1. E hoolohe mai oukou e na kanaka o Kuu Ekalesia, ka poe i haawi ia aku ai ke aupuni—e hoolohe mai oukou a e haliu mai ka pepeiao i ka Mea nana i hookumu i ka honua, ka Mea nana i hana i na lani a me na lehulehu a pau olaila, a ma Ona la i hana ia ai na mea a pau e ola nei, a e hele nei, a i loaa ke ola ana.

2. A eia hou, ke olelo aku nei Au, e hoolohe mai i Koʻu leo, o loaa oukou i ka make; iloko o ka hora a oukou e manao ole ai e hala ae ana ke kau mehana, a pau ae la ka ohi ana, a o ko oukou mau uhane aole i hoola ia.

3. E hoolohe ia Ia, ka Mea uwao me ka Makua, ka Mea e noi haahaa nei no ko oukou pono imua Ona,

4. I ka i ana, E ka Makua, e nana i na ehaeha a me ka make Ona, ka Mea i hana ole i kekahi hewa, ka Mea Au i olioli loa ai; e nana i ke koko o Kau Keiki i hookahe ia—ke koko Ona, ka Mea Au i haawi ai i hoonani ia ai Oe;

5. No ia mea, e ka Makua, e hoopakele ia lakou nei, Koʻu mau hoahanau i manaoio i Koʻu inoa, i hele mai ai lakou Ioʻu nei a loaa ke ola mau loa.

6. E hoolohe mai oukou, e na kanaka o Kuu Ekalesia, a o oukou, e na Lunakahiko, e hoolohe pu mai, a e hoolohe mai i Koʻu leo, oiai ka wa i kapa ia o keia la, a mai hoopaakiki i ko oukou mau naau,

7. No ka mea, he oiaio, ke olelo aku nei Au ia oukou, Owau no ka Alepa a me ka Omega, ka hoomaka ana a me ka hopena, ka malamalama a me ke ola o ke ao nei—ka malamalama e olino ana iloko o ka pouli a aole i hoomaopopo ka pouli ia mea.

8. Hiki mai la Au i Koʻu poe iho, aole nae i hookipa mai Koʻu poe iho Iaʻu; aka, i ka poe a pau i hookipa mai Iaʻu, haawi aku la Au i ka mana e hana i na hana mana he nui, a e lilo i mau keiki na ke Akua; a he oiaio, i ka poe i manaoio i Koʻu inoa i haawi aku ai Au i ka mana e loaa ke ola mau loa.

9. A pela no i hoouna aku ai Au i Kuu berita mau loa i ko ke ao nei, e lilo i malamalama i ko ke ao nei, a e lilo i kumu hoohalike no Koʻu poe kanaka a no ka poe Genetile e imi ai, a e lilo i elele imua o Koʻu alo e hoomakaukau i alanui imua Oʻu;

10. No ia mea, e hele mai oukou i ua mea la, a e kamailio ana Au ma ka noonoo kuhohonu me ka mea e hele mai ana, e like la me na kanaka i na la o ka wa kahiko, a e hoike aku no Au ia oukou i Koʻu noonoo kuhohonu ana,

11. No ia mea, e hoolohe like mai oukou a e ae mai Iaʻu e hoike aku ia mea ia oukou, oia hoi, i Koʻu naauao—ka naauao Ona, ka Mea a oukou e olelo nei Oia ke Akua o Enoka a me kona mau hoahanau,

12. Ka poe i hookaawale ia mai ka honua aku, a ua hookipa ia mai Ioʻu nei—he kulanakauhale i hookoe ia a i ka la o ka pono e hiki mai ai—he la hoi i imi nui ia e na kanaka hemolele a pau, a aole nae ia i loaa ia lakou mamuli o ka hewa a me na hana hoopailua;

13. A ae iho la, he poe malihini a he poe kuewa hoi lakou maluna o ka honua;

14. Aka, loaa iho la nae kekahi olelo-hoopomaikai e loaa ana ia lakou ia mea; a e ike ia mea ma ko lakou io.

15. No ia mea, e hoolohe, a e kamailio Au me ka noonoo kuhohonu me oukou, a e olelo aku no Au ia oukou a e wanana hoi e like me ia i na kanaka i na la o ka wa kahiko;

16. A e hoike moakaka aku no Au ia mea e like me Kaʻu i hoike aku ai ia mea i Kaʻu mau haumana i Koʻu wa e ku ana imua o lakou ma ka io, a olelo aku la ia lakou, i ka i ana, mamuli o ko oukou noi ana mai Iaʻu i na mea e pili ana i na hoailona o Koʻu hiki ana mai iloko o Koʻu nani iloko o na ao o ka lani, e hooko i na olelo-hoopomaikai Aʻu i hana ai me ko oukou mau kupuna,

17. Mamuli hoi o ko oukou nana ana maluna o ke kaawale loihi ana o ko oukou mau uhane mai ko oukou mau kino ae me he noho pio ana la, e hoike aku ana Au ia oukou i ke ano o ka hiki ana mai o ka la hoolapanai, a me ka hoihoi hou ia ana mai no hoi o ka Iseraela i hoopuehu ia.

