2:3

Ta eo M̧ool?

Dieter F. Uchtdorf

Jen Būreejtōnji eo Kein Kajuon

Ro jeiū im jatū, ro m̧ōtta rejitōnbōro, ij m̧ōņōņō kōn iien in em̧m̧an n̄an pād ippāmi rainin. Iien otemjeļo̧k ej letok en̄jake ko rem̧m̧an n̄an eō n̄an jepooļ jān rūm̧m̧an ded ro an Kabun̄ in, im kom̧ij im̧we eō n̄an kwaļo̧k, “Let Zion in her beauty rise.” Āinwōt ami jokwe aolepān laļ in, im jutak ilo etan ilo juon wāween eaiboojoj tokālik eo im kajoor eo an Kabun̄ in. Kōnke ikdelel ko rejim̧we ami im kallim̧ur eo ami n̄an ļoor Rilo̧mo̧o̧r eo, tokālik eo an kabun̄ in ealikkar an em̧m̧an.

Ij bōkwaj n̄an kom̧ iakwe im kōjeram̧m̧an eo an Būreejtōn Thomas S. Monson. Būreejtōnji eo Kein Kajuon ej jar kōn kom̧ emakijkij. Kōmij iien otemjeļo̧k kajjitōk ippān Irooj n̄an kōjeram̧m̧an, kōjparok, im tōl kom̧.

Em̧m̧aan ro Repilo im Eļbōn eo

Ekwe elōn̄ļo̧k jān jibuki iiō remootļo̧k, juon rijeje poem̧ Riamedka eaar likūt ilo juon poem̧ juon būrabōl in etto. Eoon eo m̧oktata an poem̧ eo ej kōnono kōn:

Jiljino em̧m̧aan in Indostan
Ro raar lukkuun tijemļo̧k,
Ro raar ilo̧k n̄an lale juon Eļbōn
(Men̄e aoleperwōn̄ raar pilo),
Jān lale ļo̧k jān kajjojo
Kar kije ilo reel an ļōmņak eo an.

Ilo poem̧ eo kajjojo jiljino ritok-itak ro rej bōk juon m̧ōttan eoktak an eļbōn eo innām kōmeļeļeik n̄an ro jet ta eo eaar loe.

Juon iaan em̧m̧aan ro kar lo bwe neen eļbōn eo im kōmeļeļeik āinwōt edoulul im ikurbalōklōk āinwōt juon wōjke. Eo juon eaar en̄jake n̄i lep eo im kōmeļeļeik eļbōn eo āinwōt m̧ade. Eo kein kajilu eaar jibwe teeļ eo im kwaļo̧k bwe eļbōn eo ej āinwōt juon to. Eo kein kemen eaar lo lukōn im kwaļo̧k bwe eļbōn eo ej āinwōt juon jineek eļap.

Kajjojo ej kōmeļeļeik em̧ool.

Im kōnke m̧ool eo an ej itok jān jeļā eo an juon make, kajjojo ej kwaļo̧k bwe ejeļā ta eo ejeļā.

Poem̧ eo ej kōjem̧ļo̧k:

Im kōn menin em̧m̧aan in Indostan ro
Raar arto-artak eļap im aitok,
Kajjojo ilo ļōmņak eo an make.
Kar pen būruwier im jab ebbweer.
Men̄e kajjojo raar jim̧we jidik,
Im aolep raar bōd!1

Jej kalimjōk bwebwenato in kōn ļōmņak eo ad make im ettōn̄. Ālkin men otemjeļo̧k, jejeļā ewi jekjek in juon eļbōn. Em̧ōj ad riit kaki, im kar alooji ilo pija, im elōn̄ iaad em̧ool em̧ōj aer lo juon kōn mejeer make. Jej tōmak jejeļā m̧ool eo kōn ta in eļbōn. Bwe juon emaron̄ make kōm̧m̧ane juon jem̧ļo̧k kar pedped ion juon wōt jekjek an m̧ool im kōjerbale n̄an aolepān juon men āinwōt ejej tokjen ak em̧ool pen tōmake. Ilo turejet eo juon, jemaron̄ ke kile kōj make ilo em̧m̧aan rein jiljino repilo? Jenan̄in ke kar bōd kōn ejja jekjek in ļōmņak in?

Ij ļōmņak un eo bwebwenato in ej kanooj bun̄bun̄ wōt ilo ekanooj lōn̄ m̧anit ko im ium̧win ekanooj lōn̄ iiō ko kōnke kōn jekjek eo an eļap. Rijilōk Paul eaar ba bwe ilo laļ in meram eo ej mejkunļo̧k im jej lo wōt m̧ōttan m̧ool eo āinwōt n̄e jej lale “lale juon glass, e tab.”² Im aaet ej āinwōt ej m̧ōttan lukkuun piktok eo ad āinwōt armej ro n̄an kōm̧m̧ani kōtmene ko kōn armej, kien ko, im ujlepļo̧k eo ej pedped ioon likjab eo ad im emakijkij in jeļā eo ebōd.

