Fuofua Feinga ke Maʻu ʻEku Leá
Fakamafola Satelaite ʻa e Semineli mo e ʻInisititiuti Fakalotú•4 ʻAokosi, 2015
Introduction
ʻOku ou houngaʻia ke ʻi heni fakataha mo kimoutolu, ʻoku ou fiefia ke kau ki he ngāué ni.
ʻI he teuteu ko ia ki he ʻaho ní, ne u fai ai ʻeku leá ki hoku fāmilí pea kole haʻanau fakamatala … pea naʻe meimei ke tokoni kotoa ʻenau fakamatalá. Ko e fakamatala ʻoku ou momou ke fakahaaʻi atú—pea ʻoku ou tui kuo teʻeki maʻu ʻe ha taha ʻo kimoutolu ʻi ha kalasi—naʻe mohe pē ʻa ʻAni ko ʻema taʻu 12 ʻi he meimei vaeuá pē. Ko ia ʻokú ma fakatauange ʻe kiʻi lelei ange ʻa e tatau ko ʻení!
Ne fakaafeʻi kimautolu ʻe Misa Seti Uepi he taʻu ʻe ua kuohilí ke tokoniʻi ʻetau kau akó ke nau ako e folofolá ʻi ha founga ʻe fakalolotoʻi ai ʻenau tui ki he Fakamoʻuí.1 ʻI he taʻu kuo maliu atú kuo tokolahi ange ha kau ako kuo nau lau e folofolá ʻi ha toe taimi kimuʻa. Ne aʻu hono ako fakatāutaha ʻo e folofolá ki ha houa ʻe 9 miliona tupu2. Fakamālō atu he ngāue ko iá!
ʻI he ʻaho ní, ʻoku mau loto ke toe vakaiʻi e fakaafe ko iá. Te ke lava nai ke tokoniʻi e tokotaha ako semineli mo ʻinisititiuti takitaha ke ʻuhingamālie ʻene ako e folofolá he ʻaho takitaha? Neongo pē ʻe ʻi ai ha ngaahi konga ʻo e Fuakava Motuʻá ʻe faingataʻa mo mahino hono laú ki heʻetau kau akó, ʻOku ou pē he ʻikai fie maʻu ke tau “fakaʻaongaʻi ha ngaahi founga olopoto ke [nau] saiʻia ai [ʻi he Fuakava Motuʻá].”3
Naʻe toe fakaafeʻi kimautolu ʻe Misa Uepi ke aleaʻi e “founga te mau toe nofo taha lahi ange ai he folofola ʻoku mau akoʻí.”4 Naʻá ne fai ha ngaahi fehuʻi lahi ki he ngāue ʻoku fai ʻe he ngaahi folofolá ʻi heʻemau faiakó. Kuo fakakauʻi lelei e fehuʻi ko iá ʻe hamou tokolahi. Fakamālō atu ki ai! Tau talanoa muʻa he ʻahó ni ʻo kau ki he fatongia ʻo e folofolá ʻi heʻetau teuteu ko ia ke faiakó?
Naʻe nofo ʻa Siosefa mo ʻEma ʻi Hāmoni ʻi Penisilivenia ʻi Mē ʻo e 1829. Ne ʻeva mai ʻa Hailame mo e ʻamanaki ke ne ako ki hono fatongia he ngaahi meʻa ʻoku hoko ʻi hono Fakafoki mai ʻo e ongoongoleleí. Naʻe fehuʻi e Palōfitá ki he ʻEikí pea naʻe fakamanatu ki ai ko e folofolá “ʻoku moʻui mo mālohi, pea māsila ange ʻi he heletā fakatoumata.”5 Ne akoʻi ʻe he Fakamoʻuí kia Hailame mo kitautolu ha tefitoʻi moʻoni mo ha meʻa mahuʻinga ʻi Heʻene fokotuʻu ha fakahokohoko mahuʻinga maʻá e kau faiakó: “ʻOua ʻe feinga ke malanga ʻaki ʻa ʻeku leá, kae fuofua feinga ke maʻu ʻeku leá, pea ʻe toki vete ho ʻeleló; pea kapau te ke loto ki ai, te ke maʻu leva ʻa hoku Laumālié pea mo ʻeku leá, ʻio ʻa e mālohi ʻo e ʻOtuá ki hono fakalotoʻi ʻo e kakaí ke tuí.”6
Maʻu ʻo e Leá: Kuo pau ke Tomuʻa Vela Hotau Lotó
ʻOku ʻikai ke toki kamata pē ʻetau faiakó ʻi hono teuteu ʻo ha lēsoni pe fakakaukauʻi e founga ʻe fakahoko ʻaki iá pe vakaiʻi ʻo e nāunau fakalēsoní.ʻOku kamata pē ʻetau ngāue fakafaiakó, ad fontes, pe ʻi he ngaahi matavaí7. Naʻe pehē ʻe Palesiteni Melioni G. Lomenī, ʻoku ʻikai ha toe teuteu fakafaiako lelei ange, ka ko e ako mei he tupuʻangá ʻa ia ko e folofolá.8 Kapau ʻoku tau loto ke akoʻi ʻaki e folofolá ha mālohi, mo ongoʻi heʻetau kau akó e moʻoní mo e mahuʻinga ʻo ha potufolofola, kuo pau ke kamata ʻaki ia ha ongoʻi foʻou mo ha vēkeveke fakatāutaha ʻiate kitautolu.9
