Ko e ʻAho Sāpaté

Chad H. Webb

Pule, Semineli mo e ʻInisititiuti Fakalotú

Fakamafola Satelaite ʻa e Seminelí mo e ʻInisititiuti Fakalotú •4 ʻAokosi , 2015

ʻOku fakafiefia ke ʻi heni mo kimoutolu he ʻahó ni pea mo e ngaahi ako fakaʻofoʻofá. ʻOku fakafiefia ʻaupito ke tau ʻi heni. Fakatauange ke mou ʻiloʻi ʻeku ʻofa, mo ʻeku houngaʻia, mo e fakaʻapaʻapa lahi kiate kimoutolu hono kotoa ko e ngaahi meʻa kotoa ʻoku mou faí. ʻOku fakafiefia ʻaupito ke ʻi heni hoku uaifi ko Kilisitií. ʻOku fakamanatu ʻa e taʻu 25 ʻo ʻema nofo malí ʻi heʻ ahó ni, pea ne ma pehē ko ha tāpuaki ia ke vahevahe mo ʻema ngaahi kaungāmeʻa ofi ʻe toko 98,000 tupu. Ko ha ngaahi meʻa fakaʻofo ia ʻoku mou fai mo hoʻomou malí ʻi he houalotu ko ʻení. ʻOku mau fakamālō atu koeʻuhí ko hoʻomou ngaahi tokoní and fakamalō ko hoʻomou ʻi heni he ʻahoní. ʻOku fakaʻofoʻofa ʻaupito ke tau kau fakataha ʻi he ngāue ko ʻení mo kimoutolu.

Naʻe fai ha ako ki he kau Taki Māʻolungá ʻi he konifelenisi lahi fakamuimuí ʻo kau ki hono tauhi ʻo e Sāpaté pea ke hoko ia ko ha ʻaho fakafiefia. ʻOku ngāue fakataha e ngaahi kōlomu pule ʻa e Siasí ʻi ha ngāue mahuʻinga fakamāmanilahi ke akoʻi e mahuʻinga hono tauhi ʻo e ʻaho Sāpaté ʻi he siasí pea ʻi ʻapi. Kuo akoʻi ʻi he ngaahi fakataha alēlea fakaʻēliá, fakafekauʻakí, mo fakasiteikí. Kuo akoʻi ʻe he kau palesiteni fakasiteikí e kau pīsopé, pea te nau fetakinima ke akoʻi e kāingalotu honau siteikí mo e uōtí.

Ako ʻoku Fai ki he Kau Taki ʻo e Siasí

Kuo ʻoatu ha ngaahi vitiō ako mei he kau Taki Māʻolungá pea ʻe tuku ia ki heʻetau uepisaití.¹ ʻOku ou ʻamanaki pē te mou vakaiʻi, mo toe vakaiʻi fakalelei mo fakaʻaongaʻi e ngaahi maʻuʻanga tokoni mahuʻinga ko ʻení. ʻOku ou loto ke mou sio he ʻahó ni ki ha lea ʻe ua mei he ako ko iá. Te mou ʻuluaki fanongo kia Palesiteni Lāsolo M. Nalesoni. ʻE hoko atu ai ʻa ʻEletā M. Lāsolo Pālati.

Palesiteni Lāsolo M. Nalesoni: “ʻE kāinga, ʻoku ou fakahaaʻi atu ʻeku ʻofa mo e houngaʻia lahi ʻiate kimoutolu takitaha. …ʻOku nofo taha e tokanga mo e hohaʻa ʻa e Kau Palesitenisī ʻUluakí he pongipongí ni ʻiate kinautolu kotoa ʻoku hē mei he siasí, taʻeʻiloa, mo māmālohí. ʻI heʻetau nofo taha he palopalema ko iá, ʻoku mau loto ke tokanga taha ke ʻoua naʻa hoko ha ngaahi palopalema pehē. ʻE nofotaha ʻetau ako he ʻaho ní mo ʻapongipongi ʻi hono langaki e tui ki he ʻOtuá, tui ki he ʻEiki ko Sīsū Kalaisí, langaki e tui ki Heʻene Fakaleleí. … ʻI heʻeku hoko ko ʻEne ʻAposetolo kuo fakanofó, ʻoku ou houngaʻia koeʻuhí ko e fatongia kuo nau ʻomi kiate au te u lea kiate kimoutolu ʻi he taumuʻa ko ʻení. Ko e fekau ko ia ʻa e ʻEikí ke fakatapui e ʻaho Sāpaté mo tauhi ke toputapú ko ha fatongia kuo pau ke tau matuʻaki tokanga ki ai. Kapau te tau lava moʻoni ke fai ia—kapau te tau lava moʻoni ke fai ia—te tau tokoniʻi ai hotau kāingalotú ke langaki ʻenau tui ki he ʻEikí mo fakalolotoʻi ʻenau ului kiate Iá mo Hono Siasí. … ʻI heʻetau ako ke fakatapuʻi lelei ange e ʻaho Sāpaté, ʻe tupulaki e tuí ʻi he māmaní.”

ʻEletā M. Lāsolo Pālati: “ʻE kāinga ʻoku mau talitali lelei kimoutolu ki he fakataha ako konifelenisi ko ʻení. Ne fakaʻaongaʻi ʻe he Kau Palesitenisī ʻUluakí mo e Kōlomu ʻo e Toko Hongofulu Mā Uá ha ngaahi houa lahi ʻi he ngaahi māhina lahi kuohilí ke toe vakaiʻi e fakatotolo ʻoku maʻu fekauʻaki mo e tokāteline mo e ngaahi tefitoʻi moʻoni ʻa e Siasí ʻokú ne fakatupulaki e tui ki heʻetau Tamai Hēvaní pea mo e ʻEiki ko Sīsū Kalaisí mo ʻEne Fakaleleí. ʻOku mou ʻiloʻi e hokohoko ʻemau hohaʻa ki he ului ʻoku tolongá, tauhi ʻo e fuakavá, toʻutangata lahi ʻoku mālohi he Siasí, mo hono fakamālohia fakalaumālie e kāingalotu ʻo e Siasí. Mei he ngaahi liliu kotoa ʻo e ako fakahoualotú pe tuʻutuʻuní pe tokāteline te ne lava ke fakavaveʻi e ngāue ʻo e fakamoʻuí ʻi he taimi ní, ʻoku mau fakapapauʻi ko e meʻa te ne tākiekina lahi taha e kāingalotú mo e ngaahi fāmilí ke ofi ange ki he ʻEiki ko Sīsū Kalaisí ko hono hikiʻi hake e tuʻunga fakalaumālié.”

