Em̧ōj ke Aō Lo Pein Anij ilo Mour eo Aō?
Nokon in Jotan an CES n̄an Rūm̧m̧an Ded ro• M̧aaj 3, 2013• University of Texas Arlington
N̄e ij itok itak ippān ļeo ippa ilaļ in, ij būrom̧ōj n̄an lo bwe elōn̄ jodikdik ro rej en̄jake ajimakeke im pere bwe Irooj ejeļā kajier ak bwe Ej iakwe er. Iaar jar kōn pedped ko imaron̄ kar kalikkari joten in me enaaj kar jipan̄ bwe kom̧in jeļā Irooj ejeļā kajiemi kom̧ im iakwe kom̧. Ij jar kōn Jetōb eo n̄an jipan̄ eō kwaļo̧k ennan in.
Inaaj kōjerbal naan ko jān juon al in jemenere n̄an ejake ennaan ko aō:
Ej aikuj wōr lojiln̄id n̄an ron̄ naan eo an Irooj,
Im māj n̄an lo karōk eo An,
Ne n̄an ļoor iaļ eo An,
Im Bōro ko n̄an meļeļe.
(Steven K. Jones, “Hearts that Understand,” Hold to the Rod Songbook [1988], 20)
Lojilin̄i ko n̄an Ron̄ Naan eo an Irooj
M̧oktata, ej aikuj wōr lo̧jilin̄id n̄an ron̄ naan eo an Irooj. Jemaron̄ ron̄jake ainikien Irooj ilo ad ekkatak jeje ko rekwojarjar (lale D&C 18:34–36). Ke iaar detta wōt kom̧, Spencer W. Kimball eaar Būreejtōn eo an Kabun̄ in. Juon kout jān e eaar āinwōt juon unin tōl n̄an eō aolepān mour eo aō. Eaar ba: “Iaar kile bwe n̄e ij alijaļļo̧k kōn jemjerā eo aō ippān Anij im n̄e ej āinwōt bwe Anij ejjab ron̄jake eō im Anij ejjab ekōnono n̄an eō, bwe eļap aō ettoļo̧k. Eļan̄n̄e emakijkij aō ekkatak jeje ko rekwojarjar im ilo m̧ool jepeļļo̧k eo jān Anij ij en̄jake epaaktok” (Teachings of Presidents of the Church: Spencer W. Kimball [2006], 67).
Ij kam̧ool eļan̄n̄e ewōr lo̧jiln̄id n̄an ron̄ naan eo an Irooj, jenaaj en̄jake iakwe eo An n̄e Ej ekōnono n̄an kōj kōn jeje ko rekwojarjar.
Māj ko n̄an Lo Karōk eo An
Karuo, ej aikuj wōr mejād n̄an lo karōk eo An. Juon raan iaar ļōmņak kōn juon mijenede eaar ro̧o̧l iaar jeļā kajien ke, ilo jidimkij, iaar bōk juon email jān e. Liin eaar jiron̄ eō ekōjkan an kar en̄jake an Irooj jerbali menin bwilōn̄ ko kōn e ilo jikin an mijen, bōtaab jān ke eaar ro̧o̧l n̄an kapejuknen liin eaar ļōmņak jet iien eļan̄n̄e Eaar lukkuun jeļā kōn e.
Ilo uwaak eo aō n̄an e, iaar kwaļo̧k jet kapilōk ko raorōk Elder Eyring eaar leļo̧k n̄an rijikuuļ in BYU-Idaho ro. Eaar ba: “Ij kōjeram̧m̧an kom̧ bwe aolep raan, eļan̄n̄e kom̧ naaj kajjitōk ilo jar n̄an kwaļo̧k ia eo pein Anij ej waļo̧k ie ilo mour eo ami raan jab in, Ij kōjeram̧m̧an kom̧ bwe kom̧ naaj lo men jab in. Naaj kwaļo̧k n̄an kom̧. Bwe kom̧ naaj lo bwe E ej tōl im kōjbwebweik im kotak kom̧, im bwe E ejeļā kajiemi” (“A Steady, Upward Course,” Brigham Young University–Idaho Devotional, Jept. 18, 2001], web.byui.edu/devotionalsandspeeches).
Innām iaar kōmeļeļeik ekōjkan aō kar jar aolep raan kōn kōjeram̧m̧an in im kar lo kareel an Anij ej jerbal n̄an jelet eō. Iaar kam̧ool n̄an e bwe Jemedwōj Ilan̄ enaaj kar kōm̧m̧ane ejja āindein n̄an e.
