ការប្រែក្លាយជាបុគ្គលរស់នៅដ៏ស្មោះត្រង់ក្នុងសហស្សវត្ស

ប្រធាន រ័សុល អិម ណិលសុន

នៃកូរ៉ុមពួកសាវកដប់ពីរនាក់

រាត្រីជួបជាមួយប្រធាន រ័សុល អិម ណិលសុន

ការប្រជុំធម្មនិដ្ឋាន ស៊ី.អ៊ី.អែស សម្រាប់យុវមជ្ឈិមវ័យ• ថ្ងៃទី ១០ ខែ មករា ឆ្នាំ ២០១៦ •សាកវិទ្យាល័យព្រិកហាំ យ៉ង់–ហាវ៉ៃ

ប្អូនៗប្រុសស្រីជាទីស្រឡាញ់ ឆ្នាំថ្មីនេះនឹងជាឆ្នាំដែលមានព្រឹត្តិការណ៍សំខាន់ៗជាច្រើនកើតឡើងយ៉ាងប្រាកដ ។ ពេលឆ្នាំថ្មីនេះទើបតែចាប់ផ្ដើម វែនឌី និង ខ្ញុំ បានពោលពាក្យចុងក្រោយទៅកាន់បងស្រីជាទីស្រឡាញ់របស់ខ្ញុំគឺ ម៉ាជូរី ដែលបានចាកចេញពីជីវិតរមែងស្លាប់នេះរួចទៅហើយ ។ យើងបានស្វាគមន៍ទារកទើបនឹងកើតចំនួនពីរនាក់មកក្នុងគ្រួសារយើង—វេឌ រីឆាដ វ៉កឃើរ និង អ៊ីសាក រ័សុល មិកដូនហ្វ ។ ឥឡូវនេះយើងមានឯកសិទ្ធដើម្បីថ្លែងទៅកាន់អ្នកជាយុវមជ្ឈិមវ័យ ពាសពេញពិភពលោក ។ យើងមានអំណរគុណសម្រាប់អ្នក ។

ខ្ញុំថ្លែងអំណរគុណយ៉ាងជ្រាលជ្រៅ ចំពោះសារលិខិតដ៏សំខាន់ និង គំរូដ៏បំផុសគំនិតរបស់ វែនឌី ! យើងក៏សូមសម្ដែងគារវកិច្ចចំពោះការចូលរួមរបស់ អែលឌើរ គីម ប៊ី ក្លាក ក្នុងពួកចិតសិបនាក់ និងជាអភិបាលអប់រំ ព្រមទាំងភរិយារបស់លោកគឺ ស៊ូ និង ឆាដ អេក វែប អ្នកគ្រប់គ្រងថ្នាក់សិក្ខាសាលា និងថ្នាក់វិទ្យាស្ថានសាសនា ព្រមទាំងភរិយារបស់លោកគឺ គ្រីស្ទី ។

ខ្ញុំសូមសម្ដែងកិច្ចស្វាគមន៍ និង ក្ដីស្រឡាញ់មកពីគណៈប្រធានទីមួយ និង កូរ៉ុមនៃពួកសាវកដប់ពីរនាក់ ។ យើងមានអំណរគុណចំពោះ ការលះបង់របស់អ្នកចំពោះព្រះអម្ចាស់ និង ដំណឹងល្អទ្រង់ដែលបានស្ដារឡើងវិញ ។ យើងមានអំណរគុណចំពោះគ្រប់ពេលដែលអ្នកក្រោកឡើង ហើយថ្លែងចេញនូវសេចក្ដីពិត—ជាពិសេសពេលដែលវាមិនត្រូវបានគេចាប់អារម្មណ៍នោះ ។

មនុស្សជាច្រើនចាត់ទុកអ្នកថាជា បុគ្គលរស់នៅក្នុងសហស្សវត្ស ។ ខ្ញុំសូមប្រាប់អ្នកថា នៅពេលអ្នកសង្គមវិទូហៅអ្នកដោយប្រើពាក្យនោះ ហើយពិពណ៌នាការសិក្សារបស់ខ្លួនអំពីរូបអ្នកទាំងអស់គ្នា—ចំណង់ចំណូលចិត្ត និង ការមិនចូលចិត្ត អារម្មណ៍ និង ទំនោរចិត្ត ភាពខ្លាំង និង ភាពខ្សោយរបស់អ្នក—នោះខ្ញុំពុំស្រណុកចិត្តឡើយ ។ មានអ្វីមួយទាក់ទងនឹងរបៀបដែលពួកគេប្រើពាក្យបុគ្គលរស់នៅក្នុងសហស្សវត្ស ដែលធ្វើឲ្យខ្ញុំខ្វល់ចិត្ត ។ និយាយឲ្យត្រង់ ខ្ញុំពុំចាប់អារម្មណ៍លើអ្វីដែល សង្គមវិទូ និយាយអំពីអ្នក ជាងអ្វីដែលព្រះអម្ចាស់បានមានបន្ទូលអំពីអ្នកនោះទេ ។

ពេលខ្ញុំអធិស្ឋានអំពីអ្នក ហើយទូលសួរព្រះអម្ចាស់ថាតើ ទ្រង់ មានព្រះទ័យយ៉ាងណាចំពោះអ្នក នោះខ្ញុំទទួលអារម្មណ៍ខុសគ្នាឆ្ងាយ ពីអ្វីដែលសង្គមវិទូបាននិយាយ ។ អារម្មណ៍ខាងវិញ្ញាណដែលខ្ញុំបានទទួលអំពីអ្នក នាំខ្ញុំឲ្យជឿថា ពាក្យ បុគ្គលរស់នៅក្នុងសហស្សវត្ស អាចជារឿងដ៏ល្អបំផុតចំពោះអ្នក ! ប៉ុន្តែមានមូលហេតុខុសគ្នាឆ្ងាយ ពីអ្វីដែលសង្គមវិទូ អាច យល់បានទៅទៀត ។

ពាក្យ បុគ្គលរស់នៅក្នុងសហស្សវត្ស ជារឿងដ៏ល្អបំផុតចំពោះអ្នក បើពាក្យនោះរំឭកអ្នកថាតើអ្នកជានរណាឲ្យប្រាកដ និង ថាតើគោលបំណងរបស់អ្នកគឺជាអ្វី ឲ្យប្រាកដ នោះ ។ បុគ្គលរស់នៅដ៏ស្មោះត្រង់ម្នាក់ក្នុងសហស្សវត្ស គឺបុគ្គលដែលត្រូវបានបង្រៀន ហើយបានបង្រៀនដំណឹងល្អនៃព្រះយេស៊ូវគ្រីស្ទកាលនៅជីវិតមុនឆាកជីវិតនេះ និង ជាបុគ្គលដែលបានធ្វើសេចក្ដីសញ្ញាជាមួយព្រះវរបិតាសួគ៌ពេលនោះ ទាក់ទងនឹងកត្តានៃភាពអង់អាច—ដែលជាកត្តានៃភាពអង់អាច ខាងសីលធម៌ នានា—ដែលអ្នកនឹងប្រតិបត្តិតាមនៅលើផែនដី ។

