Nomata Huia Yu, Mekem Gud Pat blong Yu: No Blokem Fes blong Yu blong Haedem Nem blong Yu
Elda Kwentin L. Kuk
Blong Kworom blong Olgeta Twelef Aposol
Mi glad long janis ia blong toktok long yufala, ol yang adalt. Mi sendem lav mo griting we i kam long Fas Presidensi mo Kworom blong Olgeta Twelef. Hem i gud tumas blong stap ia long BYY–Aedaho konfrens senta. Insaed long ae blong maen blong mi, mi save luk yufala evriwan long ol defren ples raon long ful wol.
Taem mi yang olsem yufala, Presiden Deved O. MaKei i bin profet. Presiden MaKei i stap olsem Presiden blong Jos stat long 1951 go kasem 1970, we i yia we mi bin kasem 30 yia. Oltaem, i gat wan spesel samting abaot profet we i laef long taem we yu yang adalt. Mi bin lavem mo laekem Presiden MaKei. Plante taem, hem i stap storian long wan tru stori we i bin hapen taem mi stap long misin long Skotlan. Hem i stap filim se i wantem gobak hom afta we hem i stap long misin blong sot taem, mo hem i bin spendem sam aoa blong lukluk ples kolosap long Steling Kasel. Taem we hem mo kompanion blong hem i kambak long wokbaot blong tufala blong visitim kasel (bigfala haos) ia, oli bin pas long fored blong wan bilding we oli raetem wan toktok long ston we i stap antap long doa, mo toktok ia i blong Sekspia we i stap talem: Nomata Huia Yu, Mekem Gud Pat Blong Yu.
Taem hem i tokbaot eksperiens ia bakegen long wan toktok long yia 1957, Presiden MaKei i bin eksplenem: “Mi talem long miwan, o Spirit we i stap insaed long mi, ‘Yu wan memba blong Jos blong Jisas Kraes blong Ol Lata-dei Sent. Moa long hemia, yu yu wan ripresentativ blong Lod Jisas Kraes. Yu bin akseptem responsabiliti olsem wan ripresentativ blong Jos.’ Afta nao, mi tingting long wanem mitufala i bin mekem long aftenun ia. Mifala i bin go lukluk ples, mifala i bin kasem save abaot histri blong ples, hem i tru, mo mi glad tumas long hemia. …Be, hemia i no misinari wok. … Mi bin akseptem mesej we i bin kam long mi long ston ia, mo stat long taem ia, mitufala i bin traem blong mekem pat blong mitufala olsem ol misinari long Skotlan.”1
Mesej ia: Nomata Huia Yu, Mekem Gud Pat Blong Yu, i bin impoten tumas mo i bin tajem gud laef blong Elda MaKei, mekem se hem i bin yusum blong givim insperesen long hem long ful laef blong hem. Hem i bin mekem strong tingting se nomata wanem responsabiliti bae hem i gat, bae hem i mekem gud long hem.
Taem we Elda Deved B. Haet i bin misin presiden long Skotlan, hem i bin faenem ston wetem toktok ia, mo hem i bin mekem wan kopi we i stap tedei long misinari trening senta long Provo, Yuta. Plante long yufala i bin luk toktok ia mo i bin tingting hevi long mining blong mesej ia. Elda Rasel M. Nelson i bin talemaot toktok ia bakegen long namba yia selebresen blong Provo Misinari Trening Senta.
Taem mi stap tingting long huia yufala, filing i kam long mi se ating yufala i no andastanem fulwan mining blong jeneresen blong yufala. Sosaeti, olbaot long wol i bin givim ol nem long ol defren jeneresen we oli stap laef tedei. Nem we i olfala moa long Yunaeted Stet mo ol narafala kantri hem i, “Jeneresen we I Gudwan Moa” from ol samting we oli bin gotru long hem long taem blong Bigfala Trabol Taem blong Mane long ol yia 1930, mo afta, wanem oli mekem long taem blong Wol Wo 2, mo afta long hemia blong bildimap wan wol we i gud moa. Plante long ol senia Brata blong Jos oli bin tekpat long ol taem ia. Presiden Tomas S. Monson i bin stap long Nevi blong Yunaeted Stet; Presiden Boed K. Peka i bin stap long Eafos blong Yunaeted Stet; Elda L. Tom Peri i bin wan Marin soldia blong Yunaeted Stet. Bae mi serem sam long ol eksperiens we oli bin gat, afta, mo ol lesen we oli bin lanem mo tijim.
