Bae Mi Givim Miwan long Hem

Rasel T. Osgutopi

Sandei Skul Jeneral Presiden

Pikja

JES Divosen blong Ol Yang Adalt • 3 Novemba2013 • Brigham Yang Yunivesiti

Hem i wan spesel janis blong stap wetem yufala ol dia yang brata mo sista blong mi. Mi wantem yufala i save se i wan blesing blong waef blong mi mo mi, blong stap wetem yufala tedei. Taem mi lukluk yufala, mi luk fulap rod i stap. Yufala i gat fulap blong kasem. Nomata se hop blong yufala i hae hamas, mi stap ia blong talem long yufala se oli save go hae moa. Yu save mekem moa long laef ia bitim we yu save. Wetem Lod long saed blong yufala, yu save luk merikel. Yu save mekem samting we fastaem yu ting se i no posibol. Yu save winim eni problem. Yu save girap i go antap moa bitim eni samting we i wantem pulum yu daon. Yu save sakemaot devel, mo akseptem evri samting we i gud. Yu bin kam long wol from wan samting, mo wetem help blong Lod, bae yu kasem samting ia.

Mi hop se yufala i luksave hamas man i stap prea from yufala. I gat fulap prea we oli mekem long Jos ia evri dei from ol yut blong Jos—blong ol yang adalt. Samtaem, taem yufala gat kwaet taem, mi invaetem yufala blong tingting long evri prea we man i stap mekem evri dei, speseli blong yufala, jeneresen ia we i stap kam antap. Ol prea insaed long tempol, ol prea we oli kam long Ol Jeneral Atoriti mo ol jeneral ofisa blong Jos, ol prea we i kam long ol stek mo wod lida, ol prea blong ol papa mo mama, ol nara memba blong famle, mo ol fren. Mi stap harem plante long ol prea ia. Oli kam long hat. Mi hop se bae yufala i tingting long ol paoa we oli singaotem long heven i kam daon from yufala.

Mo mi hop yufala i filim se oli lavem yufala, i no olgeta we oli save yufala nomo, be tu, evriwan we oli kea long yufala mo oli kea abaot yufala nating oli neva mitim yufala. Mi save se sapos Presiden Monson i stap ia tedei, bae hem i talemaot lav blong hem long yufala. Yumi gat wan profet we i laef we i lavem ol yut blong Jos ia.

Waef blong mi mo mi, mitufala i talem tangkyu long kwaea ia blong singsing long singsing ia “Bae Mi Givim Miwan long Hem.” Mitufala i raetem singsing ia blong ol misinari blong mifala taem mifala i givim seves long Saot Dakota Rapid Siti Misin, be ol toktok ia, oli blong yumi evriwan long laef blong yumi. Fas ves ia i talem:

Hem i givim Hemwan from mi, Hem i ded blong mi save laef.

?Wanem nao mi save mekem blong Hem? ?Wanem mi rili save givim?¹

Hemia ol toktok blong wan we i tingtingbak long ol blesing blong Atonmen, ol blesing blong stap filim lav we i kam long Papa we i stap long Heven mo Pikinini blong Hem, Jisas Kraes. Yumi evriwan i kam ol taem olsem—ol taem we yumi save se Lod i gat tingting long yumi.

Mi wantem invaetem yu, naoia, blong tingtingbak long ol blesing we yu stap filim olsem wan memba blong Jos blong Jisas Kraes blong Ol Lata-dei Sent, mo, sapos i gat wan i sap tedei we i stap tingting blong joenem Jos, mi invaetem yu blong tingtingbak long wan blesing we yu stap lukaotem. Afta, mi wantem sapos yu save serem blesing ia wetem hu i stap sidaon long saed blong yu. Sapos yu no save huia i sidaon long saed blong yu—i moa gud—bae yu kam blong save hem taem yu serem tingting wetem hem. Serem plante blesing olsem we yu save mekem, long nekis minit o tu.

Mi jes invaetem wan grup blong studen long haos blong toktok raon long topik blong tedei. Bae yumi luk se oli talem wanem taem mi askem olgeta blong serem ol filing abaot ol blesing long laef blong olgeta:

Man 1: Save we mi gat—save blong plan blong fasin blong sevem man, Papa blong mi long Heven, se Hem i olsem wanem, mo wanem Hem i wantem blong mi, mo blong save wanem mi save mekem long laef long wan wei we Hem i wantem. Ol blesing we i kam long siling paoa mo long ol tempol long wol—blong save se mi save stap wetem famle blong mi blong oltaem, olsem wan famle.

Woman 1: Save ia abaot Atonmen, mo afta, paoa blong kasem paoa ia we i kam tru long Atonmen. Plante samting, i tru long ol odinens blong prishud mo blong filim we mi rili joen long Papa blong mi long Heven tru long ol odinens mo kavenan ia we mi mekem wetem Hem. Blong gat paoa long laef blong yumi blong gat paoa long bodi, mo evri samting we yumi nidim blong gobak long Hem.

