2:3

Bwe Jen … Jab Maron̄ Makunļo̧k (D&C 19:18)

David A. Bednar

Jen Doulul eo an Jon̄oulruo Rijilōk ro

Nokon in Jota eo an Rum̧m̧an Ded ro • M̧aaj 3, 2013 • University eo an Texas Arlington

Ij kam̧oolol n̄an bōk koņaaō ilo nokon in jota in ippān jodikdik ro an Kabun̄ in jān aolepān laļ in. Ij iakwe kom̧ im m̧ōņōņō kōn iien in em̧m̧an n̄an kabun̄jar ippān doon.

Susan eaar kōnono im kam̧ool kōn pedped in katak ko raorōk, im kōj kajjojo naaj jeram̧m̧an jeni im kajoorļo̧k eļan̄n̄e jej aolep iien mour kake katak ko An ilo aolepān mour ko ad. Susan ej juon kōrā ewāpeen, im juon kōrā in kālet, im armej eo ij iakwe n̄an indeeo.

Iaar kejōkļo̧kjeņ im lukkuun kajjitōk ippān Jemedwōj Ilan̄ n̄an jeļā ekōjkan aō maron̄ in jipan̄ kom̧ jotenin. Ij jar bwe kajoor eo an Jetōb Kwojarjar enaaj pād ippād kajjojo—bwe jen maron̄ ļōmņak ta eo jej aikuj in ļōmņake, en̄jake ta eo jej aikuj in en̄jake, im katak ta eo jej aikuj in katak bwe jen maron̄ kōm̧m̧ane ta eo jejeļā me jej aikuj in kōm̧m̧ane im ļaptata erom ta eo Irooj ekōņaan bwe jen erom.

Juon Rikaļoor Euwijlepļo̧k im juon Waanjon̄ok in Jab Mekunļo̧k

Elder Neal A. Maxwell eaar juon rikaļoor eakwe Irooj Jisōs Kraist. Eaar jerbal āinwōt juon membōr in Doulul eo an Jon̄oulruo Rijilōk ro ium̧win 23 iiō ko, jān 1981 n̄an 2004. Kajoor in jetōb ilo an katakin im ilo an waanjon̄ok in rikaļoor etiljek eaar kōjeram̧m̧an im wōnm̧aanļo̧k n̄an kōjeram̧m̧an ilo elōn̄ wāween membōr ro an Kabun̄ eo eaar jepļaaktok an Rilo̧mo̧o̧r eo im armej in laļ in.

Ilo Oktoba in 1997, Sister Bednar im n̄a kar kūrtok Elder im Sister Maxwell ilo Brigham Young University–Idaho. Elder Maxwell eaar kōnono n̄an rijikuuļ ro, rijerbal ro, im jeban ro ilo juon ippān doon an nokon in jota. Aolep ro ilo kāāmbōj eo kar kijerjer in kobaļo̧k ilo lotok eo an n̄an university eo im m̧aanjebpopo n̄an ron̄jake ennaan eo an.

M̧oktaļo̧k ilo ejja iiō eo wōt, Elder Maxwell eaar en̄taan ium̧win 46 raan ko im bon̄ ko mōjņo̧ļo̧k kōn kānjer in leukemia. Ejjab etto ālkin an dedeļo̧k an taktō im kar em̧m̧akūt jān aujipitōļ, eaar jidik kōnono ilo kweilo̧k eo eļap ilo Eprōļ an Kabun̄ eo. An wōnm̧aanļo̧k wōt im kāājimourur im kakōlkōl eaar em̧m̧anļo̧k aolepān spring im summer ilo allōn̄ ko, ak kajoor in ānbwinnin im kōļmenļo̧kjeņ eo an Elder Maxwell raar mekarta jabwe n̄e ej ito itak n̄an Rexburg. Ālkin iakiakwe Elder im Sister Maxwell ilo erpoot eo, Susan im n̄a kar bōkļo̧k erro n̄an m̧weo im̧ōm bwe ren kakkije im m̧ōn̄ā in rālep jidik m̧okta jen nokon in jota eo.

Tōre in kōm̧ij kōm̧aao ippān doon raan eo, iaar kajjitōk ippān Elder Maxwell ta katak ko eaar katak jen nan̄inmej eo an. Aolep iien inaaj keememej uwaak eo ejjejjet im ettuwe eaar uwaake eō. “Dave,” eaar ba, “Iaar katak bwe jab mekunļo̧k eaorōkļo̧k jen mour.”

An uwaak n̄an kajjitōk eo aō eaar juon pedped in katak eo me eaar bōk an en̄jake eļap ilo tōre in kānjer eo an. Ke Elder Maxwell im kōrā eo pāleen raar kattōrļo̧k n̄an aujipitōļ ilo Jānwōde in 1997, ilo raan eo eaar jikejuuļ n̄an jino kakkōlkōl eo an kein kajuon, raar jeerļo̧k n̄an jikin baak eo im kejōkļo̧kjeņ ium̧win jidik iien ippān doon. Elder Maxwell “eaar ļap an ikkijeļo̧k im kar reilo̧k n̄an [kōrā eo pāleen]. Eaar leļo̧k im jibwe pein im ba…., ‘Ij jab kōņaan mekunļo̧k’” (Bruce C. Hafen, A Disciple’s Life: The Biography of Neal A. Maxwell [2002], 16).