Kar kekeememej eō kōn juon bwebwenato kōn juon ripālele me raar m̧are ium̧win 60 iiō ko. Ejeja aer akweel ilo tōre eo, im raan ko aer ippān doon raar eļļāļo̧k ilo lem̧ōņōņō im bun̄bōro. Raar kōjebar aolep men im ejjeļo̧k ņojak ko ikōtaer—ijello̧k wōt juon. Lio pālele eaar wōr juon an bo̧o̧k me eaar likūt itulōn̄ in kūļo̧jet eo, im liin eaar jiron̄ ļeo pālen ke raar m̧are bwe ejjab aikuj in n̄an jidik lale lowaan.

Ilo an jon̄oul iiō ko rej eļļāļo̧k, iien eo eaar itok me ļeo pāleen eaar bōk laļ ļo̧k bo̧o̧k eo im kar kajjitōk eļan̄n̄e emaron̄ in kar jeļā ta eo eaar pād lowaan. Lio pālele eaar errā, im ļeo eaar kōpeļļo̧ke n̄an lo ruo to̧ļļe jiddik im $25,000. Ke ļeo eaar kajjitōk ippān lio pālen ta kar meļeļe menin, lio eaar uwaak, “Ke kōjro kar m̧are, jinō eaar jiron̄ eō bwe jabdewōt iien iaar illu ippam̧ ak jabdewōt iien kwar ba ak kōm̧m̧ane juon men ijjab kōņaan, ij aikuj āje juon to̧ļļe innām kōnono kōn men ko ippam̧.”

Ļeo pālele eaar to̧o̧r dān in kōmejaaļaļ kōn bwebwenato in em̧m̧an. Eaar bwilōn̄ bwe ilo 60 iiō ko in m̧are eo eaar kallu lio pālen n̄an āje ruo to̧ļļe. En̄jake lukkuun em̧m̧an kōn e make, eaar bōk pein lio pāleen im kar ba, “Ej kōmeļeļeik to̧ļļe ko, bōtaab $25,000 eo?”

Lio pāleen eaar ettōn̄ im kar ba, “Jāān ņe iaar bōk jān aō wia kake aolep to̧ļļe ko iaar āji ium̧win iiō ko.”

Bwebwenato in eaar jab wōt katakin juon wāween ekaitoktok limo ilo ņa mejļan jab errā ko eo ilo m̧are, ak barāinwōt kwaļo̧k jajeļo̧kjeņ eo an kajju tōpar jem̧ļo̧k ko pedped ioon meļeļe ko rejabwe.

Ekanooj emakijkij an “m̧ool” eo jej jiron̄ kōj make jidik wōt an kakkure m̧ool eo, im jet iien rejjab lukkuun in m̧ool n̄an jidik.

Rainin ikōņaan kōnono kōn m̧ool. Āinwōt aō kōm̧m̧ane, ij kūr kom̧ n̄an kejōkļo̧kjeņ kōn jet kajjitok ko raorōk.

Kajjitōk eo kein kajuon ej “Ta eo m̧ool?”

Eo kein karuo, “Elukkuun ke pidodo n̄an jeļā m̧ool eo?”

Im jilu, “Ekōjkan ad uwaak n̄an men ko me rej jum̧ae m̧ool ko me jaar katak m̧oktaļo̧k?”

Ta Eo M̧ool?

Ta eo m̧ool? Ilo jem̧ļo̧k in ļo̧k awa ko āliktata in mour eo An, Rilo̧mo̧o̧r eo kar bōkļo̧k n̄an im̧aan Pontius Pilate. Elder ro an Riju raar ņa ruwōn Jisōs kōn ruwōn im jab kautiej eo an ņae Rirom im ba bwe ren m̧an E.

Ke Pilate eaar itok n̄an jelm̧ae Em̧m̧aan in Galilee eo, eaar kajjitōk, “Kwoj kiin̄ ke?”

Jisōs eaar uwaak, “Bwe Iar itok n̄an laļ, bwe In kōnnaan kōn m̧ool eo. Er otemjej jān m̧ool rej eo̧ron̄ ainikiō.”³

Ijjab jeļā ta kar kain em̧m̧aan rōt Pilate, ak ijeļā ke ta eo eaar ļōmņake. Mekarta, Ij ļōmņak bwe eaar meletlet im eaar lo eļap kōn laļ in kar jeļā kake.

