Profet Blong Yumi: Tomas S. Monson

Elda Wiliam R. Woka

Blong Olgeta Seventi

JES Divosen blong Ol Yang Adalt • Mei 5, 2013 • Brigham Yang Yunivesiti–Aedaho

“Tangkyu, Papa God, Yu givim Profet” (Hymns, no. 19). Hym ia i wan we i spesel tumas blong Jos. Yumi stap talemdotangkyu long God from wan Profet blong stap gaedem yumi long ol las dei ia.

Se God i givim wan profet long yumi, hemia hem i mein samtinglong fet mo bilif blong ol Lata-dei Sent long evri ples. Yumi save we God i laef mo Hem i lavem yumi. Yumi save we Hem i sendem Pikinini blong Hem, Jisas Kraes, blong i Sevya mo Ridima blong yumi, mo yumi save we Hem i givim yumi wan profet.

Olgeta we oli bin laef long ol fasfala yia blong Jos, oli bin filim bigfala glad mo tangkyu blong laef long taem blong Profet Josef Smit. Ol mesej mo testemoni blong Restoresen, oltaem oli ol fas eksperiens blong ol fasfala Sent.

Plante gudfala samting i bin hapen long ol yia we Brigham Yang i prisaed ova long Jos blong Lod. Ol Sent oli kam long Wes mo stanemap haos long medel blong ol Roki Maonten, mo i ples we Jos i gro mo i gat plante sakses long hem. Olgeta we oli laef long taem ia, oli kaontem se i wan bigfala blesing blong stap laef long taem blong profet Brigham Yang.

Semfala paten ia i bin gohed olsem, mo long semtaem Lod i givim ol gudfala man blong daerektem ol wok blong Jos blong Hem. Papa mo mama, mo ol bubu blong mi oli tokbaot, wetem bigfala respek mo filing, profet blong dei blong olgeta—President Hiba J. Gran.

Long Sista Woka mo mi, mo plante long ol papa mo mama mo ol bubu blong yufala, mifala i lavem ol gudfala eksampol mo ol naesfala tijing blong profet Deved O. MaKei. Olgeta we oli kam biaen long hem oli: Josef Filding Smit, Harol B. Li, Spensa W. Kimbol, Esra Taf Benson, mo Hawod W. Hanta. Wanwan long ol man ia, Lod i bin rere gud long olgeta blong save lidim Jos long wan taem we Lod Hemwan i bin jusum. Wanwan long ol man ia i filim lav mo sapot blong ol memba blong Jos.

Plante long yufala, tedei long naet, bae i tingbaot gud bigfala lidasip blong Presiden Godon B. Hinkli. Hem i bin wan blesing blong laef long taem blong hem olsem Presiden blong Jos.

Faef yia i pas, Lod i singaotem Presiden Hinkli blong gobak hom mo Tomas S. Monson i kam President blong Jos—profet blong Lod long wol ia tedei. O, hem i wan blesing blong yu mo mi blong laef long gudfala dei ia taem wan gudfala profet i stap lidim yumi.

Hemia i Jos blong Lod. Lod i gat plan long laef blong ol gudfala Aposol, mo Hem i putum olgeta long ol posisen blong lidim Jos blong hem. Hem i wan tru samting, se, wan long ol spesel samting blong Jos blong Lod, i we Lod i gat ol Aposol mo ol Profet long wol tedei.

Aposol Pol i talemaot we Jos taem i gat “ol aposol mo ol profet, [wetem] Jisas Kraes we i nambawan pos long medel” (Efesas 2:20). I bin olsem bifo, mo i olsem naoia. Jos blong Lod hem i defren from i gat ol aposol mo ol profet, wetem Jisas Kraes Hemwan we i olsem nambawan pos we i stap long medel. Evri Presiden blong Jos i bin testifae we Jisas Kraes i hed blong Jos ia.

I no gat aksiden, i no gat mistek, mo i no gat kampen. Taem wan i blong kam presiden blong Jos blong Lod, Lod nao i bos, mo yes tingting blong Hem nomo bae i hapen.

Mi testifae long yufala se hem i tingting blong Lod, we tedei, Presiden Tomas S. Monson i stap lidim yumi, we hemi profet blong Lod long wol tedei.

Olsem profet Jeremaea blong OlTesteman i tijim yumi abaot ol profet, yumi save se hemia i tru wetem Presiden Monson. Skripja i talem se, “Taem mi mi no wokem yu yet long bel blong mama blong yu, be mi save yu finis. Mo taem yu yu no bon yet, be mi mi jusumaot yu, mo mi makemaot yu, mi mekem yu yu tabu, blong yu kam wan profet, blong yu talemaot tok blong mi long ol man blong olgeta kantri long wol” (Jeremaea 1:5).

Mi wantem tokbaot long yufala tedei abaot laef mo seves blong Presiden Tomas S. Monson, namba 16 Presiden blong Jos blong Jisas Kraes blong Ol Lata-dei Sent.

Long las yia blong laef blong Presiden Hinkli, hem i jusum mi olsem Eksekutiv Daerekta blong Tempol Dipatmen, mo Presiden Monson i givim ona ia long mi blong stap long wok ia yet tedei. Ova long ol las sikis yia, mi bin gat bigfala mo blesing we bae mi neva fogetem blong stap helpem Presiden Tomas S. Monson mo tufala kaonsela blong hem long saed blong wok blong tempol. Mi bin sidaon long saed blong hem taem Presiden Monson i givim mi olgeta kaonsel mo daereksen abaot olgeta tempol mo ol samting abaot olgeta tempol raon long wol. Hem i invaetem mi blong go wetem hem long ol dedikesen blong tempol, ol taem blong brekem graon from wan tempol, mo visitim ol ples blong bildim ol tempol. Mi gat blesing ia tu blong stap travel wetem hem raon long wol, i go long ol ples olsem Kiev, long Yukren, mo Sebu long Filipin, mo long ol narafala gudfala ples, olsem long Rom long Itali.

