O Le Aso Sapati

Chad H. Webb

Taitai, Seminare ma Inisitituti o Mataupu Faalelotu

Faasalalauga Faasatelite mo Seminare ma Inisitituti o Mataupu Faalelotu•4Aokuso, 2015

O se fiafiaga le faatasi ma outou i le aso ma ua matua lelei ona aoaoina. O se fiafiaga moni lava le i ai iinei. Ou te faamoemoe ua outou iloa uma lo’u alofa mo outou, ma lou talisapaia tele, ma le faaaloalo mo outou uma ma mea uma o loo outou faia. O se fiafiaga faapitoa le faatasi ai iinei ma lo’u toalua o Kristi. O le aso e faamanatu ai le 25 tausaga o le ma faaipoipoga, o lea la ua ma manatu ai e faamanatu faatasi ma le 98,000 o uo mamae. O se mea ofoofogia moni lava o loo outou faia ma o outou taitoalua i lenei faalapotopotoga, ma e faafetai atu mo la outou sao ma le tou faatasi mai iinei. E matagogie lava le avea ai ma se vaega o lenei galuega faatasi ma outou uma.

I le fesootai ai ma le konafesi aoao na sei mavae atu nei a le Ekalesia, sa tuuina mai ai se aoaoga mo Pulega Aoao i le tausiaina o le Sapati ma le faia ia avea o se aso fiafia. Ua lotogatasi korama pulefaamalumalu o le Ekalesia i se taumafaiga iloga e aoao atu le taua o le tausiga o le aso Sapati i le ekalesia ma le aiga. Ua aoaoina i fono faamaopoopo i eria ma aufono a siteki. Ua aoaoina e peresitene o siteki ia epikopo, ma o le a latou faaauau pea ona aoao faatasi tagata o o latou siteki ma uarota.

Aoaoga e Tuuina Atu i Taitai o le Ekalesia

Ua uma ona maua ni ata vitio mai le aoaoga a le Pulega Aoao ma o le a tuu i luga o le tatou uepisaite.¹ Ou te faamoemoe o le a outou maimoa ma iloilo ma le totoa ma faaaoga nei punaoa taua. O le asō ou te manao ai ia outou maimoaina ni vaega o ni aoaoga se lua mai lena aoaoga. Muamua o le a outou faafofoga ia Peresitene Russell M. Nelson. Ona sosoo mai ai lea ma Elder M. Russell Ballard.

President Russell M. Nelson: “Uso e ma tuafafine pele, ou te faailoa atu lou alofa ma le faamemelo tele ia te outou. E pei ona taulai atu le Au Peresitene Sili i lenei taeao i le popolega tele o loo tatou popole ai mo e ua leiloloa, lēmailoa, ma lē toaaga. A o tatou taulai atu i lena faafitauli, tatou te fia taulai atu i le puipuia o na ituaiga o faafitauli. Ma o lea la, o le a tatou faataulai atu ai le tele o talanoaga o nei ma taeao i le atiaeina o le faatuatua i le Atua, atiaeina o le faatuatua i le Alii o Iesu Keriso, atiaeina o le faatuatua i Lana Togiola. … I le avea ai ma se tasi o Ana aposetolo faauuina, ou te faafetai moni ai mo lenei tofiga ua latou tuu mai ia te au e lauga ai i lenei autu. O le poloaiga a le Alii ia faamamalu ma faapaia le Aso Sapati o se tiute e mamafa ma moni ia i tatou. A mafai ona tatou faia lena mea—A mafai ona tatou faia lena mea—o le a tatou fesoasoani i o tatou tagata ia atiae le faatuatua i le Alii ma faaloloto lo latou liuaina ia te Ia ma Lana Ekalesia. … A tatou aoao atili i auala e faapaia ai le aso Sapati, o le a faateleina le faatuatua i le lalolagi atoa.”

Elder M. Russell Ballard: “Uso e ma tuafafine matou te faafeiloai atu ia te outou i lenei aoaoga taua o le konafesi aoao. Ua faaaluina e le Au Peresitene Sili ma le Korama a le Toasefululua le tele o itula i nai masina ua alu i le iloiloina o sailiiliga ua maua e faatatau i aoaoga faavae ma mataupu faavae o le Ekalesia lea e faateleina ai le faatuatua i lo tatou Tama Faalelagi ma le Alii o Iesu Keriso ma Lana Togiola. E pei ona outou silafia, o loo faaauau pea ona tatou popole i le liuaina tumau, tausiaina o feagaiga, o aiga o augatupulaga e tele, ma tagata o le Ekalesia ua faamalosia faaleagaga. I suiga uma faalefaalapotopotoga po o suiga o aiaiga po o aoaoga faaleaoaoga faavae ia e mafai ona faanatinatiina ai le galuega o le faaolataga i lenei taimi, ua matou fuafua ai o le siitiaina o le agaga ma le mana o le aso Sapati o le a sili ona uunaia i le faalatalata atili atu o tagata ma aiga i le Alii o Iesu Keriso.”

