Vakavuvulitaki ni Dina ena Vosa ni Loloma
Vuli Kaburaki Vakayabaki ni S&I 2021
Tusiti, 19 ni Janueri, 2021
Oqo e dua na madigi vakasakiti ni vakarorogo kei na vuli! Au sega ni kila e sa lewe vica vei kemuni o ni sa tiko rawa ena soqoni oqo, ia au via vakaraitaka na noqu vakavinavinaka vei kemuni yadua na volekata na lewe 56,000 na qasenivuli kacivi ni seminari kei na inisitute ka sivia e lewe 2,200 na qasenivuli saumi mai na CES me vakavulici ira na ilawalawa bibi oqo - na itabatamata tubucake tiko mai! Vinaka vakalevu na veiqaravi ena yalodina kei na sasaga kaukauwa, e vuqa vei ira na noda itabagone lomani kei na gone itabaqase era sa digia me ra vakabauta ka tudei ena sala ni veiyalayalati. Na ivakaro vakayalo kei na veika lakocurumi o ni vakaraitaka e bibi vakalevu ena kena tarai cake na nodra ivakadinadina. Au via kidavaka ka vakasausau vei kemuni na qaqa sega ni dau vakacaucautaki: na watidra o ira na qasenivuli oqo. Ke yali na tudei ni nomuni bula ni vakasama, bula vakayalo kei na vakaqaqaco taki ni vuvale, ena sega ni rawati vinaka na sasaga. Sa levu kina na vakavinavinaka vei kemuni yadudua, mai na botona, na kena lomadonu kei na veta i cake ni utoqu!
Ena itekitivu ni dua na yabaki vou - okoya eda nuitaka kece me na kauta mai e dua na icegu ni rai makare cake se edua beka na icegu ni vakacegu mai na yabaki sa oti yani - e vinaka me da raica vou na veika eda cakava tiko. E dina, e da vinakata kece me da cakacaka ena gaunisala donu, ia e bibi duadua, na noda gadreva me da na kauta mai e dua na veisau vakasakiti ena nodra bula na gonevuli.
Ena nomuni na cakacaka vata kei ira na itabatamata tubu cake, o na vinakata mo vukei ira na nomu gonevuli me ra kila matata na nodra itubutubu vakalou, na nodra i nakinaki ena bula oqo, kei ocei me ra rawa ni ra na vakataka. Na nomu gagadre titobu sa ikoya na nodra vukei me ra cadra cake mai ki na nodra inakinaki vakalou. Na inaki volai ni Seminari kei na Inisitute e oka kina na nodra vukei na gonevuli ena nodra vulica ka vakanuinui ki na ivakavuvuli kei na Veisorovaki nei Jisu Karisito ka vakavarautaki ira ena cakacaka vakalotu ni matabete ena valetabu kei na bula tawamudu. Ni o cakacaka tiko mo vakayacora na inakinaki oqo, o sa vakayaragai taki ira me ra na vorata na veitemaki kei na “gasau vidi waqa ni meca”1 ka vakaukauwataki ira me ra tamata Yalododonu dina ka vakanamata ena lesu mai ni iVakabula. O sa vukei ira tiko me ra vakavakarau ena gauna oqo ki na nodra itavi ena gauna mai muri ki na nodra vuvale, Lotu kei na vanua me ra iliuliu vakalou ka ra ivakaraitaki ni vinaka.
E na noqu vakananuma tiko na iulutaga ena veivuke vakalevu, au nanuma sara na veivakalougatataki levu ni nodrau veisotari na lesoni ni seminari kei na Lako Mai, Mo Muri Au kei na kaukauwa e na solia vei ira na itabagone kei na nodra matavuvale. Au nanumi ira na itabagone qasecake era tiko tani mai vale, kei na kena na vukei ira na Inisititute ena ivakarau ni vaka vulici ni kosipeli “vaka-usututaki-e-vale”. Au nanuma talega na sala me veiganiti kina na ivakaro vei ira na itabagone, kei na itabagone qase cake. Ni oti na noqu vakasamataka sara vaka vinaka, au sa mai vakadeitaka ni kevaka o vakasaqara vakataki iko na nomu vakatakila yadua ena nomu veitalanoa kei ira na qasenivuli tale eso, o na kunea kina na isau me vakacavari kina na taro, “meu cakava vakacava”.
