ພຣະເຢຊູຄຣິດ—ອົງສັນຕິລາດຂອງເຮົາ

ໂດຍ ແອວເດີ ຣະໂຊ ເອັມ ນຽວສັນ

ແຫ່ງສະພາອັກຄະສາວົກສິບສອງ

ຮູບພາບ

ອ້າຍເອື້ອຍນ້ອງທີ່ຮັກແພງ, ມັນເປັນປະສົບການທີ່ໜ້າອັດສະຈັນໃຈແທ້ໆ. ເພງກໍມ່ວນອອນຊອນ ແລະ ຂ່າວສານກໍສະທ້ານຈິດໃຈ. ວິນຍານຂອງບຸນຄຣິດສະມັດແມ່ນຊາບຊຶ້ງຕໍ່ຈິດວິນຍານຂອງເຮົາແທ້ໆ!

ຄວາມຊົງຈຳກ່ຽວກັບຄຣິດສະມັດໄດ້ເຮັດໃຫ້ເຮົາຫວນຄິດຄືນຫາຄອບຄົວ, ຂອງຂວັນ, ແລະ ການຮັບໃຊ້ຄົນອື່ນ. ມັນເປັນຜົນຈາກເຫດຜົນທີ່ແທ້ຈິງສຳລັບຄຣິດສະມັດ, ຊຶ່ງເປັນຂອງປະທານອັນຍິ່ງໃຫຍ່ຈາກພຣະບິດາເທິງສະຫວັນຂອງເຮົາ. “ເພາະວ່າພຣະເຈົ້າຮັກໂລກຈົນໄດ້ປະທານພຣະບຸດອົງດຽວຂອງພຣະອົງເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ.”¹

ການຕັ້ງໃຈໃສ່ທີ່ພຣະຜູ້ເປັນເຈົ້າ ແລະ ຊີວິດນິລັນດອນ ສາມາດຊ່ອຍເຫລືອເຮົາຜ່ານຜ່າການທ້າທາຍບໍ່ພຽງແຕ່ໃນຊ່ວງບຸນຄຣິດສະມັດນີ້ເທົ່ານັ້ນ, ແຕ່ຕະຫລອດຊ່ວງມະຕະນີ້. ຜູ້ຄົນທີ່ບົກພ່ອງໄດ້ແບ່ງປັນແຜ່ນດິນໂລກໃຫ້ກັບຄົນອື່ນໆທີ່ບົກພ່ອງ. ໂລກຂອງເຮົາເປັນໂລກທີ່ເສື່ອມໂຊມ ດ້ວຍໜີ້ສິນ, ສົງຄາມ, ໄພທຳມະຊາດ, ໂລກພະຍາດ, ແລະ ຄວາມຕາຍ.

ການທ້າທາຍສ່ວນຕົວຈະມາເຖິງ. ຜູ້ເປັນພໍ່ອາດຕົກງານ. ແມ່ຄົນໜຸ່ມອາດເກີດພະຍາດຮ້າຍແຮງ. ລູກຊາຍ ຫລື ລູກສາວ ອາດເດີນອອກນອກທາງ. ບໍ່ວ່າອັນໃດກໍຕາມທີ່ເຮັດໃຫ້ກຸ້ມໃຈ, ເຮົາແຕ່ລະຄົນຈະຊອກຫາຄວາມສະຫງົບໃນຈິດໃຈ.

ຂ່າວສານຂອງຂ້າພະເຈົ້າໃນຄ່ຳຄືນນີ້ ແມ່ນກ່ຽວກັບແຫລ່ງທີ່ໃຫ້ຄວາມສະຫງົບອັນຍືນຍົງ ແລະ ແທ້ຈິງ, ນັ້ນຄືພຣະເຢຊູຄຣິດ—ອົງສັນຕິລາດຂອງເຮົາ.² ເປັນຕຳແໜ່ງຂອງພຣະອົງ ທີ່ນອກເໜືອໄປຈາກຕຳແໜ່ງອື່ນໆທີ່ພຣະອົງໄດ້ຖືກແຕ່ງຕັ້ງໄວ້ແລ້ວ.