Sa ta’ua e Peresitene Nelson se popolega e uiga i le le toaaga ma se manaoga ia faamalosia le faatuatua ia Iesu Keriso ma Lana Togiola. Sa ia folafola mai “a tatou aoao atili i auala e faapaia ai le aso Sapati, o le a faateleina le faatuatua i le lalolagi atoa.”

Ou te mautinoa ua outou matauina foi na saunoa Elder Ballard e faapea, “I suiga uma faalefaalapotopotoga po o suiga o aiaiga po o aoaoga faaleaoaoga faavae ia e mafai ona faanatinatiina ai le galuega o le faaolataga i lenei taimi, ua matou fuafua ai o le siitiaina o le agaga ma le mana o le aso Sapati o le a sili ona uunaia i le faalatalata atili atu o tagata ma aiga i le Alii, o Iesu Keriso.”²

O Le Matafaioi a Seminare ma Inisitituti o Mataupu Faalelotu

I lenei taumafaiga i le lalolagi atoa, ua patino lava le taitaiga o Seminare ma Inisitituti o Mataupu Faalelotu e le Fono Faatonu o Aoga a le Ekalesia ia fesoasoani e ala i le faafouina o la tatou taulaiga i le aoao atu o mataupu faavae o le tausiga o le aso Sapati ma le aoaoga faavae e fesootai ma le faamanatuga, ma ia maua le lagolagosua a le autalavou ma talavou matutua o le Ekalesia ia tauivi ai ia malamalama atili ma ola i nei mataupu faavae. E ao ona tatou faia lena mea e ala i le faamamafaina o nei mataupu faavae pe a alia’e i a tatou aoaoga faasolosolo o tusitusiga paia ma i a tatou kosi i luga o le initoneti. E maeu lea avanoa matagofie ua tatou maua e tuufaatasia ai a tatou taumafaiga ma i latou ua poloaiina e taitai i tatou i le avea ai ma perofeta, tagatavaai, ma talifaaaliga. Ma o le faia o lea mea, o le a tatou faataunuu lelei ai la tatou sini faamoemoeina o le fesoasoani atu i le autalavou ma talavou matutua ia malamalama ma faalagolago i aoaoga ma le Togiola a Iesu Keriso.

Ina ia faamanino le auala tatou te ono aoao atu ai mataupu faavae e faatatau i le Sapati ma le faamanatuga i se ala o le a faateleina ai le faatuatua ia Iesu Keriso, ua ou filifilia muamua ai ni faataitaiga mai le Feagaiga Tuai ona o le tele o outou o le a aoaoina le Feagaiga Tuai i masina a sau.

O Le Aso Sapati

1. O le Sapati o se faailoga mai le Alii ia i tatou

O se tasi mataupu faavae taua e faatatau i le aso Sapati e sau mai le Esoto 31:

“Tou te tausi lava i o’u sapati, aua o le faailoga lea ia te au ma outou, e oo i a outou tupulaga amuli, ina ia iloa ai, o a’u nei o Ieova, o lē faapaiaina outou. …

“Ia tausi e le fanauga a Isaraelu i le sapati … [aua] o le feagaiga e faavavau.”³

O le manatu e faapea o le Sapati o se faailoga o le feagaiga a le Atua ma i tatou e taua tele ona o i tatou taitoatasi e fetaiai ma se faafitauli, o lona uiga o le “leai se mea e le mama e mafai ona nofo faatasi ma le Atua,”⁴ ma ua tatou iloa foi “ua agasala tagata uma lava, ma ua le oo i le [mamalu o] le Atua.”⁵ O le vaifofo, e pei ona ta’ua i le Mataupu Faavae ma Feagaiga 60:7, e faapea, “E mafai ona Ou faia outou ia paia.” Ma ioe, e mafai ona faia lena mea e ala ia Iesu Keriso, le tagata tutotonu i le fuafuaga o le togiola a le Tama. Ia po o le mea na aoao mai e le Aposetolo o Paulo, “ua faatauina [tatou] i le tau.”⁶

O lena tau o le soifua, puapuaga, ma le maliu o le Alo atoatoa o le Atua. Ae o le a le faamaoniga o le faatauina? O le a le lisiti? O le Sapati o se faailoga e faavavau o le faataunuuga o le feagaiga a le Atua i Lana fanau, le faailoga e mafai ona Ia faia i tatou ia paia.