Ne faleʻi mai ʻe Palesiteni Lomenī ʻo pehē: “Kuo pau ke tau ngāue mo ako … ke hoko e ngaahi akonaki [ʻa e ʻEikí] ko ʻetau ngaahi akonakí ia … pea te tau toki hoko leva ko ha kau faiako lelei ʻi he ongoongoleleí. Te tau mateuteu leva ke lea ʻi he mālohi mo e tui moʻoni. Kapau te tau toe teuteu ʻi ha founga kehe … ʻo ʻoatu pē ʻetau fakakaukaú pe fakakaukau ʻa ha niʻihi kehe [he ʻikai ke tau lava ha meʻa].”10
Maʻu e Folofolá: Ko e Meʻa ke Fekumi ki ai ʻi Heʻetau Akó
ʻI heʻetau fekumi ki ha founga ke maʻu ai e leá ke vela e folofolá ʻi hotau lotó, tuku ke u fokotuʻu atu ha founga faingofua ʻe ua ke hoko ia ko e meʻa pau ke tau fakahokó?
ʻUluakí, ʻoku tuʻunga kehekehe e mahuʻinga ʻo e ngaahi moʻoní, pea ʻe tāpuekina kitautolu mo ʻetau kau akó ʻi hono ako ke ʻiloʻi e faikehekehe ko ʻení.
Uá, ʻoku ʻi he folofolá e fakafehokotakiʻanga, sīpinga, mo e tefito,11 pea ʻoku kau he ngaahi meʻa mahuʻinga taha ʻoku tuhu ki he Fakamoʻuí ʻa e ngaahi fakataipé mo e ʻatá.
Fakatuʻutuʻunga ʻo e moʻoní
Naʻe tohi ʻe ʻEletā Niila A. Mekisuele e anga hono kamatá, ko hano “fakahokohoko ʻo e ngaahi moʻoní” he ʻoku ʻi ai ha ngaahi moʻoni ʻoku feʻunga ke tau mateakiʻi, ʻa ia ʻokú ne fokotuʻu mai ke tuʻumaʻu, pe talangofua mo faivelenga ki ai.
“ʻE lava pē ha meʻa ʻo fakatou moʻoni mo mahuʻinga. … He ʻikai ke ngata pē ʻi heʻetau fakafaikehekeheʻi e moʻoní mei he meʻa ʻoku ʻikai ke moʻoní, kae ʻiloʻi foki mo e ngaahi moʻoni ʻoku fie maʻu ke taukapoʻí.
“ʻOku tataki kitautolu ʻe he ongoongolelei o Sīsuú ki he foʻi moʻoni ʻoku fakatuʻutuʻunga e moʻoní; ʻoku ʻi ai ha ngaahi moʻoni ʻoku mahinongofua mo tuputupuʻa hono mahuʻingá mei ha niʻihi!”12
ʻOku fakamatalaʻi fakaikiiki mo tataki fakalaumālie e lahi taha ʻo e ngaahi potufolofola, te ne hanga ʻo fakamaʻalaʻala e ngaahi tefitoʻi moʻoni 13 ne fakataumuʻa ke nau fakamatalaʻí.14
ʻOku totonu ke tau hoko ko ha kau ako lelei ke fakatou ʻiloʻi e fakamatala fakaikiikí mo e tokāteline ʻi he folofolá. ʻOku mahuʻinga ke mahino ʻoku ʻikai ke ʻaonga e fakamatala fakafolofola taʻe ʻi ai ha tokāteliné. Ko e faʻahinga ako peheé “he ʻikai ke tau lavea ai kapau ʻoku ʻi ai e laumālié pe ʻikai ke tokoni mai kapau ʻoku ʻikai ke ʻi ai.”15 ʻI he tafaʻaki ʻe tahá, ʻoku ʻikai ke feʻunga hono akoʻi ʻoku ʻi ai ha ngaahi talanoa fakatāutaha, fakakaukau fakatāutaha, mo e ongo ʻoku maʻu he fealeaʻakí kae ʻikai ke ʻi ai e moʻoní mo e tataki fakalaumālié. Ko e lelei taha hono akoʻi ʻetau kau akó ko ha kau faiako ʻoku nau hoko ko e kau ako lelei taha ʻo e folofolá mo mahino kiate kinautolu e fatongia mahuʻinga ʻo e Laumālie Māʻoniʻoní.16
