Li’o Faataamilo i le Afi
Elder Kim B. Clark
O Le Fitugafulu
Faasalalauga Faasatelite mo Seminare ma Inisitituti o Mataupu Faalelotu•4Aokuso, 2015
Uso e ma tuafafine, ou te faafetai mo le avanoa e lauga atu ai ia te outou i lenei faasalalauga i le lalolagi atoa. Ua matua faamanuiaina i tatou i le i ai iinei.
Ou te manao ia outou iloa se mea o o’u lagonaina i lo’u loto, o se alofa tele mo outou lea ou te iloa o se meaalofa mai le Tama Faalelagi ma Lona Alo, le Alii o Iesu Keriso. Ou te iloa e alolofa i La’ua ia te outou, ma ou te iloa e finagalo i La’ua ia ou vaai atu ia te outou i le auala o loo La’ua silasila mai ai ia te outou ma ia alofa atu ia te outou i le ala o loo La’ua alolofa atu ai ia te outou. Ma ua La faamanuiaina ai a’u i lena meaalofa. Ou te tatalo ina ia outou lagona lo La’ua alofa, atoa ai ma lo’u alofa i lenei aso.
Ou te tatalo foi ina ia faatasi mai le Agaga Paia ia i tatou a o tatou mafaufau faatasi i le taunuuga o se savali faigofie. Ua oo patino mai le savali ia te au, ae ou te lagona e tatau ona ou faasoa atu foi le savali ia te outou. O le savali lenei: Po o le a lava le tulaga o le faaleagaga o loo tatou olioli ai i le taimi nei i o tatou olaga; po o le a lava le tikeri o le faatuatua ia Iesu Keriso ua tatou maua nei; po o le a lava le malosi o le tuuto ma le faapaiaina, po o le a lava le tikeri o le usiusitai po o le faamoemoe po o le alofa mama ua ia i tatou; po o le a lava le tulaga o tomai ma taleni faalegaluega ua tatou maua, o le a lē lava lea mo le galuega o loo taoto i luma atu.
Uso e ma tuafafine, e manaomia ona sili atu lo tatou lelei nai lo le taimi nei. Ua aoaoina i tatou e tusitusiga paia o loo vāvāō nei le lalolagi ma o le a vāvāō pea. O le a faateleina le amioleaga ma le agasala. Peitai i lena lalolagi pogisa o le a faateleina ai le amiotonu faalelagi. O loo i ai se galuega maoae a le Alii o Iesu Keriso mo i tatou e fai i le tupulaga faiae. O se galuega sili atu nai lo se isi lava galuega na tatou faia muamua. O loo galue le Alii ma le malosi e faamalosia le aoao atu ma le aoaoina i totonu o Lana Ekalesia moni ma le ola. O loo Ia faanatinatiina Lana galuega, ma o loo Ia sauniaina le lalolagi ma Lona malo faapea i tatou mo Lona toe afio mai.
O se vaega atoa lenei o se mamanu matagofie ua tatou vaaia mai le amataga o le Toefuataiga. I le 1820, na faaali atu ai le Atua le Tama ma Lona Alo, o Iesu Keriso, i le taulealea o Iosefa Samita. Talu mai lava lena aso i le Vao Paia, na atia’e ai e Iesu Keriso Lana Ekalesia ma Lona nuu i lea fuaitau i luga o lea fuaitau, ma lea mataupu i luga o lea mataupu, i lea laasaga ma lea laasaga.