Ij kile jet pere ilo uwaak eo an Pilate. Ij ron̄ ilo naan ko an ainikien eo an juon em̧m̧aan me emaron̄ kar juon iien lo̧ļe bōtaab kiiō—ālkin juon jeļā eļap kōn mour—eaar āinwōt juon men eddo, em̧ool kar kam̧ōkm̧ōk.

Ijjab tōmak Pilate eaar jab ketak ilo kōnono ke eaar uwaak kōn jilu naan ko relemwaan: “Ta in m̧ool?”⁴

N̄an kapenļok, ij ļōmņak eļan̄n̄e ta eo eaar lukkuun kar kajjitōk eaar “Ekōjkan an juon maron̄ jeļā m̧ool eo?”

Im ej juon kajjitōk n̄an aolep tōre im n̄an aolep armej.

Jabdewōt Emaron̄ ke Jeļā M̧ool eo?

Kiiō, juon emaron̄ ke jeļā m̧ool eo? Jet iaan kōļmenļo̧kjeņ ko rem̧m̧an tata me eaar mour ioon laļ in eaar kajieon̄ uwaake kajjitōk jab in. Piktok eo an m̧ool eo ekabwilōn̄lōn̄ eaar juon unin tōl em̧m̧an an bwebwenato an rijeje poem̧ ro rebun̄bun̄ im ribwebwenato ro. Shakespeare eaar āinwōt eļaptata itok limo kake. Bar juon iien n̄e kwoj riiti juon iaan kaburom̧ōjm̧ōj ko an Shakespear, kile ewi emakijkij an bwebwenato eo kwaļo̧k juon jabmeļeļe an juon m̧ool eaorōk.

Kiiō, ejjan̄in wōr ilo bwebwenato an laļ in eaar pidodo ļo̧k ad tōpar eļapļo̧k meļeļe—jet iaan m̧ool eo an, jet iaan bōd eo an, im eļap wōt jidik in m̧ool eo an.

Kōn menin, ejjan̄in kar wōr ilo bwebwenato an laļ in eaar ļapļo̧k an aorōk n̄an katak ekōjkan kajim̧we jeļā ikōtaan m̧ool im bōd.

M̧ōttan jorrāān eo ad ilo pukōt m̧ool eo ej bwe meletlet an armej eaar kanooj kainepataik kōj. Ekanooj lōn̄ ad waanjon̄ak ko kōn men ko me armej juon iien “raar jeļā” raar m̧ool bōtaab kar kwaļo̧k rebōd.

N̄an waanjon̄ak, ilo kōjekdo̧o̧n errā eo eļap jān jon̄an juon kar iien, laļin eaar jab depakpak. Iju ko rejjab jepook laļ in. Kan̄ juon tōm̧ato enaaj kōm̧m̧an bwe juon en m̧ōkaj an mej. Im, aaet, em̧m̧aan emaron̄ ekōkāke—em̧ool dōblo̧ke kōtaan ko.

Jeje ko rekwojarjar robrak kōn bwebwenato ko an em̧m̧aan im kōrā ro me raar bōd aer ukōt “m̧ool” eo.

Ilo Kallim̧ur M̧okta, Balaam eaar jab maron̄ jum̧ae ““oņeān kōm̧m̧an [nana]”⁵ kar leļo̧k n̄an e jān Rimoab ro. Kōn menin eaar kareel e make n̄an tōmak juon m̧ool kāāl im kar jipan̄ Rimoab ro bōk Riisreal ro n̄an kaje er make ilo m̧ōm̧ an kanniōk im jab pokake.⁶

Korihor eo eaar bun̄ jān tōmak, ālkin an tōl elōn̄ jān m̧ool eo, kar kwaļo̧k bwe devil eaar m̧oņe n̄an jon̄an eo me eaar lukkuun kar tōmak bwe ta eo eaar ba eaar m̧ool.⁷

Ilo Bok in Mormon, jim̧or Rinipai ro barāinwōt Rilamen ro raar tōmak kar ejaaki “m̧ool ko” aer make kōn katakin doon. “M̧ool” eo an Rinipai ro kōn Rilamen ro eaar bwe raar “awiia, im kamijak, im juon armej remaro bōtōktōk,”⁸ jamin maron̄ n̄an bōk ko̧jpeļ eo. “M̧ool” eo an Rilamen ro kōn Rinipai ro eaar bwe Nipai eaar ko̧o̧te jolet eo an ļōm̧aro jein im bwe ro ineen Nipai raar ririab ro me raar wōnm̧aanļo̧k wōt n̄an ko̧o̧te Rilamen ro kōn ta eo eaar aer menin jolet.⁹ “M̧ool” kein kar anōkaneik matōrtōr eo aer n̄an doon m̧ae iien eo āliktata eaar pād ippāer aolep.