Naʻe lea ʻa Palesiteni Nalesoni ki ha hohaʻa fekauʻaki mo e nofonoá mo ha fie maʻu ke fakamālohia e tui kia Sīsū Kalaisí mo ʻEne Fakaleleí. Naʻá ne palōmesi “ʻi heʻetau ako lelei ange ke fakatapuʻi e ʻaho Sāpaté, ʻe tupulaki e tuí ʻi he māmaní.”

ʻOku ou tui naʻa mou fakatokangaʻi naʻe pehē ʻe ʻEletā Ballard, “Mei he ngaahi liliu kotoa he houalotú pe tuʻutuʻuní pe ako fakatokāteliné te ne lava ke fakavaveʻi e ngāue ʻo e fakamoʻuí he taimi ní, kuo mau fakapapauʻi ko hono hikiʻi hake e tuʻunga fakalaumālié mo e mālohi ʻo e ʻaho Sāpaté ʻa e meʻa te ne tākiekina lahi taha ʻo tohoakiʻi ai e kāingalotú mo e ngaahi fāmilí ke ofi ange ki he ʻEiki ko Sīsū Kalaisí.”²

Ko e Fatongia ʻo e Seminelí mo e ʻInisititiuti Fakalotú

ʻI he ngāue fakamāmani lahi ko ʻení, kuo fekauʻi fakahangatonu ʻe he Poate Ako ʻa e Siasí ki he Seminelí mo e ʻInisititiuti Fakalotú ke tokoni ʻaki hono fakafoʻou ʻetau tokangá ki hono akoʻi ʻo e tefitoʻi moʻoni ki hono tauhi ʻo e ʻaho Sāpaté mo e tokāteline ʻoku fekauʻaki mo e sākalamēnití pea maʻu e tokoni ʻa e toʻutupú mo e kakai lalahi kei talavou ʻo e Siasí ke nau feinga ke mahino lelei ange mo moʻui ʻaki e ngaahi tefitoʻi moʻoni ko ʻení. Te tau fai ia ʻaki hono fakamamafaʻi e ngaahi tefitoʻi moʻoni ko ʻení ʻi heʻenau ʻasi fakanatula ʻi hono fakahokohoko ʻetau akoʻi ʻo e folofolá mo ʻetau fokotuʻutuʻu e lēsoní. Ko ha faingamālie fakaʻofoʻofa ʻoku tau maʻu ke fakatahaʻi hotau iví mo kinautolu kuo fakamafaiʻi ke tataki kitautolu ko e kau palōfita, tangata kikite, mo e kau maʻu fakahā. ʻI hono fai iá, te tau fakahoko lelei ange ai ʻetau taumuʻa ke tokoniʻi e toʻutupú mo e kakai lalahi kei talavoú ke mahino mo falala ki he ngaahi akonaki mo e Fakalelei ʻa Sīsū Kalaisí.

Ke fakamahinoʻi e founga te tau akoʻi ai e ngaahi tefitoʻi moʻoni kau ki he Sāpaté mo e sākalamēnití ʻi ha founga ʻe tupulaki ai e tui kia Sīsū Kalaisí, kuó u fili ha ngaahi sīpinga tefito mei he Fuakava Motuʻá koeʻuhi he ko e tokolahi ʻo kimoutolu te mou akoʻi e Fuakava Motuʻá ʻi he ngaahi māhina ka hokó.

Ko e ʻAho Sāpaté

1. Ko e Sāpaté ko ha fakaʻilonga ia mei he ʻEikí maʻatautolu

Ko e taha e tefitoʻi moʻoni mahuʻinga fekauʻaki mo e ʻaho Sāpaté ʻoku maʻu ia ʻi he ʻEkesōtosi 31 :

“Ko e moʻoni te mou tauhi hoku ngaahi sāpaté: he ko e fakaʻilonga ia ʻiate au mo kimoutolu ʻi homou ngaahi toʻutangata kotoa pē; koeʻuhí ke mou ʻilo ko au ko [e ʻEikí] ʻoku ou fakatapuʻi ʻa kimoutolu. …

“Ko ia, ʻe tauhi ʻa e sāpaté ʻe he fānau ʻa ʻIsilelí … ko e fuakava maʻu ai pē ia.”³

ʻOku mahuʻinga kiate kitautolu e foʻi fakakaukau ko e Sāpaté ko ha fakaʻilonga ʻo e fuakava ʻa e ʻOtuá koeʻuhí he ʻoku tau fehangahangai kotoa mo ha faingataʻa, ʻa ia ko e “pea ʻoku ʻikai ha meʻa ʻoku taʻemaʻa ʻe nofo mo e ʻOtuá,⁴ he ʻoku tau ʻiloʻi “kuo faiangahala kotoa pē, pea tōmui ʻi he fakamālō mei he ʻOtuá.”⁵ ʻOku hā ʻi he Tokāteline mo e Ngaahi Fuakava 60:7, ʻa hono solovaʻangá ʻa ia ko e, “ʻOku ou mafai ke ngaohi ʻakimoutolu ke māʻoniʻoni.” Pea ʻoku fakahoko moʻoni ʻeni ʻia Sīsū Kalaisí, ko e tokotaha tefito ia ʻi he palani ʻo e huhuʻí. Pea hangē ko e akonaki ʻa e ʻAposetolo ko Paulá, “He kuo fakatau [ʻakitautolu] ʻaki ʻa e totongi.”⁶

Ko e totongi ko iá ko e moʻui, faingataʻaʻia, mo e pekia ʻa e ʻAlo haohaoa ʻo e ʻOtuá. Ko e hā leva ha fakamoʻoni ki he fakataú? Ko e hā e fakaʻilonga naʻe ʻosi fai e totongí? Ko e Sāpaté ko ha fakaʻilonga tuʻumaʻu hono fakahoko e fuakava ʻa e ʻOtuá mo Heʻene fānaú, ko e fakaʻilonga ʻokú Ne malava ke ʻai ke tau māʻoniʻoni.