Jeneresen blong yufala, we i bon long ol yia 1980 mo eli kasem medel blong ol yia 1990, plante taem oli singaotem “Milenium Jeneresen.” Sam we oli stap givim tingting, oli no biliv long wanem we jeneresen blong yufala i save mekem. Mi biliv we yufala i gat inaf save mo fandesen blong stap olsem bes jeneresen we i bin laef, speseli blong mekem plan blong Papa long Heven i muv fored.
From wanem mi talem hemia? Jeneresen blong yufala i bin gat moa janis blong go long seminari, mo institiut bitim ol jeneresen bifo. Mo yufala i bin kasem bes trening bitim eni nara jeneresen, long Praemeri, prishud mo Yang Woman. Antap long hemia, samples 375 taosen long yufala i bin go o i stap olsem ol misinari. Yufala nomo, i ripresentem ova long wan pat aot long tri blong evri misinari we i bin stap long misin, long dispensesen ia. Samuel Smit, fas misinari long dispensesen ia, oli bin odenem hem i kam elda mo oli setem hem apat olsem wan misinari long 6 Peril 1830, dei we oli bin setemap Jos. Taem yu lukluk long evri misinari we i go long misin stat long taem ia, hem i gud tumas blong luk se wan pat aot long tri i stap long jeneresen blong yufala. Sapos yumi komperem, 76,000 misinari nomo, o i no kasem 8 pesen blong olgeta i bin go long misin long ol 12 yia taem we mi, mi bin 18 kasem 30 yia. Long yufala we i no bin kasem janis blong go long misin, givhan blong yufala i bin help bigwan tu. Kolosap haf long olgeta long Fas Presidensi mo Olgeta Twelef oli no bin gat janis blong go long wan misin.
No Stap Blokem Fes blong Yu Mo Mekem Samting Olsem se Yu Wan Narafala Man
Wetem lukluk i stap long ol plante gudfala samting we yufala i gat, wanem nao wari blong mi long saed blong fiuja blong yufala? Wanem kaonsel nao mi save givim yufala? Faswan, bae man i pusum yu blong yu mekem samting olsem se yu yu wan narafala man—blong yu haedem fes blong yu—mo kam wan we i no yu, mo wan we yu no wantem kam olsem.
Las sama, Elda L. Tom Peri mo mi, wetem Maekel Oteson, 2 long wok blong mitufala insaed long pablik afea, i bin mit wetem Ebraham Foksman long Ofis blong hem long Niu Yok. Mr. Foksman i nasonal daerekta blong Ofis Agensem blong Fasin blong Mekem Nogud Man From Ples we oli Kamaot long hem. Misin blong ofis ia i blong stopem ol toktok agensem ol man Jiu. Hem i bin stap long wok ia blong kolosap 40 yia. Stori blong laef blong hem i bin lidim hem long ples ia. Hem i bon long stat blong Wol Wo 2. Papa mo mama blong hem, Josef mo Helen Foksman, taem tufala i fesem ol loa agensem ol man Jiu, tufala i bin givim Ebraham i go long wan Katolik haosgel blong Polan, stret bifo oli go stap long wan nogud ples blong ol man Jiu long Vilna, long Lituania, long Septemba 1941. Ebraham i gat 1 yia 1 manis. Papa mo mama blong hem i bin laef tru long wo mo taem ia we oli bin kilimded evri man Jiu, be oli no bin karembak Ebraham, kasem nomo we hem i kasem 4 yia. I luk se oli bin kilim ded 1.5 milian Jiu pikinini long taem blong Nasi. Ebraham i gat proteksen tru long Katolik gel ia, from gel ia i stap tekem hem evri Sandei i go long Jos, mekem se oli haedem tru aedentiti blong hem. 3 I no wan sapraes we Ebraham Foksman i givim ful laef blong hem blong faet agensem nogud fasin agensem ol man Jiu, agensem fasin blong no laekem wan kaen pipol, fasin blong gat sot tingting mo fasin blong tokbaot kala blong skin.
