1. He oiaio, penei ka Haku e olelo mai nei, e hiki mai ana keia, o kela a me keia kanaka e haalele ana i kona mau hewa a hele mai Ioʻu nei, a kahea mai ma Koʻu inoa, a hoolohe i Koʻu leo, a malama i Kaʻu mau kauoha, e ike ana oia i Kuu maka a hoomaopopo Owau no ia,

2. A Owau no ka malamalama oiaio e hoomalamalama ana i kela a me keia kanaka e hiki mai ana iloko o ke ao nei;

3. A Owau no iloko o ka Makua, a o ka Makua iloko Oʻu, a o ka Makua a me Aʻu he hookahi Maua:

4. O ka Makua, no ka mea, haawi mai la Oia Iaʻu i kekahi o Kona piha, a o ke Keiki hoi, no ka mea, iloko Au o ke ao nei a lawe iho la i ka io i hale Noʻu, a noho iho la iwaena o na keiki a kanaka.

5. Iloko no Au o ke ao nei a loaa mai la Iaʻu kekahi mea no Koʻu Makua mai, a ua hoike maopopo ia mai la Kana mau hana;

6. A ike aku la o Ioane a hooiaio mai la no ka piha o Koʻu nani, a e hoike ia aku ana ma keia hope aku ka piha o ka Ioane hoike:

7. A hoike mai la oia me ka olelo ana, ike aku la au i Kona nani a i kinohi no Oia mamua aku o ke ao nei;

8. Nolaila, i kinohi ka Olelo, no ka mea, oia no ka Olelo, oia hoi, ka elele o ka hoola ana,

9. Ka malamalama a me ka Hoolapanai o ko ke ao nei; ka Uhane o ka oiaio, ka mea i hele mai i ke ao nei, no ka mea, ua hana ia ke ao nei e Ia, a iloko Ona ke ola o na kanaka a me ka malamalama o na kanaka.

10. Ua hana ia na ao e Ia: ua hana ia na kanaka e Ia: ua hana ia na mea a pau e Ia, a ma Ona la, a Nana mai.

11. A ke hoike aku nei au, o Ioane, ike aku la au i Kona nani, oia no ka nani o ke Keiki Hanaukahi a ka Makua, i piha i ke aloha a me ka oiaio, oia hoi ka Uhane o ka oiaio, ka mea i hele mai a noho iloko o ka io, a noho iwaena o kakou.

12. A ike aku la au, o Ioane, aole i loaa mai ia Ia ka piha i kinohi, aka, loaa aku la ke aloha no ke aloha:

13. A aole i loaa mai ia Ia kekahi o ka piha i kinohi, aka, hoomau aku la mai ke aloha a i ke aloha, a hiki i ka loaa ana ia Ia he piha.

14. A pela iho la i kapa ia ai Oia ke Keiki a ke Akua, no ka mea, aole i loaa mai ia Ia kekahi o ka piha i kinohi.

15. A ke hoike aku nei au, o Ioane, aia hoi, hoohamama ia ae la na lani, a iho mai la ka Uhane Hemolele maluna iho Ona, ma ke ano o ka manu nunu la, a noho iho la maluna Ona, a poha mai la he leo mailoko mai o ka lani e i ana, O Kaʻu Keiki punahele keia.

16. A ke hoike aku nei au, o Ioane, loaa mai la ia Ia he piha o ka nani o ka Makua;

17. A loaa mai la ia Ia ka mana a pau, ma ka lani a ma ka honua pu, a me Ia no ka nani o ka Makua, no ka mea, noho iho la Oia iloko Ona.

