Isrel, Isrel, God I Singaot

Elda Jefri R. Holan

Blong Kworom blong Olgeta Twelef Aposol

Welkam long divosen brodkas ia, long weaples yu stap long hem long bigbigfala naes Jos ia. Tangkyu long tingting blong yufala evriwan blong kam, mo tu, yufala we i stap ia tedei long Diksti Kolej kampas long homtaon blong mi.

I Bin Gat Plante Singaot blong Man I Aot long Babilon

Blong invaetem Spirit blong Lod blong stap wetem yumi, mi nao mi bin askem hym ia we yumi statem miting ia wetem: “Isrel, Isrel, God I Singaot.” Hem i wan long ol bigfala hym blong Restoresen mo i givim fas toktok long wanem mi wantem talem long yufala tunaet. Yumi save ademap tu “Yufala ol Elda blong Isrel” from semfala stamba tingting ia. Mi lavem blong harem ol misinari raon long wol oli singaot strong, “O Babilon, O Babilon, O Tata long yu; mifala i go stap long hil blong Ifrem.”¹ Mesej blong ol hym ia i kolosap semmak nomo—se, oltaem God i stap singaot long ol pikinini blong Isrel blong go long wan ples we, long en, bae evri samting i oraet.

Isrel, Isrel, God i singaot,
Long yu long ol nogud ples.
Babilon i stap folfoldaon;
God i brekem ol taoa bl’hem. …
Kam long Saeon, kam long Saeon,
Mo stap glad long ples blong hem. …
Kam long Saeon, kam long Saeon!
Bae Saeon i sing ol pres.2

Wanem we i stap, hemia i bin histri blong Isrel i kam kasem tedei. Taem ol samting oli go we i gat tumas sin, o, i gat tumas korapsen insaed long sosaeti, o, laef wetem ol Jentael i stap spolem ol standet blong gud fasin mo ol komanmen we God i bin givim, nao bae God i sendem ol pikinini blong kavenan blong oli ronwe i go long nara ples mo stanemap Saeon mo statem evri samting bakegen.

Long ol taem blong OlTesteman, Ebraham, papa blong kaen kavenan ia, i mas ronwe, blong sevem laef blong hem, aot long Koldia—we i Babilon—blong gat wan gud laef long Kenan (we naoia yumi save olsem Holi Lan). ³ Sam jeneresen nomo i pas, nao ol laen blong Ebraham (mo afta, Aesak mo Jekob)—we oli save gud olgeta olsem ol man Isrel—oli lusum Saeon blong olgeta mo oli prisena long wan Ijip we i no gat man Isrel. ⁴ Mekem se Moses i mas kam antap blong lidim ol pikinini blong promes i go long wan nara ples bakegen—!tetaem ia long medelnaet mo tetaem ia ating bred blong olgeta i no gat taem blong solap! “Isrel, Isrel, God i toktok.” Yes, oli bin singsing hemia long wei blong ol. “Harem bigfala voes blong Man we I Mekem Yumi Fri!” ⁵

Sam handred yia i pas, wan stori we i yumi intres long hem i stat, taem wan long ol famle blong ol man Isrel ia, we wan profet we nem blong hem Lihae i lidim, i kasem oda blong ronwe long Jerusalem ia we oli laekem, from se, sore tumas, Babilon i stap long doa bakegen. ⁶ Ale, wan moa taem bakegen! Oli no bin save nating se oli stap go long wan niufala graon blong stanemap wan niufala kaen Saeon; ⁷ be i bin olsem; mo oli no bin save nating se i bin hapen olsem finis wetem wan grup blong ol bubu blong olgeta we oli singaotem olgeta, ol man blong Jared. ⁸

Olsem we mi bin talem, hemia i wan wol brodkas we i go long wan intanasonol Jos we i stap gro, be, hem i long intres blong evriwan we oli stap selebretem Restoresen blong save se olgeta blong bifo we oli tekova long Amerika, oli wan grup blong ol pipol we oli bin ronwe long homples blong olgeta blong save wosip olsem we oli wantem. Wan dokta blong Yurop we i go stap long Amerika, i talem se eksperiens ia i olsem “misin blong Ol Kristin man long ples we i no gat man,” o hadwok blong ol man Isrel blong tedei blong oli kam fri long Olfala Wol we i no gat God, mo afta, oli stap lukaotem bakegen ol wei blong heven insaed long wan niu kantri. ⁹

Be, blong tunaet, bae mi mekem yufala i tingbaot wan las ronwe; ronwe ia we hym blong yumi tunaet i stap tokbaot. Hem i jos blong yumi, we ol profet blong yumi oli lidim, mo i bin stap lidim ol bubu blong yumi we oli folem relijin. Wetem Josef Smit we oli stap ronemaot mo spolem hem raon long ol stet blong Niu Yok, Pensilvania, Ohaeo, mo Misuri, mo laswan long Ilinoa we oli kilimded hem, yumi stap luk bakegen long taem blong yumi, wanem i bin hapen long ol pikinini blong Isrel we oli stap lukaotem bakegen wan ples blong stap olgetawan. Brigham Yang, Moses blong Amerika, olsem we oli bin singaotem hem, i bin lidim olgeta Sent long ol vale blong ol hil taem olgeta Sent we oli taed oli bin stap singsing:

Bae yumi faenem ples we God i bin rere long yumi,
Longwe i stap long Wes,
Ples we i no gat man i mekem nogud o mekem man i fraet;
Ples ia, ol Sent bae oli kasem blesing. 10

Saeon. Promes graon. Niu Jerusalem. Hem i stap wea? Yumi no save stret, be bae yumi faenem. Blong moa long 4 taosen yia blong kavenan histri, hemia i bin paten we i stap: Ronwe mo lukaotem ples. Ron mo stap long nara ples. Ronwe long Babilon. Bildimap ol wol we bae i protektem Saeon.

Kasem naoia. Kasem tunaet. Kasem dei ia, tedei blong yumi.

Singaot we I Kam long Yumi I blong Bildim Saeaon, Ples we Yumi Stap long Hem

Wan long ol plante fasin blong taem ia blong yumi, taem ia blong yumi blong mekem wok blong God—las dispensesen ia mo hemia we i moa bigwan long evriwan—taem naoia i defren wei ia we yumi stap stanemap kingdom blong God long wol. Yu save, wan samting we i gud tumas long saed blong dispensesen ia, hem i we wan taem blong bigfala mo kwik jenis. Mo wan samting we i bin jenis, hem i we Jos blong God bae i neva ronwe. Bae i neva aot bakegen long Uru, blong save go long Haran, blong save go long Kenan, blong save go long Nauvu, blong save go long weaples bakegen. No. Olsem Brigham Yang i bin talem long yumi evriwan: “oli kikimaot yumi long fraepan i go long faea, mo oli kikimaot yumi long faea blong go long medel floa, mo yumi stap ia nao, mo bae yumi stap long ples ia nomo.” ¹¹

Yes, i tru. Toktok ia i no wan toktok long saed blong Sol Lek Vale, o ol Wosat hil; hem i kam wan toktok we i blong ol memba blong Jos raon long ful wol. Long ol dei ia, we oli ol las dei, long dispensesen blong yumi, bae yumi kam blong save samting inaf blong yumi stop blong stap ronwe. Bae yumi kam blong save samting inaf blong yumi planem strong leg blong yumi, mo putum ol famle mo ol fandesen blong yumi long evri nesen, long evri famle, lanwis mo pipol oli stap blong oltaem. Saeon bae i stap evri ples—long weaples we Jos i stap long hem. Mo wetem jenis ia—we i wan long ol bigfala jenis blong ol las dei—yumi nomo tingting long Saeon olsem ples we bae yumi go stap long hem; be yumi tingting long hem olsem olsem wanem nao bae yumi stap long hem.

Trifala Samting we I Bin Hapen we I Lidim Yumi long Trifala Lesen

Nao, blong eksplenem niufala wok ia smol moa, mi wantem tokbaot, tunaet, tri samting we i bin hapen long Sista Holan mo mi i no longtaem i pas. Spos i gat taem, bae mi tokbaot plante moa, mo semmak long yufala.

Namba wan: Sam yia i pas, wan yangfala fren blong mi—wan riten-misinari—i bin stap long basketbol tim blong wan kolej long Yuta. Hem i wan gudfala yang man, mo i plei gud, be hem i no bin stap plei tumas olsem we hem i wantem. Ol spesel talen mo skil blong hem oli no bin wanem we tim i bin nidim long taem ia we tim mo hem i stap kam antap. Hemia i hapen long atletik; mifala i stap dil wetem hemia oltaem. Mekem se, wetem ful sapot mo gud lak blong ol koj mo fren blong tim blong hem, yangfala fren blong mi i go long wan nara skul we hem i ting se bae hem i save help moa.

I bin hapen se ol samting oli go gud moa long niufala skul ia, mo fren blong mi i kam blong stat plei long stat blong gem. Mo yu save wanem i hapen afta? Taemtebol (we oli putum finis yia bifo ol samting ia oli hapen) i mekem se yang man ia i gobak plei agensem foma tim blong hem long Sol Lek Siti we bifo oli singaotem Delta Senta.

Wanem i bin hapen long gem ia, i bin trabolem mi kasem tedei, mo mi tekem janis ia blong mi talemaot harem nogud blong mi. Ol nogud toktok we i kamaot long ol stan we oli sakem long yang man long naet ia—wan Lata-dei Sent, wan riten-misinari, we i jes mared, we i stap pem taeting blong hem, we i stap long kworom blong ol elda, we i bin givim gud seves long ol yut blong komuniti ia, mo i stap wet long wan niu bebi we bae i kam long hem mo waef blong hem—wanem we oli talem mo mekem long hem, mo long waef blong hem, mo ol famle blong tufala; i no gud blong eni man, we i stap long eni ples, long eni taem, i kasem, nomata wanem spot, nomata wanem yunivesiti blong hem, o nomata wanem desisen blong hem long tufala samting ia.