2. Ko e Sāpaté ko ha fakaʻilonga meiate kitautolu ki he ʻEikí.

ʻOku ʻikai ke ngata pē he hoko ʻa e Sāpaté ko ha fakamoʻoni ki he fakataú, ko e fakaʻilonga ʻoku fakamāʻoniʻoniʻi kitautolu ʻe he ʻEikí. Ka ko ha toe fakaʻilonga meiate kitautolu kiate Ia ki heʻetau ongo fekauʻaki mo e meʻa kuó Ne fai maʻatautolú—ko e anga ʻetau ongo ʻo kau ki Heʻene feilaulaú mo e anga ʻetau ongo ʻo kau ki heʻetau ngaahi fuakavá.

Naʻe akoʻi ʻe Palesiteni Nalesoni ʻi he konifelenisi fakamuimui taha ʻa e Siasí: “ʻI hoku ngaahi taʻu kei talavou angé, naʻá ku ʻilo ai ki ha ngāue ʻa ha kakai kehe naʻa nau fakatahaʻi ha ngaahi lisi ʻo e ngaahi meʻa ke fai pea mo ha ngaahi meʻa ke ʻoua ʻe fai ʻi he ʻaho Sāpaté. Naʻá ku toki ako kimui ange mei he folofolá ʻoku hoko ʻeku tōʻonga mo ʻeku fakakaukau ʻi he Sāpaté ko ha fakaʻilonga ʻi hoku vā mo ʻeku Tamai Hēvaní. ʻI he mahino ko iá, ʻoku ʻikai ke u toe fie maʻu ʻa e ngaahi lisi ʻo e meʻa ke fai pe taʻe faí. Ko e taimi kuo pau ai ke u fai ha fili pe tuʻutuʻuni pe ʻoku taau ʻa e ʻekitivitī ko iá pe ʻikai mo e Sāpaté, ʻoku ou fehuʻi pē kiate au, “Ko e hā ʻa e fakaʻilonga ʻoku ou fie foaki ki he ʻOtuá?” Naʻe ʻai ʻe he fehuʻí ni ke mahino ʻaupito ʻeku ngaahi fili kau ki he ʻaho Sāpaté.”⁷

ʻOku fakatāutaha pē ʻa e fili fekauʻaki mo e Sāpaté; ko e meʻaʻofa fakafoʻituitui, ko ha fakaʻilonga ʻo ʻetau houngaʻia ki Heʻene hōifua ke ʻai ke tau māʻoniʻoní. ʻOku ʻikai ha taumuʻa ke fokotuʻu ai ha lisi ʻo e meʻa ke fai mo ʻikai ke faí, ka ʻoku ou loto ke talaatu kuó u sio tonu he toʻutupu mo e kakai lalahi kei talavou ʻi hono kotoa ʻo e māmaní kuo nau fili ke tauhi e Sāpaté ke māʻoniʻoni. Kuo tokolahi ha niʻihi ne fili ke ʻoua ʻe ngāue he Sāpaté, pea fokotuʻu ʻe ha niʻihi kehe ha taumuʻa ke ʻoua ʻe ako he Sāpaté. Ne mole ha kaungāmeʻa ʻo ha finemui ʻi Taileni heʻene fili ke ʻoua ʻe ʻalu ki he ngaahi ʻekitivitī fakasōsiale he Sāpaté (ko ha foʻi fakakaukau ne teʻeki ke fanongo ki ai hono kaungāmeʻá kimuʻa). ʻOku ou ʻiloʻi ha tokotaha soka lelei ʻi Kalefōnia, kuó ne loto ke ʻoua naʻa vaʻinga he Sāpaté—neongo ʻa e teke mālohi hono kaungā vaʻingá mo e faiakó—mo e ngalingali ʻe mole ha ngaahi sikolasipi mahuʻinga.

ʻOku ou ʻiloʻi fakapapau ʻe fakaʻapaʻapaʻi ʻe he ʻEikí e kakai kei talavou fakaʻofoʻofa ko ʻení koeʻuhí he ʻoku nau fakaʻapaʻapaʻi Ia ʻaki ʻenau fili ke tauhi Hono ʻahó ke māʻoniʻoní. ʻE lava ke tau akoʻi ʻetau kau akó ko ʻetau tōʻonga mo e angafai ʻi he Sāpaté ko ha fakaʻilonga ia ki he ʻEikí ki he anga ʻetau ongo fekauʻaki mo ʻetau fuakavá mo hono “tauhi totonu ʻo e Sāpaté ko ha fakaʻilonga ia ʻo hono tauhi kotoa ʻo e fuakavá.”⁸

3. ʻOku fakafiefia ʻa e Sāpaté

Ko ha tefitoʻi moʻoni ʻe taha mei he Fuakava Motuʻá:

“Kapau te ke taʻofi ho vaʻé ʻi he ʻaho tapú, pea ʻoua naʻa fai ki ho lotó ʻi hoku ʻaho māʻoniʻoní; peá ke ui ʻa e ʻaho tapú ko e fakafiefia, ko e ʻaho māʻoniʻoni ʻo [e ʻEikí], ko e ongoongolelei; pea fakaʻapaʻapa ki ai, ʻo taʻe fai ki ho ngaahi halá, ʻo taʻe fai ki ho lotó, pea taʻe lea ʻaki ʻa e ngaahi lea ʻaʻaú:

“Pehē te ke toki fiefia koe ʻi [he ʻEikí].”⁹

Ko ha sīpinga fakaʻofoʻofa ki he tefitoʻi moʻoni ko ʻení ʻa e ʻEkesōtosi 16. ʻI he taimi naʻe lāunga ai e fānau ʻa ʻIsilelí ki heʻenau fiekaiá mo fie maʻu e “ngaahi kulo kakano” ʻo ʻIsipité, naʻe folofola e ʻEikí ʻo pehē:

“Te u fakaʻauha ʻa e maá mei he langí maʻamoutolu; pea ʻe ʻalu atu ʻa e kakaí ʻo tānaki fakatuhotuha ki he ʻaho kotoa pē ʻa e maá, koeʻuhí ke u ʻahiʻahiʻi ʻakinautolu, pe te nau felākaʻi ʻi heʻeku ngaahi fekaú, pe ʻikai.