Mi bin wok wetem Masta Foksman long sam taem bifo mo mi laekem tumas strong paoa long tingting blong hem, mo komitmen blong hem. Long miting blong mifala wetem hem long Niu Yok, mi bin askem hem wanem kaonsel nao bae hem i givim mifala long saed blong ol responsabiliti blong mifala insaed long pablik afea blong Jos. Hem i tingting smol taem mo afta, hem i eksplenem hamas hem i impoten blong leftemap tingting blong ol pipol blong oli no haedem o blokem fes blong olgeta. Hem i tokbaot Ku Kluks Klan. Hem i wan bodi we i bin gat paoa mo i mekem man i fraet long plante man Amerika long fas pat blong las handred yia. Wetem dres blong olgeta we i semsemmak, mo wetem kaliko we i blokem fes blong olgeta, i no posibol blong talem se huia i stap tekempat, be oli bin stap bonem ol wud kros long ples blong olgeta man we oli wantem mekem nogud long olgeta mo oli stap singaotem olgeta ol gadman blong fasin blong man. Olgeta we oli stap mekem nogud long olgeta, i gat, ol man Amerika blong Afrika, be tu, ol Katolik, ol man Jiu, mo ol narafala man tu. Ol man ia, olgeta we oli gat moa strong hat oli stap wipim ol man, kilim olgeta mo tu kilimded ol man. Masta Foksman i poenemaot se sam nomo long olgeta long Ku Kluks Klan bae oli werem braon sot long taem blong dikteta rul long 1930 long Yurop, be bigfala namba blong olgeta, taem oli no stap werem kaliko long hed, oli ol nomol pipol nomo olsem ol bisnisman, mo ol man we oli stap go long Jos. Hem i talem tu se, taem ol man ia, oli bin stap haedem nem blong olgeta taem oli haedem fes long kaliko, i mekem se oli save tekempat long ol aktiviti we bae oli no save go long hem sapos man i luk olgeta.4 Fasin blong ol man ia i bin spolem laef blong plante long sosaeti blong Amerika.
Kaonsel blong Masta Foksman i blong talemaot bigwan se i impoten blong ol man oli no mas haedem o blokem fes blong olgeta long kaliko mo mekem se man bae i no save stret nem blong olgeta.
Eli long histri blong Jos, Profet Josef, Ema mo twin pikinini blong tufala we tufala i gat 11 manis, Josef mo Julia, oli bin stap long Haeram, Ohaeo, long Jonson fam. Tufala pikinini i bin sik long sik misel. Josef mo smol boe blong hem, tufala i bin silip long timba bed kolosap long doa.
Brata Mak L. Staka i bin talem bakegen wanem i bin hapen:
Long naet, wan grup blong ol man we oli pentem fes blong olgeta i blak, oli pusum doa mo oli pulum Profet i go aotsaed, mo oli kilim hem mo oli kapsaetem kolta long hem mo Sidni Rigdon.
“Taem Emma i bin luk Josef we oli kilim hem mo putum kolta long hem, ae blong hem i tudak. …
“… Nomata Profet i bin lusum wan tut blong hem, i kasem kil long saed blong bodi blong hem, wan saed hea i nogat, asid i stap kakae skin blong hem, Profet i bin go prij long nomol Sandei wosip seves. Long medel blong olgeta Sent, i bin gat 4 long ol memba blong ol nogud man ia. 5
Pat we i moa nogud long trabol taem ia, i we smol Josef i bin stap long kolkol blong naet taem oli bin pulum papa blong hem i go, mo hem i kasem wan nogud flu mo hem i bin ded sam dei afta.
Hem i gud tu blong luk se olgeta we oli bin tekpat long taem blong kilimded Profet Josef mo brata blong hem, Haeram, oli bin pentem ol fes blong olgeta blong traem haedem huia olgeta.6 Olgeta ia olsem, we oli stap haedem nem blong olgeta ia, mo oli tekpat long ol sikret plan, oli mas lukaot. Yumi lanem insaed long Buk blong Momon, se Lusifa, “…i tantanem tingting blong ol pikinini blong ol man blong mekem ol sikret grup we oli stap kilim ol man i ded, mo gat evri fasin blong ol sikret wok blong tudak.” (2 Nephi 9:9; see also 3 Nephi 6:27–30).
Nao. Mi no stap talem se i gat eniwan long yufala we i stap mekem ol nogud kaen samting ia we mi jes tokbaot. Be mi biliv, se tedei, fasin blong no stap talemaot nem blong yumi i moa isi bitim bifo, be long narasaed i gat ol impoten prinsipol blong folem blong no stap haedem fes, be blong stap “tru long fet we sam man oli bin ded from.”7
Wan long ol bigfala proteksen agensem fasin blong mekem ol nogud joes, i blong no haedem nem blong yu. Sapos yu luk se yu wantem olsem, plis, yu mas save se hem i wan saen blong bigfala denja, mo hem i wan tul blong enemi blong pusum yu blong mekem wan samting we bae yu no mekem sapos man i save nem blong yu. Wan long ol risen we mifala i stap talem long ol misinari blong dresap simpol mo blong ol elda oli mas sevem fes i klin, i blong mekem se i no gat kwestin long huia olgeta, mo olsem wanem nao oli mas mekem samting. Ating sam bae i askem kwestin: Be hemia i smol samting nomo? Mi no ting. Tingbaot olsem wanem klos o ol samting blong flasem bodi we profet Moronae i tokbaot insaed long Buk blong Momon, i semmak olsem fasin blong gat hae tingting, taem man i werem “klos we i naes tumas.” Hem i talem tu se fasin blong hae tingting, we i kam wetem “ol klos we i naes tumas” i go wetem fasin blong “rao, mo wantem smasem gud narafala man, mo givim hadtaem, mo evri kaen rabis fasin” (Momon 8:36). Mi wari tumas se, tedei, fasin blong yumi blong dresap mo flasem bodi blong yumi, i wan saen blong stap agens, o fasin blong no stap obei long ol standet blong gud fasin, mo i stap spolem ol standet blong gud fasin blong ol narafala man.
