37:2

Talanoaga Faalaulauafono

Faasalalauga o Aoaoga Faaletausaga a le S&I mo le 2021

Aso Lua, 19 Ianuari, 2021

Brother Chad H Webb: Faafetai mo lou paau mai. O Uso Rory Bigelow lenei. O le taitai lagolago o matagaluega, o mea i le Maota o Ofisa o le Ekalesia pei o punaoa mo tagata faigaluega, tupe, ma fale ma fanua. O Adam Smith lea, o le taitai lagolago o aoaoga, e galulue ma matagaluega pei o Aoaoga ma Mataupu Aoaoina ma Tautua mo Tamaiti Aoga ma isi.

I le amataga, ou te fia tuuina atu se talaaga ma se vaaiga mamao o le manulauti e agai i ai. Taimi nei i Seminare ma Inisitituti (S&I) e maoae se galuega ua tatou faia e taulima ai manaoga o tamaiti aoga. Ae o le mea moni, o i latou e o mai o i latou foi na o tagata toaaga ma tuuto o le Ekalesia. O isi e faale o aafia, ma o le mea moni, ua faaitiitia le lesitala i polokalama o le S&I i le lalolagi.

O lo tatou faamoemoega sili ia suia. Ua faamoemoe e mafai e le S&I ona siita’i le matafaioi i le manaoga faanatinati e “faapotopoto” se tupulaga atoa o talavou laiti ma matutua. Manatua na aoao mai Peresitene Nelson o le faapotopotoina o Isaraelu o le galuega sili ona taua i le lalolagi. E aofia ai ma le galuega faafaifeautalai ma malumalu, fai mai Peresitene Nelson e aofia ai foi le fausia o le faatuatua ma molimau i loto o i latou tatou te tautuaina. Fai mai foi, soo se taimi tatou te fesoasoani ai i soo se tasi e osia ma tausia feagaiga ma le Atua, ua tatou faapotopotoina Isaraelu.

Tatou te popole ua mamulu atu nisi o a tatou talavou laiti ma matutua. Nai lo le faaupuga o le leiloloa po o le maua, e tele ina ta’ua e mau o le faasalalau ma faapotopoto. O nisi o i latou o tauivi ma le faatuatua. Ae ua tatou iloa le mea e maua ai; e le o leiloloa. Ua faasalalauina e tosinaga o le lalolagi ma atonu ua latou aveesea lava i latou. E ofoofogia lo tatou avanoa ma le manaoga faanatinati e “faapotopoto” ai lea vaega o Isaraelu.

O le faiga e fai ai, o le fatuina o ni aafiaga e tau atu i le liuga, talafeagai, ma avea ma ni o tatou, ma maua ai foi na aafiaga e le toatele e mafai ai. Tatou te faia a o tumau faamaoni i o tatou faapogai. Tatou te le o taumafai ia tau ina suia. E faaauau pea ona aoao atu le talalelei pei ona i ai i tusitusiga paia i le mana o le Agaga Paia. E tatau ona tatou faia ni fetuunaiga e fatu ai aafiaga.

Ua tatau ona tatou faalaga’i:

Mai le tautala ma ta’u atu i le punoua’i ma le valaaulia.
Mai le ta’u i tamaiti aoao le mea ia i ai, i le fetaui ma i latou i le mea o i ai.
Mai na o le faaviivii o mea ua lelei i le faatauaina foi o tauiviga.
Mai gaoioiga faalevafealoai i fegalegaleaiga ‘anoa.
Mai se taulai atu i togi o le vasega ma le faauuga i se taulai i le ola faaleagaga ma e avea ai.
Mai le tau aoao mai i isi i le saofagā lelei ma avea ma meafaigaluega a le Agaga Paia.

O le a tatou talanoa ma taitai o polokalama, puleaoga o seminare, faatonu o inisitituti, ma taitai faamaopoopo e faamanino atili tomai ma faamoemoega o le aoao atu ma le aoao mai, e saunia aoaoga ma tomatau, ma aumaia ni fuataga e iloa ai pe ua tatou ausia.

O aoaoga ma punaoa o le a outou maua ma suiga e faia ma le sini o le faapotopotoina o Isaraelu—e ala i le fatuina o aafiaga e taulima ai manaoga o talavou uma ma talavou matutua ma le faateleina ina maua e le toatele. O le a taulai atu i lenei sini mo le isi tolu tausaga. Le taimi lena e iloilo ai lo tatou agai i luma ma fai nisi fetuunaiga.

Te valaaulia outou uma e auai ma Peresitene Nelson i le galuega sili i le lalolagi—i le manaoga faanatinati e faapotopoto Isaraelu, e ao mai e fia faamuamua le Atua i o latou olaga. O le a tutupu mea maoae, ni vavega. O se faamanuiaga lava le avea ai ma vaega.

Ae ou te lei fesili atu i ni suiga i le Seminare ma Inisitituti, “O le a se mea o le a le suia lava?”

Brother Rory Bigelow: Te manatu o le mea e tasi e tumau pea, o le faamoemoega aotele lea. Tatou te fesoasoani i talavou ma talavou matutua ia malamalama ma faalagolago i aoaoga ma le Togiola a Iesu Keriso. Tatou te fia fesoasoani ia latou agavaa ma tapena mo faamanuiaga o faatali mo i latou. Ma o le a le suia lava lena mea. O la tatou taulaiga aotele e mo i latou, ma o le a tatou alolofa i ai. E taua i latou. Tatou te fia fesoasoani i tagata taitasi ia maua le aafiaga sa’o i Seminare ma Inisitituti.

Brother Adam Smith: Fia faaopoopo atu o le a tatou taulai pea lava i manaoga o tamaiti aoga, lea na e ta’ua—e tatau ona tatou matuai iloa manaoga o tagata a’oa’o i aafiaga i le potuaoga, ia totonugalemu tusitusiga paia i mea tatou te fai e foia na manaoga, ma totonugalemu le Faaola i le mea atoa.

