Aoao Atu o Upumoni i le Gagana o le Alofa
S&I Faasalalauga o Aoaoga Faaletausaga 2021
Aso Lua, 19 Ianuari, 2021
Uso e ma tuagane, o se avanoa ofoofogia lenei e faalogo ma aoao mai ai! Ou te le iloa pe toafia outou o faatasi mai i lenei fonotaga, ae sei ou faailoa atu lava lo’u loto faafetai tele ia te outou taitoatasi pe tusa ma le 56,000 ua faaigoaina o faiaoga seminare ma inisitituti ma outou e silia ma le 2,200 o faiaoga o faafaigaluega e le OAE e faiaoga i lenei vaega taua tele—o le tupulaga faia’e! Faafetai i la outou tautua faapaiaina ma taumafaiga totoa, e toatele o tatou talavou ma talavou matutua pele ua filifili e faamaoni ma tumau i luga o le ala o feagaiga. O aoaoga faaleagaga ma aafiaga tou te tuuina atu e matuai taua tele e fauina ai a latou molimau. Ma ou te faailoa aloaia ma faamalo atu i ō outou toa e le o ta’ua lava: o taitoalua o nei faiaoga. A na le seanoa la outou lagolago faalelagona tumau, faaleagaga ma i le aiga, semanu e le manuia lenei taumafaiga. O lea la, avatu se faafetai tele lava ia te outou taitoatasi, mai le ta’ele, le ogatotonu, ma le tumutumu o lo’u loto!
I le amataga o se tausaga fou a’ia’i—lea ua tatou faamoemoe uma lava e aumaia se manava o le faamoemoe pe tau lava o se mapuea o le faamāmā avega mai le tausaga ua tuanai atu—o se mea lelei le faafou o le vaaiga i mea o tatou faia. Ioe, tatou te mananao uma lava ia tomai faapitoa i la tatou galuega, ae e sili i mea uma, ia tatou naunau e faia se eseesega lelei i olaga o a tatou tamaiti a’oga.
A o outou galulue ai ma le tupulaga faia’e, tou te mananao e fesoasoani ia outou tamaiti a’oga ia malamalama i lo latou faapogai paia, o latou faamoemoega i le olaga nei ma pe o ai e mafai ona avea ai i latou. O lou naunauga aupito loloto o le fesoasoani lea ia i latou ia tulai a’e i lo latou gafatia faalelagi. O le faamoemoega aloaia o Seminare ma Inisitituti e aofia ai le fesoasoani i tamaiti aoga e aoao e uiga ma faalagolago i aoaoga o le Togiola a Iesu Keriso ma ia saunia ai i latou mo sauniga o le perisitua o le malumalu ma le ola e faavavau. A o e galue e faataunuu na faamoemoega, ua e faaauupegaina i latou e faasagatau i “u fanafana mu a le fili”1 faapea ai foi le faamalolosia o i latou ia avea ma Tagata Paia faamaoni i Aso e Gata Ai, o ē e sagisagi atu i le afio mai o le Faaola. O loo e fesoasoani ia i latou e sauniuni mo a latou matafaioi i le lumanai i le aiga, Ekalesia, ma le nuu o ni taitai amiotonu ma faataitaiga o le lelei.
A ou mafaufau e uiga i autu e ono mafai ona fesoasoani i le asō, sa ou manatu e uiga i faamanuiaga maoae o le i ai o mataupu aoaoina a le seminare ua faaogatusa ma le Sau, Mulimuli Mai ia te A’u ma le malosiaga e mafai ona i ai mo le autalavou ma o latou aiga. Sa ou mafaufau i talavou matutua, o e o nonofo ese mai o latou aiga, ma le ala e mafai ai e se faiga e suesue ai le talalelei e “faatotonugalemu i le aiga” i le Inisitituti ona faatatau ia i latou. Ma sa ou mafaufau foi i auala e faatalafeagai ai aoaoga i le autalavou ma talavou matutua. I le mavae ai o ni mafaufauga, sa faia la’u faaiuga e faapea, o le sailia o au lava faaaliga ma le fefautuaai ma isi faiaoga, o le a mafai ai ona e maua ia tali e faataunuu ai na “pe faapefea ona fai.”
