2:3

Rikanaan eo Ad: Thomas S. Monson

William R. Walker

Jen Jiljilimjuonn̄oul eo

Nokon in Jota eo an CES n̄an Rūm̧m̧ad Ded ro • Māe 5, 2013 • Brigham Young University–Idaho

“Kimij Kamolol Yuk, O Anij, kōn juon Dri kanan.” (Hymns, no. 26). Al in ej juon iaan kōkkaļļe ko an Kabun̄ in. Jej kam̧oololAnij kōn juon rikanaan ej tōl kōj ilo raan kein āliktata.

Bwe Anij eaar kōpooj juon rikanaan n̄an kōj ej ioļapļap n̄an tōmak eo an Armej ro Rekwojarjar ilo Raan-ko Āliktata aolep jikin. Jejeļā bwe Anij ej mour im bwe Ej iakwe kōj. Jejeļā bwe Eaar jilkintok Nejin, Jisōs Kraist, bwe en erom ad Rilo̧mo̧o̧r im Ripinmuur, im jejeļā bwe Eaar letok n̄an kōj juon rikanaan.

Ro raar mour ilo raan ko m̧okta ilo Kabun̄ in kar en̄jake eļap kam̧oolol bwe remaron̄ kar mour ilo tōre eo an Rikanaan Joseph Smith. Ennaan ko im naan in kam̧ool ko an Jepļaaktok eo en̄jake ko im̧aantata raar emakijkij n̄an Rikwojarjar eo m̧okta.

Menin kabwilōn̄lōn̄ ko raar waļo̧k iiō ko ilo tōre eo Brigham Young ej tōl Kabun̄ in an Irooj. Rikwojarjar ro raar itok n̄an turilik im ejaake er make ikōtaan Rocky Mountain ko, ijo Kabun̄ in eaar eddōkļo̧k ie. Ro raar mour ilo iien in kar watōk e āinwōt juon kōjeram̧m̧an eļap bwe remaron̄ kar mour ilo tōre eo an rikanaan Brigham Young.

Ejja jon̄ok in ej wōnm̧aanļo̧k wōt ilo an Irooj kōpooj em̧m̧aan ro reļļap im kajoor n̄an tōl m̧akūtkūt ko an Kabun̄ in An. Ro jinō im jema im jibū im jim̧aaō raar kōnono kōn m̧wilaļ in kautiej im iakwe kōn rikanaan eo ilo raan ko aer—Būreejtōn Heber J. Grant.

N̄an Sister Walker im n̄a, im elōn̄ iaan ro jinōmi im jemāmi im jibūmi im jim̧ami, kōm̧ ar iakwe waanjon̄ok in eļap im katak ko rem̧m̧an jen rikanaan David O. McKay. Rein raar bōk jerbal in raar ļoor e: Joseph Fielding Smith, Harold B. Lee, Spencer W. Kimball, Ezra Taft Benson, im Howard W. Hunter. Kajjojo em̧m̧aan ekar lukkuun m̧aanjebpopo n̄an tōl Kabun̄ in ium̧win juon tōre eo kar kalikkare jen Irooj Make. Kajjojo iaer kar iakwe im rejtake jen membōr ro an Kabun̄ in.

Enan̄in aolepāmi ijin joten in naaj lukkuun keememej tōl eo eļap an Būreejtōn Gordon B. Hinckley. Ej juon kōjeram̧m̧an n̄an mour ke eaar Būreejtōn eo an Kabun̄ in.

Ļalem iiō rem̧ootļo̧k Irooj eaar kūr Būreejtōn Hinckley n̄an kapijuknen im Thomas S. Monson eaar erom Būreejtōn eo an Kabun̄ in—rikanaan eo an Irooj ej pād ioon laļ in rainin. O, ej juon kōjeram̧m̧an eļap n̄an kwe im n̄a n̄an mour ilo raan in em̧m̧an me tōl jen juon rikanaan eļap.

En̄in ej Kabun̄ eo an Irooj. Ej karōk mour ko an aolep Rijilōk rein reļļap, im Ej likūt er ilo jerbal in n̄an tōl Kabun̄ in An. Menin ej juon men em̧ool bwe juon iaan kadkad ko rejenolo̧k an Kabun̄ in an Irooj bwen wōr An rijilōk im rikanaan ioon laļ in rainin.

Rijilōk Paul eaar kōmeļeļeik bwe Kabun̄ eo ewōr “rū jelōk kab ri kanaan, [ippān] Kraist Jisōs e make lukkuun dem̧ōn em̧” (Epesōs 2:20). Ekar āindein, im ej āindein. Kabun̄ eo an Irooj ej alikkar jen an wōr rijilōk im rikanaan, ippān Kraist Jisōs e make lukkuun dem̧ōn em̧. Aolep Būreejtōn an Kabun̄ in raar kam̧ool bwe Jisōs Kraist ej bōran Kabun̄ eo An.

Ejjeļo̧k jide, ejjeļo̧k bōd, im ejjeļo̧k m̧akūtkūt in karelel n̄an karōk. Ilo aolep jekjek ejelet kālet eo ilo Būreejtōnji eo an Kabun̄ eo an Irooj, Irooj ej bōk eddo, im em̧ool Ankilaan enaaj dedeļo̧k.

Ij kam̧ool n̄an kom̧ bwe ej ankilaan Irooj bwe jej tōl rainin jen Būreejtōn Thomas S. Monson, eo ej rikanaan eo an Irooj ioon laļ in rainin.

Āinwōt rikanaan eo ilo Kalim̧m̧ur M̧okta Jeremaia eo eaar katakin kōj kōn rikanaan ro, jejeļā menin bwe em̧ool ippān Būreejtōn Monson. Jeje ko Rekwojarjar rej ba, “M̧okta jān Aō kar kōm̧anm̧an eok ilo lo̧jien jinōm̧, iar jeļā eok; im m̧okta jān am̧ kar ļotak jān lo̧jien, Iar kajenolo̧k eok. Iar kapeek eok juon ri kanaan n̄an ri aelōn̄ ko” (Jeremaia 1:5).

Ikōņaan kōnono n̄an kom̧ rainin kōn mour im kwaļo̧k eo an Būreejtōn Thomas S. Monson, kein 16th Būreejtōn an Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Ilo iiō in mour eo āliktata an Būreejtōn Hinckley, eaar jitōn̄ eō n̄an erom Executive Director an Temple Department eo, im Būreejtōn Monson eaar nōbar eō im kōtļo̧k aō bōk wōt ijjitōn̄ in. Ium̧win iiō ko jiljino rej m̧ootļo̧k, iaar bōk kōjeram̧m̧an eo eļap im eban jako ilo jipan̄ Būreejtōn Thomas S. Monson im rikakpilōklōk ro an kōn jerbal ko rejelet tampeļ. Iaar jijet turājet in ilo an Būreejtōn Monson kar letok n̄an eō eļap kapilōk im tōl kōn tampeļ ko im jerbal ko rejelet tampeļ aolepān laļ in. Eaar kajjitōk ippa n̄an mije e ilo aje ko an tampeļ, kōjeram̧m̧an bwidej ko, im loļo̧k jikin ko naaj kalōk tampeļ eo ie. Iaar jeram̧m̧an jen ito itak eo ippān peļaakin laļ in, n̄an jikin ko rettoļo̧k āinwōt Kyiv, ilo Ukraine, im Cebu, ilo Philippines, im n̄an jikin ko jet rekam̧ōņōņō, āinwōt Rome, Italy.