ພຣະອົງໄດ້ຖືກພຣະບິດາຂອງພຣະອົງເຈີມໄວ້ ເພື່ອໃຫ້ເປັນພຣະຜູ້ຊ່ອຍໃຫ້ລອດຂອງໂລກ. ສອງຕຳແໜ່ງນີ້ ຄື ພຣະເມຊີອາ ແລະ ພຣະຄຣິດ ບອກເຖິງໜ້າທີ່ຮັບຜິດຊອບຂອງພຣະອົງໃນຖານະເປັນຜູ້ທີ່ ຖືກເຈີມ ໄວ້.³

ພາຍໃຕ້ການຊີ້ນຳຂອງພຣະບິດາຂອງພຣະອົງ, ພຣະເຢຊູໄດ້ເປັນພຣະຜູ້ສ້າງໂລກນີ້ ແລະ ໂລກອື່ນໆ.⁴ ພຣະເຢຊູເປັນຜູ້ວິງວອນແທນເຮົານຳພຣະບິດາ.⁵ ພຣະເຢຊູຄືເອມານູເອນທີ່ຖືກສັນຍາໄວ້,⁶ ເປັນພຣະເຢໂຮວາທີ່ຍິ່ງໃຫຍ່ຂອງສະໄໝພັນທະສັນຍາເດີມ.⁷

ພຣະອົງໄດ້ຖືກພຣະບິດາຂອງພຣະອົງສົ່ງມາ ເພື່ອບັນລຸການຊົດໃຊ້, ຊຶ່ງເປັນ ການກະທຳທີ່ສຳຄັນທີ່ສຸດໃນປະຫວັດສາດຂອງມວນມະນຸດ. ເພາະການຊົດໃຊ້ຂອງພຣະອົງ, ຄວາມອະມະຕະຈຶ່ງເກີດເປັນຈິງສຳລັບທຸກຄົນ, ແລະ ຊີວິດນິລັນດອນຈຶ່ງເປັນໄປໄດ້ສຳລັບຜູ້ທີ່ເລືອກຕິດຕາມພຣະອົງ.⁸ ຈຸດປະສົງເຫລົ່ານີ້ເປັນວຽກງານ ແລະ ລັດສະໝີພາບຂອງພຣະເຈົ້າຜູ້ຊົງລິດອຳນາດຍິ່ງໃຫຍ່.⁹

ໃນຖານະທີ່ເປັນແບບຢ່າງທີ່ຍິ່ງໃຫຍ່ຂອງເຮົາ, ພຣະເຢຊູໄດ້ສອນວິທີດຳລົງຊີວິດ, ວິທີຮັກ, ແລະ ວິທີຮຽນຮູ້. ພຣະອົງໄດ້ສອນວິທີອະທິຖານ, ໃຫ້ອະໄພ, ແລະ ອົດທົນຈົນເຖິງທີ່ສຸດ.¹⁰

ພຣະອົງໄດ້ສອນເຮົາໃຫ້ຮູ້ຈັກດູແລຄົນອື່ນຫລາຍກວ່າດູແລຕົນເອງ. ພຣະອົງໄດ້ສອນເຮົາກ່ຽວກັບຄວາມເມດຕາ ແລະ ຄວາມດີ—ສ້າງຄວາມປ່ຽນແປງທີ່ແທ້ຈິງໃນຊີວິດຂອງເຮົາຜ່ານອຳນາດຂອງພຣະອົງ. ພຣະອົງໄດ້ສອນເຮົາເຖິງວິທີທີ່ຈະພົບຄວາມສະຫງົບໃນຈິດໃຈ. ໃນມື້ໜຶ່ງ, ເຮົາຈະຢືນຢູ່ຕໍ່ພຣະພັກຂອງພຣະອົງ ຜູ້ພິພາກສາທີ່ທ່ຽງທຳ ແລະ ພຣະອາຈານທີ່ເມດຕາກະລຸນາຂອງເຮົາ.¹¹