បុគ្គលរស់នៅដ៏ស្មោះត្រង់ម្នាក់ក្នុងសហស្សវត្ស គឺជាបុរស ឬ ស្ត្រីម្នាក់ដែលព្រះទុកព្រះទ័យដើម្បីបញ្ជូនមកកើតលើផែនដី អំឡុងសម័យកាន់កាប់ត្រួតត្រាដ៏មានបង្ខិតបង្ខំ បំផុត ក្នុងប្រវត្តិសាស្ត្រពិភពលោក ។ បុគ្គលរស់នៅដ៏ស្មោះត្រង់ម្នាក់ក្នុងសហស្សវត្ស គឺជាបុរស ឬ ស្ត្រីដែលរស់នៅបច្ចុប្បន្ននេះ ដើម្បីជួយរៀបចំមនុស្សសម្រាប់ការយាងមកជាលើកទីពីរនៃព្រះយេស៊ូវគ្រីស្ទ និង រាជ្យនៃសហស្សវត្សទ្រង់ ។ ចូរកុំយល់ច្រឡំឡើយ—អ្នកបានកើតមកដើម្បីធ្វើជាបុគ្គលរស់នៅដ៏ស្មោះត្រង់ម្នាក់ក្នុងសហស្សវត្ស ។

សំណួរសួរថា « តើអ្នកក្រោកឈរ ហើយរស់នៅជាបុគ្គលដ៏ស្មោះត្រង់ម្នាក់ក្នុងសហស្សវត្ស » បានយ៉ាងដូចម្ដេច ? ខ្ញុំមានអនុសាសន៍ចំនួនបួន ។

ដឹងថាអ្នក ជានរណា ឲ្យប្រាកដ

អនុសាសន៍ទីមួយគឺ ៖ ដឹងថាអ្នក ជានរណា ឲ្យប្រាកដ ។

ចូរចំណាយពេលគិតដោយយកចិត្តទុកដាក់ ចំពោះសេចក្តីពិតទាំងនេះ ៖

អ្នកគឺជាបុត្រា ឬ បុត្រីដែលបានជ្រើសតាំងរបស់ព្រះ ។
អ្នកត្រូវបានបង្កើតមក ទៅតាមរូបរាងរបស់ទ្រង់ ។
អ្នកត្រូវបានបង្រៀននៅឯពិភពវិញ្ញាណ ដើម្បីត្រៀមខ្លួនសម្រាប់អ្វីៗដែលអ្នកនឹងជួបប្រទះអំឡុងសម័យចុងបង្អស់នៅថ្ងៃចុងក្រោយនេះ ។^១ ការបង្រៀននោះស្ថិតស្ថេរនៅជាមួយអ្នក !

អ្នកកំពុងរស់នៅក្នុង « ម៉ោងទីដប់មួយ » ។ ព្រះអម្ចាស់បានប្រកាសថា នេះគឺជាពេលចុងក្រោយ ដែលទ្រង់នឹងត្រាស់ហៅពួកធ្វើការនៅក្នុងចម្ការទំពាំងបាយទ្រង់ ឲ្យប្រមូលអ្នកត្រូវបានជ្រើសតាំងពីទិសទាំងបួននៃផែនដី ។^២ ហើយ អ្នក ត្រូវបានបញ្ជូនឲ្យមករួមចំណែកក្នុងការប្រមូលនេះ ។ ខ្ញុំបានឃើញដោយខ្លួនខ្ញុំម្ដងហើយម្ដងទៀត អំពីអានុភាពដ៏ខ្លាំងក្លានៃបុគ្គលរស់នៅដ៏ស្មោះត្រង់ក្នុងសហស្សវត្ស កាលពួកគេនាំមនុស្សទូទៅឲ្យស្គាល់សេចក្ដីពិត ។ នេះគឺជាចំណែកមួយនៃអត្តសញ្ញាណ និង គោលបំណងរបស់អ្នកក្នុងនាមជាពូជនៃលោកអ័ប្រាហាំ !^៣

ប៉ុន្មានខែកន្លងទៅ វែនឌី និង ខ្ញុំបានមានបទពិសោធន៍មួយដ៏អស្ចារ្យនៅប្រទេស ស៊ីបេរី ។ ចំណោមអ្នករួមដំណើរជាមួយយើងនៅ « ថ្ងៃរៀបចំ » នៅទីក្រុង អឺខឺត មានប្រធានបេសកកម្ម ហ្គ្រិគោរី អេស ប្រ៊ីនតុន ព្រមទាំងភរិយាលោកគឺ សាលី និង កូនត្រឡប់មកពីបេសកកម្មវិញគឺ សាំ ដែលបានបម្រើនៅប្រទេសរុស្ស៊ី ។ យើងបានទៅទស្សនាបឹង បៃកាល និងតូបលក់ឥវ៉ាន់នៅលើមាត់បឹងនោះ ។

ពេលយើងមកដល់ឡានរបស់យើងវិញ យើងបានសម្គាល់ថា សាំ មិនបានមកជាមួយយើងនោះទេ ។ បន្តិចក្រោយមក គាត់បានត្រឡប់មកវិញ ថែមទាំងបាននាំស្ត្រីចំណាស់បន្តិចមកជាមួយផងឈ្មោះ វ៉ាលែនទីណា ។ វ៉ាលែនទីណា បានថ្លែងជាភាសាកំណើតរុស្ស៊ីរបស់នាងថា « ខ្ញុំចង់ជួបម្ដាយរបស់យុវជនរូបនេះ ។ គាត់ជាក្មេងចេះគួរសម ឆ្លាត ថែមទាំងចិត្តល្អ ! ខ្ញុំចង់ជួប ម្ដាយរបស់គាត់ ! » វ៉ាលែនទីណា ត្រូវបានទាក់ចិត្តនឹងទឹកមុខស្រស់ប៉ប្រិម និង ពេញដោយអំណររបស់ សាំ ។

សាំ បានណែនាំទាំងម្ដាយ និង ឪពុកឲ្យ វ៉ាលែនទីណា ស្គាល់ ហើយបានផ្ដល់កូនសៀវភៅមួយអំពីព្រះអង្គសង្គ្រោះ ព្រមទាំងបានឲ្យអ្នកផ្សព្វផ្សាយសាសនាទៅជួបគាត់ ។ ក្រោយមកកាលអ្នកផ្សព្វផ្សាយសាសនាបានទៅបង្រៀនគាត់ទាំងផ្ដល់ព្រះគម្ពីរមរមនមួយក្បាល នោះគាត់បានសន្យាថានឹងអានវា ។ ស្ត្រីបីបួននាក់ដែលធ្វើការជាមួយគាត់ ក៏មានចិត្តចង់អានព្រះគម្ពីរដែល វ៉ាលែនទីណា បានទទួលនោះដែរ ។ យើងពុំដឹងថារឿងនោះបញ្ចប់ទៅយ៉ាងដូចម្ដេចទេ ប៉ុន្តែដោយសារពន្លឺដ៏ពិសេសដែល សាំ មានក្នុងខ្លួននោះ វ៉ាលែនទីណា និង មិត្តខ្លះរបស់គាត់បានស្គាល់ដំណឹងល្អ ។

