Yumi Nao Ol Man blong Droem Plan blong Hapines blong Yumiwan
Prisaeding Bisoprik
Fas Kaonsela long Prisaeding Bisoprik
Ol dia brata mo sista blong mi, tedei long naet, mi filim se mi gat bigfala ona mo janis blong gat wan taem blong toktok long yufala. Mi mi laekem tumas ol yang adalt blong Jos, mo mi stap glad blong save spendem sam taem tedei long naet wetem yufala.
Plante taosen long yufala i stap long naesfala Tabenakol ia. Plante moa we mi no save luk oli kam tugeta long ol taosen blong ol mitinghaos raon long wol. Be mi save se yufala i stap lisin gud mo stap wantem lanem samting. Nomata longfala ples i seperetem yumi, mi save se Tabu Spirit i stap nomata long weaples yumi stap long hem. Wanem i moa gud long satelaet brodkas ia, hem i Tabu Spirit we i mekem yumi joen tugeta long wan spesel wei. Mi prea se bae Hem i stap wetem yumi, se bae Hem i tijim yumi mo gaedem yumi, mo givim insperesen long yumi long naet ia.
Laef I Fulap long Ol Sapraes
Yumi stap insaed long wan naesfala rum, wan histri bilding we i givim ona long fet mo wok blong ol paeonia we oli statem Sol Lek Siti. Mi bin kam insaed long tabenakol ia, long fas taem, taem mi gat 16 yia. Hem i long taem blong fas trip blong mi long Yunaeted Stet blong Amerika. Papa blong mi i bin askem mi blong go wetem hem long wan bisnis trip blong hem long Kalifonia. Olsem wan yang man we mi groap long Saot Franis, mi jiamjiam wetem glad long invitesen ia. Bae mi go luk Amekika nao! Glad blong mi i bigwan moa taem mi faenem se rod blong mifala i tekem wan wiken long Sol Lek Siti blong go long jeneral konfrens.
Mi tingbaot taem mifala i kasem Yuta insaed long Fod Mustang trak we mifala i rentem. Long ol plante aoa we mifala i spendem long rod, mifla i pas tru long ol win blong sno, ol draeples we i gogo i no gat en, ol naes orenj kanion, mo ol bigbigfala hil. Ples ia i olsem hemia blong Wes Amerika long mi, mo mi kipim ae blong mi i open, mi hop blong luk ol kaoboe mo ol Indian long rod.
Long nekis dei, tangkyu from tru long hat blong wan fren, mifala i stap sidaon long Tabenakol ia, long ol fas ro blong kam long konfrens sesen. Mi sapraes tumas. Truaot long ol miting, mi traem blong kasem sam Inglis toktok we mi save andastanem. Mi tingbaot toktok blong Presiden Esra Taf Benson—i no stret toktok blong hem, be filing we toktok ia i mekem long hat blong mi we mi yang man. Mi filim se mi stap long wan drim, wan gudfala eksperiens.
Tetaem ia, mi no ting nating long wanem bae i hapen olsem tedei long naet! Mi no ting nating se bae mi givim toktok long semfala Tabenakol ia long fored blong wan grup blong ol pipol! Mi talem stret, neva!
Laef i fulap long ol sapraes, no? Iven faef ia i pas, mi no ting se hemia i save hapen. Long tetaem ia, mi stap long Paris wetem famle blong mi, mo laef blong mifala i gat plan finis i stap. Faef pikinini, evriwan i bon long semfala klinik klosap long haos blong mifala. Long mifala, mifala i no tingting long wan laef long nara wei o ples, be long pisful ples ia nomo aotsaed long Paris, wetem ol pikinini blong mifala raon long mifala, mo ol apu pikinini we bae oli kam yet. Afta, wan naet, Presiden Monson i ring long haos mo laef blong mifala i tanem raon wantaem.
Stat long taem ia, famle blong mi mo mi i bin faenem ol glad blong laef long Yuta—ol ples blong histri blong Jos—go wokbaot long ol hil, ol babakiu long yad taem san i draon, ol eni kaen gudfala hambega (ol gudwan mo ol nogudwan!) Ol ragbi gem … o ol Yuts. Mo hu i save, ating kaoboe we bae yu luk i folem rod tumoro, ating i mi ia nao!
Fiuja I No Klia
Wok blong mi, olsem wan memba blong Prisaeding Bisoprik i gud mo i kam long heven. Be, eksperiens ia i defren long wanem mi plan long hem taem mi yangfala. Taem mi smol, mi wantem kam man blong stadi long histri. Apuwoman blong mi i bin mekemsua se mi kasem gudfala edukesen. Hem i givim mi ol buk blong yangfala fero we naoia oli singaotem hem King Tut, mo wetem hemia mi kam blong laekem laef blong ol pipol bifo. Mi spendem plante wiken blong krietem ol droing blong ol faet blong bifo, mo ol wol blong rum blong mi oli fulap long ol pikja ia. Mi gat wan drim wan dei, we mi stap go long Ijip, blong tekempat long taem we oli digim graon blong faenem ol tempol blong bifo blong Ijip, mo ol gref blong ol fero ia.
Foti yia afta, mi no man blong stadi histri yet, mo ating bae mi neva kam man ia. Mi neva go long Ijip, mo las wok blong mi, bifo mi kam wan Jeneral Atoriti, mi stap long wok blong salem ol kakae. I longwe long ol plan blong mi taem mi pikinini!