Ij kam̧ool, ilo ad jar kōn māj ko n̄an lo karōk eo An, jenaaj kile an Anij bōk kuņaan ilo mour ko ad im jeļā bwe Ejeļā kajied.
Ne n̄an Ļoor Iaļ eo An
Jilu, ej aikuj wōr need n̄an ļoor iaļ eo An. Elōn̄ rūm̧m̧ad ded ro rej jab m̧ōņōņō, ejjeļo̧k kōjatdikdik, im ebbeer kōnke iien ko rej ļōmņak kaki naaj kar waļo̧k ilo mour ko aer rejjan̄in waļo̧k. Jet ebōd aer tōmak eļan̄n̄e Anij ejjan̄in kar leļo̧k n̄an er lem̧ōņōņō ak kōjeram̧m̧an ko raar kōjatdikdik kaki ak ļōmņak rej aikuj kar būki, Ejjab kea. N̄an kwaļo̧k jab m̧ōņōņō eo aer ippān Anij, jet rej jerwane tōmak, jab kautiej bujen ko, likūt lōke eo aer ilo m̧ōņōņō ko an laļ in, im oktakļo̧k jān Anij n̄an er make. Ijello̧kin an wōr neer n̄an ļoor iaļ eo an jim̧we, rej ilo̧k jān karōk an ko̧jpeļ eo, jejļo̧k, im erom jōbwābwe. Jejeļā juon eo me ej “jejļo̧k jān iaļ eo.” Jemaron̄ en̄jake iakwe eo an Anij ilo mour ko ad ilo ad lo tōprak eo em̧m̧an an elōn̄ ilo ad pukōtļo̧k n̄an jerbal im lo̧mo̧o̧r.
Iaļ eo an Irooj ealikkar kar kōkalleik jān katak ko an rikanaan ro, rilolo ro, im rikkwaļo̧k revelesōn ro. Allōn̄ in laļ ej kweilo̧k eo eļap. Ij kam̧ool, eļan̄n̄e jej lukkuun pukōt n̄an kile juon kajjitōk an juon make ak n̄urbōktak n̄an bōk n̄an kweiļo̧k, Irooj enaaj uwaake kōj kōn ennaan ko an ro Rikarejeran kar kapit er. Jenaaj en̄jake iakwe eo An im n̄ūrbōktak eo im ewōr peran eļapļo̧k im ne dim n̄an ļoor iaļ eo An kiiō im indeeo.
Bōro ko n̄an Meļeļe
Emen, jej aikuj bōro ko n̄an meļeļe menin letok eo an Pinmuur eo an Jisōs Kraist. Elder Bednar eaar katakin: “Ej juon iaan men ko n̄an jeļā bwe Jisōs Kraist eaar itok n̄an laļ in n̄an mej kōn kōj—ej aorōk tata eo im pedped eo n̄an katak eo an Kraist. Bōtaab jej barāinwōt aikuj in kam̧oolol bwe Irooj ej ikdelel, kōn Pinmuur eo An im kōn kajoor eo an Jetōb Kwojarjar, n̄anmour ilo kōj—ejjab wōt n̄an tōl kōj ak barāinwōt n̄an kōkajoor kōj” (“The Atonement and the Journey of Mortality,” Ensign, April 2012, 42).
N̄a n̄a, Pinmuur eo an Jisōs Kraist ej letok kaenōm̧m̧an eo an kajjojo im kein kam̧ool ekajoor an iakwe eo an Anij n̄an kōj. Ej kōkajoorļo̧k kōj n̄an kōm̧m̧ani men ko reppen—men ko jejjab ļōmņak jemaron̄ kōm̧m̧ani. Ej jipan̄ kōj dāpdāp wōt n̄e jej jab meļeļe ankilaan Anij im iien eo ilo mour ko ad. Ij kam̧ool Anij ej mour, im jenaaj en̄jake iakwe eo An im jeļā bwe Ejeļā kajied ilo ad ajeļo̧k būruwōd n̄an meļeļe eļapļo̧k kōjeram̧m̧an ko an Pinmuur eo an Nejin, Jisōs Kraist.
Ej aikuj wōr lo̧jilin̄id n̄an ron̄ naan eo an Irooj,
Im māj ko n̄an lo karōk eo An,
Ne n̄an ļoor iaļ eo An,
Im bōro ko n̄an meļeļe.
(Jones, “Hearts that Understand,” 20)
Ilo etan Jisōs Kraist, amen.
© 2013 jen Intellectual Reserve, Inc. Aolep jim̧we rej pād ippān. Kōmālim ilo kajin English: 8:12. Kōmālim ukook eo: 8/12. Ukook eo an Have I Seen the Hand of God in My Life? Marshallese. PD50045417 874.