18. A e hiki mai ana keia, ina e hooikaika a kupaa oe e loaa auanei ia oe ka piha o ka hoike a Ioane.

19. Ke haawi nei Au i keia mau olelo ia oe i hoomaopopo a ike ai oe i ke ano o ka hoomana ana, a ike hoi i kau mea e hoomana nei, i hele mai ai oe i ka Makua ma Koʻu inoa, a i ka wa pono e loaa kekahi o Kona piha,

20. No ka mea, ina e malama oe i Kaʻu mau kauoha, e loaa ia oe kekahi o Kona piha, a e hoonani ia iloko Oʻu e like me Aʻu iloko o ka Makua; nolaila, ke olelo aku nei Au ia oe, e loaa ana ia oe he aloha no ke aloha.

21. A ano, he oiaio, ke olelo aku nei Au ia oe, i kinohi no Au me ka Makua, a Owau no ka Hanaumua;

22. A o ka poe a pau i hanau ia ma Oʻu nei he poe loaa pu lakou o ka nani o ua mea hookahi la, a o lakou ka Ekalesia o ka Hanau-mua.

23. I kinohi no hoi oukou me ka Makua; o ka mea he Uhane, oia hoi ka Uhane o ka oiaio,

24. A o ka oiaio oia ka ike ana i na mea e like me ia e ku nei i keia wa, a me ia i ku ai i ka wa i hala, a me ia e ku aku ana auanei;

25. A o kela a me keia mea i oi aku a emi mai paha i keia, o ka uhane ia o kela mea hewa loa, ka mea wahahee mai kinohi mai.

26. O ka Uhane o ka oiaio no ke Akua mai ia. Owau no ka Uhane o ka oiaio, a hoike mai la o Ioane Noʻu, i ka i ana—Loaa mai la ia Ia he piha o ka oiaio, ae, o ka oiaio a pau,

27. A aole he kanaka e loaa ana he piha, ke ole oia e malama i Kana mau kauoha.

28. O ka mea e malama ana i Kana mau kauoha e loaa ia ia ka oiaio a me ka malamalama, a hiki i kona hoonani ia ana iloko o ka oiaio a hoomaopopo i na mea a pau.

29. I kinohi no hoi ke kanaka me ke Akua. O ka ike, a i ole, ka malamalama o ka oiaio, aole ia i hookumu ia, a i ole, i hana ia, a aole hoi hiki ke hana ia.

30. Ua kuokoa ka oiaio a pau ma kela wahi a ke Akua i waiho ai ia mea, e hana nona iho, e like hoi me ka ike a pau, ina aole pela aohe kekahi mea.

31. Aia hoi, eia ko kanaka mana koho, a eia ka hoahewa ia ana o kanaka, no ka mea, o ka mea mai kinohi mai ua hoike maopopo lea ia mai ia lakou, a aole nae lakou i hookipa mai i ka malamalama.

32. O kela a me keia kanaka nona ka uhane e hookipa ole ana i ka malamalama, aia oia malalo o ka hoahewa ia ana,

33. No ka mea, he uhane ke kanaka. He mau loa na kumupaa, a o ka uhane a me ke kumupaa i hui pu a hiki ole ke hookaawale ia, e loaa no ka piha o ka hauoli;

34. A i ka wa e kaawale ai aole e hiki i ke kanaka ke loaa ka piha o ka hauoli.

35. O na kumupaa ka hale o ke Akua; he oiaio, o ke kanaka ka hale o ke Akua, oia hoi, na luakini, a o kela a me keia luakini i hoohaumia ia, e hoopau auanei ke Akua i ua luakini la.

36. O ka nani o ke Akua ka naauao, a i ole, ma kekahi olelo ana, ka malamalama a me ka oiaio;

37. Ke haalele nei ka malamalama a me ka oiaio i kela mea ino loa.

38. He hala ole kela a me keia uhane o kanaka i kinohi, a mamuli o ko ke Akua hoolapanai ana i ke kanaka mai ka haule ana mai, ua lilo hou na kanaka ma ko lakou kulana pepe, he hala ole imua o ke Akua.

39. A hele mai la ua mea hewa loa la a lawe aku la i ka malamalama a me ka oiaio mai na keiki a kanaka aku, mamuli o ka hoolohe ole, a mamuli hoi o na kaao kahiko o ko lakou mau kupuna.