Be hemia nao pat we i nogud moa. Koj blong tim blong hem, we i wan bigman long saed blong wok ia, i tanem hem i go long fren ia afta long wan gudfala gem mo talem: “Hey! Wanem i stap hapen? Yu yu manples pikinini we yu mekem gud long ples ia. Olgeta ia oli ol pipol blong yu. Oli ol fren blong yu.” Be afta, antap long evri samting ia, hem i konfius mo i talem: “Be plante long ol pipol ia oli ol memba blong Jos blong yu, no?”

Nambatu samting we i bin hapen: Oli bin invaetem mi blong toktok long wan Stek singgel adalt divosen—olgeta we oli gat 18 yia i go olsem, semmak olsem tunaet. Taem mi kamtru long bakdoa blong stek senta, wan woman we i gat samples 30 yia i kam insaed long bilding long sem taem. Nating we i gat wan bigfala grup blong pipol we i stap muv i go long japel, hem i no had blong luk hem. Mi tingbaot se hem i gat tu tatu, plante kaen ring long sora mo nus, ol hea blong hem oli stanap antap long hed long eni kaen kala we yu save faenem, wan sket we i stap hae antap tumas, mo wan sot we i sot tumas.

Tri kwestin i kam long maen blong mi: Woman ia, i wan sol we i stap traehad, we i no memba, we oli lidim hem—o gud moa, wan i invaetem hem—i kam long divosen ia anda long daereksen blong Lod from hem i traehad blong helpem woman ia blong faenem pis mo rod blong gospel we hem i nidim long laef blong hem, o no? Wan nara tingting se, ating hem i wan memba, we i bin mestem rod smol long ol hop mo ol standet we Jos i stap givim long ol memba, be, mo tangkyu long heven, hem i wan memba yet mo hem i bin jusum blong kam long Jos aktiviti ia long naet ia. Nambatri tingting, “Ating hem i Rilif Sosaeti presiden?” (Be mi sua se i no hem.)

Hemia nambatri eksampol blong mi tunaet. Taem mi bin tekpat long dedikesen blong Kansas Siti Tempol, sam manis i pas, Sista Holan mo mi i bin stap long haos blong Brata Aesak Friston, wan polis ofisa mo wan gud hae pris long Libeti Misuri Stek. Long ol storian blong mifala, hem i bin tokbaot se let long wan naet, oli bin singaotem hem blong go jekem wan komplen insaed long wan nogud ples long siti. Antap long ol laod miusik, mo wetem smel blong mariruana long ea, hem i bin faenem wan woman wetem sam man, we oli stap drink mo toktok nogud, mo evriwan oli no luksave se i gat faef smol pikinini—we oli gat bitwin tu mo eit yia—we oli hip tugeta long wan rum, mo oli traem blong slip long doti floa we i no gat bed, i no gat matres, i no gat pilo, i no gat eni samting. Brata Friston i lukluk i go long kabod blong kijin mo frij blong luk spos i gat wan tin, wan katen, o samting blong kakae—be hem i no faenem wan samting nating. Hem i talem se dog we i stap singaot aotsaed i gat moa kaekae bitim ol pikinini ia.

Insaed long bedrum blong mama, hem i faenem wan matres we i no gat kaliko, wan ia nomo insaed long haos. Hem i lukraon gogo i faenem sam kaliko (spos yu save singaotem se hem i kaliko), i putum antap long matres, i putum ol faef pikinini i go long giaman bed ia. Wetem wota long ae blong hem, nao hem i bin nildaon, i mekem wan prea long Papa long Heven blong oli gat proteksen, mo i talem tata.

Taem hem i stanap mo wokbaot i go long doa, wan long ol pikinini, we i gat samples sikis yia, i jiamaot long bed, ron i go long hem, i holem han blong hem, mo askem strong long hem: “Plis, plis yu save adoptem mi?” Wetem moa wota long ae blong hem, hem i putum pikinini ia i gobak long bed blong hem, mo afta, i faenem mama ia we i drong ( ol man oli bin ronwe longtaem finis) mo i talem long hem: “Bae mi kambak tumoro, mo i mas gat jenis long haos ia bifo mi wokbaot pasem doa ia. Mo bae i mas gat moa jenis afta long hemia” hem i talem. “Mi promesem yu hemia.”¹²

