Manatua ma Faatino
Faasalalauga Faasatelite mo Seminare ma Inisitituti o Mataupu Faalelotu • 4 Aokuso, 2015
I se konafesi aoao, sa saunoa ai Elder Marlin K. Jensen, “Afai tatou te matuai gauai atu i faaaogaaga o le upu manatua i tusitusiga paia, o le a tatou iloaina o le manatuaina i le ala ua faamoemoe i ai le Atua o se mataupu faavae autu ma faaola o le talalelei.” E faapefea ona avea le manatuaina “o se mataupu faavae autu ma faaola”? Sa saunoa pea Elder Jensen, “E mafua lenei mea ona o apoapoaiga faaperofeta ia manatua, o loo valaau mai pea ia faatino: ia faalogo, ia vaai, ia faia, ia usitai, ia salamo.”1
O loo i ai se faataitaiga o lena mea o loo tusia i le Tusi a Mamona. Sa faaigoa e Helamana ona atalii o Nifae ma Liae ma tau atu i ai le mafuaaga:
“Faauta, ua ou tuu atu ia te oulua igoa o o tatou uluai matua, o e na o mai i fafo mai le laueleele o Ierusalema; ma ua ou faia lenei mea ina a oulua manatua o oulua igoa ia oulua manatua ai i laua; ma a oulua manatua i laua ia oulua manatua a laua galuega; ma a oulua manatua a laua galuega ia oulua iloa ai ua taua, ma ua tusia foi, e faapea na lelei.
“O lea, ou atalii e, ou te manao ina ia oulua faia le mea ua lelei.”2
O le tasi lea o auala e mafai ona avea ai le manatuaina ma se mataupu faavae autu ma faaola. E mafai ona fesoasoani ia i tatou ia faatino i auala talafeagai ma amiotonu. I lena tulaga ua uunaia ai i tatou i le Ekalesia ia manatua i latou o e na muamua atu ia i tatou: i latou i o tatou talafaasolopito o aiga, i latou i le talafaasolopito o le Ekalesia, i latou i tusitusiga paia, ma le mea sili ona taua, ia manatua le Faaola Lava Ia.
O se tamaitai Iutaia na maliu i sauaga o le Taua Lona Lua a le Lalolagi na faia se faamatalaga e uiga i le auala e mafai ai e i latou ua mavae atu ona faamanuiaina o tatou olaga. Sa ia tusia: “Oloo i ai fetu o lo latou susulu e vaaia pea i le lalolagi e ui ua leva ona mou atu. O loo i ai tagata o lo latou susulu o loo faaauau pea ona malamalama ai le lalolagi e ui ua leva ona maliliu. O nei malamalama e patino lava ona susulu pe a pogisa le po. Latou te faamalamalamaina le ala mo tagata.”3
E faatatau foi le mataupu faavae i le talafaasolopito o seminare ma inisitituti. Ua anoanoai mea i la tatou talafaasolopito e taua ona manatuaina. I lena tulaga, ua tusia ai se talafaasolopito o Seminare ma Inisitituti o Mataupu Faalelotu. Matou te fiafia lava e faasilasila atu i se taimi ua le o toe mamao ae maua se kopi lolomi po o luga i le initoneti o lenei talafaasolopito mo outou uma. Matou te faamoemoe o le a faitauina ma avea o se punaoa taua i a tatou suesuega taitoatasi ma faavaega. E mafai ona fesoasoani lenei talafaasolopito ia tatou aoao ai mai tagata na amatalia Seminare ma Inisitituti o Mataupu Faalelotu lea ua oo ai i le tulaga ua i ai nei. O loo tatou fausia mai mea na latou faavaea ma olioli ai i se talatuu mauoa na latou tuua mo i tatou. Ma e ui ua toatele ua maliliu, ae o loo mafai pea ona avea i latou ma sulu taiala a o tatou agai atu i le lumanai. Matou te faamoemoe o le manatuaina o i latou o le a taitai atu ai i tatou ia manatua a latou galuega ma ia faatino.
