1. He hana nui a kupaianaha i aneane e puka mai i na keiki a kanaka.

2. Aia hoi, Owau no ke Akua, a e hoolohe mai i Kaʻu olelo, ka mea ola a mana hoi, i oi aku ka oi i ko ka pahikaua oi-lua, i ka mahele ana i na ami a me ka lolo a kaawale; nolaila, e hoolohe i Kaʻu mau olelo.

3. Aia hoi, ua keokeo ka mahinaai a kupono e ohi ia, nolaila, o ka mea makemake e ohi, e hookomo aku oia i kona pahi-kakiwi me kona ikaika, a e ohi oi kau ka la, i hoahu ai oia no kona uhane i ke ola mau loa iloko o ke aupuni o ke Akua:

4. He oiaio, o ka mea e hookomo aku i kona pahi-kakiwi a ohi, oia ka i kahea ia e ke Akua;

5. Nolaila, ina e noi mai oe Iaʻu e loaa no ia oe; ina oe e kikeke e wehe ia no ia ia oe.

6. Ano, oiai ua noi mai oe, aia hoi, ke olelo aku nei Au ia oe, e malama i Kaʻu mau kauoha, a e imi e hoopuka mai a hookupaa i ka hana o Ziona,

7. Mai imi i ka waiwai, aka, i ka naauao, a aia hoi, o na mea pohihihi o ke Akua e wehe ia mai ia ia oe, a alaila e hoowaiwai ia oe. Aia hoi, o ka mea i loaa ke ola mau loa ua waiwai no ia.

8. He oiaio, he oiaio, ke olelo aku nei Au ia oe, oia hoi, e like me kau i makemake ai mai Oʻu aku nei, pela no e haawi ia aku ai ia oe; a ina e makemake oe, e lilo auanei oe i mea nana e hana i na hana maikai he nui iloko o keia hanauna.

9. Mai hai i kekahi mea, koe wale no o ka mihi, i keia hanauna: e malama i Kaʻu mau kauoha, a e kokua e hoopuka i Kaʻu hana, e like me Kaʻu mau kauoha, a e hoopomaikai ia oe.

10. Aia hoi, ua loaa ia oe he haawina, a pomaikai no oe ma o kou haawina la. E hoomanao he mea laa ia a ua hiki mai mailuna mai:

11. A ina e ninau aku oe, e ike auanei oe i na mea pohihihi i nui a kamahao; nolaila, e hoohana oe i kou haawina, i loaa ai ia oe na mea pohihihi, i hiki ai ia oe ke lawe mai i na poe he nui i ka ike ana i ka oiaio; he oiaio, e hoohuli a maopopo ia lakou ka hewa o ko lakou mau aoao.

12. Mai hoike aku i kou haawina i kekahi mea, koe wale no i ka poe a kou manaoio hookahi. Mai paani wale me na mea laahia.

13. Ina e hana oe i ka pono, ae, a e kupaa me ka manaoio a hiki i ka hopena, e hoola ia auanei oe iloko o ke aupuni o ke Akua, oia hoi ke pookela o na haawina a pau o ke Akua; no ka mea, aohe he haawina i oi aku mamua o ka haawina o ke ola mau loa.

14. He oiaio, he oiaio, ke olelo aku nei Au ia oe, ua pomaikai oe no ka mea au i hana ai, no ka mea, ua ninau mai oe Iaʻu, a aia hoi, e like me ka pinepine o kau ninau ana mai, ua loaa ia oe ke ao ana mai o Koʻu Uhane. Ina aole pela, ina aole oe i hiki mai i kahi au e ku nei i keia wa.

15. Aia hoi, ua ike oe ua ninau mai oe Iaʻu, a ua hoomalamalama aku Au i kou naau; a ano, ke hai aku nei Au ia oe i keia mau mea, i ike ai oe ua hoomalamalama ia oe e ka Uhane o ka oiaio;

16. He oiaio, ke hai aku nei Au ia oe, i ike ai oe aole mea e ae, o ke Akua wale no ka i ike i kou mau manao a me na iini o kou naau:

17. Ke hai aku nei Au ia oe i keia mau mea i mea hoike ia oe, o na olelo o ka mea [buke] au i kakau ai he oiaio no ia.

18. Nolaila, e hooikaika; e kakoo i Kaʻu kauwa ia Iosepa, me ke kupaa, iloko o kela a me keia nohona pilikia ana e komo ai no ko ka olelo pono.

19. E ao ia ia iloko o kona mau kinaunau, a loaa hoi ia oe ke ao ana mai ia ia mai. E hoomanawanui; e kuoo; e pakiko; e paa i ke ahonui, ka manaoio, ka manaolana a me ke aloha.