?Wanem nao i semmak long ol trifala taem ia? I no gat tumas samting, be oli bin hapen long Sista Holan mo mi i no longtaem i pas. Mo oli givim tri, smol be defren eksampol blong tru laef blong Babilon—wan nogud samting we i hapen long wan man long wan basketbol gem, wan samting we i blong kalja mo i givim saen blong jalenj blong wanwan wetem olgeta we oli laef defren long yumi, mo wan bigfala mo series problem, we i go fas long loa, we i bigwan tumas we i luk olsem se wan man i no naf blong save fiksim. Taem mi givim ol trifala jalenj ia, mi minim blong no yusum ol bigfala eksampol blong trabol long saed blong seks, o fasin blong faetem man, o adiksen long ponografi, nomata ol samting ia oli kilim hom long sam long yufala, bitim ol eksampol ia we mi bin yusum. Be yufala i smat inaf blong tingting i kasem ol ples ia.

Lesen 1: “Neva Lego Relijin blong Yu I Stap long Doa”

Faswan, bae mi endem storian blong basketbol. Dei afta long gem, afta we pablik i stap kikbak, mo sam oli askem blong oli mas talem sore, wan yang man i talem olsem: “Yu luk. Yumi stap tokbaot basketbol ia, i no Sandei Skul. Spos yu no save fesem faea, kamaot long kijin. Mifala i pem bigfala mane blong luk ol gem ia. Mifala i save mekem samting olsem mifala i wantem. Yumi lego relijin i stap long doa.”

“ Yumi lego relijin i stap long doa”? Lesen nambawan blong stap stanemap Saeon long namba 21 senturi: Yu neva “lego relijin blong yu i stap long doa.” Neva.

Ol yang fren blong mi. Kaen fasin ia blong stap disaepol, i no save stap—hemia i no wei blong wan disaepol nating. Olsem we profet Alma i bin tijim ol Yang Woman blong Jos blong talemaot evri wik long Yang Woman Stamba Toktok blong olgeta, yumi mas “stanap olsem ol witnes blong God long evri taem, long evri samting, mo long evri ples we yumi stap long hem,”¹³ be i no long sam taem, mo long sam ples, o taem tim blong yumi i stap win.

“Lego relijin blong yu i stap long doa” Mi bin kros tumas.

Lesen 2: soem Lav mo Sore, be Stap Tru long Ol Komanmen

Be bae yumi stap wetem hemia. Yumi stap wetem hemia blong smol taem from se i gat wan seken lesen i kam. Lesen nambatu, long rod blong yumi tunaet blong kasem Saeon, hem i we, long stret kros blong mi (olsem yumi stap talem oltaem se i stret), mi mas mekemsua se bae mi no go mo mekem wanem we mi stap talem se sapota ia i mekem i rong —blong go krangke, mekem stupid samting, no stap kwaet, singsingaot, blong putum han long hem—gudwan nao raon long nek blong hem—kasem taem we, ges wanem? Bifo mi luksave, mi tu mi bin lego relijin blong mi i stap long doa! No. I mas gat wan long laef, wan long namba 21 senturi, wan long evri kaen situesen ia we i mas laef folem relijin blong hem, sapos no, yumi evriwan i kam wan bigfala grup blong ol krangke man we i stap mekem samting olsem se yumi no gat standet.

Luk. Hem i isi blong stap stret mo gud taem ol samting oli kwaet mo laef i gud mo evri samting i ron gud nomo. Tes i kam taem i gat ol tru tes o temtesen, taem man i pus biaen mo man i taed, taem i gat kros mo fraet, o i posibol blong yu brekem loa tru. Bae yumi save stap fetful long taem ia? Hemia nao kwestin, from se Isrel, Isrel i stap singaot. Blong gat tru fasin, hem i wanem we i hae biaen long toktok ia: “Papa, fogivim olgeta from se oli no save wanem oli stap mekem.”¹⁴——yes, stret long taem we fasin blong fogiv mo fasin blong andastanem man, mo gat bigfala hat long ol man we oli mekem nogud long yu, i las samting ia nao we wan we i not stret evriwan olsem Sevya blong wol bae i wantem mekem. Be yumi mas traem; yumi mas wantem blong kam strong. Nomata wan situesen, o nogud toktok, o problem, i no gat wan tru disaepol blong Kraes we i save “lego relijin blong hem i stap long doa.”