Nai lo lena, ou te fia taulai atu i ni nai mataupu faavae. O mataupu faavae ou te fia talanoaina o loo i ai i le vaega o le “O mea ou te moomoo maimau pe ana ou iloaina a o avea a’u o se faiaoga seminare.” O le galue ai o se faiaoga seminare i le vaveao mo le ono tausaga, o se avanoa matagofie ma o se faamanuiaga. O le uarota sa ou faiaoga ai, sa aofia ai se vaega tele o tamaiti aoga sa ō ni a’oga maualuga eseese se 10. Sa faataapeapeina i latou i nofoaga ae tuufaatasia i le faaaumea. Maimau pe ana mafai ona ou fai atu sa avea a’u ma faiaoga maoae, ae e mafai ona ou fai atu sa ou aoaoina ni nai mea i le aluga o na tausaga, ma ou te fia faasoaina atu na o ni mea se lua.
O le uluai mataupu faavae sa ou aoaoina o le avatu i tamaiti aoga “mea aano” faaleagaga. E manaomia e le autalavou ma talavou matutua i nei aso amuli le “mea aano” faaleagaga o le talalelei ina ia mafai ai ona tali atu i fesili faigata e tulai mai e fesoasoani ia i latou e tatalia uunaiga e ono tata’iese ai i latou mai le ala o feagaiga. E mafai ona latou taulimaina. Latou te manaomiaina! E tatau ona tatou faaalu se taimi e tatalo ma sauniuni ai—e le na o anomea o lesona, ae ia faaalu foi se taimi e iloa ai tamaiti aoga ina ia mafai ona tatou malamalama i mea latou te manaomia, ona iloa lea o le mea e faaaoga mai mea sa tatou saunia. E mafai ona tatou tali atu i le valaau: “Sa ou fia’ai, ma sa e aumai mea e ‘ai.”2 Sei ou faasoa atua ni nai faataitaiga.
Ina ua ou auai i le seminare o se talavou i le talafatai i sasae o le Iunaite Setete, sa salalau solo tagata o le uarota i se eria faalefanua tele naua. Sa na o le toalua isi tamaiti aoga i la’u aoga maualuga toatele, o ni tagata o le Ekalesia e ese mai o’u uso. Sa ogaoga tosinaga le lelei i tagata. O se taimi o mea faasoesa ma le fevaevaea’i, e aofia ai le femisaa’i e au ina faateleina le leaga ona o feteenaiga o tagata e pulea, o fouvalega taatele o le faailoga lanu, o taua i le isi itu o le kelope ma solotetee e faasaga i taua i lo matou nuu. O se ituaiga olaga o “fegalegaleaiga feusuai saoloto,” o le faaaoga saoloto o maruana ma fualaau faaleaga mafaufau na fatuina ai se siosiomaga na iloga ai le manatu faapito ma tosina ai le lafoa’ia o tulaga masani. O le tagatavaleina faapolotiki ma eseesega tele o manatu pe faapefea ona faagaoioia le malo na tavavaeeseina ai tagata i ni vaega faatautava a’ia’i o mafaufauga. Na i’u ina muta lea vaitau vevesi i se tulaga lelei ina ua tulaueleele le uluai tagata i le masina.3 Pe i ai se mea o nei mea e talitutusa ma le siosiomaga faaleagafesootai o loo feagai nei ma o tatou talavou ma talavou matutua i le taimi nei?