2. O le Sapati o se faailoga mai ia i tatou i le Alii

E le gata o le Sapati o le faamaoniga o le faatauina, le faailoga o le a faapaiaina i tatou e le Alii, ae o se faailoga foi mai ia i tatou ia te Ia e uiga i le auala tatou te lagonaina ai mea ua Ia faia mo i tatou—o tatou lagona e uiga i Lana taulaga ma o tatou lagona e uiga i a tatou feagaiga.

Sa aoao mai Peresitene Nelson i le konafesi aoao sili ona lata mai nei a le Ekalesia: “A o ou laitiiti, sa ou suesue i lisi na faia e isi e faatatau i mea e fai ma mea e lē faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ai ni lisi o mea e faia ma mea e le faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te au, “O le a le faailoga ou te manao e avatu i le Atua?” O lena fesili e matua ta’u manino mai ai lava a’u filifiliga e uiga i le aso Sapati.”⁷

O filifiliga taitasi e faatatau i le Sapati e patino i le tagata lava ia; o se taulaga a le tagata lava ia, o se faailoga o lo tatou loto faafetai o loo Ia finagalo e faia i tatou ia paia. E aunoa ma le faamoemoe e fautua atu se lisi o mea e fai ma mea e le faia, Ou te fia faapea atu ua ou molimauina le autalavou ma talavou matutua i le lalolagi atoa o loo filifili e tausia le Sapati ia paia. E toatele ua filifili ia aua nei faigaluega i le Aso Sa; o isi ua faatutu ni sini ia aua nei fai meaaoga i le Aso Sa. O se tamaitai talavou i Tailani na maumauina ni ana uo ona sa ia filifili ia le auai i ni gaoioiga faaleagafesootai i le Sapati (o se mataupu e lei faalogo muamua lava i ai ana uo). Ou te iloa se tama taalo soka lelei i Kalefonia, na tetee atu i uunaiga mai uo ma faiaoga ma lamatia ai ona avanoa taua faasikolasipi, i le naunau ia le auai i ni taaloga e faia i le Sapati.

Ou te talitonu o le a faamamaluina e le Alii nei talavou lelei tele ona ua latou faamamaluina o Ia e ala i le filifili e tausi Lona aso ia paia. E mafai ona tatou aoao atu i a tatou tamaiti aoga, o o tatou uiga ma amioga i le Sapati o se faailoga lea i le Alii e tusa ma o tatou lagona e uiga i a tatou feagaiga ma o le “tausiaina o se Sapati moni o se faatusa lea o le tausiaina o le feagaiga atoa.”⁸

3. O le Sapati o se aso fiafia

O se isi mataupu faavae mai le Feagaiga Tuai:

“Afai e te liliu ese lou vae i le sapati, a e le faia lou lava loto i lo’u aso sa; ma e ta’ua le sapati o le aso fiafia, le aso ua sa ia Ieova, ua mamalu; ma e faamamalu i ai, o loo e le faia au lava amio, o loo le maua ai lou lava fiafia, ma e le tautala ai i au lava upu:

“Ona e fiafia lava lea i a Ieova.”⁹

O le Esoto 16 o se faataitaiga matagofie o lenei mataupu faavae. Ina ua faitio le fanauga a Isaraelu i lo latou fia’aai ma mananao ia toe foi atu i “ulo e tunu ai tufaaga” a Aikupito, na fetalai atu le Alii:

“Ou te faatotoina ifo le mea e ai mai le lagi ma outou, e o atu foi le nuu ma latou faaputuputuina, o le aso ma ana mea e tusa ai; ina ia ou tofotofo ai ia te i latou, pe latou te savavali i la’u tulafono pe leai.