Ilo ennaan eo an ilo kweilo̧k eo eļap an Oktoba 1997, taitōļ “Kōjerbal Bōtōktōkin Pinmuur an Kraist,” Elder Maxwell eaar katakin kōn eļap m̧ool kout: “Ilo ad jelm̧ae mālijjon̄ ko … ad make im en̄taan ko, kōj barāinwōt maron̄ akweļap ippān Jemād, āinwōt Jisōs eaar kōm̧m̧ane, bwe jen ‘jab maron̄ … mekunļo̧k’— meļeļein n̄an bar kāliktak ak n̄an ettoļo̧k jene (D&C 19:18). Jab mekunļo̧k eļap an aorōkļo̧k jen mour! Barāinwōt, bōk m̧ōttan juon kab emeo̧ im jab meo̧ ej ejja jekjek in m̧ōttan n̄an ļoor Jisōs” (Ensign, Nov. 1997, 22).

Uwaak eo an Elder Maxwell n̄an kajjitōk eo aō eaar kōm̧m̧an aō kōļmenļo̧kjeņ kōn katak ko an Elder Orson F. Whitney, eo eaar jerbal āinwōt juon membōr an Doulul eo an Jon̄oulruo Rijilōk ro kout: “Ejjeļo̧k metak jej en̄taan kake, ejjeļo̧k mālijjon̄ jej en̄jake ejjeļo̧k tokjen. Ej kwaļo̧k n̄an ad jeļāļo̧kjeņ, n̄an eddōkļo̧k eo an wāween ko rekarbab āinwōt kijenmej, tōmak, peran im ettā bōro. Men otemjej jej en̄taan jeni im aolep men ko jej kijenmeji, eļaptata n̄e jej kijenmej kaki, kalōk wāween mantid, kareeoiki būruwōd, kōļapļo̧k jetōb ko ad, im kōm̧m̧an bwe en ļapļo̧k ad kea im jouj, lukkuun erreo n̄an ņaetad ajri ro nejin Anij … im ej jen būrom̧ōj im en̄taan, kije im en̄taan, bwe jen maron̄ bōk jeļāļo̧kjeņ eo me [jaar itok] ijin n̄an bōke” (kar kout ilo Spencer W. Kimball, Faith Precedes the Miracle [1972], 98).

Im eoon kein kōn en̄taan eo an Rilo̧mo̧o̧r eo ilo An kar leļo̧k katok eo eļaptata im ejjeļo̧k jemļo̧kin kar jino en̄jake kabūrom̧ōjm̧ōj im meļeļe eļap n̄an n̄a:

Eaar kakien kōj n̄an ukweļo̧k eļan̄n̄e jab Enaaj den̄ļo̧ke kōj jen alal in Lo̧n̄iin im jen An kakkure im jen An illu, im ad en̄taan ej kōmmetaļo̧k—ekōjkan an kōmmetak jejab jeļā, ekōjkan an aiboojoj jejab jeļā, ekōjkan an pen n̄an ineeke jejab jeļā.

Rilo̧mo̧o̧r eo eaar ba bwe Eaar en̄taan kōn men kein kōn aolep bwe ren jab maron̄ en̄taan eļan̄n̄e renaaj ukweļo̧k;

Ak eļan̄n̄e reban ukweļo̧k, rej aikuj en̄taan āinwōt Eaar en̄taan;

Eo eaar kōm̧m̧an bwe Emake, aaet Anij, Eo eutiej tata jen aolep, n̄an wōtlo̧k kōn metak, to̧o̧rļo̧k jen aolep ron̄ in ānbwinnin, en̄taan jim̧or ānbwin im jetōb, im kajjitōk bwe En jab idaak kab in emeo̧ im jab mekunļo̧k—

Mekarta, Eaar leļo̧k aiboojoj eo n̄an Jemān. Eaar bōk m̧ōttan im kadedeļo̧k kōppopo ko an n̄an kōj (LaleD&C 19:15–19).

Rilo̧mo̧o̧r eo eaar jab mekunļo̧k ilo Gethsemane ak ioon Golgotha.

Elder Maxwell eaar barāinwōt jab mekunļo̧k. Rijilōk in ekajoor eaar wōnm̧aanļo̧k wōt dim im kar jeram̧m̧an kōn bar juon iien ilo mour in n̄an iakwe, n̄an jerbal, n̄an katakin, im n̄an kam̧ool. Iiō ko āliktata ilo mour eo an rekar juon kakkobaba in waanjon̄ok ko an rikaļoor ewujlepļo̧k—jen jim̧or kōm̧m̧an ko an im naan ko.