Ejjab menin aikuj n̄an ba, elōn̄ waanjon̄ak ko ilo Bok in Mormon me rej jum̧ae jim̧or jekjek kein. Mekarta, Rinipai ro im Rileman ro tōmak “m̧ool” kein me eaar ļam jem̧ļo̧k eo an kar juon tōre armej kajoor im aiboojoj.

Lukkuun Piktok in Armej im M̧ool eo

Ilo jet wāaween jej aolep jejjet n̄an kain ļōmņak rōt in rankeke.

“M̧ool” ko jej būki rej jelet jekjek eo an jukjukinpād ko ad barāinwōt m̧wil ko ad kajjojo. Aolep emakijkij an “m̧ool” kein pedped ioon jab dedeļo̧k im bōd eo an kein kam̧ool eo im, ilo iien ko, raar jerbale kōņaan ko an ļōmņak kōn juon make ekanooj ļap.

M̧ōttan un eo n̄an ekajet ejjab em̧m̧an ej itok jān ļōmņak eo an armej n̄an ilo jab jim̧we kōjeno̧lo̧k tōmak jān m̧ool. Emakijkij ad kwaļo̧k tōmak ippān m̧ool, ļōmņak bwe kōnke jet men rej remeļeļe ak reinem̧m̧an, ej aikuj in m̧ool eo. Ilo jekjek eo juon, jet iien jejjab tōmak m̧ool eo ak joļo̧ke—kōnke ej aikuj bwe jān oktak ak kwaļo̧k bwe jej kōm̧m̧an bōd. Emakijkij, m̧ool eo ej kowaane kōnke ejjab waļo̧k ilo jokkun wōt juon ippān jeļā ko im̧aanļo̧k.

N̄e ļōmņak ko ak “m̧ool ko” an ro jet roktak jān eo ad make, ijello̧kin ļōmņak kōn jekjek ko me emaron̄ in meļeļe ko me remaron̄ jipan̄ im kōkm̧anm̧anļo̧k ak rie ta eo jejeļā, emakijkij ad kwaļo̧k jem̧ļo̧k ko ak kōm̧m̧ani kōtmene ko me armej eo juon ebōd kōmeļeļeik, apan̄ ilo ļōmņak, ak em̧ool jeļā n̄an m̧ōņ.

Ejerata, ļōmņak in emaron̄ ajeded n̄an aolep eria ko an mour ko ad—jān ikkure ko n̄an jemjerā ko an baam̧le im jān kabun̄ n̄an kien ko.

Ignaz Semmelweis

Juon waanjon̄ak ekaburom̧ōjm̧ōj an ļōmņak in ej bwebwenato eo an Ignaz Semmelweis, juon taktō in Hungarian me eaar jerbal in taktō ilo 19-century eo. Ilo jinoin jerbal eo an, Dr. Semmelseis eaar katak bwe 10 pōjāān in kōrā ro me raar etal n̄an jikin taktō eo an raar, ilo an oran mej ilo jikin taktō ro iturin eaar dikļo̧k jān 4 pōjāān. Eaar jokālet n̄an pukōt.

Ālkin etale ruo jikin taktō, Dr. Semmelweis kar tōpar jemļo̧k eo bwe oktak eo eļap eaar bwe jikin taktō eo an eaar jikin katakin ijo me ānbwiin ko kar kakōlkōli. Eaar lale an taktō ro jet etal kajju jān kōm̧m̧an autopsie ko n̄an kemmour armej ro. Eaar tōpar jem̧ļo̧k eo bwe ilo juon jekjek ānwiin ko raar kōbaijin peier im kōm̧m̧an bwe en waļo̧k pipa eo enana.

Ke eaar jino kwaļo̧k bwe taktō ro rej kwaļo̧k peier kōn chlorinated lime solution, eaar ioon oktak ko im em̧ool kajirere. Jem̧ļo̧k ko An eaar jum̧ae “m̧ool ko” an taktō ro jet. Jet iaan ro m̧ōttan em̧ool kar tōmak bwe eaar kōjak n̄an ļōmņak bwe pein juon taktō emaron̄ ettoon ak kōm̧m̧an nan̄inmej.

Bōtaab Semmelweis eaar jum̧ae, im eaar kōm̧m̧ane juon kakien n̄an taktō ro ilo jikin taktō eo an n̄an kwaļ peier m̧o̧kta jān kōļotak nin̄nin̄ ko. Āinwōt juon men aorōk, oran mej eaar kanooj wōtlo̧k kōn 90 pōjāān. Semmelweis eaar en̄jake jim̧we im eaar jeļā bwe kaminene in enaaj kiiō kōjerbale ilo jukjuk in pād eo an taktō. Bōtaab eaar bōd. Em̧ool tōprak in ekkatak eo an eaar jab bwe n̄an ukōt ļōmņak ko an elōn̄ taktō ilo raan eo.

Epidodo Ke n̄an Jeļā M̧ool eo?