Kuó u fanongo ʻi hano fakamatalaʻi ʻo ha “faiako mateaki” ka naʻe ʻikai ako ha meʻa ia. Pea toe ʻi ai mo ha faiako fakaʻatamai ka naʻe ʻikai maʻu e laumālie ia ʻo e uluí. ʻOku ʻikai ke maʻu ʻe he faiako mateakí pe fakaʻatamaí ia e ngaahi fie maʻu ʻo e ako fakalotú. Naʻe pehē ʻe Misa Lōpeti J. Mātiu, “ʻOku ʻuhinga e foʻi lea ko e ‘tui fakalotú’ ki ‘hono haʻihaʻi.’ ʻOku fekauʻaki ia mo e foʻi lea ko e uouá, ʻa ia ʻokú ne haʻi e uouá ki he huí. ʻOku totonu ke haʻi ʻe he tui fakalotú ʻa e tokotaha ʻokú ne maʻu ia ki he ʻOtuá mo e ngaahi meʻa ʻoku toputapú mo māʻoniʻoní.”17.” Pea ko e meʻa ia ʻoku totonu ke falahoko ʻe he ako fakalotú maʻa ʻetau kau akó.
ʻOku faʻa fakamahinoʻi ʻe he fakamatala fakafolofolá ha moʻoni mahuʻinga. ʻI hono akoʻi fakataha ʻa e moʻoní mo e fakamoʻoní, te ne fakaafeʻi mai e fakahaá pea ʻe hanga ʻe he Laumālie Māʻoniʻoní ʻo ʻai ʻa e Fakaleleí ki heʻetau moʻuí,18 pea tupulaki ai ʻetau ului ki he Fakamoʻuí19 mo ʻetau tukupā ke muimui ki he palani ʻa e Tamai Hēvaní.
ʻOku kau ʻi he Fuakava Motuʻá ha “ngaahi talanoa mālie, ʻulungaanga fakafonua lelei, mo e ngaahi faʻu tohi fakaʻofoʻofa.”20 ʻOku mahuʻinga ke tau manatuʻi pea ʻai ke hā atu mei heʻetau faiakó, ʻoku ʻikai fakataumuʻa e potufolofolá ki he ngaahi fakamatala fakaikiiki ko ʻení. Hangē ko ia ne ʻosi akoʻi kiate kitautolú, “Naʻe tohi e ngaahi folofolá ke ne fakatolonga e ngaahi tefitoʻi moʻoní.”21 Ko e ngaahi tefitoʻi moʻoni ko ʻeni ʻo e ongoongoleleí “ko kinautolu ia e ʻuhinga mo e taumuʻa ʻo e ngaahi fakahaá.”22
Ko e taupotú, ʻoku fakatuʻutuʻunga e ngaahi tefitoʻi moʻoní, he ko e “ngaahi tefitoʻi moʻoni tefito ʻo ʻetau tui fakalotú e fakamoʻoni ʻa e kau ʻAposetoló mo e kau Palōfitá ʻo kau kia Sīsū Kalaisi.”23
Ko hono fakafaikehekeheʻi e fakamatala fakaikiikí mei he tefitoʻi moʻoní ko ha ngāue ia ʻe fai ʻi hono kotoa ʻo e moʻuí, mo hono ako ke ʻiloʻi e fakatuʻutuʻunga ʻo e ngaahi tefitoʻi moʻoni ko iá. Kapau te tau akoʻi kotoa e hisitōliá mo e fonó, mo e meʻa kotoa ki hono fakaheeʻi ʻo ʻIsilelí, pea ʻikai kau ai e pōpoaki ki he palani ʻa e Tamaí mo e Fakalelei ʻa e Fakamoʻuí ʻoku ʻi he Fuakava Motuʻá,24 ta ʻoku ʻikai ke tau akoʻi ʻe kitautolu e pōpoaki ʻo e Fuakava Motuʻá.25
Naʻe fakamatalaʻi moʻoni pē au ʻe Paula mo ha niʻihi ʻo ʻetau kau akó, ʻi heʻene pehē ʻoku ʻi ai ha veili “ʻoku teʻeki ke toʻo ia mei hono lau ʻo e fuakava motuʻá.” Naʻá ne tuku mai ha solovaʻanga ki he meʻá ni ʻi heʻene pehē “ʻoku toʻo atu e veilí ʻia Kalaisi,” pea “ʻi he taimi ʻe tafoki ai [hotau lotó] ki he ʻEikí, ʻe toʻo atu leva e veilí.”26
Kapau ʻe fakatefito ʻetau faiakó ʻi he Fakamoʻuí, 27 pea kapau te tau lava ʻo tokoniʻi ʻetau kau akó ke tafoki atu ʻenau fakakaukaú mo e lotó kiate Ia, ʻe toʻo atu leva e veilí mei heʻenau lau e Fuakava Motuʻá. Pea mahalo ko e meʻa ʻoku mahuʻinga angé, ʻi he ako ʻetau kau akó ke fekumi ki he Fakamoʻuí ʻi heʻenau ako e folofolá, te nau ako ai ha lēsoni ʻoku faitatau pea kamata ke ako ke fekumi kiate Ia mo e tākiekina ʻa e Tamai Hēvaní ʻi heʻenau moʻuí.