Kiiō, ij tōmak kōj aolep rekōņaan juon em̧maan ekajoor ilo jetōb, emminene, im jekjek in āinwōt Elder Maxwell n̄an en̄jake nan̄inmej ekauwōtata im mej kōn juon meļeļe kōn karōk in m̧ōņōņō eo an Anij, kōn lōke im tūriam̧o, im kōn jibadbad. Im em̧ool eaar kōm̧m̧ane. Ak kōttōpar eo aō rainin ej n̄an kwaļo̧k kam̧ool bwe kain kōjeram̧m̧an kein jab kakoņi n̄an wōt Ritōl ro Routiej ak n̄an jejjo membōr ro kar kāleti an Kabun̄ in.

Jen tōre eo kūr eo aō n̄an kanne peļļo̧k eo ilo Doulul eo an Jon̄oulruo ro kar kōm̧m̧an jen jako eo an Elder Maxwell, jerbal ko aō im ito itak ko raar kōmaron̄ eō n̄an jino jeļā kajjeen Armej ro Rekwojarjar retiljek, reperan, im rekajoor aolepān laļ in. Ikōņaan jiron̄ kom̧ kōn juon likao im jiron̄ ro raar kōjeram̧m̧an mour eo aō im ippān ro iaar katak katak ko raorōk an jetōb kōn jab mekunļo̧k im kōn kōtļo̧k ad kajjojo naaj erom “oran̄ļo̧k ilo ankilaan Jemān” (Mosaia 15:7).

Bwebwenato in em̧ool, im jekjek ko rej m̧ool. Ij jamin naaj, mekarta, kōjerbal likio in āt ko an kajjojo ro rej bōk koņaaer. Ij kōnono n̄an likao eo āinwōt John im jiron̄ eo āinwōt Heather. Ij barāinwōt kōjerbal kōn mālim kālet ennaan ko jān jonōļ ko aer make.

Jab Ankil Aō a Am̧ Wōt

John ej juon rikabwijer priesthood eo erreo im eaar jerbal tiljek āinwōt juon mijenede. Ālkin an jepļaaktok n̄an kabijuknen eo an jān mijen eo an, eaar jerā im m̧areik juon jiron̄ ewāppen im likatu, Heather. John eaar 23 im Heather eaar 20 ilo raan eo raar liāp ippān doon n̄an iien im n̄an indeeo ilo m̧weo imōn Irooj. Jouj likūt ilo ļōmņak iiō eo an John im Heather ilo an bwebwenato in jan̄in jem̧ļo̧k.

Jejjet in jilu wiik ko ālkin tampeļ m̧are eo aer, John kar kile kōn kānjer in dii. Ilo an kānjer eo ļapļo̧k kar barāinwōt loe ilo ār ko an, kakkōlkōl ko an taktō raar jab em̧m̧an.

John eaar je ilo jōnōļ eo an: “Eaar raan eo ekaamjak tata ilo mour eo aō. Ejjab wōt kōnke iaar ron̄ bwe ewōr aō kānjer, ak barāinwōt kōnke ij kab m̧are im ilo jet wāween iaar en̄jake aō likjab āinwōt juon ripālele. N̄a eo ej kakke im rikōjparok eo an baam̧le eo an ekāāl, im kiiō—jilu wiik ko ilowaan eddo in—Iaar en̄jake bwe iaar likjab. Ijeļā bwe pen in ebwebwe, ak ej juon iaan men ko rebwebwe iaar jiron̄ eō make ilo juon iien jorrāān.”

Heather eaar je: “Menin ekar nuuj ko rekōmetak, im ij keememej ekōjkan an lukkuun ukōt jekjek eo kōm̧ kar pād ie. Iaar pād ilo juon ruum̧ in kōttar ilo aujipitōļ jeje kam̧oolol in m̧are-kwon jeje ilo ad kōļmenļo̧kjeņ kōn waļo̧k ko an kakkōlkōl ko an John. Ak ālkin ekkatak kōn kānjer eo an John, aiinbat in kōmat im pileej ko rekar jako aorōkier. Ekar raan eo enana tata ilo mour eo aō, ak iaar keememej aō kar etal n̄an peet bon̄on̄ eo kōn kam̧oolol kōn liāp eo am ilo tampeļ. Taktō ro raar leļo̧k n̄an John 30 wōt bōjāān jide n̄an mour, iaar jeļā bwe eļan̄n̄e kōm̧ naaj tōmak wōt ewōr aō 100 bōjāān n̄an maron̄ pād ippān n̄an indeeo.”

Jejjet in juon allōn̄ tokālik John eaar jino Chemotherapy. E eaar kōmeļeļeik en̄jake in: “Kōm̧admōd ko raar kōm̧m̧an bwe in nan̄inmejļo̧k jen m̧okta ilo mour eo aō. Iaar luuji koļan bōra, jako 41 paun ko, im ānbwinnū ekar āinwōt ej wōtlo̧kļo̧k. Chemotherapy eo eaar barāinwōt jelet aō en̄jake, kōlmenļo̧kjeņ, im jetōb. Mour eaar juon jekjek epen ilo allōn̄ in kimo kōn m̧ōņōņō, būrom̧ōj, im men otemjej repād ioļapļap. Ak jen aolepān, Heather im n̄a kar dāpij tōmak eo bwe Anij enaaj kōmour eō. Kōm̧ kar jeļā.”