18. A ano, ke ike nei oukou i keia halelaa, ka mea e ku nei ma Ierusalema, ka mea a oukou e kapa nei ka hale o ke Akua, a ke olelo nei ko oukou poe enemi aole loa e hiolo ana keia hale.

19. Aka, he oiaio, ke olelo aku nei Au ia oukou, e hiki mai ana ka hooneoneo ana maluna o keia hanauna, me he aihue la i ka po, a e luku ia keia poe kanaka a e hoopuehu ia mawaena o na lahuikanaka a pau.

20. A o keia halelaa a oukou e ike nei e hoohiolo ia ana ia ilalo a aole e koe ana kekahi pohaku maluna o kekahi.

21. A eia kekahi, aole e hala keia hanauna o ka poe Iudaio, a hooko ia kela a me keia hooneoneo ana Aʻu i hai aku ai ia oukou e pili ana ia lakou.

22. Ke olelo nei oukou ua ike oukou e hiki mai ana ka hopena o ke ao nei; a ke olelo nei no hoi oukou ua ike oukou e lilo ana na lani a me ka honua;

23. A ma keia ke olelo nei oukou me ka oiaio, no ka mea, pela io no; aka, o keia mau mea Aʻu i olelo aku ai ia oukou aole e lilo aku a hiki i ka hooko ia ana o na mea a pau,

24. A o keia Kaʻu i olelo aku ai ia oukou e pili ana ia Ierusalema, a i ka wa e hiki mai ai ua la la, e hoopuehu ia aku ke koena mawaena o na lahuikanaka a pau;

25. Aka, e houluulu hou ia ana auanei lakou, aka, e noho aku lakou pela a hiki i ka hooko ia ana o na manawa o ka poe Genetile.

26. A i kela la e lohe ia no na kaua a me na lono o na kaua, a e haunaele ana ka honua holookoa, a e paupauaho ana na naau o na kanaka, a e olelo lakou ke hookaulua nei o Kristo i Kona hiki ana mai a hiki i ka hopena o ka honua.

27. A e maalili auanei ke aloha o na kanaka a e nui ana ka hana hewa;

28. Aia a hiki mai na manawa o ka poe Genetile e puka mai ana kekahi malamalama mawaena o lakou, ka poe e noho ana iloko o ka pouli, a oia auanei ka piha ana o Kuu Euanelio;

29. Aka, aole lakou e hookipa ia mea, no ka mea, aole e hoomaopopo lakou i ka malamalama a e hoohuli aku lakou i ko lakou mau naau mai Oʻu aku mamuli o na ao ana a kanaka;

30. A iloko o ia hanauna e hooko ia ai na manawa o ka poe Genetile;

31. A e ku ana kekahi poe kanaka iloko o ia hanauna, e make ole ana, a hiki i ko lakou ike ana i kekahi hoopai e pahola ana, no ka mea, e uhi paapu ana kekahi mai hooneoneo i ka aina;

32. Aka, e ku ana Kaʻu poe haumana ma na wahi hemolele, a aole e hoonaueue ia; aka, mawaena o ka poe hewa, e hookiekie ana na kanaka i ko lakou mau leo, a hoino aku i ke Akua a make iho.

33. A e hiki mai no hoi na olai ma na wahi like ole, a e nui ana na hooneoneo ana; aka nae, e hoopaakiki ana na kanaka i ko lakou mau naau Iaʻu, a e hapai ana lakou i ka pahi-kaua e kue kekahi i kekahi, a e pepehi lakou kekahi i kekahi.