ໜ້າທີ່ຮັບຜິດຊອບທີ່ສັກສິດເຫລົ່ານີ້ຂອງພຣະຜູ້ເປັນເຈົ້າ ໄດ້ເຮັດໃຫ້ເຮົາສັນລະເສີນພຣະອົງ ໃນຖານະເປັນອົງສັນຕິລາດສ່ວນຕົວ ແລະ ເປັນນິດຂອງເຮົາ. ເຮົາສັນລະເສີນພຣະອົງ ສຳລັບສິດທິພິເສດຂອງເຮົາ ໃນຖານະພໍ່ແມ່, ພໍ່ຕູ້ແມ່ຕູ້, ແລະ ຄູສອນຂອງລູກໆ.

ຊ່ວງເທດສະການບຸນຄຣິດສະມັດ ເປັນເວລາທີ່ມີຄ່າຫລາຍສຳລັບຄອບຄົວ. ເວລາສຳລັບຄອບຄົວເປັນເວລາທີ່ສັກສິດ. ເຮົາສາມາດຊ່ອຍເຫລືອລູກໆຂອງເຮົາ ໃຫ້ຫັນກັບຄືນມາຫາພຣະຜູ້ຊ່ອຍໃຫ້ລອດ. ເພງຄຣິດສະມັດກໍຊ່ອຍເຮົາໄດ້ຄືກັນ. ລູກໆຂອງພວກເຮົາມັກເພງຊື່ວ່າ “I’m Trying to Be like Jesus”¹² ແປວ່າ ເຮົາພະຍາຍາມເປັນເໝືອນດັ່ງພຣະເຢຊູ.

ພຣະເຢຊູໄດ້ກ່າວວ່າ, “ຈົ່ງປ່ອຍໃຫ້ເດັກນ້ອຍມາຫາເຮົາ, ຢ່າຫ້າມພວກເຂົາເພາະອານາຈັກສະຫວັນເປັນເໝືອນເດັກນ້ອຍເຫລົ່ານີ້ແຫລະ.”¹³

ພຣະອົງສາມາດນຳຄວາມສະຫງົບມາສູ່ຄົນທີ່ໄດ້ຮັບເຄາະຮ້າຍຈາກສົງຄາມ. ຄອບຄົວທີ່ຖືກລົບກວນ ເນື່ອງດ້ວຍໜ້າທີ່ຮັບໃຊ້ປະເທດຊາດ, ຊຶ່ງຕິດຢູ່ໃນຄວາມຊົງຈຳຂອງຂ້າພະເຈົ້າຈາກສົງຄາມເກົາຫລີ.

ສົງຄາມໃນສະໄໝຂອງເຮົາ ແມ່ນສັບຊ້ອນຫລາຍກວ່າທີ່ຜ່ານມາ ແຕ່ກໍຍັງກະທົບກະເທືອນຕໍ່ຄອບຄົວຫລາຍທີ່ສຸດ. ຜູ້ທີ່ມີຄວາມທຸກໂສກສາມາດຫັນຫາພຣະຜູ້ເປັນເຈົ້າໄດ້. ຂ່າວສານທີ່ປອບໂຍນຂອງພຣະອົງ ແມ່ນຂ່າວສານແຫ່ງຄວາມສະຫງົບ ແລະ ສັນຕິສຸກແກ່ມະນຸດທັງປວງ.¹⁴

ຄວາມສະຫງົບສາມາດມາເຖິງຜູ້ທີ່ບໍ່ສະບາຍ. ຜູ້ທີ່ໄດ້ຮັບບາດເຈັບ, ຜູ້ທີ່ເຈັບປວດທາງວິນຍານ ເພາະຄິດຮອດຄິດເຖິງຄົນທີ່ເຂົາເຈົ້າຮັກ ຫລື ຜູ້ທີ່ເປັນທຸກທາງດ້ານຈິດໃຈ. ອ້າຍເອື້ອຍນ້ອງທັງຫລາຍ, ຄວາມສະຫງົບສາມາດມາສູ່ຈິດວິນຍານຂອງທ່ານໄດ້ ເມື່ອທ່ານສ້າງສັດທາຂອງທ່ານໃນອົງສັນຕິລາດ.