O isi foi mea e lua o le a le suia lava, o le a tatou tuuto pea i faamuamua faaperofeta ma le taitaiga mai perofeta ma aposetolo. O le a tatou taumafai pea ia tatou mafuta ma le Agaga Paia i o tatou olaga, pe a tatou sauniuni, aemaise pe a tatou i le potuaoga ma tamaiti aoga.

Brother Webb: Faafetai mo lena mea. E taua tele. O mea sili na ona taua o le a le suia lava. E le suia lava le fatu o o tatou faasinomaga.

I le ta’ua ai o mea ua suia, e ese le faasalalauga lenei. Ua tatou suia mai Se Afiafi ma se Pulega Aoao i lenei taimi o le tausaga, i lenei faasalalauga faaleaoaoga i le lalolagi. E mafai la e se isi o oulua ona talanoa pe aisea ua fai ai lena suiga?

Brother Bigelow: E tele mafuaaga, ae ou te manatu e lua mea tetele e taua ona iloa. Muamua, ua loa tausaga, i le—1912, ina ua amata le Granite Seminary—sa tele ina taulai a tatou taamilosaga faaleaoaoga i le kalena faaakatemia a le I.S. I le 1991, na fai tatou suiga. I le 1991 sa toatele atu a tatou tamaiti i inisitituti i fafo atu o le Iunaite Setete nai lo totonu o le Iunaite Setete.

A o tuputupu pea faavaomalo, sa le’i onomea le faatino pea i se kalena e faavae i le kalena faaakatemia a le Iunaite Setete. O se tasi la lea o mafuaaga—o se manao e suia se kalena e sili ona faaletausaga nai lo, se kalena faaakatemia mo le itulagi i matu.

O le isi mea—pe mafai ona tau ina faaopoopo atu—te manatu o le isi mea o se suiga i lo tatou filosofia i le faiga o aoaoga. Mo se taimi umi, sa toe ina faapei o la e fai se tatou tautuuga moliga fu’a. E saunia e le ofisa tutotonu se aoaoga ma faamuamua, ona oo lea i mafutaga a faatonu o eria, matou pasi atu lena fu’a i faatonu o eria. Ona latou o lea ma pasi atu i a latou aoaoga faaleeria.

Ma, ua matou tilotilo atili nei e ala i vaaiga a se mafutaga a faatonusili o eria po o aoaoga e fefautuaai faatasi ma fatuina faatasi ai le taitaiga. Taimi nei, o le suia o la tatou mafutaga a faatonu eria mai ia Aperila ia Oketopa, ua mafai ai ona matou fono ia Oketopa, ma saunia ai—e pei o le taimi nei, ia Ianuari—mo se faasalalauga faaleaoaoga mo le lalolagi atoa.

Brother Webb: Na la ua ta’ua ai se isi suiga. Tusa ua faaluaina le toatele o faatonu eria. Ua faatele ona toso mai ia matou fono nai lo le taimi muamua. Ua mafai ai la ona tolaulau lelei mai ai manaoga o eria taitasi i le lalolagi atoa i na aufono, ma gasolo lelei ai fesootaiga, i le agaga o se aufono. Te manatu o se vaega taua tele lena mea.

O le isi suiga ua toatele tagata e fesili ai—ma e talisapaia le naunau o tagata uma e fetuunai i lenei suiga a o tatou agai i luma ma le kalena fou faaletausaga o le Sau, Mulimuli Mai ia te A’u nai lo se kalena faaakatemia o a tatou mataupu aoaoina. Adam, e te fia saunoa i lena suiga?

Brother Smith: Ia, ua lelei. Pe tusa o Mati i le 2019, na matou fuafua ai e faia lena uluai laasaga e faaogatusa mataupu aoaoina o le Seminare ma le Inisitituti ma le tusi o mau o le Sau, Mulimuli Mai ia te A’u . Sa’u aumaia se saunoaga a Elder Clark ou te fia faitauina auiliili ona e aoga tele.

Ina ua fofogaina i le lalolagi, fai mai Elder Clark: “Sa tulai le perofeta a le Alii i le konafesi aoao ma saunoa, ‘Tatou te manaomia aoaoga faaletalalelei e totonugalemu i le aiga e lagolago e le ekalesia.’¹ Ma ona ua ia saunoa i ai, na suia mea uma.”

O lea sa matou fuafua ai i le tautoulu o le 2019—tou te manatua—na tatou se’e atu i le Feagaiga Fou, ia Ianuari 2020 i le Tusi a Mamona. Tusa o le tautoulu o le 2019, na fesili mai ni polokalama o Seminare e fai i taimi o a’oga pe mafai ona latou faata’ita’ia se mea. Sa latou mananao e taumafai ona aoao ia mataupu aoaoina o le Seminare ia matua ogatusa ma le faasologa o le faitauga o le Sau, Mulimuli Mai ia te A’u . Sa matou manatu atonu o le a mananaia ni mea e aoao mai ai, ma sa matou valaaulia i latou e fai.

Sa matou aumaia se ‘au sailiili e o e talanoa i tamaiti aoga ma matua ma faiaoga Seminare ma taitai ma faatusatusa a latou taunuuga ma aafiaga i na polokalama sa faia ia mataupu aoaoina masani e iva-masina--ma le faamaoni i tusi o mau, ae aoao pea mataupu aoaoina o le Seminare i la tatou kalena e iva-masina.

O mea na matou aoao mai lena sailiiliga—sa ese le musuia. E fai foi si ofo ai. Na matou iloa ai sa le’i afaina i tamaiti aoao le fai faafia. Na tutusa foi le malamalama o le tamaitiiti aoga i le tusi o mau.

O le popolega, a mulimuli i le kalena o le Sau, Mulimuli Mai ia te A’u e i ai ni mea o le a misi e tamaiti aoga i se potuaoga Seminare ona o le tuuaga i le taumafanafana, tautotogo po o le tautoulu. Ae o le malamalama o tamaiti aoga i le tusi o mau, ua faamaonia le tutusa.