Taem yu wan yut, plante taem i gud taem ia blong mekem ol plan blong yuwan. Wanwan long yumi i gat ol drim taem yumi smol. Taem yumi yang adalt, yu gat yet ol drim blong fiuja—blong yu, yufala evriwan! Ating i hop blong kasem wan gol long atletik, kriesen blong wan naes artwok, o kasem wan diploma, o wan wok we yu traehad from tru long wok mo strong tingting. Ating yu gat wan gudfala pikja long maen blong yu, blong wan fiuja hasban o waef, pikja blong fes blong hem, fasin blong hem, kala blong ae o hea blong hem, mo ol naesfala pikinini we bae i blesem famle blong yu.
Hamas long ol tingting ia bae oli kam tru? Laef i fulap long ol taem we i no sua. Ol sapraes bae oli kamaot long ful rod blong laef. Hu i save wanem bae i hapen tumoro, mo weaples bae yu stap long hem long sam yia we i kam, mo wanem nao bae yu stap mekem? Laef i olsem wan aksen buk, we yu no save wanem i kam afta.
Bae i gat sam ki taem long yufala, we bae i jenisim rod blong laef blong yu wantaem nomo. Ol taem ia, i no fes blong man, o wan storian, o wan pati we yu no plan from. Valeri mo mi, i tingbaot yet stret taem we mitufala i lavlavem mitufala. I bin long taem blong kwaea praktis blong adalt wod long Paris. Hemia mitufala i no plan from! Mitufala i save mitufala stat long taem we mitufala i smol pikinini, be mitufala i neva gat ol filing blong bigfala lav long wanwan long mitufala. Long naet ia, mi stap long piano, mo hem i stap singsing long kwaea. Ae blong mitufala i mit, mo samting i hapen. Wan seken nomo be i blong ful taem we i no save finis!
Bae i gat ol niu janis we bae oli kamaot long laef blong yufala, olsem las toktok blong Presiden Monson long saed blong yia blong go long misin. Afta long anaonsmen blong profet, i gat plante taosen yang man mo yang woman long Jos, naoia, we oli stap jenisim ol plan blong olgeta blong go long wan misin.1
Samtaem, ol jenis blong rod long laef blong yumi, oli kam from ol jalenj o harem nogud we yumi no plan from. Mi bin lanem hemia tru long eksperiens, se yumi stap kontrolem sam pat nomo blong ol samting we i hapen long laef blong yumi.
Be yet, plante pipol oli no laekem samting we oli no save. Samting we man i no save, i mekem se sam oli nomo trastem olgetawan, oli fraet long fiuja we i kamaot long olgeta long ol defren wei. Sam oli fraet blong mekem komitmen from oli fraet se bae oli no mekem gud, nating we sam gudfala janis i kamaot long olgeta. Eksampol, oli stap pusumbak taem blong mared, skul, taem blong statem famle, o blong stanap strong long wan wok, mo oli ting se i moa gud blong hangaraon, o stap wom gud long haos blong papa mo mama.
Wan nara tingting we i stap blokem yumi, wan toktok ia i tokbaot gud: “Kakae, dring, mo stap glad, from tumoro bae yumi ded” (2 Nifae 28:7). Toktok ia, i stap talem se from yumi no save wanem bae i hapen tumoro, mo bae yumi evriwan bae i mas ded, nao yumi mas spolem gud yumi naoia. Tingting ia, i blong spolem gud yu long eni kaen samting, nating wanem i kam afta.
Folem Rod blong Hapines
Ol dia brata mo sista blong mi. Mesej blong mi i go long yufala tedei, i we, i gat ol defren rod i stap, i no hemia blong fraet, o tu tingting, o blong spolem gud yu—wan rod we i tekem pis, tras, mo gud laef. Yu no save kontrolem evri situesen blong laef blong yu. Ol samting, we oli gud mo givim jalenj, bae oli hapen long yu, nating yu no plan from. Be, mi talemaot long yufala se yufala i gat kontrol long hapines blong yufala. Yufala nao i man blong droem plan blong hapines ia.
Mi save tingbaot yet ol waes toktok we Presiden Dita F. Ukdof i talem long las jeneral konfrens:
“Moa yumi kam olfala, moa yumi lukbak long laef mo luksave se ol samting aotsaed oli no impoten o talem se bae yumi hapi o no
“…Yumi putum plan blong hapines blong yumi.” 2
No, hapines i no risal blong ol situesen blong laef blong yu. Hapines blong yu i risal blong visen blong yu long saed blong spirit mo ol prinsipol we yu stanemap laef blong yu long hem. Ol prinsipol ia, bae oli givim yu hapines nomata ol jalenj mo ol sapraes we yu no plan mo bae yu fesem long ol rod blong yu long laef.
Long naet ia, mi wantem luklukbak, wetem yufala, sam long ol stamba prinsipol ia.
1. Luksave se Yu Yu Impoten
Fas prinsipol hem i: Luksave se yu yu impoten.
Long sama ia, famle blong mi mo mi i spendem wan holidei long Provins, wan naes ples long Saot Franis. Wan naet, afta san i draon, mo tudak i fulmap kaontrisaed, mi disaed blong stap kwaet mo ledaon long wan longfala jea aotsaed long haos. Evri samting i tudak evriwan mekem se mi no save luk ol samting raon long mi. Ol ae blong mi oli stat blong lukluk ol heven. Fas taem, ples i tudak evriwan. Kwiktaem, wan laet i kamaot long skae, olsem wan flas laet, afta tu, mo tri. Sloslo i go, ae blong mi i stretem hem wetem tudak, mo mi save luk plante sta. Wanem we mi ting se i wan skae we i tudak, i jenisim i kam wan skae wetem ol sta.