បុគ្គលរស់នៅដ៏ស្មោះត្រង់ក្នុងសហស្សវត្សដូចជា សាំ ដឹងយ៉ាងប្រាកដថាខ្លួនគេជានរណា ។ ពួកគេជាសិស្សដ៏ពិតរបស់ព្រះយេស៊ូវគ្រីស្ទ ដែលប្រើគ្រប់ឱកាសដែលមានដើម្បីជួយខ្លួនឯង និង មនុស្សទូទៅ សម្រាប់រជ្ជកាលនៃសហស្សវត្សរបស់ព្រះអង្គសង្គ្រោះ ។

ហេតុដូច្នោះហើយ អនុសាសន៍ទីមួយរបស់ខ្ញុំគឺ ត្រូវដឹង ដោយខ្លួនអ្នកថា អ្នកជានរណាឲ្យប្រាកដ ។ ចូរទូលសួរព្រះវរបិតាសួគ៌របស់អ្នក នៅក្នុងព្រះនាមនៃព្រះយេស៊ូវគ្រីស្ទ ថាតើទ្រង់មានព្រះទ័យដូចម្ដេចចំពោះអ្នក និង បេសកកម្មរបស់អ្នកលើផែនដីនេះ ។ បើអ្នកទូលសួរដោយស្មោះអស់ពីចិត្ត ឲ្យបានច្រើនដង នោះព្រះវិញ្ញាណនឹងខ្សឹបប្រាប់សេចក្ដីពិតដែលផ្លាស់ប្ដូរជីវិតដល់អ្នក ។ សូមកត់ត្រាអារម្មណ៍ទាំងនោះ ហើយអានវាជាញឹកញាប់ រួចធ្វើតាមដោយប្រាកដប្រជា ។

ខ្ញុំសូមសន្យា នឹងអ្នកថា បើអ្នកចាប់ផ្ដើមយល់តែបន្តិចអំពីអ្វីដែលព្រះវរបិតាសួគ៌ទតឃើញក្នុងអ្នក និង អ្វីដែលទ្រង់រំពឹងឲ្យអ្នកធ្វើដើម្បីទ្រង់ នោះជីវិតអ្នកនឹងផ្លាស់ប្ដូរជានិច្ច !

រំពឹង ហើយត្រៀមខ្លួនសម្រេចបានភាពមិនអាចទៅរួច ។

អនុសាសន៍ទីពីរគឺ ៖ រំពឹង ហើយត្រៀមខ្លួនសម្រេចបាននូវកិច្ចការលំបាកៗ ។

ព្រះបានតែងតែតម្រូវឲ្យបុត្រាបុត្រីទ្រង់ដែលធ្វើសេចក្ដីសញ្ញា ធ្វើកិច្ចការដ៏លំបាកៗ ។ ដោយសារតែអ្នកគឺជាបុត្រាបុត្រីព្រះដែលរក្សាសេចក្ដីសញ្ញា រស់នៅក្នុងសម័យចុងបង្អស់នៅថ្ងៃចុងក្រោយ នោះព្រះអម្ចាស់នឹងតម្រូវឲ្យ អ្នក ធ្វើកិច្ចការលំបាកៗ ។ អ្នកអាចប្រាកដបានថា—ការសាកល្បងទៅលើអ័ប្រាហាំពុំឈប់ត្រឹមអ័ប្រាហាំនោះទេ ។^៤

ខ្ញុំដឹងអំពីកម្រិតភ័យខ្លាចដែលអាចនឹងមាន ពេលត្រូវបានស្នើឲ្យធ្វើអ្វីមួយ ហាក់ដូចជា លើសឆ្ងាយពីសមត្ថភាពរបស់អ្នក ។ ខ្ញុំបានធ្វើជាសមាជិកក្នុងកូរ៉ុមនៃពួកសាវកដប់ពីរនាក់ អស់រយៈពេល ១៩ ឆ្នាំ ចាប់តាំងពីប្រធាន ស្ពែនស៊ើរ ដបុលយូ ឃឹមបឹល បានទទួលមរណភាពទៅ ។ នៅក្នុងការប្រជុំដំបូងរបស់គណៈប្រធានទីមួយ និង កូរ៉ុមនៃពួកសាវកដប់ពីរនាក់ បន្ទាប់ពីប្រធាន អ៊ែសរ៉ា ថាហ្វ ប៊ែនសឹន ត្រូវបានតែងតាំង លោកបានផ្ដល់ការចាត់តាំងពិសេសៗដល់ពួកដប់ពីរនាក់ ។ ការណែនាំរបស់លោកចំពោះខ្ញុំរួមមាន « អ្នកត្រូវបើកការប្រកាសដំណឹងល្អ នៅបណ្ដាប្រទេសអឺរ៉ុបខាងកើត » ។

កាលនោះគឺឆ្នាំ ១៩៨៥ ។ អំឡុងពេលភាពតានតឹងខាងនយោបាយដែលហៅថាសង្គ្រាមត្រជាក់នោះ ពុំមែនគ្រាន់តែកំពែងដ៏ធំដែលពុះចែកទីក្រុង ប៊ែកឡាំង នោះទេ ប៉ុន្តែអឺរ៉ុបខាងកើតទាំងមូលបានស្ថិតនៅក្រោមនឹមសង្កត់សង្កិននៃលទ្ធិកុម្មុយនិស ។ សាសនាទាំងអស់ត្រូវបានបិទ ហើយការថ្វាយបង្គំខាងសាសនាត្រូវបានដាក់កំហិតយ៉ាងតឹងរ៉ឹង ។

ខ្ញុំមានអាជីពជាអ្នកវះកាត់បេះដូងដើម្បីសង្គ្រោះជីវិតមនុស្សជាច្រើន ប៉ុន្តែខ្ញុំ គ្មាន បទពិសោធន៍ដែលនាំខ្ញុំឲ្យជឿថា ខ្ញុំអាចបើកឲ្យមានការប្រកាសដំណឹងល្អនៅបណ្ដាប្រទេសនានាឡើយ ។ ប៉ុន្តែព្យាការីបានផ្ដល់ការចាត់តាំងមួយដល់ខ្ញុំ ដូច្នេះខ្ញុំបានចាប់ផ្ដើមធ្វើអ្វីដែលទំនងជាមិនអាចទៅរួចចំពោះខ្ញុំ ។