“Pea ʻi hono ono ʻo e ʻahó ʻe fai pehē, te nau ngaohi ʻa ia kuó na tukú pea ʻe tuʻo ua hono lahi hake ʻi he mā ʻoku nau ʻomi ʻi he ʻaho [takitaha].”¹⁰

‘Oku toe tānaki mai mo ha ongo tefitoʻi moʻoni ʻi he ngaahi veesi ko iá. Ko e taha ai ko hono siviʻi ʻe he ʻEikí ʻetau talangofua ki he Sāpaté. Ko e veesi ʻe tahá ko hano teuteu ʻe he ʻEikí ha founga ke tau lava ʻo tauhi ai ʻEne ngaahi fekaú. Fakakaukau ki he anga ʻene fakahoko e talaʻofa ʻoku fakafiefia e Sāpaté. Kapau te ke ngāue he ʻaho kotoa pē, ʻo tānaki e maná ke moʻui ai, pea folofola mai e ʻEikí ʻi ha ʻaho ʻe taha ʻo pehē, “He ʻikai te ke ngāue he ʻahó ni, ka te u kei fafanga pē koe ʻo hangē pē naʻá ke ngāué,” ʻikai nai ko ha meʻa fakafiefia ia?

Ne u fanongo ki ha konga fakaonopooni ʻo e talanoá ni ʻi hano talanoaʻi ʻe Sisitā mo ʻEletā Peesi, ko ha ongomātuʻa faifekau ne ngāue ʻi ʻAfilika. Naʻá na pehē:

“ʻOku mau nofo ʻi ha feituʻu masivesiva ʻo Kēnia ʻi he kauʻāfonua ʻo ʻIukanitaá. Ko e taha ʻo ʻemau kau palesiteni fakakoló … ko ha faama ne nofo ʻi ha ʻapi ʻo hano kāinga. Ko ha talavou ne ʻi ai hano kiʻi fāmili. …

“… ʻOku talange ki ai ʻe ha niʻihi ʻo e kau mēmipa ʻo hono koló … he ʻikai ke nau lava ʻo haʻu ki he lotú ʻi he Sāpaté koeʻuhí … ʻoku nau manavasiʻi ke mavahe mei ʻapi naʻa kaihaʻasi ʻe honau kaungāʻapí ʻenau ngoué. … [Ko e] meʻa fakahohaʻa MOʻONI ʻeni. … Ko hono moʻoní, ʻoku fie tō ngoue e kakaí … ʻi he taimi ʻoku tō ngoue ai honau kaungāʻapí, koeʻuhí ke fakasiʻisiʻi ange e faingamālie ki hano kaihaʻasi ʻenau ngoue tokamuʻá. …

“[ʻOku nau toe pehē foki] he ʻikai ke nau lava ʻo omi ki he lotú he Sāpaté he kuo pau ken au ngāue … he ʻoku nau fuʻu masiva.”

“[Ne hoko atu e palesiteni fakakoló], ‘ʻOku ou talaange kiate kinautolu, “ʻOku ou mavahe mei hoku ʻapí he Sāpate kotoa pea nofo ʻi he lotú ʻi ha ngaahi houa lahi ʻo e ʻahó. ʻOku ʻikai ke u ngāue he Sāpaté. ʻI heʻeku foki ki ʻapí, ʻoku ou faʻa ʻilo kuo kaihaʻasi ʻe hoku kaungāʻapí ʻeku [koané], fanga moá, honau fuá, ʻeku fuaʻiʻakaú he naʻa nau fiekaia pea ʻikai haʻanau meʻakai. Ka ʻoku ou ʻilo ko ʻene hoko pē ʻa e taimi utu taʻú, ʻoku faitāpuekina au he ʻoku lahi ange e fuaʻeku fonuá ʻiate kinautolu—neongo ʻoku nau ngāue he Sāpate kotoa. ʻOku fua lahi ange ʻeku kelekelé, pea kuo faitāpuekina au he ʻoku ou tauhi e Sāpaté ke māʻoniʻoni.’”

“ʻI he fanongo [ʻa e palesiteni fakakolo ko ʻení] ki he lau ko ʻení, naʻá ne pehē, ‘ʻE lava ke u fakamoʻoniʻi ki he meʻa tatau. ʻOku ʻi ai haʻaku [koane] ʻeka ʻe 2. ʻOku ngoueʻi ʻe hoku kaungāʻapí ha ʻeka ʻe 10. ʻOkú ne ngāue he Sāpate kotoa. ʻOku ʻika ke u fai ia. ʻI he hokosia e taimi ututaʻú, ʻoku lahi haʻakú. ʻOku omi hoku kaungāʻapí ʻo kole meʻakai kiate au he ʻoku ʻikai lahi e meʻa ʻokú ne maʻú, ʻoku faitāpuekina au ʻi heʻeku tauhi e fono ʻo e Sāpaté.’”¹¹

ʻOku māʻolunga ange e ngaahi founga ʻa e ʻEikí ʻi heʻetau foungá—pea pehē ki Heʻene tāpuakí. ʻOku kehe ia meiate kitautolu. ʻIkai ʻoku pehē pē mo e vahehongofulú, ʻikai ko ia? ʻI he vahehongofulú, ko e 10 kole mei ai e 1 ʻoku ʻikai maʻu ai e 9. ʻOku tāpuekina ʻaki kitautolu ʻe he ʻEikí e meʻa ʻoku tau fie maʻú mo lahi ange. ʻOku toe moʻoni ia ki he Sāpaté. ʻOku ʻaho ʻe fitu ʻi he uike, ka ʻoku tau maʻu ha meʻa lahi ange ʻo ʻikai ke siʻi, ʻa e meʻa ʻoku tau fie maʻu moʻoní, ʻi heʻetau ngāue he ʻaho pē ʻe ono ʻo e ʻaho ʻe fitú. Te ke mei lava pē ʻo fanongo ki he folofola mai ʻa e ʻEikí, “Pea mou ʻahiʻahiʻi au … pe te u fakaava ʻa e ngaahi matapā ʻo e langí pe ʻikai, peau lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai.”¹²

ʻOku ʻikai ngata pē he hoko ʻa e ʻaho Sāpaté ke mālōlō mei he ngaahi ngāue fakatuʻasinó, ka ko ha toe ʻaho ia ʻo e fakafoʻou fakalaumālie. Ko ha ʻaho ʻo e mālōlō mei he ngaahi ngāue ʻo e māmaní.