Heather eaar je ļōmņak ko im en̄jake ko an: “Ij jab maron̄ jutak n̄an kōtļo̧k an [John] joļo̧k juon bon̄ makeļo̧k iaan ilo aujipitōļ eo, kōn menin iaar aikuj kiki aolep bon̄ ioon juon kauj ilo ruum̧ eo an. Eaar lōn̄ ro m̧ōttam im baam̧le rej lotok ilo raan, ak bon̄ ko raar eppen. Iaar kalimōj jiliin̄ eo im kōļmenļo̧kjeņ kōn ta eo Jemedwōj Ilan̄ eaar karōke n̄an kōm̧. Jet iien ļōmņak eo aō ej jebwābwe ilo jikin ko remarok, im aō mijak n̄an luuji [John] enan̄in anjo ioō. Ak iaar jeļā ļōmņak kein raar jab jān Jemedwōj Ilan̄. Jar ko aō kōn kainōm̧m̧an raar jino emakijkij, im Irooj eaar letok n̄an eō kajoor n̄an wōnm̧aanļo̧k wōt.”

Jilu allōn̄ tokālik John eaar jelm̧ae juon jerbal in m̧wijm̧wij n̄an kōmakūt juon tumōr ilo neen. John eaar ba: “M̧wijm̧wij eo eaar juon errā eļap n̄an kōm̧ kōnke patholgy teej ko raar etale tumōr eo n̄an lale ewi jon̄an an pād wōt im ewi jon̄an an kānjer eo mej. Ekkatak in enaaj letok n̄an kōm̧ kakkōlkōl eo m̧oktata ewājabdik kōn chemotherapy eo im kōn ekōjkan am̧ aikuj leļo̧k am̧ ippān kōm̧admōd ko tokālik.”

Ruo raan ālkin jerbal eo, iaar loļo̧k John im Heather ilo aujipitōļ. Kōm̧ ar kōnono kōn iien eo kein kajuon iaar ioon John ilo mijen eo an, kōn m̧are eo aer, kōn kānjer eo, im kōn katak ko raorōk n̄an indeeo kōm̧ kar katak jene rej jen mālijjon̄ ko an mour wabanban. Ke kōm̧ij kajemļo̧k iien eo am̧ ippān doon, John eaar kajjitōk ippa eļan̄n̄e imaron̄ leļo̧k n̄an e juon kōjeram̧m̧an an priesthood. Iaar uwaak bwe inaaj m̧ōņōņō in leļo̧k juon kōjeram̧m̧an, ak m̧oktata iaar aikuj in kajjitōk jet kajjitōk ko.

Innām iaar kwaļo̧k kajjitōk ko iaar jab ļōm̧ņak n̄an kajjitōk im jan̄in kar ļōmņaki moktaļo̧k: “John, ewōr ke am tōmak n̄an jab mour? Eļan̄n̄e ej kōņaan eo an Jemedwōj Ilan̄ bwe kwon em̧m̧akūt kōn mej ilo am jodikdik n̄an laļ eo an jetōb n̄an wōnm̧aanļo̧k ilo kwaļo̧k eo am, ewōr ke am tōmak n̄an leļo̧k eok n̄an Ankilan im jab mour?”

Kiiō, ro jeiū im jatū, iaar ikōn̄ bwilōn̄ jen kajjitōk ko iaar im̧we n̄an kajjitōk ippān ripālele rein. Emakijkij ilo jeje ko rekwojarjar, Rilo̧mo̧o̧r eo ak rikarejar ro An raar kōjerbal menin leļo̧k an jetōb in kōmour (lale 1 Korint 12:9;D&C 35:9; 46:20) im ļōmņak bwe juon make ewōr tōmak ippān n̄an mour (lale Jerbal 14:9; 3 Nipai 17:8; D&C 46:19). Ak āinwōt John im Heather im n̄a kar kakpilōklōk doon im ire kōn kajjitōk kein, kōm̧ ar meļeļeļo̧k bwe eļan̄n̄e ankilan Anij bwe likao in em̧m̧an en mour, kōjeram̧m̧an eo emaron̄ kar bōke eļan̄n̄e ripālele rein reperan m̧oktata eaar ewōr aer tōmak n̄an jab mour. Ilo naan ko jet, John im Heather raar aikuj in eļļā ioon, jen Pinmuur eo an Irooj Jisōs Kraist, “armej ilo piktokin” (Mosaia 3:19) ikdelel eo ilo kōj aolep n̄an kajjitōk ilo ejjeļo̧k kijenmej im jab bōjrak in kipel n̄an kōjeram̧m̧an ko jekōņaan im tōmak jej aikuj būki.