Ia te a’u lava ia, o le aoga maualuga na amata ai se taimi o le iloaina o mea fou ma le faiga o filifiliga i se lalolagi lautele atu nai lo lo’u fale ma le aiga. Sa ou vaai i le tele o filosofia faalelalolagi ma sa amata ai ona ou fesiligia le moni o mea uma sa aoaoina ai au e o’u matua faamaoni ma taitai o le Ekalesia i lo’u teineitiiti. O lo’u uluai faiaoga seminare o Sister Thomander, e lauulu sina, o se tamaitai e le faatauagavale i se mea faatasi ai ma se poto masani tele naua i le Ekalesia, ma se molimau loloto i le talalelei. Sa lu’iina i matou e faitau atoa le Tusi a Mamona i lena tausaga, ma ia o mai sauniuni i aso taitasi e talanoaina mea sa matou faitauina.
O aoaoga ‘anoa, ma le musuia a Sister Thomander o aoaoga faavae na aafia ai la’u molimau i se ala maoae tele. Sa ou iloa e aunoa ma se masalosalo sa ia iloa e moni le Ekalesia aua sa sau o ia ua matua’i saunia lelei e faamatala mai i ni ala manino ia fuaiupu matou te faitaua, ma sa ia molimau mai i na mea moni. Sa iloa lelei lona faaaluina o se taimi e tapenapena ai e faasoa mai mea sa ia lagona o le a sili ona aoga. Ou te le manatuaina ni taaloga po o ni pati po o ni mea faatupu fiafia, ae ou te manatua le lu’iina faaleagaga ma le siitia faaleagaga ma le fafagaina faaleagaga i aso taitasi. O lesona taitasi sa le o ni mea faapapa ma faaili, ae o aso uma o se faamautuūga ma le faamautinoaga a o ia tali mai ma le onosai ma le uunaiga o fesili mai le loto sa fesiligia e tamaiti aoga. O lana valaaulia i vaiaso tailua ma faamoemoega maualuga na faia ai se eseesega i lo’u olaga lea e le mafuatiaina. O Sister Thomander o se tasi ou te manao e vaai i ai ma faafetai atu i ai pe a ou oo atu i le isi itu o le veli.
Ou te faatusaina le eseesega o lena tausaga i le tasi ina ua ou i ai i le vasega matutua atu. O le faiaoga seminare sa malie ma agalelei, ae e fia iloa, sa laitiiti lava se sootaga moni na ou lagonaina. Na mavae atu vaiaso a o ia aoao maia anomea i se ala faasamasamanoa. Sa manino le le faatauaina o ia e tamaiti aoga: sa fai valivaliga atigilima a teine matutua a o nonofo i le laina pito i tua ae o la e fai tala malie tama o le tasi ma le isi, a o le isi vaega uma o i matou sa fepasia’i a matou fasipepa tusitusia e faafiafia ai i matou lava. E ui ina sa matou mautinoa sa i ai sana molimau i le talalelei aua o ia o se faifeautalai ua maea le misiona, sa matou aoaoina e aua nei faia ni fesili faaleaoaoga faavae aua e tele ina fai faafia ana tali pe le manino foi, ma sa matou lei mautinoa foi pe mafai ona ia taliina. E taua tele le faamoemoega faaleagafesootai o le seminare ae sa le o se aafiaga faaleagaga.