Mi tingting: “hemia i olsem rilesen blong yumi wetem God. Hamas pipol oli biliv se Hem i stap longwe, o Hem i no gat nating? Ol pipol ia oli faenem se laef i tudak mo i blak evriwan. Oli no tekem taem, o no hadwok blong lukgud long ol heven blong luk se Hem i stap, i stap klosap long yumi.”
Ae blong mi i gohed blong lukluk raon. Mi lukluk long bigbigfala yunives we i stap long fored blong ae blong mi, mo bodi blong mi we i smol i stap, mo askem miwan, “Mi mi wanem long fored blong wan bigbigfala mo naesfala samting olsem?” Wan skripja i kam long maen blong mi. Hem i wan naesfala skripja, wan sam blong Deved, we ol poem blong hem i givim insperesen long mi.
“Taem mi mi luk skae we yu yu mekem, mo mi luk mun mo ol sta we yu yu putum tugeta oli stap long stret ples blong olgeta
“Mi luk se man i nating nomo, i no stret blong yu yu tingbaot hem. I no stret nating blong yu lukaot gud long hem.” (Ol Sam 8:3–4).
Stret afta, naes toktok ia i kam:
“Be yu yu mekem hem, yu leftemap hem i hae we i hae, we yu nomo yu hae moa long hem. Yu mekem hem i olsem king, yu givim paoa long hem mo yu leftemap nem blong hem.” (Ol Sam 8:5).
Hemia nao samting we i defren evriwan mo merikel blong Kriesen. Yunives i bigbigwan mo i no gat en, be yet, long semtaem, wanwan long yumi i impoten, i gat glori mo i no gat en long ae blong Krieta blong yumi. Bodi blong mi i smosmol evriwan, be yet, mi mi impoten tumas we tumas, long Papa blong mi long Heven.
Presiden Ukdof i talemaot:
“Long weaples yu stap long hem, long wanem situesen yu stap long hem, oli no fogetem yu. Nomata yu luk se taem blong yu i tudak, nomata yu ting se yu nating, nomata yu ting se bigfala sado i kavremap yu, Papa blong yu long Heven i no fogetem yu. Yes, Hem i lavem yu wetem wan lav we i no gat en.
“… Man i save yu mo tingbaot yu. Mo Man ia i Man we i moa Hae, i gat moa paoa mo i gat moa glori long yunives! Lav we i kam long yu i kam long wan King we i stap long ples we i no gat en mo taem we i no gat en!” 3
Taem yumi save se God i save yumi mo lavem yumi, i olsem wan laet we i saenem laef blong yumi mo i givim mining long hem. Mi tingbaot wan yang woman we i kam blong luk mi afta long wan faeasaed we mi stap long hem long Rom, Itali. Voes blong hem i fulap wetem filing mo hem i tokbaot wan sista blong hem we i stap gotru long sam taem blong trabol mo wari. Afta, hem i askem kwestin ia long mi: “Olsem wanem mi save helpem hem blong save se Papa blong hem long Heven i lavem hem?
Yufala i no ting se hemia nao stamba kwestin? Olsem wanem nao yumi save save se God i lavem yumi? Plante taem, filing we yumi gat, se yumi impoten o no, i stanap long lav mo intres we yumi kasem long olgeta raon long yumi. Yet, lav ia, samtaem i no gat. Lav we i kam long ol man, plante taem i no stret evriwan, i no fulwan, o i selfis.
Be, lav we i kam long God, i stret evriwan, i fulwan mo i no selfis. Nomata huia mi, sapos mi gat fren o nogat, sapos man i save gud mi o no, mo sapos mi filim se man i sakemaot mi o spolem mi, mi save stret se Papa blong mi long Heven i lavem mi. Hem i save ol nid blong mi; Hem i andastanem wari blong mi; Hem i wantem blesem mi. Mo bigfala wei blong Hem i soem lav we Hem i gat long mi i we, Hem i “lavem wol ia tumas, nao i givim Wan Stret Pikinini Ia nomo blong Hem” (Jon 3:16). Hem i no bin tekemaot konkon kap ia long Sevya, mo i tru, Hemwan i bin harem nogud tumas taem Hem i stap luk Pikinini blong Hem i safa insaed long Garen blong Getsemane mo antap long kros. Kraes i bin pemaot ol sin blong evri man, mo wan pat blong bigfala Atonmen ia, i blong mi mo i stap blong mi tedei. Spesel presen ia, we Papa mo Pikinini blong Hem i serem, i konfemem long sol blong mi se mi mi impoten long Tufala.
Ol brata mo sista blong mi, traem tingting se bae i minim wanem long yu, sapos yu save luk yuwan olsem we God i stap luk yu. Bae i olsem wanem sapos yu stap luk yuwan wetem semfala gud tingting, lav mo tras we God i luk yu longhem? Traem tingting se samting ia bae i mekem wanem long laef blong yu, blong yu save andastanem paoa blong yu we i no save finis, semmak olsem we God i andastanem. Sapos nomo yu save luk yuwan tru long ol ae blong Hem, bae hemia i gat wanem paoa long laef blong yu?