Men eo kōn m̧ool ej bwe ej waļo̧k eļapļo̧k tōmak. Ej m̧ool men̄e eļan̄n̄e ejjeļo̧k juon ej tōmake.

Jemaron̄ ba iturilik ej ituiōn̄ im ituiōn̄ ej iturilik aolepān juon raan im em̧ool tōmake kōn aolepān būruwōd, bōtaab eļan̄n̄e, n̄an waanjon̄ak, jej kōņaan kelōk jān Quito, Ecuador, n̄an New York City United States, ewōr juon iaļ me naaj tōl kōj n̄an ijōņ, im bwe ej ituiōn̄—iturilik ejjab jejjet.

Aaet, menin ej baj juon waanjon̄ak an ekākke elemwaan. Mekarta, ewōr ilo m̧ool kain menin āinwōt lukkuun m̧ool—ban kowaane, m̧ool ejjab oktak.

M̧ool in ej oktak jān tōmak. Ej oktak jān kōjatdikdik. Lukkuun m̧ool ej jab pedped ilo ļōmņak an armej ak bun̄bun̄. Poll ko rejjab maron̄ kareele. Jekdo̧o̧n mālim ekajoor an rie an ļakkūk emaron̄ ukōte.

Kōn menin ekōjkan ad maron̄ lo m̧ool eo?

Ij tōmak bwe Jemed ilo Lan̄ ej m̧ōņōņō ippān ajri ro Nejin n̄e rej kōjerbal tōļan ko aer im maron̄ in ļōmņak n̄an lukkuun lo m̧ool eo. Ium̧win epepen ko elōn̄ em̧m̧aan im kōrā ro—kōn jibadbad, un, kappok an kein kapeel, im, aaet, kōn im̧we—kar lo m̧ool eo. Elolo kein em̧ōj aer kōjeram̧m̧an armej, kōkōm̧anm̧anļo̧k mour ko ad, im lōn̄aj lan̄lōn̄, kabwilōn̄lōn̄, im kautiej.

Em̧ool, men ko jaar ilo juon tōre ļōmņak kar jeļā rej wōnm̧aanļo̧k wōt ilo aer em̧m̧anļo̧k, kōkōm̧anm̧anļo̧k, ak em̧ool jum̧ae jān rijeļāļo̧kjeņ ro me rej pukōt n̄an meļeļe m̧ool eo.

Ilo ad aolep jeļā, ebwe an pen n̄an kōjeno̧lo̧k m̧ool eo jān en̄jake ko ad make. N̄an kōm̧m̧an bwe men ko ren nana ļo̧k, ewōr ad rijum̧ae, “tepil eo, āinwōt lion e rorror, ej etetal wōt im pukot eo ej maron̄ in kan̄i.”¹⁰

Satan ej rijeļā m̧oņ eļap, “rikinaakļo̧k ro jeim im jatim,”¹¹ jemān aolep riab,¹²eo ej wōnm̧aanļo̧k wōt ilo pukōt n̄an kapok bwe en maron̄ anjo iood.¹³

Rikapo eo elōn̄ an jekjek in aujiid n̄an dāpij armej jān m̧ool eo. Ej letok tōmak eo bwe m̧ool ej āinwōt. Waļo̧k n̄an ļōmņak eo aer kōn bōk im jokkun wōt juon, ej dāpij lukkuun ņooj m̧ool eo kōn ba bwe “m̧ool” eo an juon armej ej em̧m̧an in eo an jabdewōt.

Jet ej kapo er n̄an tōmak bwe ewōr juon lukkuun m̧ool ijōko jabdewōt bōtaab bwe epidodo n̄an jabdewōt n̄an jeļā kake.

N̄an ro me em̧ōj aer kadede dāpij m̧ool eo, kōtōbalbal eo an eļaptata ej n̄an kajeeded ine ko an pere. N̄an waanjon̄ak, eaar kōm̧m̧an bwe elōn̄ membōr ro an Kabun̄ in n̄an tūbbo̧k ke raar lo meļeļe eo kōn Kabun̄ in me ej āinwōt n̄an jum̧ae ta eo raar katak im̧aanļo̧k.

Eļan̄n̄e kwoj en̄jake kain iien in, kememej bwe ilo tōre in an meļeļe elōn̄ ro rej ejaak pere kōn jabdewōt men im aolep men, ilo jabdewōt iien im aolep jikin.

Kwonaaj lo em̧ool ro me rej ba wōt bwe ewōr aer kein kam̧ool bwe laļ in edepakpak, bwe allōn̄ ej hologram, im bwe rikōm̧m̧an pija ro rej m̧ool armej in laļ ko jet. Im iien otemjeļo̧k em̧m̧an n̄an ļōmņak, kōnke jet men rej jeje ilo pepa, waļo̧k ilo Intōrnet, emakijkij āliji, ak ewōr juon kumi ekajoor an rikaļoor ro rejjab kōm̧m̧an bwe en m̧ool.