Taem hem i stap go kam raon long wol, mi bin gat blesing blong stap blong witnesem bigfala lav we hem i gat long olgeta pipol— i no ol memba blong Jos nomo, be evri pipol. Mi witnesem olsem wanem hem i soem fasin blong stap wan fren mo gud fasin, fasin blong hem olsem hemia blong Kraes, speseli long olgeta pikinini, olgeta olfala, mo olgeta sikman. Plante taem, taem mi stap luk Presiden Monson, mi gat wan filing olsem: “Hemia i stret samting we Sevya bae i mekem. Hemia i stret fasin we Sevya bae i stap tritim ol pipol.”

Mi bin witnesem strong paoa we i no gat en blong laef blong hem, strong tingting blong hem, glad blong hem long laef, mo fasin blong wantem wok blong Lod mo mekem olsem we Sevya i wantem hem blong mekem. Hem i neva taet blong mekem wok blong Lod.

Long Doktrin mo Ol Kavenan, seksen 52, ves 14, Lod i talem long yumi se bae Hem i givim yumi wan rod blong folem long evri samting, blong mekem se oli no trikim yumi.

Mi lavem skripja ia, from hem i tijim mi se Lod bae i givim wan rod blong mi mo soem long mi olsem wanem blong mekem samting, olsem wanem blong tekem aksen, olsem wanem blong laef. Be i no abaot mi. Hem i abaot wanwan long yumi. Lod i stap soem rod long yumi. Hem i stap givim wan rod blong folem long wanwan laef blong yumi blong soem yumi olsem wanem blong stap laef.

Mi biliv se wan impoten paten long laef blong yumi hem i laef blong profet we i stap gaedem mo daerektem Jos blong Lod long taem blong yumi. Olsem we mi bin talem finis, long mi, olsem wan yangfala, rod ia hem i bin Presiden Deved O. MaKei. Mi bin lavem hem mo sastenem hem, mi bin prea from hem, stadi gud long olgeta toktok blong hem, mo mi wantem tumas blong kam olsem hem olsem we tingting blong mi i tingting long hem.

Mi save se, taem plante long ol papa mo mama blong yufala oli bin yang, rod blong olgeta hem i bin Presiden Spensa W. Kimbol. O yes, long wanwan long yumi, bigfala tingting blong hat blong yumi i blong mekem rod blong laef blong yumi i semmak long hemia blong Sevya— blong folem hem, blong laef folem ol komanmen blong hem, mo blong kam moa olsem hem.

Long 3 Nifae 27:27, Jisas i tijim se: “Yufala i mas kam ol wanem kaen man? I tru mi talem long yufala, i olsem mi stap.”

Hemia i bigfala gol blong yumi— blong kam olsem Hem.

Long wol blong evri ofis we Presiden Tomas S. Monson i stap yusum stat long taem we oli singaotem hem olsem wan bisop, hem i pikja ia blong Sevya we yumi save gud long hem we Henrij Hofman i pentem. Hem i wan long naesfala pikja blong Sevya.

Taem hem i stap tokbaot peinting ia, Presiden Monson i talem: “Mi lavem peinting ia, we mi gat taem mi gat 22 yia nomo olsem wan bisop… Mi bin tekem pikja ia i go long evri wok we oli givim long mi blong mekem. Mi traem blong putum rod blong laef blong mi i semmak long hemia blong Masta. Taem we mi gat ol had desisen blong mekem, oltaem mi lukluk pikja ia mo askem miwan, ‘?Wanem nao bae Hem i mekem?’ Afta mi traem blong mi mekem” (long Heidi S. Swinton, To the Rescue: The Biography of Thomas S. Monson [2010], 135).

Mi save se Presiden Monson i tingbaot blong folem eksampol blong Jisas. Long wan taem mi stap wetem Presiden Monson long wan taem bifo long wan dedikesen blong tempol. Hem i jes flae i kam long dei ia nomo, mo taem miting blong naet ia i kam blong finis, mi ting se Presiden Monson bae i taet, mo mi wantem mekemsua se hem i gat inaf spel bifo dedikesen long nekis dei. Taem las hym i finis, mi muv i go kolosap long Presiden Monson mo talem, “Presiden, afta long las prea, sapos mifala i tekem yu go tru long doa ia long saed, mifala save tekem yu kwiktaem i gobak long hotel mo blong yu save gat smol spel.”

Hem i lukluk wetem wan fes we i sapraes mo talem long mi, “Elda Woka, sapos Jisas i stap ia, ?yu ting se bae Hem i go tru long saed doa stret afta nomo we miting i finis?”

Mi nomo talem tingting ia bakegen. Olsem we Sevya bae i mekem, hem tu, i bin wantem blong stap wetem olgeta pipol. Hem i no stap tingbaot hemwan nating. Hem i stap tingbaot ol gud samting we bae hem i save mekem.

Oltaem mi filim se mi save kam wan gud man taem mi mekem rod blong mi i semmak long rod blong ol stret mo gud man we Lod i putum long rod blong mi: ol bubu blong mi, papa mo mama blong mi, ol bisop blong mi, misin presiden blong mi, mo yes, profet blong God we mi save luk mo harem mo long hem we mi prea from evri dei. Mi save se yufala tu i stap mekem semmak.

Hem i bin wan naesfala blesing long laef blong mi blong luklukgud blong kam moa olsem Lod mo blong luklukgud blong kam olsem profet blong Hem— Presiden Tomas S. Monson.

