
4 E me rave koe i teia au mea nei, te rave ra koe i te mea maata rava atu ki toou au tangata tupu, e ka tauturu te reira i te akamata i te kakā ona ra, o toou Atu.
5 No reira, kia tu akarongo; e noo ki te taonga taku i akataka ia koe; e tauturu atu i tei apikepike, e akatu mai i te rima tei tautau ki raro, e ma te akamaroiroi atu i te au turi ru ua ra.
6 E me tu akarongo tikai koe e tae uatu ki te openga, ka rauka ia koe te korona o te kopapa mate kore, e te ora mutukore i roto i te nooanga taku i akonokono i roto i te ngutuare o taku Metua.
7 I na, e i na ra, ko teia oki te tuatua a te Alepha e te Omega, koia a Iesu Mesia. Amene.