Jet iien men ko rejjab m̧ool ba kaki ak meļeļe ko rej waļo̧k ilo juon jekjek me rej waļo̧k ebwe aer ļap tokjāer. Mekarta, n̄e kwoj idajon̄jon̄ kōn meļeļe eo me ej idaptōk ippān naan an Anij kar kwaļo̧ke, kememej bwe em̧m̧aan ro repilo ilo būrabōļ eo an eļbōn eo rejjamin maron̄ kar jim̧we ilo kōmeļeļeik likio in m̧ool eo.

Jejjab jeļā aolep men ko—jejjab maron̄ lo aolep men. Ta eo me maron̄ jum̧ae kiiō emaron̄ lukkuuk meļeļe kake ilo ad pukōte im bōk eļapļo̧k meļeļe ko raorōk. Kōnke jej lo ilo juon kūlaj emarok, jej aikuj lōke Irooj, eo ej lo aolep men ilo alikkar.

Aaet, laļ in ad eobrak kōn tarpok. Bōtaab āliktata aolep kajjitok ko ad renaaj uwaak. Aolep pere ko ad naaj bōk jikier kōn m̧ool. Im bwe ej kōnke ewōr juon kein jipan̄ an m̧ool eo me edipieo jim̧we, im ejjab nana. Unin jipan̄ eo ej Jemedwōj Ilan̄ eo ejjeļo̧k jem̧ļo̧kin im jeļā kake. E ejeļā m̧ool eo āinwōt eaar, āinwōt ej im aaet āinwōt an naaj.¹⁴ E ejeļā aolep men ko, im E ej ilōn̄in aolep men ko, im jān E, ¹⁵.

Jemedwōj Ilan̄ eo ej iakwe, ej letok m̧ool eo An n̄an kōj, ajri ro Nejin ilo mour in.

Kiiō, ta m̧ool in?

Ej ko̧jpeļ eo An. Ej ko̧jpeļ eo an Jisōs Kraist. Jisōs Kraist ej “iaļ eo, m̧ool eo, im mour eo.”¹⁶

Eļan̄n̄e enaaj bwe ad peran im tōmak n̄an etetal ilo iaļ eo An, enaaj tōl kōj n̄an aenōm̧m̧an an bōro im ļōmņak, n̄an wōr meļeļe eo indeeo ilo mour, n̄an lem̧ōņōņō ilo laļ in, im n̄an lan̄lōn̄ ilo laļ eo ej itok. Rilo̧m̧o̧o̧r eo ejjamin im “ejjab ettoļo̧k jān kōj otemjej.”¹⁷ Ewōr ippād kallim̧ur eo An bwe eļan̄n̄e jej pukōt E ilo tiljek, jenaaj lo E.¹⁸

Eddo eo Ad n̄an Pukōt M̧ool eo

Bōtaab ekōjkan ad maron̄ jeļā bwe “m̧ool” in ej oktak jān ko jet? Ekōjkan ad maron̄ lōke “m̧ool” in?

Kūr eo an n̄an lōke Irooj ejjab kōtļo̧k kōj jān eddo eo n̄an jeļā kōn kōj make. Menin eļapļo̧k jān juon iien em̧m̧an; ej juon eddo—emaron̄ juon iaan un ko kar jilkintok kōj n̄an laļ in.

Armej ro Rekwojarjar ilo Raan-ko Āliktata jab kajjitōk n̄an bōk ilo jidik aolep men ko rej ron̄. Kar kōketak kōj n̄an ļōmņak im lo m̧ool eo kōn kōj make. Kōtmeneik kōj n̄an kejōkļo̧kjeņ, n̄an pukōt, n̄an etale, im n̄an itok n̄an juon jeļāļo̧kjeņ an juon make kōn m̧ool eo.

Brigham Young eaar ba: “Ij … mijak bwe armej rein ekanooj ļap ļōke eo ippāer ilo ritōl ro aer bwe rejjamin naaj kajjitōk kōn er make ippān Anij eļan̄n̄e rej tōl jān E. Ij mijak rej pād ilo juon iminene an pilo an kōjparok an juon make. … Kōm̧m̧an bwe aolep em̧m̧aan im kōrā ren jeļā, kōn unoojdikdik an Jetōb eo an Anij n̄an er make, eļan̄n̄e ritōl ro aer rej etetal ilo iaļ eo Irooj ej kwaļo̧ke.”¹⁹