Mi wantem blong serem wetem yufala sam samting abaot laef mo ol tijing blong Presiden Tomas S. Monson, mo wetem hop se, taem bae mi talem, bae yufala i save luksave sam fasin we bae yufala i wantem blong yusum long laef blong yufala. Bae yumi gat bigfala blesing blong save mekem i rod blong folem long laef blong yumi mo lanem samting long laef blong profet blong Lod.

Olsem Nifae, mo olsem plante long yufala, Tomas S. Monson i bin bon long wan gudfala papa mo mama. Hem i bon long Sol Lek Siti long 21 Ogis 1927. Hem i kam groap long wan famle olsem yufala. Hem i neva traem blong jenisim ples we hem i kam long hem. Wetem fasin blong stap hapi, mo ful glad wetem huia hem, wanwan taem bae Presiden Monson bae i talem se hem i no nidim blong wari se hem i kam long wanem saed blong rod blong tren — from hem i groap bitwin ol rod blong tren.

Mi stap sapraes oltaem long hao hem i stap tokbaot gud taem we hem i yangfala. Mi ting se hem i moa olsem Nifae. Leman mo Lemyul, tufala i gud blong luk ol problem mo lukluk long nogud saed blong evri samting. Nifae, long narasaed, i wan we i lukluk long gud saed, i gat hop, i gat wan hat tu blong talem tangkyu. Hem i luk gud saed blong evri samting raon long hem. Hem i wei ia nao Tomi Monson i groap long hem—!mo hem i bin olsem blong ful laef blong hem!

Hem i bin wan gudfala studen, mo ating samting we i moa impoten, hem i bin wan gud boe. Hem i bin soemaot tru fasin blong hem blong wantem mekem gud wok blong Lod taem hem i bin kasem koling ia blong stap olsem sekretari blong Kworom blong olgeta dikon long wod blong hem. 70 yia afta, olsem Presiden blong Jos, hem i tingbaot wetem hae tingting ol fasin we hem i wantem raetemgud ol minit blong kworom blong ol dikon. Hem i no gat tingting se “?From wanem mi mi sekretari mo i no presiden blong kworom?” Hem i jes wantem blong mekem gud wok blong hem. Hem i kasem koling blong givim seves insaed long Jos, mo hem i wantem blong mekem bes blong hem. Hem i wantem blong raetem gud ol minit i klia mo putum gud long oda, mekem se hem i taepem ol minit long kompiuta blong givim long kworom blong ol dikon blong hem. Olsem wan boe we i gat 12 yia nomo, hem i bin stap givim wan gudfala eksampol long yumi.

Sapos hemia i saon gud long yu, mi no sapraes. Hem i bin saon gud tu long stek presiden blong hem we, taem hem i harem abaot ol gudfala samting we yang Tomi i stap mekem, i singaotem hem blong givim toktok long stek konfrens—olsem sekretari blong kworom blong olgeta dikon. ?Yu bin harem finis wan sekretari blong kworom blong olgeta dikon i toktok long stek konfrens? !Hemia i wan gudfala eksampol long yumi.!

Hem i finisim sekendri skul blong hem mo joenem Yunaeted Stet Nevi. Hem i wok blong kantri blong hem, mo taem hem i stap longwe, hem i kipim hemwan i klin mo gat klin fasin. Hem i kambak hom mo wokhad blong kasem gud edukesen. Hem i wan gudfala studen—!wan narafala gud eksampol blong yumi evriwan! (Eksampol blong stap wan gud studen bae ating i moa impoten long sam long yufala bitim ol narafalawan.)

Hem i mekem fren mo kam blong lavem wan naesfala Lata-dei Sent gel, nem blong hem Fransis Jonson, mo smol taem afta, i askem gel ia blong maredem hem. Tufala i bin mared long Sol Lek Tempol long 7 Oktoba 1948, long 21 yia. !Hemia i wan gudfala eksampol long yumi evriwan! (Bakegen, ating hemia i moa impoten long sam long yufala bitim ol narafalawan)

Iven tufala i mared blong 1 yia 6 manis nomo, mo taem tufala i stap wok blong faenem wan niu wok, hem i akseptem koling ia we i kam long Lod blong stap olsem bisop blong wan bigfala wod long wan bigfala taon. Hem i wod ia we hem i groap long hem. (!Tingbaot hemia!) Hem i no talem, “i no stret taem yet” o “Mi yang tumas”; hem i jes akseptem koling ia, i trastem Lod, mo go insaed long wok ia fulwan wetem evri paoa mo talen we Lod i givim long hem. Hem i wantem mekem bes we hem i save mekem long wok blong Lod.

Yang Bisop Monson i lavem ol skripja we i save blesem laef blong yumi, we i bin blesem laef blong hem tu:

“Yu mas trastem Hae God long olgeta tingting blong yu; mo no ting se save ia blong yu naoia bae i naf blong givhan long yu.

“Long olgeta samting we yu stap mekem yu mas tingbaot hem oltaem, mo hem bae i soemaot stret rod long yu, blong yu yu folem.” (Ol Proveb 3:5–6).

Kam kasem dei ia tedei, Presiden Monson i stap talem skripja ia oltaem mo laef folem wanem we hem i tijim yumi. !Hem i wan gudfala eksampol long yumi! Bae yumi evriwan i save mekem gud spos yumi tingbaot skripja ia mo mekem i kam impoten pat blong tingting blong yumi abaot laef—semmak olsem we Presiden Monson i bin mekem.