Ko ha Sīpinga ʻo e Fakatuʻutuʻungá
Te u ʻoatu ha foʻi fokotuʻu ʻe taha te ne tokoniʻi kitautolu ke tau ʻiloʻi ʻa e moʻoní ʻi he folofolá: Fili ha potufolofola, lau ia pea fehuʻi kiate koe, “Ko e hā e fakaikiiki ʻoku ʻi he potufolofolá?” Laineʻi e kakaí, feituʻú, taimí, mo e taimi ʻo e talanoá. Sio leva ki he puipuituʻa fakalukufua ʻo e potufolofolá, pea laineʻi kotoa e fakamatala fakaikiiki ʻo e puipuituʻa te ke maʻú. Pea hangē ko hono fokotuʻu mai heʻetau tohi tuʻutuʻuní, fakatokangaʻi e “mavahevahe fakanatulá”28 ʻa ia ʻoku fetongi ai e ongó pe fakamatalá.
Toe sio leva ki he potufolofolá, pea fehuʻi pē kiate koe, “Ko e hā ha ngaahi tefitoʻi moʻoni pe moʻoni ‘ʻi heni ke fakaʻaongaʻi,’29 pea ka mahino, ʻe ‘[iku] ai ki he talangofuá’?”30 Ako e tuʻunga fakalūkufua fakatokāteline ʻi he potufolofola ko iá. Fakaʻilongaʻi kehekehe ʻo e tefitoʻi moʻoni takitaha peá ke toki fakaʻilongaʻi e fakamatala fakaikiikí. Kapau ʻoku kau ai ha ngaahi tefitoʻi moʻoni,31 tuku ha taimi ke ke hiki ia.
Kapau ʻe fakatokangaʻi e ngāué ʻe ʻuluaki faingataʻa. ʻE fie maʻu ki ai ha taimi mo ha tokanga lahi. Ko e konga ʻo e tāpuaki ki hono fai e foungá ni ko hono fakaafeʻi kitautolu ke tau toutou ʻeke, “Ko e hā ʻa e fakamatala fakaikiiki ʻi he potufolofolá ni, pea ko e hā e ngaahi tefitoʻi moʻoni ʻoku nau taumuʻa ke akoʻí?”
Hangē ko ia ne tau ʻosi talanoa ki aí, ʻoku ʻi ai ha ngaahi tefitoʻi moʻoni ʻe niʻihi ʻoku mahuʻinga ange ia he niʻihi; ʻoku maʻu ai ha tataki fakalaumālie, moʻui, mo e fakamoʻui lahi ange he ʻoku nau tuhu ki he Fakamoʻuí. Toe vakai leva ki he potufolofolá, ʻi ha faʻahinga founga ʻe taha, pea fehuʻi, “ʻOku fakataumuʻa fēfē e potufolofolá ni32 ke tuku ai ʻeku tokangá ki he Fakamoʻuí? Ko e hā ha meʻa heni ʻe maʻu ai ha mahino, houngaʻia, mo fakafalala lahi ange kiate Ia mo e palani ʻa e Tamai Hēvaní?”
Fakaʻosí, fakakaukauʻi fakalelei e meʻa ne lea ʻaki ʻe he kau palōfita ʻo onopōní te ne tānaki mai ha fakakaukau, mahino, mo ha tataki fakalaumālie ki he potufolofolá.