ពេលចាប់ផ្ដើមដំបូង ឧបសគ្គនានាបានកើតឡើងចំពោះខ្ញុំ ។ ខ្ញុំបានទៅដល់ប្រទេសជាច្រើន ដែលខ្ញុំពុំដឹងថាត្រូវទៅទីណានោះទេ ។ ទោះជាខ្ញុំ អាច រកឃើញឈ្មោះមន្ត្រីរដ្ឋាភិបាលដែលត្រូវជួបក៏ដោយ ក៏វាមិនមែនជារឿងចម្លែកនោះទេ ដែលការប្រជុំត្រូវលុបចោលនៅនាទីចុងក្រោយ ឬ ត្រូវពន្យារពេលនោះ ។ ក្នុងប្រទេសមួយ នៅពេលការណាត់ជួបត្រូវបានពន្យាររយៈពេលពីរថ្ងៃ ចំនួននៃការល្បួងត្រូវបានដាក់នៅនឹងមុខដើម្បីសាកល្បងខ្ញុំ—រួមមានទីផ្សារប្រាក់ប្ដូរប្រាក់ និង សកម្មភាពខុសច្បាស់ផ្សេងៗ ។ គ្រាមួយ ការប្រជុំត្រូវបានបើកដោយមានការបញ្ជាឲ្យខ្ញុំចាកចេញ ជាបន្ទាន់ !

ប៉ុន្តែព្រះអម្ចាស់អាចធ្វើកិច្ចការរបស់ទ្រង់បាន^៥ ហើយខ្ញុំមានឯកសិទ្ធិដើម្បីឃើញអព្ភូតហេតុមួយហើយមួយទៀត—ជានិច្ច ហើយមានតែ បន្ទាប់ពី ខ្ញុំបានគិតដោយល្អិតល្អន់ ប្រឹងប្រែងដោយអង់អាច និង អធិស្ឋានដោយស្មោះប៉ុណ្ណោះ ។

ប្រទេសមួយចំនួនបានទទួលស្គាល់សាសនាចក្រ ពីមុនកំពែងទីក្រុងប៊ែកឡាំងបានរលំចុះ ។ ក្រោយៗមកទៀតមានប្រទេសដទៃបានទទួលស្គាល់ដែរ ។ ក្នុងឆ្នាំ ១៩៩២ ខ្ញុំអាចរាយការណ៍ទៅកាន់ប្រធាន ប៊ែនសឹន ថា ឥឡូវនេះសាសនាចក្រត្រូវបានស្ថាបនាក្នុង គ្រប់ ប្រទេសនៅអឺរ៉ុបខាងកើត !

ក្នុងនាមជាបុគ្គលរស់នៅដ៏ស្មោះត្រង់ក្នុងសហស្សវត្ស ព្រះអម្ចាស់អាចរំពឹងថាអ្នក ក៏នឹងសម្រេចបានរឿងជាប្រវត្តិសាស្ត្រដែរ ! អ្នកនឹងត្រូវបានតម្រូវឲ្យទទួលយកកិច្ចការលំបាកៗ ហើយក្លាយជាឧបករណ៍នៅក្នុងព្រះហស្តព្រះអម្ចាស់ ។ ហើយទ្រង់នឹងធ្វើឲ្យ អ្នក សម្រេចបានភាពមិនអាចទៅរួច ។

តើអ្នកនឹងសម្រេចបាននូវកិច្ចការលំបាកទាំងនោះ បានយ៉ាងដូចម្ដេច ? តាមរយៈការធ្វើ អ្វីគ្រប់យ៉ាង ដែលតម្រូវឲ្យមានដើម្បីពង្រឹងសេចក្ដីជំនឿលើព្រះយេស៊ូវគ្រីស្ទ តាមរយៈការបង្កើនការយល់ដឹងអំពីគោលលទ្ធិដែលបានបង្រៀននៅក្នុងសាសនាចក្រទ្រង់ដែលបានស្ដារឡើងវិញ និង ការស្វែងរកសេចក្ដីពិតដោយឥតស្រាកស្រាន្ត ។ ក្នុងនាមជាបុគ្គលរស់នៅដ៏ស្មោះត្រង់ក្នុងសហស្សវត្ស ដែលចាក់គ្រឹះនៅលើគោលលទ្ធិដ៏ពិត នៅពេលអ្នកត្រូវបានតម្រូវឲ្យធ្វើរឿងដែលមិនអាចរួច អ្នកនឹងអាចឈានទៅមុខដោយក្ដីជំនឿ ហើយបន្តធ្វើជានិច្ច ហើយរីករាយធ្វើអ្វីទាំងអស់ដែលមានក្នុងអំណាចរបស់អ្នក ដើម្បីបំពេញព្រះបំណងរបស់ព្រះអម្ចាស់ ។^៦

អ្នកនឹងមានគ្រាដែលអ្នកនឹងបាក់ទឹកចិត្តទាំងស្រុង ។ ដូច្នេះ សូមអធិស្ឋានដើម្បីមានភាពក្លាហានដើម្បីមិនបោះបង់ចោល ! អ្នកនឹងត្រូវការកម្លាំងនោះ ព្រោះវានឹងមានមនុស្សចាប់អារម្មណ៍កាន់តែតិចទៅៗក្នុងការធ្វើជាពួកបរិសុទ្ធថ្ងៃចុងក្រោយ ។ ជាអកុសល បុគ្គលមួយចំនួនដែលអ្នកគិតថាជាមិត្តរបស់អ្នកនោះ នឹងក្បត់អ្នក ។ ហើយរឿងខ្លះនឹងហាក់ដូចជាពុំយុត្តិធម៌ឡើយ ។

យ៉ាងណាក៏ដោយ ខ្ញុំសូមសន្យាថា ពេលអ្នកដើរតាមព្រះយេស៊ូវគ្រីស្ទ អ្នកនឹងរកឃើញភាពសុខសាន្ត និង អំណរពិត ។ ពេលអ្នករក្សាក្ដីសញ្ញាដោយមានភាពប្រាកដប្រជាកាន់តែខ្ពស់ ហើយពេលអ្នកការពារសាសនាចក្រ និង នគរព្រះនៅលើផែនដីនេះ នោះព្រះអម្ចាស់នឹងប្រទានពរអ្នកដោយនូវកម្លាំង និង ប្រាជ្ញាដើម្បីសម្រេចបាននូវកិច្ចការលំបាកៗ ។

ដឹងរបៀបទទួលបានអំណាចពីស្ថានសួគ៌ ។

អនុសាសន៍ទីបីគឺ ៖ ដឹងរបៀបទទួលបានព្រះចេស្តាពីស្ថានសួគ៌ ។

យើងគ្រប់គ្នាសុទ្ធតែមានចម្ងល់ ។ ការព្យាយាមរៀន យល់ដឹង ហើយស្គាល់សេចក្ដីពិត គឺជាផ្នែកមួយដ៏សំខាន់ក្នុងបទពិសោធន៍ជីវិតរមែងស្លាប់របស់យើង ។ ខ្ញុំបានចំណាយពេលជាច្រើនក្នុងជីវិតខ្ញុំ ដើម្បីសិក្សាស្រាវជ្រាវ ។ អ្នកក៏នឹងរៀនបានយ៉ាងល្អបំផុត ដោយសួរសំណួរដ៏បំផុសគំនិត ។