Jej kile juon pedped in katak eo ej jerbal n̄an aolep rikaļoor ewujlepļo̧k: tōmak ekajoor ilo Rilo̧mo̧o̧r eo ej leļo̧k errā ilo Ankilan im iien ilo mour ko ad—men̄e waļo̧kier ej jab ta eo jaar kōjatdikdik kake ak kōņaan. Ilo m̧ool, John im Heather naaj kōņaan, januwade, im akweļap kōn kōmour kōn aolepān aer kajoor, ļōmņak, im maron̄. Ak eļapļo̧k an aorōk, renaaj aikuj “ajeļo̧k e n̄an aolep men ko Irooj ej lo ekkar n̄an kaddoik na ioon [er], em̧ool āinwōt juon ajri ej ajeļo̧k e n̄an jemān”(Mosaia 3:19). Ilo m̧ool, renaaj m̧ōņōņō n̄an “wūjlepļo̧k aolep jetōb ko [aer] āinwōt juon katok n̄an e” (Omni 1:26) im jar, “Jema eļan̄n̄e Kwō kōņaan, Kwōn bōkļo̧k kab in jān Eō; a en jab ankil Aō a Am̧ wōt.” (Luk 22:42).

Ta eaar jino waļo̧k n̄an John, Heather, im n̄a kar kajjitōk ko retarpok raar erom m̧ōttan jon̄ok eo āinwōt ekaarmejete pedped ko an ko̧jpeļ eo. Kōļmenļo̧kjeņ kōn kean̄ eo an Rilo̧mo̧o̧r eo: “Eo ej lo an mour, en̄in enaaj jako jān e: eo ej joļo̧k an mour kōn N̄a, enaaj lo e. (Matu 10:39). Eaar barāinwōt kwaļo̧k, “A elōn̄ ro rej m̧okta re naaj āliktata, im ro rej āliktata renaaj m̧okta (Matu 19:30). Im Irooj eaar kōkkapilōklōk rijilōk ro An raan ko āliktata, bwe jen waļo̧k in naan ko aer elōn̄ riutiej renaaj ettā, im elōn̄ rūttā ro renaaj utiejļo̧k n̄an juon jerbal in nōbar (D&C 112:8). Ilo wāween in, wōr tōmak n̄an jab kōmour āinwōt ej jerbal jejjet ilo juon kajoor kōm̧m̧ane āinwōt ekaarmejete pedped ko an ko̧jpeļ eo, eo ej kōm̧m̧an bwe jen kajjitōk, pukōt, im n̄an kōļļaļaļ bwe jen maron̄ bōk jeļāļo̧kjeņ im meļeļe (lale 3 Nipai 14:7).

Ālkin bōk iien eo emenin aikuj n̄an kejōkļo̧kjeņ im pukōt im kōnono ippān kōrā eo pāleen, John eaar ba n̄an eō: “Elder Bednar, ij jab kōņaan mej. Ij jab kōņaan em̧m̧akūt jen [Heather]. Ak eļan̄n̄e ankilan Irooj ej n̄an bōkļo̧k eō n̄an laļ eo an jetōb, innām bōlen em̧m̧an ippa menin. “Būruwō eaar obrak kōn kam̧oolol lōke ke ij kam̧ool an likao in kwaļo̧k bōro kajjitōk eo emenin aikuj tata an aolep apan̄ ko ilo jetōb—ajeļo̧k im leļo̧k ankilaer n̄an ankilan Anij. Tōmak eo aō eaar kajoorļo̧k ke ij kam̧ool an ripālele rein ruo kōtļo̧k kōņaan ko aer kajoor im meļeļe kōmour eo en maron̄ “oran̄ļo̧k ilo ankilaan Jemān” (Mosaia 15:7).

John eaar kōmeļeļeik ilo an m̧akūtkūt n̄an kōm̧ao eo am̧ im kōjeram̧m̧an eo eaar bōke: “Elder Bednar eaar kwaļo̧k n̄an kōj katak eo jān Elder Maxwell bwe em̧m̧an n̄an jab mekunļo̧k jen mour. Innām Elder Bednar eaar kajjitōk ippam̧, ‘Ijeļā ewōr ami tōmak n̄an mour, ak ewōr ke ami tōmak n̄an jab mour?’ Eaar juon jekjek ekāāl n̄an n̄a. Eaar aikuj bwe en kar kajjitōk eļan̄n̄e ewōr aō tōmak n̄an bōk ankilan Anij eļan̄n̄e Ankilan eaar bwe in jab mour? Eļan̄n̄e iien eo eaar kepaakļo̧k eō n̄an deļo̧n̄e laļ eo an jetōb kōn mej, iaar ke pojak n̄an leļo̧k im bōke?”