Ilo an ito itak aolepān laļ in, iaar jeram̧m̧an n̄an kam̧oole iakwe eo an eļap ijeņ n̄an armej ro—jab n̄an membōr ro wōt an Kabun̄ in, ak aolep armej. Iaar kam̧oole an ettā im jouj, tūriam̧o āinwōt Kraist im en̄jake, eļaptata n̄an ajri ro, rūtto ro, im ro routame. Aolep iien iaar kalimjek Būreejtōn Monson, eaar wōr aō kam̧ool: “En̄in ej wāween eo me Rilo̧mo̧o̧r eo en kar kōm̧m̧ane. En̄in ej wāween An naaj kar kōm̧anm̧an n̄an Armej.”

Iaar kam̧ool an m̧ōņōņō ejjeļo̧k jem̧ļo̧kin, an kajoor im leke, an lan̄lōn̄ ilo mour, im an lukkuun in kōņaan n̄an jerbal n̄an Irooj im kōm̧anm̧an āinwōt Rilo̧mo̧o̧r an naaj kōņaan bwe en kōm̧m̧an. Ej jamin mōk in kōm̧m̧ane jerbal eo an Irooj.

Ilo Doctrine and Covenants, jekjen 52, eoon 14, Irooj eaar ba bwe Enaaj letok n̄an kōj juon jon̄ok in men otemjej jej kōm̧anm̧ani bwe jen maron̄ jab moņ.

Ij iakwe eoon in, ilo an katakin eō bwe Irooj enaaj kōpooj juon jon̄ok n̄an eō im kwaļo̧k n̄an eō wāween kōm̧m̧an, wāween m̧akūtkūt, im wāween mour. Ak ej jab kōn eō. Ej kōn kōj kajjojo. Irooj ej kwaļo̧k n̄an kōj iaļ eo. Ej kōpooj jon̄ok ko ilo kajjojo ad mour n̄an kwaļo̧k n̄an kōj wāween eo n̄an mour.

Ij tōmak juon iaan jon̄ok ko raorōk ilo mour ko ad ej mour eo an rikanaan eo ej tōl im jineete Kabun̄ eo an Irooj ilo raan kein ad. Āinwōt iaar kwaļo̧k m̧oktaļo̧k, n̄an n̄a āinwōt kar juon jodikdik, jon̄ok eo eaar Būreejtōn David O. McKay. Iaar iakwe im rejtake e, jar kōn e, katak jen naan ko an, im kōņaan in erom eļapļo̧k āinwōt e jon̄an eo imaron̄e.

Ij kōtmene bwe elōn̄ iaan ro jinemi im jemāmi reddik, jon̄ok eo aer eaar Būreejtōn Spencer W. Kimball. Aaet, n̄an kōj kajjojo, ikdelel eo ad eļap ej n̄an jon̄ok in ad mour ālkin Rilo̧mo̧o̧r eo—n̄an ļoor E, n̄an mour kōn kien ko An, im n̄an erom āinwōt E jon̄ok wōt ad maron̄.

Ilo 3 Nipai 27:27, Jisōs eaar katakin: “Armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄a ij.”

En̄in ej pedped in jibadbad eo ad—n̄an erom āinwōt E.

Eaar pād idipin aolep opiij Būreejtōn Thomas S. Monson eaar jerbal ie jen tōre eo kar kūri āinwōt bisop eaar ejja pija in wōt an Rilo̧mo̧o̧r eo kar pijaik jen Heinrick Hofmann. Ej juon pija eaiboojoj an Rilo̧mo̧o̧r eo.

Kōnono kōn pija, Būreejtōn Monson eaar ba: “Em̧m̧an ippa pija in, eaar wōr ippa jen ke iaar juon bisop ron̄oul iiō rūttoon [.] … iaar bōk [e] ippa jabdewōt jikin kar jitōn̄ eō n̄an jerbal ie. Iaar kajjieon̄ jon̄ok e mour eo aō ālkin Maajta eo. Jabdewōt iien ewōr aō kālet epen n̄an kōm̧m̧ane, iaar aolep iien reilo̧k n̄an pija eo im kajjitōk ippa make, ‘Ta Enaaj kōm̧m̧ane?’ Innām ij kajjieon̄ kōm̧m̧ane”(Heidi S. Swinton, To the Rescue: The Biography of Thomas S. Monson [2010], 135).

Ijeļā bwe Būreejtōn Monson ej ļōmņak kōn ļoor waanjon̄ok eo an Jisōs. Ilo juon iien iaar pād ippān Būreejtōn Monson ilo juon m̧akūtkūt m̧okta jen juon aje an tampeļ. Ej kab kātok raan eo, im ilo kweilo̧k eo joten eo ke eaar epaak n̄an jem̧ļo̧k, iaar ļōmņak Būreejtōn Monson emaron̄ kar mōk, im iaar kōņaan bwe en wōr an iien kakkije m̧okta jen m̧akūtkūt ko raan eo juon. Ke al in kōjem̧ļo̧k eo eaar jan̄, iaar malļo̧k n̄an Būreejtōn Monson im ba, “Būreejtōn, ālkin jar in ikkilōk eo, eļan̄n̄e jej diwōjļo̧k ilo kōjam eo rājet, jemaron̄ bōkļo̧k eok n̄an hotel eo im komaron̄ in kakkije.”

Kōn juon tarpok imejān, eaar ba n̄an n̄a, “Elder Walker, eļan̄n̄e Jisōs en kar pād ijin, kwoj ļōmņak En ke kar diwōjļo̧k ilo kōjam eo rājet n̄e kweilo̧k in ejem̧ļo̧k.?”

Ijjan̄in bar kōm̧m̧ane kajjitōk in. Āinwōt Rilo̧mo̧o̧r eo enaaj kar kōm̧m̧ane, eaar kōņaan pād ippān armej ro. Eaar jab ļōmņak kōn e make n̄an jidik. Eaar ļōmņak kōn em̧m̧an eo emaron̄ kōm̧m̧ane.

Iaar aolep iien en̄jake bwe imaron̄ juon armej em̧m̧anļo̧k n̄e ij jon̄ok e mour eo aō ālkin armej ro rewāppen Irooj eaar likūt im̧aan aō iaļ: ro jibū im jim̧aaō, ro jinō im jema, bisop ro aō, mijen būreejtōn eo aō, im aaet, rikanaan eo an Anij eo imaron̄ loe im ron̄jake im kōn e ij jar kajjojo raan. Ijeļā em̧ool kom̧ aolep rej kōm̧m̧an ejja āindein.

Eaar juon kōjeram̧m̧an em̧m̧an ilo mour e aō n̄an pukōt n̄an erom eļapļo̧k āinwōt Irooj im n̄an pukōt n̄an erom eļapļo̧k āinwōt rikanaan eo An—Būreejtōn Thomas S. Monson.

Ikōņaan kwaļo̧k ippāmi jet iaan mour im katak ko an Būreejtōn Thomas S. Monson, im kōjatdikdik, ilo aō kōm̧m̧ane menin, kom̧ naaj maron̄ kile kadkad ko kom̧ naaj kōņaan in likūt ilo mour eo ami. Jenaaj aolep jeram̧m̧an n̄an pukōt jon̄ok an mour ko ad ālkin im katak jen rikanaan eo an Irooj.