Hemia i lidim mi i go long woman ia wetem renbo hea mo plante kaen ring. Nomata wanem wei wan bae i mekem long yang woman ia, rul we i stap blong oltaem i blong wanem yumi mekem i soemaot bilif blong yumi mo gospel komitmen blong yumi. From hemia, olsem wanem yumi fesem wan situesen, i mas mekem samting i kam gud moa, i no blong kam nogud moa. Yumi no save mekem o talem samting long wan wei we bae i mekem se yumi rong i bitim, long kes ia, woman ia. Hemia i no minim se yumi no save gat ol tingting, se yumi no gat ol standet, se yumi sarem ae nomo long ol toktok blong heven we i talem se “no mekem” o “mas mekem olsem” long laef. Be hem i minim se yumi mas laef folem ol standet ia mo yumi mas difendem ol “no mekem” o “mas mekem” long wan wei we i stret, long bes wei we yumi save mekem, folem wei we Sevya i bin laef folem mo i bin difendem olgeta. Mo oltaem, Hem i bin mekem wanem Hem i nid blong mas mekem blong situesen i kam gud moa—olsem blong tijim trutok, blong fogivim ol man we i mekem sin, blong klinim tempol. !Hem i wan bigfala presen, mi talem bakegen long yufala, blong save olsem wanem blong mekem ol kaen samting ia long stret fasin!

Mekem se, wetem niufala fren ia we i dresap defren mo i mekem hem i defren, yumi stat faswan blong tingbaot se hem i wan gel blong God, mo hem i gat praes. Yumi stat blong tingbaot se hem i gel blong wan man mo woman long wol ia tu, mo, long sam wei, i save gel blong mi. Yumi stat blong talem tangkyu se hem i stap long aktiviti blong Jos, we i no ronwe long eniwan. Long sot toktok, yumi traem blong yumi stap gud long situesen ia, mo wantem blong helpem hem blong kam gud moa. Yumi gohed blong prea long sikret: Wanem nao stret samting blong mekem mo talem long ples ia? Wanem i stret samting blong talem? Wanem stret samting nao bae i mekem situesen blong hem, mo hem, i gud moa? Taem yumi stap askem ol kwestin ia mo rili traem blong mekem wanem we Sevya bae i mekem, long mi, mi ting se hem i wanem we Sevya i minim taem Hem i talem mo mi kwot: “I nogud yufala i stap jajem man …long lukluk nomo [blong hem]; yufala i mas jajem man long fasin we i stret gud.” Jajem man long stret mo gud jajmen.¹⁵

Nao we mi talem hemia, mi rimaenem yumi evriwan se taem yumi stap go aot mo helpem wan sipsip we i mestem rod i kambak, yumi gat bigfala responsabiliti tu long olgeta 99 we oli no mestem rod—mo hemia folem ol tingting mo wanem we Man we i lukaot long sipsip i wantem. I gat wan grup blong ol sipsip i stap, mo yumi evriwan i sapos blong stap insaed long hem, nomata wanem sefti mo blesing i kam long yumi we i stap long grup. Ol yang brata mo sista. Jos ia i neva save daonem doktrin blong hem blong mekem se i faenem wan ples insaed long sosaeti o politik, o eni nara risen. Hem i wan hae graon ia nomo we i stap wetem trutok we i kam long heven, we i givim yumi wan ples blong stanap long hem blong save leftemap wan narawan we ating i gat trabol o i stap hemwan. Lav mo sore we yumi gat mo lav blong yumi—ol stamba fasin blong Kristin fasin blong yumi—neva, bae yumi mas ting se oli stap blong jenisim ol komanmen. Olsem we Joj MakDonal i bin talem wan taem, long ol kaen situesen olsem: “Yumi no nid blong talemaot evri samting we yumi biliv long hem, be yumi nid blong neva luk olsem samting we yumi no biliv long hem.”¹⁶

Jajem Man Folem Ol Jajmen we Oli Stret mo Gud

Long saed ia—long saed blong fasin blong gat lav mo sore, mo stap tru long ol komanmen—samtaem i gat janis blong ol yang pipol oli no andastanem gud hemia—olgeta we oli sem yia olsem yufala o yangfala moa— mo oli ting se yumi no sapos blong jajem eni samting, se bae yumi no mas skelem eni kaen samting. Yumi mas helpem wanwan long yumi wetem hemia from se Sevya i mekem i klia se, long sam situesen, yumi mas jajem samting, yumi gat wok ia blong jajem samting—olsem taem Hem i talem se “i no gud yu givim samting we i tabu i go long ol dog, mo i nogud yu sakem ol gudgudfala samting blong yu i go long ol pig.”¹⁷ Hemia, long mi, i olsem wan jajmen. Nara wei i blong foldaon mo kam olsem wol blong tedei we i gat ol standet blong gud fasin we oli no strong, we taem oli pus strong long olgeta, i talem se long en, i no gat wan samting i blong taem we i no save finis, o i tabu, mo from hemia, i no gat wan standet long saed blong eni samting we i moa impoten bitim eni narawan. Mo i simpol nomo, hemia i no tru.