“ມີຜູ້ໃດເຈັບປ່ວຍຢູ່ໃນບັນດາພວກເຈົ້າບໍ່? ຈົ່ງນຳເອົາພວກເຂົາມານີ້. ມີຜູ້ໃດທີ່ເປັນລ່ອຍ, ຫລື ຕາບອດ, ຫລື ຂາເສຍ, ຫລື ພິການ, … ຫລື ມີທຸກອັນໃດບໍ່? ຈົ່ງນຳເອົາພວກເຂົາມານີ້ ແລະ ເຮົາຈະປິ່ນປົວພວກເຂົາ.”¹⁵

“ເຮົາເຫັນວ່າເຈົ້າມີສັດທາພຽງພໍທີ່ຈະໃຫ້ເຮົາປິ່ນປົວເຈົ້າ.”¹⁶

ຄວາມສະຫງົບສາມາດມາສູ່ຜູ້ທີ່ທຸກທໍລະມານກັບຄວາມໂສກເສົ້າ. ບໍ່ວ່າຄວາມໂສກເສົ້ານັ້ນມາຈາກຄວາມຜິດພາດ ຫລື ການບາບກໍຕາມ, ສິ່ງທີ່ພຣະຜູ້ເປັນເຈົ້າຮຽກຮ້ອງແທ້ໆແມ່ນການກັບໃຈທີ່ແທ້ຈິງ. ພຣະຄຳພີໄດ້ຊຸກຍູ້ເຮົາໃຫ້ “ຫລີກໜີ [ຈາກ] ລາຄະຕັນຫາຂອງຄົນໜຸ່ມ; … [ແລະ] ຮ້ອງອອກພຣະນາມຂອງພຣະຜູ້ເປັນເຈົ້າດ້ວຍໃຈບໍລິສຸດ.”¹⁷ ແລ້ວ “ຫວ້ານຢາໃນກີເລອາດ” ຂອງພຣະອົງຈະປິ່ນປົວແມ່ນແຕ່ຈິດວິນຍານທີ່ເປັນບາບ.¹⁸

ໃຫ້ຄິດກ່ຽວກັບການປ່ຽນແປງຂອງທ່ານຈອນ ນິວຕັນ, ເກີດຢູ່ກຸງລອນດອນ ໃນປີ 1725. ລາວໄດ້ກັບໃຈຈາກຊີວິດທີ່ເປັນບາບຂອງລາວ ໂດຍທີ່ເຄີຍເປັນຄົນຂາຍພວກຂ້າທາດ ແລ້ວໄດ້ກາຍເປັນຄຸນພໍ່. ດ້ວຍການປ່ຽນແປງອັນຍິ່ງໃຫຍ່ໃນໃຈນັ້ນ, ທ່ານຈອນຈຶ່ງໄດ້ແຕ່ງເພງໜຶ່ງ ຊື່ວ່າ “Amazing Grace.”