Mo sina taimi i lenei taeao, ou te fia faasoa atu ai ni nai tala mai la tatou talafaasolopito. O le a faamatalaina ma le faamoemoe o le manatuaina o i latou na asaina le gasū o le taeao, o le a tatou mananao ai ia faataitai ia i latou—i o latou faanaunautaiga ma a latou taumafaiga.
I lana lauga o le “The Charted Course of the Church in Education,” sa saunoa ai Peresitene J. Reuben Clark Jr. e faapea o le mea manaomia muamua lava mo se faiaoga faalelotu o se molimau patino “o Iesu o le Keriso ma o Iosefa Samita o le perofeta a le Atua.”4 O lea molimau na te sauniaina le uunaiga mo le tele o faiaoga faalelotu faamaoni ma o latou aiga e talia tofiga faigata ma le toafimalie ma ia ositaulaga le tele o tomai ma le toafimalie faaletagata. Ua atagia mai ai Peresitene Gordon B. Hinckley lea na saunoa e uiga ia te ia lava, “Ou te le iloa pe faapefea ona faia se mea vagana ai lo’u tootuli ma aioi atu mo se fesoasoani ona toe tu ae lea i luga ma alu e galue.”5 O se tasi tagata faapena o Ray L. Jones, lea na talosagaina e amatalia le polokalama o le seminare i le vaveao mo le Ekalesia.
“I le konafesi aoao ia Aperila 1950, sa feiloai ai peresitene o siteki e 10 mai Los Angeles faatasi ma Elder Iosefa Filitia Samita e talanoaina le faavaeina o se ituaiga o polokalama seminare mo le autalavou i o latou eria.” Sa lei mautonu i latou pe faapefea ona faia lea mea talu ona faasaina i le setete le faia o aoaoga faalelotu i taimi o a’oga.
Sa silafia e Franklin L. West, le Komesina o Aoga a le Ekalesia nisi o vasega seminare i Iuta sa faia a o lei amataina le aoga ma vaaia ai lenei auala o se vaifofo talafeagai i le talosaga mai Kalefonia i Saute. Sa fesili atu le Komesina ia Ray L. Jones, o se puleaoga seminare i Logan, Iuta, pe faamata na te mafaufauina e malaga i Kalefonia e amata le polokalama. I le toafimalie ai i lona tofiga sa i ai i lena taimi ma le nofo ai i se fale fou faatoa faatau, sa faailoa atu ai e Uso Jones se le mautonu faapea o ia e le tatau ona amataina le polokalama.
I le naunau ai ia faagaoioi le polokalama, sa fautua atu ai Komesina West ia tuua e Uso Jones lona aiga i Logan ma tau na ona ‘faimalaga’ atu mai lea taimi i lea taimi i Los Angeles—[o se mamao e silia ma le 700 maila]. Sa mulimuli ane malie Uso Jones e tatalo e uiga i lena fesili. I le mavae ai ona faaalu sina taimi e mafaufau loloto ai, na [ia] filifili ai e toe faatau ese lona fale i Logan ma masii atu e nofo mau i Los Angeles e amatalia le polokalama.”6
E pei o Nifae lea sa saunoa, “Sa taitai au e le Agaga, ona sa ou le mua’i iloa muamua mea e tatau ona ou faia,”7 sa alu atu ai loa Ray L. Jones i Kalefonia i Saute.
Sa lei faatupeina e le Ekalesia lana malaga, o lea sa maua ai e Uso Jones se galuega e fesoasoani ai e ave se nofoaafi e feaveai ai povi mai Iuta i Kalefonia. Sa iu ina ia avatua lona aiga i Los Angeles ma fesoasoani ai e faatulaga se fono faatonu o aoga i le lotoifale. O se peresitene o se siteki i le eria, o Howard W. Hunter, sa avea ma taitaifono o le fono faatonu, ma o le vaega atoa o le tala—e pei ona latou ta’ua—o le talafaasolopito.8 O le mea sa amata i le 1950 i tamaiti aoga e 195 i vasega e fitu, i le 65 tausaga, ua silia nei ma le kuata miliona tamaiti aoga i atunuu e 136.
