ຄວາມສຸກທີ່ແທ້ຈິງຂອງບຸນຄຣິດສະມັດ
ໂດຍ ປະທານທອມມັສ ແອັສ ມອນສັນ
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າມີຄວາມສຸກຫລາຍທີ່ໄດ້ມາຮ່ວມກັບທ່ານໃນຄ່ຳຄືນນີ້ ໃນຂະນະທີ່ເຮົາສະເຫລີມສະຫລອງການກຳເນີດຂອງພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່—ແມ່ນແຕ່ພຣະເຢຊູຄຣິດ, ພຣະຜູ້ເປັນເຈົ້າຂອງເຮົາ, ຜ່ານຄຳດົນໃຈ ແລະ ສຽງເພງ.
ບຸນຄຣິດສະມັດເປັນເທດສະການທີ່ຮຸ່ງເຫລື້ອມປະຈຳປີ. ມັນຍັງເປັນເວລາທີ່ຫຍຸ້ງຫລາຍສຳລັບຫລາຍຕໍ່ຫລາຍຄົນ. ຂ້າພະເຈົ້າຫວັງວ່າ ເຮົາຈະບໍ່ຫຍຸ້ງຍາກຫລາຍກັບຄວາມກົດດັນຂອງເທດສະການນີ້ ຈົນເຮັດໃຫ້ເຮົາເນັ້ນໜັກໃສ່ສິ່ງທີ່ບໍ່ຖືກຕ້ອງ ແລະ ລືມຄວາມສຸກທີ່ງ່າຍດາຍຂອງການສະເຫລີມສະຫລອງການກຳເນີດຂອງອົງບໍລິສຸດແຫ່ງເບັດເລເຮັມ.
ການຊອກຫາຄວາມສຸກທີ່ແທ້ຈິງຂອງບຸນຄຣິດສະມັດ ບໍ່ໄດ້ມາເຖິງເພາະການຟ້າວເຮັດໃຫ້ແລ້ວໄວ ແລະ ເຮັດໃຫ້ແລ້ວຫລາຍຢ່າງ. ເຮົາພົບຄວາມສຸກທີ່ແທ້ຈິງຂອງບຸນຄຣິດສະມັດ ເມື່ອເຮົາເຮັດໃຫ້ພຣະຜູ້ຊ່ອຍໃຫ້ລອດເປັນຈຸດສຳຄັນຂອງເທດສະການນີ້.
ໂດຍທີ່ໄດ້ກຳເນີດຢູ່ໃນຄອກສັດ, ຖືກວາງໄວ້ຢູ່ໃນຮາງຫຍ້າ, ພຣະອົງໄດ້ມາຈາກສະຫວັນເພື່ອມາສູ່ໂລກ ເປັນມະນຸດມະຕະ ແລະ ເພື່ອຈັດຕັ້ງອານາຈັກຂອງພຣະເຈົ້າ. ພຣະກິດຕິຄຸນອັນຮຸ້ງເຫລື້ອມຂອງພຣະອົງ ໄດ້ປ່ຽນແນວຄິດຂອງໂລກ. ພຣະອົງໄດ້ມີຊີວິດຢູ່ເພື່ອເຮົາ, ແລະ ພຣະອົງໄດ້ສິ້ນພຣະຊົນເພື່ອເຮົາ. ເຮົາຄວນເຮັດສິ່ງໃດເພື່ອຕອບແທນພຣະອົງ?
ຂ້າພະເຈົ້າມັກຖ້ອຍຄຳໃນບົດກະວີຂອງຊາວອັງກິດຄົນໜຶ່ງຊື່ ຄຣິສຕີນາ ໂຣແຊທີ ທີ່ວ່າ:
ຜູ້ຂ້າຈະຖະຫວາຍສິ່ງໃດແກ່ພຣະອົງ,
ຍາກຈົນເຊັ່ນຜູ້ຂ້າ?
ຖ້າຜູ້ຂ້າເປັນຄົນລ້ຽງແກະ
ຜູ້ຂ້າຈະນຳລູກແກະມາຖະຫວາຍ
ຖ້າຜູ້ຂ້າເປັນໂຫລາຈານ
ຜູ້ຂ້າຈະຖະຫວາຍເງິນຄຳກຳຍານ
ຜູ້ຂ້າຈະຖະຫວາຍສິ່ງໃດ?
ມີແຕ່ຫົວໃຈເທົ່ານັ້ນ.1
ການສະເຫລີມສະຫລອງບຸນຄຣິດສະມັດຂອງເຮົາ ຄວນເປັນການສະທ້ອນເຖິງຄວາມຮັກ ແລະ ຄວາມບໍ່ເຫັນແກ່ຕົວຂອງພຣະຜູ້ຊ່ອຍໃຫ້ລອດ. ການມອບໃຫ້, ບໍ່ແມ່ນແຕ່ການໄດ້ຮັບ, ຈະນຳຄວາມສຸກອັນລົ້ນເຫລືອມາໃຫ້. ເຮົາຈະມີເມດຕາຈິດຕໍ່ກັນຫລາຍກວ່າເກົ່າ. ເຮົາຈະເອື້ອມອອກໄປຊ່ອຍເຫລືອຄົນທີ່ອາພັບ. ຫົວໃຈຂອງເຮົາຈະອ່ອນໂຍນ. ເຮົາຈະໃຫ້ອະໄພສັດຕູ, ຈະຈື່ຈຳໝູ່ເພື່ອນ, ແລະ ຈະເຊື່ອຟັງພຣະເຈົ້າ. ພຣະວິນຍານຂອງຄຣິດສະມັດເຮັດໃຫ້ທ່ານຫລຽວເຫັນໂລກໃນຮູບແບບໃໝ່, ແລະ ເຮົາຈະເບິ່ງຊີວິດອັນຫຍຸ້ງຍາກຂອງໂລກ ແລະ ເລີ່ມສົນໃຈກັບຜູ້ຄົນຫລາຍກວ່າສິ່ງຂອງ. ໃນການເຂົ້າໃຈຄວາມໝາຍທີ່ແທ້ຈິງຂອງວິນຍານຂອງຄຣິດສະມັດ, ເຮົາພຽງແຕ່ຕ້ອງເອົາຄຳວ່າ ສະມັດ ອອກໄປ, ແລ້ວມັນຈະກາຍເປັນວິນຍານຂອງພຣະຄຣິດ.