Mekem Samting Folem Ol Tru Bilif blong Yu
Seken kaonsel we bae mi givim i olsem: Mekem samting i folem ol tru bilif blong yu, taem yu spendem taem long ol samting we bae i bildimap mo developem fasin blong yu mo bae i helpem yu blong kam moa olsem Kraes. Mi hop se i no gat wan long yufala i lukluk se laef i faswan, “taem blong fani mo pleplei,” be bae i luk se i “wan taem blong rere blong mitim God” (Alma 34:32).
Wan gudfala eksampol blong mekem gud pat blong yumi mo yusum gud taem long stret fasin, i kamaot long wan samting we i bin hapen long laef blong Elda L. Tom Peri taem we, olsem wan Marin soldia, hem i bin stap long ami fos blong Yunaeted Stet long Japan long en blong Wol Wo 2. Elda Peri i bin serem hemia taem hem i bin talem spesel witnes blong hem abaot Sevya, we oli stap soem long senta blong ol visita.
Stori blong Elda Peri
“I bin gat wan eksperiens long laef blong mi we i rimaenem mi oltaem long glad ia we mi kasem aot long kwestin ia taem mi askem: “Wanem nao Sevya bae i mekem long situesen ia?”
“Mi bin pat blong fas grup blong ol Marin we i go soa long Japan afta long saening blong pis triti afta long Wol Wo 2. Taem mifala i go insaed long siti blong Nagasaki we i smas gud, hem i bin wan long ol eksperiens long laef blong mi we i sore tumas. Wan bigfala pat blong siti i bin smas fulwan. Sam long ol ded oli no berem olgeta yet. Olsem tim blong wok, mifala statem mekem ol hedkwota mo bin go long wok.
“Situesen ia i no bin gud nating, mo sam long mifala i bin wantem blong help moa. Mifala i bin go long hedkwota blong mifala mo askem raet ia blong helpem bildimbak ol Kristin Jos. From nomo gavman i bin stopem long taem blong wo, ol jos ia i bin stop blong wok. Sam bilding i bin smas gud evriwan. Wan grup blong mifala i bin wiling blong fiksim mo plastarembak ol japel ia long taem we mifala no wok blong mekem se mifala i save gat bakegen ol Kristin seves.
“Mifala i no toktok o andastanem lanwis. Wanem we mifala i save mekem i blong finisim wok blong bildimbak bilding ia. Mifala i bin faenem ol minista we oli no bin save wok long taem blong ol yia blong wo, mo leftemap tingting long olgeta blong gobak long ol pulpit blong olgeta. Mifala i bin gat wan gudfala eksperiens wetem ol pipol ia taem oli kasem bakegen eksperiens blong fridom blong praktisim Kristin bilif blong olgeta.
“Wan samting i bin hapen taem mifala i stap livim Nagasaki blong gobak hom we oltaem mi stap tingbaot. Taem mifala i stap go insaed long tren we bae i tekem mifala i go long ol sip blong tekembak mifala i go hom, i bin gat plante nara Marin we oli bin jikim mifala. Oli bin gat ol gel fren blong olgeta we oli stap talem tata long olgeta. Oli bin laf long mifala mo talem se mifala i bin mestem ol gudfala taem, taem stap long Japan mo mifala i bin westem taem blong mifala blong wok mo plastarem ol wol.
“Taem oli stap gohed blong jikim mifala, antap lelebet kolosap long stesen blong tren, kolosap tu handred long ol impoten Kristin Japanis we mifala i bin fiksim ol jos blong olgeta i stap singsing “Go Fored Ol Kristin Soldia.” Oli bin kamdaon mo givim long mifala plante presen. Afta oli stanap laen folem rod blong tren, mo taem tren i stat blong folem rod, mifala i putumaot ol han blong mifala i go aotsaed mo tajem ol fingga blong olgeta taem mifala i go. I nomo gat toktok; mifala i sore tumas long olgeta. Be mifala i glad tumas se mifala i save givim smol help long wan wei blong bildimbak Kristin laef long wan nesen afta long wo.