O le agaga o le tuuto ma le ositaulaga ua faaalia pea lava pea i loto o faiaoga faalelotu i vaega uma o le lalolagi. Faalogo i le tala lenei o se tasi o a tatou faiaoga faalelotu i Monokolia, lea sa faalogo i le fautuaga a lona taitai perisitua ma alu atu ma galue i lalo o ni tulaga faigata ina ia tupu ai:
O Odgerel Ochirjav, o se tagata liliu mai i le Ekalesia, sa mauaina se faailoga PhD i mea tau vaomatua ma sa faigaluega o se tagata suesue i Monokolia ina ua talosagaina o ia e faigaluega tumau o se taitai faamaopoopo o le seminare ma le inisitituti. Sa muamua lava ona ia teenaina le ofa ae mulimuli ane malie i ai. Ia Novema o le 2008, sa fono ai Uso Odgerel ma lona faatonu eria, o Patrick Cheuck faatasi ma le peresitene o le misiona. Sa fesili i ai le peresitene pe aisea e le o faia ai ni vasega seminare i le vaveao i Monokolia. Sa tali i ai Uso Odgerel, ‘Peresitene, o Monokolia lenei. Malulu, pogisa, taifau, ma le leai o ni taavale.’ I se tausaga mulimuli ane sa toe fono foi alii nei e toatolu, sa toe fesili foi le peresitene o le misiona i lea lava fesili e tasi. Sa toe tali atu foi Uso Odgerel, ‘Malulu, pogisa, taifau, ma le leai o ni taavale.’ Ina ua maea le fonotaga, sa ave e Uso Cheuck ia Uso Ochirjav ma fai i ai, ‘Odgerel, a fai atu loa lou taitai perisitua ia te oe [e fai] se mea, e manaomia loa ona e galue i ai!’ I lana tali, sa faapea atu ai Uso Odgerel, ‘Patrick, e te le malamalama i le pogisa o Monokolia, le malulu o Monokolia, taifau a Monokolia, ma le leai o ni taavale!” Ma o iina na muta ai le talanoaga.
“E lei leva lena, ae faitau e Uso Ochirjav le Mataupu Faavae ma Feagaiga vaega 85:8, [ma le] fasifuaitau ‘faasagatonu le atolaau’ na gauai atu i ai. Sa ia … faitau i se upusii mai ia Peresitene Tavita O. MaKei [i se tusi lesona a le inisitituti] lea na faapea mai o e saili e ‘faasagatonu le atolaau’ e vave lava ona oti faaleagaga. Sa mulimuli ane tusia e Uso Ochirjav: ‘I lo’u le manao ai ia sola ese le Agaga, sa amata ai ona ou galue i se polokalama seminare i le vaveao mo Monokolia. O se mea na faateia ai, sa fiafia tele taitai perisitua i le lotoifale i lea manatu.’”9 Ia Setema 2009 na latou amata ai i tamaiti aoga e 140, ma e oo ifo ia Mati, ua 352 na auai, sa onosaia le malulu tele o Monokolia i le 30 tausaga—o se taumalulu lea sa oo ai le averesi i le -25 tikeri Farenaite.
I se konafesi aoao, sa saunoa ai Epikopo Victor L. Brown: “I le lalolagi, ua maumau ai e le tele o faalapotopotoga, malo, e oo lava i ekalesia, e oo i aiga le tele o lo latou malosi ona ua latou fefefe e fai atu i tagata ia ositaulaga. E taua tele lo tatou le faia o lea lava measese e tasi.”10
E mafai ona ou avea sina taimi e faafetai atu ai, e fai ma sui o le pulega, mo osigataulaga o loo outou faia. O le tele o mea sili ona taua tou te faia e faamanuia ai le autalavou e le o amanaiaina ma e le o faaalia lava i lipoti. E foliga mai ia te au o auaunaga ma osigataulaga ia faaauau pea ona uluola i la tatou faalapotopotoga. Faafetai lava. E pei ona tatou usuina i se tasi o a tatou viiga, tau ina ia “[aumai e tou osigataulaga] ia faamanuiaga o le lagi”11 i o outou luga ma ē pele ia te outou.