ປະທານເດວິດ ໂອ ມິກເຄ ໄດ້ກ່າວວ່າ: “ຄວາມສຸກທີ່ແທ້ຈິງມາເຖິງ ເພາະການເຮັດໃຫ້ຄົນອື່ນມີຄວາມສຸກເທົ່ານັ້ນ—ນັ້ນຄືການໃຊ້ຄຳສອນຂອງພຣະຜູ້ຊ່ອຍໃຫ້ລອດຢ່າງຖືກຕ້ອງທີ່ວ່າ ຕ້ອງເສຍຊີວິດຂອງຕົນເພື່ອຈະພົບຊີວິດນັ້ນ. ສະຫລຸບແລ້ວ, ວິນຍານຂອງຄຣິດສະມັດ ແມ່ນພຣະວິນຍານຂອງພຣະຄຣິດ, ທີ່ເຮັດໃຫ້ຫົວໃຈຂອງເຮົາເຕັມໄປດ້ວຍຄວາມຮັກສັນອ້າຍເອື້ອຍນ້ອງ ແລະ ເພື່ອນຝູງ ແລະ ກະຕຸ້ນເຮົາໃຫ້ເຮັດຄວາມດີແຫ່ງການຮັບໃຊ້.
“ມັນແມ່ນວິນຍານແຫ່ງພຣະກິດຕິຄຸນຂອງພຣະເຢຊູຄຣິດ, ການເຊື່ອຟັງຕໍ່ສິ່ງທີ່ຈະນຳ ‘ຄວາມສະຫງົບມາສູ່ໂລກ,’ ເພາະມັນໝາຍຄວາມວ່າ—ສັນຕິສຸກແກ່ມະນຸດທັງປວງ.”2
ຂໍໃຫ້ເຮົາຈົ່ງມອບໃຫ້ດັ່ງທີ່ພຣະຜູ້ຊ່ອຍໃຫ້ລອດໄດ້ປະທານໃຫ້. ການມອບຕົນເອງໃຫ້ ເປັນຂອງປະທານທີ່ສັກສິດ. ເຮົາມອບໃຫ້ເປັນສິ່ງລະນຶກເຖິງທຸກສິ່ງທີ່ພຣະຜູ້ຊ່ອຍໃຫ້ລອດໄດ້ປະທານໃຫ້. ຂໍໃຫ້ເຮົາຈົ່ງມອບຂອງຂວັນທີ່ມີຄຸນຄ່ານິລັນດອນ, ພ້ອມກັບຂອງຂວັນທີ່ໃນທີ່ສຸດຈະແຕກຫັກ ຫລື ຫລົງລືມໄປ. ໂລກນີ້ຈະດີຂຶ້ນຫລາຍພຽງໃດ ຖ້າຫາກເຮົາທຸກຄົນມອບຂອງຂວັນແຫ່ງຄວາມເຂົ້າໃຈ ແລະ ຄວາມເຫັນອົກເຫັນໃຈ, ການຮັບໃຊ້ ແລະ ຄວາມເປັນເພື່ອນ, ມີເມດຕາ ແລະ ຄວາມອ່ອນຫວານ.
ໃນຂະນະທີ່ເທດສະການຄຣິດສະມັດອ້ອມຮອບເຮົາດ້ວຍຄວາມຮຸ່ງເຫລື້ອມທັງໝົດຂອງມັນ, ຂໍໃຫ້ເຮົາຈົ່ງເຮັດເຊັ່ນດຽວກັບພວກໂຫລາຈານ ທີ່ສະແຫວງຫາດາວດວງໃໝ່ທີ່ຮຸ່ງເຫລື້ອມ ເພື່ອນຳພາເຮົາໃນການສະເຫລີມສະຫລອງການກຳເນີດຂອງພຣະຜູ້ຊ່ອຍໃຫ້ລອດ. ຂໍໃຫ້ເຮົາຈົ່ງເດີນທາງໄປເບັດເລເຮັມໃນວິນຍານ, ນຳຫົວໃຈອັນອ່ອນໂຍນຂອງເຮົາໄປເປັນເຄື່ອງຖະຫວາຍແກ່ພຣະຜູ້ຊ່ອຍໃຫ້ລອດ.
ອ້າຍເອື້ອຍນ້ອງຂອງຂ້າພະເຈົ້າ, ຂໍໃຫ້ເຮົາທຸກຄົນຈົ່ງເຕັມໄປດ້ວຍຄວາມສຸກຂອງບຸນຄຣິດສະມັດ. ນີ້ຄືຄວາມຫວັງ ແລະ ຄຳອະທິຖານຂອງຂ້າພະເຈົ້າ, ໃນພຣະນາມອັນສັກສິດຂອງພຣະຜູ້ຊ່ອຍໃຫ້ລອດຂອງເຮົາ, ພຣະເຢຊູຄຣິດ, ອາແມນ.