Mi testifae se Hem i stap ia. Lukaotem Hem! Lukaotem mo stadi. Prea mo askem. Mi promesem yu se God bae i sendem ol saen se Hem i stap laef mo Hem i gat lav long yu. Ating i save tru long wan ansa long wan prea. Ating i kwaet paoa blong Tabu Spirit we i stap mekem gud yu; ating i wan strong tingting, o wan niu paoa we yu neva kasem bifo; ating i wan memba blong famle, wan fren, o prishud lida we i stap long raet ples long raet taem blong blesem laef blong yu. Long wan wei o nara wei, taem yu stap go aot long Hem, bae Hem i letem yu save se Hem i stap ia.
2. Kam Huia Yu
Nao, wan seken prinsipol blong hapines: Kam huia yu.
Toktok ia, “kam huia yu,” i kam long Pinda, wan long ol bigfala poet blong Gris. 4 Ating i saon defren smol. Hao nao bae mi kam man we mi stap finis?
Letem mi soemaot prinsipol ia tru long wan stori. I no longtaem i pas, mi luk wan muvi, Yia blong Gud tingting. Muvi ia i tokbaot stori blong Magret, wan woman we i gat wan bank, we i gat wan krangke laef, we i fulap long travel mo konfrens long ol fo kona blong wol. Nomata woman ia i mared, hem i talem se hem i no gat taem blong gat pikinini.
Dei we hem i kasem 40 yia, hem i kasem wan defren leta we i talem: “Dia mi, tedei mi gat seven yia mo mi raetem leta ia long yu blong helpem yu tingbaot ol promes we mi bin mekem taem mi gat yia blong gud tingting yet, mo tu, blong yu tingbaot huia mi wantem kam.” Kwiktaem, Magret i bin andastanem se woman we i raetem leta ia, i hemwan nomo taem hem i bin gat seven yia. Wanem i folem long ol pej afta, smol gel ia i tokbaot moa ol gol blong laef blong hem.
Magret i luksave se woman we hem i kam, i no olsem wanem we hem i bin wantem kam taem hem i bin yangfala gel. Taem hem i bin disaed blong karembak woman ia we hem i gat visen long hem taem hem i bin pikinini, gudfala plan blong laef we i oganaes gud, i kapsaed evriwan. Hem i stretem bak hem wetem famle blong hem, mo mekem tingting blong givim ful laef blong hem we i stap blong givhan long ol pipol long nid.5
Ol dia fren blong mi. Sapos naoia, yu kasem wan leta we i kam long laef blong yu bifo, bae i talem wanem? Wanem bae i stap long leta ia we yu raetem yuwan long dei ia blong baptaes blong yu taem yu gat eit yia nomo? Bae mi gobak biaen moa. Sapos i posibol blong yu kasem wan leta we i kam long laef blong yu bifo yu laef long wol ia, bae i talem wanem? Wanem bae i hapen long laef blong yu sapos yu kasem wan leta we i kam long wan tru wol we yu fogetem, mo yu kasem leta ia tedei?
Ating leta ia bae i talem samting olsem: “Dia mi, Mi stap raet long yu blong yu tingbaot huia mi wantem kam. Mi bin glad long janis blong go long wol. Mi save se laef long wol i wan stamba rod blong pas long hem blong mi gro blong kasem ful paoa blong mi mo laef blong oltaem wetem Papa blong mi long Heven. Mi hop se bae yu tingbaot se mi wantem tumas blong stap wan disaepol blong Sevya blong yumi, Jisas Kraes. Mi sapotem plan blong Hem, mo taem mi stap long wol, mi wantem blong helpem Hem long wok blong Hem blong sevem ol man. Plis, tingbaot tu se mi wantem pat blong wan famle we bae i stap tugeta blong taem we i no save finis.”
Las tingting ia i mekem mi tingbaot wan naesfala singsing we i stap long Franis hymbuk blong Jos—wan we i no stap long ol hymbuk blong ol narafala kantri. Taetol i, “Souviens-toi,” we i minim “Tingbaot,” mo i folem miusik blong Niu Wol Simfoni blong Antonin Rak. Hem i singsing blong wan papa o mama we i toktok long niubon pikinini blong hem.
Letem mi ridim nambatri ves long yu:
“Tingbaot, pikinini blong mi: Long en blong dei,
Yumitu bin ol fren we i stap pleiplei long win.
Afta, wan dei, wetem glad, yumitu jusum
Blong akseptem bigfala plan blong laef we i kam long Lod.
Long naet ia, pikinini blong mi, yumitu promes,
Tru long lav, tru long fet, blong kam tugeta bakegen.6
“Tingbaot pikinini blong mi.” Wan long ol bigfala rod blong laef, i blong faenemaot huia stret yumi, ples we yumi kam long hem, mo afta, laef folem aedentiti blong yumi mo stamba blong laef blong yumi long ples ia.
Brigham Yang i talem: “Lesen we i bigwan moa we yu save lanem, i blong save huia yuwan. … Yu mas kam long wol blong save hemia. … I no gat man i save kam blong save gud huia hem, sapos hem i no andastanem smol ol samting we i blong God; mo i no gat man i save lanem mo andastanem ol samting we i blong God, sapos hem i no save hemwan bakegen: hem i mas save huia hem, sapos no, bae hem i neva save huia God.” 7
I no longtaem i pas, ol gel blong mi oli talemaot long mi se wan gudfala parabol blong prinsipol ia, i stap long muvi ia, Laeon King. Jeneresen blong yufala, i groap wetem ol saon mo ol pikja blong muvi ia. Ating yufala i tingbaot pat ia we Simba i kasem wan visit blong papa blong hem, Mufasa, King we i ded. Afta we papa blong hem i ded, Simba i bin ronwe longwe long kingdom from se hem i filim se hem i rong, mo hem nao i mekem papa blong hem i ded. Hem i wantem ronwe long responsabiliti blong hem olsem fiuja king.