O polokalama faamanuiaina o seminare ma inisitituti e manaomia ai lava i taimi uma ni faiaoga faalelotu e i ai ni sootaga lelei e galulue faatasi ma isi, e aofia ai matua, taitai perisitua, au faigaluega a le aoga, ma sui o nuu. O la tatou amio ma le galulue faatasi ma isi e tatau ona atagia atu ai i taimi uma le Agaga o Keriso ma Lana talalelei.
Sa saunoa Elder Robert D. Hales, “O le auala tatou te taulimaina ai tagata o o tatou aiga, o tatou tuaoi, paaga faapisinisi, ma tagata uma tatou te feiloai, o le a faaalia ai pe o tatou tauaveina i o tatou luga Lona suafa ma manatua pea o Ia.”12 O sea agaga sa faaalia e le faatonu o le inisitituti muamua lava, o Uso J. Wyley Sessions.
I le mavae ai o le fitu tausaga sa auauna ai o se peresitene o le misiona a Aferika i Saute, sa talosagaina ai ia Uso ma Tuafafine Sessions e le Au Peresitene Sili ia masii atu i Moscow, Idaho, e amatalia le polokalama inisitituti. E ui sa talileleia e tagata o le Ekalesia i [Moscow, Idaho,] ia Uso Sessions ma lona aiga, ae sa i ai nisi o le nuu na vaai ia i latou ma le masalosalo. O le le manino lelei o le natura o lona tofiga i Moscow sa faatupuina ai le le faatuatuaina o ia. Sa oo lava ina tofia e nisi tagata faipisinisi se komiti latou te mata’ituina o ia ma faamautinoa na te le ‘Faamamonaina’ le iunivesite.
Sa auai Uso Sessions i ni faalapotopotoga faalenuu i se taumafaiga ia aapa atu i tagata o e ua le fia talanoa atu ia te ia. I ni soloaiga o ni taumafataga afiafi tai lua vaiaso na faia e le Chamber of Commerce, sa ia faia ai ni taumafaiga e nofo ai i talaane [o le alii sa] faauluulu i ai le komiti sa tofia e teenaina lana galuega. I se tasi o nei taumafataga afiafi, sa faapea atu ai [lenei alii], ‘… O oe o se tagata mata’ina. Sa tofia au i se komiti ia taofia oe mai Moscow, ma o taimi uma ou te vaai ai ia te oe, e te sau lava iinei ma le tausaafia ma ou te fiafia ai lava ia te oe i taimi uma.’ Sa tali atu Uso Sessions, ‘E faapena foi au. E sili ai la le ta uo.’ Mulimuli ane sa faamatala e Uso Sessions sa oo ina avea [lea alii] ma ana uo mamae i le taimi sa nofo ai i Moscow.”13
I le Mataupu Faavae ma Feagaiga, sa fetalai ai le Alii, “E leai se tasi e mafai ona fesoasoani i lenei galuega vagana ai ua lotomaualalo o ia ma tumu i le alofa.”14 E le mafai ona tatou faia le galuega a se faiaoga faalelotu pe afai e le o faaosofiaina i tatou e le alofa: o se alofa mo le Alii, o tatou aiga, a tatou tamaiti aoga, ma i latou tatou te galulue faatasi.