នៅគ្រានេះមានគ្នាយើងមួយចំនួន កំពុងមានបញ្ហាក្នុងការដឹងថាអ្វីដែលខ្លួនគួរតែធ្វើក្នុងជីវិត ។ អ្នកខ្លះទៀត អាចឆ្ងល់ថាតើអ្នកត្រូវបានអត់ទោសពីអំពើបាបហើយឬនៅ ។ អ្នកទាំងអស់គ្នាភាគច្រើនឆ្ងល់ថាតើនរណាជាដៃគូអស់កល្ប និងថាតើម្នាក់នោះនៅឯណា—និង អ្នកដែលមិនគួរក្លាយជាដៃគូអ្នក ។

អ្នកខ្លះអាចឆ្ងល់ថាតើហេតុអ្វីបានជាសាសនាចក្រ ធ្វើអ្វីមួយចំនួនដែលសាសនាចក្រត្រូវធ្វើ ។ អ្នកទាំងអស់គ្នាជាច្រើននាក់អាចពុំប្រាកដ អំពីរបៀបទទួលបានចម្លើយចំពោះការអធិស្ឋានរបស់អ្នក ។

ព្រះវរបិតាសួគ៌យើង និង ព្រះរាជបុត្រាទ្រង់ត្រៀមព្រះកាយជានិច្ច ដើម្បីឆ្លើយតបទៅនឹងសំណួរនានាតាមរយៈការបម្រើនៃព្រះវិញ្ញាណបរិសុទ្ធ ។ ប៉ុន្តែនោះគឺអាស្រ័យទៅលើខ្លួនអ្នក ដែលត្រូវរៀនដើម្បីបានសក្ដិសម ហើយទទួលបានចម្លើយទាំងនោះ ។

តើអ្នកអាចចាប់ផ្ដើមត្រង់ចំណុចណា ? ចូរចាប់ផ្ដើមដោយចំណាយពេល នៅក្នុងទីបរិសុទ្ធឲ្យបានកាន់តែច្រើន ។ ព្រះវិហារបរិសុទ្ធគឺជាទីបរិសុទ្ធ ។ សាលាជំនុំក៏ជាទីបរិសុទ្ធដែរ ជាទីដែលអ្នកធ្វើសេចក្ដីសញ្ញាសាក្រាម៉ង់រៀងរាល់ថ្ងៃអាទិត្យ ។ ខ្ញុំសូមអញ្ជើញអ្នកធ្វើឲ្យផ្ទះជួល អន្តេវាសិកដ្ឋាន គេដ្ឋាន ឬ បន្ទប់របស់អ្នកក្លាយទៅជាទីបរិសុទ្ធ ដែលអ្នកអាចដកខ្លួនអ្នកចេញពីភាពរំខានដ៏ខ្មៅងងឹតនៃលោកិយនេះ ។

ការអធិស្ឋានគឺជាគន្លឹះមួយ ។ ចូរអធិស្ឋានដើម្បីឲ្យបានដឹងថាអ្វីដែលត្រូវឈប់ធ្វើ និង អ្វីដែលត្រូវចាប់ផ្ដើមធ្វើ ។ ចូរអធិស្ឋានដើម្បីដឹងថាអ្វីដែលត្រូវបន្ថែមទៅក្នុងស្ថានភាពរបស់អ្នក និងអ្វីដែលត្រូវដកចេញ ដើម្បីឲ្យព្រះវិញ្ញាណអាចគង់ជាមួយអ្នកយ៉ាងបរិបូរ ។

ចូរទូលអង្វរព្រះអម្ចាស់ សុំអំណោយនៃការចេះសង្កេត ។ ក្រោយមក ចូររស់នៅ ហើយធ្វើការឲ្យបានសក្ដិសមទទួលអំណោយនោះ ដើម្បីកាលណាព្រឹត្តិការណ៍ដ៏ច្របូកច្របល់កើតឡើងលើពិភពលោកនេះ អ្នកនឹងដឹងយ៉ាងប្រាកដថាអ្វីដែលពិត និង អ្វីដែលមិនពិត ។ ^៧

បម្រើមនុស្សដោយសេចក្ដីស្រឡាញ់ ។ ការបម្រើពេញដោយក្ដីស្រឡាញ់ចំពោះអ្នកដែលបានវង្វេង ឬ មានរបួសខាងវិញ្ញាណ អាចបើកចិត្តអ្នកឲ្យទទួលវិវរណៈផ្ទាល់ខ្លួន ។

ចូរចំណាយពេលកាន់តែច្រើន—កាន់តែច្រើនបំផុត—នៅក្នុងទីបរិសុទ្ធដែលព្រះវិញ្ញាណមានវត្តមាន ។ នោះមានន័យថា ចំណាយពេលកាន់តែច្រើនជាមួយមិត្ត ដែលកំពុងព្យាយាមមានព្រះវិញ្ញាណគង់ជាមួយពួកគេ ។ ចូរចំណាយពេលកាន់តែច្រើនដើម្បីលុតជង្គង់អធិស្ឋាន ជាមួយព្រះគម្ពីរ ជាមួយកិច្ចការពង្សប្រវត្តិ នៅក្នុងព្រះវិហារបរិសុទ្ធ ។ ខ្ញុំសូមសន្យាថា ពេលអ្នក ថ្វាយ ចំណែកនៃពេលវេលារបស់អ្នក ដោយស្ម័គ្រចិត្ត នោះទ្រង់នឹងធ្វើពេលវេលាដែលនៅសល់ទាំងប៉ុន្មានកាន់តែមានន័យ ។

យើងគាំទ្របុរស ១៥ នាក់ ដែលបានតែងតាំងជាព្យាការី អ្នកមើលឆុត និងអ្នកទទួលវិវរណៈ ។ ពេលបញ្ហាពិបាកៗកើតឡើង—ហើយហាក់ដូចជាកាន់តែពិបាកពីមួយថ្ងៃទៅមួយថ្ងៃ—បុរសទាំង ១៥ រូបនេះពុះពារដោះស្រាយបញ្ហានោះ ព្យាយាមស្វែងរកលទ្ធផលដែលអាចដោះស្រាយទៅរួចចំពោះសកម្មភាពនានា ហើយពួកលោកព្យាយាមស្ដាប់ព្រះសូរសៀងរបស់ព្រះអម្ចាស់ដោយឧស្សាហ៍ ។ បន្ទាប់ពីបានតមអាហារ អធិស្ឋាន សិក្សា ពិចារណា ហើយប្រឹក្សាជាមួយពួកបងប្អូនប្រុសអំពីបញ្ហាធំៗហើយ វាមិនមែនជារឿងចម្លែកនោះទេ ដែលខ្ញុំត្រូវភ្ញាក់ដឹងខ្លួនពេលកណ្ដាលរាត្រី ដោយទទួលបានអារម្មណ៍បំផុសគំនិតលើបញ្ហាដែលយើងកំពុងព្រួយបារម្ភនោះ ។ ពួកបងប្អូនប្រុសរបស់ខ្ញុំ ក៏មានបទពិសោធន៍ដូចគ្នានេះដែរ ។