Taem yumi mas skelem ol samting, oli no askem yumi blong givim panismen long ol narawan, be oli askem yumi blong mekem desisen evri dei, we i soemaot jajmen—mifala i hop i wan gud jajmen. Elda Dalin H. Oks, wantaem i bin tokbaot ol desisen ia olsem “ol medel jajmen” we plante taem, i long saed blong sefti blong yumiwan o sefti blong ol narawan, be i no wanem hem i singaotem, ol “las jajmen”, we God nomo i save mekem, from se Hem i save evri samting we i stap.¹⁸ (Tingbaot, insaed long skripja we mi kwotem faswan, se Sevya i bin talem se “ol medel jajmen” ia oli mas ol “stret mo gud jajmen,” i no ol jajmen we i putum yu antap, we i wan defren samting evriwan.)

Eksampol. Ol papa mo mama oli mas yusum gudfala jajmen long saed blong sefti mo gudfala laef blong ol pikinini blong olgeta evri dei blong laef blong olgeta. I no gat wan bae i blemem wan papa o mama from se hem i talem long ol pikinini blong hem se oli mas kakae vejetebol, o i blokem pikinini blong hem blong ronron long wan rod we fulap trak i stap ron long hem. From wanem nao bae yumi blemem papa o mama we i kea, taem hem i talem long pikinini blong hem we i bigwan, se wanem taem nao bae hem i kambak hom long naet, o wanem nao standet blong aksen o fasin blong ol fren blong hem, o wanem yia nao bae oli stap deit, o sapos yes o no oli save gat eksperiens long saed blong drag o ponografi, o blong brekem loa long saed blong seks? No. Yumi stap mekem ol desisen mo stap stanap strong mo talem strong ol valiu blong yumi—long sot toktok, yumi stap mekem “ol medel jajmen”—evri taem. Yumi sapos blong mekem hemia.

Sam Problem mo Loa, Risal blong Olgeta I Stap Kasem Taem we I No Save Finis

Nao, taem yumi fesem ol kaen situesen olsem we i lukluk long ol defren sosol problem insaed long wan dimokratik sosaeti, hem i save kam wan jalenj, mo long sam, i save mekem man i konfius. Ol yang pipol oli save gat kwestin, long saed blong standet ia o toktok ia, o polisi ia we Jos i stanap long hem, mo talem: “Okei. Yumi no biliv se yumi mas laef o mekem samting long wei olsem o long nara wei ia, be from wanem nao bae yumi mas mekem ol narafala pipol oli mas mekem semmak? Olgeta tu oli fri blong mekem joes, no? Yumi no stap putum yumi antap tumas mo jajem man, mo stap fosem man blong biliv semmak long yumi, mo fosem olgeta blong oli mekem samting folem wan wei? Long ol situesen olsem, yufala i mas eksplenem long gudfala wei, from wanem yumi stap difendem sam prinsipol, mo from wanem yumi agensemsam sin, long weaples yumi faenem olgeta, from se ol poen ia mo ol loa ia, oli no blong sosaeti o blong politik nomo, be risal blong hem i blong taem we i no save finis. Mo long semtaem we yumi no wantem spolem olgeta we oli gat defren bilif long yumi, be mifala i wari tumas blong no spolem God, o, olsem skripja i talem, we i blong no mekem sin agensem hem we i givim loa long yumi ¹⁹—mo mi stap tokbaot ol bigfala loa long saed blong gud fasin mo tingting.

Be, blong mekem poen, bae mi yusum eksampol blong wan loa we i daon moa. Hem i lelebet olsem wan yangfala we i talem: “Naoia we mi save draev, mi save se mi sapos blong stop long red trafik laet, be olsem wanem? Bae mi rili mas jajem man mo traem blong mekem evri nara man oli stop tu long ol red trafik laet? Olsem wanem? Bae evriwan i mas mekem wanem we yumi, yumi stap mekem? Be ol narawan ia oli fri tu blong mekem joes, no? Bae oli mas mekem olsem yumi?” Okei, naoia, yu mas eksplenem from wanem, yes, yumi hop se olgeta evriwan bae oli stop long wan red trafik laet. Mo yu mas mekem hemia long wan wei we yu no daonem olgeta we oli stap brekem loa, o biliv long defren samting long yumi, from se, yes, olgeta tu oli gat raet blong mekem joes.

Ol yang fren blong mi. I gat plante kaen defren bilif long wol ia, mo i gat fridom blong jusum ol gud fasin long evriwan; be i no gat wan i gat raet blong mekem samting olsem se God i sarem maot long saed blong ol topik ia, o olsem se ol komanmen blong hem oli impoten nomo sapos pablik i agri long olgeta. Long namba 21 senturi, yumi nomo save ronwe bakegen. Bae yumi mas faet from ol loa mo ol situesen mo ol ples we oli letem blong man i fri blong yusum relijin blong hem mo gavman i blokem praktis blong hem. Hemia i wan wei we yumi save stap strong insaed long Babilon, be i no blong pat long hem.