Woman 2: Janis mo spesel janis blong gat presen we i Tabu Spirit wetem yumi oltaem, blong lidim desisen blong yumi blong mekem folem tingting blong Hem, mo blong Hem i leftemap tingting mo givim paoa long yumi, mo paoa blong gogohed long laef ia, mo afta, blong stap wetem Hem blong oltaem.

Man 2: Mi filim olsem se evri samting ia, oli ol blesing blong prishud we i stap blong ol man, mo tu, ol woman. Mi glad tumas from prishud we i kambak blong yumi evriwan i gat ol blesing ia: tempol, Tabu Spirit, janis blong save yusum Atonmen.

Woman 3: Mi glad tumas blong save se mi save progres, mo laef ia, i no blong no gat intres, o blong sidaon long wan fanis o eni nara ples. Hem i blong stanap mo go samples. Mo long mi, i nid blong progres, mo samting ia i mas hapen mo i save gohed blong hapen afta long ded.

Man 3: Buk blong Momon. Taem mi studen, mi spendem plante taem blong ridim plante samting we mi mas askem kwestin ia—?I tru o no? ?Wanem rul nao oli gat? ?Hao bae mi lukluk tru long evri samting we oli stap talem? Be mi filim olsem se mi save tekemaot sus blong mi i stap, taem mi ridim Buk blong Momon. From nomo se i tru tumas—mo oli transletem tru long presen mo paoa blong God.

Sapos i no gat gospel we i kam blong Jisas Kraes, bae yumi no gat wan blesing we ol fren blong mi oli tokbaot. Taem yumi tingtingbak long ol blesing blong yumi, i givim yumi paoa blong muv fored long laef, be yumi evriwan i save se blong muv fored, i wan jalenj. Hemia wol ia, mo wol ia i no isi. Nambatu ves blong singsing we kwaea i singsing i:

Taem sam oli tanem baksaed, i luk se i no gat wan i wantem save,
?Olsem wanem bae mi filim lav blong Hem? ?Olsem wanem bae mi save se Hem i stap ia?
… … … … … … … … … … … … … … . .
Taem sobodi mo harem nogud i kam long huia i kwestinim ?from wanem?
?Olsem wanem nao bae mi tekem pis i go long olgeta? ?Olsem wanem bae mi helpem olgeta blong oli traem?2

Naoia, mi invaetem yufala blong raetemdaon—o tekem not long tingting—long ol jalenj we yu stap fesem naoia long laef, ol wari we samtaem i mekem se yu no slip long naet.

Mi askem ol fren blong mi we oli kam long haos blong mi wanem nao jalenj blong olgeta, mo hemia wanem oli talem:

Woman 2: !Plante tingting i kam! Wan samting we mi stap tingting i we, plante taem, i isi blong joenem hamas yu impoten mo aedentiti blong yu wetem wanem yu mekem i kamtru: mi no mared yet, o mi no kasem digri, o masta digri yet, o ol samting ia we yu mekem, o no mekem i kamtru.

Man 2: Blong stap holemtaet Spirit we yumi gat taem yumi stap givim fultaem seves long Lod. Hemia i wan samting we mi mas jusum evri dei; se bae mi save gohed wetem ol semfala praktis we mi developem long misin, o no gat.

Man 1: Wan long ol bigfala samting we i tekem Spirit long laef blong mifala long misin, i janis ia blong tij mo talem testemoni we i gohed tru long hom mo visiting tijing mo tru long felosip—wetem plante bigfala janis blong mekem plante samting we i gat mining. Mo semfala Spirit ia, i save stap wetem yumi taem yumi stap tijim ol narawan.

Man 3: Faenem stret balens bitwin fasin blong letem Spirit i lidim yumi, mo insperesen long ol desisen we yumi mekem long laef, mo jes mekem ol desisen ia. Sam pipol, i luk se Lod i lidim olgeta fulap. Mo sam pipol, oli mas wok long ol samting, o jes go from wan samting bifo oli save se i stret o no.

Woman 1: Wan bigfala topik, olsem blong sloem daon ol blesing mo andastaning. Blong andastanem se bae oli kam, samtaem. Be jes blong gat fet mo tras mo putum tingting blong yumi i folem hemia blong Papa long Heven.

Woman 3: ?From wanem ol nogud samting oli hapen long ol gud pipol? ?o from wanem ol had samting— ol rili rili had samting—oli hapen long ol gud pipol? Hemia wan samting we i bin stap long maen blong mi. Eksampol, mi jes faenemaot se papa blong mi i gat kansa. Mo mi tingting se: “?Olsem wanem samting ia i save hapen long wan man we i givim fulap seves tumas?”

Nomata wanem jalenj blong yu, mi testifae se topik we yumi toktok raon long hem long naet ia bae i save helpem yu blong winim jalenj ia.