Papa blong hem i kamaot long hem mo i wonem hem: “Yu fogetem huia yu, mo semtaem, yu fogetem mi. Luk insaed long yu, Simba. Yu yu moa long wanem yu kam. Yu mas tekem ples blong yu long sekol blong laef.” Afta long hemia, invitesen ia i kambak plante taem: “Tingbaot huia yu. … Tingbaot huia yu.”
Tingting blong Simba i fasfas wetem eksperiens ia, mo i disaed blong akseptem fiuja blong hem. Hem i toktok wetem fren blong hem, kleva mangki ia, se i “luk olsem win i stap jenis.”
Mangki i ansa, “Jenis i gud.”
Mo Simba i talem: “Be i no isi. Mi save wanem mi mas mekem. Be blong gobak i minim blong fesem laef blong mi bifo. Mi bin stap ronwe long laef ia longtaem finis.”
“Yu stap go wea?” Mangki i askem hem.
“Mi stap gobak!” Simba i singaot.8
Yumi evriwan i save tekem—o tekembak—ples blong yumi insaed long sekol blong laef. Blong kam huia stret yumi. Hamas yu save mekem yu hapi mo faenem wan stret skel long laef, bae i hapen taem yu faenem, luksave, mo akseptem tru aedentiti blong yu olsem wan pikinini blong Papa blong yumi long Heven, mo afta, laef folem hemia wetem save ia.
3. Trastem Ol Promes blong God.
Naoia mi serem wetem yufala, nambatri prinsipol blong stap hapi: Trastem ol promes blong God.
Mi laekem ol gudfala toktok blong Presiden Tomas S. Monson: “Fiuja i saen semmak olsem fet blong yu.” 9 Sakses mo hapines blong yumi long laef i dipen bigwan long bilif mo tras we yumi gat se Lod bae i lidim mo gaedem yumi blong mekem fiuja blong yumi i hapen.
Mi bin luk se ol yang man mo woman we oli mekem ol bigfala samting long laef, plante taem, oli gat bigfala tras long fiuja blong olgeta taem oli yangfala nomo. Wan eksampol blong hemia i Winston Jejil, wan bigman blong Inglan. Taem hem i bin yang man, hem i gat strong tras long fiuja blong hem. Taem hem i bin stap long ami long India long 23 yia, hem i raet i go long mama blong hem, “Mi gat bilif long sta blong mi—se mi mi bon blong mekem wan samting long wol.” 10 Hemia tingting blong wan profet! Yes, i tru, hem i gat visen se bae hem i kam wan ki man long histri blong kantri blong hem, mo hem i kam man we i lidim Inglan blong win long Wol Wo 2.
Mi biliv se wanwan long yufala, ol yangfala memba blong Jos blong Jisas Kraes, yufala i gat moa bitim wan sta long skae blong lidim yufala. God i stap lukaot long yufala mo i bin mekem ol promes long yufala.
Wan skripja long buk blong Malakae i stap long hat blong Gospel ia we i Kambak, mo enjel Moronae i talem long evri visit blong hem long yangfala Josef Smit. Enjel i talem, mo yusum ol toktok blong profet Elaeja se bae hem i planem, insaed long ol hat blong ol pikinini, ol promes we God i bin mekem long ol papa blong olgeta, mo hat blong ol pikinini bae i tanem i kam long papa blong olgeta (luk long Joseph Smith—History 1:39).
Ol yang brata mo sista blong mi. From Gospel we i Kambak, yufala i ol pikinini blong promes. Bae yufala i kasem, olsem wan raet blong yufala, ol promes we God i bin mekem long ol papa blong yufala. Ol promes ia, we oli kam long Lod, oli mekem yu pat blong wan jeneresen blong King.
Plante long yufala we mi stap toktok long yufala, i kaontem ol bigfala paeonia we oli stap long famle blong yufala, ol bigfala sol we oli bin help blong stanemap Jos we i kambak tru long strong paoa long tingting blong olgeta mo sakrifaes blong olgeta. Ol jeneresen blong ol strong Sent oli kam fastaem long yufala. Ol narawan we oli stap lisin long mi tedei, oli ol paeonia blong famle blong olgeta, mo long kantri blong olgeta. Yufala i fas huk blong wanem we bae i kam wan jen we i no save finis. Nomata wanem nao stori blong yu, o wanem yu kasem, olsem ol memba blong Jos, yu joen long wan famle long saed blong spirit. Famle laen blong yu long saed blong spirit i mekem wanwan long yufala i kamaot long ol bubu, olsem we ol profet oli bin talemaot finis, mo yufala i gat raet long ol promes we God i bin mekem long olgeta.
Ridim bakegen petriakel blesing blong yufala. Long blesing ia, Lod i konfemem long yu se yu joenem wan long ol twelef traeb blong Isrel, mo from hemia, tru long fetful fasin blong yu, bae yu gat raet long ol bigfala blesing we God i promesem long Ebraham, Aesak, mo Jekob. God i promesem Ebraham se folem hamas we oli akseptem Gospel ia, bae oli singaotem olgeta folem nem blong [hem], mo bae oli kaontem olgeta olsem sid blong [hem], mo bae oli kam antap mo blesem [hem], olsem papa blong olgeta (luk long Abraham 2:10). Taem yu stap ridim petriakel blesing blong yu, luklukgud long ol promes we Lod i bin mekem long yuwan. Tingting long wanwan long olgeta. Oli minim wanem long yu?