Ae sa ese le mea na matou gauai atu i ai. Sa i ai se faatelega maoae—faafuainumera moni—sa toatele tamaiti aoga na o mai i le vasega ua saunia e aoao le lesona i lena aso—tele naua tamaiti aoga na faaalia manatu anoa ma tofu sao lelei i le vasega.

Ma o le mea sa sili ona ou fiafia ai, o le faatelega maoae i le aofai o tamaiti aoga na faitau a latou tusitusiga paia i le fale i fafo o le Seminare. Ina ua matou vaaia lena sailiiliga ma le faatusatusaga, sa matou malamalama moni o le faia o lea suiga, o le a faamanuiaina ai tamaiti aoga, ma aiga. Na faamamafa ai foi se isi mea na aoao soo mai e Elder Clark a o avea ma komesina.

Na ia aoao mai e fesoasoani i tamaiti ia loloto le aoaoina ma se aafiaga liua a o tatou faatasi. O le ogatusa ma le Sau, Mulimuli Mai ia te A’u e tuumama teisi ai lenei avega o le faamae’aga, ma mea e tatau ona mae’a. O le a tumau pea ona tatou faamaoni i tusitusiga paia; e totonugalemu pea lava. O le Sau, Mulimuli Mai ia te A’u tatou te aoao ai se tusi o mau mai le amataga seia uma. Ae ua tatou iloa e le mafai ona mae’a uma, o lea e mafai ona tatou taulai i manaoga o le tagata aoao, faafesootai i latou i le Faaola, fai i mau, ma e ala i le Agaga Paia.

Ae matou te lei faagaloina e i ai se faafitauli i soo se kalena faalea’oga, i soo se mea i le lalolagi, e i ai tu’uaga, pe a le o a’e aoga, pe tusa o le lua i le tolu masina le uumi. O le lua lena i le tolu masina o anotusi o mau, o le a le maua e tamaiti aoga i le Seminare. Ma le avea ai ma faiaoga o tusitusiga paia, e afua ai ona popole.

O le mea la na taua ai pea ia Mau Tauloto Faaleaoaoga Faavae talu ona folasia mai, ou te manatu ua atili faamamafa ma faateleina ai lona taua. Afai o le a taulai atu faiaoga i le aoaoina o lesona o Mau Tauloto Faaleaoaoga Faavae faalevaiaso, po o le a lava le kalena faalea’oga i le lalolagi atoa, e maua lava e tamaiti elemene sili ona taua. O nisi taimi, o le lelei tele o faiaoga, ma le mananao ia mae’a poloka mau, e mafai ona tuu ia Mau Tauloto Faaleaoaoga Faavae i le faaiuga, pe a maua se taimi e fai ai, ae e le maua lava so tatou taimi. Tele naua mea e aoao atu.

O nisi taimi e vaai atu ai i Mau Tauloto Faaleaoaoga Faavae e toe ina le taua i lo mea e fai i seminare. Ae o le mea moni o Mau Tauloto Faaleaoaoga Faavae e taua tele i mea tatou te faia. E fesoasoani tatou te ausia ai o tatou faamoemoega ma mea e poloaiina tatou e perofeta e fai. O le taulai la i Mau Tauloto Faaleaoaoga Faavae, e mafai ai ona talanoaina mea e lei mae’a i se kalena faalea’oga, ma ia ogatusa ai ma le Sau, Mulimuli Mai ia te A’u i se faiga e manuia ai tamaiti aoga ma aiga.

Brother Webb: Ou te manatua le taimi na faaali ai le sailiga ia Elder Johnson, ma talanoa ai. Mai a i le amataga, sa ia manao ia ogatusa ma le Sau, Mulimuli Mai ia te A’u ona e manuia ai aiga ma, e fesootai ma latou suesuega i le fale. Sa popole foi o ia, pei o matou, e uiga i mea o le a misi i ni autu patino i nisi itu o le lalolagi ona o tuuaga a aoga. E ono le aoao atua le toe vaiaso o le soifuaga o le Faaola i seminare, po o le Uluai Faaaliga po o ni mea taua ma mataupu faavae o le talalelei.

Pei la ona e saunoa, ina ua talanoaina le faiga o le taulai i lesona o Mau Tauloto Faaleaoaoga Faavae e aofia ai ma na, tusa pe na misi i le tuuaga—ma fatu ai foi ni lesona otooto, ni sootaga e fesootai ai, pe a foi mai le tu’uaga ma lē oso sa’o ai loa i le kalena o le Sau, Mulimuli Mai ia te A’u ae amata i ni lesona faafesootai mo mea na misi, ona faaauau ai lea o le faasologa o le faitauga o le Sau, Mulimuli Mai ia te A’u—o le a mafai ai ona maua faamanuiaga na e faamatalaina i le ogatusa ai ma kalena o le Sau, Mulimuli Mai ia te A’u ma aveesea ai foi atugaluga i mea e ono misi. E tatau foi la ona faatuatuaina aiga ma tagata o le a suesueina na vaega pe a tatou le mafuta, ia i ai se aafiaga ma, ala i le Agaga Paia e aoao ai mea e tatau ona latou iloa. O se faamalamalamaga umi tele lena. Fa’afetai.

O se tasi mea, e tele tagata o tuufesili i le suiga o faitauga moomia—mai le manaomia ona faitau le anotusi mo le kosi i le masani i aso taitasi o le suesue i tusitusiga paia. O le a la se tala e uiga i lena faaiuga?

Brother Smith: Ua tatou iloa uma mea manaomia mo le faamae’aina o le Seminare ma le tipiloma, tatou te tausisia le auai ma valaaulia i latou e faitau anotusi o le kosi. Ma e i ai le tatou iloiloga o le aoaoina. Ua i ai foi sina fetuunaiga teisi i faitauga manaomia mai le faamae’aina o Tusi Faavae e fa i lo latou taimi i le seminare i le valaaulia o i latou ia i ai se uiga masani e faitau tusitusiga paia faaleaso.

E tele so matou taimi e faaalu ma faatonu o eria—ma se aofaiga tele o faatonu o itulagi—i le lalolagi e talanoaina ai mea matou te matuai mananao e tupu i olaga ma mafaufau ma loto o tamaiti aoga ona o o latou aafiaga i le seminare ma le inisitituti.

Ma a’o matou talanoa i aafiaga o le seminare, ma mea matou te faamoemoe o le a tupu i olaga o se tamaitiiti aoga, sa talanoa foi i le toe fo’i i se faitauga manaomia o tusitusiga paia i le seminare. Ae sa matou iloaina o le mea matou te mananao moni e faamamafa, e sili ona taua o le mafai lea ona tatou fesoasoani i se tamaitiiti e fatu se masani faaleaso e tumau ai i o latou olaga.

Sa ou aumaia foi se isi upusii. E mai le tusitaulima o le Aoao Atu ma le Aoao Mai o le Talalelei ua aotele lelei ai. Fai mai, “E i ai nai mea e mafai ona faia e faiaoga o le a i ai se aafiaga sili ona mamana ma tumau i olaga o latou tagata aoao nai lo le fesoasoani e aoao ia fiafia i tusitusiga paia ma suesue i ai i aso uma.”² A tatou mananao la e avea se tipiloma ma faatusa o se aafiaga anoa, loloto ma le liua i le fa tausaga, o le suesue i tusitusiga paia sona vaega la.

E tele auala e mafai ona e fuaina ai le punouai o le tamaitiiti i tusitusiga paia, ae sa matou mananao e taulai e fua le mea sili ona taua, le fesoasoani lea i tamaiti e fatu sana lava masani e suesue faaleaso tusitusiga paia. O lea na matou aumai faatasi ai ma ni punaoa lelei tele e aoao ai taitai ma le faamoemoe o le a maua e faiaoga ma taitai e faia aoaoga. Ona e faaopoopo moni na i mea manaomia e fesoasoani ai i tamaiti ia maua tomai, ma fai sini, ma iloa ai le ala e fesootai ai i le Tama i le Lagi ma lo latou Faaola e ala i le Agaga Paia i tusitusiga paia. Ae o le mea manaomia lenei e maua ai le mea e sili ona taua ma le mea moni e ta’u mai e le tipiloma.

Brother Webb: O le a tatou uunaia pea le faitauga o le anotusi mo le kosi. O le mea moni, o le faitauga moomia i aso taitasi, po o le faamoemoega, ia i ai i le aluga o suesuega.

Matou te faamoemoe la o le a faitau pea e tamaiti seminare le kosi o suesuega. E faamoemoe o le a latou faatutu pea sini ia ‘anoa pei ona e ta’ua. Ae o le mea manaomia mo togi e 75 pasene o aso latou te i ai i lena semesa. O le a le vailiilia le uiga o le “faitau faaleaso.” Ae a latou punouai e suesue tusitusiga paia mo le kosi i aso taitasi, 75 pasene o le taimi, o se faatosina lena e uunaia ai i latou e maua se aafiaga o se vaega o lo latou taimi i le seminare.

Brother Bigelow: Ua, ou fiafia lava ua e ta’ua atonu e ese le sini, ma le taunuuga tatou te mananao ai mo tagata—ia i ai i tusitusiga paia i aso uma. O nisi vaega o le lalolagi e i ai le seminare, e leai ni a latou tusitusiga paia lolomi e mafai ona faitau ai. O lea la, ina ia fatuina se anavatau e fetaui ma le lalolagi atoa—o le mea lea tatou te mafaia ai. E mafai ona fai atu ai, “Matou te mananao ia faaleleia la lua sootaga ma le Tama Faalelagi e ala i le upu.” Ma o le a tupu lena mea i se masani faaleaso o le suesue i le upu a le Atua.

Brother Webb: Faaaoga loa le avanoa i aso uma e faalogo ai i Lona siufofoga.

Brother Bigelow: Sa’o lelei.

Brother Webb: E avatu ai foi se faatuatuaga i faiaoga, sa’o? Ina ia galulue taitasi ma tamaiti e fetuunai o latou aafiaga e tusa ma o latou manaoga ma tomai. Ma e matou te faatuatuaina outou. O le ala lea matou te le toe auiliiliina ai le uiga o lenei mea.

Brother Bigelow: Sa’o lelei.

Brother Webb: Faafetai lava. Ua uma la ona fofogaina atu ma faatino na suiga, ma e matou te talisapaia a outou taumafaiga uma e faaaoga i le mea sili e faamanuia ai tamaiti aoga. O le isi suiga, pe o mea na aligaliga, o le faama’i oti ma mea na tutupu i nai masina ua mavae i o tatou potuaoga ma le mau faalavefau ma suiga i le aoao mai i le initoneti ma, isi suiga na faia ona o le faama’i oti. Rory, o le a sau tala i mea na tatou aoao mai le faama’i oti, ma suiga o le a fai ona o lena mea?

Brother Bigelow: Ou te manatu o le mea muamua—na e ta’ua i lau saunoaga ia amata nei—ma o le mea lena ua tatou iloa, ua i ai tagata ofoofogia tatou te galulue faatasi. A tuu la i ai ma a’oga a le Ekalesia ma faifeautalai uma ma faiaoga e tofia, ma tagata faigaluega, au faigaluega faavaitaimi, e i luga atu o le 60 ma le afe o tagata i le lalolagi. O ni tagata lelei tele foi i latou. Ae ou te manatu o le faamai oti, e pei ua fatuina ai sina fafagu mo i tatou e uiga i ni tomai atonu tatou te le’i maua.

I le lamatia ai i le faasoaina atu o se aafiaga patino, sa tofia i ma’ua ma lo’u toalua, i le pe a ma le fitu tausaga ua te’a, e avea ma taitai misiona i Pasila. Na ma o ua uma ona aoao le FaaPotukale—Sa ou faamisiona i le gagana Sipaniolo a o talavou, o lea la o se gagana fou mo i ma’ua, ma sa mafaufau ua mafai ona ma tautala faaPotukale.

Ou te manatua le uluai aso na ma taunuu ai i le misiona na ave ai i maua i le fale e le peresitene misiona agalelei. Sa i ai le pule FM, ma a o matou savavali atu i le umukuka, sa fai mai, “E manaomia ona oka le vai.” Sa pei o tuu lona lima i luga o le fagu vai, ma fai mai, “E manaomia ona e aumaia se faguvai fou.” Sa ou matua popole, ona sa ou iloaina ou te le iloa le faaPotukale o le water bottle . Sa ou aoaoina isi mea. Sa ma suesue, faapea ua ma malamalama. Sa ou fai atu ia te ia, “E mafai ona e faia mo a’u?” Faamolemole?” Sa fai mai o ia,”Ua lelei.”

Na te le’i iloaina ina ua fai lana telefoni, sa u lo’u tua ia te ia, toso mai se kata e 3 i le 5 ma tusi ai upu taitasi e oka ai vai. Sa’u manatu, o le a feoti lo matou aiga i le lua vaiaso ona atonu o le a leai se vai.

O lena aafiaga o se taimi o le manino, na ou iloa ai ou te le’i iloa mea sa ou manatu ua ou iloa. Te manatu ai, o le mea lea ua fai e le faama’i oti. O le maualuga o lo tatou tomai i le tilivaina i le initoneti o aoaoga faalelotu, e le’i oo i le mea e tatau ona i ai. O nisi ua vave ona fetuuna’ia, o so latou tofi ma tomai, na fananau mai ma i latou, ma ua mafai ona latou faia. O isi atonu e le tele.

O lea ou te manatu ai o se tasi o mea ua tatou aoao mai ma o le a manaomia ona faaauau pea, o le—faaleleia atili o se tomai patino. E tatau ona tatou saili e faaleleia lo tatou gafatia.

Na e ta’ua se mea i lau saunoaga tomua. Ou te ta’ua pea, ae ou te manatu e taua moni lava. Mai ia Elder Clark, ina ua ia fai mai, “Po o le a lava le maualuga o le usitai, faamoemoe, po o le alofa mama o a tatou ia; po o le a lava le maualuga o tomai faapolofesa ua tatou maua, o le a le lava lea mo le galuega o i luma.”³

O se tasi o mea ou te manatu ua tulai mai i le faama’i oti mo a’u lava ia o se, naunauga loloto lea e faaleleia, ia mautinoa ua ou ausia faamoemoega, o faamoemoega faateleina o le Alii i lenei lalolagi ese ua tatou i ai nei. O le a la lana mea o le a fai i luga o le initoneti? Ou te le iloa. Adam, o a mea na te faia mo tatou aoaoga i le initoneti? Ou te matea e fetaui ma oe le tali i le fesili lea.

Brother Smith: Ia, ou te toe ta’ua le mea na e saunoa ai. Masalo ua tatou aoaoina ni mea taua tele se lua mai le faama’i o le a tatou faaaoga e agai i luma. O le tasi pei ona e ta’ua, ua tatou galulue moni ma tagata aupito sili. O a tatou faiaoga totogi, o a tatou volenitia, e ese le naunau ma e matagofie, ma ua faapaiaina. Ua latou la’a moni i se vaega faigata ma ua matagofie la latou faatinoga.

Ua tatou iloa foi avanoa e faaleleia. Ua tatou iloa lelei foi fesili e tatau ona fesili ai ia aoao ai tali e tatau ona tatou aoao.

O se mea e tasi ua tatou faia i le Maota o Ofisa o le Ekalesia o le faatulagaina lea o se vaega o le Pulega Faatekinolosi e Aoao Ai. O lona uiga, o se vaega o tagata tomai faapitoa e fesoasoani ia tatou agai i luma i mea e ofo atu i le Initoneti mo Seminare ma Inisitituti. Ua faaigoa o le “Pulega Faatekinolosi e Aoao Ai” ona o le initoneti e tele faauigaga eseese. O le uiga moni o soo se ituaiga tolaulauga taumamao e faaaoga ai tekinolosi, pe suifefiloi po o se fonotaga faavitio pe auina atu faamatalaga i se isi itu—e tele ala eseese.

Ae masalo o le mea ua tatou aoaoina o le, pe o a fesili e tatau ona tatou faia? Ua amata ona tatou faia na fesili ia mafai ai ona fausia punaoa, se fuafuaga faataatia, ma se polokalama e lagolago ai mea o le a avea ma sao faatekinolosi lautele o vasega seminare ma le inisitituti.

A aluese le KOVITI, lea ua tatou faamoemoe ia vave ae le tuai, o le a le maualuga le manaomia, ae o le a maualuga atu nai lo le taimi muamua ona ua tatou pa’i atu i ni tamaiti aoga sa tatou le’i pa’i i ai muamua. Ua mafai ona manuia olaga ma aiga tatou te lei mafaia muamua ona pei sa fai faamalosi i tatou i lea ituaiga o tolaulauga a o lea ua tatou vaaia ona aoga. Ua tatou iloa nei fesili e fai ia faaleleia atili, ua tatou faia foi taumafaiga naunautai e aoao na tali. Ua ou manatu ai e i ai ni mea mananaia o le a oo mai.

Brother Webb: Ua fesili mai nisi, “Mata tatou te oo i se tulaga e i ai lava la tatou aufaigaluega tuuto mo le initoneti?” O la’u tala o loo tatou tauivi pea ma na fesili. E matuai mafai ona i ai se aso o le a i ai faiaoga Seminare i le taimi atoa e faiaoga ai i luga o le initoneti. E moni foi e manaomia e i tatou uma le i ai o se malamalama faavae i le ala e faiaoga lelei ai i luga o le initoneti. E ono i ai se taimi e valaauina ai i tatou e fai lena mea. Afai o lea, tatou te mananao e fai le mea sili tatou te mafai. Ua tatou vaai i ni faiaoga ua matagofie lo latou faatinoina. Ua tatou vaai i faiaoga ua faafāina a latou lesitala i polokalama inisitituti ona o le lelei tele o a latou tolaulauga i le initoneti. E taua atu la nai lo le tulaga faalefaalapotopotoga, pe mafai ona tatou aoao mai tomai e tatau ai e tolaulau lelei ai aoaoga i le initoneti ma faamanuia moni ai tagata i lena auala faafaiaoga?

A o tatou aoaoina atili lena mea, o le a faasoa atili atu foi na mea i avanoa faaleaoaoga ia mafai ai e tagata ona faia le mea sili i le tuuina atu o se aafiaga lelei o aoaoga faalelotu. Ou te manatu la o ni finagalo lelei tele na. Fa’afetai.

Brother Bigelow: O le fetuunaiga lenei i aoaoga i le initoneti, e le faapea ua tatou lafoai atoa mea na tatou faia i le tuanai. Ae e tatau ona fetuunai, pe toe aumai nisi faiaoga inisitituti faavaitaimi, faiaoga Seminare faavaitaimi. O le initoneti e maua ai se avanoa mo tagata e aoao atu, e le o se aso atoa.

Brother Webb: Ae o le a le faamalosia se tasi i na suiga. Tatou te faia lava na fetuunaiga a o tatou agai i luma, ma pe a maua avanoa. O se tasi mafuaaga, se’i ou ta’ua faapuupuu. Ua toatele naua le aofai o tamaitai i le aufaigaluega. Ma matou te faafetai tele mo lo latou sao. O nisi o i latou ua filifili, ona o tulaga faaleaiga, e faiaoga faavaitaimi pe faiaoga i luga o le initoneti po o le a lava le mafuaaga.

E moni foi, ua toatele atu tamaitai i le aufaigaluega, o lea ua faateleina ai foi avanoa mo i latou e taitai ai. Se’i o’u ta’ua, e toa 10 faatonusili o vaega i le Maota o Ofisa o le Ekalesia, ma o le toatolu o i latou o tamaitai. Ma, e le’i tofia pe faafaigaluegaina i latou i na tulaga ona o ni tamaitai, o i latou o ni sui tauva sili ona agavaa mo na tulaga ma e maoae lo latou saofaga i le galuega o tatou faia.

Ua na o se faataitaiga, a o tuputupu ae la tatou faalapotopotoga, o le mea lena ua tupu faapea foi i Faatonusili o Itulagi, ma faiaoga po o taitai o polokalama. Ou te ta’ua foi ona o se suiga lea i la tatou aufaigaluega, ma e ao ona tatou iloa. O taitai foi o polokalama e ao na latou silafia atili le eseesega o vaaiga, ma fefautuaai faatasi ma utuvai mai le poto masani o tagata ma manuia atili mai o latou manatu.

Ua ou manatua se mea e tatau ona tatou mafaufau i ai ia manuia ai mai se aufaigaluega su’ifefiloi. E patino lena i tagata faigaluega totogi, e faapea foi i se lalolagi ua tumu i faiaoga, tane ma fafine e eseese uma talaaga, o e ua ta’ua o faiaoga e tele naua mea latou te ofo maia, e tatau ona tatou faalogo i ai, ma malamalama i o latou manatu ma o latou poto masani ia mafai ai ona manuia tamaiti aoga i a tatou faalapotopotoga.

Brother Bigelow: Atonu e toatele nisi e le o silafia, a o lea ua amata ona fatuina ‘au i tua. E mafai ai ona i ai a tou tusitala o mataupu aoaoina mai le salafa o le lalolagi, o tagata e faia aoaoga, o ‘au e faia aoaoga, pe a mai vaega eseese o le lalolagi. E mafai ai ona lelei la tatou vaai i mea o tutupu i le lalolagi nai lo le na o se vaaiga vaaapiapi.

Brother Webb: Faafetai lava. Adam, tatou toe se’e atu ia te oe. Tele naua mea ua tulai mai i le Inisitituti Fou, ua tele tagata ua fiafia i ai, ma saofaga i lena taumafaiga. O le a se tala lata mai i le Inisitituti Fou?

Brother Smith: Ia, ua tele le taimi ma punaoa ua matou tuuto atu, e toatele foi faatonusili maoae o initisituti ma faiaoga o loo tilotilo i mea e pei o le suia o siosiomaga faaletino, po o kosi fou ua ofo atu, pe na o le fetuunai foi o igoa o kosi. E matagofie uma lava. Atonu o le mea pito sili ona taua ua matou faia o lo matou faalogo atu i tamaiti o le inisitituti, aemaise se taulai atu e faalogo i tamaiti aoga sa mafai ona matou faatasi ae leai. Atonu na o le ta’itasi ona o mai ae lei toe foi mai, pe le’i o mai lava i le inisitituti. Ua matou matuai taulai e faalogo ia i latou.

Masalo o le faafouga fou taua sili e mafai ona tatou fai o le fetuunai teisi o le ala e aoao atu ai. Pei ona e fai mai, Rory, e le o se suiga atoa; e na o si fetuunaiga laitiiti, suiga laiti i mea e fai soo. O lau saunoaga foi Brother Webb ia Iuni talu ai lea na e faamamafa mai ai le fatuina o potua’oga o le liuga, talafeagai, ma le avea ai, o le ala moni lena ua matou faafou ai le inisitituti.

Ou te fia faasoa atu se tala sa ta’u mai e se Faatonusili o se Eria e uiga i se faiaoga inisitituti. Sa tapena o ia e faiaoga i lana uluai tauaofiaga i le Zoom, o le kosi o le Aiga Faavavau. I lana tapenaga na ia valaaulia ai tamaiti aoga e fai ni tamai folasaga faavitio o i latou lava.

Na tonu i se tasi alii o le vasega e folasia mai ia lava o se faafafine, i le vasega inisitituti, ma sa faasoa mai ai ni ona faaletonu i talitonuga o le Ekalesia i aiga ma faaipoipoga. Sa iloa e lenei faiaoga o le a alu e aoao atu le mataupu ma aoaoga faavae o le aiga. O lea na tonu ai ia te ia ia matua’i faautauta ma faaeteete ma ia lototatalo. Sa ia talanoa ma le faamaoni i lenei taulealea ma ta’u atu lona manao ia avea le potu o le inisitituti ma nofoaga e le gata e mafai ona na o ia e aoao manino atu ai le aoaoga faavae, ma mea na aoao mai e perofeta ma aposetolo, ae o se nofoaga e lagona ai e tamaiti aoga le saogalemu ae le faamasinoina e faasoa ai o latou popolega, faafitauli, ma fesili.

O le aapa atu i lea taulealea, na ia faasoa atu ai i lona faiaoga sa ia fuafua e na ona nofo filemu i le lesona atoa aua o lana masani lava lea. Soo se mea i le lotu e amata aoao atu ai se tagata e uiga i le aiga, e lē ano lava ma filemu. Ae ona ua aapa atu i ai lenei faiaoga faapea i ai, na naunau ai lenei tamaitiiti aoga e sau i le vasega ma ua’i i ai. Ma sa matagofie aafiaga o le vasega ona e maoae le sao o lenei taulealea, na fesoasoani foi ona popolega ma fesili faafoe ai se talanoaga ‘anoa Ona sa i ai i se siomaga o le faatuatua sa aoao atu ai upumoni, sa mafai ai foi ona faia ni fesili moni ma le faamaoni a’ia’i.

Ina ua uma le aafiaga i le potuaoga, sa tusia e lea tauleaea le lautusi lea i le faiaoga lea sa faasoa mai ia te a’u. Ou te manatu o loo ta’u moni mai ai le mea tatou te mananao moni e fai i le inisitituti fou. Sa ia fai mai:

“Na o lo’u fia faafetai atu ia te oe i le aluga o le lesona. Sa fai si o’u popole, ma sa ou le manao e tautala, ae i le iuga, sa toetoe ina a ou faataio atu ‘faafetai’. Sa matagofie le lesona. Ou te faatusaina i se lesona sa ou maua ina ua ou faailoa atu o se faafafine i se faiaoga seminare i le aoga maualuga, o le sa lagolago mai ina ua ou ta’u atu i ai le mea sa tupu i se isi vaega. O lana lesona ma lau lesona sa tumu i le alofa ma le lagolago ma pei sa suia ai lo’u olaga atoa. Ua ou lagona se faafouga o le mana’o e tumau i le talalelei, ma se tautinoga fou ou te faia le mea sili e ola ai. Ua suia ai le olaga. Faafetai. Faafetai atu foi i le taliina o a’u fesili ma lou manao ia iloa au, ma lou lagolago mai. Sa ou tusia o’u lagona i mea uma ona sa ou lagonaina le agaga … e tele. Sa ou tusia i la’u apitalaaga o mau sa tumu au i le faafetai ma le olioli. O lea ou te tali nei i lo’u fiafia. Faafetai, o lou uso ma se atalii o le Atua.”

Ua tatou vaai ua faia e lenei faiaoga se sootaga anoa ma se tamaitiiti aoga, i se ala ua avatu ai le faamoemoe ma le lototoa e sau i le Faaola ma tumau ai i le ala o feagaiga. Ma ona o le potuaoga o lea faiaoga ua avea ma nofoaga o le liuga, talafeagai, ma le avea ai.

Brother Webb: Ese lo’u fiafia i le ala na tali ai lena fesili. O le a tatou galulue i suiga faalesiosiomaga ma auivi o kosi ma le mau mea. A outou maua ni auala fou e mafai ona suia ai le inisitituti, seia oo ina valaaulia nisi tamaiti aoga o e, le o auai mai i le taimi nei. A oo la ina o mai, ia maua se aafiaga faapena, o le a latou nonofo, ma fesootai atu ai i le Tama Faalelagi, o le faamoemoega tonu lava lena o nei taumafaiga uma, faafetai lava.

Se’i ou fesili atu le toe fesili lea ae ia oulua taufai tali mai. Ua tele mea ua tatou talanoaina ua uma ona iloa e tagata, ae atonu o se mea latou te lei iloa o nai suiga o le a oo mai, o se tusitaulima—o le Aoao Atu ma le Aoao Mai ma isi mea e o faatasi ma le aoaoga lea o le a tuufaatasia ai ma a tatou tusitaulima fou. O le a la sau lua tali e uiga i mea fou o le a oo mai e tusa ai ma la tatou aoaoga?

Brother Smith: Ua faateleina moni a tatou taumafaiga e taulai, faafaigofie ma soofaatasi. Ua tatou fiafia lava i se avanoa e galulue faatasi ai ma le Au Peresitene Aoao o le Aoga Sa i le Matagaluega o le Perisitua ma Aiga, ua tasi le tusitaulima mo faiaoga i le Ekalesia.. Aoao Atu i le Ala o le Faaola ma le Aoao Atu ma le Aoao Mai o le Talalelei o le a o mai faatasi ma o le a faigofie ma manino ma tuufaatasi e aumai moni ai se faauigaga manino o le aoao atu, aafiaga e tatau ona i ai i se potuaoga, ma aafiaga e tatau ai mo tagata aoao pe a, tatou faatasi. O se tulaga lautele lea i faiaoga e tofia, faiaoga Seminare ma le Inisitituti.

Ina ia lagolagoina la, ua amata le fauga o le mea ua ta’ua o se Potutusi o Punaoa Faaleaoaoga, a oo ina faitau e se faiaoga se faauigaga o se tomai, ona latou iloa lea e i ai se nofoaga e mafai ona i ai, e faataitai ma faamalamalama ai lena tomai, ma mafai ai ona latou maua se aoaoga i ai, se valaaulia e faataitai, ma faatino. Matou te faamoemoe lava e fesoasoani i o tatou faiaoga ia iloa se tomai e mananao e faaleleia, ma maua punaoa e faalelei ai. Faatasi ai, matou te mananao lava e sue auala e fua ai, pe o tatou faia mea ua faamoemoe e ausia? Pe ua tatou ausia lo tatou faamoemoega i olaga o talavou?