John eaar wōnm̧aanļo̧k wōt: “Wōr tōmak n̄an jab mour āinwōt eaar jab kōtmene eo; ak jibadbad eo eaar ukōt wāween eo kōrā eo pāleeō im n̄a kar ļōmņake im kar kōtļo̧k am̧ likūt am̧ lōke ilo karōk eo an Jemād n̄an kōm̧. Kōm̧ ar katak bwe kōm̧ ar aikuj in bōk tōmak eo bwe Irooj ej eddoiki jabdewōt waļo̧k eo emaron̄ waļo̧k, im enaaj tōl kōm̧ jān ijo kōm̧ij pād ie n̄an ijo kōm̧ij aikuj in pād ie. Ke kōm̧ij jar, kajjitōk ko am̧ raar oktak ‘Jouj kōm̧m̧an bwe in likio” n̄an “Jouj letok n̄an eō tōmak eo n̄an bōke jabdewōt waļo̧k eo Kwaar karōke n̄an eō.’

“Iaar jeļā bwe kōnke Elder Bednar eaar juon Rijilōk, enaaj kōjeram̧m̧an mākwoj ko an anbwinnū n̄an aer bar ekkar, im inaaj jerkak jen peet eo im jino eb ak kōm̧m̧an ikkure āinwōt in! Ak ke ej kōjeram̧m̧an eō raan eo, iaar bwilōn̄ bwe naan ko eaar kōnono raar einļo̧k wōt ko an jema, jemān kōrā eo pāleeō, im mijen būreejtōn eo aō. Iaar kile eļap bwe ejjab aorōk wōn eo ej likūt pā ko pein ioon bōra. Kajoor eo an Anij ejjab oktak, im Ankilan ej alikkar n̄an kōj kajjojo im jen rikarejar ro an remālim.”

Heather eaar je: “Rainin eaar obrak kōn en̄jake ko rāinjuon n̄an n̄a. Kar lujur eō bwe Elder Bednar enaaj likūt pein ioon bōran John im kōmour e jen kānjer eo an. Iaar jeļā menin jen kajoor eo an priesthood eo emaron̄ kōmour, im iaar lukkuun kōņaan bwe menin en waļo̧k. Ālkin an kar katakin kōm̧ kōn tōmak eo ejjab maron̄ kōmour, iaar mijak. N̄an kiiō, iaar jab dāpij wōt m̧ool eo bwe karōk an Anij eaar kitbuuj luuji ļeo pāleeō. Tōmak eo aō eaar pedped wōt ioon waļo̧k ko iaar kōņaan. Ilo juon wāween ba, eaar juon jekjek. Jen mijak ilo jinoin, ļōmņak n̄an wōr tōmak n̄an jab mour eļap an kar kaanjo̧ eō jān inepata. Eaar kōtļo̧k aō bōk lōke elikio bwe Jemedwōj Ilan̄ ejeļā wōn n̄a eļapļo̧k jen aō jeļā wōn n̄a make, im Enaaj kōm̧m̧ane ijo em̧m̧antata n̄an n̄a im John.”

Juon kōjeram̧m̧an kar leļo̧k, im wiik ko, allōn̄ ko, im iiō ko raar eļļā jen. Kānjer an John kar lukkuun jako ilo juon iien. Eaar maron̄ in kadedeļo̧k katak ko an ilo university im kar bōk jerbal. John im Heather raar wōnm̧aanļo̧k wōt n̄an kōkajoorļo̧k kōtaan eo aer im lan̄lōn̄ kōn mour ippān doon.

Jet iien tokālik, bōk juon leta jān John im Heather eo ej karon̄ eō bwe kānjer eo eaar bar waļo̧k. Chemotherapy eaar jino im iien m̧wijm̧wij eo kar jikejuuļi. John eaar kōmeļeļeiki: “Eaar jab kwaļo̧k wōt an nuuj ko itok āinwōt juon inepata n̄an Heather im n̄a, ak kōm̧ ar pok kake. Eaar ke wōr juon men kōm̧ ar jab katak jene kar kein kajuon. Irooj eaar ke kōtmene jet men reļļapļo̧k jān kōm̧? Iaar rūttoļo̧k āinwōt Armej ro Rekwojarjar ilo Raan-ko Āliktata, eaar imminene n̄an etal n̄an m̧ōn jar eo im ron̄jake naan in, ‘aolep mālijjon̄ Anij ej litok n̄an kōj ej n̄an em̧m̧anļo̧k eo ad.’ Ekwe, n̄an m̧ool n̄an kom̧, iaar jab lo ekōjkan an menin kōjeram̧m̧an eō!