Blong stat, bae yumi tingtingbak smol taem long las JES Divosen, long blesing blong aposol we Elda Rasel M. Nelson i bin talem long taem ia, hem i talem se: “Mi blesem yufala …se tingting blong God bae yufala i mekem i hapen, mo bae i hapen tru long yufala.”³ Tingting long paoa blong ol toktok ia. Sapos yumi nao, bae yumi mekem tingting blong God, mo bae i tru long yumi, nao tingting blong yumi i nid blong stap semmak long hemia blong God. Yumi nidim blong wantem wanem we, Hem, Hem i wantem.

Wan taem, Elda Nil A. Makswel i talem: “Taem yu mekem tingting blong yu i folem hemia blong God, yu stap givim Hem wan samting ia nomo we yu save givim Hem, we i rili blong yu nao blong givim. !Yu no wet longtaem tumas blong faenem olta, o blong stat putum presen blong tingting blong yu antap long olta ia!”⁴

Tedei long naet, mi invaetem yufala blong tingting wetem mi, long trifala kwestin ia: (1) ?Wanem mining blong toktok ia, tingting? (2) ?Olsem wanem yumi givim tingting blong yumi long God? mo (3) ?Olsem wanem nao yumi save se yumi winim hemia?

Faswan, ?Wanem nao toktok ia, tingting, i minim? Yumi no tokbaot tingting oltaem, o yumi no yusum toktok ia. Samtaem yumi talem, “paoa blong tingting.” Eksampol, “Mi no gat paoa long tingting blong no kakae jis kek ia. So, tingting, “hem i blong mekem samting,”⁵ tingting long hat we i mekem yumi tekem aksen.

Sapos yu askem ol pipol long Yunaeted Stet blong talem tu impoten samting blong helt blong bodi, kolosap 95 pesen bae oli talem “gud kakae mo spot”—olsem bae yumi ting. Afta, sapos yu askem ol sem pipol ia se, “Yu stap kakae long raet fasin mo mekem inaf spot?” ating 5 pesen go kasem 10 pesen bae i talem se yes. I gat wan hol i stap, bitwin blong save samting mo mekem samting ia. Plante pipol oli save wanem blong mekem, be smol nomo i gat tingting blong mekem.

Wan eksampol, long misin blong yumi, i soem se taem yumi kasem help, yumi save developem tingting blong mekem wanem yumi sapos blong mekem.

Wan taem, wan asisten long misin blong mifala i talem long kompanion blong hem: “Ei, mi kasem 13 kilo moa stat long taem mi kam long misin. Mi no save go hom olsem. ? Bae yu helpem mi lusum kilo? (Hem i stap long wan basketbol tim, mo hemi no wantem gobak hom olsem ia.)

Kompanion blong hem i agri.

I no longtaem afta, mi stap folem tufala misinari ia long laen blong kaekae. Misinari we i wantem lusum kilo, i go tekem wan joklet kek. Kompanion blong hem i toktok slo long hem, “Yu no wantem samting ia.”

Misinari ia we i hanggri, i harem nogud smol, i talem se: “O yes, mi wantem hemia.”

“No bae yu no wantem; yu no rili wantem,” kompanion i talem.

Misinari ia i tekem joklet kek.

Misinari ia i wantem lusum kilo, be hem i nidim help blong winim filing blong hem from joklet kek ia. Tingbaot laen ia long singsing we i talem: “?Olsem wanem bae mi helpem olgeta blong traem?” Kompanion ia i stap helpem misinari fren blong hem blong traem mekem wanem hem i rili wantem mekem, be, i no save mekem sapos hem i no gat help long wan man. Hem i stap traem blong helpem misinari ia blong luk se tingting blong hem blong stap helti i save winim tingting blong hem blong kakae joklet kek. Hem i bin stap traem blong helpem hem blong mekem tingting i kam strong.

Enemi bae i mekem yumi biliv se i no gat samting olsem, tingting—se yumi no gat joes be blong folem wanem bodi i filim—blong kakae hamas joklet kek we yumi wantem. Sam, oli rong blong tingting se tingting blong yumi i folem wanem i stap long blad, mo yumi no gat kontrol nating long hemia.

Blong soem olsem wanem hemia wan stamba kwestin, bae mi serem wan smol pat blong wan nius atikol. Man we i raetem i wan profesa blong baeoloji we man i respektem hem. Hem i statem atikol blong hem we taetol i ?From Wanem Yu No Rili Gat Fri Tingting.” Taetol ia i kasem ae blong mi, from se, olsem wan memba blong Jos, mi save se yumi nao, yumi gat tingting.

Hem i eksplenem se ol desisen we yumi ting se yumi mekem, yumi no mekem nating olgeta. Taem hem i tokbaot joes we yumi mekem from brekfas long moning, hem i talem: “Ating yu filim se yu bin mekem joes, be wanem i tru, desisen blong yu blong kakae eg o pankek [long moning ia] i stap longtaem finis bifo yu save long hem—ating bifo yu wekap tedei. Mo ‘tingting’ blong yu, i no gat pat long desisen ia.”⁶

So, hem i stap talem se yumi no gat tingting, no gat kontrol ova long ol filing blong yumi. Yumi mekem nomo folem blad blong yumi i talem. Taem mi ridim atikol ia, mi wantem talem long hem abaot misinari blong yumi. Hem i mekem joes ia. Hem i bin lusum 13 kilo. Tingting blong hem i winim filing blong bodi blong hem.