Hili hono akoʻi he foungá ni, ko e taimi ko ia te tau sio ai ki he nāunau fakalēsoní, maʻu e mahino ʻoku lahi angé, fokotuʻutuʻu, mo e fakahinohino ʻoku ʻi aí ʻe kau fakataha leva ia mo e fakakaukau, ueʻi fakalaumālie, mo e aʻusia ʻoku tau maʻu he folofolá mo e ngaahi lea ʻa e kau palōfitá. ʻOku fakapapauʻi mo fakalahi mai ʻe he nāunau fakalēsoní ʻa ʻetau mateuteu ke lea ʻaki e folofolá ʻi he mālohi.
Hangē ko ʻení, ʻi heʻetau ako e tohi ʻa Luté he taʻu ní, ʻoku tau sio ki ha talanoa fakaʻofa ʻo e mole mo e moʻui mateaki. Pe ʻi hono fakakaukauʻi ʻo e ngaahi moʻoni mahuʻingá, te tau fakatokangaʻi e mole e husepāniti ʻo Luté, peá ne fononga ki Pētelihema33 ʻo ne feʻiloaki ai mo Poasi. Ne tau ʻiloʻi hono tokangaʻi ʻe Poasi e fie maʻu ʻa Luté, ʻoange ʻene mā mo e vaimahi, 34 pea hoko ko hono fakalaloa he matapā ʻo e koló,35 mo hono kāinga ʻa ia ʻoku fakatonuleaʻi ko e “taukapó,” 36 ʻone fakatau ʻa Lute, 37ʻo maʻu ia ko hono uaifi, 38pea ʻikai pē ke mālōlō kae ʻoleva ke ne pehē, “Kuo ʻosi. 39” Te tau kamata ongoʻi leva mei ai ʻa e fakamoʻoni ʻo e ʻofa mo e huhuʻi ne fakataumuʻa ki aí pea pehē ki he fakamaama mo e tataki fakalaumālie ʻi hono ʻiloʻi ʻoku fai ʻe he ʻEiki Pulé40 e meʻa tatau maʻatautolu fakatāutaha.
Ko e founga faingofua ʻeni ʻe taha ʻo e fekumi ʻi he folofolá. ʻE tokoniʻi ʻe he faiako ʻoku tokangá e tokotaha akó fakatāutaha ke ne aʻusia e faʻahinga ako tatau peheni ʻi he hoko ʻa e tokotaha akó ʻo fakafalala fakalaumālie pē kiate iá.41
ʻE kāinga, ʻi he peesi takitaha ‘o e folofolá, ʻoku tau fai ha fili te ne tākiekina e mālohi ʻo e faiakó mo e akó ʻi heʻetau kalasí. ʻOku anga peheni e filí: Ko e moʻoni fē te tau tataki ki ai e fakakaukau mo e loto mo e tui ʻetau kau akó? ʻOku hanga ʻe he fili ko ʻení ʻo fakahoko ha fuʻu meʻa makehe ʻi he konga ʻo e folofola ʻoku ʻi honau ʻatamaí mo e moʻuí. 42 Kapau ʻoku ʻikai ke tau faivelenga ʻi he meʻa ni, kapau ʻoku ou fili e konga siʻisiʻi ange ʻo e moʻoní ke “tataki ʻeku faiakó,” pea ʻe tatau leva ia mo e meʻa ne akoʻi ʻe Palesiteni Eyring, “Ne u meimei loto foʻi ke tokoniʻi ha tokotaha ako ke ne matuʻuaki e tākiekina kovi ʻo e māmaní.”43
Fakafehokotakiʻangá, Tefitó mo e Sīpingá
Fakataha mo hono fakatokangaʻi ʻo e fakatuʻutuʻunga ko ʻeni ʻo e moʻoní, ko ha fakakaukau faingofua hono ua ʻe lava ke tokoni ʻi heʻetau maʻu e folofolá ko e fonu ʻa e folofolá he ngaahi fakafehokotakiʻanga, tefito, mo e sīpinga. Tuku ke u ʻoatu ha sīpinga takitaha mei he Fuakava Motuʻá?
Ngaahi Fakafehokotakiʻangá
Naʻe fakamatalaʻi ʻe ʻEletā Tēvita A. Petinā “ko e fakafehokotakiʻangá ko ha fekāingaʻaki pe fakafehokotaki ʻo e fakakaukau, kakai, meʻa, pe ngaahi meʻa ʻoku hoko.”44
Ko ha fehokotakiʻanga te tau fakatokangaʻi mei he Fuakava Motuʻá ʻa e lahi ha ngaahi talanoa ʻo e lavameʻá mo e taʻemalavá, pea ʻoku akoʻi e fakataha pē e ngaahi talanoá ni: Keini mo ʻĒpeli, Siosefa mo hono ngaahi tokouá, Sēkope mo ʻĪsoa, ʻApikeli mo Natape, mo e ngaahi talanoa lahi kehekehe.