Mi no save wan nara paoa mo tru fasin we yumi save soemaot long wan wol we yumi no save ronwe long hem, be hemia nomo blong wokbaot long wan rod we i sef—blong stanap long gud fasin we God i talemaot, mo ol loa we Hem i bin givim, be blong mekem hemia wetem lav mo sore, wetem fasin blong andastanem man mo bigbigfala lav. Yes, i wan had samting blong mekem—blong luksave mo putum sin long wan saed mo man we i mekem sin long nara saed. Mi save sam moa olsem we i moa had blong mekem, o i moa had blong tokbaot, be yumi traehad blong mekem hemia stret wetem lav. Yufala i bilivim mi, ol brata mo sista. Long wol ia we yumi stap muv long hem, bae yumi gat plante janis blong developem ol paoa ia, blong soemaot strong paoa long tingting, mo blong soemaot lav mo sore—evriwan, long semtaem. Mo mi no stap tokbaot ol heastael we i stanap o ring long nus blong yu.

Lesen 3: Yusum Ol Valiu blong Gospel blong Mekem Gud long Ol Komuniti mo Ol Kantri

Nao, laswan, stori ia blong Kansas Siti. I no plante long yumi bae i kam ol polis ofisa, o ol sosol seves ofisa o jaj we i sidaon long jea blong kot, be yumi evriwan i mas kea long gudfala laef blong ol nara man, mo sefti blong gud tingting mo fasin blong bigfala komiuniti blong yumi. Elda Kwentin L. Kuk blong Olgeta Twelef i bin givim wan ful toktok blong Jeneral konfrens long saed blong topik ia tu yia i pas. Taem hem i tokbaot nid blong yumi blong lidim sosaeti we i stap aotsaed long wol blong hom blong yumi, hem i talem:

“Antap long wok blong protektem famle blong yumiwan, yumi mas stap olsem wan stamba blong laet blong protektem ol komuniti blong yumi. Sevya i bin talem: ‘letem laet ia i saenaot i kasem ol man, blong oli save luk ol gudfala wok we yufala i stap mekem. Nao bae oli leftemap nem blong Papa blong yufala we i stap long heven. …’

“Long wol blong yumi we i stap go nogud tumas.” Hem i gohed i talem “hem i nid blong ol valiu we oli stanap long ol bilif blong relijin oli kamaot klia long pablik ples. …

“Fet blong relijin i wan stoa blong laet, save, mo waes tingting mo i gat gud paoa long sosaeti.”²⁰

Sapos yumi no tekem ol blesing blong gospel i go long ol komuniti mo ol kantri blong yumi, wanem bae i hapen i we bae yumi neva gat inaf polisman—bae i neva gat inaf Aesak Friston—blong mekemsua se man i folem ol gud fasin, sapos loa i save mekem hemia. Mo loa i no save mekem hemia. Ol pikinini ia, insaed long hom ia, we oli no gat kaekae o klos, oli ol boe mo gel blong God. Mama ia, we i rong from se hem i bigwan mo i mas responsibol moa, i wan gel blong God tu. Ol kaen situesen ia i nidim ol taf lav, wetem ol loa, be yumi mas traem blong help taem mo long weaples yumi save mekem, from se yumi no stap lego relijin blong yumi long doa, nating sam man oli mekem samting olbaot mo oli no gat tingting.

Bae yumi no save stretem evri problem blong yu o blong sosaeti long wol tunaet. Taem yumi aot tedei long naet, bae i gat yet ol puaman, mo fasin blong no save samting, mo fasin blong brekem loa, man i no gat wok mo abius, faet mo hat we i soa long ol neiba, mo ol siti, mo ol nesen blong yumi. No. Yumi no save mekem evri samting, be olsem we olfala toktok i talem, yumi save mekem sam samting. Mo blong ansa long singaot blong God, “Isrel,Isrel” olgeta nao oli mas mekem hemia—i no blong ronwe long Babilon long taem naoia, be blong faet agensem. Mi no tingting olsem pikinini, o mi no blaen, be yumi save laef folem relijin blong yumi long fri wei mo wetem strong tingting, mekem se bae yumi faenem eni kaen janis blong helpem wanwan long yumi, helpem ol famle, blesem ol neiba, mo protektem ol narawan, mo tu, jeneresen ia we i stap kam antap.

Gat Wan Laef we I Soemaot Lav we Yu Gat long Jisas Kraes

Mi no talemaot toktok ia misinari, long topik ia, from se mi fraet yufala i tingting long ol waet sot mo nem baj. Yufala i no blokem tingting blong mi long hemia. Stap wetem mi long bigfala pikja—bigfala nid ia—blong serem gospel olsem fultaem misinari, be tu, taem yu no stap long fultaem seves. Oli singaotem ol Lata-dei Sent blong stap olsem yis insaed long bred, sol ia we i neva lusum tes blong hem, laet ia we i stap antap long hil we oli neva haedem andanit long baket. Mo yia grup blong yufala—plante i 80 kasem 30—plante i 18 kasem 30 (sori mi filim olfala tunaet. Yia grup blong yufala, i taem ia long laef blong wan man o woman, taem ol fren blong yufala oli rere blong akseptem gospel, sapos yufala i serem long olgeta. Mifala i save hemia. Eni stadi we Jos i bin mekem i bin talem hemia long mifala.