គណៈប្រធានទីមួយ និង កូរ៉ុមនៃពួកសាវកដប់ពីរនាក់ ប្រឹក្សាជាមួយគ្នា ហើយចែកចាយអ្វីទាំងអស់ដែលព្រះអម្ចាស់បានដឹកនាំយើងឲ្យយល់ ហើយទទួលអារម្មណ៍ដឹង ទាំងបុគ្គលម្នាក់ៗ និង ជាក្រុម ។ បន្ទាប់មក យើងទន្ទឹងចាំមើលព្រះអម្ចាស់ប្រទានអានុភាពឲ្យប្រធាននៃសាសនាចក្រ ប្រកាសអំពីព្រះបំណងទ្រង់ ។

ដំណើរការរបស់ព្យាការីនេះបានចាប់ផ្ដើមក្នុងឆ្នាំ ២០១២ ដែលមានការផ្លាស់ប្ដូរអាយុអ្នកផ្សព្វផ្សាយសាសនា ព្រមទាំងកំណែបន្ថែមនៅក្នុងក្បួនខ្នាតសាសនាចក្រ ដែលបណ្ដាលមកពីការទទួលស្គាល់ឲ្យស្របច្បាប់លើអាពាហ៍ពិពាហ៍ភេទគ្នាក្នុងប្រទេសមួយចំនួន ។ ដោយសារពេញដោយក្ដីអាសូរដល់មនុស្សគ្រប់រូប ជាពិសេសដល់កុមារទាំងឡាយ ទើបយើងពុះពារដើម្បីបានយល់ព្រះបំណងព្រះអម្ចាស់លើបញ្ហានេះ ។ ទន្ទឹមពេលដែលយើងប្រុងប្រៀបធ្វើតាមផែនការនៃសេចក្ដីសង្គ្រោះរបស់ព្រះ និង ក្ដីសង្ឃឹមទ្រង់ឲ្យបុត្រាបុត្រីទ្រង់មានជីវិតអស់កល្បនោះ យើងបានពិចារណាលើការផ្លាស់ប្ដូរ និង ការរៀបចំស្ថានភាពនានាដែលអាចកើតមានឡើង ។ យើងបានជួបប្រជុំគ្នាជាច្រើនដង ដើម្បីតមអាហារ និង អធិស្ឋាន ហើយស្វែងរកការដឹកនាំ និង ការបំផុសគំនិតបន្ថែម ។ រួចកាលព្រះអម្ចាស់បំផុសគំនិតដល់ព្យាការីទ្រង់គឺ ប្រធាន ថូម៉ាស អេស ម៉នសុន ឲ្យប្រកាសអំពីព្រះឆន្ទៈរបស់ព្រះអម្ចាស់ ព្រមទាំងព្រះបំណងទ្រង់នោះ យើងម្នាក់ៗទទួលបានការបញ្ជាក់ខាងវិញ្ញាណអំឡុងពេលដ៏ពិសិដ្ឋនោះឯង ។ វាគឺឯកសិទ្ធិរបស់យើងក្នុងនាមជាសាវក ដែលត្រូវគាំទ្រអ្វីដែលត្រូវបានបើកសម្ដែងដល់ប្រធាន ម៉នសុន ។ វិវរណៈមកពីព្រះអម្ចាស់ទៅកាន់អ្នកបម្រើទ្រង់គឺជាដំណើរការដ៏ពិសិដ្ឋមួយ ចំណែកឯឯកសិទ្ធរបស់អ្នកក្នុងការទទួលបានវិវរណៈផ្ទាល់ខ្លួនក៏ដូច្នេះដែរ ។

ប្អូនៗប្រុសស្រីជាទីស្រឡាញ់ អ្នកក៏អាចដឹងព្រះឆន្ទៈ និង ព្រះបំណងរបស់ព្រះអម្ចាស់ សម្រាប់ជីវិតអ្នកផ្ទាល់ ដូចជាយើងដែលជាសាវកមានសម្រាប់សាសនាចក្រទ្រង់ដែរ ។ ក៏ដូចជាព្រះអម្ចាស់តម្រូវឲ្យ យើង ស្វែងរក តមអាហារ ហើយអធិស្ឋាន ហើយសិក្សា ហើយពុះពារនឹងចម្លើយពិបាកៗដែរ នោះទ្រង់តម្រូវឲ្យ អ្នក ធ្វើដូចគ្នានេះ នៅពេលអ្នកស្វែងរកចម្លើយចំពោះសំណួរផ្ទាល់ខ្លួន ។

អ្នកអាចរៀនស្ដាប់តាមព្រះសូរសៀងរបស់ព្រះអម្ចាស់ តាមរយៈការខ្សឹបប្រាប់ពីព្រះវិញ្ញាណបរិសុទ្ធ ។^៨ ទោះជា Google, Twitter, និង Facebook មើលទៅដូចជាមានប្រយោជន៍យ៉ាងណាក្ដី ក៏វាមិនផ្ដល់ចម្លើយចំពោះសំណួរចាំបាច់បំផុតរបស់អ្នកនោះដែរ !

មិត្តវ័យក្មេងរបស់ខ្ញុំអើយ អ្នកអាចស្គាល់ព្រះឆន្ទៈ និង ព្រះបំណងរបស់ព្រះអម្ចាស់សម្រាប់ជីវិតផ្ទាល់ខ្លួនអ្នកបាន ។ អ្នកមិនបាច់ឆ្ងល់ថាតើព្រះអម្ចាស់សព្វព្រះទ័យឲ្យអ្នកនៅទីណា ឬ ថាតើអ្នកកំពុងធ្វើអ្វីដែលទ្រង់សព្វព្រះទ័យឲ្យអ្នកធ្វើដែរឬនោះទេ ។ អ្នកអាចដឹងបាន ! ព្រះវិញ្ញាណបរិសុទ្ធនឹងមានបន្ទូលប្រាប់អ្នក « គ្រប់អ្វីទាំងអស់ដែលអ្នកត្រូវធ្វើ » ។^៩

