Seksen 61
Revelesen i go long Profet Joseph Smith, long arere bilong wara Missouri, McIlwaine’s Bend, long 2 Ogas 1831. Long raun bilong ol i go bek long Kirtland, Profet wantaim ol tenpela elda i pul long kanu i go daun long wara Missouri River. Long nambatri de bilong raun bilong ol, ol i painim planti samting nogut. Elda William W. Phelps, long wanpela driman long san, lukim devel ron wantaim pawa antap long wara.
1–12, Bikpela i tokaut pinis long planti bagarap bai kamap antap long ol wara; 13–22, Jon i bin tok nogutim pinis ol dispela wara, na satan i save ron antap long ol dispela wara; 23–29, Sampela i gat pawa long bosim ol wara; 30–35, Ol elda i mas raun tupela tupela na autim toktok long gospel; 36–39, Ol i mas redi long kam bilong Pikinini Man bilong Man.
1 Lukim, na harim gut long nek bilong em husat i gat olgeta pawa, husat i stap oltaim oltaim i go yet long oltaim oltaim, olsem tu Alpa na Omega, long stat na long pinis.
2 Lukim, tru olsem Bikpela i tokim yupela, o yupela ol elda bilong sios bilong mi, husat i bung antap long dispela hap, husat mi fogivim ol sin bilong yupela, long wanem mi, Bikpela, i save fogivim ol sin, na mi man bilong marimari long husat ol lain i tok sori long ol sin bilong ol wantaim bel bilong daun pasin;
3 Tasol tru mi tokim yupela, olsem em i nogat nid olsem olgeta dispela grup bilong ol elda bilong mi long raun kwiktaim antap long ol wara, taim ol lain long tupela sait i wok long dai long sin.
4 Tasol, mi bin larim olsem yupela inap tokaut; lukim, i gat planti samting nogut i ken kamap antap long ol wara, na moa yet long bihain taim;
5 Bikos mi, Bikpela, bin tokaut pinis long kros bilong mi planti bagarap bai kamap antap long ol wara; tru, na moa yet antap long ol dispela wara.
6 Tasol, olgeta samting i stap long han bilong mi, na em husat i bihainim tru namel long yupela bai no inap dai long ol dispela wara.
7 Olsem na, em i gutpela olsem wokman bilong mi Sidney Gilbert na wokman bilong mi William W. Phelps hariap na statim wok na misin bilong tupela.
8 Tasol, mi no inap long larim olsem yupela bai mas noken lusim ples inap yupela i kisim pen long ol sin bilong yupela, olsem yupela bai bung wantaim, olsem yupela bai no inap long dai long taim yupela i stap long pasin bilong sin.
9 Tasol nau, tru mi tok, em i gutpela long mi olsem yupela i mas go. Olsem na larim ol wokman bilong mi Sidney Gilbert na William W. Phelps go wantaim ol lain ol i bin raun wantaim pastaim, na larim ol statim raun bilong ol kwiktaim olsem bai ol inap wokim misin wok bilong ol, na wantaim feit ol i bai kamap gut;
10 Na inap olsem ol i bihainim tru Bikpela bai lukautim ol, na mi, Bikpela, bai stap wantaim ol.
11 Na larim ol narapela lain kisim ol wanem klos ol i bai nidim.
12 Larim wokman bilong mi Sidney Gilbert kisim ol dispela samting ol narapela i no nidim, olsem ol bai wanbel.
13 Na nau, lukim, long gutpela bilong yu mi givim yu wanpela komanmen long ol dispela samting; na mi, Bikpela, bai stretim tok wantaim yu wankain olsem ol manmeri bilong taim bipo.
14 Lukim, mi, Bikpela, long stat bilong dispela ples graun i bin blesim ol dispela wara; tasol long ol las de, long maus bilong wokman bilong mi Jon, mi bin mekim tok nogut long ol dispela wara.
15 Olsem na, ol dispela de bai kam taim nogat man bai stap seif antap long ol wara.
16 Na ol bai tok long ol de bihain olsem nogat man bai inap long go long graun long Zion antap long ol wara, tasol em husat i stap wantaim stretpela pasin long bel.
17 Na, olsem mi, Bikpela, long stat bilong dispela graun bin mekim tok nogut long en, olsem tu long ol dispela las de mi bin blesim dispela ples graun, long taim bilong en, long gutpela bilong ol seint bilong mi, olsem bai gutpela bilong dispela ples graun bai bilong ol.