Ua outou masani i le fesili a Paulo i le 1 Korinito: “Aua foi a faaletonu le leo o le pu, o ai ea se na te sauni e tau?”4 I le avea ai o ni faiaoga o le talalelei i tupulaga faia’e, e tatau ona tatou “iliina se pu patino.” I taimi o le Feagaiga Tuai, o le pu o se sofara, o se seu o se povi po’a, lea e i ai se leo faigofie, e le mafa’aseseina. Sa faaaoga e valaau ai le nuu o le Alii e faapotopoto mo tapuaiga, e lapata’ia ai tulaga lamatia ua oo mai, ma avatu ai faatonuga faailoilo i le taimi o taua. I taua anamua, o le leo ma le vāvāō o taua e afua ai le fememea’i. Afai e le mafai ona fesootai manino mai le taitai i vaegaau, ona feagai lea o le autau ma le toilalo mautinoa. O le mea lea, sa amata ai ona faaaoga se “pu patino”. Sa aoao faapitoa ia fitafita uma ia iloa le leo, e oo lava la i taimi o le fememea’i, o le a iloa lava e tagata taitoatasi pe agai i luma pe faatali, e osofaia le itu tauagavale po o le taumatau.5
O Sister Thomander o le pu lena mo a’u. E tatau ona avea i tatou ma lena pu, lena leo faatuatuaina o le mautinoa o upumoni faavavau i le feagai ai ma tulaga faatauaina televave ma ua suia o le lalolagi. E tatou ona tatou ta’u i a tatou tamaiti aoga le mea moni ma fesoasoani ia latou malamalama i le pe aisea e faapei foi o le po o le a. E mafai ona tatou faia lena mea “i le malu ma le agamalu,”6 ae e tatau lava ona tatou faia. E pei ona faaupuina e se tasi faiaoga seminare, “Tatou te le soona ilia le pu i se taliga o se tasi, ae tatou te le taina foi ma le tau le lagona lana savali; ae, e ao ona malie le valaau ma mautinoa ma patino le leo.”7 O le aoao atu o a’u lava vasega seminare, sa ou aoaoina ai e moni lava, e fiafia le autalavou i aoaoga malie e aoao ai, ma e manaomia fegalegaleaiga faaleagafesootai ma a latou paaga, ae e naunau foi i tali moni i fesili i le talalelei ma manatu faatino i le ala e faatatau ai mataupu faavae o le talalelei i o latou lava olaga.
O le mataupu faavae lona lua sa ou iloa e tatau ai o le faafesootai lea i le amanaia moni E faapefea ona tatou fesootai ma a tatou tamaiti aoga i ni auala e talafeagai ma anoa? O le gagana e mautinoa lava e faia ai se eseesega. Mo se faataitaiga, afai ou te taumafai e tautala faaKuesi i tamaiti aoao e na o le Takaloka e malamalama ai, o le a le manuia le savali o loo avatu. Ma le agaga faafetai, e lua ni gagana faavaomalo e malamalama ai talavou ma talavou matutua uma: o le gagana a le Agaga ma le gagana o le alofa.
O le gagana muamua, a le Agaga, e iloa e i latou uma e sailia le upumoni. E pei ona aoao mai Elder Joseph B. Wirthlin: “E leai ni papupuni o gagana i le Ekalesia. O loo i ai se mana uiga ese e i talaatu o le mana o savali e tuuina atu i upu lava ia, ma o le mana lea o savali e faafesootai mai e le Agaga i o tatou loto. … , po o le a lava le gagana po o le gagana faapitoa. O se avefeau faavaomalo i loto uma ua e ua’i atu.”8
E fesootai mai le Agaga i le loto i le loto. E pei ona faamanatu mai e Paulo, “O loo molimau mai lea lava Agaga i o tatou agaga, o fanau i tatou a le Atua.”9 A o tatou saili mo, faalogo i, ma mulimuli i uunaiga a le Agaga Paia, o le a tatou maua musumusuga e uiga i auala e tautala atu ai i a tatou tamaiti a’oga e ala i le Agaga i se tulaga latou te malamalama ai. O le saunia lelei, ma faaaoga ia anomea o lesona ua mamanuina, e tusitala musuia o mataupu aoaoina, e fesoasoani lea tatou te tumau mausali ai i aoaoga faavae faigofie, lea ua tatou iloa o i ai le mana sili e suia ai loto ma olaga. O le mea e sili ona taua o le saili lea mo faaaliga patino e uiga i le po o le a le mea e faasoa atu ma le pe faapefea ona faasoa atu mea ua e saunia. O le gagana a le Agaga o le a faamatalaina mea e sili atu nai lo mea e mafai ona e ta’u atua.