ធ្វើតាមព្យាការី ។

អនុសាសន៍ទីបួនគឺ ៖ ធ្វើតាមព្យាការី ។

ក្នុងឆ្នាំ ១៩៧៩ កាលកំពុងបម្រើជាប្រធានថ្នាក់សាលាថ្ងៃអាទិត្យទូទៅ ខ្ញុំត្រូវបានអញ្ជើញឲ្យចូលរួមសិក្ខាសាលាអ្នកតំណាងភូមិភាគដែលប្រធាន ស្ពែនស៊ើរ ដបុលយូ ឃឹមបឹល បានផ្ដល់សុន្ទរកថាដ៏បំផុសគំនិតមួយ អំពីការប្រកាសដំណឹងល្អដល់ជាតិសាសន៍នានា និងការមិនអនុញ្ញាតឲ្យប្រកាសមានដូចជា ប្រទេសចិនជាដើម ។ លោកបានអញ្ជើញឲ្យអ្នកចូលរួមសិក្ខាសាលានោះទាំងអស់ សិក្សាភាសាចិនកុកងឺ ដើម្បីយើងអាចប្រើជំនាញរបស់យើងជួយដល់ជនជាតិចិន ។

ចំពោះខ្ញុំ ការអញ្ជើញរបស់ប្រធាន ឃឹមបឹល ហាក់ដូចជាការបង្គាប់បែបព្យាករណ៍ ។ ដូច្នេះនារាត្រីនោះ ខ្ញុំបានសួរភរិយាខ្ញុំ ដានស្សិល ថាតើនាងចង់សិក្សាភាសាចិនកុកងឺជាមួយខ្ញុំឬទេ ។ នាងបានយល់ព្រម ហើយយើងបានជួលគ្រូបង្រៀនម្នាក់មកបង្រៀនយើង ។ ប្រាកដណាស់ យើងពុំចេះនិយាយភាសាចិនកុកងឺបានយ៉ាងល្អប៉ុន្មានទេ ប៉ុន្តែយើងបានដឹងថា នៅពេលយើងត្រូវបានអញ្ជើញនៅឆ្នាំបន្ទាប់នោះ ( តាមរយៈព្រឹត្តិការណ៍ដែលពុំបានគ្រោងទុក ) ដើម្បីទៅប្រទេសចិន ក្នុងនាមជាសាស្ត្រាចារ្យធ្វើទស្សនកិច្ចដើម្បីបង្រៀនវះកាត់បេះដូង នោះខ្ញុំបានត្រៀមខ្លួនបានយ៉ាងល្អ ។

ប្រាំមួយឆ្នាំក្រោយមកដល់ឆ្នាំ ១៩៨៥ ជាឆ្នាំ បន្ទាប់ពី ខ្ញុំត្រូវបានហៅឲ្យបម្រើជាកូរ៉ុមនៃពួកសាវកដប់ពីរនាក់ ។ ថ្ងៃមួយខ្ញុំបានទទួលសំណើបន្ទាន់មួយឲ្យទៅប្រទេសចិន ដើម្បីវះកាត់បេះដូងឲ្យតួល្ខោនល្បីល្បាញម្នាក់ ដែលគេចាត់ទុកជាវីរបុរសស្នេហាជាតិពេញមួយប្រទេសចិន ។ ខ្ញុំបានពន្យល់ថា តួនាទីខាងសាសនារបស់ខ្ញុំពុំអាចឲ្យខ្ញុំទៅបានទេ ប៉ុន្តែវេជ្ជបណ្ឌិតនៅប្រទេសចិន បានអង្វរឲ្យខ្ញុំទៅម្ដងនេះដើម្បីវះកាត់សង្គ្រោះជីវិត ។

ខ្ញុំបានពិភាក្សាជាមួយប្រធានកូរ៉ុម និង គណៈប្រធានទីមួយ ។ ពួកគេបានទទួលអារម្មណ៍ថា ដើម្បីជួយដល់ជនជាតិចិន ខ្ញុំគួរតែធ្វើដំណើរទៅ ហើយធ្វើការវះកាត់ ។

ដូច្នេះខ្ញុំបានទៅ ។ ដោយអំណរគុណ ការវះកាត់បានបញ្ចប់ទៅដោយជោគជ័យ ! យ៉ាងណាក៏ដោយ នោះគឺជាការវះកាត់ចុងក្រោយដែលខ្ញុំបានធ្វើ ។ វាគឺនៅទីក្រុង ជិនណាន ប្រទេសចិន ថ្ងៃទី ៤ ខែ មិនា ឆ្នាំ ១៩៨៥ ។

ពេលវេលាកន្លងទៅលឿនណាស់ ឥឡូវខែ តុលា ឆ្នាំ ២០១៥ ទៅហើយ ហើយទើបតែបីខែមុននេះ ។ វែនឌី និង ខ្ញុំត្រូវបានអញ្ជើញឲ្យត្រឡប់ទៅសាកលវិទ្យាល័យ ស្សានដុន សាកលវិទ្យាល័យវេជ្ជសាស្ត្រនៅទីក្រុង ជិនណាន ។ យើងភ្ញាក់ផ្អើលដែលខ្ញុំត្រូវបានស្វាគមន៍យ៉ាងកក់ក្ដៅក្នុងនាមជា « មិត្តចាស់ម្នាក់ » របស់ប្រទេសចិន ហើយបានរួបរួមគ្នាជាមួយគ្រូពេទ្យវះកាត់នានាដែលខ្ញុំបានបង្រៀនកាលពី ៣៥ ឆ្នាំមុន ។ ទស្សនកិច្ចរបស់យើងនោះគឺជួបជាមួយកូនប្រុស និង ចៅប្រុសរបស់តួល្ខោនដ៏ល្បីល្បាញរូបនោះ ។ បទពិសោធន៍ដ៏អស្ចារ្យទាំងនេះ អាចកើតឡើងដោយសារមូលហេតុមួយ ៖ ខ្ញុំបានស្ដាប់តាមដំបូន្មានរបស់ព្យាការីឲ្យសិក្សាភាសាចិនកុកងឺ !

ព្យាការីមើលឃើញការណ៍នានាជាមុន ។ លោកមើលឃើញគ្រោះថ្នាក់ ដែលបច្ចាមិត្តបានដាក់ ឬ នឹងដាក់នៅតាមផ្លូវរបស់យើង ។ ព្យាការីក៏មើលឃើញទុកជាមុននូវការទទួលខុសត្រូវ និង ឯកសិទ្ធិដែលរង់ចាំសម្រាប់អ្នកដែលស្ដាប់តាម ដោយមានចិត្តស្មោះក្នុងការគោរពប្រតិបត្តិ ។ ខ្ញុំដឹងថា រឿងនេះពិត ! ខ្ញុំបានដកពិសោធន៍វាដោយខ្លួនខ្ញុំផ្ទាល់ ម្ដងហើយម្ដងទៀត ។

