Veikauwaitaki
Vuli Kaburaki Vakayabaki ni S&I 2021
26 ni Janueri, 2021
Au taleitaka na veika e tukuna o Brother Wilkinson baleti ira era sa takali yani na nodra daulomani ka ra sa vakaleqai ena sala tale eso ena veigauna ka keitou vinakata mo ni kila ni keimami sa nanumi kemuni.
Au vinakata talega meu tekivu ena noqu vakaraitaka nanoqu vakavinavinaka e na nomuni sasaga ena dua na gauna ni veisau levu. Sa vakasakiti dina na nomuni cakacaka vagumatua mo ni veivakavulici vakavinaka ena initaneti. Au kila ni so na siga ena veivakayalolailaitaki, na nomu saga tiko me ra vakaitavi na gonevuli ni yaco tu e levu na veika e veivakataotaki. Vinaka vakakalevu na nomuni gugumatua tikoga. Keimami vakavinavinakataka talega na nomuni yalosoli mo ni veisau ki na veisau bibi eso sa vakayacori tiko, me vaka na ituvatuva vakavula ni lewenivuli vou kei na veika e veiganiti kina. Au vakavinavinakataka vakalevu na kaukauwa levu e tu vei kemuni mo ni sotava kina na veika kece oqo ena vakabauta cecere.
Ena dua na gauna ni veisau, e tiko e dua na kaukauwa, e dua beka na isolisoli ni Yalotabu, kau nanuma ni sa ka bibi me tu vei keda yadua. E tubu mai na vakabauti Jisu Karisito. Sai koya na noda rawa ni yalodei tu me baleta na rawaka ni veigauna sa oti, ni da vakanamata tiko ki na ikuri ni rarama e vinakata na Turaga me vakarautaka. E tukuna kina vaqo o Elder Jeffrey R. Holland:
“Na veika sa sivi sa ikoya meda vuli mai kina ia me kakua ni da bula tiko kina. … Nida sa vulica na veika e dodonu meda vulica ka kauta vata mai kei keda na noda vinaka taucoko eda sa rawata meda sa qai rai ki liu, ka nanuma tiko ni vakabauta sa dau dusi tikoga ki na veisiga ni mataka. …
“Na vakabauta e tarai ena veigauna sa oti ia e sega ni gadreva me tu voli ga kina. Na vakabauta e nuitaka ni tu vua na Kalou na veika cecere me noda.”1
Ni da taura tiko na veika vivinaka mai na veigauna sa oti, sa dodonu meda saga meda tara cake tiko na sasaga ena noda saga meda kila vakavinaka na veika e vinakata meda cakava na Turaga. Sa dodonu meda tarogi keda “Na cava sa vo vei au?”2 ka dau saga me vakavinakataki na noda kila, itovo, itovo tudei, kei na noda cakacaka. Oqori talega na ivakaraitaki ni noda vakabauta.
Ko ni na nanuma tiko beka ena sivia na lima na yabaki sa oti, a tukuna kina o Elder Kim B. Clark:
“Se vakacava ga na ivakatagedegede vakayalo eda marautaka tiko ena noda bula ena gauna oqo; se vakacava ga na ivakarau ni vakabauti Jisu Karisito e tiko vei keda oqo; se vakacava na kaukauwa ni yalodina kei na lomasoli, se vakacava na ivakarau ni talairawarawa se vakanuinui se loloma cecere ka tu vei keda; se vakacava na ivakatagedegede ni kila kei na rawa-ka vakacakacaka eda sa bau rawata, e na sega ni veirauti kei na cakacaka e tu e matada. …
Na Turaga ko Jisu Karisito e sa tu Vua na cakacaka levu meda cakava ena vukudra na itabatamata tubu cake mai. Sa dua na cakacaka e uasivia na veika kecega eda a sa cakava oti e liu.”3
Au vakavinavinakataka na nomuni ciqoma na nona veisureti. Au sa raica na nomuni sa vakatitobutaka na nomuni bula vakayalo kei na yalodina eso vei kemuni kei na na nomuni maqosa kei na kaukauwa. Eda sa raica oti na vuna sa rui bibi kina kei na vuna ena dau gadrevi tiko ga kina me da vakatitobutaka na veiitovo ni bula oqo ena veisiga ni mataka.
Meu wasea mada vei keda e dua na kena ivakaraitaki? Eda a veivosakitaka tiko na gagadre me da vakanamata vakalevu cake ena noda vakayavutaki keda vei Karisito ka vakanamata ki na vuli. E sega walega ni dua na malanivosa e veirawai se iwalewale ni veivakavulici. Na noda vakanamata tikoga vei Karisito kei na vuli-ka e dua na sala meda bulataka kina na ivunau cecere e rua.4 Sa dodonu me moica na noda sasaga me sureta vakalevu cake na itabagone kei an itabagone qasecake me ra vakaitavi. Ka dodonu talega me moica na noda sasaga me vakalevucaketaka na kaukauwa ni veivakavulici.
Ni da sasaga ena yalodina meda bulataka na imatai ni vunau cecere ki na noda veivakavulici e sega walega ni da tukuna na iVakabula ena icavacava ni lesoni. Eda vakayagataka na madigi kece sara meda vakadinadinataki Koya ka vakaraitaka Vua na noda vakavinavinaka. Eda toso tani mai na italanoa baleti Koya ki na tukuni Koya ni sa noda Dauniveivueti yadua, ka sa yaco meda kila, lomana, ka nuitaka.
Ena gauna eda saga kina meda bulataka na ikarua ni vunau levu ki na noda veivakavulici, e sega walega ni da vakanamata ki na lewenivuli vakarautaki se na vakayagataki ni iwalewale ni veivakavulici eso me ra vakaitavi kina na gonevuli. Eda vakanamata vakatabakidua ki na tamata yadua kei na nodra gagadre, ka da gadreva meda vukei ira mera toso tikoga yani ki na bula tawamudu. Eda toso tani mai na noda raica na dua na kalasi ni gonevuli ka da raica na gonevuli yadua ni luvena lomani na Kalou ka tiko na nona ituvaki vakalou.
Qori era sega ni vakasama vou. Eda dau vinakata tu ga me da cakava oqo. Sa vakakina na noqu taro, e rawa Vakacava me da na tarai keda cake ena irawa ka ni veigauna sa oti me da na cakava vakavinaka cake kina oqo ena veisiga ni mataka?
E dina ni da sa veitalanoa tiko ena iulutaga oqo, ena nuinui meda tara cake na vinaka sa yaco tiko, au gadreva meu wasea e dua na vakasama, me baleta na iwase veimama ruarua ni itukutuku oqori, tekivu mai na vakanamata vakatabakidua vei Karisito. Au sa dau tovolea meu kila vakavinaka cake na kena ibalebale oqori kei na kena irairai beka ena noda veiloma ni vale kei na valenivuli. E dina sara. sa dodonu me da na tomana tiko na noda sasaga me da vukei ira na gonevuli me ra vakanamata ena iulutaga, itovonibula, kei na ivakaraitaki nei Jisu Karisito.5 Meu vakatura mada e dua tale na sala me kena ikuri? E daru sa vakananumi mai vua na parofita ni Turaga, o Peresitedi Russell M. Nelson, ni “noda wilika noda kalougata e uasivi cake sara mai na noda vakananuma lesu na noda veileqa eso.”6 Au sa vulica mai vua na veivakalougatataki sa vakarautaki tu me baleti ira na Isireli ni veiyalayalati vakakina ni da vakatara me yaco ga na loma ni Kalou, eda na sotava na veivakabulai, kunea na isaunitaro, rawata na yaloqaqa me da vorata na veitemaki kei na kaukauwa me da vala ena noda ivalu. Me vaka e tukuna o Peresitedi Nelson, eda “na sotava [vakataki keda] meda kila ni ‘dua na Kalou ni cakamana’ na noda Kalou [Momani 9:11].”7 E dua tale na sala meda vakanamata vua na iVakabula sai koya na noda vukei ira na noda gonevuli me ra kila na sala duidui eso e dau dolele mai kina ko Koya ena loloma kei na loloma vakalou ki vei ira kece na luvena na Tamada Vakalomalagi.
Au a vakaitavi ena dua na gauna lekaleka wale toka ga qo ena dua na kalasi vakomupiuta. Ena nodra vakavakarau ki na kalasi, era a wilika na gonevuli na Ica 2:25: “Ka raica, Au sa vakarautaki kemudou ki na veika oqo; ni na sega ni rawa mo dou kosova na wasaliwa titobu oqo ka vakavo kevaka au sa vakarautaki kemudou mo dou sotava na ua ni wasawasa.”6 Era veivosakitaka na kalasi na tikina oqo kei na nona vakarautaki ira na Jeretaiti na Turaga ena nodra ilakolako. E wasea e dua na gonevuli ni a tu ena lomadonu ni dua na veivakatovolei, ka vakamacalataka o koya ni ka vakarerevaki duadua e qai bau sotava.
A qai tarogi e dua na taro kau vakabauta ni a vakauqeta na Yalo Tabu. Na cava beka sa vakayacora oti na Turaga me vakarautaki iko kina ki na veivakatovolei oqo—ni se bera sara mada ga ni yaco? Na veika cava soti o sa sotava oti mai Vua, kei na veilesoni sa vakavulica oti vei iko o Koya ka na rawa ni o rai kina ena gauna oqo Sa dua na taro cecere me vakavuna noda vakasamataka na ivakarau e yacovi keda mai kina na iVakabula ena loloma, ni kena ibalebale sara mada ga oqori ni sa namaka tiko noda leqa. A tukuna o koya a sotava tiko na veivakatovolei e vuqa na sala sa vakarautaki koya tiko kina na Turaga. A qai kila ni a sa sotava oti na veika e rawa ni rai kina kei na kilaka titobu kei na ivakadinadina ni veivakavuvuli tudei e gadreva me kila me sotava kina na veivakatovolei eso oqo ena vakabauta cecere. E vica tale na lewe ni kalasi eratou wasea na nodratou a tokoni mai vua na Turaga ena nodratou vakatovolei kei na nodratou qai kila ni lomani iratou o Koya ka vinakata me vakalougatataki iratou.
Ni o raica vata kei na nomu gonevuli na liga ni Turaga ena nodra vakalougatataki na tamata eda sa mai kilai ira ena ivolanikalou, ena rawa talega ni o vukei ira me ra raica ka kila na Nona itavi ena nodra bula ena gauna oqo. Me vaka na veivakauqeti ni iVola i Momani, sa rawa ni da vukei ira me ra “kila kina na nona loloma na Turaga vei ira na luve ni tamata.”9
Oqo e dua na vakasama me baleta na ikarua ni veimama ni iyatuvosa oya: na gagadre me da vakanamata tikoga vei ira na noda gonevuli. Eda bula donumaka e dua na gauna era sotava e vuqa na itabagone kei ira na itabagone qase cake kei na veitaro sega na kena isau ka ra veilecayaki mai na vuqa na domo e tu e vuravura. Me ra curu basikata na rorogo era gadreva me ra kila na ivunau. Me vaka ga na kena veigauna sa dau yaco tu, sa gadreva me tu vei keda na yaloqaqa me da vakavulica ka vakadinadinataka na dina tawamudu. Me da taura matua vakacava na veika oqori—ka tara cake kina—me sotava na veika era gadreva ni ra toso ki liu? Me da vakanamata vakavinaka cake beka vakacava sega walega ena vakavuvulitaki ni dina ia ena nodra vukei na noda gonevuli me ra vulica na dina?
E dua na sala me caka kina oqori sai koya na itovonibula Vakarisito ni veikauwaitaki. Na yalololoma sai koya na nomu rawata mo kila ka wasea na nona nanumae dua tale na tamata. Na veikauwaitaki dina e kauti ira vata kece mai na tamata; e bukia na isema ka vukea nodra vakila na tamata ni ra sega ni tiko duadua. Sa dua na tiki bibi sara ni kena buli na yalo ni da okati kina. Na ivakarau ni rai oqo sa idola ni noda vakarorogo vakavinaka vua e dua na gonevuli e lomatarotaro voli kei na kena liutaki e dua na veivosaki totoka vakailawalawa ka ra na vakarorogo matua kina e vuqa na gonevuli ka tu nodra taro sega ni cavuti.
Sa vakaraitaki ena vakadidike ni o ira e tosotoso dredre tiko nodra vakabauta era sega ni sa lako tani tiko mai na ivunau. Era sa toso tani tiko baleta na nodra taro e yavutaki ena veika era sotava tiko vakatamata yadua ka vakavuna me ra raica na veika oqo ena mata—vakabibi ni ra sega ni veiganiti se na mosi ni yalo se veika namaki sega ni yaco mai. Kevaka eda sauma na nodra taro ka sega kina na yalo kauwai, sega ni da kila na lewena taucoko, eda na sega beka ni rawa ni solia na veivuke era gadreva. Ka na ca vakalevu cake, kevaka eda veivakawaleni, daulelewa, se dausabai keda, eda na vakayalia na veivakabauti kei na madigi me da maka vinaka vei ira.
Sa kena ivakaraitaki uasivi sara na iVakabula ena “ia na ka dina ena yalololoma.”10 Na Nona itovo ni veimaliwai e vakasinaiti tu ena veikauwaitaki, sa dau caka me ganita na nodra leqa kei na kilaka na tamata kecega. Ni yaco oqo, o ira era sega ni yacova se sega ni veirauti kei na ivakarau ni tisaipeli vinaka era se vakila tikoga na Nona loloma kei na nona sa vakauqeti yani ki Vua. Era na kila ni ra gadrevi Koya.
E dua tale na ivakaraitaki vakasakiti mai na vuli ni yabaki oqo ni Vunau kei na Veiyalayalati. NaWase 88 e volai kina na idusidusi ni Turaga me baleta na Koronivuli ni Parofita. E dodonu me liu yani na qasenivuli vei ira na gonevuli ka vakarautaki koya kei na valenivuli. A vakaroti talega me kidavaki ira na gonevuli ena veimalanivosa oqo:
“Au sa kidavaki kemudou ena yaca ni Turaga ko Jisu Karisito, me ivakatakilakila se ivakananumi ni veiyalayalati tawavakaiyalayala, io na veiyalayalati au sa ciqomi kemudou kina, raica au sa gadreva sara me tudei, sega ni yavalati, ka sega ni veiveisau, io meu sa nomudou itokani ka wekamudou ena loloma soli wale ni Kalou ka me kena ivau na loloma.”11
Ena sega beka ni veiganiti me tekivutaki vakaoya na veikalasi kece ni semineri kei na inisitute, sa veidusimaki vakalevu ka vakaibalebale sara na veikidavaki oqo. Me vaka a taroga o Sister Virginia Pearce: “E rawa beka ni o raitayaloyalotaka e dua na draki ni vuli ka tauyavu ena mataqali veivakadeitaki ena loloma kei na yalodina mai vei ira vakakina vei ira na nomu itokani gonevuli? E rawa beka ni o raitayaloyalotaka na veitaqomaki yadua era a vakila—kei na igu ena vakayagataki beka me ra taqomaki ka maroroi ira mai kina ka vakarautaki tu ena vukudra me ra vuli ka tubu ka veisau? E rawa beka ni o raitayaloyalotaka na kaukauwa ni Yalo Tabu ena loma ni dua na rumu ka ra sa yalataka kina o ira kece era vakaitavi tiko kina me ra itokani ka veitacini ena loloma soli wale ni Kalou ena ivau ni loloma?”12
Vakasamataka mada na sala ena veisautaka kina na noda kalasi kei na sala ena vakalougatataki ira kina na gonevuli yadua. Raitayaloyalotaka mada, me kena ivakaraitaki, e dua na cauravou na yacana o Alex, ka a taroga, “Na cava meu cakava kevaka au sega ni duavata kei na veilawatu kece sara ni Lotu?” Na sala cava beka e rawa ni o sotava kina e dua na sala me vakaraitaka na nomu loloma kei na veikauwaitaki? Sa dina sara, ena gadreva o koya me kila na nodra itavi na parofita kei na bibi ni talairawarawa. Ia, qo ena sega beka ni kena isau vinaka totolo duadua, ka na sega beka ni veirauti vua e dua e veiqalisominiwai tiko oqo. Ni se bera ni da sauma e dua na taro se liutaka e dua na veivosaki, ena vinaka cake vei keda me da segata taumada me da kila vakavinaka na tamata oya ka taro tiko se ilawalawa era veivosakitaka tiko. Kevaka e donumaki iko na madigi mo drau veitalanoa kei Alex, na cava tale o na gadreva mo kila, kei na cava tale ena gadreva mai vei iko o koya?
Me tekivu eda rawa ni da masuta na kaukauwa me da biuti keda ena nona ivava ka tovolea me da raitayaloyalotaka na veika e vakila tiko o koya. De sega tiko beka ni taroga o Alex na taro oqo me dua na ivakarau rawarawa ni vakaukauwa vakasama se me kila ga kina na ivunau. E tiko e dua na itukutuku kei Alex. Sa lako curuma o koya na veika eso kei na isema eso, eso e vinaka ka so e sega. Ia na ka dina, ena vuku ni ka oqo, sa dau vakila o Alex nona sega ni okati ni dau lako ki lotu kei na inisitute. Ena gauna ni veivosaki vakosipeli dau duatani na ka e vakila mai vei ira e vuqa na tamata era dau vosa cake. E dau vakataroga kevaka e dua tale beka e vakila tiko na veika vata oya, ia e sega ni dua e vaka me dau kauta cake mai na nona taro. Na veika oqo sa dau vakavuna na nona galili voli ena lotu. Ena gauna e tovolea kina me wasea na nona rai, e vakila ni sega ni rogoci se ciqomi. Ena dua tale na gauna, a cavuta e dua na qasenivuli e dua na ka me baleta na kumina. E muri, a qai vakawaletaka e dua na gonevuli e dua na ulutaga e nanuma o Alex ni sa rui bibi. Sa tekivu me vakila ni vakalewai ka so na gauna e cudru sara.
Ia, e dua tale tiko na ka e dodonu mo kila ka nanuma tiko baleti Alex. Se tiko voli ga qo o koya. A lako mai ki na kalasi. E lako tiko mai baleta ni taleitaka na kosipeli kei na Lotu. E tovolea tiko me kukuva matua toka nona vakabauta, ka tovolea tiko me cakava na ka e dodonu. Sa tovolea tale tikoga me wasewasea, na veika kece sa rogoca ka sotava ena Lotu, o cei na ivunau dina kei cei na itovo tudei se na veika cala sara mada ga era a vakadewataka voli mai o ira na lewenilotu tu vinaka. Sa tobo tu ena loma ni dua na veiqalisominiwai vakavakasama ka, segata tiko o koya me kila na loma ni Turaga. O na kila beka vakacava na veika kece oqo me baleti Alex kevaka o a sega ni vakarorogo ka vaqara mo veikauwaitaki? Ia oqo ni o sa kilai Alex vakavinaka cake vakalailai, o sa qai kila ni sega ni vakataroga voli ga o koya na lawatu ni Lotu. Na nona taro e sega ni “E dina beka na Lotu?” E vinakata o koya me kila, “E vinaka beka na Lotu?” “E dua beka kina na noqu tikina?” kei na “Ena ganiti au beka vakacava ni vaka me o au duadua ga e tu na noqu lomalomarua kei na lomatarotaro?”
E rawa ni o vukei Alex me vakasamataka na nona taro ka me veisautaka ki na dua na ivakarau ni rai tawamudu. Ena so na gauna na noda taroga na taro donu sa tiki bibi ni noda ciqoma na isaunitaro mai vua na Tamada Vakalomalagi. Ia ni tu vei iko na loloma kei na veikauwaitaki mo ciqomi koya ka vakadinadinataka na ibalebale ni nona taro ena vukei iko mo vakarautaka na veitokoni kei na veidusimaki e gadreva. Oqo e sega ni rawarawa ka rawa sara mada ga ni veivakadrukai. Ia au sega ni kerei iko tiko mo liutaka na veivosaki kecega ka sauma vakavinaka sara na taro kece Au kerei iko tiko mo vakarorogo, mo kauwaitaka, ka vukei ira me ra vakila na loloma ni Tamada Vakalomalagi ena vukudra. E rawa beka ni o raitayaloyalotaka na veitaqomaki yadua era a vakila—kei na igu ena vakayagataki beka me ra taqomaki ka maroroi ira mai kina ka vakarautaki tu ena vukudra me ra vuli ka tubu ka veisau? E rawa beka ni o raitayaloyalotaka na kaukauwa ni Yalo Tabu ena dua na valenivuli ka vakasinaiti tu ena veitokani kei na ivau ni veilomani?
O se nanuma tiko beka na ivakasala nei Elder Dale G. Renlund ena koniferedi raraba sa oti? A tukuna o koya me baleta e dua na tauvimate sa curu oti vakavica e valenibula me baleta na qaravi ni mate eso ka vakavuna na wai ni veivakamatenitaki. E dua na vuli vuniwai a tukuna ni sega ni dodonu me mai vakaogai o koya ena vuqa na auwa me qarava tiko kina na tauvimate oqo baleta na nona leqa e kauta ga mai o koya vakataki koya.
A rogoca o Elder Renlund na nona vosa e dua tale na vuniwai ena nona kaya, “O mai vuniwai mo qaravi ira na tamata ka nomu cakacaka mo vakabulai ira. O a sega ni yaco mo dua na vuniwai mo vakalewai ira. Kevaka o sega ni kila na kena duidui, e sega ni tu vei iko na dodonu mo mai vulitara ena valenibula oqo.”13
O kedaru e daru sega ni mai qasenivuli ni kosipeli i Jisu Karisito me daru vakalewai ira na nodaru gonevuli. Eda yaco me qasenivuli baleta ni da vinakata me da dusi ira vua na Dauveivakabulai Levu. O Jisu Karisito duadua ga e tu vua na dodonu me lewai keda, sai Koya duadua ga e rawa ni veivakabulai. Ena noda vakanamata duadua ga Vua e veisiga—ena Nona ivakaraitaki, Nona ivakavuvuli, kei na Nona yalayala—sa rawa kina ni da vukei ira me ra raica na veivakabulai kei na veidusimaki era gadreva. Veitalia na veisau ena noda iwalewale ni veivakavulici kei na noda semati vei ira na noda gonevuli, e dua na ka ena sega ni veisau vakadua. Na sala bibi duadua meda vukea na kena tarai cake nodra vakabauta na itabatamata era tubu cake tiko o ya meda biuti Jisu Karisito me usutu ni noda veivakavulici kei na vuli mera kilai Koya na gonevuli, vuli mai Vua, ka sasaga tiko mera vakataki Koya. Ni rau sa veitokoni na yameyame ni nomu ivakadinadina kei na loloma titobu ena vukudra na nomu gonevuli, o sa na tu kina ena itutu vinaka duadua ena rawata e dua me vukea nodra kila ka vakararavi ena Nona ivakavuvuli kei na Nona Veisorovaki ka vakadonui ki na Nona veivakalougatataki yalataki. Ena yaca i Jisu Karisito, emeni.
Ena gauna oqo, au gadreva meu lako meu duavata kei rau o Brother Bigelow kei Brother Smith.