Naʻe akoʻi ʻe Palesiteni Siosefa F. Sāmita ʻo pehē, ʻoku ʻuhinga e mālōlō ʻa e ʻEikí ki he “maʻu e ʻilo ki he ʻofa ʻa e ʻOtuá, ʻo tui ki heʻene taumuʻá pea mo ʻene palaní, … ʻo ʻikai uesia kitautolu ia ʻe he matangi ʻo e tokāteliné, pe ʻe he kākā olopoto ʻo e tangatá ʻa ia ʻoku tokatataʻo ai ke kākā.”¹³ (Fakakaukau ki he mālohi ʻo e talaʻofa ko iá ʻi heʻene fekauʻaki mo ʻetau fakamuʻomuʻa hono tokoniʻi ʻetau kau akó ke fekumi ki he moʻoní mo ʻiloʻi e moʻoní mei he meʻa ʻoku halá.)

Te u talaatu mo ha tāpuaki matuʻaki mahuʻinga ʻe taha mei he ngaahi folofolá. ʻOku ngāue ʻaki ʻe he ʻEkesōtosi 31 ha kupuʻi lea ko e “ʻi homou ngaahi toʻutangata kotoa pē,”¹⁴ pea ʻomi ʻe he ʻĪsaia 58 ha talaʻofa ʻe hanga ʻe he ʻEikí ʻo “fafanga ʻaki koe ʻa e tofiʻa ʻo Sēkopé.”¹⁵ ʻI hoʻo ako e ngaahi veesi mo e ako ko ʻeni ʻa e kau taki ʻo e Siasí, te ke fakatokangaʻi ko e taha ʻo e tāpuaki mahuʻinga taha ki hono tauhi ʻo e Sāpaté ke māʻoniʻoní ʻoku maʻu ia ʻe hoʻo fānaú mo ho makapuná. Ko ha faingamālie ʻa e Sāpate takitaha ke akoʻi ki hoʻo fānaú e meʻa ʻokú ke fakamuʻomuʻa he moʻuí pea ʻokú ke loto ke feilaulauʻi e ngaahi fie maʻu fakatāutahá ke tauhi e ngaahi fekau ʻa e ʻEikí.

Ko ha tāpuaki ʻeni maʻanautolu. ʻE tokoni ke maʻu ha ngaahi fāmili ʻoku laui toʻutangata ʻo ha kau ākonga faivelenga ʻa Sīsū Kalaisi. ʻI hono ʻiloʻi ʻeni mo e ngaahi tāpuaki kehe ʻoku maʻu mei he Sāpaté, meʻa ní he ʻikai ke hoko ia ko ha meʻa fakafiefia?

4. ʻOku tauhi kitautolu ʻe he Sāpaté ke taʻemele mei he māmaní

Ko ha tefitoʻi moʻoni ʻe taha fekauʻaki mo e ʻaho Sāpaté ʻoku maʻu ia ʻi he Tokāteline mo e Ngaahi Fuakava vahe 59: “Pea ko e meʻa ke tauhi ai koe ke maʻa ange mei māmaní, ke ke ʻalu ki he fale ʻo e lotú pea ʻohake ai hoʻo ngaahi ouau toputapú ʻi hoku ʻaho tapú.”¹⁶

ʻOku lahi ha ngaahi faingamālie ʻi he Fuakava Motuʻá ʻokú ne akoʻi e tefitoʻi moʻoni ko ʻení. Hangē ko ʻení, ʻi hoʻo akoʻi e fuakava faka-ʻĒpalahamé te ke maʻu ai ha faingamālie ke akoʻi hotau toʻutupú ke nau ʻi he māmaní kae ʻikai ʻo e māmaní. Te ke maʻu ha faingamālie ʻe taha ʻi hoʻo akoʻi e vahe 1 Samuela 8.

Naʻe ngāue ʻaki ʻe Palesiteni Sipenisā W. Kimipolo e vahe ko ʻení ke akoʻi ha lēsoni matuʻaki mahuʻinga. Naʻá ne pehē:

“Naʻe houhau mo lotomamahi e ʻEikí mo ʻene palōfita ko Samuelá. … Ka naʻe kaikaila e kakaí ke maʻu ha tuʻi ‘ke mau tatau mo e ngaahi puleʻanga kotoa pē.’…

“ʻOku ʻikai ke tau toe kehe mei ai he ʻahó ni! ʻOku tau fie maʻu e fakaʻofoʻofa mo e meʻa taʻeʻaonga ʻo e māmaní, ʻo ʻikai faʻa fakatokangaʻi e nunuʻa kovi ʻo ʻetau valé. ʻOku [feinga e tokotaha taʻe siasí ke fiefia he Sāpaté; ʻoku tau loto ke fiefia] neongo ko e taimi lahi ʻoku ʻuhinga ia ke siʻaki e ngaahi ʻekitivitī ʻo e Sāpaté mo hono maʻumauʻi ʻo e ʻaho toputapu ʻo e ʻEikí. ʻOku fai ʻe hotau kaungā fonongá e ngaahi mali taʻe fakalotu—kuo pau ke tau faifaʻitaki ki honau sīpinga valá mo e meʻa kotoa pē, neongo ʻene nofotaha he meʻa fakafiefia ʻo e māmaní mo ʻikai fakatokangaʻi e molumalu ʻo e mali totonú. …

“ʻOku fokotuʻu e ngaahi sīpinga valá ʻe he kakai angakovi mo holi pē ki he paʻangá ʻo nau tala ʻoku olokuonga e ngaahi sīpinga vala fuoloá. … ʻE lelei ange ke tau mate ʻo ka ‘ʻikai maʻu e vala fakamuimuitahá.’ … ‘Kuo pau ke tau maʻu ha tuʻi ʻo hangē ko e ngaahi puleʻanga kehé!’