“A oo foi i le aso ono, latou te sauni le mea e au mai ai, e tailua mea i mea e faaputu ai i lea aso ma lea aso.”¹⁰

E le itiiti ifo ma le lua isi mataupu faavae o loo i ai i na fuaiupu. O le tasi o le tofotofoina e le Alii o lo tatou usiusitai i le Sapati. O le isi o le faasaoina ma le sauniaina lea e le Alii o se ala mo i tatou ia mafai ai ona tausia Ana poloaiga. Mafaufau i le auala e faataunuu ai le folafolaga o le Sapati i le avea ai ma se aso fiafia. Afai e te galue i aso uma, i le aoina o le manai ina ia e ola ai pea, ma i le aso e tasi e fetalai mai ai le Alii, “E te le tau galue i le asō, ae o le a ou fafagaina pea oe e pei o e galue pea, mata e le o se fiafiaga lena?

Sa ou faalogo i se tala faaonapo nei o lenei tala na faamatalaina e Sister ma Elder Beecher, o se ulugalii faamisiona na auauna i Aferika. Sa la tusia:

“Matou te nonofo i se vaega mativa lava o Kenia i le tuaoi o Uganda. O se tasi o a matou peresitene o le paranesi … o se faifaatoaga sa nofo i luga o se fanua a se aiga lautele. O ia o se tagata talavou e i ai sona aiga laiti. …

“… Sa ia i ni tagata o lana paranesi e tau atu ia te ia … e le mafai ona o mai i le Lotu i le Aso Sa ona … latou te popole e tuua o latou fale ona e fefefe i o latou tuaoi e o mai ma gaoi a latou to’aga. … O se popolega MONI lava [lenei]. … O le mea moni, e faatalitali … tagata e toto latou to’aga pe a toto to’aga a isi tuaoi, o lea e itiiti ai le avanoa vave fafai ai e le au gaoi a latou to’aga. …”

“[Latou te fai mai foi] e le mafai ona latou o mai i le Lotu i le Aso Sa ona e tatau ona latou galulue … ona latou te matitiva tele.”

“Sa faaauau pea le tala a [le peresitene o le paranesi], ‘ou te tau atu ia i latou, “Ou te tuua lo’u fale i Aso Sa uma ma nofo ai i le Lotu mo le tele o itula o le aso. Ou te le galue i le Sapati. A ou foi atu i le fale, e tele lava ina ou iloa ua gaoia e o’u tuaoi a’u [sana], a’u moa, o fuamoa, o a’u fualaau suamalie ona e fia’aai ma e leai ni a latou meaai. Ae, ou te iloa lava a oo mai le taimi o le seleselega, e faamanuiaina lava a’u ona e tele atu fua e maua mai lo’u fanua nai lo i latou—e ui lavalatou te faigaluega i Aso Sa taitasi. E tele atu fua o lo’u fanua, ma ua faamanuiaina au ona ou te tausia le Aso Sapati ia paia.”’

Ina ua faalogo atu i le faamatalaga lea a [lenei peresitene o le paranei], sa fai mai le [peresitene o se isi paranesi], ‘Ou te faamaonia lena lava mea e tasi. E 2 eka la’u toga [sana], ae o lo’u tuaoi e 10 eka. E galue o ia i Aso Sa uma. Ae o a’u e leai. A oo mai le taimi o le seleselega, e tele au mea e maua. E sau lo’u tuaoi ia te au mo se meaai ona e le lava ni ana meaai. Ua faamanuiaina foi au ia, i le ola ai i le tulafono o le Sapati.’”¹¹

E silisili atu ala o le Alii i lo o tatou ala—faapea ai ma Ana fuataga o le manuia. E ese atu i lo o tatou ala. E moni lava i le sefuluai a ea? I le sefuluai, 10 toese le 1 e le tutusa ma le 9. Ua faamanuiaina i tatou e le Alii i mea tatou te manaomia ma sili atu. E moni foi lena i le Sapati. E fitu aso o le vaiaso, ae o le faigaluega i le ono aso mai le fitu tatou te maua moni ai lava mea tele atu, ae le itiiti ifo, o mea tatou te manaomia moni lava. E toetoe lava a e lagona atu o fetalai mai le Alii, “Tofotofo mai ia te au i lenei mea … pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.”¹²

E le gata o le Sapati o se aso e malolo ai mai galuega faaletino, ae o se aso foi o le faafouina faaleagaga. O se aso e malolo ai mai le popole i mea o le lalolagi.

Sa aoao mai Peresitene Iosefa F. Samita e faapea o le malologa a le Alii “o lona uiga o le ulu atu i le malamalama ma le alofa o le Atua, mauaina o le faatuatua i lona faamoemoega ma i lana fuafuaga, … ua le faalavelaveina i matagi uma o mataupu, po o le pepelo o tagata i togafiti leaga ua saunia e faasese ai.”¹³ (Mafaufau i le mana o lena folafolaga e fesootai ma mea tatou te faamuamua e fesoasoani ai i a tatou tamaiti aoga ia saili le upumoni ma ia iloatino le upumoni mai le measese.)