Āinwōt Nipai, im āinwōt aolepāmi, Thomas S. Monson eaar ļotak jen ro jinen im jemān rem̧m̧an. Eaar ļotak ilo Salt Lake City ilo O̧kwōj 21, 1927. Eaar rūttoļo̧k ilo jekjek ko rettā. Ej jan̄in ukōt kadkadin ijo eaar itok jene. Kōn an wājepdik make im kalem̧ōņōņō, ekitbuuj jeļā kainōm̧m̧an kōn wōn e, Būreejtōn Monson ekkā an ba ej aikuj in jab inepata men̄e ej mour ilo jikin eo em̧weie ak jikin eo ejeramōl kōnke eaar jokwe ilo ikōta er.

Aolep iien iaar bwilōn̄ kōn wāween an aolep iien kōnono iakwe kōn an kar jodikdik. Ij ļōmņak eaar āinwōt ļo̧k wōt Nipai. Leman im Lamuel raar jeļā lo jorrāān ko im pukōt ijo enana ilo men otemjej, ekar āindein. Nipai, ilo juon wāween eoktak, eaar em̧m̧an, rikōttōpar, im kam̧oolol. Eaar lo em̧m̧an ilo men otemjej ipeļaakin. Ej wāween dein an Tommy Monson rūttoļo̧k—im eaar wāween dein ilo aolepān mour eo an!

Eaar juon rijikuuļ em̧m̧an, im bōlen ļaptata, eaar juon ļaddik em̧m̧an. Eaar kwaļo̧k an ikdelel n̄an kōm̧m̧an em̧m̧an ilo jerbal an Irooj ke eaar kūr n̄an jerbal āinwōt rijeje an doulul in tikōn ro ilo ward eo an. Turinļo̧k 70 iiō tokālik, āinwōt juon Būreejtōn an Kabun̄ in, eaar kōlm̧enļo̧kjeņ kōn jet iaan ju bōro ko kōn ikdelel eo an n̄an ļo̧o̧ki m̧akūtkūt ko an doulul in tikōn ro an em̧m̧an jon̄an wōt an maron̄. Eaar ejjeļo̧k an ļōmņak kōn “Etke ij rijeje im jab būreejtōn eo an doulul in?” Eaar kōņaan jerbal em̧m̧an ilo jerbal eo an. Eaar kūr n̄an juon jerbal ilo Kabun̄ eo an Irooj, im ekōņaan kōm̧m̧ane bwe em̧m̧an. Eaar kōņaan bwe ļo̧o̧k in m̧akūtkūt ko ren em̧m̧an im ellaajrak, im eaar taibi ļo̧o̧k in m̧akūtkūt ko n̄an doulul in tikōn ro an. Āinwōt juon ļaddik 12 iiō rūttoon, eaar kōm̧m̧ane juon waanjon̄ok em̧m̧an n̄an kōj.

Eļan̄n̄e menin ekabwilōn̄lōn̄ n̄an kom̧, ij jab ilbōk. Eaar barāinwōt kabwilōn̄lōn̄ n̄an stake būreejtōn eo an eo, ke eaar ron̄ kōn jerbal eo em̧m̧an an Tommy, eaar kōņaan ippān n̄an kōnono ilo kweilo̧k eo eļap an stake—āinwōt juon rijeje an doulul eo an tikōn ro. Emōj ke ami ron̄ an juon rijeje an doulul eo an tikōn ro kōnono ilo kweilo̧k eo eļap an stake? Ej juon waanjon̄ok n̄an kōj aolep!

Eaar kamōj high jikuuļ im kobaļo̧k ilo United States Navy. Eaar jerbal n̄an laļ eo an, im tōre eo ej jerbal, eaar kōjparok e make ilo erreeo im wānōk. Eaar ro̧o̧ltok jān jerbal in tariņae eo an im kate jerbal n̄an bōk juon jeļāļo̧kjeņ em̧m̧an. Eaar juon rijikuuļ em̧m̧an—bar juon waanjon̄ok eļap n̄an kōj aolep! (Waanjon̄ok im erom juon rijikuuļ em̧m̧an emaron̄ ļapļo̧k an aorōk n̄an jet iaami jen ro jet.)

Eaar m̧ōņōņō im en̄jake iakwe ippān juon leddik edeo̧ ej Armej ro Rekwojarjar etan Frances Johnson, im jidik iien tokālik kar kajjitōk ippān n̄an m̧areik e. Raar m̧are ilo Salt Lake Temple ilo Oktoba 7, 1948, ilo 21 an iiō. Ej juon waanjon̄ok n̄an kōj aolep! (Bōlen menin eļapļo̧k an aorōk n̄an jet iaami jen ro jet.)

Men̄e eaar m̧are ium̧win wōt 18 allōn̄ ko, im tōre eo ej jerbal n̄an an ļe n̄an bōk juon jerbal ekāāl, eaar m̧ōņōņō kōn kūr eo jān Irooj n̄an jerbal āinwōt juon bisop an ward eo ekilep ilo bukwōn eo. Eaar ward eo eaar rūttoļo̧k ie. (Ļōmņak kōn menin!) Eaar jab ba, “Iien eo ejjab jim̧we” ak “Ilukkuun dik”; eaar bōk kūr eo, lōke ilo Irooj, im ajeļo̧k e make n̄an ijjitōn̄ eo kōn aolepān an kajoor im tōļan bwe Irooj eaar leļo̧k n̄an e. Eaar kōņaan erom rijeļā tata eo emaron̄ erom ilo jerbal in jipan̄ an Irooj.

Bisop Monson eo edik eaar jino iakwe juon eoon eo emaron̄ kōjeram̧m̧an mour ko ad kajjojo, āinwōt eaar kōjeram̧m̧an eo an:

“Kwōn lōke Irooj kōn aolepen būruōm̧, im kwōn jab atartar ioon jeļāļo̧kjeņ eo am̧.

“Kwōn kwaļo̧k E ilo iaļ ko am̧ otemjeļo̧k, innām Enaaj ba kajjien iaļ ko am̧” (Jabōn Kōnnaan Ko 3:5–6).

N̄an rainin, Būreejtōn Monson ej kwaļo̧k eoon in emakijkij im mour kake ilo mour eo an ekkar n̄an ta eo ej katakin. Ej juon waanjon̄ok n̄an kōj aolep! Jenaaj aolep kōm̧m̧an em̧m̧an eļan̄n̄e jej keememej eoon in im kōm̧m̧an bwen m̧ōttan eo eaorōk an katak eo an mour eo ad—āinwōt Būreejtōn Monson eaar kōm̧m̧ane.

Ward eo an Bisop Monson eaar lōn̄ļo̧k jen 1,000 membōr ro ie, ekitbuuj 84 kōrā ro ejako pāleer. Jaar jeram̧m̧an ilo kweilo̧k eo eļap im jekjek ko jet n̄an ron̄jake an kwaļo̧k jet iaan en̄jake ko rem̧m̧an kar an ilo an kar kōjparok sister rein ro raar jeram̧m̧an n̄an pād ium̧win an kōjparok.

N̄an n̄a, aolep iien ij ron̄jake an kōnono kōn juon iaan en̄jake ko āinwōt bisop, ij kile, im elukkuun kabwilōn̄lōn̄ n̄an n̄a, bwe an iakwe im kea n̄an membōr ro an ward eo an eaar jab jem̧ļo̧k ke eaar kōtļo̧k āinwōt bisop. Eaar kūr n̄an stake būreejtōnji eo ilo 27 an iiō, ak aaet elōn̄ iiō ko tokālik (ālkin kūr eo an āinwōt juon mijen būreejtōn im Rijilōk), eaar wōnm̧aanļo̧k n̄an iakwe, naajdik, im pukōtļo̧k membōr ro rerūtto an ward eo an. Eaar jab alikkar wōt an iakwe im kea n̄an er jen ijjitōn̄ eo an. An iakwe im kea n̄an er eaar m̧wilal ilo būruwōn im pen an maron̄ jako jen jabdewōt kain ijjitōn̄.