O Lana fetalaiga lenei:
“Aua o le a Ou faatu mai mo a’u se nuu mamā, o e e auauna mai ia te a’u i le amiotonu.”1
“Ina ia mafai ona faaauau o le galuega o le faapotopotoina faatasi o la’u au paia, ina ia mafai ona Ou atiae o i latou i lo’u igoa i luga o nofoaga paia; ona ua oo mai le taimi o le seleselega, ma ua tatau ona faataunuuina o la’u upu.”2
“E ao ina tofotofoina lo’u nuu i mea uma, ina ia latou saunia e maua le mamalu ua ia te A’u mo i latou, o le mamalu lava lea o Siona.”3
O le mamanu lenei a le Alii: O loo Ia faatuina, atiaeina, ma sauniaina Lona nuu ma Lana Ekalesia. Ua manino lava lenei mamanu i o tatou aso i le valaau a Peresitene Thomas S. Monson ia i tatou uma ina ia tutulai ae ma fausia le malo o le Atua. Faalogo i ana valaaulia ia i tatou ina ia faia ni mea se tele atu ma faia ni mea e sili ona lelei i le galuega o le faaolataga. Ou te fia faitau atua ni upusii mai nisi o lauga a Peresitene Monson na saunoa i ai i konafesi aoao talu ona avea ma Peresitene o le Ekalesia.
“Matou te toe tuuina atu foi lena valaaulia faamaoni: Foi mai. Matou te aapa atu ia te outou i le alofa mama o Keriso. … Ia i latou o e o loo manunua faaleagaga po o e o loo tauivi ma fefefe, matou te faapea atu, Faataga matou e siitia outou ma faafiafia outou ma faatoafilemu tou popolega.”4
“Afai o i ai nisi o outou ua paie ma lē mamafa ia te outou ia asiasiga faaleaiga … , ou te faapea atu e leai se isi taimi e pei o le taimi lenei e toe tuuto atu ai oe lava.”5
“O loo i ai vae e faatutu, o lima e uu mai, o mafaufau e faamalosiauina, o loto ia musuia, ma agaga e laveai.”6
“Ua amata nei loa, o alii talavou uma e agavaa ma malolosi, o e ua faauu mai aoga maualuga pe o isi aoga talitutusa faapena, … o le a maua le avanoa e fautuaina atu ai mo le galuega faafaifeautalai e amata i le 18 tausaga, ae le o le 19. …
“… O tamaitai talavou e malolosi, ma agavaa ma ua i ai le manao e auauna atu, e mafai ona fautuaina atu mo le galuega faafaifeautalai e amata i le 19 tausaga, ae le o le 21 tausaga.”7
“[O lo tatou] luitau o le avea lea ma ni faifeautalai faamanuiaina sili i le tovine a le Alii. E faatatau lenei mea ia i tatou uma, po o le a lava le matua, ae le faapito autasi ia i latou o loo sauniuni e auauna atu o ni faifeautalai faamisiona, aua o i tatou uma taitoatasi ua poloaiina e faasoa atu le talalelei a Keriso.”8
“O le taimi lenei mo tagata uma ma faifeautalai e o mai faatasi ai, ia galulue faatasi, ma galueaiina le tovine a le Alii ina ia aumai agaga ia te Ia.”9
“O le moomoo o le a lē taunuu ai. Ua faamoemoeina e le Alii o tatou mafaufauga. Ua Ia faamoemoeina a tatou amioga. … Ua Ia faamoemoeina lo tatou tuuto atu.”10
“Ou te molimau atu ia te outou, e le mafuatiaina o tatou faamanuiaga folafolaina. E ui ina foufou mai afa, e ui ina to mai uaga i o tatou luga. … Ae o le a leai se mea o lenei lalolagi e mafai ona faatoilaloina i tatou.
“Ou uso e ma tuafafine pele, aua tou te fefefe. Ia outou lototetele. E i ai le faamoemoe i le lumanai, pei foi o lo outou faatuatua.”11
Uso e ma tuafafine, o le valaau lenei a le perofeta ia i tatou. I le Ofisa o Aoga a le Ekalesia o lona uiga tatou te manaomia ni auauna faatuatuaina a le Alii ua saunia e galulue i seminare ma inisitituti, i kolisi ma iunivesite a le Ekalesia, ma i aoga a le Ekalesia. O soo se galuega, soo se valaauga, o soo se tagata i le Ofisa o Aoga a le Ekalesia e taua, ma e manaomia i tatou uma, e aofia ai ma a’u, ina ia sili atu ona lelei nai lo le tulaga sa tatou i ai muamua.