Ol promes ia, yu save holem olgeta, mo sapos yumi mekem pat blong yumi, God bae i mekem pat blong Hem. Mi laekem tumas ol toktok we Alma i bin talem long dei we hem i givim ol tabu histri i go long boe blong hem, Hileman:
“Tingbaot, tingbaot, boe blong mi Hileman. …
“… Be sapos yu holem ol komanmen blong God, mo mekem ol samting ia we oli tabu olsem we Lod i givim oda long yu, … luk, i no gat paoa long wol o hel we i save tekemaot olgeta long yu, from we God i gat tumas paoa blong mekem ol toktok blong hem i hapen.
“From we bae hem i mekem ol promes blong hem i hapen we bae hem i mekem long yu, from we hem i bin mekem ol promes we hem i bin mekem wetem ol bubu blong yumi i hapen” (Alma 37:13, 16–17).
Blong ol promes blong God oli kamtru, oltaem i go wetem fasin blong obei long ol loa we i go wetem ol promes ia. Lod i talem se Hem, Lod, rop i fasem Hem taem yumi mekem samting we Hem i talem; be taem yumi no mekem samting we Hem i talem, yumi no gat promes (luk longD&C 82:10).
Long nara han, ol promes ia, oli no mekemsua se evri samting we i hapen long laef blong yumi bae i folem tingting blong yumi mo wanem yumi wantem. Be, ol promes blong God oli blong mekemsua se wanem we bae i hapen long yumi bae i folem tingting blong God. Samtaem, sam tes we yumi no ting long olgeta oli kamaot mo yumi mas winim; samtaem, ol blesing we oli promes oli kam longtaem afta. Be taem bae i kam we bae yumi kam blong save se ol tes ia, mo ol taem ia, oli bin blong gud blong yumi mo blong yumi progres. Bae yumi askem wanem moa?
Bigfala samting we yumi wantem long laef i blong stretem tingting blong yumi wetem hemia blong Lod—blong yumi akseptem plan we Hem i gat long laef blong yumi. Hem i save evri samting stat long stat, hem i gat visen we yumi no gat, mo Hem i lavem yumi wetem wan lav we i no gat en.
Bae mi givim eksampol blong prinsipol ia tru long wan eksperiens blong miwan. Taem mi yangfala, mi disaed blong rere blong wan eksam blong go insaed long wan long ol bes bisnis skul long Franis. Blong mi rere, i tekem wan yia, mo i gat fulap jalenj mo i nidim blong mi mas wokhad evri dei. Long stat blong yia, mi disaed se nomata se wok i had olsem wanem, bae mi no letem ol stadi blong mi oli blokem mi blong go long jos long Sandei, o blong go long wan institiut klas wan taem long wan wik. Mi bin agri blong stap olsem klak blong yang adalt wod blong mi, we i minim se mi gat moa aoa blong wok long evri wik. Mi bin gat tras se Lod bae i luksave se mi fetful mo bae i helpem mi blong kasem ol gol blong mi.
Long en blong yia, taem eksam i kam kolosap, mi filim se mi bin mekem bes blong mi. Mi stap prea strong moa mo mi livim kakae. Taem mi kasem eksam blong bigfala skul ia, mi gat ful tras se Lod bae i ansarem ol tingting blong mi. Be sore tumas, ol samting oli hapen long wan wei we i defren long hemia we mi hop from. Oral eksam long top topik blong mi i nogud evriwan—mi kasem wan mak we i no letem mi blong go long hae skul ia we mi kavetem. Tingting blong mi i brokdaon. Olsem wanem nao Lod i lego mi taem mi bin hadwok mo traehad blong stap fetful?
Taem mi go long orol eksam long seken skul long lis blong mi, mi gat fulap tu tingting mo no sua long samting. Long skul ia, eksam we i karem moa mak i wan 45 minit intaviu wetem wan juri we daerekta blong skul ia i prisaedem. Stat blong intaviu i nomol nomo—kasem taem oli askem wan impoten kwestin: “Mifala i save se yu bin stadi fulap blong rere long eksam ia. Be, bae mifala i intres blong save wanem aktiviti nao yu gat aotsaed long stadi blong yu.” Hat blong mi i pam hariap! Long wan ful yia, mi mekem tu samting nomo: stadi mo go long jos! Mekem se mi bin save se hemia i wan impoten taem blong trutok. Be, mi bin fraet se bae oli tekem nogud long saed blong membasip blong mi insaed long Jos. Be, long wan seken nomo, mi mekem desisen blong stap fetful long ol prinsipol blong mi.
Mi talem, “Mi wan memba blong Jos blong Jisas Kraes blong Ol Lata-dei Sent.” Afta, blong 15 minit olsem, mi tokbaot ol aktiviti blong mi insaed long Jos: Sabat miting, institiut klas, ol responsabiliti blong mi olsem wod klak.
Taem mi finis, daerekta blong skul i toktok: “Yu save, mi glad yu talem hemia. Taem mi yangfala, mi bin stadi long Yunaeted Stet. Wan long ol bes fren blong mi i wan Momon. Hem i wan gudfala yang man, wan man we i gat ol gudfala kwaliti. Mi tekem se Ol Momon oli ol gudfala pipol.”
Mi glad bigwan! Long dei ia, mi bin kasem wan long ol bes mak, we i letem mi blong go long skul ia wetem wan ples blong ona.