Ilo menin, Būreejtōn Monson eaar kwaļo̧k n̄an kōj iaļ eo. Ej juon iaļ em̧m̧an; ej iaļ eo an Irooj. Ej iakwe ro jet im ej kea kōn ro jet—āinwōt Irooj eaar katakin kōj bwe jej aikuj in. Ej juon waanjon̄ok n̄an kōj aolep!

Ilo 31 an iiō, Būreejtōn Monson eaar kūr n̄an erom būreejtōn an Canadian Mission, opiij eo eļap ilo Toronto, Ontario. Āinwōt eaar kōm̧m̧ane āinwōt kar bisop, eaar ajeļo̧k e make n̄an jerbal eo an, leļo̧k men otemjej ippān, im lōke ilo Irooj kōn aolepān būruwōn. Aolep ro peļaakin raar maron̄ loe an iakwe n̄an Irooj, an iakwe n̄an kōrā eo pāleen im ajri ro nejin, an iakwe n̄an mijenede ro im membōr ro, im an iakwe n̄an Canada, āne eo kar kūri n̄an jerbal ie. An kareel āinwōt mijen būreejtōn eļap im n̄an rainin epen jon̄we. Mijenede ro an raar iakwe e im kar pukōt n̄an mour mour ko renaaj kōm̧m̧an an ju būrwōn mijen būreejtōn eo an. Jemaron̄ aolep ekkatak jān menin.

Āinwōt eaar kōm̧m̧ane ke eaar jem̧ļo̧k an bisop, eaar wōnm̧aanļo̧k n̄an dāpij iakwe ilo būruwōn en̄jake ko an im kōm̧m̧an n̄an mijenede ro an im Rikwojarjar ro raar jeram̧m̧an n̄an mour ium̧win an jerbal. Iaar juon rikam̧ool n̄an jerbal eo ej jamin mekunļo̧k an Būreejtōn Monson im an itok limo ilo mijenede ro raar jerbal ium̧win ilo Canadian Mission. Ej juon waanjon̄ok!

Ijeļā kajjeen mijenede ro raar jeram̧m̧an n̄an erom Thomas S. Monson aer mijen Būreejtōn ro raar kajjieon̄ ļoor jon̄ok in jerbal eo ejim̧we ilo aelōn̄ in kiin̄ in an Irooj eo Būreejtōn im Sister Monson raar eāik n̄an er. N̄an bōktok juon waanjon̄ok, ij kwaļo̧k ippāmi kabwilōn̄lōn̄ in em̧ool an 141 tampeļ būreejtōn ro rej kiiō jerbal aolepān laļ in, ļalem iaer rej mijenede ro relikao ro raar jerbal ium̧win Būreejtōn Monson ilo Canadian Mission.

Taujin iami ro rej pād ippād joten in rej mijenede ro ededeļo̧k aer mijen. Ij jar bwe kōj kajjojo naaj ļoor waanjon̄ok eo an tampeļ būreejtōn rein ļōļļam im kijejeto n̄an tiljek im etetal ilo iaļ an jerbal ewāppen kar eāik jen mijen būreejtōn ro ad.

Iaar m̧weiur kōn en̄jake ke iaar lo juon pija in Būreejtōn Monson ilo Church News ej loļo̧k juon em̧m̧aan ilo juon aujipitōļ ilo Toronto. (lale “Teachings of the Prophet,” Church News, Feb. 3, 2013, 7). Em̧m̧aan in eaar jerbal ippān Būreejtōn Monson 50 iiō ko rem̧oktaļo̧k. Būreejtōn Monson eaar jab meļo̧kļo̧k e. Elōn̄ iiō ko im elōn̄ maiļ ko raar jab bōk jān Būreejtōn Monson en̄jake ko rem̧m̧an an iakwe im kam̧oolol rej itok n̄an ro rej jerbal n̄an Irooj ippān doon. Ij kōjatdikdik bwe kōj kajjojo naaj ļoor waanjon̄ok in an im jab meļo̧kļo̧k ro raar kōjeram̧m̧an mour ko ad m̧oktaļo̧k.

Ilo 1963, ke eaar 36 iiō rūttoon, Thomas S. Monson eaar kūrļo̧k n̄an opiij eo an Būreejtōn David O. McKay, eo eaar Būreejtōn eo an Kabun̄ in ilo iien in. Kar ilo kweilo̧k in, Būreejtōn McKay eaar kūri n̄an erom juon Rijilōk an Irooj Jisōs Kraist.

Būreejtōn Monson ej Rijilōk eo wōt kar kūri n̄an Jon̄oulruo eo ilo juon iiō edik ilo 100 iiō ko rej mootļo̧k. Em̧ool, pein Irooj eaar tōl kūr in an Rijilōk in edik, āinwōt Irooj eaar jeļā kajjeen Thomas S. Monson bwe enaaj tōl Kabun̄ in ilo raan kein ad.

Kweilo̧k eo eļap an O̧ktoba in enaaj erom 50th iiō in an Thomas S. Monson kūr n̄an erom juon Rijilōk. Ekabwilōn̄lōn̄ ke menin? (Jab jen tōre eo an Joseph Fielding Smith, eaar wōr ad juon Rijilōk ej keememe 50 iiō in ilo Jon̄oulruo eo.)

N̄an 22 iiō ko Būreejtōn Monson eaar jerbal āinwōt juon rikakpilōklōk n̄an jilu Būreejtōn ro an Kabun̄ in: Ezra Taft Benson, Howard W. Hunter, im Gordon B. Hinckley. Ilo Pāpode 3, 2008, Thomas S. Monson kar kōjenolo̧ke āinwōt Būreejtōn eo an Kabun̄ in. Eaar wōr ruo an rikakpilōklōk reļļap im kajoor ro rej jutak turājet in: Būreejtōn Henry B. Eyring im Būreejtōn Dieter F. Uchtdorf. Rej jilu Pris ro Routiej rej tōl Kabun̄ in an Irooj ioon laļ in rainin (lale D&C 107:22).

Kwaļo̧k eo ekabwilōn̄lōn̄ an Būreejtōn Monson eaar emakijkij waļo̧k jen naan eo “To The Rescue.” Heidi Swinton eaar je juon bwebwenato ekabwilōn̄lōn̄ an Būreejtōn Monson, im eaar karōke im ņaetan To The Rescue. Bwebwenato in eaar bablij ilo 2010. Eļan̄n̄e kwoj jan̄in riiti, ij lukkuun kōmālim i n̄an kom̧. Enaaj kōjeram̧m̧an mour eo am.

Ennaan eo, aaet, ejja ennaan eo Jisōs eaar letok n̄an kōj ilo Luk: likūt “ruwatimjuonn̄oul im ruwatimjuon” im etal im lo̧mo̧o̧ren juon (Luk 15:4). En̄in ej m̧ōttan eo eaorōk an pedped in ko̧jpeļ eo an Jisōs Kraist, n̄an iakwe ro m̧ōttad im n̄an kōm̧m̧ane aolep ad maron̄ n̄an kōjeram̧m̧an mour ko an ro jet. Būreejtōn Monson eaar aolep iien katakin pedped kein, ak eļapļo̧k an aorōk, eaar mour ilo wāween in. Mour eo an eaar obrak kōn waanjon̄ok ko ban bwini n̄an pukōtļo̧k n̄an loļo̧k, kainōm̧m̧an, ak jipan̄ eļaptata ro raikuj: kōrā ro ejako pāleer, ajri ro, rinan̄inmej ro, ro atajinemjen, im ro rej ajimakeke ak rub būruweed.

