O, Laga Nos Bini Ador’é ---- i e Plan!
Manera hopi di boso, Craig, mi kasa enkantador, i ami realmente ta stima músika sagrado di Pasku. Si nos lo mester a traha un lista di nos faboritonan, serka di e tòp sigur lo tin “Venid, adoremos.” Su letranan “alegre” i “triunfante” ta yama nos pa “bini,” “mira,” i “adorá” nos Salbador, JesuCristu----e “Rei di angelnan.” 1 Mi ta sinti sigur ku, komo spiritunan premortal siñamentu ta parti di e plan di salbashon,nos no a solamente kontemplá i adorá pero a grita di alegria ora E boluntariamente i humildemente a ofresé Su mes komo e Salbador di e mundu. 2 Den sinku di e palabranan di mas profundo ku hamas a wòrdu pronunsiá, E ku mansedumbre a bisa, “Ata mi aki, manda mi.” 3
E Apòstel Pablo a amonestá nos pa ta “semper kla pa duna ... un motibu di e speransa ku ta den [nos].”4 Segun mi kompartí algun rekuerdo personal di Pasku, m ta spera ku boso por mira e motibu di kon mi a spera den e Salbador, den “Dios [nos Tata Eterno, ku] a stima e mundu asina tantu, ku el a duna su úniko Yu,” 5 i den e Tata su plan di felisidat perfekto i glorioso.
Rekuerdo di Pasku Number 1
Tempu mi tabatin 14 aña, nos famia tabata biba na New Zealand. Mi tata tabata un hòmber yòn den su trinta i piko aña ora el a wòrdu yamá pa sirbi komo presidente di mishon.
Pasku a yega, i mi sinku rumannan i ami ainda tabata purba pa adaptá na nos hogar nobo for di kas. Tabata un desafio pa mi----un teenager sin madurá---pa ta leu for di kas, amigunan, i famia. Mi tabata keha tokante, sinti falta di mi bista familiar, sonidonan, i selebrashonnan di Pasku---e músika, e lusnan, palu di Pasku, sneu, i spesialmente famia. Mi a sinti falta di mi primunan stimá, tantanan, i tionan ku mi tabata sa pronto lo reuní na Tawela Kjar (pronunsiá “care”----tata di mi tata) su kas na Salt Lake City pa e fiesta di Pasku anual di famia Kjar.
Tabata Nochebuena na 1966. Mi a reuní ku desgana na mi famia i e mishoneronan pa un nochi de hogar na e kasa mishonal, kombensí ku e reunion lo ta, a lo mehor, un sustitushon pober di e fiesta di famia Kjar pa kua mi tabatin asina tantu nostalgia. Mi no por kòrda presis na kua momentu e telefòn a rin, pero e yamada ei mes ora a kambia mi kurason di teenager,yenando mi ku kompashon pa mi tata stimá i remordimentu pa mi komportashon egoista.
E yamada a bini di mi tio Joe, informando nos ku nos Tawela Kjar stimá, sin egoismo, trahadó duru, wardadó di kombenio a kaba di sufri un atake di kurason i tabata drumiendo inkonsiente den hòspital. Rekuerdonan a pasa lihé den mi mente di e patriarka gustadó di su kámara, musikal, grasioso aki ku nos tur ta stima asina tantu! Tata tabata klaramente konmoví Ora el a bolbe for di e yamada, pero el a tene su mes fuerte, stret su skoudernan, i a duna su testimonio ferviente di e Tata su plan i su fe den e Salbador su ròl vital den dje. Su testimonio a toka mi kurason doloroso.
Tristemente, Tawela no a rekuperá. El a fayesé lihé e dia siguiente. Tabata dia di Pasku na New Zealand pero Nochebuena, Tawela su dia favorito di aña na Salt Lake City. Su fayesimentu tabata mi promé eksperensia di pèrdè un hende asina serka i stima pa mi. Ounke mi a yora su morto, mi tabata bendishoná i konsolá den mi konosementu di e glorioso plan di felisidat. Mi a sinti e siguransa ku lo mi mira Tawela atrobe si mi biba e manera ku e a biba. Mi no ta kere ku na e momentu ei den mi bida, mi a komprondé kompletamente, e parti importante di e Salbador i Su sakrifisio ekspiatorio a hunga den hasi posibel pa un dia mi reuní ku mi sernan kerí. Pero mi tabata sa sufisiente pa regosihá den e plan. Mi tabata sa sufisiente pa adorá E ku su nasementu nos tabata selebrá.
For di e Pasku ei hopi tempu pasá, mi a siña mas di nos Salbador, JesuCristu. Presidente Harold B. Lee a siña: “E Yu di Dios ... tabatin e poder pa traha mundunan, pa dirigí nan. El a bini aki komo e Yu Unigénito pa kumpli ku un mishon, pa ta manera un Lamchi matá promé ku fundashon di e mundu, pa trese salbashon na henter humanidat. Dor di duna Su bida El a habri e porta pa resurekshon i a siña e kaminda pa kua nos por gana bida eterno. ... Esei tabata ken Jesus tabata den tur Su grandesa.” 6
Rekuerdo di Pasku Number 2
Un otro Pasku konmovedor a pasa na 1984, kousando mi gratitut pa e Salbador i e glorioso plan di salbashon pa krese atrobe di manera signifikante. Mi tabatin 32 aña, kasá ku mi esposo stimá i fiel, i mama di kuater mucha kerí, edat di tres pa dies aña. Seis siman promé ku Pasku, nos a haña e notisia di e dòkter ku a sakudí nos bida. Ora el a pronunsiá e diagnóstiko di “kanser.” Graig i ami tabata wak otro sin por kere,nos tur dos bringando e lágrimanan, puntrando kiko futuro lo trese pa nos. E sentimentu siguiente, sinembargo, tabata e pas “dushi ... ku a surpasá tur komprendementu” 7 pa motibu di nos fe den JesuCristu i den e Tata su plan.
