O Se Faasinomaga Mamalu

Kathy Kipp Clayton

O Se Faasauga ma Elder L. Whitney Clayton

Faigalotu i le Lalolagi Atoa mo Talavou Matutua • 13 Setema, 2015 • Falelotu o le Malumalu o Manhattan Niu Ioka

Ua ou fiafia lava e i ai iinei, uu lima faatasi ma tutu faatasi ma la’u uo mamae e faavavau. O le ola faatasi ai ma le fatu o lo’u olaga o se malaga silisili.

Ua faamamaluina foi au e faatasi ma outou iinei. O outou o se vaaiga ofoofogia lava—o outou uma o loo mafai ona ou vaaitino atu i ai ma le toatele o isi o loo ou vaai atu i ai faalemafaufau. E ofoofogia lava outou. Ou te moomoo o loo mafai ona outou vaai ia te outou lava e pei ona ou vaai atu ai i le taimi nei—ua manino le susulu mai i gafatia ma folafolaga. O nisi taimi ou te popole ai ona o i tatou tagata e seasea mafai ona tatou iloaina lo tatou lava taua, ae tusa foi pe tatou te iloaina, e faigata le ola e tusa ai ma lena taua. Ma o le mea e faanoanoa ai, o le vaaiga itutasi tatou te vaai ai ia i tatou lava e tele lava ina itiiti nai lo le faalauteleina.

Ua faamatalaina tatou e le mau, i le Mose, i le avea ai ma Ona atalii ma afafine, “ua tusa … ma [le Atua],”¹, ma faapena foi i le Mosaea, “Ona o le feagaiga ua outou faia [o le papatisoga lea] o le a ta’ua ai outou o le fanau a Keriso, o ona atalii ma ona afafine”². E faapena foi i le Roma tatou te faitau ai:

“O fanau i tatou a le Atua:

“Afai foi o fanau i tatou . . . o suli lava o le Atua, o sili faatasi ma Keriso.”³

Aisea ua faigata tele ai ona tatou manatuaina lo tatou faasinomaga mamalu ma ola e faaosofiaina pea ma ia ogatusa ma lena faasinomaga? O le tala faatusa lenei e foliga mai e aoga ia te au:

I nai tausaga ua mamao atu sa matou nonofo ai ma lo’u toalua ma le ma uii, i Atenitina i se tofiga mai le Ekalesia. Sa ma faia ma lo ma atalii se mea fiafia o le asiasi atu i ni nofoaga mataina i le lotoifale i o ma taimi avanoa. E i ai ni nai nofoaga na ma fiafia lava i ai. I se tasi o na nofoaga o se pamanu aivao matagofie e le tutusa ma se isi lava pamanu na ma vaai muamua i ai. Nai lo le savalivali solo ma pasia ni faitotoa o ni manu o loo momoe ma faamemelo ia i latou mai se mea mamao, sa valaaulia e le Pamanu a Lujan tagata tafafao ia ulu atu i pa ma faalata ia manu—e oo lava i manu sili ona feai. Sa le mafai ona ma teenaina lena valaaulia. A o taumulimuli atu i faioaga, sa matou o atu ai i le pa sa saunia mo liona tetele ma taufaamatau, ma sa matou faalata i latou a o foliga mai latou te matua le ano mai.

O le taimi lava na matou tuua saogalemu ai le pa, sa ou fesili atu i faiaoga pe na faapefea lava ona latou faatalitonuina na manufeai tetele ia aua nei aia i matou. Sa mataina la latou tali ia te au. Sa latou taaina tu lau vaai i ni tamai taifau o loo i ai foi i totonu o na pa. Sa latou tau mai ia te au o se tasi o mea na latou faia o le tausi ae lea o liona faatasi ma na taifau ma nonofo faatasi ai i taimi uma. A o laiti lava liona, sa lapopoa ai na taifau feou i tamai liona. Sa talitonu taifau o latou epule, ma sa latou fetulinai solo ma le le alofa nai liona ma felusi ma le agaleaga i o latou matiu’u. Sa oo ina masani ai tamai liona nei i le faamimigi ai i tulimanu ma filemu ai e peisea’i sa matua fefefe lava i tamai taifau taufaamatau nei.

Ina ua tutupu ae liona, sa faaauau pea ona faamimigi i le tulimanu ma fefefe i tamai taifau nei. Ae o sina taia lava i matiuu o se tasi o na liona tetele, e faigofie ai lava ona fefelei mai i fafo na taifau mai le pa, ae sa lei mafai e liona ona vaai ia i latou lava i o latou tulaga moni. Sa latou le iloaina ma le tiga lo latou faasinomaga mamalu. Sa taofia ma faatapulaaina i latou e se manatu sese o lo latou gafatia. Sa latou manatu latou te laiti ma vaivai, o lea sa latou faatagaina ai taifau taufaamatau ma lotomaaa e pulea ma faapologa i latou.