Rijilōk Jemes eaar je, “Kabun̄ erreo im jab ettoon im̧aan mejān ad Anij im Jemed, en̄in: bwe armej en loļo̧k ro atajinemjen im kōrā e jako pāleir ilo aer jorrāān, im bwe en dāpij e im jab libbijinjin kōn laļ in” (Jemes 1:27).

En̄in ej wāween eo Būreejtōn Monson eaar mour ilo mour eo an. Katak in n̄an kōj ej bwe juon ejjab aikuj in erom juon Rijilōk n̄an mour ilo wāween in. Jemaron̄ mour ilo kabun̄ eo ad, jemaron̄ in loļo̧k ro ejjeļo̧k jemāer im kōrā ro ejako pāleer, im jemaron̄ kōjparok kōj make jān libijinjin an laļ in. Jemaron̄ reilo̧k n̄an rikanaan eo ad n̄an pukōt mejļan ad maron̄ kōm̧m̧ane menin! Jemaron̄ jiron̄ kōj make, “En̄in ke kain armej eo ikōņaan erom.”

Jet iiō ko rem̧ootļo̧k, m̧okta jen kweilo̧k eo eļap, Būreejtōn Monson eaar katakin bar juon katak em̧m̧an. Iien in eaar n̄an kakobaik Ritōl ro Routiej, ro raar itok n̄an Salt Lake City, elōn̄ rej itok jān jikin ko peļaakin laļ in ijo rej jerbal ilo Eria Būreejtōnji ko. Eaar juon kweilo̧k elukkuun aorōk. Jaar itok ippān doon n̄an ekkatak jen Būreejtōnji eo Kein Kajuon im Jon̄oulruo eo.

Ke iien eo n̄an kweilo̧k eaar epaaktok, aolep raar pād ijjelo̧kin Būreejtōn Monson, eo e jan̄in kar itaak tok. Jet minit m̧okta jān an kweilo̧k eo kar ijjino, kōm̧ ar bōjrak am loļo̧k doon im jijet kautiej ron̄jake kōjan̄jan̄ eo emeļak—kōtmāne bwe rikanaan eo enaaj itok ilo jabdewōt iien.

Kōm̧ ar kijenmej kōttar jen ke awa eo ratimjuon jibbon̄ eaar itok im eļļāļo̧k. Juon eaar diwōj namōjļo̧k ilo kōjām eo turājet—n̄an wate im lale eļan̄n̄e jet jipan̄ eaar maron̄ in aikuj. Ilo aer bar deļo̧n̄etok ruum̧ eo, kar jiron̄ kōm̧ bwe “Būreejtōn Monson enaaj kobatok ippām ejjab etto.”

Enan̄in 15 minit ko ālkin an kar kweilo̧k eo ijjino, Būreejtōn Monson eaar deļo̧n̄etok ilo ruum̧ eo. Kōn kautiej, kōm̧ aolep kar jutak ke ej deļo̧n̄tok. Kōm̧ ar m̧ōņōņō in loe e im m̧ōņōņō bwe em̧m̧an an pād. Eaar jab alikkar bwe eaar wōr jabdewōt un etke eaar maron̄ rum̧wij.

Būreejtōn Monson eaar kaju n̄an pulpit eo im ba, “Em̧m̧aan ro jitōn bōro, joļo̧k aō bōd bwe irum̧ij, ak kōrā eo pāleeō eaar aikuji eō jibbon̄ in.”

Iaar lukkuun m̧weiur im ettā. Eaar pen aō kabōjrak aō kōļmenļo̧kjeņ kōn naan ko an Būreejtōn Monson. Kweilo̧k eo eaar lukkuun aorōk. Aolep ritōl ro an Kabun̄ eo raar kuktok ippān doon, ak Būreejtōn Monson eaar kwaļo̧k waanjon̄ok eo n̄an kōm̧ aolep. Kōrā eo pāleen eaar aikuji e, im eaar bōk iien eo emenin aikuj n̄an kōjparok e. Eaar juon katak eo eļap. Ij jab keememej jabdewōt men kar kōnono kake raan eo, ak iaar keememej katak eo: “Kōrā eo pāleeō eaar aikuji eō.”

Katak in eaar kapen bar juon iien ke Būreejtōn Monson eaar ba, “Ke iaar ron̄ an em̧m̧aan ro ba rej iakwe kōrā ro pāleer, innām iaar kōņaan in ba n̄an er, ‘Innām kam̧oole jen wāween am̧ kōm̧m̧an n̄an e im jerbal n̄an e.’”

En̄in ej wāween dein Būreejtōn Monson: Ej aolep iien pukōtļo̧k bar juon. Ej aolep iien kwaļo̧k jouj im kea n̄an ro jet.

Kom̧ij jab aikuj pād aetok iturin Būreejtōn Monson n̄an en̄jake an iakwe im kalim̧m̧ur n̄an kōrā eo pāleen, Sister Frances Monson. Jabdewōt iien ej kōnono kōn e, mejān ej ebbōl im jej lo juon ettōn̄ iturin mejān. Kwojeļā em̧m̧aan in ej iakwe kōrā eo pāleen ej juon waanjon̄ok n̄an aoleped wōj. Būreejtōn im Sister Monson raar kwaļo̧k n̄an kōj waanjon̄ok an juon em̧m̧aan im juon kōrā jon̄an wōt juon ilo aer iakwe n̄an Irooj im aer ikdelel n̄an jerbal n̄an E ilo jim̧we.

Ikōņaan erom āinwōt Irooj, ak ibarāinwōt kōņaan erom āinwōt rikanaan eo An.

Eļan̄n̄e kom̧ij ļōmņak ta eo Būreejtōn Monson emaron̄ in kōņaan n̄an kōj kajjojo, bōlen kwaļo̧k laajrak in en̄jake in enaaj jipan̄ kom̧ jeļā:

Nobōm̧ba eo ļo̧k Boise Idaho Temple eo eaiboojoj eaar pojak n̄an an bar aje ālkin 18 allōn̄ ko eaar kilōk n̄an kaiboojojeļo̧k im kōm̧anm̧anļo̧k tampeļ eo. Ālkin 30 iiō ko rem̧m̧an kar kōjerbale jen Rikwojarjar ro retiljek ilo m̧ōttan in ilo Idaho im eria ko peļaakin, tampeļ in eaar lukkuun in aikuj in kōkāāl. Āinwōt ilo imminene n̄an kōjeram̧m̧an iien aje eo an tampeļ eo, jodikdik ro ilo tampeļ district eo raar kajjitōk ippāer n̄an kwaļo̧k juon ikkure in manit. Eaar juon joten n̄an al im eb im kwaļo̧k tōmak eo aer im kam̧oolol kōn tampeļ eo.

Iaar jijet iturin Būreejtōn Monson ke kōm̧ij alooje ikkure ko rem̧m̧an jen elōn̄ stake ko. Juon iaan al in eb ko raar pijaikļo̧k juon kurub in jiron̄ ro rem̧m̧an. Ke Būreejtōn Monson eaar itok limo in kōn ikkure eo, eaar maltok n̄an n̄a im kwaļo̧k an en̄jake ilo būruwōn. Eaar ba, “Aō kōjatdikdik bwe er aolep renaaj aolep m̧are ilo tampeļ in. Ilukkuun kōņaan bwe kajjojo iaer ren bōk kōjeram̧m̧an in—n̄an m̧are ilo tampeļ eo.”