Ne fakatokangaʻi ʻe Palesiteni ʻAealingi e kī ko ʻení: “ʻOku ʻata mai mei [hono] fakamatalaʻi ʻo e ʻikai lava ha meʻá ha founga ki he lavameʻá … heʻe lava ʻe he toutou hoko ʻa e siakale ʻo e tōlalo fakalaumālié mo e fakaakeaké… ʻo maʻu ha fakahinohino mo ha ʻamanaki lelei ki hoʻo kau akó.”45
Tefitó
Naʻe toe fakamatalaʻi ʻe ʻEletā Petinā “ko e ngaahi tefitó ʻoku fakaʻaongaʻi he tohí kotoa, toutou hoko, mo e ngaahi meʻa lelei pe fakakaukau ʻoku fāitaha, ʻo hangē ha fetuiaki ha filo ʻo maʻu ai ha kofú ʻi hono kotoa e folofolá.”46 Ko ha tefito ʻe lava ke tau fakatokangaʻi he taʻu ní ʻoku maʻu ia he pupunga lea ko ʻení: “pea te mou ʻilo ko au ko [e ʻEiki] ko homou ʻOtua.”47
Naʻe tala ki he fānau ʻa ʻIsilelí he lolotonga e ngaahi fakamamahi kimuʻa honau fakahaofí, pea pehē ki he ngaahi mana ne hoko atu aí, ʻi he ngaahi meʻa ko iá “ke mou ʻilo ko au ko [e ʻEikí].”48
ʻOku lekooti kotoa hono tamateʻi ʻo Kolaiaté,49 fakamoʻui ʻo Neamaní,50 ʻIlaisiā mo e kau taulaʻeiki ʻa Pealí,51 mo e aʻusia toputapu mo molumalu ʻa Taniela mo e Tuʻi ko Nepukanesá 52 mo ha taumuʻa ke fakahā “ke hoko ʻo ʻilo ʻe māmani kotoa pē ʻoku ai ha ʻOtua ʻo ʻIsileli.”53
ʻI hono kotoa e ngaahi tohi ʻo e Sāmé,54 ʻĪsaia,55 mo ʻIsikeli,56 mo e ngaahi tohi ʻe 17 ʻo e Fuakava Motuʻá, pea mo e taimi kehekehe ʻe 80 tupu, ne toutou fakapapauʻi mo fakamanatuʻi ʻe Sihova ki ʻIsileli mo kitautolu ke tau mamata kiate Ia mo Hono toʻukupú ʻi he ngaahi meʻa ʻoku hokó mo e ngaahi akonaki ʻo e Fuakava Motuʻá koeʻuhí ke tau lava mo ʻetau fānaú “ke nau ʻilo mei he hopoʻanga laʻaá, pea mei he lulungá, … ko au ko [e ʻEikí], pea ʻoku ʻikai mo ha taha.”57
ʻI heʻetau ako e ngaahi tefito fakafolofolá ʻi he tafaʻaki foʻou ʻo e ngaahi kalasi ʻinisititiutí,58 ʻe “fehaʻiʻaki e folofolá ʻi ha founga ʻe tohoakiʻi ʻetau tokangá ki ha folofola ʻe taha lolotonga [ʻetau] ako ki ha folofola ʻe taha.”59Kapau ʻe hoko e folofolá ko e tefito ia ʻo e ngaahi kalasí ni, ʻe “tutupu fakataha” e folofolá pea ʻomi ai ʻetau kau akó ke “ʻilo ki [heʻenau] ngaahi fuakavá.”60 Naʻe pehē ʻe ʻEletā Petinā, “ʻOku tataki kitautolu … ʻe he founga ʻo e fekumi mo hono ʻiloʻi e tefito fakafolofolá ki he … moʻoni ʻoku taʻengatá ʻo ne fakaafeʻi mai ai e fakamoʻoni pau ʻa e Laumālie Māʻoniʻoní. … Ko e meʻa faingataʻa mo fefeka tahá ʻa e anga ko ʻeni hono maʻu ʻo e vai moʻuí mei he tanakiʻanga fakafolofolá; ka ʻoku toe maʻu ai mo e fakamaama lahi tahá.”61 Kau faiako, ʻe fie maʻu ha meʻa lahi ange meiate kitautolu, kae ʻikai ko ha meʻa siʻi.62
Sīpinga mo e ʻata ʻo Kalaisí
Mei he ngaahi sīpinga lahi ʻo e Fuakava Motuʻá,63 ʻoku ʻi ai ha teftitoʻi sīpinga e taha ʻokú ne fakaafeʻi ʻetau tokangá mo e feingá. Ko hono moʻoní ia, ko e sio ki he ngaahi fakamoʻoni ʻa e Tamai Hēvaní mo e Fakamoʻuí. Naʻe pehē ʻe ʻEletā Pulusi R. Makongikī, “ʻOku … totonu ke sio ki he ngaahi faitatau ʻo Kalaisí he feituʻu kotoa pē pea toutou fakaʻaongaʻi kinautolu ke tauhi maʻu ia mo ʻene ngaahi fonó ʻi hotau ʻatamaí.”64