O loo matou tilotilo i ni auala lelei ma le ‘anoa mo se faiaoga e fua ma iloilo ai i latou lava, e faaleleia le ala e lagolagoina ai se faiaoga e se supavaisa e mafai ona alu atu ma fesoasoani ia latou tuputupu ae, atina’e ma lelei atili, ma fesili foi i tamaiti aoga i o latou aafiaga, ma mea tonu o tupu i o latou olaga. E faamoemoe foi o le a faia nei mea uma i le agaga o le faamalosiau, alualu i luma, ma le tuputupu ae, ma na o se avanoa tatou te faaaoga ai soo se punaoa o i ai ia avea ma faiaoga sili atu

Ua silafia uma ua tatou ola i taimi o lumanai ai le afio mai faalua o le Faaola, ma o na talavou e o mai i o tatou potuaoga, o nisi aupito sili ia ua i ai i le lalolagi. E ao foi ona tatou lelei, aua e lelei tele i latou. Ua na ona tatou mananao lava la ia lelei tele atu.

Brother Bigelow: E malie le otootoga a Adam, o le manatu, pe mafai ona tatou faamaninoina le mea ua tatou faamoemoe ia tupu? Pe mafai ona tatou aoao ia mafai ai ona ausia? Ona taua ai lea o lea fuafaatatau. Ua uma ona tatou talanoaina auala e taumafai ai e faaali lena fuafaatatau ona seti lea o ni sini e faavae i le mea o i ai, ma le mea e fia oo i ai.

Brother Webb: Te silafia, pe a tatou talanoa e uiga i le pulega o faatinoga po o le a lava, ma tatou faia lenei faaupuga faapolofesa, e manatu tagata, “Ia, o lea ou te aoao atu le talalelei, ma o le mea lena ou te popole ai.” Tou te alolofa uma i tou tamaiti aoga, ma mananao ia manuia. O le i ai la o se tasi i ou autafa e fesoasoani atu i lena alualu i luma, lena manao ia manuia tamaiti, ma avea o se atalafoia o mea o tutupu i le potuaoga, ma fesoasoani i lou manao e alualu i luma ma faamanuia tamaiti aoga—e le ona ua tou mananao uma ia avea ma faiaoga atoatoa, ae ona ua e manao e fai se aafiaga sili mo au tamaiti aoga.

Mafaufau la o se mea manaia tele lea, ma ou te manatu ua e vaai i ai—pe a e vaai i mea a oo mai, ma le tusitaulima, ma le Potutusi o Punaoa Faaleaoaoga, e oo lava i mea ua matou taua o fuafaatatau, e lelei nei mea uma ma aoga, o le a tou fiafia ai. O le faamoemoega lena, e sa’o?

Brother Smith: Ioe.

Brother Webb: Sa i ai la se mea sa e fia saunoa ai a o lei faaiuina?

Brother Bigelow: Te manatu o se mea e taua, o lenei. E tele ina tatou taulai i le aoao atu ma le faaleleia o le aoao atu, ae faagalogalo ai le vaega faaletaitai po o le vaega tau le taitaiga, o le avea o se puleaoga seminare po o se taitai faamaopoopo po o se faatonusili o se itulagi, se eria, po o le a lava le tulaga. Tatou te le o taumafai e faatuatuanai nei. O mea ua tatou tuu i vaimata, le manatu o le a tatou faia se pepa tusitusia o matafaioi e fesoasoani ai i se puleaoga ia iloa le mea ua faamoemoeina. A tatou talanoa la e uiga i le fuafaatatau, e le na o le fuafaatatau o le aoao atu, o le fuafaatatau foi o lau taitaiga. Ina ua tofia a’u e puleaoga i ni nai tausaga ua mavae, semanu ou te talia fiafia mea sa tatou talanoaina.

Ana mafai ona ou avatu i la’u au faigaluega, a’u faiaoga, le lagolago faaletaitai, faapea, “Fesoasoani mai ia ou iloa pe o faapefea la’u galue,” e faavae i se anavatau, “ma fesoasoani mai ia ou iloa le mea e mafai ona ou fai e faaleleia ai.” Ou te fia avea ma taitai aupito sili e mafai ona ou i ai, ma na pau le mea ou te faia ai o le pe a ou iloa le mea la ou te i ai, le mea e tatau ona ou i ai, ma le mea e mafai ona ou fai e oo ai iina. O mea uma la na tatou talanoaina, ua i ai i lena mafaufauga faavae o le a tatou fesoasoani i nisi mau talavou, talavou matutua ia maua ni aafiaga sili, e faatatau foi i la’u taitaiga.

Brother Webb: E taua le matau o nisi o nei fetuunaiga o le a vave ona tupu—i masina a sau—a o isi e umi se taimi.

Fa’afetai tele. A o lei faaiuina lenei vaega o le faasalalauga, ou te toe fia fai atu se mea e tasi i le lautele. E mafai ona tatou fatuina ni polokalama fou ma punaoa uma i le lalolagi, ae leai se mea e manuia vagana ua tatou lotogatasi, ma vagana ua tatou ogatasi ma le finagalo o le Tama Faalelagi. E manaomia ona tatou avatu le mea sili. O le a manaomia ai lo tatou tuu ia malo le Atua i o tatou olaga. O le a manaomia ai lo tatou naunau e talia ma tali fiafia atu i suiga. Ina ia maua le mana e suia ai olaga, e tatau ona tatou aoao ma molimau atu mai loto ua suia.

Ina tatou soofaatasia ia o tatou loto ia ua’i atoa atu i le galuega a Keriso. Ina tatou faalagolago atoa atu ia ia te Ia. A tatou faia, o le a mafai ona tatou fetuunai i soo se suiga e oo mai. O le a fesoasoani le Agaga Paia ia tatou vaai ma suia mea e tatau ona tatou suia i o tatou lava olaga ma i lo tatou aoao atu. Ma o le a tatou iloa e i tatou lava o lo tatou Atua o le Atua o vavega. I le suafa, o Iesu Keriso, amene.