“Mi save se God i laef. Mi save se yumi evriwan i ol pikinini blong Hem mo we Hem i lavem yumi. Mi save se Hem i bin sendem Pikinini blong Hem blong kam aton mo sakrifaes blong evri man long wol, mo olgeta we oli gat gospel blong Hem mo folem Hem bae oli stap glad long laef we i no save finis, we i bigfala presen bitim eni nara presen blong God. Mi save se Hem i lidim bakegen restoresen blong gospel long wol, tru long ministri blong Profet Josef Smit. Mi save se blong stap glad mo hapi blong oltaem, yumi save faenem nomo long taem blong yumi long wol wetem eksperiens we bae i kam taem yumi folem Sevya, obei ol loa blong Hem, mo kipim ol komanmen blong Hem. Hem i laef. Hemia i witnes blong mi long yu long tabu nem blong Hem, we i Jisas Kraes, amen.”8
Tingbaot se i minim wanem blong sam soldia oli spendem taem blong bildimbak ol Kristin Jos, be sam narafala soldia oli stap go mekem ol krangke, mo rabis wok. Plis tingting hevi mo tekem step blong jusum olsem wanem bae yu yusum taem blong yu.
Taem mi lukluk vidio ia, i mekem mi tingbaot wan long ol fas memori blong mi taem mi jes faef yia. Stek presiden blong mifala, papa blong Elda Peri. Long en blong Seken Wol Wo, hem i bin mekem evri soldia we oli bin kambak oli stanap antap long stan long japel long taem blong sakramen miting. Oli bin werem ol ami yunifom blong olgeta, mo wanwan i bin serem sot testemoni blong olgeta. Presiden Peri i bin krae taem tufala boe blong hem, Elda Peri wetem yangfala brata blong hem, Ted, tufala i serem testemoni. Mi smol boe, mo hemia i givim insperesen mo i tajem tingting blong mi. Mi no tingbaot wanem tufala i bin talem, be mi tingbaot filing we mi bin gat.
Olsem we yufala i save luk long eksampol insaed long vidio blong Elda Peri, mi no stap tokbaot se bae yufala i putum relijin blong yufala i flasem klos blong yufala, o blong yufala i priten blong stap fetful. Hemia i save mekem yufala i sem, mo mekem sem long Jos. Mi stap tokbaot blong yufala i mas kam huia yufala i mas kam. Taem mifala i bin stap wok long misinari gaed, Prijim Gospel blong Mi, mifala i bin filim se bae i wan gudfala gaed blong yusum long ful laef, we i blong ol misinari mo ol memba, speseli long japta 6, “Olsem Wanem Mi Divelopem Ol Fasin Olsem Hemia blong Kraes.” Taem yufala i stap traem blong mekem gud pat blong yufala, mo faenemaot ol fasin ia we yufala i wantem developem, bae yufala i wantem blong “raetemdaon mo stadi … ol ples long skripja we oli stap tij abaot ol fasin ia,” blong “yufala i setem ol gol mo mekem ol plan blong olsem wanem blong yusum ol fasin ia long laef blong yufala”, mo blong yufala i “prea long Lod blong helpem yufala blong developem ol fasin ya.”9 Taem yufala i mekem olsem, yufala i no mas blokem fes blong haedem nem blong yufala.
Sam long yufala i bin foldaon long kaen fasin ia, we i go i bitim wanem we i fani mo pleplei. Olgeta we oli stap insaed long ponografi o eni narafala kaen fasin blong ponografi, oli stap mekem samting we i defren long wanem we oli rili stap o mas stap. I gud blong luk se kolosap evriwan we i stap insaed long ponografi i gat wan giaman nem mo i haedem hem we hem i stap tekpat. Oli stap haedem fasin blong olgeta, we oli save se i rong mo i save spolem evriwan we oli laekem. Ponografi i wan rabis sik we i spolem gud nem blong hem long fored blong God, be tu, i save prapa spolem ol mared mo famle mo i gat wan nogud risal long sosaeti. Fasin blong stap adik long Intanet mo ponografi, tufala ia i spolem ol mared.10 Taem yufala i stap muv i go from mared, yufala i no mas blokem fes blong yufala blong haedem ol fasin we oli rong we bae i spolem yufala o mared blong yufala.
Long yufala we yufala i foldaon long fasin ia we i spolem yufala, plis, yufala i mas save se yufala i save sakem sin, mo kam gud bakegen. Fasin blong sakem sin i mas kam fastaem long hiling. Blong kam gud, bae i save tekem longtaem. Bisop i save givim advaes long yufala long olsem wanem yufala i save kasem help we yufala i nidim blong yufala i kam gud bakegen. Mifala i bin askem ol bisop blong oli sendem yufala long ol pipol we oli beswan blong helpem yufala.