O le isi gagana o le a fesoasoani e te fesootai ai i tamaiti aoga, o le gagana o le alofa. Alofa, talu ai o se faapogai faalelagi foi, e tautala foi mai le loto i le loto. Na faasoa mai e Ioane le Aposetolo, se molimau na vaaitino i le Faaola, lenei upumoni faigofie: “Tatou te alolofa ia te ia, aua na ia muai alofa mai ia te i tatou.”10 E moni foi lena mea i sootaga a le tagata-i-le-tagata. Ua outou faalogo i le faaupuga faapea “e le mafai ona ano atu tagata i le tele o lou iloa seia vagana ua latou iloa le tele o lou ano atu.”11 I le avea ai ma faiaoga, o lo tatou aafiaga umi o le a tosina sa’o e ala i lo tatou alofa faa-Keriso mo a tatou tamaiti aoga.
Atonu ua outou masani ma le manatu faavae o “gagana o le alofa.”12 O auala nei e faaali atu ai le alofa lea o le a malamalama i ai ma taliaina e isi, e faalagolago i o latou uiga patino a le tosinaga o o latou aafiaga ua mavae. E ono tali mai tagata eseese ma le saunia lelei e se ituaiga se tasi o le gagana o le alofa nai lo se isi, ae o le a iloa e tamaiti aoga uma lou ano moni atu i se tasi o auala e tolu o le a ou faasoa atu i le aso.
O se tasi ituaiga o le gagana o le alofa o upu o le faamautinoaga. O fasifuaitau nei e faamalosiau ai ma siitia e pei o le “E mafai ona e faia” po o le “Ua e lelei moni lava” po o le “Ou te mitamita lava ia te oe i lou galue malosi.” O upu nei e ta’u atu ai i se tamaitiiti aoga e taua o ia ma e na te gafatiaina. O le faamautinoaga mu’amu’a a le Faaola ia Siaosi Mila, o loo tusia i le Mataupu Faavae ma Feagaiga, o se faataitaiga matagofie tele lea o lea ituaiga o gagana o le alofa. O le faamatalaina o ia o se alii “e aunoa ma le faa’ole’ole,” na faaauau le fetalaiga a Iesu Keriso e uiga ia te ia e faapea “e mafai ona faalagolagoina o ia ona o le faamaoni o lona loto; ma ona o le alofa ua ia te ia i laʼu molimau, o Aʼu, o le Alii, ua alofa ia te ia.”13 O le toatele o i tatou e le manatuaina lenei igoa o se tagata muai liliu mai, ae e mafai ona ou mafaufau o na upu faamautinoa atonu na faamalosia ai le molimau a Siaosi i le talalelei toefuataiina faapea foi lona alofa mo lona Faaola.
O nisi o upu sili ona mamana o le “faafetai” ma isi faailoaga o le talisapaia. I le avea ai o se faiaoga mataumea ma le alofa i le autalavou po o talavou matutua, e mafai ona e matauina mea faatauvaa e faia e se tamaitiiti aoga mo oe pe mo isi i le vasega, pe faalogo foi mo mea lelei e te faalogoina e uiga ia i latou o faia i le aoga po o le nuu, ma faaali atu i ai lou agaga talisapaia. O le auina atu o se faaupuga tusia i matua o se tamaitiiti aoga e uiga i se mea lelei na e matauina i a latou talavou, e faateleina ai foi lagona o le tamaitiiti aoga i le ausiaina o mea ma lona lava taua. O nei ituaiga uma o faamatalaga faamautinoa e fausia ma faamalolosia ai sootaga, e faateleina ai lagona o le amanaia moni i le va o le faiaoga ma le tamaitiiti aoga, e taunuu ai i le faalauteleina o le tosinaga a le Agaga i o latou olaga.