Au gadreva meu vakatabakiduataka e vica na ivakavuvuli. Na ivakavuvuli au na via veitalanoataka e tiko ena iulutaga ni “Na veika au a diva me‘u a kila ni‘u a qasenivuli voli ni seminari”. Na noqu a veiqaravi voli ena vakavulici ni seminari ena veimataka-lailai ena loma ni ono na yabaki e a dua dina na madigi vinaka ka veivakalougatataki. Na tabana levu au a veivakavulici kina e oka kina e dua na ilawalawa gonevuli levu ka ra lewe ni tini na veimataqali koronivuli e cake. E raba ilevu na vanua e ra dui tu kina ia era duavata ena nodra sokalou. Au diva meu vakatokai au niu dua na qasenivuli vakasakiti, ia au rawa ni tukuna niu a vulica e vica na ka ena loma ni vei yabaki oya, kau vinakataka meu wasea walega e rua vei kemuni.
Na imatai ni vakavuvuli au vulica oya me soli vei ira na gonevuli na “kakana” vaka yalo. O ira na itabagone kei na itabagone qase cake ni vakataotioti ni gauna oqo era gadreva na “kakana” vakayalo ni kosipeli me ra na sauma kina na veitaro dredre e na basika mai ka me na vukea na nodra tudei ena drakidrakita ka rawa ni kauti ira tani mai na sala ni veiyalayalati. Era na rawa ni colata. Era na gadreva! Me da taura na gauna me da masu ka vakavakarau—sega walega ni vurevure ni lesoni, ia e gadrevi talega na gauna me da kilai ira vinaka na noda gonevuli me rawa ni da kila kina na veika era gadreva kei na vakayagataki ni veika e vakarautaki me vakavulici. E rawa me da sauma na kaci: “Au sa viakana sara, o qai solia vei au na kakana”.2 Meu wasea mada eso na ivakaraitaki.
Ena gauna au a lewena voli kina na seminari niu a se itabagone voli ena tokalau kei Amerika, o ira na lewe ni tabanalevu era veituyaki ena dua na vanua rabailevu. A rua tale na gonevuli ena noqu koronivuli levu sega ni wili kina o au kei taciqu e rau a lewe ni Lotu. Sa levu sara na veivakayarayarataki ca ena vanua. E a dua na gauna ni tiko leqaleqa kei na veivakaduiduitaki oya, oka kina na tiko yavavala ena vei koro lelevu ka vakalevutaka na veisaqasaqa vata kei ira na veiliutaki, na veicacati va kawatamata, na veivaluvaluti ena veiyasai vuravura kei na kudru ni ivalu ena noqu vanua. Ai vakarau ni bula ni “veivinakati wale”, vakayagataki vakaveitalia ni mariwana kei na wainimate ni veivakamatenitaki e a tauyavutaka e dua na mataqali bula ka vakaliuci kina na nodra raici ira ga vakataki ira na tamata yadua ka biu laivi na bula ni tu dodonu. Na veibuturaki vaka politiki kei na duidui ni vakasama ena kena cicivaki na matanitu e a tawasea na tamata me ra veiqati ka veisaqasaqa na nodra rai. Na tiko yavavala ni tini na yabaki e a qai mai cava ena dua na ka vakasakiti ena nona mai ro ena vula na imatai ni tamata.3 E so beka na veika oqo e rogorogo vata kaya kei na draki ni bula ni lasa era sotava tiko na itabagone kei ira na itagone qase ena gauna edai?