Long saed blong ponografi mo rabis tingting long saed blong seks, i gat ol nara rabis fasin tu we i givim posen long sosaeti mo i daonem stamba blong gud fasin. Hem i wan praktis tedei blong wan i haedem nem blong hem blong raetem ol toktok we i talem nogud man, i daonem man, hemia long intanet. Sam oli singaotem “hot toktok”. Sam kampani oli traem blong luktru long ol toktok ia. Eksampol Niuspepa New York Times bae i no save akseptem ol toktok we i agensem wan man, i gat swea, rabis toktok, tok agensem God, tok we i tokbaot nogud man, tok we i mekem man i konfius, mo fasin blong SINGAOT. …
“Niuspepa The Times i leftemap tingting blong man i yusum stret nem blong olgeta, from se, ‘mifala i faenem se ol pipol we oli yusum stret nem blong olgeta oli stap talem ol samting we i gud mo i givim tingting.’”11
Aposol Pol i bin raetem:
“Yufala i no krangke: rabis toktok i save spolem fasin blong man.
“Yufala i mas stretem tingting blong yufala, mo lego ol sin blong yufala. I gat sam long yufala we oli no save God nating”(1 Korin 15:33–34).
Hem i klia se rabis toktok i no wan kwestin blong nogud fasin nomo, be sapos olgeta we oli ol Lata-Dei Sent oli stap praktisim, bae oli spolem olgeta we oli no save God nating, o oli no gat wan testemoni abaot Sevya.
Eni fasin blong yusum Intanet blong mekem man i fraet, spolem nem blong wan man, o putum man long nogud ples, i rong. Wanem yumi stap luk long sosaeti i we, taem ol pipol oli stap blokem fes o nem blong olgeta, bae oli mekem ol kaen fasin ia we i spolem gud olgeta long fes blong pablik. Hem i agensem tu ol stamba prinsipol we Sevya i bin tijim.
Wan long ol stamba mesej blong gospel blong Jisas Kraes we yufala i bin lanem taem yufala i yang, i “God i lavem tumas ol man long wol, nao hem i givim mi stret pikinini blong hem, blong olgeta man we oli bilif long mi oli no save lus, oli gat laef we i no save finis”(Jon 3:16; luk tu long D&C 34:3). Sevya i bin eksplenem se Hem i no bin kam blong panisim wok be blong sevem wol. Afta, hem i tokbaot wanem ia i panismen:
“Delaet i kam long wol finis, be ol man oli no laekem delaet, oli laekem tudak from we fasin blong olgeta i no stret.”
“Man we i stap mekem fasin we i no stret, hem i no laekem delaet, i agens long hem, mo i no save kam long delaet, from we delaet ya bambae i soemaot ol fasin blong hem.
“Be man we i stap mekem ol stret fasin nomo, hem i save kam long delaet, blong delaet ya i soemaot we ol fasin we hem i stap mekem, be God i bin givhan long hem blong i mekem.” (Jon 3:19–21; luk long ol ves 17–21).
Man we i stret mo gud i no nidim blong blokem fes blong haedem nem. Mi laekem tru stori ia blong laef blong Presiden Tomas S. Monson. Hem i bin kasem 18 yia nomo long en blong Wol Wo 2. I tru, wo long Yurop i bin finis, be wo long Pasifik i bin gohed.
Hem i joenem Nevi blong Yunaeted Stet mo oli bin sendem hem long San Diego, Kalifonia. Bae yu tingbaot stori blong hem long las jeneral konfrens. Long fas Sandei blong hem, sajen i laenemap olgeta blong oli go long jos. Hem i sendem ol Katolik oli go wanples, ol man Jiu long nara ples, mo hem i bin traem blong sendem haf we oli stap oli go long Protestan miting. Presiden Monson i bin save se hem i no wan Katolik, Jiu o Protestan; hem i wan Momon. Hem i gat paoa long tingting blong stanap long ples blong hem mo i glad blong faenem se i bin gat ol nara fetful memba oli bin stanap biaen long hem. Bae i isi blong go wetem bigfala grup blong ol Protestan. Hem i mekem tingting blong hem i strong blong oli save huia hem olsem we hem i stap mo i mekem gud pat blong hem.12
Setem Ol Gol we Oli Stret
Nambatri kaonsel blong mi i abaot sam long ol gol we yufala i mas tingting long olgeta. Long kolosap semtaem we Elda Peri i bin stap long Japan wetem ol Marin, Presiden BoedK. Peka i bin stap long Japan wetem Eafos long en blong Wol Wo 2.