O se isi gagana o le alofa o faatinoga o le auauna atu. O le saunia i anomea faaleagaga e siitia ai ma faamalamalamaina ai i aso taitasi, o se faatinoga maoae lea o le auauna atu ma le alofa! O a outou meaalofa o taimi ma taumafaiga atonu e le aloaiaina pea e le autalavou i aso taitasi, ae e mavae aso, o le a faateleina lo latou nofouta faaleagaga ma “o le a latou faaamuia ia te [oe],”14 e pei ona ou faia i la’u Sister Thomander.
Se’i ou faamatala atu le ala na faaalia ai e ni faiaoga se toalua lo la alolofa e ala i faatinoga o le auauna atu. O se tasi faiaoga seminare i Zimbabwe na valaauina ae lei pine ae tulai mai le faama’i oti i le lalolagi atoa. Sa sagisagi fiafia tamaiti aoga e feiloai a o lei amataina aoga i aso taitasi, ma sa faatoa amata ona masani i taimi faatulagaina ae le toe faatagaina loa i latou e faapotopoto faaletino. Sa feagai le faiaoga ma se faaletonu tele: o le tele o tamaiti aoga sa leai ni initoneti i le fale, o lea sa le mafai ai ona faia se vasega i luga o le initoneti. O lea, ina ia mautinoa e maua i aso taitasi e ana tamaiti aoga ia meaai faaleagaga, sa amata ona ia fatuina ia lesona faatasi ai ma mau, o fesili ‘anoa, o ata ma ‘anofaamatalaga ma vitio na ia auina atu ia i latou i aso taitasi i le WhatsApp, o se faatulagaga faaleagafesootai ua i ai mo ana tamaiti aoga. O loo “fafagaina [ana tamaiti aoga] i le afioga lelei a le Atua”15 i lenei taimi vavamamao faaleagafesootai.16 Latou te aloaia ma talisapaia nei faatinoga o le auauna atu o se faailoaga o lona alofa. Latou te tali atu ma uunaiga faaleagaga o lo latou lava sagisagi fiafia atu ia latou inumaga i aso taitasi o le taitaiga faaleagaga ma le siitiaga e faavae i mau.
O se faiaoga i Nouei e i ai se lu’itau faafeagai. O ana vasega e na o le initoneti ona e nonofo vavamamao ana tamaiti aoga i le atunuu. Ae pe o fea lava e malaga i ai o ia i le lalolagi pe o le a foi le taimi i le mea o i ai o ia, e saunia lava o ia e aoao atu na tamaiti aoga i le seminare i vaveao ma le alofa ma le naunau moni. E ui i le vavamamao faalefaafanua i le va o ia ma i latou—ma e seasea ona vaaitino—na te iloa lava se mea e uiga i uiga ma naunauga o i latou taitoatasi. Pe vaai o ia i o latou foliga i le mea pueata pe leai, na te faafeiloa’ia lava i latou ma fesili atu mo o latou manatu. Na te saunia se nofoaga mafanafana o le malupuipuiga lea mafai ai e tamaiti aoga ona faia fesii e aunoa ma le fefe i lagona faapea e le agavaa. Na te avatu ia te i latou taumafataga ‘oa o meaai faaleagaga, e faamae’a i avanoa faisoo e faalogo ai i lana molimau i mataupu faavae o le talalelei ma na te valaaulia i latou e faasoa mai o latou lava mea faaleagaga na aoaoina.17 E faapei o outou, e tautatala nei faiaoga i le gagana o le alofa e ala ia latou faatinoga o le auauna atu tuuto.