Ol memba we i stap long wod blong Bisop Monson i ova long 1000, wetem 84 wido insaed. Yumi bin gat blesing blong save harem long jeneral konfrens ol eksperiens blong hem we i gud tumas taem hem i lukaotem gud ol sista ia we oli gat blesing blong ia blong hem i save lukaot long olgeta.

Long mi, evri taem mi harem hem i tokbaot wan long ol eksperiens olsem wan bisop, mi kam blong luksave, mo hem i strong tumas long mi, se lav mo wari blong hem long ol memba blong wod blong hem i neva stop afta we hem i bin rilis. Oli bin singaotem hem long presidensi blong stek taem hem i gat 27 yia, be iven afta plante yia (afta we oli singaotem hem olsem wan misin presiden mo wan Aposol), hem i gohed blong soemaot lav, tijim, mo lukaot gud long ol olfala memba long wod blong hem. i bin klia se hem i no lavem mo kea long olgeta from nomo hem i gat wok ia. Lav mo wari blong hem i kamaot stret long hat blong hem mo bae i neva stop iven wok we hem i stap mekem i bin jenis.

Tru long hemia, Presiden Monson i soem rod ia long yumi. Hem i moa gudfala rod; hem i wei blong Lod. Hem i lavem ol narafala mo i stap wari from ol narafala—semmak olsem we Lod i tijim yumi, we yumi mas olsem. !Hem i wan gudfala eksampol long yumi!

Long 32 yia, Presiden Monson i kasem koling blong kam presiden blong Kanada Misin, we hedofis blong hem i stap long Toronto, Ontario. Semmak olsem we hem i mekem olsem wan bisop, hem i putum hem fulwan insaed long wok blong hem, i givim evri ting we hem i gat, mo i trastem Lod wetem olgeta hat blong hem. Evriwan raon long hem i save luk lav we hem i gat long Lod, long waef mo ol pikinini blong hem, lav blong hem long ol misinari mo ol memba, mo lav blong hem long Kanada, graon we oli singaotem hem blong go givim seves. Fasin blong hem olsem misin presiden, i tajem plante mo i no gat wan samting i save talem hamas hem i bin mekem. Ol misinari blong hem oli lavem hem mo lukaotem blong laef long wan wei we bae i mekem misin presiden blong olgeta i glad long olgeta. Yumi evriwan i save lan long hemia.

Semmak olsem we hem i bin mekem taem hem i bin rilis olsem bisop, hem i gohed blong holem i stap insaed long hat blong hem ol filing we hem i gat long ol misinari blong hem mo olgeta sent we oli bin gat blesing blong stap anda long lidasip blong hem. Mi mi bin witnesem lav we i no go daon, blong Presiden Monson, mo hao hem i intres bigwan long ol misinari we oli givim seves anda long hem long Kanada Misin. !Hem i wan gudfala eksampol!

Mi save se ol misinari ia we oli bin gat blesing blong gat Presiden Monson taem misin presiden blong olgeta i bin traehad blong laef folem rod blong stret mo gud seves insaed long kingdom blong Lod we Presiden mo Sista Monson i soem long olgeta. Blong talem klia, bae mi serem wetem yufala wan tru samting, se aot long ol 140 tempol presiden we i stap givim seves naoia raon long wol, 5 long olgeta oli ol yang misinari we oli stap long misin anda long Presiden Monson long Kanada Misin.

Taosen long yufala we yufala i stap wetem mifala long naet ia, i ol misinari we i kambak long misin. Mi prea se bae wanwan long yumi i folem eksampol blong ol 5 tempol presiden ia mo traehad blong stap strong mo wokbaot long rod blong stret mo gud seves we ol misin presiden oli bin soem long yumi.

Long Nius blong Jos mi bin luk wan foto blong Presiden Monson we i bin tajem mi taem hem i stap visitim wan man long wan hospital long Toronto, Kanada (luk long “Teachings of the Prophet,” Church News, Feb. 3, 2013, 7). Man ia i bin givim seves long saed blong Presiden Monson 50 yia i pas. Presiden Monson i neva fogetem hem. Plante yia mo plante kilometa i no save stilim aot long Presiden Monson ol naes filing blong lav we i kam long olgeta we oli givim seves tugeta long Lod. Mi hop se wanwan long yumi bae i folem ol eksampol ia blong hem mo no fogetem olgeta we oli bin blesem ol laef blong yumi long wan taem bifo.

Long 1963, taem hem i gat 36 yia, Tomas S. Monson i kasem invitesen blong go long ofis blong Presiden Deved O. MaKei, we i Presiden blong Jos long taem ia. Hem i long miting ia nao we Presiden MaKei i singaotem hem olsem wan Aposol blong Lod Jisas Kraes.

Presiden Monson i wan Aposol ia nomo we oli singaotem hem we hem i yangfala yet long ol las 100 yia. (Josef Filding Smit oli bin singaotem hem long 33 yia long 1910.) I tru, we han blong Lod i daerektem koling ia blong yang Aposol ia, olsem we Lod i save se Tomas S. Monson bae i lidim Jos blong hem tedei.

Long Oktoba jeneral konfrens we i stap kam bae i makem 50 yia we Tomas S. Monson i bin kasem koling ia olsem wan Aposol. ?Hem i gud tumas ah? (I no bin gat selebresen blong 50 yia insaed long Olgeta Twelef kasem taem blong Josef Filding Smit i kam kasem tedei.)

Blong 22 yia Presiden Monson i stap olsem wan kaonsela blong 3 Presiden blong Jos: Esra Taf Benson, Howod W. Hanta mo Godon B. Hinkli. Long 3 Febwari 2008, oli bin setem apat Tomas S. Monson olsem Presiden blong Jos. Hem i gat 2 gudfala kaonsela we oli stanap long saed blong hem: Presiden Henri B. Aering mo Presiden Dita F. Ukdof. Olgeta oli ol trifala Prisaeding Hae Pris we oli stap daerektem Jos blong Lod long wol tedei. (luk long D&C 107:22).