Ou te manatu e lua ni mafuaaga:
Mafuaaga muamua 1: E manaomia ona tatou aoaoina le tupulaga faiae ia sili atu ona loloto ma sili atu ona mamana nai lo le mea sa tatou faia pe na faia e soo se tasi muamua.
O le aoaoina loloto o “se faateleina o le … mana ia Iloa, ia Faia, ma ia Avea ai.”12 O lona uiga tonu lava o le faateleina lea o le iloa, ae o lona uiga foi o le faateleina o le malamalama o le loto. O lona uiga o le faateleina o le tomai ma le gafatia e galue ai. O lona uiga o le faateleina o le malosi o uiga, e aofia ai le amio sao, lototele, ma le agalelei.
O le aoaoina loloto e masani lava o se aafiaga faaleagaga. E na o le pau le aual o le a loloto ai le aoao a le tupulaga faiae pe afai lena e aogā ia mana togiola ma faamalosiau a Keriso i o latou olaga, e faamamaina, faapaiaina, ma faaagavaaina ai i latou ina ia maua Lona alofa tunoa ma meaalofa ua Ia saunia mo i latou. E tatau ona latou galulue filiga ma saili le aoaoina, ae e tatau foi ona faamamaina i latou e ala i le toto togiola o Keriso ina ia mafai ai ona latou mauaina atili le malamalama ma ia aoaoina e le Agaga Paia.
O aoaoga musuia lea e taitai atu ai i le aoaoina loloto o se aafiaga faaleagaga foi. Tatou te manaomia foi le Togiola a le Faaola ina ia galue ma le mamana atili i o tatou olaga. E manaomia ona tatou agavaa ma maua meaalofa o le faamamaina ma le faapaiaina atoa ai ma faamanuiaga a le Agaga Paia ina ia mafai ai ona tatou fesoasoani i le tupulaga faiae ia loloto atili lo latou aoaoina.
E manaomia e le tupulaga faiae lena aoaoina loloto aua o le lalolagi o le a latou fetaiai, o le a maoae ma matautia—o le a faateleina le malamalama ma le mana mai le lagi, ma o le a sili atu foi ona matautia le amioleaga ma le vāvāō ma le fenumiai. O le a manaomia ona faamauaaina i latou i upumoni manino ma faigofie o le talalelei, e manomia ona mausali le talalelei i o latou loto, ma o le a latou manaomiaina le mea na ta’ua e Peresitene Russell M. Nelson o le faatuatua mausali ia Keriso: “Aisea tatou te manaomia ai se faatuatua mausali faapena? Aua foi o loo i luma atu aso faigata. I le lumanai, o le a seāseā lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea i aso e gata ai, o i latou o e mulimuli ma le filiga i le Alii ‘e sauaina i latou’ [2 Timoteo 3:12]. O lena lava sauaga e mafai ona olopala ai oe seia e matua vaivai ai lava, pe faaosofia ai foi oe ia e avea atili ma faataitaiga lelei ma lototele i lou olaga i aso uma.”13
Mafuaaga lona 2: Ou te talitonu o tagata talavou o le a o mai ia i tatou o le a saunia mo—ma o le a mananao ia maua—ia aoaoga sili atu nai lo le mea o tatou tuuina atu ia i latou i le taimi nei. Ma le isi, o nisi e o mai o le a sili atu mea e manaomia ona e le o maua i o latou aiga le mea la e latou te mananao i ai po o le mea o loo latou manaomiaina.
Ou te le o fai atu e manaomia e tagata talavou ona sailiili i ni manatu lavelave lea e faavae i masalosaloga. O le a latou manaomiaina ia upumoni manino ma faigofie o le talalelei e aoao atu ma le alofa faateleina ma i le mana faateleina o le Agaga Paia.