I le 1978, sa saunoa ai Elder Gordon B. Hinckley i le aufaigaluega a le aoga a le Ekalesia e faapea:
“Ia avea le alofa ma ou fetu taiala. O le malosiaga silisili lea i le lalolagi. …
“ Faafailele … se alofa mo i latou e te aoaoina, aemaise lava mo i latou e foliga mai ua matua faigata ona aapa atu i ai. Latou te manaomia tele outou, ma o le vavega lea o le a oo atu i o latou olaga a o tou galulue ma i latou i se agaga o le faamalosiauga ma le agalelei o le a aumaia le fiafia ma le faamalieloto ia te outou i o outou aso uma atoa ai ma le malosi ma le faatuatua ma le molimau ia i latou.”15
I nisi taimi, atonu tatou te iloa ai le faigata ona alofa atu i ni tamaiti aoga patino po o isi o tatou galulue faatasi. O le a la le mea e fai? Ua i ai i la tatou talafaasolopito le tala o se tasi na avea muamua ma taitai ma le faigata na ia oo i ai i le alofa ia i latou na talosagaina o ia e galue i ai. Faamolemole ia matau i lenei tala le mea na mulimuli ane faatagaina o ia e alofa atu.
A o faatupulaia le Ekalesia i isi malo, sa feagai Seminare ma Inisitituti o Mataupu Faalelotu ma le luitau o le tuuina atu o aoaoga faalelotu i atunuu fou, aganuu, ma gagana. I le popofou o le 1970 sa toe faatulagaina ai le pulega o Seminare ma Inisitituti o Mataupu Faalelotu ma tuu atu ai i taitai lagolago ni eria faavaomalo e vaavaai.
O Frank Day, o se tasi o taitai lagolago, sa tautua i le marini i le Taua Lona Lua a le Lalolagi. Sa tau o ia i le Pasefika i Saute ma sa aoaoina o ia ia ita i le fili. Ua popole nei Uso Day ina ne’i tofia o ia e galulue faatasi ma tagata Asia.
E pei ona ia fefe i ai, na faatonuina e Uso Joe J. Christensen, komesina lagolago o aoga ia ona vaavaaia le Pasefika i Saute ma Asia. “A o lele atu [Uso] Day i le salafa o le Vasa Pasefika e agai atu i Iapani, sa i ai pea ia te ia … lagona malolosi [mai le taua] e ui lava sa ia tatalo faamaoni ina ia tineia ese. A o ia sauni e tulaueleele, sa faatumulia Uso Day i se fefe. Sa ia savali atu i le malaevaalele … ma latalata atu [i le peresitene o le misiona]. A o ia tepa atu i fofoga o le peresitene o le misiona, sa na o le alofa sa ia vaaia iina ma sa lofituina o ia i ona lava lagona o le alofa.” O ona lagona le lelei uma sa i ai na mouese atu.16
Fai mai Uso Day sa ia tatalo faamaoni ma sa aumaia e le Agaga o le Alii se alofa i lona loto sa lei i ai muamua iina. E mafai foi ona tatou faia lea mea e tasi. Sa fautua mai Mamona, “Tatalo atu i le Tama ma le malosi atoa o le loto, ina ia faatumulia outou i lenei alofa.”17
O lena lava Agaga e tasi e mafai foi ona uunaia ma siitia ai i tatou pe a tatou oo i ni taimi tatou te lagonaina ai le tuuatoatasi, le talisapaiaina, pe faalotovaivaiina.
Sa maua e Bob ma Gwenda Arnold le tofiga ia masii atu i Kuatemala ma amata le polokalama seminare ma le inisitituti iina. Na faamatalaina e Uso Arnold ia lagona na ia oo i ai i se malaga umi e toe foi atu i lona aiga ina ua maea se tofiga faalegaluega: “Masalo o le sefululua-tolusefulu po o le tasi i le vaveao. Pe tusa o lea taimi sa ou maua ai lenei lagona matautia o le tuuatoatasi lea e leai ma se tasi o le lalolagi na iloa le mea sa ou i ai. Sa manatu lo’u aiga sa ou moe i se isi mea. Sa le iloa e tagata i le Iunaite Setete le mea sa ou faia. Sa matua tuuatoatasi lava au. A o ou tietie atu i se [vaega togavao matagofie], faatasi ai ma le lagi ua lilofia i fetu susulu, sa ou tepa ae i luga ae musumusu mai le Agaga, ‘Ou te iloa le mea o e i ai.’ Sa aluese atu le tuuatoatasi ma sa ou tagi i le vaega na totoe o le ala i le aiga. Sa oo mai le lagona o le olioli ma le filemu mai le iloaina sa silafia e le Tama i le Lagi au ma mea sa ou faia.18
Afai e i ai se mea e aoao mai e le talafaasolopito o seminare ma inisitituti, e mautinoa lava o le mauaina o le agaga faafetai mo le avanoa sili ua tatou maua e fegalegaleai ai ma le autalavou faatuatua ma talitonu o le Ekalesia. I tuluiga uma o le lalolagi ua faaalia ai e nei tamaiti aoga se agaga o le faatuatua ma le ositaulaga. Mo se faataitaiga, sa ala i luga se alii talavou i le 3:15 i vaveao uma ina ia taunuu vave ai i le seminare. O lana malaga e manaomia ai ona ia savali i se fale faatali pasi, tietie i le pasi mo le 15 minute, faatali le pasi lona lua, tietie i lena pasi, ona savali lea i poloka e fa i le falesa. E tele ona ia faia lenei mea i le timu ma le malulu. I le faaiuga o le tausaga, sa silia ma le 90 pasene le auai ae leai se tuai.