“ʻOku pehē ʻe he ʻEikí te ne maʻu ha kakai makehe ka ʻoku ʻikai ke tau loto ke makehe. …

“Ko fē nai ha taimi ʻe tauʻatāina ai hotau Kāingalotú mei he māmaní, fokotuʻu maʻu honau tuʻunga ʻulungāngá, muimui he sīpinga totonú mo moʻui ʻo fakatatau ki heʻenau moʻui nāunauʻiá ʻo hangē ko e sīpinga ne tataki fakalaumālie ai e Ongoongoleleí.”¹⁷

ʻI he faingataʻaʻia hotau toʻutupú he ngaahi tukufakaholo mo e fakakaukau ʻa e māmaní mo e tuʻunga ʻulungaanga mo e sīpinga ʻa e māmaní, tokoniʻi ke nau ʻilo ko ha kakai makehe kitautolu, ʻatā mei he ngaahi tākiekina ʻa e māmaní.¹⁸ Tokoniʻi ke nau ʻilo ko e founga ki aí ʻa hono tauhi ʻo e Sāpaté ke māʻoniʻoní, ko ha founga ke tauhi ai kinautolu ke taʻemele mei he māmaní.

Ko e Sākalamēnití

Ko e taumuʻa ʻo e sākalamēnití

Tuku muʻa ke tau hiki mei ai ʻo lea ʻi ha kiʻi taimi siʻi ki he taumuʻa ʻo e sākalamēnití?

ʻOku tau maʻu e sākalamēnití ʻi hono manatua e sino mo e taʻataʻa ʻo e ʻAló. Ko e ʻuhinga ʻeni ʻo e sākalamēnití naʻe ʻomi Tonu ʻe he ʻEikí ʻi Heʻene fakahoko fakatāutaha ia ʻi he Fonua Tapú mo e ongo ʻAmeliká.¹⁹ ʻOku totonu ke hoko ʻeni ko ha konga mahuʻinga ʻo ʻetau aʻusia he uike takitaha. Ko e sākalamēnití ko ha faingamālie ke manatua Ia mo e meʻa kotoa ʻoku fakafofongaʻi ʻe Hono sinó mo Hono taʻataʻá fekauʻaki mo e Toetuʻu moʻoní, huhuʻi mei heʻetau angahalá, mo e manavaʻofa ʻoku feʻunga ke fehangahangai ai mo e ngaahi faingataʻa kotoa ʻo e moʻuí.

ʻOku tau fakamoʻoni ki he ʻOtuá, Tamai Taʻengatá, ʻoku tau loto fiemālie ke toʻo kiate kitautolu e huafa ʻo Hono ʻAló mo tauhi ʻEne ngaahi fekaú, ʻo fakafoʻou kotoa ai ʻetau ngaahi fuakavá. Fakakaukau angé kapau naʻa tau fakahoko fakamātoato ia he uike kotoa pē? ʻE hoko e houalotu sākalamēnití ko ha keinangaʻanga fakalaumālie, ʻo aofangatukuʻaki e talaʻofa ʻa e ʻEikí te tau “maʻu Hono Laumālié,” ʻo maʻu ai e ʻamanaki lelei, fakamoʻui, mālohi, fakafiemālie, mo e fakamolemole.²⁰

ʻOku tau fie maʻu kotoa ʻa e fakamolemolé mo e fakamoʻuí, pea ko e niʻihi ʻiate kitautolu ʻoku fie maʻu ke tau tuku atu ʻa e ngaahi ongo ʻita kuo fuʻu fuoloa hono tuku lotoʻí. ʻOku ʻomi ʻe he Fakaleleí mo e sākalamēnití ʻa e faingamālie ko iá ʻi he taimí ni.

ʻOku ʻi ai ha ngaahi faingamālie ke akoʻi ai e taumuʻa ʻo e sākalamēnití ʻi he folofolá mo hono kotoa ʻetau ngaahi kalasí. ʻOku ou fokotuʻu atu ke tau sio ki ha founga pau ʻe ua ke fakahoko ʻaki ʻeni. ʻUluakí, ko e taimi kotoa pē ʻoku tau akoʻi ai ha sīpinga pe fakaʻilonga ʻo e Fakamoʻuí, ʻoku tau maʻu ha faingamālie ke akoʻi e ngaahi taumuʻa ʻo e sākalamēnití. Ko hono uá, ko e taimi kotoa pē ʻoku tau akoʻi ai ha tefitoʻi moʻoni ʻoku fekauʻaki mo e ngaahi fuakavá, ʻoku tau maʻu ai ha faingamālie ke fakaʻaongaʻi e ngaahi tefitoʻi moʻoni ko iá ʻi he sākalamēnití.

Tuku ke u vahevahe atu ha sīpinga takitaha ʻo e ongo sīpinga ko ʻeni ʻo e faingamālié (toe toʻo ʻeni mei he Fuakava Motuʻá)?

1. Ngaahi sīpinga mo e fakaʻilonga ʻoku tataki ai kitautolu kia Sīsū Kalaisí

Ko e sīpinga ʻuluaki, ʻokú ne fakatātaaʻi hono ngāue ʻaki ʻo e ngaahi sīpingá mo e fakaʻilonga ʻo e Fakamoʻuí, ʻoku maʻu ʻi he vahe 1 ʻo Levitikó. Naʻe akoʻi ai ʻe he ʻEikí e fānau ʻa ʻIsilelí ke nau ʻomi loto lelei ha meʻaʻofa ki he ʻEikí. Ko e meʻaʻofá ko ha monumanu tangata taʻe hano mele, ʻa ia ʻe tali ke fakahoko ha fakalelei maʻá e tokotaha ʻoku haʻu ke moihuú. ʻOku tamateʻi leva ʻe he tokotahá e monumanú, pea ʻe luluku ʻe he kau taulaʻeikí ʻa e totó ʻo fakatakatakamilo ʻi he feilaulauʻangá.²¹

ʻOku faingofua ke sio ki he fakaʻilongá mo ʻene fekauʻaki mo e sākalamēnití mo ʻiloʻi ko e lolotonga hono ʻai ke fakamāʻoniʻoniʻi e tokotaha ko iá, ʻe hanga ʻe he ʻEikí tonu ʻo fua hono faingataʻaʻiá, mamahí, mo e angahalá. ʻOku ou tui ko ha meʻa lelei ʻeni ki he kau angatonú ʻakinautolu “ʻoku hinehina honau ngaahi kofú ʻi he taʻataʻa ʻo e Lamí.”²² Ka “ʻe kulokula ʻa e kofu ʻo e ʻEikí.” Pea hangē ko ʻEne folofolá, “Pea kuo pani honau totó ʻi hoku kofú, mo fakalanu ʻa hoku kofú kotoa.”²³