Sei o tuu atua se faataitaiga o se aoaoga faavae manino ma faigofie lea e manaomia ona aoaoina loloto atili e a tatou tamaiti aoga. I le aluga o le fitu tausaga talu ai, sa manaomia ai e le BYU–Idaho se kosi i le aiga e avea o se vaega o le latou polokalama Faavae. (O lea ituaiga kosi o se vaega o le faasologa fou o le Maatulimanu lea e manaomia e tamaiti aoga uma o le inisitituti, kolisi, ma le iunivesite i le Ofisa o Aoga a le Ekalesia.) Talu ai e ave e tamaiti aoga uma a le BYU–Idaho lenei kosi, ua mafai ai nei e faiaoga ona silafia mea o loo i loto ma mafaufau o tamaiti aoga e uiga i le aoaoga faavae o le faaipoipoga e pei ona tuuina mai i le folafolaga i le aiga.
O mea na mauaina e faiaoga sa avea ma ni popolega. O le toatele o tamaiti aoga (masalo e 40 i le 50 pasene) o le tulaga sili ona lelei o le le faamaeaina lea ae o le tulaga sili ona leaga o le malamalama sese i lenei aoaoga faavae sili ona taua. O ni talavou lelei ma toaaga ia a le Au Paia o Aso e Gata Ai o e na faauu mai le seminare ma e lei lava lelei le aoaoina o le aoaoga faavae o le faaipoipoga ‘a lē o le aiga po o i le seminare po o le Aoga Sa po o a latou vasega a Tamaitai Talavou po o korama perisitua ma, i nisi tulaga, e lei lava aoaoina i a latou misiona.
E le gata e manaomia e tamaiti aoga se malamalama sili atu o le aoaoga faavae o le faaipoipoga, ae latou te mananaomia foi ona malamalama i ai i o latou loto. Latou te manaomia se molimau faaleagaga o lona moni, ma e manaomia ona latou galulue i lena molimau i le ala o loo latou saunia ai i le taimi nei ia avea ma ni tane po o ni āvā ma ni tina po o ni tamā i se aiga e faavavau.
E manaomia foi ona latou iloa le auala e talanoa ai e uiga i le aoaoga faavae o le faaipoipoga faatasi ma a latou uo ma nisi e le tutusa o latou talitonuga. Ma e manaomia ona latou tuputupu ae i lo latou gafatia ia iloatino le eseesega i le va o le mea moni ma le mea sese. Latou te manaomia le faateleina o le faatuatua ia Iesu Keriso, ma e latou te manaomia le faateleina o le faamoemoe ia te Ia.
O le mea lenei e manaomia e le tupulaga faiae. Ma o le a la le mea e manaomia ona tatou faia?
E tatau ona faia e i tatou taitoatasi le mea o finagalo le Alii ia faia i o tatou olaga. Ou te faamoemoe o le a aoga le aafiaga lenei ia te outou a o outou mafaufau loloto ma tatalo e uiga i mea e finagalo le Alii ia outou faia:
I le tele o tausaga ua tea, i se taimi faigata tele i o matou olaga, sa ou lagonaina le osofai mai o le fili. I lena aafiaga sa matua faamanino mai ai e le Alii ia te au le manaomia ona ou faia o nisi mea se tele ma ia faia ia sili ona lelei. Sei ou tuuina atua ia te outou sina talaaga laitiiti lava.
Sa ma faaipoipo ma Sue mo le silia ma le 30 tausaga. Sa ma toaaga ma auai i le tele o mea i le Ekalesia i o maua olaga atoa. Sa ma galulue i le Ekalesia; sa ma auai i le malumalu i vaiaso uma; sa matou tatalo faatasi ma le ma fanau, suesue i tusitusiga paia ma i latou, ma faia afiafi faaleaiga. Sa matou taumafai ia avea ma ni Au Paia lelei o Aso e Gata Ai. Peitai, sa tau mai e le Alii ia te a’u, “E manaomia ona e faia nisi mea se tele.”