Iaar ļōmņak: “Ejjab kabwilōn̄lōn̄ ke. Rikanaan eo an Anij ej pād ijin kam̧oole an jodikdik rein kōjeram̧m̧an ilo al im eb, im n̄an e elukkuun alikkar eaar ekkejel n̄an tampeļ eo enaaj aje jibbon̄ eo juon. An kōjatdikdik eaar bwe aolepāer ren m̧are ilo tampeļ.” Eļan̄n̄e en̄in ej kōņaan eo an rikanaan eo n̄an kōj, im en̄in ej, innām juon iaad ej aikuj kōņaan n̄an kōj aolep, im ej lukkuun, lukkuun kōttōpar eo eaorōk ilo mour ko ad kajjojo.

Ikōņaan kwaļo̧k bar juon en̄jake ippāmi:

Būreejtōn Monson, Būreejtōn Eyring, im Elder Quentin L. Cook jen Doulul eo an Jon̄oulruo Rijilōk ro raar etal n̄an Laie, Hawaii, n̄an bar aje eo an tampeļ in eaboojoj ilo Nobōm̧ba in 2010. Joten eo m̧okta jen aje eo an tampeļ eo, kōm̧ ar kuktok ippān doon ilo Cannon Center eo ilo BYU Hawaii kāmbōj n̄an juon ikkure in kōjeram̧m̧an. Būrookraam̧ eo eaar em̧m̧an. Jen al, eb, im bwebwenato, jodikdik ro an tempeļ district eo raar kwaļo̧k juon bwebwenato an Kabun̄ in ilo Hawaii. Raar kwaļo̧k kōn mijenede ro m̧okta im rioktak ro m̧okta. Raar kwaļo̧k bwebwenato eo ekabwilōn̄lōn̄ kōn ilju im jekļaj eo an rikanaan Joseph F. Smith kar kūr n̄an jerbal e juon mijen ilo Hawaii ilo 1854, ke eaar 15 wōt an iiō. Joseph F. Smith in elikao eaar jepļaak jen jilu iiō mijen m̧okta jen an kar kein 19 an iiō. (Im kom̧ ar ļōmņak iiō eo kiiō n̄an 18 ekar kabwilōn̄lōn̄, kom̧ ar jab ke?)

Kōjeram̧m̧an eo ilo m̧anit eaar wōnm̧aanļo̧k wōt ke jodikdik ro raar kōmeļeļeik jarlepju eo an Kabun̄ in ilubwilijin armej in Polynesia ro im kar kwaļo̧k wāween an Būreejtōn Joseph F. Smith kar ro̧o̧ltok n̄an Hawaii elōn̄ļo̧k jen 50 iiō tokālik im āinwōt Būreejtōn eo an Kabun̄ in kar kōjeram̧m̧an jikin eo im kōjeram̧m̧an bwidej eo n̄an jerbal in ekkal an Laie Hawaii Temple.

Kōjeram̧m̧an in m̧anit eo eaar em̧m̧an, im Būreejtōn Monson eaar iakwe aolepān. Eaar lan̄lōn̄ kōn juon ikkure eaar pijaik eb eo ebun̄bun̄ an Pata eo Kein Karuo an Laļ in “Boogie Woggie Bugle Boy,” āinwōt eaar kakeememej e kōn raan ko an ilo Navy. Ko jet raar pedped wōt ioon elōn̄ eb ko an riwōdin bwil kein.

Juon al ej pijaik eb in hula eo eaiboojoj eaar kōm̧m̧an. Juon jiron̄ eaar pād ilo eb in eaar jijet ilo wiiljea. Eaar deeo̧, im em̧ool eaar jab aikuj in kōjerbal neen, eaar aiboojoj an eb. Būreejtōn Monson eaar jitōn̄tok e n̄an n̄a im kwaļo̧k wāween an em̧m̧an im wāween an aiboojoj an ikkure kōn eb eo.

Ke būrookraam̧ eo eaar jem̧ļo̧k, aolep raar m̧ōņōņō kōn ikkure ko reļļap raar kōm̧m̧an. Ke kōm̧ij etal jen ijo kōm̧ij pād ie, aolep rieb ro raar bar ro̧o̧ltok n̄an piļoor eo, ekoba rieb hula ro. Būreejtōn Monson eaar jab karōk n̄an diwōjļo̧k ilo iaļ eo ak eaar kajim̧weļo̧k n̄an piļoor eo n̄an kwaļo̧k an kam̧oolol n̄an jodikdik ro, im eļaptata eaar kajuļo̧k wōt n̄an leddik eo eaiboojoj ilo wiiljea eo n̄an kōnono ippān im kwaļo̧k an iakwe n̄an e.

Aaet ilo ioļapin kōjeram̧m̧an eo im jarlepju eo eļap, Būreejtōn Monson eaar bar juon alen kwaļo̧k iakwe erreo an Rilo̧mo̧o̧r eo. Eaar etal n̄an juon. Eaar m̧anlalļo̧k im mejān māik ioon dōm̧an. Iaar ļōmņak: “Ekabwilōn̄lōn̄ ke menin. Bar juon alen rikanaan eo an Anij ej kwaļo̧k n̄an kōj wāween ad diwōjļo̧k n̄an ro peļaakid, ekōjkan ad maron̄ jouj im iakwe, im ekōjkan n̄an rōjan̄ im kotak.” Iaar ļōmņak: “En̄in ej wāween eo Jisōs enaaj kar kōm̧m̧ane. En̄in ej wāween eo Rilo̧mo̧o̧r eo ekōņaan bwe jen kōm̧m̧ane n̄an ro jet.”

Ij iakwe al in Būraimere eo ej ba, “I’m trying to be like Jisōs.” Children's Songbook, 78). Im ikōņaan kobaik n̄an menin, “Im ij kajjieon̄ n̄an āinwōt rikanaan eo An.”

Ikōņaan kwaļo̧k ļalem wāween ko jemaron̄ ļoor waanjon̄ok eo an Būreejtōn Monson:

Juon, Jemaron̄ in em̧m̧an, im jemaron̄ in m̧ōņōņō.

Ilo Pearl of Great Price, Rikanaan Joseph Smith ej kōm̧eļeļeik āinwōt bōk juon mejān m̧ōņōņō (lale Joseph Smith—History 1:28). Menin ej barāinwōt kōmeļeļeik Būreejtōn Monson. Eaar lukkuun wōr ippān mejān m̧ōņōņō.

Ilo juon iien Būreejtōn Monson eaar ba: “Jemaron̄ … in kālet n̄an bōk juon m̧wil em̧m̧an. Jej jab maron̄ kōjebwebweik kōto ko, ak jemaron̄ in kajim̧we wijļā ko. Ilo naan ko jet, jemaron̄ in kālet n̄an m̧ōņōņō im em̧m̧an, mekarta ta eo ej itok ilo iaļ ko ad” Church News, Sept. 2, 2012, 2).