“Kōn menin iaar jino jar n̄an bōk alikkar im n̄an Irooj n̄an jipan̄ eō meļeļe etke bar waļo̧k in an kānjer eo eaar bar waļo̧k. Juon raan ke iaar riit ilo Kalim̧m̧ur Ekāāl iaar bōk uwaak eo aō. Iaar riiti bwebwenato eo an Kraist im Rijilōk ro An raar pād ilomaļo̧ ke juon kapo eaar jarjar. Mijak bwe ļoon eo enaaj pedo, rikaļoor ro raar etal n̄an Irooj im kajjitōk, ‘Majta, kwōn tūriam̧o̧ bwe jenaaj jako?’ En̄in eaar kōjkan aō lukkuun en̄jake! Kwōj jab tūrim̧o̧ bwe ewōr aō kānjer ke? Kwōj jab tūriam̧o̧ bwe kōm̧ kōņaan jino juon baam̧le ke? Ak ke ij riiti m̧aanļo̧k ilo bwebwenato in, iaar loe uwaak eo aō. Irooj eaar kalimijōk er im ba, ‘O kom̧ edik tōmak,’ im Eaar kotak Pein im kalur dān ko.

“Ilo iien eo iaar aikuj kajjitōk ippa make, ‘Ij ke m̧ool in tōmak menin?’ Ij ke m̧ool im tōmak Eaar kalur dān ko raan eo? Ak ej ke baj juon bwebwenato em̧m̧an n̄an riiti?’ Uwaak eo ej: Ij tōmak, im kōnke ijeļā bwe Eaar kalur dān ko, ijeļā bwe Emaron̄ kōmour eō. N̄an tōre in, epen aō etale menin aikuj eo n̄an tōmak eo aō ilo Kraist kōn juon men eo ej waļo̧k kōn Ankilan. Iaar loe er āinwōt ruo men ko rejenolo̧k jen doon, im jet iien iaar en̄jake bwe juon ej kaarmejete eo juon. Etke ej aikuj wōr aō tōmak eļan̄n̄e Ankilan enaaj ta eo enaaj waļo̧k,' iaar kajjitōk? Ālkin en̄jake in, iaar jeļā bwe wōr tōmak—mekarta ilo jekjek eo aō—eaar jab menin aikuj n̄an jeļā bwe Eenaaj kōmour n̄a, ak bwe Eemaron̄kōmour n̄a. Iaar aikuj in tōmak bwe Emaron̄, im men̄e eaar waļo̧k eaar An pepe.

“Ilo aō kōtļo̧k an ļōmņak ko ruo waļo̧k ilo mour eo aō, pedped wōt ilo tōmak ilo Jisōs Kraist im leļo̧k aolepān n̄an Ankilan, ij loe kainōm̧m̧an eo eļapļo̧k im aenōm̧m̧an. Eaar lukkuun kabwilōn̄lōn̄ n̄an loe pein Irooj ilo mour ko am̧. Men otemjej raar ekkar ilo jikier, kabwilōn̄lōn̄ raar waļo̧k, im kōm̧ ar wōnm̧aanļo̧k ettā n̄an loe karōk eo an Anij n̄an kōm̧ eaar waļo̧ktok.”

Kiiō, ro jeiū im jatū, ij āliji ennaan in kwaļo̧k eo an John: “Ilo aō kōtļo̧k an ļōmņak ko ruo waļo̧k ilo mour eo aō, pedped wōt ilo tōmak ilo Jisōs Kraist im leļo̧k aolepān n̄an Ankilan, ij loe kainōm̧m̧an eo eļapļo̧k im aenōm̧m̧an.”

Mour jim̧we im tōmak m̧ool rej kein jerbal ilo kōmakūt tōļ ko—eļan̄n̄e kōm̧akūt tōļ ko rej kōttōbrak kōttōpar eo an Anij im ej pād ilo ekkar n̄an Ankilan. Mour jim̧we im tōmak m̧ool rej kein jerbal ilo kōmour rinan̄inmej, rijarron̄ron̄, ak riake—eļan̄n̄e kain kōmour in ej kōttōbrak kōttōpar eo an Anij im ej pād ilo ekkar n̄an Anilan. Aaet, em̧ool kōn tōmak ekajoor, elōn̄ tōļ ko renaaj em̧m̧akūt. Im jab aolep rinan̄inmej im rijorrāān ilo ānbwin renaaj mour. Eļan̄n̄e jum̧ae otemjej raar dikļo̧k, eļan̄n̄e nan̄inmej ko raar jako, innām lukkuun kōttōpar ko an karōk eo an Jemād naaj jejtokjen.

Elōn̄ iaan katak ko jaar iten ekkatak ilo mour in maron̄ būki wōt jen men ko jej en̄jake im jet iien en̄taan kaki. Im Anij ej kōtmeneik im lōke kōj n̄an jelm̧ai kōjdat eawabanban an jidik wōt iien kōn jipan̄ eo An bwe jen maron̄ ekkatak ta eo jej aikuj in ekkatak im elap erom ta eo jaar iten erom n̄an indeeo.

Meļeļe eo an Men Otemjej

Bwebwenato in kōn John im Heather rej jim̧or jenolo̧k im lukkuun jenolo̧k. Ripālele rein reddik rej bōk jikin milien ritōmak ro, Armej ro Rekwojarjar ilo Raan-ko Āliktata rikōjparok bujen ro aolepān laļ in ro rej wōnm̧aanļo̧k wōt ilo iaļ in erarin̄ im ejim̧we kōn dim ilo Kraist im juon kōjatdikdik ewāppen. John im Heather raar jab jerbal ilo jerbal ko routiej ilo Kabun̄ in, raar jab nukin Ritōl ro Routiej, jet iien rej pere im mijak. Ilo elōn̄ iaan wāween kein, bwebwenato in jidik jenolo̧k.