Mi bin talem tangkyu long Lod from gud fasin blong Hem. Be, long tetaem ia, mi no save akseptem se mi no bin mekem gud long gudgudfala skul ia. Blong longtaem, mi kipim, insaed long mi, wan filing se mi bin mestem wan janis mo oli no mekem i stret long mi. I bin tekem mi plante yia blong andastanem se hem i wan merikel blesing blong mi no go insaed long skul blong drim blong mi. Long seken skul ia, mi mitim sam ki pipol. Mi karem fulap samting from mi bin stap wetem olgeta long fultaem blong wok blong mi, mo kasem tedei, oli impoten long laef blong mi mo long laef blong famle blong mi. Mi save naoia se iven taem mi yangfala, Lod i bin stap lidim ol step blong mi, wetem wan save blong misin ia we bae Hem i askem mi blong mekem afta long laef blong mi.
Ol brata mo sista blong mi, afta we yu mekem evri samting long paoa blong yu, sapos ol samting oli kamaot olsem we yu bin hop long hem, rere blong akseptem tingting blong Papa long Heven. Yumi save se bae Hem i no givim long yumi eni samting we i no blong gud blong yumi. Lisin long kwaet voes we i talem sloslo long sorae blong yumi se evri bodi blong mit mo bun i stap long han blong Hem; mo yumi mas stap kwaet mo save se Hem i God (luk long D&C 101:16).
Mi jes luk wan gudfala muvi we i tokbaot histri blong Willi mo Matin hankat kampani. Long Mei 1856, tu grup i tekem moa long wan taosen Sent, oli aot long Inglan i go long Yuta. Taem we, sikis manis afta, oli kasem Sol Lek Vale long en blong rod blong olgeta, moa long 200 long olgeta oli no bin stap. Plante oli bin ded from sik, hanggri, o taed folem rod ia we i go long ples ia we oli singaotem “Saeon.”
Wan long ol paeonia we oli soem long muvi ia, i sapraesem mi. Hem i stap leftemap tingting blong ol pipol wetem gudfala glad blong hem. Be, hem i no bin semmak long plante long ol paeonia. Hem i wan smol man mo hem i handikap bigwan; hemwan, hem i wan merikel! Mi bin lanem se strong paeonia ia i Robet Pies blong Jeltenham, Inglan.
Wan long ol kompanion we i travel wetem hem, i talem se hem i wan long “ol man we i handikap tumas blong stap travel. Ol leg blong hem oli no save muv mo bodi blong hem i kruked evriwan, be hem i gat strong fet. Hem i bin save tekem hemwan wetem wan spid we i spid taem i wokbaot wetem ol stik.” 11
Wan dei, Robet Pies i tekem rong rod mo i nomo luk grup blong ol pipol. Sam man oli go aot blong faenem hem mo nao oli faenem hem we i no stap gud nating. Mi ridim ol toktok blong olgeta:
“Mifala i sek nogud; mifala i luk raon long wan olfala tri, tu bigfala wolf we tufala i stap tantanem raon mo plante igel we oli stap flae ova long tri ia, oli wet se bae hem i stop blong singaot mo muvmuvum ol stik blong hem, blong oli save jiam long hem mo kakae hem, we hem i sidaon nogud andanit long tri. …
“Mifala i kasem hem long stret taem blong sevem hem; mifala i tekemaot hem, mo putum hem long kat we mifala i tekem, mo putum hem i sidaon blong hem i stiarem kat i gobak long kamp.”
Mo afta, hemia i soem gudfala fasin blong Robet: “Be puafala man ia i plis long mifala blong mifala i letem hem i wokbaot, from hem i talem se hem i bin promes … long stat blong trip, se bae hem i wokbaot nomo i go kasem Sol Lek Siti.”
Mo afta, sore pat blong stori ia: “Be mifala i bin sevem hem nomo blong hem i travel sam moa dei nomo, from se long en blong namba sikis dei blong wokbaot, ol trabol blong hem long wol ia i finis, mo oli bin berem hem long saed blong Elkorn Reva.” 12
Sista Jolen Olfin, we i putum tugeta stori blong Robet Pies, i tokbaot hem i se: “Hem i gud tumas we Robet Pies i bin wokbaot 600 mael finis wetem stik blong hem, bifo hem i givap long ol hadwok blong wokbaot ia. Hat blong hem i wantem blong stap tugeta wetem ol Sent long Saeon, mo hem i no wantem givim hadwok long ol fren blong hem. … Robet i no bin wantem eni help o spesel tritmen.” 13
Ol brata mo sista, mi bin askem miwan kwestin ia: “From wanem God, we i sevem man ia long wan merikel blong strong fet, aot long ol wolf mo ol igel, i letem hem blong i ded long saed blong rod sam dei nomo afta?
Taem hem i ded, i bin kwaet nomo. Long muvi, hem i talem, stret bifo en blong hem:
“Ol misinari oli talem long mi se mi mi impoten, mo wan dei, bae mi stret evriwan! …
Mi bin wantem wan strong bodi oltaem. Naoia, bae mi kasem. Taem yufala i kasem Saeon, tingbaot mi.” 14
Wetem respek long Robet Pies, mi tingting long leta blong Pol i go long ol man Hibrus:
“Olgeta man ya oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk. Nao olgeta oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.
“… Taem ol man oli tok olsem, oli soemaot i klia we oli stap lukaot wan prapa ples blong olgeta. …
“Olgeta oli wantem wan narafala ples blong olgeta we i gud moa, we ples ya i stap long heven nomo” (Hibrus11:13–14, 16).