Toe tasi se faataitaiga ou te avatu i le auala e mafai ona faatumulia ai tatou tamaiti aoga i le faatuatua ma le tuuto.
O Stephen K. Iba, sa avea muamua ma se taitai lagolago, sa faamisiona i le Atu Filipaina ona toe foi atu lea i ni nai tausaga mulimuli ane e fesoasoani e tau amata le seminare iina. Na ia faamatalaina le asiasi atu i se aiga na ia iloa a o faifeautalai—o se aiga sa i ai “se afafine tiotio e sefululua tausaga le matua” e igoa ia Maria. Sa tusia e Uso Iba:
“Sa ou tuitui i le faitotoa o lo latou tamai … fale … ma sa tali mai le tina. … Sa ou [tau] atu ia te ia le mafuaaga ua ou toe foi atu ai ma faamalamalama i ai le polokalama seminare o suesuega e fai i le fale.
“Sa ou fesili mo Maria, lea ua tatau ona sefuluiva tausaga pe ā. Sa tosoese e le tina le pupuni lea sa vā a’i le potu ma o loo taoto mai ai iina i luga o se tamai moega, tai pei o se faatagata, i lona mamafa pe limasefulu pe onosefulu pauna, ia Maria, i tulaga faaiu o le kanesa. Sa susulu mai lena matafiafia matagofie ma na mata tiotio a o ou savali atu i ona tafatafa.
“Sa ia fesili mai pe mafai ona amata ana suesuega faaseminare. Ua toe ono masina le umi e ola ai ma sa manao ia saunia lelei atili e aoao atu ona aiga i le lalolagi o agaga. Sa ou folafola i ai o le taimi lava e taunuu ai anomea i Manila, o ia lava le tagata muamua e mauaina. Ina ua ou toe foi ane i se vaiaso mulimuli ane, ua saunia Maria e suesue.
“O lona tama, ua avea nei ma tagata o le ekalesia ma o le peresitene o le paranesi, sa faatutuina faaata i luga ae o lona ulu ina ia mafai ai ona ia tepa i luga ma faitau ma tusitusi. Ona o ona tulaga vaivai, sa le mafai ai ona nofo i luga. I le vaiaso a o lumanai ai lona maliu … , sa faamaea ai e Maria ana suesuega mulimuli i le fale o le Tusi a Mamona—iva masina o galuega, itulau e afe pe sili atu, o upu uma, ma avanoa uma.”19
O lo matou faamoemoe a oo ina maua lenei talafaasolopito, ia outou faitauina, faaaoga lesona e mafai ona aoao ai i tatou, ma le—mea sili ona taua—ia avea ma se sooga malosi i le filifili o la tatou talafaasolopito o loo tupu.
Sa saunoa Peresitene Dieter F. Uchtdorf:
“O nisi taimi tatou te mafaufau ai i le Toefuataiga o le talalelei o se mea ua maea, ua tuanai. … O le mea moni, o le Toefuataiga o se faagasologa faifai pea; o loo tatou ola ai nei. …
“O se tasi lenei o vaitau ofoofogia o le talafaasolopito o le lalolagi!”