Ma e tatau ona ou taua le isi faamanuiaga e tasi e matua taua lava mai nei mau faasino. O loo faaaoga e le Esoto 31 le fasifuaitau “i a outou tupulaga amuli,”¹⁴ ma i le Isaia 58 o loo i ai le folafolaga e faapea o le Alii o le a “fafaga foi ia te oe i le tofi o Iakopo.”¹⁵ A o e suesueina nei fuaiupu atoa ai ma aoaoga ua saunia e o tatou taitai o le Ekalesia, o le a e iloaina o se tasi o faamanuiaga silisili o le tausiaina o le Sapati ia paia o le a maua e tou fanau ma fanau a tou fanau. O Aso Sa taitasi o se avanoa lea e aoao ai lau fanau i mea e te faamuamuaina i le olaga ma o loo e loto e ositaulaga mea e te fiafia i ai oe lava ina ia tausi ai poloaiga a le Alii.

E maeu lenei faamanuiaga mo i latou. O le a fesoasoani e fatua’i ai ni aiga o augatupulaga e tele o ni soo faamaoni o Iesu Keriso. O le iloaina o nei mea ma isi faamanuiaga e fesootai ma le Sapati, e mafai faapefea la ona le avea ma se aso fiafia?

4. O le Sapati e tausia i tatou ia le pisia mai le lalolagi

O le isi mataupu faavae e faatatau i le aso Sapati o loo maua i le Mataupu Faavae ma Feagaiga vaega 59: “Ma ina ia mafai ona e tausi atili atoatoa oe lava i le le pisia mai le lalolagi, ia e alu atu i le fale tatalo ma osi a’e i luga au faamanatuga i lo’u aso paia.”¹⁶

E anoanoai avanoa i le Feagaiga Tuai e aoao atu ai lenei mataupu faavae. Mo se faataitaiga, a o e aoao atua le feagaiga faaAperaamo o le a e maua se avanoa e aoao ai le autalavou ina ia i ai i le lalolagi ae le o ni ō o le lalolagi. O le isi avanoa o le a maua pe a e aoaoina le 1 Samuelu 8.

Sa faaaogaina e Peresitene Spencer W. Kimball lenei mataupu e aoao atu ai se lesona loloto. Sa ia saunoa:

“Sa le fiafia ma faanoanoa le Alii ma lana perofeta o Samuelu. … Ae sa alalaga mai le nuu mo se tupu ‘ina ia pei i tatou o nuu uma.’ …

“Ua le ese ai ma o tatou nei aso! Ua tatou mananao i mea faatosina ma faafefete a le lalolagi, ma le le iloaina i taimi uma ia faasalaga o lo tatou valea. O tagata le lolotu [e saili atu i mea faafiafia i le Sapati, ma ua tatou mananao foi i ia mea faafiafia] e ui lava, i le tele o mea ua tutupu, ua oo ai i le lafoaia o gaoioiga o le Sapati ma le soliga o le aso paia o le Alii. Ua i ai i o tatou vaitaimi faaipoipoga e le faalelotu—ma ua tatou faataitai foi i a latou sitaili ma faiga uma, e ui lava o loo atagia mai ai faiga a le lalolagi ma lē maua ai le paia o le faaipoipoga moni. …

“Ua fatuina sitaili e tagata paaa mo na o le tupe ma soona fai mai le tasi sitaili i le isi ia faapāsiā ai sitaili o loo i ai nei. … E sili ai lo tatou oti nai lo le ‘ofu i ni sitaili fou.’ … ‘E tatau ona i ai so tatou tupu e pei o isi nuu!’

“Ua fetalai le Alii o le a ia faia se nuu tulagaese ae tatou te le moomoo ina ia tulagaese. …

“O afea, o afea ea, o le a tutu mausali ai o tatou Au Paia o Aso e Gata Ai mai le lalolagi, ma faamautu o latou lava tulaga faatonuina, mulimuli i mamanu talafeagai ma ola i o latou olaga mamalu e tusa ai ma mamanu musuia o le talalelei.”¹⁷

A o tauivi o tatou talavou ma filisofia ma tumasani faalelalolagi faatasi ai ma tulaga faatonuina ma sitaili a le lalolagi, fesoasoani ia i latou ia iloa e ao ina avea i tatou ma ni tagata tulagaese, ua saoloto mai faatosinaga a le lalolagi.¹⁸ Fesoasoani ia i latou ia iloa o le tausiaina o le Sapati ia paia o se ala lea e faia ai lena mea, o se ala e tausia ai i latou lava ia le pisia mai le lalolagi.