I se tasi po sa faia ai sa’u miti taufaafefe matautia. Sa ou ala i luga ma le popole tele ma le fefe, ma sa ou tootuli ma tatalo i lo’u Tama i le Lagi mo se fesoasoani. A o ou tatalo, sa oo mai i lo’u mafaufau se fuaitau mai le Efeso, mataupu e 6: “Aua tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.”14
I le taeao sa ou sueina le mau ma faitauina upu nei:
“O’u uso e, o le toe upu lenei, ia outou loto tetele i le Alii, ma le malosi o lona mana.
“Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.”15
Ina ua ou faitau i upu “ia oofu outou i ofutau atoatoa mai le Atua,” sa ou lagonaina le molimau malosi mai le Agaga o le tali lea i a’u tatalo. Sa manaomia ona ou ofuina le ofutau atoatoa a le Atua, ona vaega uma lava.
Ma o lea, sa ma talanoa ai ma Sue po o le a le uiga o lena mea, ma sa ma tatalo mo le taitaiga. Sa ou aoaoina e manaomia ona ma fesili ifo ia i ma’ua lava ni fesili se lua. Ou te talitonu o tali o fesili ia o le a taitai atu ai i tatou e faia mea e manaomia ona tatou faia e saunia ai mo mea o loo taoto mai i luma. O fesili la nei: (1) O le a se mea o ou faia e tatau ona tuu? ma le (2) O le a se mea ou te le o faia e tatau ona ou amata faia?
A o ma fesili atu i na fesili i le tatalo, sa ma maua ni tali na matua patino lava. Na suia le auala na ma faaaluina ai lo ma taimi, o ituaiga o ala o faasalalauga sa ma faatagaina i totonu o lo matou fale, o le auala na ma auauna atu ai i le malumalu, o le auala na matou suesueina ai tusitusiga paia, auala na matou auauna atu ai i le Alii ma le anoanoai o isi mau mea. Sa manaomia ona faateleina lo matou tulaga faaleagaga. Na auala mai i lenei faagasologa o le salamo, na aapa mai ai le Alii o Iesu Keriso ma suia o matou olaga. Sa matou lagonaina Lona alofa mutimutivale, Lona alofa tunoa, Lona alofa, ma Lona mana. Na auala mai i Lona mana le mafaatusalia na Ia suia ai o maua loto ma o maua mafaufau ma siitia atu i maua ia te Ia. Ou te iloa pe ana ma le faalogo ma faatino mea sa ma mauaina, semanu e le valaauina a’u e auauna atu i BYU–Idaho ma semanu ou te le o tu atu iinei i o outou luma i lenei aso. Sa avea ma se suiga tele i o maua olaga.
Uso e ma tuafafine, ou te iloa o loo ou tautala atu i le Au Paia o Aso e Gata Ai faamaoni ma tausi feagaiga. Ou te iloa tou te matua lelei tele lava i mea o loo outou faia. Ae ou te iloa mai lou lava aafiaga e manaomia ona tatou fesili soo ifo ia i tatou lava nei fesili e lua. E manaomia ona tatou suia ma salamo ina ia mafai ona galue ma le mana sili atu le Togiola a Keriso i o tatou olaga. Afai tatou te faia, o le a faamanuiaina i tatou e lo tatou Tama Faalelagi i le malosi faaleagaga sili atu. Ou te iloa e moni lena mea.
Ma ou te talitonu, o le ki atoa lena e faafetaiaia ai avanoa ma tiutetauave sili o loo taoto mai i o tatou luma. E tele mea aoga e manaomia ona tatou faia. O le a manaomia ona tatou mafaufau mamafa ma fuafua ma galulue ma fefautuaai ma saunia e faia le mea sili tatou te mafaia. Ae o le mana o le Agaga Paia o le a aumaia le aoaoina loloto ma le iloatino sili atu atoa ai ma le mana togiola ma le faamalosiau o Keriso i olaga o a tatou tamaiti aoga.