I lena tulaga, sa fautuaina ai i tatou e Peresitene Uchtdorf ia aua ne’i o tatou “momoe i le taimi atoa o le Toefuataiga.”20 E tatau ona tatou taufai faafetai uma ma faamaualaloina ua tuuina mai ia i tatou le avanoa paia e fesoasoani ai e tusi lenei mataupu i le tala faifai pea o le Toefuataiga.
O i tatou uma o molimau i le auala o loo faanatinatiina ai e le Alii Lana galuega o le faaolataga. Sa saunoa Elder Quentin L. Cook, “O le tele o mea mamafa o loo siiina i le faanatinatiina o le galuega o le faaolataga mo e uma o ola ma maliliu o le a faia e [le] autalavou.”21 I le avea ai ma faiaoga faalelotu e mafai ona tatou fesoasoani e saunia i latou ia sii na mea mamafa. E mafai ona tatou fesoasoani sili ia i latou, e pei ona fautua mai Peresitne Eyring i ni nai tausaga talu ai, e ala i le talosaga atu i le toatele o i latou, ae le o le toalaiti.22
A o siitiaina e tamaiti aoga lo latou aoaoina e ala i le auai soo i vasega, e ala i le faitau tusi i fafo atu o le vasega, ma e ala i le auai i iloiloga, o le a latou saunia e sili atu i lo se isi lava tupulaga na muamua atu.
O le tusitala ma le puipui i le FaaKerisiano o C. S. Lewis sa ia tusia, “O mea sili ona taua na tutupu i vaitausaga uma e le o tusia i a tatou tusi o talafaasolopito.”23Mo le silia ma le selau tausaga sa i ai lava i latou i seminare ma inisitituti e galulue leleoa ma ositaulaga e fesoasoani e aumai tagata ia Keriso. O le toatele o na tagata ma a latou tala o le a le tusia lava i se tusi. Ae ua tatou maua le faamautinoaga o le a iloaina lava. “O loo tusitusia leleoa e agelu o loo i o tatou luga ae,”24 ma o loo i ai se tusi ua tausia i se isi mea o le a aofia ai faatinoga taitasi uma—e aofia ai au faatinoga—na o loo fesoasoani i le Alii e faataunuu Lana galuega.
Sa tatou talanoa mo sina taimi i le asō e uiga i la tatou talafaasolopito. Ae a o tatou liliu atu ma tulimatai atu i le lumanai, o le a lelei atu ona manatua se saunoaga mai ia Elder James E. Talmage. “O valoaga” sa ia fai mai ai, “o se faamaumauga o mea a o lei tutupu. O talafaasolopito o se faamaumauga o mea ina ua uma ona tutupu; ma i ia mea e lua, o valoaga e ao ona sili atu ona faatuatuaina mo lona maoti i lo le talafaasolopito.”25
Ma o le a se mea o tau mai e le valoaga e uiga i lo tatou lumanai? Sa tau mai ia i tatou e le Perofeta o Iosefa Samita: “E leai se lima eleelea e mafai ona taofia le galuega mai le alualu i luma; … o le upumoni a le Atua o le a agai pea i luma ma le lototoa, mamalu, ma le tutoatasi, seia oo ina ulufia uma konetineta, asia uma itulagi, tafia uma atunuu, ma logo taliga uma, seia oo ina faataunuu faamoemoega o le Atua, ma fetalai ai le Ieova Sili ua maea le galuega.”26
Tau ina ia faamanuia mai le Alii ia i tatou taitoatasi i a tatou taumafaiga e faaaoga la tatou talafaasolopito ia manatua ai—ma ia faatino—a o tatou fesoasoani e aumai le manumalo mamalu o le galuega a le Alii. I le suafa o Iesu Keriso, amene.
© 2015 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania 6/15. Faamaonia le faaliliuga: 6/15. Faaliliuga o le “Remember and Act.” Samoan. PD10054335 890