O Le Faamanatuga

O faamoemoega o le faamanatuga

Sei vavae foe ae talanoa mo ni nai minute e faatatau i faamoemoega o le faamanatuga.

Tatou te aai ma feinu i le faamanatuga e manatua ai le tino ma le toto o le Alo. O le mafuaaga lenei na tuuina mai e le Alii Lava Ia mo le faamanatuga e pei ona Ia faavaeina patino ai i le Nuu Paia ma Amerika.¹⁹ E tatau ona avea lea ma se vaega taua o lo tatou aafiaga i vaiaso taitasi. O le faamanatuga o se avanoa e manatua ai o Ia atoa ai ma mea uma e fai ma faatusa o Lona tino ma Lona toto e faatatau i le Toetu moni, le togiolaina mai a tatou agasala, ma le alofatunoa lea ua lava e faafetaia’ia ai luitau uma o le olaga.

Ua tatou molimau atu i le Atua, le Tama Faavavau, ua tatou loto e ave i o tatou luga le suafa o Lona Alo ma tausi i Ana poloaiga, o lea, o le faafouina lena o a tatou feagaiga uma. Mata e te mafaufauina pe o faia ma le faamaoni e i tatou taitoatasi lena mea i vaiaso uma. O le a avea le sauniga faamanatuga ma se tausamaaga faaleagaga, e faamaea i le folafolaga a le Alii o le a tatou “maua pea lona Agaga e faatasi ma i tatou,” lea e aumaia ai le faamoemoe, faamalologa, malosi, mafanafana, ma le faamagaloga.²⁰

Tatou te manaomia uma le faamagaloga ma le faamalologa, ma o nisi o i tatou e manaomia le faamagalo atu ma faagalo ia lagona oona ua leva ona tatou taofia. Ua aumai e le Togiola ma le faamanatuga se avanoa ia i tatou e faia ai lena mea i le taimi nei.

O loo i ai avanoa e aoao atu ai faamoemoega o le faamanatuga i tusitusiga paia uma ma i a tatou kosi uma. Ou te fia fautua atu ni auala patino se lua e faia ai lenei mea. Tasi, soo se taimi lava tatou te aoao atu ai se faatusa po o se foliga o le Faaola,, tatou te maua se avanoa e aoao atu ai faamoemoega o le faamanatuga. Ma le lona lua, soo se taimi lava tatou te aoao atu ai ni mataupu faavae e fesootai ma feagaiga, tatou te maua lava se avanoa e faatatau ai na mataupu faavae i le faamanatuga.

Se’i ou faasoa atua lava se faataitaiga se tasi o nei ituaiga o avanoa e lua (e mai foi i le Feagaiga Tuai).

1. O faatusa ma faailoga e faasino atu i tatou ia Iesu Keriso

O le faataitaiga muamua, lea e faamanino ai le faaaogaina o faatusa ma faailoga o le Faaola, e mai le Levitiko mataupu 1. O iina o loo aoao ai e le Alii le fanauga a Isaraelu ia ofofua atu se taulaga i le Alii. O le taulaga o se manu lea e tatau lava o se po’a e sao ona lelei, lea o le a taliaina e fai ma togiola mo le tagata na sau e tapuai. Ona fasi mate lea e le tagata o le manu, ma sausau e le faitaulaga le toto ia soo ai luga o le fatafaitaulaga.²¹

E faigofie le vaaia o faatusa ma ona sootaga i le faamanatuga ma ia iloa e ui ina faia ia paia le tagata, ae o le a tauaveina lava e le Alii Lava Ia o latou mafatiaga, faanoanoaga, ma agasala. Ou te manatu o se feteenaiga maofa o e amiotonu “o i latou ia o e ua sinasina o latou ofu i le toto o le Tamai Mamoe.”²² Ae “o le Alii o le a mumu ona ofu.” Aua e pei ona Ia fetalai, “Ua Ou sausau o’u ofu i lo latou toto, ma faapisipisia o’u ofu uma.”²³

E maofa lea vaaiga—le vaaia o le Alii i laei mumu, e siomia e agelu e laei i laei papae. Ona o le puapuaga o Iesu Keriso, “e ui lava ina pei o ofu mumu a outou agasala, e sisina ia e pei o le kiona; e ui ina mumu ia e pei o le ie ulaula, e avea e pei o fulufulu mamoe.”²⁴