18 Na nau mi givim long yupela wanpela komanmen olsem wanem samting mi tokim wanpela em mi tokim yupela olgeta, olsem yupela bai inap long givim tok lukaut long ol brata bilong yupela long ol dispela wara, olsem bai ol i no ken kam antap long ol dispela wara taim ol i raun, nogut feit bilong ol bai pinis na satan bai traim ol;
19 Mi, Bikpela, i bin tokaut, olsem satan bai raun antap long ol dispela wara, na mi i no kisim bek dispela tokaut.
20 Mi, Bikpela, i bin kros long yupela aste, tasol tede kros bilong mi i pinis.
21 Olsem na, ol dispela lain mi wok long toktok long ol, larim ol dispela lain bai statim kwik raun bilong ol—gen mi tokim yu, larim ol statim kwik raun bilong ol.
22 Na em i no bikpela samting long mi, bihain long liklik taim, sapos ol i wokim misin bilong ol, sapos ol i go long wara o long graun; larim dispela bai stap olsem i ken kamap klia long ol olsem long jasmen bilong ol long bihain taim.
23 Na nau, long ol wokman bilong mi, Sidney Rigdon, Joseph Smith Jnr., na Oliver Cowdery, larim ol i mas noken raun gen antap long wara, inap tasol olsem ol i raun antap long baret wara, taim ol i raun i go long ol haus bilong ol; o long tok narapela wei ol i mas noken raun antap long ol wara long mekim raun bilong ol, inap tasol antap long ol baret wara.
24 Lukim, mi, Bikpela, bin makim wanpela wei bilong ol seint bilong mi long raun; na lukim dispela em i wei—olsem taim ol lusim baret wara ol bai raun long graun, inap olsem ol i kisim oda long raun na go antap long graun long Zion;
25 Na ol bai wokim olsem ol pikinini bilong Isrel, putim ol haus sel bilong ol long wokabaut bilong ol.
26 Na, lukim, yupela bai givim dispela komanmen long ol brata bilong yupela.
27 Tasol, long em husat Bikpela bai givim pawa long givim oda long ol wara, long em Spirit i givim save long olgeta wei bilong God;
28 Olsem na, larim em wokim wanem Spirit bilong God i stap laip i tokim em, sapos antap long graun o antap long wara, olsem Bikpela bai wokim long bihain taim.
29 Na long yupela Bikpela i tokaut long rot bilong ol seint, o wei bilong ol seint bilong kem bilong Bikpela, long raun.
30 Na gen, tru mi tokim yupela, ol wokman bilong mi, Sidney Rigdon, Joseph Smith Jnr., na Oliver Cowdery, bai ol i no inap opim maus bilong ol long ol kongrigesen bilong ol lain nogut inap ol i kamap long ples Cincinnati;
31 Na long dispela ples ol bai i mas litimapim nek bilong ol long God agensim ol dispela lain, tru, long em husat kros bilong em agensim pasin nogut bilong ol, ol dispela lain husat i wok long kamap mau long kisim bagarap.
32 Na long hap larim ol raun bikos long ol kongrigesen bilong ol brata bilong ol, long wanem nau tu ol memba laikim wok bilong ol long namel long ol na i no namel long ol kongrigesen bilong ol lain nogut.
33 Na nau, long ol narapela lain, larim ol raun na tokaut long gospel bilong mi namel long ol kongrigesen bilong ol lain nogut, inap olsem Bikpela i tokim ol long givim;
34 Na inap olsem ol i wokim dispela ol bai fri long ol kolos bilong ol dispela lain, na ol bai nogat doti long ai bilong mi.
35 Na larim ol raun wantaim, o tupela tupela, olsem i luk gut long ol, tasol larim wokman bilong mi Reynolds Cahoon, and wokman bilong mi Samuel H. Smith, bai wok wantaim bikos mi hamamas long tupela, inap ol i go bek long ples bilong tupela, na dispela em i wanpela bikpela samting long mi.
36 Na nau, tru mi tokim yupela, na wanem samting mi tokim wanpela mi tokim yupela olgeta, yupela i mas hamamas, liklik pikinini; long wanem mi stap namel long yupela, na mi no lusim yupela;
37 Na inap olsem yupela i daunim yupela yet long ai bilong mi, ol blesing bilong kingdom ol i bilong yupela.
38 Yupela mas redi na kirap i go na was gut na tingting bilong yu i mas klia, was stap long taim bilong Pikinini Man bilong Man bai kam gen, long wanem em bai kam long kain aua yupela i ting nogat.
39 Beten olgeta taim, nogut yu go insait long temtesen nogut, olsem yu bai stap long dispela de bilong kambek bilong em, sapos long laip o long dai. Em tasol. Amen.