Yumi lanem long revelesen, blong bifo mo blong tedei, se yumi gat fridom blong joes, se yumi gat wan tingting, se yumi gat ol filing, mo ol filing ia oli save jenis. Elda Rasel M. Nelson, long las jeneral konfrens i se, kwot: “Yumi save jenisim fasin blong yumi. Ol filing blong yumi i save jenis. ?Olsem wanem? Wan jenis we i stap fogud i save kam nomo tru taem yumi hil, yumi kam klin, mo tru long paoa blong Atonmen blong Jisas Kraes.”⁷

Taem Elda Makswel i taem se tingting blong yumi i wan samting ia nomo we yumi rili save givim long God, hem i stap tijim se eni nara samting we yumi givim i wan samting we God i bin givim finis long yumi. Taem yumi givim ol taeting mo ofring, yumi stap givimbak long God nomo wanem we Hem nao i bin givim fastaem long yumi. Eni mane yumi kasem long laef, i kam long yumi tru long ol kriesen blong God. Sapos yumi givim taem blong yumi, yumi stap givim God wanem Hem i givim finis long yumi—ol dei long wol ia. Be taem yumi givim tingting blong yumi long Hem, hemia i wan presen we i spesel, i kam nomo long yumi. Taem yumi givim tingting blong yumi, yumi stap givim yumiwan fulwan, we yumi no holemtaet samting.

Hemia wanem ol fren blong mi oli talem taem mi askem olgeta blong luklukgud long ol skripja, mo afta, givim ol tingting abaot mining blong toktok ia, tingting:

Man 3: “Blong stap wantem blong folem evri samting we Lod i luk se i stret blong putum long yumi, semmak olsem wan pikinini i folem tingting blong papa blong hem.”⁸ Hemia i tokbaot yu we i wantem mo folem—mo blong yu wantem mekem. Afta mifala i tokbaot hemia, mo i lidim mifala long nara skripja long Hileman 3.

Man 1:Hileman 3:35— “Mekem se ol hat blong olgeta i kam klin mo tabu, we fasin blong mekem i kam tabu i kam from we oli givim ol hat blong olgeta long God.”

Woman 3: Hemia i no hapen long wan taem nomo. Mi no ting. Be i wan samting we i kam wetem taem mo wok.

Man 2: Mi filim se i olsem yu kasem paoa taem yu stap mekem ol raet joes. Hem i isi moa blong mekem raet joes long nekis taem. Prea, mo skripja stadi evri dei, mo tingting hevi, mo raet long wan jenol.

Woman 2: Long Mosaea 5:2, i tokbaot olsem wanem bigfala jenis long yumi mo hat blong yumi we i mekem se yumi nomo wantem mekem nogud, be blong mekem gud oltaem.

Woman 1: I fani from se mifala i stap ridim ol semfala skripja, be storian blong mifala i defren. Mi rili ting se hemia i bigwan tumas wanem i stap long Hileman 3:35, abaot givim hat blong yumi long God, mo hao i mekem yumi kam klin. Mi ting se i nid fulap tras blong go long Hem mo talem: “No, bae mi no trastem yu naoia se plan blong yu i stret gud. Bae mi givim tingting blong mi long yu, mo bae mi letem yu, mo afta yusum hemia blong sepem mi mo kam huia yu nidim mi blong kam.”

Man 2: Mifala i stap tokbaot Wo long Heven—hao yumi bin faet from fridom blong joes blong yumi, hao yumi disaed blong folem Kraes, mo mekem wanem we Hem i wantem yumi mekem. Mifala i tokbaot olsem wanem, long laef ia, i wan faet blong ol tingting. ?Bae yumi disaed blong wantem wanem we Kraes i wantem, blong kam olsem Hem, o blong talem nomo se bae yumi mekem ol samting we Hem i askem yumi blong mekem?—?Bae yumi wantem blong mekem?

So blong givim tingting blong yumi long Lod i no minim se yumi givap long fridom blong joes blong yumi. Wantem i tru, hem i nara wei. Moa yumi givim tingting blong yumi long Lod, moa yumi gat paoa blong yusum fridom blong joes blong yumi. Blong save wanem we God i wantem blong save, blong talem wanem Hem i wantem yumi blong talem, blong mekem wanem we Hem i wantem yumi blong mekem, evri samting ia, i lidim yumi blong stap olsem we Hem i wantem yumi blong stap. God i givim fridom blong joes blong yumi blong yumi save givim yumiwan long Hem, be i no blong yumi foldaon long temtesen.