Ounke Craig tabata sirbi komo obispu di nos bario e tempu ei, nos a opta pa kompartí e notisia solamente ku nos famia ku e meta pa mantené kos mas normal posibel pa nos yunan. Durante dje seis ei lunanan promé Pasku, mi a biaha kasi tur dia, dor di sneu i eis, pa tratamentu pa pashèntnan ku no mester a keda na hòspital----miéntras mamanan i hermananan sin egoismo tabata tuma turno pa yuda na kas. Tabata un tempu difísil, pero mi ta pensa atrobe na e Pasku ei ku palabranan inadekuá pa deskribí e profundidat di mi gratitut pa e sakrifisio ekspiatorio di nos Salbador, JesuCristu, i e “plan miserikordioso di e---gran Kreador.” 8
Realisando ku kisas mihó ku nunka promé kon frágil bida tabata, e plan di felisidat di nos Tata Selestial bira mas personal ku nunka promé. Pasku tabata diferente e aña ei. Maske kuantu mi ta stima tur kos tokante Pasku, e úniko kosnan ku ta parse di ta importá mi mas tabata mi matrimonio eterno, mi famia, i mi fe den i testimonio di mi Tata Selestial, JesuCristu, i e plan.
Un dia miéntras mi tabata sosegando na kas, pensando tokante futuro di nos kuater yunan chikitu, mi dedenan a pasa dor di e revista Friend ora un parti di músika a kapta mi bista. Mi a sinta na e piano i mi a yora ora mi a kanta i sinti e mensahe di e kantika penetrando den mi kurason suave. Mi tabata sa ku mi mester a siña e kantika aki no na solamente e shen muchanan di Primaria den nos bario, unda mi tabata sirbi komo lider musikal di Primaria, pero mas importante na e kuater muchanan presioso ku tabata biba den nos hogar.
Kon e Tata por a bisa e mundu di amor i dulsura?
El a manda su Yu, un beibi resien nasí, ku pas i santidat.
Kon e Tata por a mustra e mundu, kaminda nos tin ku bai?
El a manda su Yu pa kana ku hende riba tera, pa nos por sa.
Kon e Tata por bisa e mundu di sakrifisio, i morto?
El a manda su Yu pa muri pa nos i resusitá
Kiko e Tata ta pidi di nos? Kiko e skrituranan ta bisa?
Tin fe, tin speransa, manera su Yu, yuda otronan riba nan kaminda.
Kiko e ta pidi ? Biba manera su Yu. 9
E kantika inspirá aki a duna mi un komprendementu chikitu kon mi por mustra mi Tata Selestial mi gratitut pa Su Yu i pa Su plan. Mi a sinti ku hasta ku mi no por a wòrdu pèrmití e privilegio di mira nos yunan krese na madures, si nan por a yega na sa, i komprondé, i biba e doktrina simpel pero profundo kontené den e kantika sagrado aki, nan por bira disípulonan berdadero di JesuCristu.
Tabatin un sentimentu spesial en ambiente di nos hogar e aña ei, bendishonando nos ku pas i amor un pa otro ku lo mi no lubidá nunka. Mi tabata sinti ku manera ku nos yunan tabatin en komprendementu eksepshonal di e sagrado di e Pasku aya. Nunka promé i nunka despues di esei nan a representá e nasementu ku tal reverensia, rèspèt i amor ku ta surpasá nan añanan tierno. Segun nos tabata wòrdu probá krese den nos sirkunstansianan difísil, tabata parse ku nos por a sinti e impreshonnan spiritual mas fuerte ora nos a meditá i duna danki pa e donnan di nos Salbador, JesuCristu, i pa nos Tata Selestial su glorioso plan di salbashon.
Hopi biaha mi a puntra kon hende por biba sin e speransa ku ta bini for di un komprendementu di e plan di salbashon i e ròl sentral di e Salbador su Ekspiashon den e plan aki. Ku gratitut mi ta duna mi testimonio na esun di nos profeta stimá, Presidente Thomas S. Monson, ken ku poder a testifiká: “Di Dje ku a libra kada un di nos for di morto sin fin, hasta JesuCristu, mi ta testifiká ku E ta e maestro di bèrdat----pero e ta mas ku un maestro. E ta e Ehèmpel di e bida perfekto---pero E ta mas ku un ehèmpel. E ta e Gran Dòkter----pero e ta mas ku un dòkter. E ku a reskatá e ‘batayon pèrdí ’ di humanidat ta e Salbador literal di e mundu, e Yu di Dios, e Prínsipe di Pas, Esun Santu di Israel---hasta e Señor resusitá---ku a deklará, ‘Ami ta e promé i e delaster; ami ta e ku ta biba, ami ta ku a wòrdu matá; ami ta boso abogado na e Tata.’ Father’ [D&C 110:4].”10
Ora nos ta pensa riba Su sakrifisio inkomprensibel pa nos, sigur entre e sinku palabranan di mas tristu ku nos Salbador a yega di bisa: “Boso tambe lo ke bai?” 11 Ora tempu ta difísil, nos por skohe pa bira bai for di Dje i lucha dor di aflikshonnan nos so, òf nos por skohe pa bira na Dje i e Tata su plan, hañando ku nos lo sufri kualke tipo di aflikshon ku no a wòrdu vensé pa nos goso den Cristu. 12 Mi orashon pa kada un di nos ta pa aseptá e invitashon di e himno sagrado di Pasku pa “bini, laga nos ador’é” i nos Tata Selestial pa Su plan glorioso i perfekto! Den e nòmber di JesuCristu, amèn.