20. Aia hoi, o oe no o Oliva, a ua olelo aku Au ia oe mamuli o Kou mau makemake; nolaila, e hoahu ae i keia mau olelo iloko o kou naau. E kupaa a e hooikaika i ka malama ana i na kauoha a ke Akua, a e apo aku Au ia oe iloko o na lima o Koʻu aloha.

21. Aia hoi, Owau no o Iesu Kristo, ke Keiki a ke Akua. Owau no ka mea hookahi i hiki mai i Koʻu poe iho, aole nae Koʻu poe i hookipa mai Iaʻu. Owau no ka malamalama e olino ana iloko o ka pouli, aole nae i hoomaopopo ka pouli i ua mea nei.

22. He oiaio, he oiaio, ke olelo aku nei Au ia oe, ina makemake oe i hoike hou aku, e huli ae kou noonoo i ka po au i kahea mai ai Iaʻu iloko o kou naau, i ike ai oe e pili ana i ka oiaio o keia mau mea.

23. Aole anei Au i hai aku i mea e maluhia ai kou noonoo e pili ana i ua mea la? Heaha ka hoike i oi ae i hiki ke loaa ia oe, mamua o ka hoike mai ke Akua mai?

24. A ano, aia hoi, ua loaa ia oe he hoike, no ka mea, ina ua hai aku Au ia oe i kekahi mau mea a kekahi kanaka i ike ole ai, aole anei i loaa ia oe he hoike?

25. A, aia hoi, e haawi aku no Au ia oe he haawina, ke makemake oe mai Oʻu aku nei, e unuhi e like me Kaʻu kauwa, o Iosepa.

26. He oiaio, he oiaio, ke olelo aku nei Au ia oe, aia no kekahi mau mooolelo e paa ana i na mea he nui o Koʻu Euanelio, na mea i aua ia mamuli o ka hewa o na kanaka;

27. A ano, ke kauoha aku nei Au ia oe, ina he mau makemake pono kou—he makemake e hoahu ae i mau waiwai nou iloko o ka lani—alaila, e kokua oe i ka hoopuka ana mai i ke akea, ma o kou haawina la, i kela mau hapa o Kuu mau Palapala Hemolele i huna ia mamuli o ka hewa.

28. A ano, aia hoi, ke haawi aku nei Au ia oe, a i Kaʻu kauwa no hoi, ia Iosepa, i na ki o keia haawina, ka mea nana e hoopuka mai i keia hana o ka Oihanakahuna i ka malamalama, a ma o ka waha la o na mea hoike elua a ekolu paha e kukulu paa ia ai kela a me keia olelo.

29. He oiaio, he oiaio, ke olelo aku nei Au ia olua, ina e hoole lakou i Kaʻu mau olelo, a me keia hapa o Kuu Euanelio a hana o ka Oihanakahuna hoi, e pomaikai olua, no ka mea, aole hiki ia lakou ke hana i na mea ia olua a oi aku mamua o na mea i hana ia mai Iaʻu.

30. A ina hana lakou ia olua e like me ka lakou i hana mai ai Iaʻu, e pomaikai olua, no ka mea, e noho pu auanei olua me Aʻu iloko o ka nani;

31. Aka, ina aole lakou e hoole mai i Kaʻu mau olelo, na mea e hookupaa ia ana e ka hoike e haawi ia aku ana, e pomaikai lakou, alaila e loaa ia olua ka hauoli iloko o ka hua o ka olua mau hana.

32. He oiaio, he oiaio, ke olelo aku nei Au ia olua, e like me Kaʻu i olelo ai i Kaʻu mau haumana, ma kahi e halawai ai na mea elua a ekolu paha ma Koʻu inoa, e pili ana i kekahi mea hookahi, aia hoi, malaila pu no hoi Au iwaena o lakou, pela no hoi Au me olua.

33. Mai makau e hana i ka pono, e Kaʻu mau keiki, no ka mea, o kela a me keia a olua e lulu ai, oia no hoi ka olua e ohi ai; nolaila, ina e lulu olua i ka pono, e ohi no hoi olua i ka pono i uku no olua.

34. Nolaila, mai makau, e ka pu-a hipa uuku, e hana i ka pono; e kuu aku i ko ka honua a me ko ka po e hui kue mai ia olua, no ka mea, ina ua kukulu ia olua maluna o Koʻu pohaku, aole lakou e lanakila mai ana.

35. Aia hoi, aole Oʻu hoahewa ia olua, o hele olua a mai hana hewa hou aku, e hana me ke kuoo i ka hana Aʻu i kauoha aku ai ia olua;

36. E nana mai Iaʻu ma kela a me keia manao; mai kanalua, mai makau;

37. E nana mai i na palapu i hou ia ai Koʻu aoao, a i na puka kui iloko o Koʻu mau lima a me na wawae; e kupaa, e malama i Kaʻu mau kauoha, a e loaa ia olua ke aupuni o ka lani. Amene.