Taem yu luk insaed mo digim dip i go daon, yu save faenem ol tingting we i lidim yu long ol aksen we yu laekem tumas. Bae yu luk se mi no talem “ we i lidim yu i go long eni aksen”—from se sam long ol aksen blong yumi, ol strong filing blong bodi nao oli pusum yumi long olgeta. Sam aksen bae i hapen we yumi no ting tumas long olgeta. Sam aksen bae i go agens fulwan long wanem yumi wantem tumas.

Wan yang man i bin kam luk mi blong kasem help long rod blong sakem sin. Taem hem i tokbaot harem nogud blong hem from samting we hem i bin mekem, hem i se: “Taem mi lukbak long hem, mi no save bilivim se mi mekem samting ia. I olsem se nara man i mekem, be i no mi.” Dip insaed long hat blong hem, hem i no wantem mekem wanem hem i bin mekem, be man we i folem fasin blong wol i tekova, mo hem i folem toktok blong enemi, be i no toktok blong Tabu Spirit, we bae i helpem hem sapos hem i bin stanap agensem temtesen.⁹ Hem i stap tokbaot tingting. Hem i wantem mekem gud, be sam pat blong hem—sam pat blong tingting blong hem—we hem i no wantem folem. Hem i stap holembak wan smol pat, mo hemia nao i lidim hem blong mekem samting we hem i harem nogud from. Be hem i kam long wan prishud lida blong mekem samting i kam stret bakegen—blong kam huia stret hem, wan fetful boe blong Papa we i stap long Heven. Hem i kam blong mekem se hem i save traem blong givim ful tingting blong hem long Lod, mo long tetaem ia, i no holembak wan samting.

Yang man ia, i gotru wan jenis long hat. Hem i nomo “wantem mekem nogud, be blong mekem gud oltaem.”¹⁰ Wanem hem i wantem, i jenis, mo from wanem hem i wantem i jenis, fasin blong hem tu i jenis. Hem i livim man we i folem fasin blong wol, mo i mekem folem toktok blong Tabu Spirit. Wan jenis long hat i wan jenis long tingting, i no wan jenis blong aksen nomo. Yumi nid blong mekem gudfala samting, be moa long hemia, yumi nidim blong mekem from ol raet risen.

Pikja

Motives and Actions Diagram

Daegram ia i helpem mi andastanem rilesensip bitwin tingting blong yumi o wanem yumi wantem, mo ol aksen blong yumi. Taem yumi stap long kavenan rod blong stap disaepol, tingting blong yumi i klin gud, mo aksen i stret mo gud. Yumi mekem gudfala samting from se yumi lavem Lod mo ol pikinini blong Hem. Be, i posibol tu blong mekem wan gudfala samting wetem wan tingting we i no stret mo i nogud. Taem yumi stap mekem samting olsem ol man blong tu fes—yumi mekem gud from se yumi wantem luk gud, o from se yumi wantem se man i luk se yumi gud moa bitim wan narafala man.

Sapos yumi mekem wan aksen we i no stret mo i nogud, wetem wan tingting we i no stret mo i nogud, yumi, olsem skripja i talem, “yumi minim blong go agensem God.”¹¹ Olgeta olsem, oli glad long ol nogud samting we oli wokem. Be taem yumi rili wantem mekem gud, be yumi glis mo foldaon, yumi stap folem man o woman we i folem fasin blong wol. Yumi luk se yumi stap long wan rod we i no hemia blong disaepol; yumi nid blong dipen long ol paoa blong Atonmen taem yumi sakem sin, mo bae yumi stap long stret rod bakegen.

Rod ia blong sakem sin, i klia se i wan rod blong stap jenisim ol tingting. Hem i wan rod blong mekem spes i stap blong Spirit i kam. Mo taem yumi mekem wan spes blong Spirit, bae i no gat spes i stap blong sin.

So, tingting blong yumi i wanem we yumi wantem mo wanem i pusum yumi we i joen tugeta. Tingting blong yumi i stamba blong aksen blong yumi. So, ?olsem wanem nao yumi mekem blong mekem tingting i kam strong moa? ?Olsem wanem yumi save givim tingting blong yumi long Lod? Mi invaetem kwaea blong singsing bakegen kores blong singsing we oli singsing long stat blong divosen tedei. Lisin gud long ol toktok.

Bae mi talem wanem Hem i wantem talem, bae mi mekem wanem Hem i wantem mekem.
Bae mi testifae long wol abaot Pikinini we God i lavem tumas.
Bae mi givim miwan long Hem—givim hat blong mi, tingting blong mi, sol blong mi.
Bae mi singsing long lav we i pemaot man, singsing ia we i mekem mi gud bakegen.12

Yumi evriwan i save talem wanem Hem i wantem talem.

Taem mi stap olsem stek presiden, mi bin intaviu wan sista we i jes mared. Mi askem: “?Mared blong yu olsem wanem?”

Hem i ansa: “O, i oraet, mi ting. Mitufala i no faet tumas.”

Mi askem: “?Yu minim wanem, no faet tumas?”

Hem i talem: “Be, yu save. Evri mared kapol oli faet.”