40. Aka, ua kauoha aku Au ia oukou e malama i ka oukou mau keiki iloko o ka malamalama a me ka oiaio;

41. Aka, he oiaio, ke olelo aku nei Au ia oe, e Kuu kauwa, e Federika G. Wiliama, ua hoomau aku oe malalo o keia hoahewa ana;

42. Aole oe i ao aku i kau poe keiki i ka malamalama a me ka oiaio, e like me na kauoha, a he mana ko kela mea hewa loa maluna ou a hiki i keia wa, a o keia ke kumu o kou popilikia.

43. A ano, he kanawai Kaʻu e haawi aku nei ia oe, ina e makemake oe e hoopakele ia, e hooponopono oe i kou hale ponoi, no ka mea, he nui na mea i pono ole iloko o kou hale.

44. He oiaio, ke olelo aku nei Au i Kuu kauwa, ia Sidane Rigedona, ma kekahi mau mea aole oia i malama i na kauoha e pili ana i kana poe keiki; nolaila, o ka mea mua e hooponopono oe i kou hale.

45. He oiaio, ke olelo aku nei Au i Kuu kauwa, ia Iosepa Kamika, opio, a i ole, ma kekahi olelo ana, e kapa aku Au ia oukou he mau hoaloha, no ka mea, o oukou no Koʻu poe hoaloha, a e loaa ana ia oukou he hooilina pu me Aʻu.

46. Kapa aku la Au ia oukou he poe kauwa no ka pono o ko ke ao nei, a o oukou ka lakou poe kauwa no Koʻu pono;

47. A ano, he oiaio, ke olelo aku nei Au ia Iosepa Kamika, opio, aole oe i malama i na kauoha, a he mea pono ke ao ikaika ia oe imua o ka Haku.

48. He mea pono maoli i kou ohana e mihi a haalele i kekahi mau mea, a malama me ka ikaika i kau mau olelo, i ole e hoonee ia aku mai ko lakou wahi ae.

49. O ka mea Aʻu e olelo aku nei i ka mea hookahi, oia Kaʻu e olelo aku nei i ka poe a pau; e pule mau, o loaa auanei i kela mea hewa loa ka mana iloko ou a hoonee aku ia oe mai kou wahi ae.

50. He mea pono maoli no Kuu kauwa, o Nuela K. Witine, he Bihopa no hoi no Kuu Ekalesia, e ao ikaika ia e pono ai a e hooponopono i kona ohana, a e ike e oi aku ana ko lakou makaala a hoihoi ma na mea o ka home, a e pule mau, i ole e hoonee ia ae auanei lakou mai ko lakou wahi ae.

51. Ano, ke olelo aku nei Au ia oukou, e Oʻu mau hoaloha, e hookuu aku i Kuu kauwa, ia Sidane Rigedona, e hele ma kana huakai hele, a e hele awiwi, a e hai aku no hoi i ka makahiki ku i ke apono ia o ka Haku, a i ka Euanelio o ka hoola ana, e like me ka olelo ana Aʻu e haawi aku ai, a ma o ka oukou pule la o ka manaoio me ka ae lokahi ana e kakoo no Au ia ia.

52. E hele aku no hoi Kaʻu mau kauwa, o Iosepa Kamika, opio, a me Federika G. Wiliama me ka awiwi, a e haawi ia no ia ia laua e like me ka pule o ka manaoio, a ina e malama oe i Kaʻu mau olelo, aole oe e hoopilihua ia ma keia ao, aole hoi ma ke ao e hiki mai ana.

53. A he oiaio, ke olelo aku nei Au ia oe, o Koʻu makemake ia e awiwi oe i ka unuhi ana i Kaʻu mau Palapala Hemolele, a e imi a loaa ka ike e pili ana no ka mooolelo, a no na aina, a no na aupuni, no na kanawai o ke Akua a me kanaka, a o keia a pau no ka hoola ia ana o Ziona. Amene.