ʻOku hangē pe hono kamata ke lisi e ngaahi fakataipé mo e ʻata ʻo e Fakamoʻuí ko hono lau e tulutā ʻo e vaí ʻi ha vaitafe pe malama ʻo e laʻaá ʻi ha ʻaho laʻā. Ko hono fakakātoá, “mo e ngaahi meʻa kotoa pē ʻa ia kuo ʻomai ʻe he ʻOtuá talu mei he kamataʻanga ʻo e māmaní, ki he tangatá, ko e fakataipe ia kiate ia.”65
Naʻe fakataumuʻa moʻoni e Fakatupú,66 ngata palasá,67 maná,68 hono fakahaofi ʻo ʻIsileli mei he nofo pōpula ʻi ʻIsipité ʻaki e taʻataʻa ʻo e lami ne vali he kau matapaá,69 mo hono kotoa e fono ʻa Mōsesé, mo hono ngaahi founga feilaulaú mo e fakamanatú, ke hoko “ko hotau takiakiʻi ʻa e fonó kia Kalaisi.”70
Ko e loto fiemālie ʻa ʻĒpalahame71 ke feilaulauʻi ʻa ʻAisaké72; ngaahi hingoa ʻo Melekisētekí,73 kau ai e “Pilinisi ʻo e melinó”74; ko hono fakahaofi ʻe Siosefa hono ngaahi tokoua ne nau fakatau iá 75; mo hono fakahaofi ʻe Mōsese76 e fānau ʻo ʻIsilelí ʻo nau hoko ko e fakatātā “ʻo ia ʻe haʻu ʻamuí.”77
Ko ha tangata ʻa ʻĀtama ne ʻikai haʻane angahala ka78 naʻá ne fili loto fiemālie lolotonga ʻene ʻi he ngoué79 ke foaki ʻene moʻuí ka tau moʻui.80
Naʻe fakakaukau ʻa e tuʻí “ke fakanofo ʻa Taniela ko e pule ki he puleʻangá kotoa pē, koeʻuhí ko e ʻatamai lelei naʻe ʻiate iá.”81 Ka ko e “kau pule mo e houʻeiki,”82 ne nau maʻu e mafaí ne nau fehiʻa kia Taniela ʻo, “kumi ha meʻa hala kiate [ia] … ka naʻe ʻikai te nau ʻiloʻi ha kovi.”83 Pea naʻe “fakataha … [mo] alea fakataha,” e kau tangata angakoví ni 84 ka ʻi he taimi ko iá, ne ʻalu ai ʻa Taniela ki hono falé,85 ʻo fai haʻane lotu.86 ʻI hono ʻafioʻi ʻe he tuʻí e meʻá ni “ne tokanga lahi hono lotó … ke fakahaofi ʻa Taniela.”87 Hili hono ʻave ʻa Taniela ki ha mateʻanga pau, “pea ʻomi ha maka ʻo ʻai ki he ngutu ʻo e ʻaná.”88 Ne hoko ai e tuʻu pongipongi hake ʻa e tuʻí “ʻo hengihengi ʻaupito, ʻo [ʻalu] fakavave ki he ʻana ʻo e fanga laioné”89 ʻo ʻilo naʻe ʻi ai ha ʻāngelo90 pea “toʻo hake ʻa Taniela mei he ʻaná, pea naʻe ʻikai ʻilo ha lavea siʻi ʻiate ia.”91
Naʻe pehē ʻe ʻAlifeleti ʻEtasaimi ʻoku “fakataumuʻa kotoa e [Fuakava Motuʻá] ke tuhu ki [he Fakamoʻuí]. … ʻOku ʻikai ko e fonó pē ʻa e fai fakahinohinó … pe ngaahi sīpingá, ʻa ia ko e ngaahi ʻata ʻo [Ia], pe ko e ngaahi kikité, ʻa ia ʻoku lau kiate [Iá]; ka ʻoku fonu kotoa e Fuakava Motuʻá ʻia Kalaisi. … Ko e meʻa ʻeni ʻoku hokó: ʻa ia ko ʻeni … ʻe feʻunga pe mahuʻinga hono ako e Folofolá ke tau ako ai ke ʻilo [e Fakamoʻuí].”92
Feinga ke tuku ha taimi ʻi he kotoa hoʻo kalasí, pea aʻu pē ki hotau ʻapí mo e fāmilí, ke ʻeke ki hoʻo kau akó mo e fānaú e meʻa ʻoku nau akó mo e anga ʻene tokoni ke mahino mo nau falala ai ki he Tamai Hēvaní mo e Fakamoʻuí? Pea mei he ʻuluaki ʻaho hoʻo kalasí, te ke lava nai ke akoʻi hoʻo kau akó ke nau fekumi fakamātoato ki he ngaahi fakamoʻoni fakaʻofoʻofa ko ʻeni naʻe fakataumuʻa moʻoni ki ai e kau faʻu tohi ne tataki fakalaumālie ko ʻení?