Vei au, na vuli torocake a tekivuna e dua na gauna ni vakadidike kei na vakayaco digidigi ena vuravura ka levu cake mai na noqu vale kei na noqu vuvale. A vakaraitaki vei au e vuqa na ivakavuvuli vakavuravura ka tekivu sara meu sa taroga na dina ni veika e rau a vakavulica vei au o irau na noqu itubutubu kei ira na liuliu ni Lotu ena gauna au a se gone kina. Na imatai ni noqu qasenivuli ni Seminari o Sisita Thomander, e dua na marama ulu sikoa, sega ni dau veiwali ka levu sara na ka e kila me baleta na Lotu ka tiko talega na nona vakadinadina titobu ni kosipeli. A bolei keimami me keimami wilika taucoko na Vola iMomani ena yabaki oya, ka me keimami vakarautaki kemaimi mai ena veisiga ena veitalanoataki ni veika e sa wiliki mai.
Na nona ivakarau ni veinanumi o Sister Thomander, e vakatubura na vakavulici ni kosipeli ka vakaukauwataka vakalevu na noqu ivakadinadina. Au kila vakaidina ni kila o koya ni dina na Lotu baleta ni dau vakarautaki koya vaka vinaka mai me mai vakamacalataka vakamatata na tikina keimami wilika, ka vakadinadinataka o koya na vei dina oya. E kilai levu na nona dau vakavakarau mai me wasea na veika ena ganiti keimami. Au sega ni nanuma e dua na qito se soqo se vakalomavinaka, ia au dau nanuma vinaka na noqu dau bolei vakayalo ka vakauqeti vakayalo ka vakani vakayalo ena veisiga. Na vei lesoni kece e sega ni dau rogolevu se kacabote se vakalukalu, ia ena veisiga e veivakadeitaki ka veivakauqeti na nona dau sauma ena yalo ni dauvosota na veitaro yalodina era taroga na nona gonevuli. Na nona veisureti maqosa kei na nona vakanuinui levu e kauta mai e dua na veisau ena noqu bula ka sega ni wiliki rawa. O Sister Thomander e dua au vinakata meu raica ka vakavinavinakataka niu sa na lako e na yasana kadua ni ilati.
Au vakatauvatana na yabaki oya ki na gauna au sa tiko kina ena dua tale na kalasi qase cake. Na qasenivuli ni seminari e dau lasa ka veiciqomi, ia au vakawa ni lailai na noqu veisemati dina vua. E mai sivi yani e vica na macawa ni nona vakavulica na lesoni vaka vovodea. E kilai levu ni ra sega ni tauri koya vakabibi o ira na gonevuli: era boroya na goneyalewa na qaqalo ni ligadra ena loma ni kalasi e muri ka ra veiveiwali o ira na gonetagane, o keimai na kena vo keimami pasitaki ivola wavoki me vakalasami keimami tu. Dina ni keimami kila ni tiko na nona ivakadinadina ni kosipeli baleta ni a kaulotu ena dua na gauna, keimami vulica me keimami sa kua ni dau taroga na taro titobu ni kosipeli baleta na nona isau ni taro e dau vovodea ka keimami sega ni kila ke rawa ni na dau sauma rawa. Na seminari e veiqaravi me dua na inakinaki ni bula marau bibi ia e sega ni dua na veikacurumi vakayalo.
O na kila beka na nona taro o Paula ena 1 Korinica: “Ia kevaka ena rorogo na davui ni valu ka sega ni kilai na kena rorogo, o cei ena vakarautaki koya me laki valu?”4 Ni da sa qasenivuli ni kosipeli vei ira na itabagone tubu cake mai, e dodonu me da “rogorogo me vaka e dua na mataqali rorogo ni davui”. Ena gauna ni Veiyalayalati Makawa, na davui e a dua na ileu, ni bulumakau, ka dau duatani ka sega ni guilecavi na kena irogorogo. E dau vakayagataki me kacivi ira na tamata ni Kalou me ra soqoni ka sokalou, vakasalataka na lako mai ni leqa, ka vakadewataka na ivakaro ena gauna ni ivalu. Ena gauna ni ivalu ni gauna makawa, na rorogo, kei na veicavilaki ni ivalu e bulia na veilecayaki. Kevaka e sega ni rawa ni vakadewataka vakamatata na iliuliu ni ilawalawa ena sotava na mataivalu na druka. O koya gona sa buli kina edua na kena davui. Na vei sotia yadua e terenitaki me ra kila na irorogo, ena gauna madaga ni veilecayaki era na kila vakayadua me ra toso yani ki liu se me ra suka ki muri, me ra kabakoro ena yasana imawi se yasana imatau.5
O Sister Thomander e a vakaitakarakara ni rorogo ni davui vei au. E dodonu me da wili vaka davui oya, na domo vakabauti ka nuitaki ka vakadeitaka na dina tawamudu ena gauna ni toso-totolo, veiveisau ni vakabauta vakavuravura. E dodonu me da tukuna vei ira na noda gonevuli na dina ka vukei ira me ra kila vinaka na vuna vakatalega kina na cava E rawa ni da vakayacora oqori ena “yalo malumu kei na yalo malua,”6 e dodonu me da vakayacora. Me vaka e a vakacaucautaka e dua na qasenivuli ni seminari, “Me da kakua ni vakacabolotaka na davui ena daligana e dua, ia e sega talega ni da vakasolokakanataka na itukutuku; ia, na kaci e dodonu me kamica ka dei ena kena rorogo”.7 Ena noqu vakavulici ira tiko na noqu kalasi ni seminari, au vulica ni dina ni ra taleitaka na itabagone na vulici ni itavi qaravi lasa kei ira na nodra itaba, ia era gadreva talega na isau ni taro momona va-kosipeli kei na kena vakayagataki na ivakavuvuli ni kosipeli ena nodra dui bula.
Na ikarua ni ivakavuvuli au kunea ni bibi sa ikoya mo veisemati ena yalo dina ka veikauwaitaki. Me da veisemati vakacava kei ira na noda gonevuli ena sala e dodonu ka vakaibalebale? Na vosa cavuti ni dua na vanua e rawa ni vakavuna e dua na duidui. Me vakataka, kevaka au tovolea meu vosataka na vosa va Q‘eqchi’ vei ira na gonevuli era kila ga na vosa vaka Tagalog, au na sega ni vakasavuia rawa na itukutuku. Ia au vakavinavinaka ni tiko e rua na vosa cavuti kilai raraba ka ra kila taucoko na itabagone kei na itabagone qasecake: na vosa ni Yalo Tabu, kei na vosa ni loloma.
Na imatai ni vosa, oya mai na Yalo, e ra kila kece o ira era vakasaqara na dina. Me vaka e vakavulica o Elder Joseph B. Wirthlin, “E sega ni tiko e dua na vakatatao ni vosa ena Lotu. E tiko e dua na kaukauwa e lako sivita na kaukauwa ni itukutuku e dau soli vaka vosa walega, oqo na kaukauwa ni itukutuku e vakasavuya na Yalo Tabu ki yaloda … , se cava ga na vosa eda vosataka. O koya e dua na dau kau itukutuku raraba ki vei ira yadua na yalo e tiko donu.”8
Na Yalo Tabu e dau veitaratara mai na dua na yalo ki na dua tale. Me vaka a kaya o Paula ki vei ira na Yalododonu e Roma, “A Yalo oqo sa tukuna mai ki na yaloda, ni da sa luve ni Kalou.”9 Ni da vakasaqara, vakarorogo ka vakamuria na veivakayarayarataki ni Yalo Tabu, eda na ciqoma na ivakatakila ena sala me da vosa kina vei ira na noda gonevuli mai vua na Yalo Tabu ena gaunisala era na kila vinaka kina. Na vakavakarau vinaka, ka vakayagataki na lesoni e volai mai vei ira na kena dau, e vukei keda me da dinata tiko na ivakavuvuli eda kila vinaka e tiko kina na kaukauwa ni veisau ni yalo kei na bula. E ka bibi duadua oya na vakasaqarai ni vakatakila yadua ena cava me da wasea kei na kena wasei vakacava na veika e sa vakarautaki mai. Na vosa ni Yalo ena vakasavuia sara vakalevu ka sivia cake mai na veika o na tukuna rawa.
Na vosa tarava ka na vukea na nomu sema vei ira na nomu gonevuli sa ikoya na vosa ni loloma. Na loloma, me vaka e lako mai vakalou ena ivakatekivu, e vosa talega mai na yalo ki na yalo. O Joni na iApositolo, e dua na ivakadinadina ni iVakabula, e wasea na dina oqo: “E da lomani koya baleta ni lomani keda iliu.”10 Oqori e yaco talega ena veimaliwai nona e dua ki na dua tale. Ni sa rogoca beka ni dau tukuni tu “era sega ni kauwaitaka na tamata na levu ni ka o kila me yacova sara ni ra sa kila na levu ni nomu kauwaitaki ira.”11 Ena noda gauna vaka qasenivuli, na revurevu ni veika eda vakayacora ni tiko vei keda na loloma va Karisito ena veivakayarayarataki vei ira na noda gone vuli.
O ni na kila beka na ibalebale ni “vei vosa ni loloma”12 Oqo na veimataqali gaunisala me vakaraitaki kina na loloma ka me ra kila ka ciqoma o ira na tamata, ka na vakatau ena nodra ivalavala kei na draki ni bula era lako curuma mai. Na rogoci ni vosa ni loloma ena duidui mai na dua na tamata ki na dua tale, ia o ira kece na nomu gonevuli era na kila na nomu kauwaitaki ira dina mai na dua vei ira na tolu na gaunisala au na wasea nikua.
E dua na vosa ni loloma sa ikoya na vosa ni veivakadonui Oqo na mala ni vosa e veivakauqeti ka veilaveti cake me vaka na, “O rawa ni Cakava” se “O sa toso vinaka sara tikoga mai” se “Au sa dokai iko vakalevu ena nomu cakacaka vakauwakauwa”. Na vei vosa oqo e vakadewataka vua e dua na gonevuli ni taleitaki ka rawaka o koya. Na nona vosa ni veivakadonui na iVakabula ki vei Joji Mila, ka volai tu ena iVunau kei na Veiyalayalati, e dua na ivakaraitaki vakasakiti ni dua vei ira na vosa ni loloma oqo. Ni vakatokai koya me dua e “sega vua na lawakica”, a vakuria o Jisu Karisito me baleti koya “sa rawa ni vakabauti ena vuku ni nona sa tamata yalodina; kei na nona loloma ena vuku ni noqu ivakadinadina koi Au na Turaga, au lomani koya”. 13 E vuqa vei keda ena sega ni nanuma na yacai koya ka a saumaki mai oqo, ia au rawa ni raitayaloyalo taka na kena vakaukauwataka na ivakadinadina ni kosipeli vakalesui mai kei na nona lomana na nona iVakabula o Joji ena vosa ni veivakadonui oya.
E so vei ira na vosa veivakaukauwataki sa ikoya na vosa na “Vinaka” kei na so tale na vosa ni veivakacaucautaki. Ke o dua na qaseinvuli dau vakadidike ka dau lomani ira na nomu itabagone kei na itabagone qase cake, mo na raica na veika lalai era vakayacora na gonevuli vei iko se vei ira tale eso ena kalasi, se rogoca na veika vinaka era vakayacora tiko e koronivuli se vei ira na lewe ni nodra itikotiko raraba, ka vakaraitaka vei ira na nomu vakavinavinaka. Na vakauti ni dua na ivola tukutuku lailai vua na itubutubu ni nomu gonevuli me baleta e dua na ka vinaka o dikeva me baleta na luvena ena vakalevutaka na nona yalo ni rawaka ka vakakina na nona na rokovi koya vakai koya. O ira na veimataqali veivakadonui oqo e na taracake ka vakaukauwataka na veimaliwai, vakalevu taka na yalo ni veikauwaitaitaki dina ni veimaliwai ni gonevuli kei qasenivuli, yaco sara me vakalevutaka na veivakayarayarataki ni Yalo ena nodra bula.
E dua tale na vosa ni loloma sa ikoya na itovo ni veiqaravi Na nomu vakarautaki iko vakayalo mo laveta ka veivakararamataki ena veisiga e sa dua na tovo bibi ni veiqaravi kei na loloma! Na nomu iloloma me vaka na nomu soli gauna kei na nomu sasaga ena sega beka ni ra raica na itabagone ena veisiga, io ni lako tiko na gauna, na nodra bula vakayalo ena vakalevutaki ka ra na qai “kacivi [iko] kalougata,”14 me vaka ga o noqu Sister Thomander.
Meu wasea mada na gaunisala e rau wasea kina e rua na qasenivuli na nodrau loloma e na itovo ni nodrau veiqaravi. E dua na qasenivuli ni seminari mai Zimbabwe e a kacivi ni bera ga vakalailai na ravuravu ni mate dewa e vuravura. Era sa vakanamata ka marautaka na gone na nodra sota ni bera ni tekivu na vuli ena veisiga ia me ra sa qai matau sara tiko ga mai ena nodra porokaramu vou ni vuli e sa mai vakatabui yani na soqoni. Sa mai sotava sara na qasenivuli e dua na leqa: e vuqa vei ira na nona gonevuli e sega na monalivaliva ena nodra vei vale, ka sega ni mani vakayacori rawa na veivakatavulici ena onolaini. Me vakadeitaka ni ra ciqoma tiko na kedra kakana vakayalo o ira na nona gonevuli, sa tekivu sara me vakarautaka na lesoni ka yavutaki ena ivolanikalou, na taro vakavure vakasama, memes kei na vidio ka vakauta ena veisiga ena WhatsApp, e dua na buturara ni vakauitukutuku ka ra na raica rawa o ira na nona gonevuli. E ra vakani ena vosa ni Kalou o ira na nona gonevuli15ena gauna madaga oqo ni tiko veiyawaki.16 Era raica ka vakavinavinakataka na itovo ni veiqaravi me ivakaraitaki ni loloma. Era sauma mai ena ivalavala vakayalo ka ra vakanamata ki na veikaroni vakayalo ena veisiga kei na veivakatorocaketaki e lako mai ena ivolanikalou.
E dua na qasenivuli mai Norway a sotava e dua na kena veibasai. Na nona kalasi e onolaini walega baleta ni ra tu veiyawaki ena nodra vanua. Se vakacava na vanua e gade kina e vuravura se na gauna cava ena vanua vou e tiko kina e dau vakarautaka tu ga me na vakavulici iratou na nona gonevuli ena veimataka ena loloma kei na veikauwaitaki dina. Dina ga ni veiyawaki na vanua era dui tu kina - ka tu yadudua na nona rawa ni raici ira - e kila vinaka tu o koya e dua na ka me baleta na nodra bula kei na veika e ra taleitaka yadudua. Ke raica rawa na matadra se sega ena video ni veitaratara, e dau kidavaki ira o koya ka dau kerea me dua mai na nodra cau. E dau vakarautaka o koya e dua na vanua era vakila ni ra taqomaki kina na gonevuli, ka rawa ni ra taroga kina na taro cava ga ka sega vei ira na rere se me ra nanuma ni ra sega ni kila vinaka. E vakarautaka o koya e dua na magiti vakayalo, sinai ena madigi mo rogoca vakawasoma na nona i vakadinadina ni vakavuvuli ni kosipeli kei na nona veisureti vei ira me ra wasea na veika era vulica tiko vakayalo.17 Me vakai iko, o ira na qasenivuli oqo era vosataka na vosa ni loloma mai na nodra itovo ni veiqaravi dina.
Na itotioti ni vosa ni loloma au na vosa kina sa ikoya na bibi ni gauna vata Mo vakabibitaka na gauna ni kalasi - vakatabakidua ena veika e lakocurumi mai vakayalo - sa ikoya na iloloma ena soli koya tikoga vakataki koya. E vinaka cake mo solia vakatabakidua na nomu gauna ena nodra vakaitavi na gonevuli me ra vakila na Yalo Tabu kei na kena vakayagataki na kosipeli ena nodra bula ka ni na levu cake na kena isausau mai na kena vakayagataki na gauna ena qito me rawa kina na lasa se mo vakayagataka na gauna bibi ni vakavakarau mo bulia e dua na tiki ni pepa era na biuta tuga na gone ena fuloa ni ra biuta na nomu kalasi. Ni sa vakaibalebale na nomu sauma na taro, ka vakavure vakasama na kena isau, na nomu sasaga ena vakadewataka na loloma ena dua na gaunisala sega ni vakacalai. Na nomu vakabibitaka na nodra cau na gonevuli - vakarorogo ena vakarokoroko ki na nodra veiwasei se taro ka sauma ena veivakadonui - ena vukea na nodra kila na nomu gonevuli ni o kauwai dina tiko ena nodra lomatarotaro ka sega ni baleta na nomu saga tiko mo vakaotia na lesoni ena siga oya. Mo tu vakarau mo sauma e dua na taro ka sega ni semati ki na lesoni se mo tokarua taka tale e dua na sau ni taro ena dua tale na sala me yacova ni ra sa kila vinaka ena e vakadewataka vei ira na nomu gagadre dina me ra tubu vakayalo—se ena dua tale na kena ivovosataki, e vakadewataka na nomu loloma va-Karisito.
E na dua tale na yasana, ni o sa qasenivuli ni seminari, e dua na veivakalougatataki vei au na noqu rawa ni vulica vakatitobu na kosipeli mai na vei lesoni e vakarautaka na Church Educational System. Io, na isutu ni vuli oya sa ikoya meu vakarautaki au vinaka me rawa niu solia vei ira na noqu gonevuli na veika era gadreva, e sega ni baleta meu mai vakadreta kina na veika au mai vakadikeva rawa me baleti au. O na vakalougatataki oqo kei na siga mai muri ena madigi mo vuli ka vakavulica na kosipeli ki na seminari kei na inisitute, ia o ira na nomu gonevuli era na vakalougatataki sara vakalevu ena nomu vakatabikiduataka na nodra vuli mai na nomu.
Mai vua e dua na qasenivuli ni seminari ena veimataka kivei kemuni kece, au kila vinaka na dredre o na sotava me ra cicivaki vata kece tiko na gagadre ni vuvale, cakacaka se na itavi vakavanua. Au kila na dredre ni kune gauna mo vakarautaki iko kina - na kune gauna mo moce kina—ka lako vata kei na vei gagadre tale eso ka tu e matamu. Au vakadinadinataka ni Turaga ena vukei iko ni ko taro, vakasaqara ka tukituki. Ni o masu, vulica ka muria na veivakayarayarataki e na lako mai vei iko, ena rawa mo solia vei ira na nomu gonevuli talei na kakana va-kosipeli - na veivakacegui vakayalo e gadrevi me ra yaco me ra iliuliu, tama kei na tina era gadreva me ra vakataka ena ivakataotioti ni gauna. O na rawa ni vosataka na dina ena vosa ni Yalo kei na vosa ni loloma. O na rawa ni semati iko ena yalo ni veikauwaitaki dina, ka vakaraitaka na loloma nei Tamada Vakalomalagi kei Jisu Karisito vei ira mai na nomu vosa ni veivakadonui, itovo ni veiqaravi kei na bibi ni gauna o wasea ena vakarorogo kei na nomu sauma tiko na nodra taro ni vakasaqaqara.
Mo dau tomana tikoga na vakavulici ni dina ka solia na nomu iloloma ena sala e taracake na ivakadinadina ni kosipeli nei Jisu Karisito vei ira na itabagone tubu cake tiko mai. Mo sasagataka na nodra vukei me ra yacova na vanua yalataki vei ira yadudua ena nodra sasaga me sokomuni ko Isireli ena vakataotioti ni gauna sa noqu masu kei noqu veisureti ena yaca i Jisu Karisito, emeni.