O le toe gagana o le alofa o le a ou tautala i ai o le tuuina atu lea o se taimi ‘au’aumama. O le faia o le taimi o le vasega ia taua i le mea e te mafaia—taulai atu i aafiaga faaleagaga—o se meaalofa lea e tumau pea ona foai atu. Nai lo le faaaluina o le taimi i taaloga ma e na ona fegalegaleai ai, pe faaaogaina se taimi tele mo tapenaga e fatufatu ai se tufaaga lavelave e ono galo i le fola pe a tuua tamaiti aoga, o lou faamoemoega e taulai i ai i le faagauai mai o tamaiti aoga i le aoaoina o le ala e iloa ai le Agaga ma faatatau le talalelei i o latou olaga, o le a aupito sili lona taui. A o e tali atu i fesili i ni tali ‘anoa, e tumu i manatu, e ta’u atu e au taumafaiga le alofa i se ala e le mafaaseseina. O le faatauaina o sao o tamaiti aoga—faalogologo ma le faaaloalo i o latou manatu faaalia ma fesili ma tali atu ma se manatu mautu—e fesoasoani i tamaiti aoga e iloa ai e te amanaia o latou atugaluga ma manaoga nai lo le taulai atu i le tolaulauina o anommea e tatau ona e faamaeaina i lena aso. O le naunau faasēsē ese mai le tali atu i lena fesili e le talafeagai pe toe fai atu foi lena tali faigofie i se ala e ese, seia iu ina malamalama i le manatu faavae, e ta’u atu ai lona manao moni i lo latou alualu i luma patino faaleagaga—i se isi faaupuga, e ta’u atu ai lou alofa faa-Keriso.
I se isi itu, o le avea ai ma faiaoga seminare, o se tasi o faamanuiaga silisili mo a’u o le mafai lea ona suesue ma aoao atili e uiga i le talalelei mai anomea silisili e saunia e le Ofisa o Aoga a le Ekalesia. Peitai, o le si’ui o lena suesue o le saunia atoatoa lea e avatu i tamaiti aoga mea latou te manaomia, ae le o le mafai ona faalauteleina ma le fiafia o mea na ou maua e au lava ia. Ua faamanuiaina outou ma o le a faamanuiaina pea i lo outou avanoa e aoao mai ai ma aoao atu le talalelei i le seminare ma le inisitituti, ae o le a sili atu ona faamanuiaina au tamaiti aoga e ala i lou taulai i lo latou aoaoina nai lo oe lava.
Mai se tasi faiaoga seminare i le vaveao ia te outou uma, ou te malamalama i faigata o le fetuunai o manaoga o le aiga, galuega, po o matafaioi faalenuu. Ou te malamalama i luitau o le maua o se taimi ia lava e sauniuni ai—ma le maua o se taimi ia lava e moe ai—ma isi mea uma i luga o lau ipu. Ou te molimau atu o le a fesoasoani atu le Alii ia te oe pe a e ole atu, saili, ma tu’itu’i atu. A e tatalo, suesue ma faatino ia uunaiga e te maua, o le a mafai ona e avatu i au tamaiti aoga pele le mea aano o le talalelei—le tausiga faaleagaga latou te manaomia ia avea ai o ni taitai, tamā ma tina latou te mananao ma e tatau ona avea ai i latou i nei aso amuli. O le a mafai ona outou ta’u atu le moni e ala i le gagana a le Agaga ma le gagana o le alofa. O le a mafai ona outou fesootai atu ma le manatu alofa moni, e faapupula atu ai le alofa o le Tama Faalelagi ma Iesu Keriso mo i latou, e ala i upu faamautinoa, faatinoga o le auauna atu ma le taimi ‘au’aumama e te faaaluina e faalogologo atu ai ma tali a latou fesili sailiili.
Ia faaauau pea ona outou aoao atu upumoni ma avatu le alofa i auala e fausia ai a latou molimau o le talalelei a Iesu Keriso i le tupulaga faia’e. Ia outou saili e saunia i latou e faataunuu lo latou gafatia faalelagi a o latou faapotopotoina Isaraelu i nei aso amuli o la’u tatalo pulunaunau lea ma le valaaulia i le suafa, o Iesu Keriso, amene.