E sosoo ai, o le vaevaeina o le taulaga i vaega—o le ulu, o totoga, o vae, ma le ga’o.²⁵ O le ulu e fai ma faatusa o o tatou mafaufauga; o totoga o o tatou loto, o tatou lagona; ma vae, o a tatou amioga. O le faatusa ua faamanatu mai ai ia i tatou le faamanatuga a o tatou tuuto e alofa atu i le Atua ma o tatou loto atoa, manatu, mafaufau, ma le malosi.²⁶

I se isi faaupuga, e pei ona aoao mai Elder Neal A. Maxwell, “O taulaga patino moni lava e le o le tuuina o se manu i luga o le fatafaitaulaga. Ae, o se naunautaiga ia tuu le manu lea e i totonu o i tatou i luga o le fatafaitaulaga ma tuu ai e mu.”²⁷

E mafai foi ona tatou faaaogaina le matafaioi a faitaulaga, o atalii o Arona,²⁸ e aoao ai o tatou alii talavou i le taua tele o le matafaioi o loo latou faatinoina i le taimi o le faamanatuga. Aoao a tatou ositaulaga o i latou o atalii o Arona, ma e tatau ona vavae ese mai i latou mai le lalolagi, ona o loo fai i latou ma sui o le Faaola. Aoao ia aoao o le Perisitua Arona o loo latou tutu i le tulaga o Iosefa le Arimataia, o loo sauniaina le tino o Keriso. (O nisi o outou na mauaina se aafiaga paia o le sauniaina o se tino mo le falelauasiga. Faamata e te vaai faalemafaufau i le aafiaga paia o Iosefa le Arimataia?²⁹) Fesoasoani i a tatou alii talavou ia malamalama o le sauniga faamanatuga o se sauniga faamanatu e manatua ai le Faaola.

Sa aoao atu e se peresitene o se siteki lenei manatu i se korama a aoao. O le taimi nei, o le latou peresitene o le korama a aoao e 15 tausaga le matua e aumaia lana korama atoa i le 30 minute a o lei amataina le sauniga faamanatuga i Aso Sa uma, ma latou faitau ai tusitusiga paia ma tatalo faatasi, ona latou saunia lea o le faamanatuga o se korama.

E mafai foi ona tatou aoaoina a tatou tiakono i le matafaioi latou te faatinoina. E mafai ona e vaai faalemafaufau o se tasi e amoina le pusamaliu i le sauniga faamanatu mo le Faaola?

Fesoasoani ia i latou uma ia iloa o loo latou faamamaluina lo latou perisitua i ni auala e fesoasoani ai ia i tatou taitoatasi ia maua faamanuiaga o Ketesemane ma ia maua le faamagaloga ma le faamalologa na te aumaia.

2. O le aoao atu e uiga i feagaiga tatou te maua ai se avanoa e aoao atu ai le faamanatuga

O le isi avanoa o le a aoao atu ai le faamanatuga pe a tatou aoao atua mataupu faavae e fesootai ma feagaiga.

O se tasi faataitaiga o lenei mea o loo maua i le tusi a Hosea, lea e faaaogaina le faatusa o se tane, lana avā, le faalata a le avā, ma se tofotofoga o feagaiga o le faaipoipoga ina ia aoao ai la tatou sootaga o le feagaiga ma lo tatou Tama Faalelagi. Sa tau atu e le Alii ia Hosea ia “fai ava i le fafine talitane, ma ia fai mau le fanau a le faitaaga.”³⁰ O lea na ave ai e Hosea ia Komeri e fai ma ana avā. Ae ina ua la nonofo, tausi o ia, ma faaalia lona alofa mo ia, sa ia toefoi atu i lona olaga tuai sa i ai ma ia faalataina o ia.

O le a sou lagona pe ana faapea o oe o Hosea? Ae faafofoga i le auala na tali atu ai Hosea i lenei taufaalata i upu nei:

“Ou te faaōleōle ia te ia, ma taitai ia te ia i le vao, ou te faamafanafana ia te ia.