Long en, Robet Pies i luksave se ples we hem i stap go long hem i kingdom blong heven, i no Sol Lek Vale.
Hem i semmak long yumi evriwan. Ol promes blong Lod oli talem gud long yumi las ples we bae yumi go long hem. Rod blong wanwan long yumi bae i defren folem save we God i save finis. Situesen blong yumi bae i jenis, ol samting we yumi no plan from bae oli hapen, ol jalenj oli kam antap, be ol promes we God i mekem long yumi oli stap tru long fetful fasin blong yumi.
Sista An K. Pingri, i talemaot gud wanem i minim blong gat fet long ol promes blong Lod. Hem i stat blong tokbaot toktok blong Elda MaKonki olsem:
“‘Fet, we i fulwan mo i klin gud i nidim wan tras we i no muvmuv mo … wan ful tras se bae [God] i harem ol prea mo ansarem ol prea blong yumi long stret taem blong Hem. Taem yumi bilivim hemia, yumi tu, i save ‘stanap strong long bilif’ tedei, mo tumoro.” “‘Faith in its full and pure form requires an unshakable assurance and … absolute confidence that [God] will hear our pleas and grant our petitions’ in His own due time. Believing that, we too can ‘stand fast in the faith’ today and tomorrow.”
Mo afta, Sista Pingri i gohed:
“I nomata weaples yumi stap long hem, o wanem nao situesen blong wanwan long yumi. Evri dei, stret mo gud laef blong yumi i soemaot wan fet long Jisas Kraes, we i stap luk i go bitim ol harem nogud blong wol ia, ol nogud taem mo ol promes we oli no kamtru. Hem i wan bigfala samting blong gat fet we i letem yumi luk fored from dei ia ‘taem evri samting we God i promesem, bae i kamtru.’”15
Ol brata mo sista blong mi, ol situesen blong laef blong mi tedei, i tru, oli defren evriwan long wanem mi bin plan from taem mi yangfala. Be, mi no biliv se mi bin hapi moa bitim hemia. Sapos wan i bin talemaot long mi, taem mi gat 20 yia, stori blong laef blong mi kasem naoia, mi ting se bae mi agri nomo mo no tingting tu taem!
Fiuja blong Yu I Saen olsem Fet blong Yu
Mi wantem tokbaot Valeri mo mi. Moa mi luklukbak long rod blong laef blong mitufala, moa mi biliv se wanem i mekem samting i defren, i we, taem mitufala i yangfala, mitufala i serem wan semfala visen blong laef we i no save finis. Mitufala i wantem statem wan famle we i no save finis. Mitufala i bin save from wanem mitufala i save long wol mo wanem nao ol stamba tingting blong taem we i no save finis. Mitufala i bin save se God i lavem mitufala mo mitufala i impoten long ae blong Hem. Mitufala i gat ful tras ia se bae Hem i givim ansa long prea blong mitufala long wei blong Hem mo long taem we Hem i luk se i gud. Mi no save sapos yumi bin rere blong akseptem tingting blong Hem long saed blong evri samting, from se hemia i bin wan samting we mitufala i bin lanem—mo mitufala i gohed blong lanem yet. Be mitufala i bin wantem mekem bes blong folem Hem mo givim evri laef blong mitufala long Hem.
Mi testifae, wetem Presiden Monson, se “fiuja blong yufala i saen olsem bilif blong yufala.” Hapines blong yufala i dipen plante moa long ol prinsipol we yufala i jusum blong folem bitim ol aotsaed situesen blong laef blong yufala. Stap fetful long ol prinsipol ia. God i save yufala mo lavem yufala. Sapos yu laef i stret wetem plan blong Hem we i no save finis, mo sapos yu gat fet long ol promes blong Hem, nao fiuja blong yu bae i saen!
Yu gat ol drim mo gol? Hemia i gud! Wok wetem ful hat blong yu blong mekem i hapen. Afta, letem Lod i mekem haf we i stap. Bae Hem i lidim yu long ples we yu no save lidim yuwan i go. Bae Hem i mekem yu kam wanem yuwan yu no save mekem yu kam.
Long evri taem, akseptem tingting blong Hem. Stap rere blong go long ples we Hem i askem yufala blong go long hem mo blong mekem ol samting we Hem i askem yufala blong mekem. Kam man o woman ia we Hem i lukaotem yu blong kam olsem.
Mi prea se bae yu filim lav blong Papa long Heven long laef blong yu, se bae yu save hamas yu trastem yuwan olsem Hem i trastem yu. Mi prea se bae oltaem, bae yu save stap fetful, long evri taem mo long evri ples. Mi talemaot lav blong mi long yufala mo mi glad mo gat respek long eksampol mo paoa we yufala i stap givim long ful wol.
Mi testifae se laef ia i wan gudfala taem long taem we i no save finis. Yumi stap ia wetem wan bigfala gol, we i blong rere blong mitim God. Pikinini blong Hem, Jisas Kraes i laef, mo Atonmen blong Hem i wan bigfala presen blong lav we i openem doa blong hapines we i no save finis. Jos blong Jisas Kraes i stap bakegen long wol long stret wei blong hem, wetem wan profet blong God i stap long hed blong hem. Hem i wan bigfala glad mo janis blong stap long Jos ia, long nem blong Jisas Kraes, amen.
© 2012 i kam long Intellectual Reserve, Inc. Oli holem evri raet. Oli letem long Inglis: 5/12. Oli letem Translesen: 5/12. Translesen blong We Are the Architects of Our Own Happiness. Bislama. PD50039056 852