Mi ansa: “I no evri mared kapol. Waef mo mi i no faet. Papa mo mama blong mi i no faet.”

Afta, mitufala i gat gud storian long hao hem mo hasban blong hem i save toktok long tufala wetem lav, be i no wetem nogud tingting o strong toktok.

Yumi save talem wanem Lod i wantem yumi talem. Yumi save karemaot strong fasin long toktok blong yumi mo tiun blong toktok. Yumi save leftemap mo bildimap ol narawan, be i no blong pulum olgeta i kamdaon.

Wan taem, mi go wetem Elda Jefri R. Holan blong oganaesem wan stek presidensi bakegen. Taem mitufala i go insaed long hotel we mitufala i stap long hem, mi luksave wokman blong hotel mo askem hem: “Ei, ?hemia naes boefren blong yu?”

Woman ia i talem: “O, mitufala i finis sam wik i pas.”

Hem i talem: “Bae yu faenem wan moa, mo bae i gud moa.”

Woman ia i smael mo mitufala i go. Long nekis dei, mi stap luk taem Elda Holan i stap talem naes toktok long ol memba mo ol lida, wan afta narawan. Hem i mekem hemia isi nomo we evriwan we mitufala i mitim i filim gud moa abaot olgetawan mo abaot laef—jes from hem i bildimap olgeta.

Yumi evriwan i save mekem hemia. Sapos Sevya i stap ia, bae hem i leftemap evriwan long rod blong Hem, semmak olsem we Hem i mekem taem Hem i stap long wol. Yumi evriwan i save talem wanem we Hem i wantem talem.

Taem wan i askem mi se i olsem wanem blong wok wetem ol Jeneral Atoriti, fas samting we i kam long maen blong mi i lav we mi stap filim taem mi stap raon long olgeta. Wan i save ting se blong stanap long pulpit long Konfrens Senta i save mekem yu fraet from se Fas Presidensi mo Kworom blong Olgeta Twelef Aposol oli sidaon stret biaen long yu taem yu toktok. Be long wan wei, oli givim yu filing ia se yu save mekem.

Taem yu finis toktok, Olgeta Twelef oli sekhan long yu mo talem tangkyu long help blong yu long miting taem yu wokbaot i gobak long jea blong yu. Fas taem hemia i hapen, mi sek smol. Mi no ting se bae oli soemaot filing olsem, be oli mekem. Oli bildimap evriwan long rod blong olgeta, semmak olsem Sevya i bin mekem. Hemia nao mak blong Presiden Monson.

Presiden Monson i soem lav long evriwan. Afta wan long ol sesen long Oktoba konfrens, Presiden Monson i luk wan yang boe i stap tata long hem. Hem bendaon ova long rel, mo singaotem hem i kam kolosap. Mo afta, hem i sekhan long hem. Boe ia i glad tumas.

Long wan nara taem, afta long wan samting long Konfrens Senta, Presiden Monson i stap afta long miting blong sekhan wetem fulap yut we i stap. Hem i wokbaot i go long stej, mo go long wan grup blong yang pipol we oli gat bigfala disabiliti. Nating we ol yut ia oli no save toktok stret long Presiden Monson, smael long fes blong olgeta i soemaot hamas oli glad we hem i kam sekhan mo talem griting blong hem.

Sapos yumi go aot long ol narawan, nao paoa blong yumi blong go aot bae i kam bigwan moa. Hemia i talemaot klia we yumi stap givim tingting blong yumi long God.

Mekem se yumi save talem wanem we Lod i wantem yumi talem. Yumi save mekem tu wanem we Hem i wantem mekem. Samtaem, aksen i moa impoten long toktok.

Taem mitufala i stap lukaotem famle, waef blong mi i kasem wan bigfala sik mo i gat slip long hospital. Mi stap traem blong putum kaekae long tebol mo kea long faef yang pikinini taem hem i stap kam gud. Be mi no bin nid blong wokhad tumas blong putum kaekae long tebol. Oli stap karem kaekae long doa blong mitufala, wan afta wan—plante tumas we mifala i no save kakae evriwan. Mekem se mi stat blong putum ol kaekae ia long aesbokis kasem taem i fulap.

Ating ol aksen ia oli smol taem yu komperem wetem sam narafala aksen blong lav mo sore, be bae mi talem se ol kaekae ia oli minim plante long mi. Oli sevem mi. Waef blong mi i no gat paoa, mo tingting blong mi i slak. Be mi save go nomo long aesbokis, luk se bae mifala i kakae wanem long naet ia. Wetem evri kaekae we ol gudfala memba blong wod oli karem i kam long haos, oli bin stap givim tingting blong olgeta long God. Oli bin stap mekem wanem Hem i wantem se oli mas mekem.

