Glory long God
I Kam long Ronal A. Rasban
Blong Presidensi blong Olgeta Seventi
Meri Krismes ol brata mo sista blong mi. Mi talemaot tangkyu long Fas Presidensi from spesel janis ia blong serem filing blong mi long saed blong tabu Krismes taem ia, mo taem we Lod mo Sevya blong yumi, Jisas Kraes i bon.
Mi neva taed long ol mesej blong Krismes we oli stat wetem taem ia we bebi Jisas i bon long Betlehem long Judia.
Aesea i tokbaot taem ia moa long 700 yia bifo i hapen: “Wan yang gel we naoia i gat bel, bambae i bonem wan pikinini boe blong hem, mo bae i putum nem blong hem se Emanuel.”1
King Benjamin i bin profesae: “Mo bae oli singaotem hem Jisas Kraes, Pikinini blong God, Papa blong heven mo wol, Krieta blong evri samting stat long stat; mo mama blong hem bae oli singaotem hem Meri.”2
Profet Nifae i harem wan voes we i talem: “Long tumoro mi kam long wol.”3
Long nekis dei, longwe longwe long solwota, Kraes i bin bon. Yes i tru nomo se mama blong Hem, Meri, i lukluk wetem sapraes long niufala bebi boe blong hem, Wan Stret Pikinini Ia Nomo blong Papa we i bon long wol ia.
Antap long ol hil blong Judia we oli raonem Betlehem, Luk i talem long yumi se ol man we oli stap lukaot long ol sipsip oli bin stap long ol plantesen blong olgeta.4 Ol man blong lukaot long sipsip ia, oli no ol man olbaot, oli ol stret mo tabu man we bae oli testifae abaot pikinini ia we i Kraes.5
“Nao wan enjel blong Hae God i kamtru long olgeta, mo [bigfala laet blong Hae God i saen long olgeta], nao oli fraet tumas.
“Enjel ya i talem long olgeta se: ‘Yufala i no fraet. Mi mi gat wan gud nius blong talem long yufala we i save mekem olgeta man oli harem gud tumas.
Long naet ya nomo, long vilej ya blong King Deved bifo, i gat wan pikinini i jes bon, we hem bambae i sevem yufala. … Hem i Mesaea ya we i Masta blong yumi.’”
“Nao wantaem nomo, i gat fulap enjel blong heven oli kam joen wetem enjel ya, nao oli stap presem God, oli stap singsing se:
“ ‘Long heven antap we antap, oli stap leftemap nem blong God, mo long wol ya, pis i stap wetem ol man we God i glad long olgeta.’”6
Traem gat pikja blong taem ia long Judia—Skae i saen gud wetem laet blong wan bigfala sta mo ol kores we oli kam long heven we i makem taem ia we i spesel. Ol man blong lukaot long sipsip oli hariap7 i go blong luk bebi ia we i stap slip long bokis blong kakae blong animol. Mo afta, oli talemaot long ol narafala ples8 wanem nao we oli bin luk.
Evri yia, long Krismes, yumi stap ademap witnes blong yumi long hemia blong ol man blong lukaot long sipsip, se Jisas Kraes, stret Pikinini blong God we i stap laef, i kam long wan kona blong wol, long wanem we yumi stap singaotem Tabu Graon.
Wetem respek, ol man blong lukaot long sipsip oli kam kolosap long ples blong animol blong wosipim King blong ol king. ?Long wanem wei nao bae yumi wosipim Hem long taem ia? ?Bae yumi go soping blong ded? ?Bae yumi hariap olbaot mo stap dekoretem hom blong yumi? ?Bae hemia nao ona we bae yumi givim long Sevya blong yumi? ?O bae yumi tekem pis i go long ol trabol hat, gud nius long olgeta we oli nidim moa hae stamba tingting, glori long God long wei we yumi wantem mekem wanem Hem i askem? Jisas i putum hemia long simpol wei: “Kam [mo] folem mi.”9
Gospel blong Jisas Kraes, we i bin kambak tru long Profet Josef Smit, i bin go raon wetem olgeta we oli biliv raon long wol. Mi bin witnesem miwan strong tingting blong olgeta we oli bin akseptem tabu toktok blong Hem stat long ol aelan blong solwota i go long bigfala ples blong Rasia.
Sam long ol bubu blong yumi, oli bin ol fas Sent we oli bin kam tugeta i go long Saeon. Wan woman, Hana Las Konabi, i bin stap long Spanis Fok, long Yuta. Long ol hadtaem ia, samtaem Krismes oli makem nomo wetem wan aranis, o wan pleplei we oli kavem, o ating wan doli we oli mekem wetem pisis kaliko—be i no olsem oltaem. Hana i raetem long 25 Disemba 1856:
“Dei bifo Krismes i bin kam, mo ol naes pikinini blong mi, wetem fet blong pikinini, oli hangem stoking blong olgeta, mo stap askem olgetawan sapos bae oli fulap. Wetem hat we i soa, we mi haedem long olgeta, mi talem se bae oli no fogetem olgeta; mo oli slip wetem glad blong wet kasem moning.