ພຣະຄຸນ​ອັນ​ເລີດ​ລ້ຳ! ຊ່າງ​ແສນ​ຫວານ
ທີ່​ຊ່ອຍ​ກູ້​ຄົນ​ເຊັ່ນຜູ້ຂ້າ.
ຄັ້ງໜຶ່ງ​ຂ້າ​ເຄີຍ​ຫລົງ​ໄປ, ​ແຕ່​ບັດ​ນີ້​ຖືກ​ພົບ​ເຫັນ,
ເຄີຍ​ຕາບອດ, ​ແຕ່​ບັດ​ນີ້​ຫລຽວ​ເຫັນ.19

“ສະຫວັນຈະມີຄວາມຊົມຊື່ນຍິນດີຫລາຍທີ່ຄົນບາບຜູ້ໜຶ່ງຖິ້ມໃຈເກົ່າເອົາໃຈໃໝ່.”²⁰

ຄວາມສະຫງົບສາມາດມາເຖິງຄົນແບກຫາບພາລະໜັກໜ່ວງ:

“ບັນດາຜູ້ຄົນທີ່ເຮັດການໜັກໜ່ວງ ແລະ ແບກພາລະໜັກຈົ່ງມາຫາເຮົາ ແລະ ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.

“ຈົ່ງເອົາແອກຂອງເຮົາແບກໄວ້ແລ້ວຮຽນຮູ້ຈາກເຮົາ ແພາະວ່າເຮົາເປັນຜູ້ໃຈອ່ອນສຸພາບ ແລະ ຖ່ອມລົງ: ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.

“ດ້ວຍວ່າ ແອກຂອງເຮົາກໍພໍເໝາະ ແລະ ພາລະຂອງເຮົາກໍເບົາ.”²¹

ຄວາມສະຫງົບສາມາດມາສູ່ຄົນທີ່ໂສກເສົ້າ. ພຣະຜູ້ເປັນເຈົ້າໄດ້ກ່າວວ່າ, “ຜູ້ໃດໂສກເສົ້າກໍເປັນສຸກເພາະວ່າຜູ້ນັ້ນຈະໄດ້ຮັບການເລົ້າໂລມ.”²² ເມື່ອເຮົາມີຄວາມໂສກເສົ້າກັບການຕາຍຂອງຄົນທີ່ເຮົາຮັກ, ເຮົາສາມາດພົບຄວາມສະຫງົບຂອງພຣະຜູ້ເປັນເຈົ້າໄດ້ ຜ່ານອິດທິພົນຂອງພຣະວິນຍານ.

ຄົນທີ່ຕາຍໃນພຣະເຢຊູຄຣິດ ຈະບໍ່ໄດ້ຊີມລົດຊາດຂອງຄວາມຕາຍ, ເພາະມັນຈະຫວານຊື່ນສຳລັບເຂົາ.²³

“ເຮົາມອບສັນຕິສຸກໄວ້ກັບພວກເຈົ້າເປັນສັນຕິສຸກຂອງເຮົາທີ່ເຮົາມອບໃຫ້ພວກເຈົ້າ, ສັນຕິສຸກທີ່ເຮົາໃຫ້ບໍ່ຄືສັນຕິສຸກທີ່ໂລກໃຫ້, ຢ່າວຸ້ນວາຍເປັນທຸກໃຈ ແລະ ຢ່າສູ່ຢ້ານ.”²⁴

“ເຮົານີ້ແຫລະເປັນເຫດໃຫ້ຄົນທັງປວງເປັນຄືນມາ ທັງເປັນຊີວິດ ຜູ້ທີ່ວາງໃຈເຊື່ອໃນເຮົາເຖິງແມ່ນວ່າຕາຍໄປແລ້ວກໍຍັງມີຊີວິດຢູ່:

“ຜູ້ໃດທີ່ຍັງມີຊີວິດຢູ່ ແລະ ເຊື່ອເຮົາ ຈະບໍ່ຕາຍຈັກເທື່ອ.”²⁵

ຄວາມສະຫງົບສາມາດມາສູ່ທຸກຄົນ ຜູ້ສະແຫວງຫາອົງສັນຕິລາດຢ່າງພາກພຽນ. ຄວາມສະຫງົບຂອງພຣະອົງເປັນຂ່າວສານອັນຫວານຊື່ນ ແລະ ຊ່ອຍໃຫ້ລອດ ຊຶ່ງຜູ້ສອນສາດສະໜາຂອງເຮົາ ໄດ້ນຳໄປໃຫ້ຜູ້ຄົນທົ່ວໂລກ. ເຂົາເຈົ້າສັ່ງສອນພຣະກິດຕິຄຸນຂອງພຣະເຢຊູຄຣິດ ທີ່ໄດ້ຖືກຟື້ນຟູຄືນມາໃໝ່ຜ່ານສາດສະດາໂຈເຊັບ ສະມິດ.²⁶ ຜູ້ສອນສາດສະໜາສອນຖ້ອຍຄຳທີ່ປ່ຽນແປງຊີວິດຂອງພຣະຜູ້ເປັນເຈົ້າ ດັ່ງນີ້: “ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງພຣະບັນຍັດຂອງເຮົາ.”²⁷

ຄວາມສະຫງົບສາມາດມາສູ່ທຸກຄົນທີ່ເລືອກເດີນຕາມເສັ້ນທາງຂອງພຣະອາຈານ. ຄຳເຊື້ອເຊີນຂອງພຣະອົງແມ່ນກ່າວອອກມາໃນສີ່ຄຳທີ່ອ່ອນຫວານນີ້ວ່າ: “ຈົ່ງຕາມເຮົາມາ.”²⁸

ເຮົາຮ້ອງເພງສັນລະເສີນອົງສັນຕິລາດ,²⁹ ເພາະວ່າພຣະອົງຈະສະເດັດມາອີກ. ແລ້ວ “ລັດສະໝີພາບຂອງພຣະຜູ້ເປັນເຈົ້າຈະມາປະກົດ, ແລະ ທຸກປະຊາຊາດກໍຈະໄດ້ເຫັນນຳກັນ.”³⁰ ໂດຍທີ່ເປັນພຣະເມຊີອາຂອງຊ່ວງໄລຍະພັນປີ, ພຣະອົງຈະປົກຄອງເປັນຈອມກະສັດ ແລະ ຈອມເຈົ້ານາຍ.³¹

ເມື່ອເຮົາຕິດຕາມພຣະເຢຊູຄຣິດ, ພຣະອົງຈະນຳພາເຮົາໄປຢູ່ກັບພຣະອົງ ແລະ ພຣະບິດາເທິງສະຫວັນຂອງເຮົາ, ຢູ່ກັບຄອບຄົວຂອງເຮົາ. ຜ່ານການທ້າທາຍຫລາຍຢ່າງຢູ່ໃນຊ່ວງມະຕະນີ້, ຖ້າຫາກເຮົາຍັງຊື່ສັດຕໍ່ພັນທະສັນຍາທີ່ເຮົາໄດ້ເຮັດ, ຖ້າຫາກເຮົາອົດທົນຈົນເຖິງທີ່ສຸດ, ແລ້ວເຮົາຈະເໝາະສົມກັບຂອງປະທານອັນຍິ່ງໃຫຍ່ນັ້ນຂອງພຣະເຈົ້າ, ຄືຊີວິດນິລັນດອນ.³² ຢູ່ໃນທີ່ປະທັບອັນສັກສິດຂອງພຣະອົງ, ຄອບຄົວຂອງເຮົາສາມາດຢູ່ນຳກັນຕະຫລອດການ.

ຂໍໃຫ້ພຣະເຈົ້າຈົ່ງອວຍພອນທ່ານ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ ຂໍໃຫ້ເຮົາແຕ່ລະຄົນຈົ່ງມີຄວາມສຸກສັນໃນວັນຄຣິດສະມັດ! ແລະ ຂໍໃຫ້ທ່ານຈົ່ງຊື່ນຊົມຕະຫລອດການກັບພອນທັງໝົດຂອງພຣະເຈົ້າ—ອົງສັນຕິລາດ—ຂ້າພະເຈົ້າອະທິຖານໃນພຣະນາມຂອງພຣະເຢຊູຄຣິດ, ອາແມນ.