Ol memba blong wod oli gat klin tingting blong helpem wan famle long nid, be i posibol blong mekem wan gud samting wetem wan nogud tingting. Afta, olsem ol skripja oli tijim, ol gud samting we yumi mekem, bae oli kaontem se i nogud from se hat blong yumi i no stret.¹³ Yumi bin mekem gud samting, be yumi no mekem wetem gud hat. So, ol tingting blong hat i evri samting. Yumi nidim blong wantem wanem we God i wantem. Yumi nidim blong talem wanem we God i wantem from se yumi wantem blong talem wanem Hem i wantem talem. Yumi nidim blong mekem wanem we God i wantem mekem from se yumi wantem blong mekem wanem Hem i wantem. Mo yumi nid blong stap wan witnes blong Pikinini we God i lavem from se yumi wantem stap wan witnes. Long tetaem ia nao yumi stap givim ful sol blong yumi long Hem—i no gat wan smol pis blong yumi we i wantem mekem samting we i no stret folem tingting blong Hem.

Blong talem mo mekem ol raet samting oli kam isi moa taem yumi mekem ol promes long Lod.

Ol kavenan oli plei wan stamba rol long divelopmen blong tingting. Taem yumi baptaes, yumi mekem kavenan blong tekem nem blong Lod long yumi—blong mekem wanem Hem i wantem. Nao, evri Sabat dei, yumi riniu kavenan ia. Yumi testifae long Papa blong yumi long Heven bakegen we yumi wantem yet blong tekem nem blong Lod long yumi, mo tingbaot Hem, mo kipim ol komanmen blong Hem. Evri taem we yumi klin inaf mo tekem pis bred blong sakramen long han, mo pusum kap wota long maot, yumi stap givim tingting blong yumi long Hem. Yumi stap talem: “Bae mi testifae long wol abaot Pikinini we God i lavem tumas.”¹⁴

Taem yumi sil long tempol long patna blong yumi we i no save finis, yumi mekem bakegen kavenan we bae i mekem tingting blong yumi i strong moa. Yumi save filim paoa we i mekem yumi strong moa, we i kam long Atonmen evri taem yumi go insaed long tabu haos. Ples ia nao yumi mekem kavenan blong givim yumi fulwan long Lod. From hemia nao Elda Makswel i talem: “No wet longtaem tumas blong faenem olta mo putum presen blong ol tingting blong yu long olta ia.”¹⁵ Ating i toktok long haed toktok, be mi biliv se hem i stap toktok klia long hao nao yumi save givim tingting blong yumi long God taem yumi mekem mo kipim ol kavenan wetem Hem.

So, yumi mekem evri samting we yumi save mekem blong givim yumiwan long Hem—hat blong yumi, tingting blong yumi, sol blong yumi. Moa yumi folem rod ia, moa Lod bae i blesem yumi wetem lav blong Hem. Mo moa yumi filim lav blong Hem, moa yumi save se yumi win blong givim tingting blong yumi long Hem.

Mi hop yumi stap lanem wan samting long tedei we bae i helpem yumi mekem blesing blong Elda Nelson i hapen—se tingting blong God, bae yumi save mekem, mi i save kamtru tru long yumi. Taem mi bin askem ol fren blong mi wanem oli bin lanem, hemia nao oli talem:

Man 2: Mi ting se plante taem, mi joenem fridom blong joes mo givim tingting blong mi long God, mo hemia i helpem mi luk se tufala i tu defren samting. Mi mekem plante raet samting, be naoia, mi wantem go mo mekem tingting biaen i kam klin, blong mi save kam huia God i wantem mi kam.

Woman 2: Mi lavem blong joenem ol tingting. Mi stap tingting, okei, hemia wanem i hapen long laef blong mi, mo yes, hemia i wanem mi bin stap stadi long hem, mo yes, man o woman ia i talem hemia. Mo, mi ting se mi joenem plante tingting.

Man 1: Nomata wanem nao jalenj blong yumi, yumi jes nid blong givim moa yumiwan long God. I olsem we Presiden Aering i talem: “Ol samting oli had olsem wanem tedei, bae oli gud moa long tumoro sapos yumi jusum blong wok blong God tedei.”¹⁶

Man 3: Blong givim hat mo tingting blong yu long God … Fas samting we Hem i mekem wetem—Hem i mekem i kam tabu. I no se yumi evriwan i givim hat blong yumi long God mo Hem i putum i go insaed long wan bigfala lokrum mo talem: “Yes, wan moa hat blong mi glad long hem.” Hem i tekem, i mekem i kam tabu, mo i traem, mo i givimbak long yumi mo talem: “Nao, go yusum mo mekem bigfala samting.” Mi neva tingting long wanem i hapen afta yu givim tingting mo hat long Hem. Mi ting se hemia nao en, be hemia i stat nomo.

Woman 3: Mi save se mi no save evri samting, mo i olsem se moa mi lanem, moa mi luksave hamas nao mi no save. Be mi save se God i stap laef. Mo mi ting se tedei i moa olsem wan konfemesen long hemia—se Hem i save mo Hem i wari mo i stap wet, mo i wantem blesem ol pikinini blong Hem, mo hemia, yumi ia.