Juon raan iaar kōttar inamōj in bootruum̧ eo an Būreejtōnji eo Kein Kajuon. Iaar kūrļo̧k ijeņ n̄an bōk kuņaaō ilo juon kweilo̧k n̄an kōnono kōn jerbal ko an tampeļ ko. Iaar jijet namōj in ruum̧ eo, make iaaō. Iaar ļōmņak Būreejtōnji eo Kein Kajuon emōj aer jino kweilo̧k eo im bwe iaar ļōmņak iaar kūrtok n̄an koba ippāer ium̧win jejjo wōt minit ko. Ke ij jijet ijo iaar maron̄ ron̄ an armej etetal im wājeļ ilo jikin etetal eo. Iaar ļōmņak ippa make: “Elōn̄ armej ej jab meļeļe kakien ko rejejjet ke. Kwoj jab etetal im wājeļ ipeļaakin in inamōjin opiij eo an Būreejtōn eo an Kabun̄ in im bootruum̧ eo an Būreejtōnji eo Kein Kajuon.” Ejjab etto riwājeļ eo eaar etetal idamōn m̧weo—eaar Būreejtōn Monson. Eaar m̧ōņōņō, im eaar jab inepata. Eaar iakiakwe eō im ba, “Ij ļōmņak jenaaj jino kweilo̧k in ilowaan jejjo minit ko.” Men̄e eddo eo an aolepān Kabun̄ in ioon aeran, ej juon waanjon̄ok in m̧ōņōņō im e aolep iien ej inem̧m̧an. Jej aikuj āinwōt wāween in.

Ruo, Jemaron̄ jouj im iakwe ņae ajri ro, āindein Būreejtōn Monson.

Jisōs eaar kōnono emakijkij kōn ajri ro. Rikanaan eo An, Būreejtōn Monson, ej kōnono emakijkij kōn ajri ro barāinwōt, im iaar lukkuun loe ilo aje ko an tampeļ ko ekōjkan an iakwe ajri ro, jen waanjon̄ok eo an, jen wāween an katakin kōj im kōm̧m̧an n̄an er. Ilo aolep aje an tampeļ ej pedped wōt ioon ajri ro. Ej iakwe im kitbuuj er ilo kōjeram̧m̧an eo an dōkā in jabōn em̧ eo im aolep iien ej kūrtok jet n̄an likūt jet jimāān ilo dōkā in jabōn em̧ eo n̄an bōk koņaaer ilo kōkkaļļe eo ededeļo̧k an tampeļ eo. Ej kōm̧m̧an bwe en kam̧ōņōņō n̄an er. Ej kōm̧m̧an bwe en kakeememej er. E aolep iien ej ettōn̄ n̄an er. Ej rōjan̄ er im kōnono n̄an er. Ej juon men elukkuun em̧m̧an n̄an lale.

An iakiakwe emakijkij an kitbuuj ļalem men ko, kōm̧atkūtkūt lo̧jidn̄in, im rōjan̄ n̄an jerbale mijen ko im m̧are ilo tampeļ eo. Ej lan̄lōn̄ kōn mour—im kōj aolep aikuj barāinwōt.

Jet iiō ko rem̧ootļo̧k, Būreejtōn Monson eaar jikejuuļ n̄an aje Oquirrh Mountain Temple eo ilo raan in ļotak eo an. Ke eaar itaakļo̧k ilo tampeļ eo im kepaakļo̧k kōjam̧ eo an tampeļ eo, juon kumi in jodikdik raar kuk ippān doon. Raar jeļā eaar raan in ļotak eo an Būreejtōn Monson, ke raar jino al “Happy Birthday” n̄an e. Eaar iakwe er. Eaar bōjrak im wōnm̧ae er kōn juon ettōn̄ imejān. Eaar jino jeaļ e pein, āinwōt eļan̄n̄e eaar tōl er ilo al. Ilo jem̧ļo̧kin raar bar āliji “Im bar āliji.” Būreejtōn Monson eaar iakwe barāinwōt, ke eaar ba, “En̄in ej m̧ōttan eo em̧m̧an ippa.”

Ajri ro im jodikdik ro an Kabun̄ in raar iakwe e, im ļōmņak ej kōnke eaar ejjeļo̧k aer pere bwe ej iakwe er! Jisōs eaar iakwe ajri ro reddik, im rikanaan eo An ej iakwe ajri ro reddik. En̄in ej juon waanjon̄ok eļap n̄an kōj kajjojo!

Jilu, Jemaron̄ ļoor im̧we ko an Jetōb eo, āinwōt Būreejtōn Monson.

Kijejeto eo an Būreejtōn Monson n̄an Irooj im an kalim̧m̧ur n̄an ļoor im̧we ko an Jetōb eo raar aiboojoj kar waļo̧k jen rikanaan eo make ilo naan kein: “En̄jake eo em̧m̧antata ijeļā ilo mour ej n̄an en̄jake im̧we im m̧akūtkūt ekkar n̄ane, im tokālik loe bwe eaar kakūrm̧ool jar an juon armej ak aikuj an juon armej. Im aolep iien ij kōņaan bwe Irooj en jeļā bwe eļan̄n̄e Ej aikuji juon rijipan̄ n̄an etal, Tom Monson enaaj ettōr kōn jipan̄ n̄an E.” (On the Lord’s Errand [DVD, 2008]). En̄in ej juon jon̄ok bwe kōj kajjojo aikuj kōņaan im ļoore.

Emen. Jemaron̄ iakwe tampeļ eo, āinwōt Būreejtōn Monson ej iakwe tampeļ eo.

Būreejtōn Monson enaaj waļo̧k ilo bwebwenato āinwōt juon rikkaļ tampeļ ko reļļap ilo bwebwenato in Kabun̄ in. Jen iien eaar erom Būreejtōn eo an Kabun̄ in ilo Pāpode 2008, eaar wōnm̧aanļo̧k kōn jerbal eo eļap ilo kalōk tampeļ ko. Jet iaan tampeļ ko eaar kōjjeļāik raar pād ilubwilijin ko rebun̄bun̄: “Jibbon̄ in ij jouj n̄an kōjjeļāik ļalem tampeļ ko rekāāl ko jikin ko emōj aer alikkar im ko, ilo allōn̄ kane rej itok im iiō kane, renaaj ekkal ilo jikin kein rej ellaajrak: Calgary, Alberta, Canada; Córdoba, Argentina; eria eo eļap ilo Kansas City; Philadelphia, Pennsylvania; im Rome, Italy” (“Welcome to Conference,” Ensign ak Liahona, Nov. 2008, 6).

Ilo ļalem iiō ko eaar erom rikanaan, Būreejtōn Monson eaar kōjjeļāik karōk n̄an kalōk 33 tampeļ ko rekāāl. Allōn̄ eo ļo̧k ilo kweilo̧k eo an Eprōļ, eaar kōjjeļāik karōk ko n̄an ruo tampeļ ko rekāāl: Cedar City, Utah, im Rio de Janeiro, Brazil.

Ilo aje eo an Tegucigalpa Honduras Temple ilo M̧aaj eo, jejeļā ewōr 141 tampeļ ko ilo Kabun̄ in, ippān bar 29 kiiō repād ilo jerbal in ekkal ak ilo karōk in kajutak ko. En̄in ej juon iien eļap an ekkal tampeļ im kabun̄jar ilo tampeļ ilo Kabun̄ eo an Irooj. Iaar ron̄ an Būreejtōn Monson jiron̄ļo̧k jodikdik ro, ro raar lukkuun dik n̄an deļo̧n̄e tampeļ eo n̄an wanlōn̄ļo̧k im jibwe dipin tampeļ eo innām “kōm̧m̧an bwe tampeļ eo en un̄ūr eok.”