Ak ro jeiu im jatu, likao in im jiron̄ in raar jeram̧m̧an ilo wāween ko rejenolo̧k n̄an ekkatak katak ko raorōk n̄an mour indeeo jen en̄taan im pen. Iaar kwaļo̧k bwebwenato ippāmi kōnke John im Heather, ro rejjab oktak jen kom̧, ro raar meļeļe bwe jab mekunļo̧k eaorōkļo̧k jen mour. Mekarta, en̄jake eo aer eaar jab ļap kōn mour im mej; ijjelo̧kin, eaar kōn ekkatak, mour, im erom.

Koba in tōmak ekajoor ilo jetōb ilo im ioon etan ekwojarjar Jisōs Kraist, kōn ettā leļo̧k n̄an Ankilan im iien, n̄an wōnm̧aanļo̧k wōt “kijejeto kōn tiljek” (Hilamōn 15:6), im kile Pein ilo men otemjej ej leļo̧k menin kainōm̧man ko n̄an aelōn̄ in kiin̄ eo an Anij eo ej bōktok lan̄lōn̄ im mour indeeo (lale D&C 42:61). Āinwōt an ripālele rein jelm̧ae apan̄ ko reddo, raar mour juon “mour im tōt wōt ilo aenōm̧m̧an im kwōjarjar” (1 Timote 2:2). Raar etetal aenōm̧m̧an (lale Moronai 7:4) ippān im ilubwilijen ro nejin armej. “Im aenōm̧m̧an jān Anij, eo ej eļļā jān jeļā otemjej, enaaj kōjparok būruemi im ļōmņak ko ami ilo Kraist Jisōs” (Phillipai 4:7).

N̄an elōn̄ iami, bwebwento eo aer ej, eaar, ak emaron̄ bwebwenato eo ami. Kom̧ij jelm̧ae, kar jelm̧ae, ak naaj jelm̧ae apan̄ ko reier wōt in ilo mour ko ami kōn ejja peran in im jibadbad in ilo jetōb me John im Heather raar ioon. Ijjab jeļā etke jet armej rej ekkatak katak ko an mour indeeo jen mālijjon̄ im en̄taan—ak ro jet rej ekkatak ejja katakin ko jen lo̧mo̧o̧ren im kōmour. Ijjab jeļā aolep un ko, aolep kōttōpar ko, im ijjab jeļā men otemjej kōn iien an Irooj. Ippān Nipai, kom̧ im n̄a maron̄ ba bwe “Ijab jeļā meļeļein aolep men” (1 Nipai 11:17).

Ak jet men ilukkuun in jeļā. Ijeļā jej leddik im ļaddik ro rej jetōb nejin juon Jemedwōj Ilan̄ eo eakwe. Ijeļā Jemād Indeeo ej rijeje an karōk in m̧ōņōņō eo. Ijeļā Jisōs Kraist ej ad Rilo̧mo̧o̧r im Ripinmuur. Ijeļā Jisōs eaar kōmaron̄ karōk eo an Jemād jen Pinmuur eo An Eļap im ej n̄an indeeo. Ijeļā bwe Irooj, eo eaar “kinejnej, metak, [im] rub ānbwinnin kōn kōj” (“Jesus of Nazareth, Savior and King,” Hymns, no. 181), maron̄ jipan̄ im kōkkajoorļo̧k “armej ro An ekkar n̄an mōjino ko aer” (Alma 7:12). Im ijeļā juon iaan kōjeram̧m̧an ko reļļap an mour in ej n̄an jab mekunļo̧k im n̄an kōtļo̧k ad kajjojo naaj “oran̄ļo̧k ilo ankilaan Jemān” (Mosaia 15:7).

Ijjab jeļā men otemjej kōn ekōjkan im n̄āāt im ia im etke kōjeram̧m̧an kein rej waļo̧k, ijeļā rej mour. Ij jeļā im ij kam̧ool bwe rej mool. Ij kam̧ool bwe men kein otemjej rej m̧ool—im bwe kōj—kwe im n̄a— jeļā jen kajoor eo an Jetōb Kwojarjar eo n̄an kwaļo̧k m̧ool eo aer ekwojarjar, m̧ool, im karbab. Ro jeiū im jatū, ij lewaj ioomi kōjeram̧m̧an in: aaet bwe ilo ami wōnm̧aanļo̧k ilo mour ko ami kōn dim ilo tōmak ilo Kraist, kom̧ naaj jeram̧m̧an kōn kajoor eo n̄an jab mekunļo̧k. Ij kwaļo̧k kam̧ool in im lewaj kōjeram̧m̧an in ilo etan ekwojarjar an Irooj Jisōs Kraist, amen.