34. A, ano, i ka wa Aʻu, a ka Haku, i olelo aku ai i keia mau olelo i Kaʻu mau haumana ua pihoihoi lakou:

35. A olelo aku la Au ia lakou, mai pihoihoi oukou, no ka mea, i ka wa e hiki mai ai keia mau mea a pau, e ike oukou e hooko ia ana na olelo-hoopomaikai i olelo ia ia oukou;

36. Aia a hoomaka ka malamalama e poha mai, e like auanei ia mea ia lakou me he olelo-nane la Aʻu e hoike aku ai ia oukou:

37. E nana oukou a ike aku i na kumulaau fiku, a e ike oukou ia mau mea me ko oukou mau maka, a olelo oukou i ka wa o lakou e liko mai ai, a oi opiopio ko lakou mau lau, ua kokoke mai ke kau mehana;

38. Pela no auanei i kela la a lakou e ike ai i keia mau mea a pau, ia wa lakou e hoomaopopo ai ua kokoke mai ka hora.

39. A eia kekahi, o ka mea e makau Iaʻu e nana ana oia no ka la nui o ka Haku e hiki mai ai, he oiaio, no na hoailona o ka hiki ana mai o ke Keiki a ke Kanaka:

40. A e ike no auanei lakou i na hoailona a me na mea kamahao, no ka mea, e hoike ia ana ia mau mea ma na lani iluna, a ma ka honua ilalo;

41. A e ike no lakou i ke koko, a me ke ahi, a me na punohu uahi;

42. A mamua o ka hiki ana mai o ka la o ka Haku, e pouli auanei ka la, a e hoololi ia ka mahina i koko, a e haule na hoku mai ka lani mai;

43. A e houluulu ia ke koena iho ma keia wahi,

44. A ia manawa, e nana no lakou Noʻu, a aia hoi, e hiki mai no Au; a e ike mai no lakou Iaʻu ma na ao o ka lani, i hoaahu ia me ka mana a me ka nani nui, me na anela hemolele a pau; a o ka mea kiai ole Noʻu e oki ia aku no ia.

45. Aka, mamua o ka haule ana mai o ka lima o ka Haku, e puhi no kekahi anela i kana pu, a o ka Poe Hoano i hiamoe e hele mai no lakou e hui me Aʻu iloko o na ao;

46. No ia mea, ina ua hiamoe oukou iloko o ka maluhia, pomaikai no oukou, no ka mea, e like me oukou e ike mai nei Iaʻu ano a hoomaopopo Owau no ia, pela no auanei oukou e hele mai ai Ioʻu nei a e ola ko oukou mau uhane, a e piha pono ana ko oukou hoolapanai ia ana, a e hiki mai ka Poe Hoano mai na kihi eha mai o ka honua.

47. Ia manawa e haule mai ai ka lima o ka Haku maluna o na lahuikanaka,

48. Alaila, e keehi ka Haku i kona wawae maluna o keia mauna, a e owa no ia a kaawale, a e haalulu no ka honua, a e hikaka i o a ia nei, a e naueue no hoi na lani,

49. A e hoopuka no ka Haku i Kona leo, a e lohe no na welelau a pau o ka honua, a e kanikau na lahuikanaka o ka honua, a e ike na mea i akaaka i ko lakou lapuwale,

50. A e uhi ka popilikia maluna o ka mea hoomaewaewa, a e hoopau ia ka mea hoowahawaha, a o ka poe i nana aku no ka hewa e kua ia lakou ilalo a e kiloi ia aku iloko o ke ahi.

51. Ia manawa no e nana mai na Iudaio maluna Oʻu, me ka olelo ana. Heaha keia mau palapu ma Kou mau lima a me Kou mau wawae?

52. Alaila e hoomaopopo ai lakou Owau no ka Haku; no ka mea, e olelo aku ana Au ia lakou, O keia mau palapu oia na palapu Oʻu i hoeha ia ai ma ka hale o Koʻu mau hoaloha. Owau no Ia, ka Mea i hapai ia ae iluna. Owau no o Iesu ka Mea i kaulia ia. Owau no ke Keiki a ke Akua.

53. A ia wa e uwe lakou mamuli o ka lakou mau hana hewa; a, alaila lakou e uwe ai mamuli o ka lakou hoomaau ana i ko lakou Alii.

54. A, ia manawa, e hoolapanai ia na lahuikanaka pegana, a e loaa i ka poe i ike ole i ke kanawai ke ala mua ana; a e oluolu auanei ia ia lakou;

55. A e hoopaa ia o Satana i loaa ole ai ia ia he wahi iloko o na naau o na keiki a kanaka.

56. A i kela la, Iaʻu e hele mai ai iloko o Koʻu nani, e hooko ia ai ka olelo nane, ka mea Aʻu i olelo ai e pili ana i na wahine puupaa he umi;

57. No ka mea, o ka poe i naauao a i hookipa i ka oiaio, a i lawe i ka Uhane Hemolele i alakai no lakou, a aole hoi i puni wale; he oiaio, ke olelo aku nei Au ia oukou, aole loa lakou e kua ia ilalo a kiloi ia aku iloko o ke ahi, aka, e ku no ma kela la,

58. A e haawi ia aku ka honua ia lakou i hooilina; a e mahuahua a e ulu a ikaika no lakou, a e ulu ae ka lakou mau keiki me ka hewa ole a hiki i ka hoola ia ana.