Jān pukōt m̧ool eo jabdewōt jikin jemaron̄ lo ie. Rikanaan Joseph Smith eaar katakin bwe “Mormon ej m̧ool. … Pedped eo im̧aantata im aorōk an kabun̄ eo ad ekwojarjar ej, bwe jej tōmak bwe ewōr ad jim̧we n̄an dāpij aolep, im aolep aitem an m̧ool eo, ilo ejjeļo̧k jon̄an … kamo jān utiej bōro ko ak ļōmņak an jeļāļo̧kjeņ ko an armej.”²⁰

Aaet, ewōr ippād tarlep eo an ko̧jpeļ eo ejjeļo̧k jem̧ļo̧kin, bōtaab ejjab meļeļe in bwe jejeļā aolep men. Ilo m̧ool, juon iaan pedped ko an ko̧jpeļ eo kar kōjepļaaktok ej tōmak eo ad bwe Anij “enaaj kwaļo̧k elōn̄ men ko reļļap im aorōk.”²¹

Jepļaaktok eo an ko̧jpeļ eo an Jisōs Kraist eaar itok kōnke juon likao kōn juon bōro ettā im juon ļōmņak ekajoor eaar pukōt m̧ool eo. Joseph eaar ekkatak im jerbale, im eaar lo bwe eļan̄n̄e juon armej ej aikuj meletle, emaron̄ kajjitōk ippān Anij im m̧ool eo naaj lukkuun leļo̧k n̄an e.²²

Kabwilōn̄lōn̄ eo eļap an Jepļaaktok eo eaar jab baj kajim̧we wōt ļōmņak ko rebōd im katak ko renana—em̧ool eaar kōm̧m̧ane āindein—bōtaab ej kōpeļļo̧k leplep rōn̄ōl ko an lan̄ im kar jino juon jiōbtok ekajoor an meram kāāl im jeļāļo̧kjeņ me eaar wōnm̧aantak n̄an rainin.

Kōn menin jej wōnm̧aanļo̧k wōt im pukōt m̧ool eo jān aolep bok ko rem̧m̧an im kein jipan̄ ko rem̧m̧an jet. “Elan̄n̄e elōn̄ men ko rewānōk, kam̧ōņōņō, ak ennaan ko rem̧m̧an ak nōbari, men kein kōmij pukōti.”²³ Ilo jekjek in jemaron̄ jum̧ae m̧oņ an eo enana. Ilo jekjek in jemaron̄ katak m̧ool eo “naan in kain̄i im bar naan in kain̄i; lain im bar lain.”²⁴ Im jeļāļo̧kjeņ ej eddāp n̄an jeļāļo̧kjeņ, im meletlet ej bōk meletlet, im m̧ool ej dāpij m̧ool.²⁵

Ro m̧ōtta reddik, ilo ami bōk eddo eo n̄an pukōt m̧ool eo kōn juon kōļmenļo̧kjeņ epeļļo̧k im juon bōro ettā, kom̧ naaj pidodo ļo̧k ami bōk ro jet, peļļo̧kļo̧k n̄an ron̄jake, ļapļo̧k ami pojak n̄an meļeļe, ļapļo̧k ami itoklimo n̄an kalōk ijello̧kin rupe, im ļapļo̧k ami m̧ōņōņō n̄an etal ijo Irooj ekōņaan bwe kom̧in ilo̧k ie ļo̧k.

Jetōb Kwojarjar—Unin Tōl eo Ad n̄an M̧ool Otemjeļo̧k

Baj ļōmņak kake. Kom̧ij lukkuun wōr ami juon m̧ōttami ekajoor im unin tōl eo eļap tokjen ilo pukōt m̧ool eo ejjab jem̧ļo̧k. Wōn in? Ej Jetōb Kwojarjar. Jemedwōj Ilan̄ eaar jeļā ewi jon̄an an pen enaaj kar n̄an kōj n̄an dibuk aolep ennaan ko rej jiāe im lo m̧ool eo ilo tōre in mour in ad. Eaar jeļā jenaaj kar lo wōt m̧ōttan eo an m̧ool eo, im Eaar jeļā bwe Satan enaaj kar kajieon̄ m̧oņe kōj kōn menin Eaar letok n̄an kōj menin letok an lan̄ Jetōb Kwojarjar n̄an kōmeram ļōmņak ko ad, katakin kōj, im kam̧ool n̄an kōn m̧ool eo.

Jetōb Kwojarjar ej juon rikkwaļo̧k revelesōn. E ej Rikaenōm̧m̧an, eo ej katakin kōj m̧ool eo an aolep men ko [eo] ejeļā aolep men ko; im ewōr an aolep kajoor ekkar n̄an meletlet, jouj, m̧ool, jim̧we, im ekajet.²⁶

Jetōb Kwojarjar ej unin tōl em̧ool im juon inem̧m̧an n̄an jipan̄ aolep armej me ej pukōt ippān Anij ilo aer kōm̧m̧ani kālet ko ilubwilijin tarpok im jum̧ae.