“Mi no gat wan suga nating i stap, mi no save wanem blong mekem. Be, oli no mas harem nogud. Afta, mi tingbaot sam pamken long haos; mi boelem mo afta, mi sevem wota blong hem, we afta i boel sloslo blong sam aoa, i mekem wan swit jus. Wetem hemia, mo smol spaes, mi mekem wan jinja bred, we mi katem long ol defdefren sep, mo bekem long wan fraepan, (from mi no gat stof), mo fulumap stoking blong olgeta mo hemia i mekem olgeta oli glad tumas.”10
Long medel blong ol laen blong stori ia, i gat wan stori blong wan mama we i wok tru long naet we i no gat wan stof blong mekem wok blong hem i isi. Yet, hem i putum tingting blong hem blong tekem glad long ol pikinini blong hem, blong mekem fet i kam strong moa, mo talem bakegen long hom, ‘!Hapi dei, evri samting i gud!”11 ?Hemia i no mesej blong Krismes ia?
Presiden Monson i tijim: “Ol janis blong yumi givim yumiwan oli no gat limit, be oli save lus tu. I gat ol hat blong mekem i glad. I gat ol naes toktok blong talem. I gat ol presen blong givim.”12
Long enitaem we yumi wok wetem sem tingting blong Lod—blong mekem wok blong Hem, blong leftemap olgeta raon long yumi—yumi stap testifae se Hem i stap laef, mo Hem i lavem yumi, nomata wanem jalenj blong yumi long wol ia.
Wan nara bigfala sol long histri blong Jos, hem i man Skotlan, we i konvet, Jon Mensis MakFalen. Hem i bin joenem Jos wetem wido mama mo brata blong hem, mo olgeta tru oli bin go long Sol Lek long 1852. Hem i gat 18 yia. Ova long ol yia, hem i kam wan man blong sove, wan bilda, mo wan distrik jaj, be miusik nao i mekem man i save hem.
Hem i oganaesem fas kwaea blong hem long Sida Siti, mo i tekem grup blong hem raon long Saot Yuta. Afta wan konset long Sent Joj, Elda Erastus Sno, wan Aposol mo lida blong grup, i leftemap tingting blong hem blong muv i go long komuniti blong Saot Yuta mo tekem famle blong hem wetem hem, wetem miusik blong hem.
Ol taem oli bin had tumas long 1869, mo Elda Sno i bin askem Brata MakFalen blong setemap wan Krismes program we bae i leftemap spirit blong ol pipol. Brata MakFalen i bin wantem wan miusik pis we i niu mo i gud blong taem ia. Nomata hamas hem i traem blong komposem singsing, i no gat wan samting i kam. Hem i bin prea from insperesen mo i bin prea bakegen. Afta, wan naet, hem i wekemap waef blong hem mo talem strong: “!Mi gat ol toktok blong wan singsing, mo mi ting se mi gat miusik tu!” Hem i hariap i go long kibod blong smol piano blong olgeta mo i plei tiun ia, i raetem mo semtaem waef blong hem i holem, long fored blong hem, wan laet we i stap danis, we oli mekem wetem smol kaliko insaed long wan bol blong gris. Ol toktok mo miusik oli kam kam:
Longwe longwe, long graon blong Judia,
Man blong sipsip oli bin harem singsing ia:
!Glori long God,
Glori long God,
Glori long God, hem i hae tumas.
Pis long wol, gud wok blong man.
Pis long wol, gud wok blong man!13
Brata MakFalen i neva go long Judia blong luk se ol flat ples, oli moa olsem ol smol hil blong ston, be mesej blong insperesen blong miusik blong hem i kamaot long sol blong hem olsem wan witnes blong taem Sevya i bon long Betlehem long Judia, wan stat we bae i jenisim wol fogud.14
Mi talem witnes blong mi se Papa blong yumi we I No Save Finis i stap laef. Plan blong Hem blong hapines i blesem bigwan laef blong wanwan pikinini blong Hem long evri jeneresen. Mi save se Pikinini we Hem i Lavem Tumas, Jisas Kraes, bebi we i bon long Betlehem, i Sevya mo Ridima blong wol, mo we dia Presiden Thomas S. Monson i profet blong Hem long wol tedei. Ol toktok blong pres ia oli talem trutok long sora blong mi: “Glori long God, Hem i hae tumas, pis long wol, gud wok blong man.”15
Long nem blong Jisas Kraes, amen.