E manaomia e le tupulaga faiae ia upumoni manino ma faigofie o le talalelei e aoao atu ma aoaoina mai ma le alofa faateleina, ma le mana faaleagaga sili atu, atoa ai ma aafiaga loloto atu i o latou olaga. Ou te talitonu o le a oo mai lena aafiaga ona o le a sili atu ona mamana le mauaa o le talalelei a Iesu Keriso i o tatou loto ma o tatou mafaufau ma ona o le a avea le Agaga Paia ma a tatou soa tumau. O le a matua atagia atoatoa mai i o tatou olaga ia aoaoga a le Faaola. Ma—pe a tatou faatautaia ni polokalama, pe atinae se mataupu aoaoina, pe faaaoga ni metotia fou, pe faafaigaluega pe valaau ma aoaoina ni faiaoga fou, po o le faufautua i tamaiti aoga, pe fuafuaina foi ni fale fou, pe tatala se eria fou, pe savali atu foi i totonu o se potu aoga e aoao ia fanau a le Atua—o le a tatou maua le faaaliga tatou te manaomiaina, ma o le a tatou faia le galuega i le alofa mama o Keriso e ala i le mana o le Agaga Paia. O le a loloto le aoaoina o le tupulaga faiae, ma o le a latou tutulai mai!
Tatou te iloa o le a tupu lenei mea. Tatou te iloa le tulaga o le a iu i ai nei mea uma. O le a afio mai le Alii o Iesu Keriso, ma o le a saunia Lona nuu ma Lana Ekalesia e talia o Ia.
A ou mafaufau ia te outou ma mea o le a outou faia i le malo o le Atua, ou te mafaufau i lena aafiaga ofoofogia i le 3 Nifae 17, ina ua faapotopoto mai e le Faaola ia tamaiti i Ona talaane. Ou te manao tou te vaai faalemafaufau i lena vaaiga ona o loo outou i ai i lena vaaiga. Ua aumai e matua a latou fanau pele i le Faaola. Ua Ia faapotopoto mai i latou ia te Ia; o loo i ai o Ia i le ogatotonu. Ua tatalo o Ia mo i latou ma o latou matua i se auala ofoofogia, ma ua Ia faamanuiaina ia tamaiti taitoatasi. Ona afifio ifo lea o agelu mai le Lagi “e peiseai ua i ai i le totonugalemu o se afi”16 ma auauna atu i tamaiti, ma ua li’o faataamilo ia tamaiti e lena afi paia.
I se lagona mamana, o le mea lea o loo tatou faia i le seminare ma le inisitituti. Ioe, o le Ofisa lenei o Aoga a le Ekalesia. E aumai e matua a latou fanau ia i tatou. O le Faaola o loo i le ogatotonu, o le taulaiga lea o mea uma e tupu i le fanau. E tatalo o Ia mo i latou faapea ma i tatou; o Ia o lo tatou Fautua i le Tama. O i tatou o agelu—o outou o agelu—o e o mai e auauna atu i na tamaiti i le afi paia. O tagata na, ou uso e ma tuafafine pele, e tatau ona avea ai i tatou.
Ma o tagata na o le a tatou avea ai ona o loo i ai se Atua i le lagi. O Ia o lo tatou Tama. O Lona Alo, le Alii o Iesu Keriso, o le Faaola ma le Togiola o tagata uma. O loo soifua o Ia! Ou te molimau atu i Lona suafa paia. Ua ou vaai o galue o Ia, ua ou iloa Lona alofa mutimutivale ma Lona alofa tunoa, ma ou te lagona Lona alofa. Ua ia te Ia le mana atoa e faamama ai i tatou mai le agasala, suia ai o tatou loto ma siitia i tatou, ma faamalosia i tatou ina ia avea ma mea uma e finagalo o Ia ia tatou avea ai. Ou te iloa afai tatou te liliu atu ia Keriso, o le o loo tu i taimi uma ma faaloaloa mai Ona aao ia i tatou, o le a Ia faamanuiaina i tatou ina ia sili atu ona lelei ma faia nisi galuega se tele i Lana galuega paia lenei. Ou te molimau atu ai, i le suafa paia o Iesu Keriso, amene.
© 2015 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania 6/15. Faamaonia le faaliliuga: 6/15. Faaliliuga o le “Encircled About with Fire.” Samoan. PD10054335 890