Gudfala seves blong Presiden Monson, oltaem, i go wetem toktok ia “ blong sevem wan we i lus.” Haedi Swinton i bin raetem wan naesfala stori abaot laef blong Presiden Monson, mo hem i putum taetol blong hem, To the Rescue (Blong Sevem Wan we I Lus). Stori ia oli putumaot long 2010. Sapos yu no ridim yet, mi nao stap askem yu blong ridim. Bae i blesem laef blong yu.

Mesej blong hem, i semmak mesej we Jisas i givim long buk blong Luk: livim olgeta naentinaen i stap, mo go mo sevem wan we i lus (Luk 15:4). Hemia nao i stamba long gospel blong Jisas Kraes, blong lavem ol narafala man, mo mekem bes blong blesem laef blong olgeta. Oltaem Presiden Monson i stap tijim olgeta prinsipol ia, be moa impoten long hemia, hem i laef long wei ia nao. Laef blong hem i fulap long ol gudfala eksampol blong go aot blong visit, givim kamfot, o helpem olgeta we oli stap long nid: ol wido, ol pikinini, olgeta we oli sik, olgeta we oli harem nogud, mo olgeta we oli stap olgetawan o gat brokbrok hat.

Aposol Jemes i raetem se, “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol ino spolem hem” (Jemes 1:27).

Hemia nao wei we Presiden Monson i stap laef. Lesen we i blong yumi, hem i we wan i no nidim blong kam wan Aposol blong save laef olsem. Yumi save laef folem relijin blong yumi; yumi save visitim olgeta papa we oli no gat pikinini mo ol wido, mo yumi save kipim yumi aot long ol fasin blong wol. !Yumi save lukluk long profet blong yumi blong luk olsem wanem nao yumi save mekem olsem! Yumi save talem long yumiwan, “Hemia nao kaen man ia we mi wantem kam.”

Sam yia i pas, jes bifo long jeneral konfrens, Presiden Monson i tijim wan nara naes lesen. Taem ia i go long Ol Jeneral Atoriti we oli kam tugeta, we oli bin travel i kam long Sol Lek Siti, plante oli kam long ol ples raon long wol we oli stap stap olsem ol Presiden blong ol eria ia. Hem i wan impoten miting. Mifala i kam tugeta blong kasem instraksen long Fas Presidensi mo long Olgeta Twelef.

Taem taem blong miting i stap kam klosap, evriwan i bin stap be Presiden Monson nomo i no kam yet. Sam minit bifo miting i stat, mifala i stop blong toktok long mifala mo sidaon kwaet mo stap lisin long miusik—mo ting se bae profet i kam long eni taem.

Mifala i wet kasem taem 9 klok i pas. Wan man i wokbaot i kam long saed blong doa—i blong jek nomo sapos wan man i nidim eni help. Taem hem i kambak bakegen long rum, oli talem long mifala se “Presiden Monson bae i joenem mifala i no longtaem.”

15 minit afta we miting i sapos blong stat, Presiden Monson i kam insaed. Blong soem respek, mifala evriwan i stanap taem hem i kam insaed. Mifala i glad tumas blong luk hem mo luk se hem i oraet. I nogat wan samting we i soem se i gat wan risen from wanem hem i kam let.

Presiden Monson i go stret long pulpit mo talem, “ Ol brata, mi sore blong kam let, be waef blong mi i nidim mi long moning ia.”

Mi bin sapraes tumas mo gat tingting i we i stap daon. Mi no save stop blong tingbaot toktok blong Presiden Monson. Hem i bin wan impoten miting. Evri bigfala lida blong Jos oli bin stap, be Presiden Monson i soem wan eksampol long mifala evriwan. Waef blong hem i nidim hem, mo hem i tekem taem blong lukaotgud long hem. Hem i wan naesfala toktok. Mi no save tingbaot ol samting we oli tokbaot long dei ia, be mi tingbaot toktok ia: “Waef blong mi i nidim mi.”

Toktok ia i kam strong moa long wan nara taem, we Presiden Monson i talem: “Taem mi harem ol man oli stap talem we oli lavem waef blong olgeta, mi wantem talem long olgeta, ‘Pruvum hemia long olsem wanem yu tritim hem mo olsem wanem yu givim seves long hem.’”

Hemia fasin we i tokbaot Presiden Monson: Oltaem, Hem i lukluk long ol nid blong ol man. Oltaem, Hem i soem gudhat mo stap kea long ol narafala.

I no nid blong yu stap klosap long Presiden Monson blong longtaem blong save filim lav mo komitmen blong hem long switat blong hem, Sista Fransis Monson. Taem hem i tokbaot hem, ol ae blong hem i fulap long laet, mo i gat wan big smael long fes blong hem. Yu save nomo we man ia we i lavem waef blong hem i wan eksampol blong yumi evriwan. Presiden mo Sista Monson, tufala i stap soem yumi eksampol blong wan man mo woman we tufala tugeta i lavem Lod mo tufala i wantem givim seves long Hem long stret mo gud fasin.

Mi wantem blong kam moa olsem Lod, be tu, mi wantem blong kam moa olsem profet blong hem.

Spos yu stap tingting long wanem Presiden Monson i wantem long wanwan long yufala, ating bae ol eksperiens ia bae oli helpem yu blong save:

Las Novemba naesfala Tempol blong Boes Aedaho i bin rere blong oli dediketem afta long 18 manis we i klos blong oli mekem sam wok long hem. Afta long 30 yia we ol fetful Sent oli stap yusum tempol long eria ia blong Aedaho mo ol narafala ples, taem i kam blong oli mas riperem tempol ia. Olsem wan fasin blong selebretem dedikesen blong tempol, ol yut blong tempol distrik oli kasem invitesen blong mekem wan kalja selebresen. Hem i wan naet blong singsing mo danis mo talemaot fet mo tangkyu from tempol.

Mi bin sidaon long saed blong Presiden Monson taem mifala stap lukluk ol presentesen ia blong wanwan stek. Wan long olgeta grup blong danis i soem wan gudfala grup blong ol yang woman. Taem Presiden Monson i stap soem glad long ol samting ia, hem i muv i kam klosap mo talem ol filing blong hat blong hem. Hem i se: “Hop blong mi hem i blong evriwan long olgeta i mared long tempol. Mi wantem tumas blong wanwan long olgeta i mas kasem blesing ia—blong mared long tempol.”

Mi stap tingting: “Hem i gud tumas. Profet blong God i stap ia mo witnesem selebresen blong ol yut ia long singsing mo danis, mo long hem, hemia i go stret wetem tempol we bae hem i dediketem long nekis moning. Hop blong hem i blong evriwan long olgeta i kasem tempol mared.” Sapos hemia i wanem profet i wantem blong wanwan long yumi, mo hem i olsem, nao wanwan long yumi i mas wantem blong yumiwan bakegen, mo hem i mas stap wan impoten gol long wanwan laef blong yumi.

Mi wantem serem wan nara eksperiens wetem yufala:

Presiden Monson, Presiden Aering, mo Presiden Kwentin L. Kuk blong Kworom blong Olgeta Twelef i go long Lae, Hawae, blong dediketem bakegen naesfala tempol ia long Novemba blong yia 2010. Long naet bifo dedikesen blong tempol, mifala i kam tugeta long Kanon Senta long skul graon blong Brigham Yang Yunivesiti long wan kalja selebresen. Program ia i bin gud. Tru long ol singsing, danis, mo toktok, ol yut blong tempol distrik i talem stori blong histri blong Jos long Hawae. Oli tokbaot ol fasfala misinari mo memba. Oli tokbaot naesfala stori blong wan fiuja profet Josef F. Smit we i kasem koling blong go long wan misin long Hawae long 1854, taem we hem i gat 15 yia nomo. Yangfala Josef F. Smit i gobak hom afta long 3 yia misin blong hem jes bifo hem i gat 18 yia. (?Mo yu ting se jenis i go long 18 yia i spesel tumas long yu?)

Kalja selebresen ia i gohed taem we ol yut i soem gro blong Jos long medel blong ol man Polinesia mo talem olsem wanem nao Presiden Josef F. Smit i kambak long Hawae afta long 50 yia, taem Presiden blong Jos i dediketem ples mo i brekem graon blong oli bildim tempol blong Lae Hawae.

Kalja selebresen ia i bin gud, mo Presiden Monson i laekem evri pat blong program ia. Hem i hapi blong luk wan danis blong Wol Wo 2 singsing “Bugi Wuki Bagol Boe,” we i mekem hem i tingbaot taem blong hem long Nevi. Ol nara danis i blong olgeta pipol blong olgeta aelan.

Wan naes danis we i soem naesfala danis ia, hula, oli bin mekem. Wan long ol yang woman we i pat long danis ia i stap long wil jea. Hem i wan naes gel, iven we hem i no save yusum ol leg blong hem, be hem i bin danis gud we. Presiden Monson i soem hem long mi mo talem we hem i naes mo hem i stap danis i naes.

Taem program i finis, evriwan i hapi long wanem we i jes finis. Taem mifala i lego ples we mifala i stap sidaon long hem, evriwan we i danis i sidaon long floa, iven olgeta we oli danis long hula. Presiden Monson i no folem rod blong go aot long bilding, be hem i go stret long olgeta mo soem glad blong hem long olgeta yut, mo hem i go stret long naesfala gel ia long wiljea blong soem glad blong hem mo hamas hem i lavem hem.

Iven long medel blong selebresen ia mo bigfala grup blong ol man, Presiden Monson, bakegen, i soem stret lav blong Kraes. Hem i go long wan ia. Hem i nildaon mo kisim hem long fored blong hed. Mi stap tingting: “Hem i gud tumas. Bakegen profet blong God i soem long yumi olsem wanem blong go aot long olgeta we oli stap raon long yumi, hao yumi save stap kaen mo gat lav, mo hao blong leftemap ol narafala.” Mi stap tingting: “Hemia i wei we Jisas bae i mekem. Hemia i wei we Sevya bae i wantem yumi blong mekem long ol nara man.”

Mi laekem Praemeri singsing ia we i talem se, “Mi stap traem blong kam olsem Jisas” (“I’m Trying to Be Like Jesus,” Children's Songbook, 78). Mo mi wantem ademap long ples ia, “Mo mi wantem blong kam olsem profet blong Hem.”

Mi wantem tokbaot 5 wei we bae yumi save folem eksampol blong Presiden Monson:

Faswan, Yumi save lukluk long gud saed, mo yumi save stap hapi.

Long Perel we I Gat Bigfala Praes, Profet Josef Smit i tokbaot blong gat fes we i hapi oltaem (luk long Joseph Smith—History 1:28). Hemia i tokbaot tu Presiden Monson. Hem i oltaem gat wan hapi fes.

Long wan taem Presiden Monson i talem: “Yumi … save jusum blong gat oltaem wan fasin blong lukluk long gud saed. Yumi no save daerektem win, be yumi save yusum gud ol sel. Long nara toktok, yumi save jusum blong stap hapi mo lukluk long gud saed, i nomata wanem i kam krosem rod blong yumi” (“Messages of Inspiration from President Monson,” Church News, Sept. 2, 2012, 2).

Wan dei mi stap sidaon aotsaed long rum blong Fas Presidensi. Mi bin kasem invitesen blong go longwe blong pat long wan miting abaot ol tempol. Mi sidaon kwaet aotsaed long rum ia, miwan. Mi stap tingting se Fas Presidensi i statem miting ia finis mo bae wan bae i kam talem blong mi joenem olgeta. Taem mi stap sidaon mi save harem wan i stap wokbaot i kam mo i stap wisel. Mi stap tingting se: “Wan man i no andastanem stret fasin blong wok; yu no save wokbaot raon long ofis blong Presiden blong Jos mo miting rum blong Fas Presidensi mo stap wisel.” Smol taem afta, man we i stap wisel ia i kam raon long kona—man ia i Presiden Monson. Hem i hapi, mo i fulap long ol gudfala tingting. Hem i gritim mi mo talem, “Ating bae yumi statem miting ia i no longtaem.” Iven wetem evri wok blong Jos i stap long solda blong hem be hem i wan eksampol blong stap glad mo hem i oltaem gat gud fasin. Yumi mas olsem ia nao.

Nambatu, yumi save stap kaen mo soem lav long ol pikinini, olsem we Presiden Monson i mekem.

Jisas i tokbaot plante ol pikinini. Profet blong Hem, Presiden Monson, i tokbaot plante ol pikinini tu, mo mi luk hemia long taem blong dedikesen blong ol tempol mo, tru long eksampol blong hem, i tijim yumi hao yumi mas tritim olgeta. Long evri dedikesen blong tempol bae hem i oltaem lukluk long ol pikinini. Hem i lavem blong mekem olgeta tu oli pat blong kontaston seremoni mo putum simen long ol pos blong tempol blong soem se tempol i finis. Hem i mekem olgeta i glad from. Hemi wan taem we bae oli neva fogetem. Hem i oltaem laf wetem olgeta. Hem i leftemap tingting blong olgeta. Hem i wan gudfala samting blong luk.

Hem i stap gritim ol man wetem hae faef, muvum sora, mo leftemap tingting blong go long misin mo mared long tempol. Hem i laekem laef—?mo i no hemia nao we yumi evriwan i wantem?

Sam yia i pas, Presiden Monson i stap go long dedikesen blong Okir Maonten Tempol long betdei blong hem. Taem hem i kasem tempol mo stap wokbaot i go long doa long fored blong tempol, wan grup blong ol yangfala i stap tugeta. Oli save se hem i dei we Presiden Monson i bon long hem, afta oli stat blong singsing “Hapi bedei” long hem. Hem i laekem. Hem i stop mo i fesem olgeta wetem bigfala smael long fes blong hem. Hem i stat blong muvum han blong hem, olsem se hem i stap lidim singsing. Long en oli ademap toktok ia “Mo plante moa.” Presiden Monson i laekem hemia tu, mo i talem: “hemia nao pat we mi laekem moa.”

Ol pikinini mo ol yangfala blong Jos oli lavem hem, mo mi stap ting se i from oli nogat tu tingting we hem i lavem olgeta. Jisas i lavem ol pikinini, mo profet blong Hem i lavem ol pikinini. !Hemia i wan bigfala eksampol long wanwan long yumi!

Nambatri, yumi save folem smol voes blong Spirit, semmak olsem Presiden Monson.

Presiden Monson i givim hem fulwan long Lod mo komitim hem blong oltaem folem smol voes blong Spirit we profet hemwan i bin talem i naes long ol toktok ia: “Swit eksperiens we mi save long laef i blong filim Spirit mo mekem wanem i talem, mo afta faenemaot we hem i ansa blong prea blong wan o nid blong wan. Mo oltaem mi wantem Lod blong save se spos mi nidim wan wokman, Tom Monson bae i wokman blong hem” (On the Lord’s Errand [DVD, 2008]). Hemia nao i rod we wanwan long yumi i mas wantem blong folem.

Nambafo, yumi save lavem tempol, olsem Presiden Monson i lavem tempol.

Presiden Monson bae i stap long histri olsem wan long ol man blong bildim tempol long histri blong Jos. Stat long taem we hem i kam Presiden blong Jos long Febware 2008, hem i gohed blong mekem bigfala wok ia blong bildim ol tempol. Sam long ol tempol we hem i anaonsem oli stap long ol histri ples blong wol: “Long moning ia mi glad blong anaonsem faef moa niu tempol we oli lukluk long ol ples blong bildim mo we long ol manis mo yia we oli stap kam, bae oli bildim long ol ples ia: Kalgari, Albeta, Kanada; Kordoba, Ajentina; Bigfala Kansas Siti eria; Filadelfia, Pensilvania, mo Rom Itali” (Thomas S. Monson, “Welcome to Conference,” Ensign o Liahona, Nov. 2008, 6).

Long ol faef yia we hem i bin stap olsem profet, Presiden Monson i anaonsem blong oli bildim 33 niu tempol. Long las manis nomo long Eprel konfrens, hem i anaonsem plan blong 2 moa niu tempol: Sedar Siti, Yuta, mo Rio de Janero, Brasil.

Wetem ol dedikesen blong Tekusikalpa Honduras Tempol long Maj, yumi nao gat 141 tempol long Jos, wetem 29 we oli stap bildim, o i stap long rod blong bildim nao. Hem i wan gudfala taem blong bildim ol tempol mo wosip long tempol long Jos blong Lod. Mi harem Presiden Monson i talem ol yangfala we oli yang tumas blong go insaed long tempol blong go mo tajem wol blong tempol afta “letem tempol i tajem yu.”