ព្រះអម្ចាស់បានសន្យានឹងយើងថា ទ្រង់នឹងមិនបណ្ដោយឲ្យព្យាការីដឹកនាំយើងដើរផ្លូវខុសនោះទេ ។ ប្រធាន ហារ៉ូល ប៊ី លី បានថ្លែង ៖ « អ្នកអាចនឹងមិនចូលចិត្តអ្វី ដែលចេញមកពីអ្នកមានសិទ្ធិអំណាចនៃសាសនាចក្រនោះទេ ។ វាអាចនឹងផ្ទុយពីទស្សនខាងនយោបាយរបស់អ្នក ។ វាអាចនឹងផ្ទុយពីទស្សនខាងសង្គមរបស់អ្នក។ វាអាចនឹងជ្រៀតជ្រែកក្នុងជីវិតសង្គមមួយចំនួនរបស់អ្នក ។ ប៉ុន្តែបើអ្នកស្ដាប់តាមរឿងទាំងនេះ ដូចជាមកពីព្រះឱស្ឋរបស់ព្រះអម្ចាស់ផ្ទាល់ ដោយសេចក្ដីអត់ធន់ និងសេចក្ដីជំនឿ នោះការសន្យាគឺថា ‹ទ្វារស្ថាននរកនឹងពុំដែលឈ្នះអ្នកឡើយ មែនហើយ ហើយព្រះអម្ចាស់ដ៏ជាព្រះ ទ្រង់នឹងកម្ចាត់អំណាចនៃសេចក្ដីងងឹតចេញពីអ្នកទៅ ហើយនឹងបណ្ដាលឲ្យផ្ទៃមេឃញាប់ញ័រ ដើម្បីសេចក្ដីល្អដល់អ្នក និងសិរីល្អដល់ព្រះនាមរបស់ទ្រង់ › ( គ. និង ស. ២១:៦ ) »^១០

អ្នកអាចនឹងមិនយល់ការប្រកាសចេញពីព្យាការី ដែលកំពុងរស់នៅជានិច្ចនោះទេ ។ ប៉ុន្តែពេលអ្នកដឹងថា ព្យាការីគឺជាព្យាការី នោះអ្នកអាចចូលទៅជិតព្រះអម្ចាស់ដោយការបន្ទាបខ្លួន និង ក្ដីជំនឿ រួចទូលសុំសាក្សីផ្ទាល់ខ្លួនអំពី អ្វីគ្រប់យ៉ាង ដែលព្យាការីបានប្រកាស ។

ប្រមាណ ៤១ ឆ្នាំ មុន គ.ស សាសន៍នីហ្វៃជាច្រើនបានចូលសាសនាចក្រ ហើយសាសនាចក្របានរីកចម្រើន ។ ប៉ុន្តែ បក្សព័ន្ធសម្ងាត់ក៏បានចាប់ផ្ដើមរីកដុះដាលឡើងដែរ ពួកដឹកនាំរបស់វាដែលពេញដោយល្បិចកលបានលាក់ខ្លួនក្នុងចំណោមប្រជាជន ហើយមានការលំបាកក្នុងចាប់ពួកវា ។ នៅពេលប្រជាជនកាន់តែឆ្មើងឆ្មៃទៅៗ សាសន៍នីហ្វៃជាច្រើននាក់បានធ្វើ « ចំអកឡកឡឺយដល់អ្វីៗដែលពិសិដ្ឋ បដិសេធវិញ្ញាណនៃការព្យាករ និង វិវរណៈ » ។^១១

ការឈ្លានពានទាំងនោះ មានក្នុងចំណោមយើងសព្វថ្ងៃនេះ ។ ភាពពិតជាក់ស្ដែងគឺថា មាន « ពួកអ្នកបម្រើរបស់អារក្សសាតាំង »^១២ មានពាសពេញសហគមន៍ ។ ដូច្នេះ ចូរប្រយ័ត្នចំពោះដំបូន្មានដែលអ្នកដើរតាម ។^១៣

ប្អូនៗប្រុសស្រីជាទីស្រឡាញ់ អ្នកកើតមកដើម្បីធ្វើជាបុគ្គលរស់នៅដ៏ស្មោះត្រង់ក្នុងសហស្សវត្ស ! អ្នកគឺជាពូជជ្រើសរើស^១៤ ដែលត្រូវបានតែងតាំងដោយព្រះឲ្យធ្វើកិច្ចការដ៏អស្ចារ្យ—ដើម្បីជួយរៀបចំមនុស្សលើលោកនេះ សម្រាប់ការយាងមកជាលើកទីពីររបស់ព្រះអម្ចាស់ ។

ក្នុងនាមជាសាវកមួយរូបរបស់ព្រះអម្ចាស់យេស៊ូវគ្រីស្ទ ខ្ញុំសូមប្រសិទ្ធិពរជ័យដល់ប្អូនៗគ្រប់គ្នា ទុកជាខ្ញុំបានដាក់ដៃលើក្បាលអ្នក ឲ្យមានសមត្ថភាពក្លាយជាបុគ្គលរស់នៅដ៏ស្មោះត្រង់ក្នុងសហស្សវត្ស ។ ខ្ញុំសូមប្រសិទ្ធិពរអ្នកឲ្យមានប្រាថ្នា និង សមត្ថភាពក្នុងការស្គាល់អត្តសញ្ញាណ និង គោលបំណងរបស់ខ្លួន សូមអ្នកនឹងរំពឹង ហើយត្រៀមខ្លួនធ្វើកិច្ចការ « ដែលមិនអាចទៅរួច » សូមឲ្យអ្នកនឹងមិនរារែកក្នុងការខិតខំរៀនអំពីរបៀបបានអំណាចមកពីស្ថានសួគ៌ដើម្បីជួយអ្នកដោះស្រាយបញ្ហា ហើយឆ្លើយសំណួរដែលអ្នកមាន ។ ខ្ញុំសូមប្រសិទ្ធពរអ្នកឲ្យធ្វើតាមព្យាការីដោយឥតលំអៀង ឲ្យទទួលអារម្មណ៍សុខសាន្តក្នុងចិត្តនៅពេលអ្នកធ្វើដូច្នោះ ។ ខ្ញុំសូមប្រសិទ្ធពរអ្នកឲ្យដឹង ហើយទទួលអារម្មណ៍ដឹងថាព្រះអម្ចាស់សព្វព្រះទ័យអ្នក និង ថាតើទ្រង់ទុកព្រះទ័យលើអ្នកខ្លាំងប៉ុណ្ណា ។

ខ្ញុំស្រឡាញ់ ហើយគាំទ្រប្រធាន ថូម៉ាស អេស ម៉នសុន នៅក្នុងកិច្ចការដ៏ពិសិដ្ឋនៃព្រះដ៏មានព្រះចេស្ដានេះ ។ ព្រះយេស៊ូវគ្រីស្ទគឺជាព្រះអង្គសង្គ្រោះរបស់យើង ។ នេះគឺជាសាសនាចក្រទ្រង់ ។ យើងគឺជារាស្ត្ររបស់ទ្រង់ ! ខ្ញុំថ្លែងទីបន្ទាល់ដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ។