Loto Malamalama
Faasalalauga o Aoaoga Faaletausaga a le S&I mo le 2021
26 Ianuari, 2021
Ou te talisapaia lava le tala a uso Wilkinson e uiga ia i latou o e ua maliliu e pele ia i latou ma o e ua mafatia i isi auala i le aluga o lenei taimi, ma mananao ai ia tou iloa, o loo matou alolofa moni mo outou.
Ou te fia amata i le tau ina fai atu faafetai mo a outou taumafaiga i se taimi o se suiga tele. Sa ofoofogia la outou galuega faigata e faiaoga mataalia ai i luga o upega tafa’ilagi. Ou te iloa sa lotovaivai i nisi aso, i le taumafai e fesoasoani ia outou tamaiti aooga ia gauai atu i le tele o faalavefau. O lea, faafetai mo a outou taumafaiga faifai pea. Matou te talisapaia foi lo outou naunau e fetuunai i isi suiga taua, e pei o se kalena fou o mataupu aoaoina ma mea e manaomia mo le faitauina. Ou te matua faafetai mo lo outou gafatia maoa’e ma le naunau e fetaiai ma nei mea uma ma se faatuatua tele naua.
I se taimi o suiga, o loo i ai se tomai, atonu foi o se meaalofa a le Agaga, ou te manatu e taua ona maua e i tatou taitoatasi. E tupu mai i le faatuatua ia Iesu Keriso. O le tomai e maua ai le talitonuga mautinoa i manuia o le tuanai, a o sagisagi atu i le malamalama faaopoopo e finagalo le Alii e aumai. Na saunoa i ai Elder Jeffrey R. Holland e faapea:
“O le tuanai e mo le aoaoina mai ai, ae le o le ola ai. … Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili atu na tatou aafia ai, ona tatou vaavaai lea i luma ma tatou manatua o le faatuatua e masani lava ona faasino atu i le lumanai. …
“O le faatuatua e fausia i luga o le taimi ua tuanai ae le o le moomoo lava e tumau ai iina. E talitonu le faatuatua o le Atua o loo i ai ni mea se tele o loo teuina.”1
A o taofimau i mea lelei ua tuanai, e ao ona tatou saili pea ia iloa le isi mea e finagalo le Alii tatou te fai. E tatau ona tatou naunau e fesili ifo ia i tatou lava “Se a se mea o toe ou te lei faia?”2 ma taumafai e faaleleia atili lo tatou iloa, uiga faaalia, uiga tauleleia, ma le faatinoga. O lena foi mea o se faailoaga o le faatuatua.
Atonu tou te manatua le silia ma le lima tausaga talu ai, na fai mai ai Elder Kim B. Clark:
“Po o le a lava le maualuga o le faaleagaga o tatou sapi ai nei i o tatou olaga; po o le a lava le tele o lo tatou faatuatua ia Iesu Keriso i le taimi nei; po o le a lava le malosiaga o le tautinoga ma le faapaiaga, po o le a lava le tele o lo tatou usitai po o le faamoemoe po o le alofa mama; po o le a lava le maualuga o tomai ma le gafatia ua tatou maua, o le a le lava lava mo le galuega o loo i luma. …
“ … O loo i ai se galuega tele a le Alii o Iesu Keriso mo i tatou e fai i le tupulaga faia’e. O se galuega e sili atu nai lo soo se mea na tatou faia muamua.”3
Ou te faafetai lava mo la outou tali atu i lana valaaulia. Ua ou vaaia le toatele o outou ua loloto lo outou faaleagaga ma le tautinoga ma o outou tomai ma gafatia. Ua matou vaaia le tele o mafuaaga ua matua taua ai lenei mea ma le pogai o le a faaauau ai pea le tatau ai ona faalolotoina nei uiga faaleatua i le lumanai.
E mafai ona ou faasoa atua se faataitaiga? Talu ai sa matou talanoa atu ai e uiga i le manaomia ona faatotonugalemu atili ia Keriso ma taulai i le tagata aoao. E le na o se faaupuga po o se metotia faafaiaoga lenei. O le faatotonugalemu ia Keriso ma taulai atu i le tagata aoao o se auala lea e faaaoga ai ia poloaiga sili e lua.4 E tatau ona mamanuina ai a tatou taumafaiga ina ia valaaulia le toatele o le autalavou ma talavou matutua ia auai. Ma e tatau ona mamanuina ai a tatou taumafaiga e faateleina ai le mana o a tatou aoaoga.
Pe a tatou taumafai moni lava e faaaoga le poloaiga muamua ma le sili i a tatou aoaoga tatou te le tau na ona faia o se mau faasino i le Faaola i le faaiuga o se lesona. Tatou te faaaogaina avanoa uma e molimau atu ai ia te Ia ma faaali atu lo tatou agaga faafetai mo Ia. Tatou te o ese mai le na o le talanoa e uiga ia te Ia i le talanoa ia te Ia o lo tatou Togiola patino lea ua tatou iloa, alolofa i ai, ma faatuatuaina.
Pe a tatou taumafai moni e faaaoga le poloaiga sili lona lua i a tatou aoaoga, tatou te le taulai atu na o le faaaogaina o mea po o metotia faapitoa o le aoao atu mo le auai o tamaiti aoga. Tatou te taulai atu i tagata taitoatasi ma o latou manaoga, ma tatou te naunau e fesoasoani ia latou alualu i luma i le ola e faavavau. Tatou te o ese mai le vaai i se vasega o tamaiti aoga ina ia vaai atu i tagata aoao taitoatasi o se atalii/afafine pele o le Atua ma se gafatia faalelagi.
E le o ni manatu fou na mea. Matou te mananao lava e fai lena mea. O la’u fesili la, E mafai faapefea ona tatou fausia i luga o manuia o le tuanai ina ia atili mataalia ona faia lenei mea i le lumanai?
E ui lava sa ou talanoa muamua atu i nei mataupu, i le faamoemoega o le faaauau pea ona fausia i luga o le lelei ua faia, ou te fia faasoa atu se tasi o manatu faaopoopo e uiga i afa lua taitasi e lua o lena faamatalaga, e amata i le avea atili ma tagata e faatotonugalemu ia Keriso. Sa ou taumafai ia malamalama atili i le uiga ma pe o a foliga e ono i ai lena mea i o tatou fale ma potuaoga. Ioe, e ao ina faaauau a tatou taumafaiga e fesoasoani i tamaiti aoga ia taulai i faalaniga, o uiga faaleatua, ma faataitaiga a Iesu Keriso.5 Pe mafai lava ona ou fautuaina atu se ala faaopoopo ? Ma outou foi, sa faamanatu mai ia te a’u e le perofeta a le Alii, o Peresitene Russell M. Nelson, e faapea “o le faitauina o o tatou faamanuiaga e sili mamao atu i lo le toefaitauina o o tatou faafitauli.”6 Ua ou aoaoina mai ia te ia e uiga i faamanuiaga o loo avanoa mo Isaraelu o le feagaiga ma pe a tatou tuu atu ia manumalo le Atua, tatou te maua le faamalologa, maua tali, maua le lototoa e faafetaia’ia ai tofotofoga, ma le malosiaga e tau ai a tatou taua. E pei foi ona saunoa Peresitene Nelson, “o le a tatou iloa mo [i tatou lava] o lo tatou Atua o ‘se Atua o vavega’ [Mamona 9:11].”7 O se isi la ala e taulai atu ai i le Faaola o le fesoasoani lea i a tatou tamaiti aoga ia iloa le ala e aapa mai ai o Ia i le alofa ma le alofa mutimutivale i fanau uma a le Tama Faalelagi.
Sa ou auai talu ai nei i se vasega faatekinolosi. I le tapenaga mo le vasega, na faitau ai e tamaiti aoga le Eteru 2:25: “Faauta foi, ua Ou saunia outou e faasaga i ia mea; ona e le mafai ona outou sopoia lenei moana tele vagana ai ua ou saunia outou aua galu o le sami.”8 Na talanoaina e tagata o le vasega lenei fuaiupu ma le ala na saunia ai e le Alii ia sa Iareto mo la latou faigamalaga. Sa faasoa mai e se tasi teineitiiti aoga e faapea sa i ai o ia i le totonugalemu o se tofotofoga, lea sa ia faamatalaina o se mea aupito faataumaoi lea ua ia oo i ai.
Ona fai lea o se fesili lea ou te talitonu sa musuia e le Agaga Paia. O le a se mea ua uma ona faia e le Alii e saunia ai oe mo lea tofotofoga---a o lei tupu mai? O a ni poto masani ua uma ona Ia tuu atu ia te oe, ma o a foi lesona ua uma ona Ia aoao atu ia te oe e mafai ona e utuvai mai ai nei? Oka se fesili e matua’ia ai ona tatou mafaufau e uiga i auala e aapa mai ai le Faaola ia i tatou i le alofa, tusa lava pe o le uiga foi o lena mea o le tatalia o o tatou manaoga. Na tautala le tagata na feagai ma le tofotofoga i le tele o auala na saunia ai o ia e le Alii. Sa ia iloaina e i ai ona aafiaga sa mafai ona ia utuvai mai ai ma se malamalama loloto ma le molimau i mataupu faavae sa ia manaomia ona iloa e tali atu ai i lenei tofotofoga i le faatuatua tele. Sa faasoa mai e nisi o le vasega le ala na lagolagoina ai i latou e le Alii i o latou tofotofoga ma le ala na oo ai ina latou iloa e alofa o Ia ia te i latou ma finagalo e faamanuia i latou.
A o e fesoasoani i au tamaiti aoga ia iloa le aao o le Alii i le faamanuiaina o tagata ua tatou iloa i tusitusiga paia, o le a mafai ona e fesoasoani ia i latou foi ia iloaina le matafaioi o loo Ia faatinoina nei i o latou olaga. E pei ona uunaia e le Tusi a Mamona, e mafai ona tatou fesoasoani ia i latou ia “manatua le alofa mutimutivale tele o le Alii i le fanauga a tagata.”9
O ni nai mafaufauga e uiga i le ‘afa lona lua o lena faamatalaga: o le manaomia ona taulai atu i o tatou tamaiti aoga. Ua tatou ola i se vaitaimi e toatele talavou ma talavou matutua o loo tauivi ma fesili e le mafo’iaina ma lagona ai le fenumia’i ona o le tele o leo o le lalolagi. Ina ia mafai ona ulu i loto, e manaomia ona latou malamalama i le aoaoga faavae moni. E pei ona sa i ai pea lava, latou te manaomia i tatou ia lotototoa e aoao atu ma molimau atu i upumoni faavavau. E faapefea la ona tatou taofimau i lena mea--ma fausia---ia fetaui ma o latou manaoga e agai ai i luma? E faapefea ona sili atu la tatou taulai, ia le na o le aoao atu o upumoni ae fesoasoani i o tatou tamaiti aoga ia aoaoina upumoni?
O se tasi ala e fai ai lena mea o le uiga FaaKeriso o le loto malamalama. O le loto malamalama o le mafai lea ona malamalama ma fefaasoaai lagona o se isi tagata. O le loto malamalama moni e tuufaatasia ai tagata; na te faaosofia ai sootaga ma fesoasoani i tagata ia lagonaina e le o tuulafoaiina i latou. O se vaega taua lea o le fatuina o se sane o le auai ai. O lenei uiga faaleatua o se ki e tali faalelei atu ai i se tamaitiiti aoga o i ai se fesili ma taitai lelei ai se talanoaga faalevaega, lea e toatele ai tamaiti e faalogologo ma le toto’a ma fesili e le o faaleoina.
Ua faaalia i sailiiliga e faapea o i latou o tauivi ma le faatuatua e le faapea o la’a ese mai ona o le aoaoga faavae. Ua latou la’a ese mai ona o loo latou faia a latou fesili i le manatu faavae o aafiaga faaletagata lava ia lea e afua ai ona latou vaai atu i nei faafitauli i ni seti o vaaiga patino—e tele ina ala atu i vaaiga o le le fetaui i ai pe ala i le loto nutimomomo po o ni faamoemoega e le o taulau. Afai tatou te tali i a latou fesili e aunoa ma le loto malamalama, aunoa ma le malamalama i le manatu faavae, atonu e le o mafai ona tatou tuuina atu le fesoasoani o latou manaomia. E sili ona leaga, afai tatou te faalēano, faamasinosino, pe faaufiufi, o le a le faatuatuaina i tatou ma le maua le avanoa e avea ai ma tosinaga lelei i o latou olaga.
O le Faaola o le faataitaiga atoatoa lea o le “tautala i le upumoni i le alofa.”10 O Ana fegalegaleaiga sa tumu i le loto malamalama, sa fetuunai i taimi uma i manaoga ma le malamalama o tagata taitasi. O le taunuuga, o i latou na manatu sa le mafai ona latou ausia pe sa lei fetaui ma le mamanu o le soo atoatoa, sa lagonaina lava Lona alofa ma faapauu atu ai ia te Ia. Sa latou iloa sa latou manaomia o Ia.
O se tasi faataitaiga matagofie e maua mai i suesuega o lenei tausaga o le Mataupu Faavae ma Feagaiga. O leVaega 88 o loo tusifaamaumau ai faatonuga a le Alii mo le Aoga a Perofeta. E tatau ona taunuu le faiaoga a o lei taunuu atu tamaiti aoga ma sauniuni o ia lava ma le potu. Sa faatonuina foi o ia e faafeiloai tamaiti aoga i upu nei:
“Ou te faafetaia’i ia te oe i le suafa o le Alii o Iesu Keriso, i le faailoga po o le faatusa o le feagaiga tumau-faavavau, le feagaiga lea ou te talia ai oe i le usoga, i se tautinoga e tumau, e lē maluelueina, ma lē masuia, e avea ma au uo ma ou uso e ala i le alofa tunoa o le Atua i fusi o le alofa.”11
E ui o le a le talafeagai ona amata vasega seminare uma po o inisitituti i lena ala, ae o lenei faafeiloaiga e matua’i tele aoaoga ma e uigā tele. E pei ona fesili Sister Virginia Pearce: “Pe mafai ona outou mafaufau i se siosiomaga e aoao mai ai o fausia i luga o se faamautinoaga o le alofa ma le tautinoga mai au tamaiti aoga ma ia i latou? Pe mafai ona outou mafaufau i le saogalemu patino atonu na latou lagonaina—ma le malosiaga semanu e faaaoga e leoleo ai ma puipuia ai i latou lava ma sa avanoa mo i latou e aoao ma tuputupu ae ma suia ai? Pe mafai ona outou mafaufau i le mana o le Agaga Paia i se potu lea sa folafola atu ai tagata auai taitasi e avea ma se uo ma se uso e ala i le alofa tunoa o le Atua i fusi o le alofa?”12
Tau ina mafaufau i le ala o le a suia ai a tatou vasega ma le ala o le a faamanuiaina ai tamaiti aoga taitasi. Mafaufau, mo se faataitaiga, i se alii talavou e igoa ia Aleki, ua fesili, “O le a la’u mea e fai pe afai ou te le ioeina aiaiga faavae uma o le Ekalesia?” Mata o le a sau tali i se ala e faaalia ai lou alofa ma le loto malamalama? Ioe, o le a manaomia ona ia malamalama i le matafaioi a perofeta ma le taua o le usiusitai. Peitai, atonu e le o le tali aupito taua vave lea, ma atonu foi e le lava mo se tasi o loo nopia’i faamaoni i se tauiviga. Ae tatou te lei tali atu i se fesili pe taitai se talanoaga, e ono lelei ona tatou mua’i saili ia malamalama i le tagata o loo fesili, po o le vaega o loo faia le talanoaga. O lea la, afai e te maua le avanoa e talanoa moni ai ma Aleki, o le a se isi mea e tatau ona e iloa, ma o le a foi se isi mea na te manaomia mai ia te oe?
Ina ia amata, e mafai ona tatou faalogo, e mafai foi ona tatou tatalo mo le tomai e tuu ai i tatou lava i ona seevae ma taumafai e mafaufau pe o a ona faalogona. Atonu e le o faia e Aleki lenei fesili e faaaoga ai le mafaufau pe ia na ona malamalama ai i le aoaoga faavae. E i ai le talaaga o Aleki. Ua ia te ia le poto masani ma sootaga, o nisi sa lelei a o isi e leai. O le mea moni, i lona tulaga, ua lagona e Aleki e le amanaia o ia pe a alu i le Lotu po o le inisitituti. I le taimi o talanoaga faaletalalelei, e ese lana faalogo nai lo le toatele o tagata e tautatala. E tau mafaufau o ia pe o i ai se isi e tutusa o la faalogona, ae e leai lava se isi e foliga mai e talanoaina ana fesili patino. O aafiaga nei ua mafua ai ona ia lagona le tuulafoaiina i le lotu. Ina ua ia taumafai e faasoa atu ona manatu, na te lei maua se lagona o faalogo mai se isi pe o malamalama mai foi. I se tasi taimi, na faia ai e se faiaoga se faamatalaga e uiga i lana ‘ava. Mulimuli ane, sa ta’umamaina e se isi tamaitiiti aoga se mataupu na manatu ia Aleki e taua. Sa amata ona ia lagona ua faamasinoina o ia i nisi o taimi ma oo ai lava ina ita.
Ae o loo i ai se isi mea e tatau ona e iloa ma manatua e uiga ia Aleki. O loo i ai pea o ia iinei. Na sau i le vasega. E sau ona e fiafia o ia i le talalelei ma le Ekalesia. O loo taumafai o ia e taofimau i lona faatuatua, ma o loo taumafai o ia e fai le mea tonu. O loo taumafai foi o ia e faavasega, mai mea uma sa ia faalogo i ai ma iloa i le Ekalesia, pe o fea vaega o aoaoga faavae moni ma pe o a foi vaega o mea masani faaleaganuu po o ni mea foi e le sa’o na uia e tagata o le au paia e lelei o latou faamoemoega. Ua utia o ia i le totonugalemu o se tauiviga faalelagona , ma o loo saili o ia ia iloa le finagalo o le Alii. E mafai faapefea ona e iloaina uma nei mea e uiga ia Aleki pe afai e te lei faalogo ma saili mo le loto malamalama? O lea la ua e iloa atili e uiga ia Aleki, ua e iloa ai e le na ona fesili o ia e uiga i aiaiga faavae a le Ekalesia. O lana fesili e le na o le “pe moni le Ekalesia?” O le mea o loo ia manao ia iloa o le, “Pe lelei le Ekalesia?” “Pe o i ai se nofoaga mo a’u?” ma le “E faapefea ona ou ofi i totonu pe a foliga mai ua na o a’u le tagata e i ai masalosaloga ma fesili?”
E mafai ona e fesoasoani ia Aleki e mafaufau e uiga i ana fesili ma toe faava’a i se vaaiga faavavau. O nisi taimi o le faia o le fesili sa’o o se vaega taua o le mauaina o tali mai lo tatou Tama o i le Lagi. Ae o le lava o le alofa ma le loto malamalama e malamalama ai ia te ia, ma aloaia le manatu faavae o lana fesili, o le a fesoasoani ia te oe e avatu ai le lagolago ma le taitaiga na te moomia. E le faigofie lenei mea ma e mafai foi ona foliga taufaafefe. Ae ou te le o fai atu e te taitaia talanoaga uma pe tali atu foi ma le atoatoa i fesili uma. O lea ou te talosaga atu ia e faalogo, ia loto malamalama, ma ia fesoasoani ia i latou ia lagonaina le alofa o le Tama Faalelagi mo i latou. Pe mafai ona outou mafaufau i le saogalemu patino o le a lagona e Aleki ma lana vasega ma le malosiaga semanu e faaaoga talu ai e leoleo ma puipuia ai i latou lava, lea ua avanoa nei mo i latou e aoao ai ma tuputupu ae ma suia ai? Pe mafai ona outou mafaufau i le mana o le Agaga Paia i se potua’oga ua tumu i le faauo ma fusi o le alofa?
Pe tou te manatua le fautuaga a Elder Dale G. Renlund mai le konafesi aoao aupito lata mai? Sa ia faamatala ai se gasegase sa taofia i le falema’i i le tele o taimi mo ni togafitiga o gasegase e afua i le ava malosi. Sa faaalia le manatu o se fomai i se aoaoga faamasani e faapea, ua ia lagona e le fetaui lona faaaluina o ni itula se tele e vaaia ai lenei gasegase ona o auga ogaoga o lona ma’i o ia lava e tuua’ia.
Na faalogo atu Elder Renlund o tali ane se isi foma’i i le faapea atu, “Na avea oe ma fomai e tausia tagata ma galue ia faamalolo i latou. E te le’i fomai e faamasino i latou. Afai e te le malamalama i le eseesega, e leai sau feau e te aoao ai i lenei matagaluega.”13
E lei avea oe ma a’u ma faiaoga o le talalelei a Iesu Keriso e faamasino a tatou tamaiti aoga. Na avea i tatou ma faiaoga ona sa tatou mananao e faasino i latou i le Fomai o Fomai. E na o Iesu Keriso lava e i ai le aia tatau e faamasino ai, ma na o Ia foi e mafai ona faamaloloina. E na o le taulai atu ia te ia i aso uma—i Ana faataitaiga, o Ana aoaoga, ma Ana folafolaga—e mafai ai ona tatou fesoasoani ia te i latou ia iloaina le faamalologa ma le itu latou te manaomia. Po o a lava suiga i auala tatou te aoao atu ai ma le fesootai atu ia tatou tamaiti aoga, e tasi lava le mea o le a le suia lava. O le auala e tasi e sili ona taua e mafai ai ona tatou fesoasoani e faateleina le faatuatua i le tupulaga faia’e o le tuu atoatoa lea o Iesu Keriso i le totonugalemu o la tatou aoao atu ma le aoao mai e ala i le fesoasoani ia i latou ia iloa o Ia, ia aoao mai ia te Ia, ma taumafai malosi e avea e faapei o Ia. Pe a oo ina faaluaina le malosi ma le loloto o lau molimau i le alofa loloto mo au tamaiti aoga, o le a e i ai i le tulaga aupito sili e mafai ai ona fesoasoani ia i latou ia malamalama ma faalagolago i Ana aoaoga ma Lana Togiola ma agavaa ai mo Ana faamanuiaga folafolaina. I le suafa, o Iesu Keriso, amene.
O le taimi nei, ou te fia savali atu e faatasi ma Uso Bigelow ma Uso Smith.