Ou te popole lava ona e tofu uma i tatou ma ni tamai taifau taufaamatau o loo olopalaina lo tatou talitonuga maumautu ma taofia ai lava i tatou e faamimigi i ni tulimanu faafaatusa. Sei o’u ta’ua ni nai tulimanu e foliga mai e toeitiiti lava aafia uma ai tatou.

Muamua: Leai o se talitonuga maumaututu.

Sa matauina e se suesuega manino e faapea ua toatele naua i tatou ua tele atu ina tatou faavasegaina a tatou faatinoga i o tatou toilalo nai lo o tatou manuia. E masani lava, afai e tuu atu i se talavou se suega e 100 fesili ae 80 ana fesili na sa’o, o le a ia tautino mai ma le faanoanoa na ia misia fesili e 20 nai lo le matauina ma le mitamita na ia maua tali sa’o e 80. O le leai o se talitonuga maumaututu ia i tatou lava ma lo tatou gafatia e mafai ona faatauasoina ai i tatou i lo tatou taua moni lava ma le malosi.

Lua: Le Atoatoa, le lava le malamalma.

E oo lava ia Nifae le perofeta, sa noatia e faaaoga lona faatuatua ona sa ia lei iloaina mea uma. Manatua le taimi na matala ai le lagi ia te ia ma afio ifo se agelu ma tu i ona luma? Sa vaai ai Nifae i se faaaliga o Nasareta ma le tina o le Faaola, ae ina ua fesiligia o ia pe na ia malamalama i le finagalo o le Atua, sa ia tautino atu sa ia lei iloa le uiga o mea uma. Ae a o lei ona faailoa atu mea na te lei iloaina atoatoa, sa ia tau atu mea na ia iloa ma le mautinoa: “E alofa [le Atua] i lana fanau.”⁴

O le mea sili lena ona taua ia iloa. Ua lava le taofia o i tatou mai le faatagaina o soo se tamai taifau taufaamatau o le le atoatoa o le iloa e fetuunaia ai lo tatou mautinoa o le moni o le Ekalesia ma lo tatou sootaga faamanuiaina ma Ia ma Lona alofa lemafaatoilaloina ma mamana mo i tatou.

Tolu: Faatalale po o le le gauai.

O filifiliga leaga po o le lafoaia o filifiliga lelei e puaoa ai la tatou vaai i le mea moni. Ou te manatu sa i ai se mafuaaga faafaatusa sa manaomia ai e le fanauga a Isaraelu ona ao mai le manai i aso taitasi. Sa mafai lava e le Tama Faalelagi ona foai atu ia i latou se sapalai e faaaoga mo le vaiaso, ae o le matafaioi i aso taitasi e ao mai meaai mo le agaga sa faatumauina ai lo latou manatuaina o Ia. E manaomia e meaai mo le agaga le faaaogaina soo ma faatele. O le faitauina o tusitusiga paia, tatalo, auai i le Lotu, auauna atu i isi—o a tatou manai na ma o le meaai sili lea mo fanau a le Atua.

E le masalomia o loo i ai a outou taifau taufaamatau e patino lava ia te outou. E tofusia uma ai tatou. Aua nei faatagaina i latou e faamatalaina lou tagata. Ia amio pulea e pei o fanau mamalu a le Atua o avea ai outou. O lo outou tofi tautupu lena. Afai e le o tutusa lau amio i le taimi nei ma le tulaga o lou faasinomaga mamalu, ia fai nei ni suiga. Faatasi ai ma le fesoasoaniga a le lagi, e mafai ai ona e faia. O lou faasinomaga paia e tumau. E ui lava sa lei amio na liona i le lototoa, ae sa lei avea ni auala malolosi e suia ai i latou o ni liona.

O nisi taimi tatou te fai mai ai o tatou o foafoaga a le Atua, ma e mautina lava o se manatu mamalu lena. E sili atu lo’u fiafia e manatuaina o tatou o Ana fanau. O loo ia i tatou Lona DNA faaleagaga o loo fesoloai solo i o tatou uaua. Manatua, ua faafia ona Ia fetalai mai o tatou o Ona atalii ma afafine ma Ona suli. Tafi ese soo se feau taufaasese, talitonuga, po o ni mausa ua mafua ai ona e faamimigi i tulimanu o lou olaga. Aua nei faatagaina i latou e felausia oe ma e lagona ai le fefe po o le tiga. Tutulai ae i le tulaga o lo outou taua e faavavau. O outou e malualii.

Tau ina ia faamanuia i tatou e le Alii i se lagona o lo tatou faasinomaga paia. “O mea uma ua i ai i le Tama” o le folafolaga lea mo i latou e mauaina le silafaga sili a le Atua o lo latou gafatia ma ola e tutusa ma lo latou tofi tautupu o ni suli o lo tatou Tama Faalelagi. Ia faamanuiaina outou e le Alii a o outou opomauina ma olioli i tagata moni e i ai outou. I le suafa o Iesu Keriso, amene.