Ko ha meʻa fakaʻofoʻofa ke mamata ki he ʻEikí ʻoku kofu kulokula, ʻo ʻatakaiʻi ʻe ha kau ʻāngelo kofu hinehina. Koeʻuhi ko e mamahi ʻa Sīsū Kalaisí, “he neongo ʻa e tatau ʻo hoʻomou angahalá mo e kulaʻahoʻaho, ʻe hoko ia ke hinehina ʻo hangē ko e ʻuha hinaekiaki; kapau ʻoku kulokula ia ʻo hangē ko e kulamumuú, ʻe tatau ia mo e fulufuluʻi sipi.”²⁴

Hokó, ʻoku tuʻutuʻu iiki e meʻaʻofá—ʻa e ʻulú, konga ki lotó, vaʻé, mo e ngakó.²⁵ ʻOku fakafofongaʻi ʻe he ʻulú e fakakaukaú; ko e konga ki lotó ʻa hotau lotó, ʻetau ongó; pea ko e vaʻé ʻa ʻetau tōʻongá. ʻOku fakamanatu mai ʻe he fakaʻilongá kiate kitautolu ʻa e sākalamēnití mo ʻetau tukupā ke ʻofa ki he ʻOtuá ʻaki hotau hotau lotó, iví, ʻatamaí, mo e mālohí kotoa.²⁶

Naʻe pehē ʻe ʻEletā Niila A. Mekisuele ko hono fakalea ʻe tahá, “ko e feilaulau moʻoni mo fakatāutahá ʻoku ʻikai ko hano hili ha monumanu ʻi he ʻesi feilaulaú. Ka ko e loto fiemālie ke siʻaki ʻetau holi fakanatula ʻoku fepaki mo e ʻEikí ʻo tuku he ʻesi feilalaú ʻo tutu ai ke ʻosiʻosi.”²⁷

Te tau toe lava ke ngāue ʻaki e fatongia ʻo e taulaʻeikí, Ke akoʻi ʻe he “ngaahi foha ʻo ʻĒloné,”²⁸ ʻetau kau talavoú e mahuʻinga ʻo e fatongia ʻoku nau fakahoko lolotonga e sākalamēnití. Akoʻi ʻetau kau taulaʻeikí ko kinautolu ʻa e ngaahi foha ʻo ʻĒloné, kuo pau ke fakamavaheʻi kinautolu mei he māmaní, he ʻoku nau fakafofongaʻi e Fakamoʻuí. Akoʻi e kau akonaki ʻi he Lakanga Taulaʻeiki Faka-ʻĒloné ʻoku nau tuʻu he feituʻu ʻo Siosefa ʻAlimateá, ʻo teuteuʻi e sino ʻo Kalaisí. Kuo ʻi ai hamou niʻihi ne mou maʻu e aʻusia toputapu ʻo hono teuteuʻi ʻo ha sino ke tanu. Te ke lava nai ʻo fakakaukau ki he aʻusia toputapu ʻa Siosefa ʻAlimateá?²⁹ Tokoniʻi ʻetau kau talavoú ke mahino ko e houalotu sākalamēnití ko ha ouau telio ʻo fakamanatua e Fakamoʻuí.

Naʻe akoʻi ʻe ha palesiteni fakasiteki e fakakaukau ko ʻení ki ha kōlomu ʻo ha kau akonaki. Naʻe hanga ʻe he palesiteni taʻu 15 ʻo e kōlomu ʻo e kau akonakí ʻo ʻomi kotoa ʻene kōlomú ʻi ha miniti ʻe 30 kimuʻa he houalotu sākalamēniti ʻo e Sāpate kotoa pē, ʻo nau lau folofola mo lotu fakataha, pea toki teuteuʻi ʻe he kōlomú e sākalamēnití.

Te tau toe lava ke akoʻi ki heʻetau kau tīkoní honau fatongiá. Fakakaukau kapau ʻokú ke kau hono fata e puha mate he meʻafakaʻeiki ʻo e Fakamoʻuí?

Tokoniʻi ke nau ʻiloʻi kotoa ʻoku nau fakaʻapaʻapaʻi honau lakanga fakataulaʻeikí ʻi ha founga ke tokoniʻi kotoa ai kitautolu ke maʻu e taʻataʻa ʻi Ketisemaní mo maʻu e fakamolemole mo e fakamoʻui ʻokú ne ʻomí.

2. ʻOku ʻomi ha faingamālie kiate kitautolu ʻe hono akoʻi e fuakavá ke akoʻi e sākalamēnití

Ko ha toe faingamālie ʻe taha ko hono akoʻi e sākalamēnití ʻi heʻetau akoʻi e ngaahi tefitoʻi moʻoni fekauʻaki mo e ngaahi fuakavá.

Ko e taha e sīpinga ko ʻení ʻoku ʻi he tohi ʻa Hōseá, ʻa ia ʻoku ngāue ʻaki ai ha fakatātā ʻo ha husepāniti, ko hono malí, mo ʻene lavakí, mo ha siviʻi ʻo e ngaahi fuakava ʻo e malí ke akoʻi ai ʻetau fuakavá mo ʻene fekauʻaki mo ʻetau Tamai Hēvaní. Naʻe fekau ʻe he ʻEikí kia Hōsea ke “ʻalu ʻo ʻomi kiate koe ha ʻunoho mei he feʻauakí mo e fānau ʻa e feʻauakí.”³⁰ Ko ia naʻe maʻu ʻe Hōsea ʻa Kōmela ko hono uaifi. Ka naʻe hili pē ʻene maʻu ia mo tokangaʻi iá, mo ʻofa aí, naʻá ne toe foki pē ia ki he ʻene tōʻonga moʻui kimuʻá ʻo lavakiʻi ia.

Te ke ongoʻi fēfē kapau ko Hōsea koe? Ka ke fanongo ki he anga e fakafeangai ʻa Hōsea ki he lavakiʻi ko ʻení:

“Te u tauheleʻi ia, pea ʻomi ia ki he toafá, pea lea fakafiemālie kiate ia.

“Te u foaki kiate ia ʻa ʻene ngoue vaine.”³¹

Ka naʻe hoko ha liliu ʻi he fakamatala fakafolofolá meia Hōsea mo Komela ki he ʻEikí mo e fuakava ki ʻIsilelí ʻi Heʻene folofola mai kiate kitautolu: “Te u fakamaʻu koe kiate au ʻo lauikuonga; ʻio, te u fakamaʻu koe kiate au ʻi he māʻoniʻoni, pea mo e angatonu, pea ʻi he angaʻofa, pea ʻi he ngaahi ʻaloʻofa.”³²

Naʻe tāpuekina lahi au ʻi he sio ki he anga ʻo e ongo ʻa Hōsea ki heʻene ngaahi fuakavá, mo ʻiloʻi ko e anga ia e ongo ʻa e ʻEikí ki Heʻene fuakava mo kitautolú.

Ne u tomuʻa ako ke saiʻia he talanoá ni ʻi ha lea ne fai ʻe Palesiteni Henelī B. ʻAealingi. Mahalo ne ʻi ai hamou niʻihi ne ʻi ai he taimi naʻá ne lea ai ki heʻene aʻusia ʻi hono akoʻi ʻo e Fuakava Motuʻá ʻi he seminelí: “ʻOku lahi ange e ngaahi ʻuhingá he meʻa te u lava ke fakamatalaʻi, he ngaahi ʻaho ne akoʻi ai ʻa Hōseá, ne u ongoʻi ha meʻa foʻou, ha meʻa ʻoku mālohi ange. ʻOku ʻikai ko hat alanoa ʻeni ʻo ha fetuʻutaki fakapisinisi ʻa ha hoa ngāue. … Ko ha talanoa ʻeni ʻo e ʻofa. Ko ha talanoa ʻeni ʻo ha mali ʻi he fuakavá ne fehaʻiʻaki ʻi he ʻofa, ko e ʻofa tuʻumaʻu. Ne u ongoʻi ai, pea fakautuutu ʻi ha ngaahi taʻu, ke ʻiloʻi ʻoku ou tāpuekina ke fai ha fuakava mo e ʻEiki, ʻokú ne ʻofaʻi kitautolu, mo kinautolu ʻoku tau akoʻí, ʻi ha ʻofa tuʻumaʻu peau ofoofo maʻu pē ai ʻo loto ke muimui ki ai ʻaki hoku lotó kotoa.”³³

ʻOku lahi ha ngaahi meʻa ia he talanoá, ka te u tuku atu pē ke ke toe vakaiʻi e lea fakaʻofoʻofa ʻa Palesiteni ʻAealingi, naʻe fai he fakataha ʻa e Akó ʻi he 1995. Ko ʻeku ʻuhingá ʻoku tau maʻu e faingamālie ke akoʻi e ngaahi fuakavá. ʻI heʻetau fai iá, tau tokoniʻi ʻetau kau akó ke nau ongoʻi e meʻa naʻe ongoʻi ʻe Palesiteni ʻAealingí: ʻoku ʻofeina kitautolu ʻe he ʻOtuá, pea ʻokú Ne hōifua ke tāpuekina kitautolu ʻi heʻetau ngaahi fuakavá. ʻI he mahino kiate kitautolu ko e ngaahi ouaú mo e fuakavá ko ha ngaahi fakaʻilonga ia ʻo e ʻofa ʻa e ʻOtuá mo finangalo ke hākeakiʻi kitautolú, ʻoku liliu leva kitautolu ʻe he sākalamēnití ʻo tuʻuloa.

Fakaʻosí

Fakakaukau ange ki he meʻa ʻe hoko kapau ʻe ʻalu e toʻutupu mo e kakai lalahi kei talavou ʻo e Siasí ki he houalotu sākalamēnití he uike kotoa pē pea manatuʻi lelei e Fakamoʻuí, ongoʻi houngaʻia Heʻene Fakaleleí, ʻo fakamoʻoni ki he Tamaí te nau ʻalu holo mo e huafa ʻo e Fakamoʻuí he ʻaho kotoa mo feinga ke tauhi ʻEne ngaahi fekaú mo moʻui ke taau mo e meʻafoaki ʻo e Laumālie Māʻoniʻoní? Pea ʻi he lolotonga ʻo e uiké te nau ʻalu ki he kalasi seminelí mo e ʻinisititiutí ʻa ia ʻoku fakatefito ʻi he tefitoʻi fatongia ʻo e Fakamoʻuí ʻi he palani ʻo ʻetau Tamai Hēvani ʻofá mo fakamanatua kiate kinautolu ʻenau tukupā ke hoko ko e ākonga ʻa Sīsū Kalaisi? Pea kapau te nau talanoaʻi mo ʻenau mātuʻá e ngaahi meʻá ni ʻi honau ʻapí, pea palani fakataha ke tukutaha ʻenau tokangá he Sāpaté?³⁴ ʻOku ʻikai ke tau lava ʻo makupusi e ngaahi tāpuaki ʻoku tuku tatali ʻe he ʻEikí maʻatautolú.

Tuku ke u fakaʻosi ʻaki ʻeku fakamoʻoní kapau te tau akoʻi e tokāteline ko ʻení ʻaki e mālohi, kuo pau ke tau tomuʻa moʻui ʻaki ia. Kapau te tau tauhi e Sāpaté ke māʻoniʻoni mo manatuʻi e Fakamoʻuí ʻi heʻetau fakafoʻou ʻetau ngaahi fuakavá he Sāpate takitaha, ʻe hoko leva e Sāpaté ko ha ʻaho fakafiefia kiate kitautolu pea tāpuekina ai kitautolu mo hotau ngaahi fāmilí ʻo laui toʻutangata. Te ne fakamālohia moʻoni ʻa ʻetau malava ke tataki fakalaumālie ʻetau kau ako ʻofeiná ke nau ʻiloʻi e founga ke tauhi ai e ʻaho Sāpaté ke māʻoniʻoní pea tokoniʻi kinautolu ke mahino mo fakafalala he ngaahi akonakí mo e Fakalelei ʻa Sīsū Kalaisí. Te ne fakalahi ai ʻenau houngaʻia mo e tukupā ki heʻenau fuakava ke hoko ko e kau ākonga ʻa e Fakamoʻui ʻo e māmaní.

Fakatauange te tau manatua maʻu pē Ia. ʻI he huafa ʻo Sīsū Kalaisí, ʻēmeni.