Long toktok blong hem long 100 yia blong seminari, long 22 Jenuware long yia ia, hem i bin eksplenem se hemia i wan taem we hem i lanem samting long laef blong hem.13 Long 2004, mi bin go wetem Presiden Peka mo sam narawan moa i go long Japan. Hem i gat wan janis blong gobak long step blong hem mo tingtingbak long sam long ol eksperiens mo desisen we hem i bin mekem long taem ia. Hem i tokbaot sam long seminari toktok ia. Wetem raet blong hem, mi serem sam tingting mo filing blong hem.
Presiden Peka i tokbaot ol eksperiens we i bin hapen long wan aelan aotsaed long kos blong Okinawan. Hem i talem se hemia hil blong hem long ples we i stap hemwan. Hao hem i bin rere mo taem hem i mitim ol nara memba i mekem bilif blong hem long gospel tijing i kam strong moa. Be hem i no gat yet wan konfemesen—stret save ia long saed blong wanem hem i bin filim se i tru.
Man we i raetem laef blong Presiden Peka i talem wanem i hapen: “Agensem pis blong konfemesen we hem i bin stap lukaotem, hem i kam blong fesem hel blong wo agensem ol man we oli gat nating wetem wo. Hem i wantem wan taem blong stap hemwan, wan taem blong tingting, nao wan dei hem i klaem long wan ples we i hae moa bitim solwota. Long ples ia hem i faenem ol hafhaf blong wan olfala haos, mo wan plantesen blong poteto we i gro olbaot. Long medel blong ol plan we oli stap go ded, hem i luk ded bodi blong wan mama wetem tufala pikinini blong hem. Hemia i mekem hem i harem nogud tumas, mo i miks wetem ol filing blong lav long famle blong hemwan, mo evri famle.”14
Afta, hem i go insaed long wan ples we ol ami oli bildim, mo i lukluk ples, i tingting hevi, mo i bin prea. Presiden Peka, taem i lukbak long taem ia i talem se i wan taem we hem i kasem konfemesen. Hem i bin kasem insperesen long wanem bae hem i mas mekem wetem laef blong hem. I tru, hem i no save nating se bae hem i kasem hae mo tabu koling ia we hem i gat naoia. Visen blong hem, i blong hem i kam wan tija, we i tokbaot bigwan ol tijing blong Sevya. Hem i bin mekem tingting blong hem we bae hem i gat wan laef we i stret mo gud.
Tingting i kam strong long hem se bae hem i gat wan waef we i stret mo gud mo tugeta, bae tufala i lukaotem wan bigfala famle. Yangfala soldia ia i bin luksave se wok ia we hem i jusum bae i givim naf mane long hem, mo waef blong hem bae i serem ol sem tingting mo bae i wantem blong laef wetem smol samting nomo. Yufala we yufala i kam blong save Sista Dona Peka, hem i bin, mo hem i stap yet, long Presiden Peka, kompanion we i stret evriwan. I neva gat taem we mane i ova smol, be tufala i bin gat evri samting we tufala i nidim. Tufala i bin lukaotem 10 pikinini mo tufala i bin mekem sakrifaes. Naoia tufala i gat 60 apupikinini mo 79 smol apupikinini.
Mi save tingbaot ol gudfala filing we mi gat taem mi bin lanem se hem i bin sem, olsem wan niu Jeneral Atoriti, blong go wetem wan long ol senia Brata long wan miting blong ol lida blong Jos from se hem i no gat wan gudfala waet sot blong werem.
Mi serem tru stori ia wetem yufala, from se plante taem tumas, gol blong yumi i folem wanem we wol i luk i impoten. Ol stamba samting oli simpol nomo blong ol memba we oli bin kasem ol odinens blong sevem man. Stap stret mo gud. Bildimap wan famle. Faenem wan stret wei blong lukaotem famle. Mekem wok taem oli singaotem yu. Rere blong mitim God.
Sevya i bin tijim se “stamba blong prapa laef blong man i no stap long ol samting we hem i gat” (Luke 12:15). Afta Hem i bin yusum wan parabol:
“I gat wan rijman we garen blong hem i stap karem fulap kakae:
“Nao hem i stap tingting hemwan se, ‘bambae mi mekem olsem wanem? ol haos blong mi oli no moa naf nao blong mi save putum ol kakae ya i stap gud long hem.’
“Nao hem i talem se: ‘i gud mi mekem olsem. Bambae mi mas tekemaot ol haos ya, mo mi mas wokem sam narafala haos bakegen we oli bigwan moa. Nao mi save putum ol kakae ya i stap gud insaed, wetem ol narafala samting tu we mi gat.
“Nao bambae mi save talem se: ‘Man! Mi wan laki man. Naoia mi gat plante samting we mi save yusum blong plante yia. I stat naoia mi save spel, mi save kakae, mi save dring we mi gat hapi taem olwe nomo.
“Be God i talem long hem se: ‘Yu yu no gat hed. Long naet ya nomo, bambae mi tekemaot laef blong yu. Nao hu man bambae i tekem ol samting ya we yu yu hivimap rere i stap.?’
“Bae i olsem nao long olgeta we oli stap hivimap plante samting we i blong olgeta nomo, be long fes blong God, oli no rijman nating.” (Luk 12:16–21).
Bildimap Kantri blong Yu Mo Komuniti we Yu Stap Laef Wetem
Antap long ol fasin, kwaliti mo desisen we yufala i gat, sapos yufala i mas stap olsem jeneresen we yufala i nid blong stap, bae yufala i bildimap kantri blong yufala, mo komuniti we yufala i stap laef wetem. Jeneresen blong yufala, olsem jeneresen we i hae moa, bae i nidim blong protektem stret mo gud fasin mo fridom blong relijin. Jiu/Kristin laef we yumi karem long ol olfala i kam, i bigwan, be tu, i wan samting we i nid blong stap long plan blong Papa long Heven. Yumi nidim blong holemtaet blong ol fiuja jeneresen oli yusum. Yumi nidim blong joenem ol gudfala pipol, mo tu, ol pipol blong nara jos—speseli olgeta we oli filim se oli mas ansa long God. Olgeta pipol ia bae oli andastanem from wanem, tedei long naet, yumi stap tokbaot “blong nomata huia yu, mekem gud pat blong yu.” Sakses blong leftemap ol Jiu/Kristin valiu mo fridom blong relijin bae i makem jeneresen blong yufala olsem jeneresen we i hae moa we yufala i mas kam.
Wetem ol jalenj we oli stap long wol tedei, Fas Presidensi mo Kworom blong Olgeta Twelef oli wari se yufala i mas tekempat long rod blong politik long kantri we yufala i stap long hem. Jos i stanap hemwan, i no gat saed long politik mo i no sapotem ol kandidet o pati. Be mifala i wantem luk, se ol memba blong jos oli stap fulwan blong sapotem ol kandidet mo ol pati we oli jusum, we oli stanap long ol prinsipol we bae i protektem wan gud gavman. Doktrin blong yumi i klia, i talem se ol man we oli ones mo waes, oli mas wok strong blong lukaotem huia olgeta (luk long D&C 98:10). Taem ol nogud man oli rul, ol pipol oli krae sore (luk long D&C 98:9). Hemia i minim se evriwan i mas filim se hem i gat wok ia blong go vot.
Long ol stet ia long Yunaeted Stet we i gat ol pati oli stap gat miting, yufala i mas kam blong save ol poen mo ol kandidet blong olgeta mo tekpat. Eksampol, pati miting long Yuta mo Aedaho blong ol defren pati bae i stat long wik ia mo i go kasem medel blong manis Epril. Sapos yufala i go, bae yufala i save tekpat. Mifala i hop se bae yufala i jekem taem blong ol pati miting ia we yufala i jusum mo afta, yufala i filim se yufala i mas go. Mifala i hop se bae i olsem ia nao long evri tru sitisen, ol memba mo no memba blong Jos, long evri stet mo evri kantri we bae i gat ileksen. Praes blong fridom, oli bin pem i hae tumas mo risal we i kam taem yumi no tekpat i bigwan tumas blong eni sitisen i filim, mekem se yufala i no save sarem ae long responsabiliti ia.
Plis, yufala i mas save se mifala i gat bigfala tras long yufala. Lidasip blong Jos i ones blong talem se hem i biliv se yufala i save bildimap kingdom i bitim ol jeneresen blong bifo. Yufala i gat lav mo tras blong mifala, be tu, prea mo blesing blong mifala. Mifala i save se sakses blong jeneresen blong yufala i stamba blong Jos i gohed blong stanap mo blong kingdom i gro. Mifala i prea se bae yufala i mekem gud pat blong yufala: yufala i no stap blokem fes blong yufala, mo yufala i mekem samting folem huia yufala, setemap ol stret gol, mo bildimap kantri mo komuniti we yufala i laef wetem.
Mi endem toktok wetem witnes blong mi abaot Restoresen blong gospel tru long tul ia, we i Profet Josef Smit. Josef Smit i bin luk God Papa mo Jisas Kraes. Papa blong yumi long Heven i wan papa we i gat lav, we i gat plan we i blesem wanwan long ol pikinini blong Hem. Jisas Kraes i Sevya blong yumi mo Atonmen blong Hem i Stamba blong evri samting long histri. Tabu Spirit i tijim yumi mo i testifae long yumi abaot Papa mo Pikinini. Long ol samting ia, mi testifae olsem wan witnes blong Sevya, long nem blong Jisas Kraes, amen.