So stat blong serem! Sapos yumi mekem raet mo toktok raet mo go aot plante wetem ol toktok mo ol aksen blong yumi, nao, taem Sevya i katemsot wok blong Hem blong stret mo gud fasin, mo i talem se i nomo gat taem long las mo bigfala dispensesen, mo afta, Hem i kam long glori blong Hem, bae Hem i faenem yumi—yu mo mi, mo yumi evriwan—we is tap traem bes blong traem laef folem gospel, we yumi traem blong mekem gud laef blong yumi, Jos blong yumi, sosaeti blong yumi long bes wei we yumi save mekem. Taem Hem i kam, mi tu, mi wantemtumas se Hem i faenem mi we mi stap laef folem gospel mo mi stap mekem wan gud samting spos mi save. Mi wantem Sevya i talem long mi: “Jefri,” —from Hem i save nem blong yumi evriwan—“mi luksave yu, i no tru long taetol blong yu, be tru long laef blong yu, wei ia we yu stap traem blong laef folem mo ol standet we yu stap traem blong difendem. Mi luk se hat blong yu i tru. Mi save se yu bin traem blong mekem ol samting oli gud moa, mo faswan, yu traem blong yu kam gud moa, mo afta, taem yu stap talemaot toktok blong mi mo difendem gospel blong mi long ol nara man wetem lav mo sore.”

“Mi save se yu no gat sakses oltaem,” bae Sevya i talem, “wetem ol sin blong yu o situesen blong ol narawan, be mi biliv se yu bin ones blong traem. Mi biliv se yu bin lavem mi tru, long hat blong yu.”

Mi wantem tumas blong samting ia i hapen wan dei bitim mi wantem eni nara samting long laef long wol ia. Mo mi wantem hemia blong yufala. Mi wantem hemia blong yumi evriwan. Isrel, Isrel, God i singaot—i singaotem yumi blong laef folem gospel blong Jisas Kraes, yufalawan long ol smol wei, mo semtaem tu, long ol bigfala wei, mo afta, blong go aot long olgeta we yufala i luk se oli no luk, o dresap, o mekem samting semmak olsem yumi mekem, mo afta (olsem yu save mekem) go bitim hemia blong go givim seves long komuniti we i moa bigwan we yu save kasem.

Blong helpem yufala blong mekem hemia, mi livim, wetem testimoni blong mi, mi livim wan blesing blong wan aposol long wanwan long yufala tunaet. Mi blesem yufala, tru long paoa blong prishud mo raet we mi bin kasem, blong mekem yufala i save se God i lavem yufala, mo Hem i nidim yufala long las bigfala dispensesen ia taem evri samting i stap go spid mo moa samting i mas kamtru. Mi blesem yufala, wetem atoriti blong aposol, se bae ol prea mo stret mo gud fasin blong yufala bae i gat ansa, se ol fraet blong yufala bae oli lus, se ol baksaed mo ol solda blong yufala mo ol hat blong yufala bae oli strong naf blong karem ol hevi samting we i stap long olgeta. Mi blesem yufala taem yufala i stap traehad blong stap klin evriwan long hat blong yufala, mo givim yufala olsem wan tul long ol han blong God blong stanemap Saeon long ol las dei ia long evri ples we yufala i stanap long hem. Mi blesem yufala blong stap tru long wanwan long yufala, mo long olgeta we oli no stap long grup blong yufala we yufala i mas go from olgeta. Antap long hemia, mi blesem yufala blong stap ol fren blong Sevya blong wol, blong kam blong save stret huia Hem, mo blong gat tras long kampani blong Hem.

Mi lavem Lod Jisas Kraes, we mi traem blong wok blong Hem. Mo mi lavem Papa blong yumi long Heven, we i bin kea inaf blong givim Hemwan long yumi. Mi save se, long saed blong presen ia, God i stap singaotem Isrel long ol las dei ia mo Hem i wantem luk yumi mekem folem singaot ia, mo kam moa olsem Kraes, moa kam tabu bitim we yumi stap naoia long strong tingting blong yumi blong laef folem gospel mo stanemap Saeon. Mi save tu se bae Hem i givim tugeta samting ia, paoa mo tabu fasin blong stap ol tru disaepol sapos yumi askem. Mi testifae se wok ia i tabu, se lav blong Hem i hae mo God we i Gat olgeta Paoa i hae, se Atonmen blong Lod Jisas Kraes i tru, mo i go kasem hem we i moa daon long yumi. Mi blesem yufala wetem hop ia blong gat hapines mo tabu fasin, tunaet mo tumoro, mo blong oltaem, long tabu nem blong Jisas Kraes, amen.