“Ou te tuuina atu … ia te ia … tovine.”³¹

Ma i le ala faatusitusiga paia o loo fesiitai ai taulaiga mai ia Hosea ma Komeri i le Alii ma le feagaiga ma Isaraelu ina ua Ia fetalai mai ia i tatou: “Ta te osi sa ta feagaiga ma a’u e faavavau; ta te osi sa ta feagaiga ma a’u i le amiotonu, ma le faamasinoga, ma le agalelei, ma le alofa.”³²

Ina ia vaai i le ala na lagona e Hosea e uiga i ana feagaiga, ma le iloaina o le ala lena o loo lagonaina e le Alii e uiga i Ana feagaiga ma i tatou, ua matuai faamanuiaina ai lava au.

Sa muamua ou fiafia i lenei tala ona o se lauga a Peresitene Henry B. Eyring. O nisi o outou atonu sa i ai iina ina ua ia saunoa i le mea lenei e uiga i lona aafiaga i le aoaoina o le Feagaiga Tuai i le seminare: “E tele atu mafuaaga i le mea e mafai ona ou faamatalaina, i na tausaga i le aoaoina o le Hosea, sa ou lagonaina se mea fou, se mea ua sili atu ona mamana. Sa le o se tala lenei e uiga i se faiga pisinisi i ni paaga se toalua. … O se tala o le alofa. O se tala o se feagaiga o le faaipoipoga na fusia i le alofa, le alofa mausali. O le mea sa ou lagonaina i lena taimi, ma sa faateleina i le aluga o tausaga, e faapea o le Alii, o Le ua faamanuiaina ai au e osi feagaiga ai, e alofa ia te au, ma oe, ma i latou tatou te aoaoina, i se mausali lea ou te maofa ai pea ma lea ou te manao ai ma lou loto atoa ia faataitai i ai.”³³

E tele se mea o loo i ai i le tala, ae o le a taatia atu ia te oe e toe iloilo le lauga matagofie a Peresitene Eyring, na tuu atu i le semina a le OAE i le 1995. O lo’u manatu, o lea ua tatou maua se avanoa e aoao atu ai feagaiga. Ma a tatou faia, ia tatou fesoasoani i a tatou tamaiti aoga ia lagonaina le mea sa lagonaina e Peresitene Eyring: E alofa le Atua ia i tatou ma e fiafia o Ia e faamanuia i tatou e ala i a tatou feagaiga. A oo ina tatou malamalama o sauniga ma feagaiga o ni faatusa ia o le alofa o le Atua ma [Lona] finagalo ia faaeaina i tatou, o le a suia i tatou e faavavau e le faamanatuga.

Faaiuga

E mafai ona e mafaufauina po o le a le mea e ono tupu pe afai e auai le autalavou ma talavou matutua o le Ekalesia i le sauniga faamanatuga i vaiaso uma ma manatua moni lava le Faaola, lagonaina le lotofaafetai mo Lana Togiola, ma molimau atu i le Tama o le a latou tauave le suafa o le Faaola i aso taitasi ma tauivi ia tausia Ana poloaiga ma ia ola agavaa mo le meaalofa o le Agaga Paia? Ma a oo i le vaiaso atoa, latou te auai i vasega seminare ma inisitituti ia o loo taulai atu i le matafaioi autu a le Faaola i le fuafuaga a lo tatou Tama Faalelagi ma faamanatu atu ia i latou la latou tautinoga e avea ma soo o Iesu Keriso? Ma afai latou te talanoa i nei mea i totonu o o latou aiga ma o latou matua, ma fuafua faatasi e fai le Sapati ma taulaiga o lo latou vaiaso?³⁴ O le a faigata ona tatou mafaufauina faamanuiaga o loo faapolopolo mai e le Alii mo i tatou.

Sei ou faamaea atu i lau molimau afai e ao ona tatou aoao atu lenei aoaoga faavae i le mana, e tatau ona tatou ola muamua ai lava. Afai tatou te tausia le aso Sapati ia paia ma manatua le Faaola a o tatou faafouina a tatou feagaiga i Aso Sa taitasi, o le a avea le Sapati ma se aso fiafia ia i tatou ma o le a faamanuiaina ai i tatou ma o tatou aiga mo augatupulaga. Ma o le a faamalosia iloga ai lo tatou tomai e uunaia o tatou tamaiti aoga ia iloaina o le tausiga o le aso Sapati ia paia, o le a fesoasoani ia i latou ia malamalama ma faalagolago i aoaoga ma le Togiola a Iesu Keriso. O le a faalolotoina ai lo latou talisapaiaina ma le tuuto atu i a latou feagaiga o ni soo o le Faaola o le lalolagi.

Tau ina ia tatou manatua pea o Ia. I le suafa o Iesu Keriso, amene.