Tru Glad blong Krismes
I Kam long Presiden Thomas S. Monson
Ol brata mo sista we mi lavem. Hem i wan glad long mi blong stap wetem yufala long aftenun ia taem yumi stap selebretem, tru long toktok mo singsing, taem ia we Sevya mo Ridima blong yumi i bon—we Hem i Jisas Kraes, Lod.
Krismes i wan gudfala taem blong yia. Hem i wan bisi taem tu long plante long yumi. Mi hop mo mi prea se bae yumi no fasfas long ol presa blong taem ia, mekem se yumi mestem mo tingting bigwan long ol rong samting, mo mestem ol simpol glad blong stap tingbaot nomo taem ia we Tabu Wan blong Betlehem i bon.
Blong faenem tru glad blong Krismes, i no kam taem yumi hariap mo ronron olbaot blong mekem moa samting. Yumi faenem tru glad blong Krismes taem yumi mekem Sevya i stap long medel blong taem ia.
Hem i bon long wan haos blong animol; Hem i slip long bokis blong kakae blong animol. Hem i aot long heven i kamdaon blong laef long wol ia olsem wan man we i save ded, mo blong setemap kingdom blong God. Bigfala gospel blong Hem i jenisim wei we wol i tingting. Hem i bin laef from yumi, mo Hem i bin ded from yumi. ?Wanem nao bae yumi givimbak long Hem?
Mi laekem tumas ol toktok we Inglis Poet Kristina Roseti i raetem:
?Wanem bae mi givim long Hem?
Mi we mi pua tumas.
Sapos mi man blong lukaot long sipsip
Bae mi givim wan smol sipsip.
Sapos mi wan Waes Man
Bae mi givim pat blong mi
?Be yet, bae mi givim wanem long Hem?
Bae mi givim hat blong mi.1
Selebresen blong Krismes, i mas soemaot lav mo fasin we yumi no selfis we Sevya i bin tijim. Blong givim samting, i no blong kasem samting; hemia i mekem spirit blong Krismes i saen gud. Yumi filim blong stap moa kaen long narafala man. Yumi go aot wetem lav blong helpem olgeta we oli no gat tumas samting. Hat i kam sofsof. Yumi fogivim enemi; yumi tingbaot ol fren; mo yumi obei long God. Spirit blong Krismes i saenem pikja blong windo blong sol, mo yumi lukluk i go long bisi laef blong wol, mo yumi gat moa intres long ol pipol be i no long ol samting. Blong kasem stret mining blong spirit blong Krismes, yumi nidim nomo blong jenisim smol las toktok ia, mo i kam Spirit blong Kraes.
Presiden Deved O. MaKei i talem: “Tru hapines i kam nomo taem yumi mekem ol narafala man oli hapi—taem yumi putum long aksen doktrin blong Sevya blong lusum laef blong save winim laef ia bakegen. Long sot toktok, spirit blong Krismes, mo spirit blong Kraes, we i mekem hat blong yumi i saen gud taem yumi serem lav mo frensip, mo i pusum yumi blong mekem ol gudfala wok blong givim seves.
“Hem i spirit blong gospel blong Jisas Kraes, we taem yumi obei long hem, bae i tekem ‘pis i kam long wol,’ from se hem i minim —gud wok i go long evri man.” 2
Bae yumi givim semmak olsem we Sevya i bin givim. Blong givim yuwan, i wan tabu presen. Yumi givim yumi blong tingbaot evri samting we Sevya i bin givim. Bae yumi givim tu ol presen we praes blong hem i no save finis, wetem ol presen blong yumi we bae oli brok mo bae yumi fogetem. Bae wol bae i kam gud tumas sapos yumi evriwan i givim ol presen blong gud tingting, mo lav mo sore, blong seves mo frensip, blong fasin we i kaen mo i kea.
Taem we Krismes taem i kavremap yumi wetem ful glori blong hem, bae yumi, semmak olsem we ol Waes Man oli bin mekem, bae yumi lukaotem wan spesel sta we i saen gud, blong lidim yumi long selebresen blong yumi blong taem ia we Sevya i bon. Bae yumi evriwan i tekem rod ia i go long Betlehem, long spirit, mo tekem wetem yumi, wan hat we i sopsop, we i kea blong givim olsem presen i go long Sevya.
Ol brata mo sista blong mi. Bae wanwan long yufala mo yufala evriwan i gat wan Krismes we i fulap long glad. Hemia i hop blong mi, mo prea blong mi, long tabu nem blong Sevya, Jisas Kraes, amen.