Aofangatuku
Kāinga, ʻoku ʻikai lava ke fetongi e fatongia ʻo e folofolá ʻi hotau akoʻí pea pehē ki heʻetau teuteu ke faiakó! Manatuʻi ange muʻa ʻa e fakatokanga meia Palesiteni Lomenī:
“Ko hotau fatongia ke vahevahe ʻa e meʻa ko ia ʻoku tau maʻu mei he ʻEikí (ʻa e folofolá) pea mo kinautolu ʻoku tau akoʻí. Taimi ʻe niʻihi [te tau] feinga ke vahevahe ha meʻa kae ʻikai ke tomuʻa maʻu ia.
“… [Te tau mei malava] ke ʻalu atu ʻo malanga kimuʻa pea toki [ʻoange] ha faingamālie ki he ʻEikí ke ne teuteuʻi [kitautolu]. 93
ʻI he laumālie ko iá, tuku ke u tānaki atu ha ngaahi fehuʻi siʻi ki he meʻa ne tau maʻu he taʻu kuo ʻosí meia Misa Uepi mo fakaafeʻi ke tau fakakaukauʻi kinautolu ʻi heʻetau teuteu ke faiakó?
ʻOku kamata ʻaki nai ʻeku teuteu ki he kalasí ha fekumi ʻi he folofolá?
ʻOku ou fiefia nai94 he ngaahi folofola ʻoku ou akoʻi he ʻaho ní, pea ʻoku nau “hoko ʻo vela ʻi hoku ngaahi huí.”95
ʻOku mahino nai kiate au e fakaikiiki mo e tokāteline ʻoku loto e tokotaha faʻu tohi ne tataki fakalaumālié ke mahino mou sio ki aí?
Kuó u fekumi nai ʻi he ngaahi lea ʻa e kau palōfitá ki heʻenau fakamamafa, ʻilo, mo e fakamoʻoni fekauʻaki mo ha konga lea?
Kuó u fekumi nai ʻi he meʻa kotoa pē ke ʻilo e founga ʻoku fakamoʻoni ai e potufolofolá ki he Fakamoʻuí mo ʻEne Fakaleleí?96
Fakatauange ʻe hoko ʻa e folofolá ko ha heletā fakatoumata 97 ʻi hotau ngaahi lokiakó koeʻuhí ke vela ia ʻi hotau lotó! ʻOfa pē ke tau maʻu ʻa e vilitaki ke fakafaikehekeheʻi e fakamatala fakaikiikí mei he tokāteline ʻoku fie maʻu ke mateakiʻí! Fakatauange ke tau tokoniʻi ʻetau kau akó ke nau ako ke ʻilo e ngaahi fakamoʻoni fakafolofola fakaʻofoʻofa ki he palani ʻa e Tamai Hēvaní mo Hono ʻAlo ʻOfaʻanga Pē Tahá! 98
ʻOku ou tānaki atu ʻeku fakamoʻoní kiate kimoutolu, tautefito ki he ʻofa ʻa e Tamai Hēvaní 99 ʻoku hā mo maʻu mei he Fakalelei fakaofo ʻa Hono ʻAló. ʻOku ou fakahā ʻeku houngaʻia ki he faingamālie fakaʻofoʻofa ʻo e hoko ko ha konga fakaʻofoʻofa ʻo hono toe Fakafoki mai ʻo e Ongoongoleleí ʻa ia ʻoku tokoni ke ʻiloa ai Hono huafá ʻi he māmaní kotoa ʻo taʻengatá,100 ʻi he huafa ʻo Sīsū Kalaisí, ʻēmeni.
© 2015 ʻe he Intellectual Reserve, Inc. Maʻu ʻa e totonu fakalao kotoa. Fakangofua ki he lea faka-Pilitāniá 6/15. Fakangofua ke liliú: 6/15. Ko Hono Liliu ʻo e “First Seek to Obtain My Word.” Tongan. PD10054335 900