Presiden Monson i talem, “Bae wanwan long yumi i laef klin, wetem ol klin han mo klin hat, blong mekem se tempol i save tajem laef blong yumi mo famle blong yumi.” (“Blessings of the Temple,” Ensign, Oct. 2010, 19).

Afta hem i talem naesfala promes ia: “Taem yumi lavem tempol, tajem tempol, mo atendem tempol, laef blong yumi bae i soem fet blong yumi. Taem yumi kam long ol tabu haos ia blong God, taem yumi tingbaot ol promes we yumi mekem insaed, bae yumi go tru long evri jalenj mo save winim wanwan temtesen” (Be Your Best Self [1979], 56; oli ademapt italik).

Bae yumi folem rod ia we profet we i bin putum i stap blong yumi lavem tempol.

Nambafaef, yumi save stap kaen, tingting long ol narafalaman, mo lavem ol narafalaman, olsem Presiden Monson i mekem.

Presiden Monson i wan gudfala eksampol blong lavem ol narafala. Ful seves blong hem i fulap wetem ol visit long ol hom, putum han long ol hed mo givim blesing, mekem ol telefon kol jes blong givim kamfot mo leftemap tingting, sendem ol leta blong tangkyu mo glad hat, visitim ol hospital mo ol ples blong lukaot long ol olfala, mo faenem taem blong go long ol fenerol iven hem i stap bisi.

Mi bin talem se i gat 84 wido long wod blong Presiden Monson taem hem i wan bisop. Ova long 10 yia we i folem seves blong hem olsem bisop, we hem i bin dediketem hem fulwan long hem, wetem evri ansa blong ol prea blong olgeta, Presiden Monson i bin go long ol fenerol blong evriwan long olgeta. Traem tingbaot hemia.

Olsem we Sevya bae i mekem, Tomas S. Monson i bin go aot mo mekem gud, blesem mo lavem ol narafala olsem we i wan samting we i stap long laef blong hem. Yumi evriwan i save lanem long hemia taem yumi luklukgud blong folem ol wokbaot blong hem.

Wan long ol gudfala eksampol blong kaen fasin blong Presiden Monson i hapen las yia. Taem we tempol blong Brigham Siti Yuta Tempol i stap kam blong finis nao, mi mit wetem Fas Presidensi blong tokbaot plan blong dedikesen blong tempol. Wetem Brigham Siti we i wan aoa long Sol Lek Siti, bae i isi long Presiden Monson blong go longwe long dedikesen. Be, Presiden Monson i se: “Brigham Siti i hom taon blong Presiden Boed K. Peka, gudfala Aposol ia we i sidaon wetem mi blong plante yia long Olgeta Twelef. Mi wantem hem blong gat ona mo blesing ia blong dediketem tempol long hom taon blong hem. Bae mi stap ia mo bae mi asaenem Presiden Peka blong go dediketem Brigham Siti Tempol. Mi wantem hemia bae i dei blong hem.”

Hem i wan naesfala dei blong Presiden Peka mo Sista Peka, we i groap tu long Brigham Siti. I tajem mi bigwan taem Presiden Monson i soem kaen mo gud fasin long Aposol fren blong hem. Yumi evriwan i save stap olsem. Yumi save serem mo stap kaen mo no tingting long yumiwan tumas, be tingbaot moa olgeta raon long yumi.

Mi lavem singsing blong ol pikinini “Folem Profet.” Hem i gat 9 naesfala ves, be mi wantem blong ridim nomo wan ves long yufala:

Naoia yumi gat wan wol we man i konfius.
Spos yu no bilivim, go luk nius long TV.
Yumi save kasem daereksen long rod.
Sapos yumi lisin long ol profet—mekem wanem oli talem.
… … … … … … … … … .
Folem profet; yu no go lus.
… … … … … … … … … .
Folem profet; hem i save rod.
(Children’s Songbook, 111)

Presiden Monson i save rod ia. Stret rod i rod blong Lod. “Stret rod ia i blong biliv long Kraes.” (2 Nifae 25:29).

Presiden Monson i tijim yumi stret wei blong laef wetem ol naesfala mo mesej we oli kam tru long insperesen long taem blong jeneral konfrens. Hem i tijim yumi olsem wanem blong kam ol man blong Jisas Kraes tru long ol naesfala mo gudfala eksampol blong hem. I tru nomo, se Lod i givim yumi wan rod long saed blong evri samting, mo wan long ol rod ia we yumi stap luklukgud blong folem hem i profet we yumi lavem tumas.

Mi testifae se i gat wan God long heven we i save yumi mo lavem yumi. Hem i givim yumi wan profet—blong gaedem yumi, blong tijim yumi, mo blong lidim yumi long ol las dei ia. Mi testifae we Jisas Kraes i Pikinini blong God mo i Sevya blong wol ia. Mi biliv se Lod i wantem yumi blong lavem profet, blong sastenem hem, mo blong folem eksampol blong hem.

Mifala i talem tangkyu long Yu, O God, from wan profet. Mifala i talem tangkyu long Yu from profet ia. Mi kaontem olsem wan bigfala blesing blong stap laef long dei ia blong Presiden Tomas S. Monson i we i profet blong Lod. Taem yumi folem profet ia mo traem blong kam moa olsem hem, bae yumi kam ol fetful disaepol blong Lod Jisas Kraes.

Hem i bin wan ona blong toktok long yufala tunaet, mo mi prea se bae Lod i blesem yufala moa; mi testifae we hemia i wok blong Lod, long nem blong Jisas Kraes, amen.