59. No ka mea, e noho ka Haku mawaena o lakou, a e kau ana Kona nani maluna o lakou, a Oia no ko lakou Alii a me ko lakou Mea-kau-kanawai.

60. A ano, aia hoi, ke olelo aku nei Au ia oukou, aole e haawi ia aku ia oukou e hoomaopopo hou aku e pili ana i keia mokuna, a hiki i ka pau ana o ke Kauoha Hou i ka unuhi ia, a iloko o laila e hoike ia aku ai keia mau mea;

61. No ia mea, ke haawi aku nei Au ia oukou i hiki ai ia oukou ke unuhi ia mea i keia manawa, i makaukau ai oukou no na mea e hiki mai ana;

62. No ka mea, he oiaio, ke olelo aku nei Au ia oukou, ke kakali nei kekahi mau mea nui ia oukou;

63. Ke lohe nei oukou i na kaua ma na aina e, aka, aia hoi, ke olelo aku nei Au ia oukou, ua kokoke mai ia mau mea, he oiaio, aia i ko oukou mau ipuka, a aole e nui na makahiki mai neia wa aku e lohe no oukou no na kaua iloko o ko oukou mau aina ponoi.

64. No ia mea, ua olelo aku Au, ka Haku, e houluulu mai oukou mai na aina hikina mai, e hoakoakoa pu oukou ia oukou iho, e na Lunakahiko o Koʻu Ekalesia; e hele aku oukou i na aina komohana, e kahea i na kanaka e mihi, a ina e mihi lakou, e kukulu i mau apana o ka Ekalesia Noʻu;

65. A me ka naau hookahi, a me ka noonoo hookahi, e hoiliili mai i ko oukou mau waiwai i hiki ai ia oukou ke kuai i aina hooilina, ka mea e koho ia aku ana no oukou ma neia hope aku,

66. A e kapa ia ia ka Ierusalema Hou, he aina o ka maluhia, he kulanakauhale puuhonua, he wahi palekana no ka Poe Hoano o ke Akua Kiekie Loa;

67. A malaila auanei ka nani o ka Haku, a malaila pu no hoi ka weliweli o ka Haku, a hiki ole ai i ka poe hewa ke hele aku ia wahi, a e kapa ia ia o Ziona.

68. A e hiki mai no keia, o kela a me keia kanaka mawaena o ka poe hewa e lawe ole ana i kana pahikaua e kue i kona hoalauna, e pono oia ke holo aku i Ziona e pakele ai.

69. A e houluulu ia mai auanei ma ia wahi mai kela a me keia lahuikanaka mai malalo o ka lani, a oia wale no auanei ka poe kanaka e kaua ole ana kekahi i kekahi.

70. A e olelo ia mawaena o ka poe hewa, Mai pii kakou e kaua ia Ziona, no ka mea, he weliweli na kanaka o Ziona; no ia mea, aole hiki ia kakou ke ku.

71. A e hiki mai no keia e houluulu ia mai auanei ka poe pono maiwaena mai o na lahuikanaka a pau, a e hele mai i Ziona e mele ana i na mele o ka hauoli mau loa.

72. A ano, ke olelo aku nei Au ia oukou, e malama i keia mau mea mai ka laha ana aku i ko ke ao nei, a hiki i ka wa kupono iloko Oʻu e hooko ai oukou i keia hana imua o na maka o na kanaka, a imua o na maka o ko oukou poe enemi, i hoomaopopo ole ai lakou i ka oukou mau hana a hiki i ko oukou hooko ana i ka mea Aʻu i kauoha aku ai ia oukou;

73. A i ka wa e hoomaopopo ai lakou ia mea, e noonoo ai lakou i ua mau mea nei;

74. No ka mea, i ka wa e hoea mai ai ka Haku e lilo Oia i Mea weliweli ia lakou, a e loohia i ka makau, a e ku lakou ma kahi mamao aku a haalulu;

75. A e makau na lahuikanaka a pau mamuli o ka weliweli o ka Haku, a me ka mana o Kona ikaika. Pela io no. Amene.