Būreejtōn Monson eaar ba, “Kōj kajjojo jen mour mour ko rewānōk, pā ko rereeo im bōro ko rereeo, bwe tampeļ eo en un̄ūr mour ko im baam̧le ko ad” (“Blessings of the Temple,” Ensign, Oct. 2010, 19).

Innām eaar kakobabaik kalim̧m̧ur in em̧m̧an: “N̄e jej iakwe tampeļ eo, un̄ūr tampeļ eo, im etal n̄an tampeļ eo, mour ko ad renaaj kwaļo̧k tōmak eo ad. Ilo ad itok n̄an em̧ kein rekwojarjar an Anij, ilo ad keememej bujen ko jaar kōm̧m̧ani ilowaer, jenaaj maron̄ kotak aolep kapo im eļļā ioon kajjojo kapo” (Be Your Best Self} [1979], 56; naan aorōk eo kobaiktok).

Jen ļoor waanjon̄ok eo rikanaan eo eaar kōm̧m̧ane n̄an kōj ilo iakwe tampeļ eo.

Ļalem, Jemaron̄ jouj, kile, im iakwe ro jet, āinwōt Būreejtōn Monson eaar kōm̧m̧ane.

Būreejtōn Monson ej juon waanjon̄ok em̧m̧an ilo iakwe ro jet. Aolepān kwaļo̧k eo An eaar obrak ilo loļo̧k ko n̄an m̧ōko, likūt pein ioon dōm̧ān im leļo̧k kōjeram̧m̧an ko, kōm̧m̧an taļboon ko̧o̧ļ ko ejjeļo̧k kōtmāne kaki n̄an kaenōm̧m̧an im rōjan̄, jilkinļo̧k leta im kōjeram̧m̧an im kam̧oolol, loļo̧k aujipitōl ko im im̧ōn kau ko, im pukōt iien n̄an etal n̄an kallib ko im ilo̧mej ko men̄e jikejuuļ eo an eboub.

Iaar kwaļo̧k m̧oktaļo̧k 84 kōrā ro ejako pāleer jān ward eo an Būreejtōn Monson ke eaar bisop. Ium̧win 10 iiō ko eaar ļoor jerbal eo an āinwōt bisop, ilo juon waļo̧k in aje ekabwilōn̄lōn̄, eaar kobaik ippān uwaak ko an elōn̄ jar ko aer, Būreejtōn Monson eaar maron̄ etal n̄an kallib ko an aolepāer. Baj ļōmņak kōn menin.

Āinwōt an Rilo̧mo̧o̧r eo naaj kar kōm̧m̧ane, Thomas Monson eaar etal kōn jerbal em̧m̧an, kōjeram̧m̧an im iakwe ro jet eļan̄n̄e eaar juon kajoor ej em̧m̧akūt ilo mour eo an. Jemaron̄ aolep ekkatak jān wiik in ilo ad pukōt n̄an ļoor bun̄tōn neen.

Juon waanjon̄ok ekabwilōn̄lōn̄ an Būreejtōn Monson jouj eaar waļo̧k iiō eo ļo̧k. Ke Brigham City Utah Tempel eo eaiboojoj eaar epaak an dedeļo̧k, iaar kweilo̧k ippān Būreejtōnji eo Kein Kajuon n̄an ekōnono kōn karōk in aje ko an tampeļ eo. Ilo an Brigham City make juon awa turear in Salt Lake City, enaaj lukkuun pidodo an Būreejtōn Monson etal n̄an ijeņ n̄an aje eo. Ijjelo̧kin, Būreejtōn Monson eaar ba, “Brigham City ej jikin eo jikin Būreejtōn Boyd K. Packer, Rijilōk in eļap eo eaar jijet iturō ium̧win elōn̄ iiō ko ilo Jon̄oulruo eo. Ikōņaan bwe en an utiej im kōjeram̧m̧an eo an aje tampeļ eo ilo bukwōn in an. Inaaj pād wōt, im naaj jitōn̄ Būreejtōn Packer n̄an aje Brigham City Temple eo. Ikōņaan bwe en an rainin.”

Eaar juon raan em̧m̧an n̄an Būreejtōn Packer im n̄an Sister Packer, ro raar barāinwōt rūttoļo̧k ilo Brigham City. Iaar lukkuun en̄jake jen jouj an Būreejtōn Monson im m̧akūtkūt ko rejouj n̄an Rijilōk in m̧ōttan. Jemaron̄ aolep erom wāween in. Jemaron̄ kwaļo̧k im jouj im jab ļōmņak kōn kōj make—ak ļōmņak eļapļo̧k kōn ro peļaakid.

Ij iakwe al in ajri in “Follow the Prophet.” Ewōr ratimjuon eoon ko rem̧m̧an, ak ewōr wōt aō iien n̄an riiti eoon eo āliktata:

Kiiō ewōr juon ad laļ ijo armej rej tarpok.
Eļan̄n̄e kom̧ij jab tōmak e, etal im lale nuuj ko.
Jemaron̄ bōk tōl ilo aolepān iaļ eo ad,
Eļan̄n̄e jej eo̧ron̄ rikanaan ro—ļoor ta eo rej ba.
… … … … … … … … … .
Ļoor rikanaan eo; jab etal jabwābwe.
… … … … … … … … … .
Ļoor rikanaan eo; ejeļā iaļ eo.
(Children’s Songbook, 111)

Būreejtōn Monson ejeļā iaļ eo. Iaļ eo ejim̧we ej iaļ eo an Irooj. “Iaļ eo ejim̧we n̄an tōmak ilo Kraist” (2 Nipai 25:29).

Būreejtōn Monson eaar katakin kōj iaļ eo n̄an mour mour ko ad kōn naan ko an rem̧m̧an im im̧we ilo kweilo̧k eo eļap. Eaar katakin kōj ekōjkan n̄an erom rikaļoor ro an Jisōs Kraist jen waanjon̄ok eo an make ekabwilōn̄lōn̄ im em̧m̧an. Em̧ool Irooj eaar letok n̄an kōj juon jon̄ok ilo men otemjej, im juon iaan jon̄ok ko bwe jej aikuj pukōt n̄an ļoor e rikanaan eo ad ejitōn bōro.

Ij kam̧ool bwe ewōr juon Anij ilo lan̄ eo ejeļā kajeed im iakwe kōj. Eaar letok n̄an kōj juon rikanaan n̄an tōl kōj, n̄an katakin kōj, im n̄an tōl kōj ilo raan kein āliktata. Ij kam̧ool bwe Jisōs Kraist ej Nejin Anij im Rilo̧mo̧o̧r eo an laļ in. Ij tōmak bwe Irooj ej kōtmāne bwe jen iakwe rikanaan eo, rejtake, im ļoor waanjon̄ok eo an.

Kōm̧ij kam̧oolol eok, kōn juon rikanaan. Kōm̧ij kam̧oolol Eok kōn rikanaan in. Ij watōke āinwōt juon kōjeram̧m̧an eļap n̄an mour ilo raan kein Thomas S. Monson eaar rikanaan eo an Irooj. Ilo ad ļoor rikanaan eo im kajjieon̄ erom āinwōt e, jenaaj em̧ool tōprak erom rijilōk ro retiljek an Irooj Jisōs Kraist.

Eaar aō eutiej n̄an kōnono n̄an kom̧ joten in, im ij jar bwe Irooj enaaj kōjeram̧m̧an kōj kajjojo eļapļo̧k, ilo aō kam̧ool bwe en̄in ej jerbal eo an Irooj, ilo etan Jisōs Kraist, amen.