Woman 1: Samples tri dei i pas, mi kasem wan prishud blesing from wan samting we i kam long laef blong mi. Mo wanem oli talem long blesing i hao mi nid blong gat moa tras long God mo givim tingting blong mi. Be from sam risen, long taem blong blesing ia, mi filim stret se mi nid blong go mo stadi long hemia, mo wanem nao dip mining blong hem. Olsem wanem hemia i jenisim ol samting we mi mekem evri dei mo ful dei, mo hao blong givim miwan fulwan long God.

So, blong givim tingting blong yumi long Lod i wan samting we yumi mekem evri dei. I no wan aksen we i stap hemwan. Hem i no en, be i stat. Yumi save talem wanem God i wantem yumi talem. Yumi save mekem wanem God i wantem mekem. Yumi save testifae long wol abaot Pikinini we God i lavem tumas—evri samting ia, from se yumi wantem blong mekem olgeta samting ia. Taem jenis ia i hapen long hat blong yumi, yumi talem tangkyu moa from Atonmen mekem se yumi gogohed blong kam strong moa.

Alma i talem: “Sapos yufala i bin wantem blong singim singsing blong lav blong pemaot man, bae mi askem, yufala i save filim samting ia naoia?”¹⁷

Singsing blong lav we i pemaot man i wan singsing blong stap glad long Atonmen blong Jisas Kraes. Hem i no wan singsing wetem miusik mo toktok. Hem i wan singsing blong ol filing. Ol toktok we yumi yusum i soemaot tangkyu blong yumi taem yumi wantem singsing long singsing blong lav we i pemaot man, taem yumi gogohed blong jenis folem ol stret blesing we yumi kasem. Be filing ia blong tangkyu long Sevya, i olsem wan singsing. I save ripit hemwan bakegen mo bakegen long hat blong yumi evri taem yumi tingbaot hao Ridima i sevem yumi long evri samting we bae i save pulumdaon yumi.

Hemia nao Alma i askem se yumi filim blong singsing long hem naoia. Naoia i taem we i impoten. Sapos yumi filim olsem blong stap glad long Atonmen blong Jisas Kraes naoia, nao hat blong yumi i raet. Yumi stap givim tingting blong yumi long Hem, mo Hem i stap mekem tingting blong yumi i kam strong moa. Sapos yumi stap go from ol samting blong wol, hat blong yumi i no stret, mo tingting blong yumi bae i no save kam strong.

Long las pat blong Buk blong Momon, ol man blong Nifae, we oli bin wan stret mo gud pipol long wan taem, oli tanem baksaed blong olgeta long Lod. Oli stat blong flas long paoa blong olgetawan be i no blong stap glad long paoa blong Lod. Oli wantem blong go agensem God. ?Mo wanem i hapen long olgeta? Oli stap wetem paoa blong olgeta nomo—go kasem we oli lusum evri samting.¹⁸

Yumi no wantem mekem hemia. Yumi save se yumi no save mekem samting yumiwan long laef ia. Yumi no save mekem. Yumi nidim help blong Lod. Yumi nidim wanwan long yumi. Yumi no save dipen long paoa blong yumiwan nomo. Lod i openem han blong Hem, i invaetem yumi blong kam strong moa tru long Hem blong yumi no stap stap wetem paoa blong yumiwan nomo.¹⁹

Mi save se yumi save akseptem invitesen blong kam mo kam strong moa, blong kam mo kasem fogivnes, blong kam mo filim bigbigfala lav blong Hem. Afta, wetem wan hat we i smael, bae yumi wantem blong singsing long singsing blong lav we i pemaot man. I no wanwan taem—bae yumi wantem singsing long singsing ia oltaem. Taem yumi filim paoa blong mekem wan had samting, bae yumi singsing long singing ia long hat blong yumi. Taem yumi letem trutok i faenem yumi mo fulumap sol blong yumi, bae yumi singsing. Taem yumi filim fogivnes, bae yumi singsing. Mo taem yumi filim lav blong Hem, bae yumi singsing.

Evri taem yumi singsing long hem, bae yumi givim tingting blong yumi long God, wan presen ia nomo we yumi gat blong givim long Hem. Bae Hem i no akseptem presen ia nomo, be bae Hem i mekem i kam bigwan moa, i moa impoten moa. Bae Hem i mekem yumi filim se yumi save mekem moa. Bae i helpem yumi mekem paoa blong yumi blong lavem man mo filim lav i kam bigwan moa. Bae i lidim yumi aot long tudak i kam long laet. Baei hilim mo helpem yumi long ol wei we i letem yumi fogiv mo kasem fogivnes.

Mi testifae se Hem i Sevya mo Ridima blong yumi. Mi testifae se Papa blong Hem i lavem yumi, inaf blong sendem hem long wol blong laef mo ded from yumi. Mi save se hemia i Jos blong Hem. Mi save se profet blong Hem we i laef, Presiden Tomas S. Monson i andastanem nid blong membasip blong Jos mo i save hao blong helpem yumi blong faenem rod i gobak hom. Long nem blong Jisas Kraes, amen.