Kam̧ool eo an m̧ool eo jān Jetōb Kwojarjar ej pād n̄an aolep, aolep jikin, aolepān laļ in. Aolep ro rej pukōt n̄an jeļā m̧ool eo, ekkatak kake ilo ļōmņak ko aer,²⁷im eo ej “kajjitōk kōn juon bōro em̧ool, kōn lukkuun kōttōpar, im wōr tōmak ilo Kraist, [naaj jeļā] m̧ool eo … jān kajoor eo an Jetōb Kwojarjar.”²⁸

Im ewōr juon kakobaba, menin letok eo epen kōmeļeļeik an Jetōb Kwojarjar epād n̄an aolep ro me rej kakōrbōb er make kōn peptaij im jān mour erreo n̄an jemjerā eo An aolep iien.

Aaet, Jemami ilo Lan̄ eo ej iakwe ejjamin kar kōtļo̧k bwe kom̧in make ilo mour wabanban in n̄an jōbwābwe ilo marok. Kom̧in jab po. Kom̧ maron̄ anjo ioon maroklep an laļ in im lo m̧ool eo ekwojarjar.

Jet, mekarta, rejjab kanooj kate er pukōt m̧ool eo ilo aer kajieon̄ akweel. Rejjab m̧ool ilo pukōt n̄an katak; ijello̧kin, rej ikdelel n̄an akweel, kōmejāje kōn aer katak im kōn menin ej kwaļo̧k aikwelel. Rej kowaan ak joļo̧k kapilōk eo an Rijilōk Paul n̄an Timothy: “Kajjitōk ko waan im men in jajeļo̧kjeņ ko, bwe kwō jeļā rej keotak akwāāl ko.”²⁹

Āinwōt rikaļoor an Jisōs Kraist, jejeļā bwe kain akweel in ej lukkuun jab jejjet ippān Jetōb eo me jej pedped ioon ilo ad pukōt m̧ool eo. Āinwōt an Rilo̧mo̧o̧r eo kar kakkōl Rinipai ro “Bwe em̧ool, … Ij ba n̄an kom̧, eo ewōr jetōb in jum̧we ilo e ejjab jān Eō, ak ej jān devil, eo ej jemān jum̧ae.”³⁰

Eļan̄n̄e kom̧ij ļoor Jetōb, kappok eo ami make kōn m̧ool eo epen joļo̧k ej tōl kom̧ n̄an ami Irooj im Rilo̧mo̧o̧r, em̧ool Jisōs Kraist, bwe E ej “iaļ eo, m̧ool eo, im mour eo.”³¹ Menin emaron̄ jab wāween eo ejjab apan̄ tata. Enaaj maron̄ barāinwōt iaļ eo ejjeļo̧k tokjān ito-itak ie. Im enaaj iaļ eo kōn apan̄ ko n̄an anjo̧ ioer im reba ko rōkaeteet n̄an kijooni. Bōtaab enaaj iaļ eo An—iaļ in lo̧mo̧o̧r an Rilo̧mo̧o̧r eo.

Ij kobaik aō kam̧ool āinwōt Rijilōk an Irooj, bwe Jisōs ej RiKraist eo, Nejin Anij Emour. Ijeļā menin kōn aolepān būruwō im ļōmņak. Ijeļā menin jān kam̧ool im kajoor an Jetōb Kwojarjar.

Ij kajjitōk ippāmi n̄an jab kakoņ kijejeto ko ilo kappok eo ami n̄an jeļā m̧ool in kōn kom̧ make—kōnke m̧ool in enaaj kōm̧m̧an bwe kwon anemkwoj.³²

Ro m̧ōtta jitōnbōro reddik, kom̧wij kōjatdikdik eo an Israel. Kōm̧ij iakwe kom̧. Irooj ejeļā kom̧; Ej iakwe kom̧. Irooj ewōr an lōke eļap ilo kom̧. Ejeļā tōprak ko ami, im Ej ļōmņak kōn apan̄ ko ami im kajjitōk ko ilo mour.

Ej jar eo aō bwe kom̧ naaj pukōt m̧ool eo ilo m̧ool im jab bōjrak, bwe kom̧ naaj ikirelel n̄an idaak jān unin aolep m̧ool, eo dān ko an rerreo im enno, “juon aebōj ilo e im naj to̧o̧rtok n̄an mour indeeo.”³³

Ij kōjeram̧m̧an kom̧ kōn lōke ilo Irooj im juon ikdelel eliok tūt bok n̄an jim̧we eo n̄an jeļā m̧ool eo jān bōd—kiiō im ilo aolepān ami mour. En̄in ej jar eo im kōjeram̧m̧an eo aō, ilo etan ekwojarjar Jisōs Kraist, amen.