Kaahib’ li maatan q’axtesinb’ileb’ aawe xb’aan li Jesukristo
Ex was wiitz’in raarookex inb’aan, jwal sa xq’ehil li Ralankil! Jwal nawulak chiqu li raatinul li b’ich “Chalqex, paabʼanel”1 ut chi anchal qach’ool naqanima ru a’an: Jesus li Kristo—li xnimal ru k’uula’al re Belen—“li xnimal ru Jehova re li Najter Chaq’rab’ ut li Mesias re li Ak’ Chaq’rab’.”2
Sa’ li ewu a’in, chiqak’oxla sa’ komonil eb’ li osob’tesink li neke’chal qik’in naq taqak’oxla lix yu’am, lix mision, lix tzol’leb’, ut lix tojb’al rix li maak kixb’aanu li Jesukristo. Nekexinb’oq, jo’ kixb’aanu li rey aj Benjamin reheb’ laj santil paab’anel sa’ xkutankil, naq “chekʼoxla li osobʼtesiik ut li sahoʼk chʼoolej wankebʼ wiʼ li nekeʼpaabʼank rehebʼ lix taqlahom li Dios .” Li osob’tesiik a’an wan choq’ qe laa’o arin ut anajwan, a’b’an tiqb’il sa’ xb’een wan li osob’tesiik li toj taachalq re “sahil chʼoolejil li maajoʼqʼe naʼosoʼ.”3 Yeeb’il chi saqen ru, eb’ laj taaqenel re li Jesukristo neke’osob’tesiik chixk’ulb’al li sahil ch’oolejil k’a’jo’ xnimal ru ut li maajoq’e’ na’oso’.
Xjultiko’ we a’in junjunq kutan chaq naq xinnaw ru jun anjel, xLydia xk’ab’a’. Moko tiqto ta li anjel a’in sa’ saqi t’ikr, ut moko ch’a’aj ta rula’aninkil xb’aan naq xwulak sa’ lin oficina. Kab’laju chihab’ xyu’am li xLydia. Xyehe’ we naq wan jun xyajel li yoo chixrahob’tesinkil li rulul.4 Li xnaq’ ru chanchan xnaq’ ruheb’ li anjel ut lix kawilal xch’ool naxq’ax ru xchihab’. Naq xoo’aatinak chirix lix yu’am ut li tixk’ul chalel, tuqtu xwan. Naq xinpatz’ re ma wan junaq xpatz’om, a’an xsume sa’ junpaat, “Chan ru li choxa?” chan. Xoo’ok chi aatinak chirix li rajb’al li yu’am ut eb’ li osob’tesink q’axtesinb’ileb’ xb’aan li qaChoxahil Yuwa’ ut lix Raarookil Alal reheb’ li neke’oxloq’in reheb’ ut li neke’taaqen reheb’.
Jwal natoch’e’ inch’ool xb’aan lix paab’aal li xLydia ut lix junkab’al! Us ta k’a’jo’ xnimal lix ch’a’ajkilal sa’ li ruchich’och’ a’in, nujenaq li xLydia rik’in paab’aal. Wan jun xjunelikil ilok. A’an naxnaw naq li Qaawa’ naxra ut tixch’olani. Lix junkab’al nujenaqeb’ ajwi’ rik’in li tuqtuukilal ut kawil ch’oolej li ka’ajwi’ naru chi uxmank rik’in li paab’aal chirix li Qaawa’.
Li rajom xch’ool li xLydia, a’an xnawb’al ru li Awa’b’ej re lix Iglees li Qaawa’, a’b’an li rajom xch’ool jwal cham chiru yal jun numsihom arin sa’ ruchich’och’. Li rajom xch’ool jwal cham, a’an naq taawanq rik’in lix junkab’al chi junelik sa’ li choxahil awa’b’ejihom. Naraj ajwi’ wank rik’in li qaChoxahil Yuwa’ ut li Jesus chi junelik.
Relik chi yaal, li rajom qach’ool nokoree’aksi chi kaw, ink’a’ ka’ajwi’ arin ut anajwan a’ut sa’ ajwi’ li junelik q’e kutan. K’oxlahomaq lix aajelil ru li aatin a’in kixye laj Alma: “[Li Qaawa’] nak’ehok reheb’ li winq jo’ chanru li rajomeb’.”5
Aajel ru li rajom qach’ool sa’ xq’ehil li sihok a’in, naq yooko chixk’oxlankil li rajomeb’ li neke’qara. Chiru li q’ehil a’in, nekexinb’oq chixk’oxlankil li rajom eech’ool laa’ex. K’a’ru li rajom aach’ool jwal cham? K’a’ru taawaj xnumsinkil ut xb’aanunkil sa’ li yu’am a’in? Ma taawaj chi yaal wulak jo’ chanchan li Jesukristo? Ma taawaj chi yaal wank rik’in laa Choxahil Yuwa’ ut laa junkab’al chi junelik q’e kutan ut wank jo’ chanru a’an?
Wi jo’kan, taawaj raj xk’ulb’al naab’aleb’ li maatan q’axtesinb’ileb’ xb’aan li Qaawa’ re aatenq’ankil laa’at ut re intenq’ankil laa’in chiru xq’ehil li qayu’am sa’ ruchich’och’. Chiqatz’il rix kaahib’ reheb’ li maatan kixk’e li Jesus re chixjunileb’ li wankeb’ xch’ool chixk’ulb’aleb’.6
Xb’een, a’an kixk’e aawe laa’at ut we laa’in li qawankilal maak’a’ roso’jik re rahok. A’an ajwi’ li wankilal re xraab’al li ani ch’a’aj xraab’al jo’ ajwi’ li ani ink’a’ nakatxra anajwan a’b’an narahob’tesink aawe.7
Rik’in lix tenq’ankil li Qaawa’, naru taqatzol rahok jo’ kirahok a’an. Maare taaraj naq taajale’q qach’ool—relik chi yaal naq tento taaq’unob’resiiq qach’ool—naq li Kolonel yoo chixk’utb’al chiqu chan ru rilb’al qib’ chiqib’il qib’ chi yaal. Ex was wiitz’in raarookex inb’aan, naru took’anjelaq jo’ naraj li Qaawa’ naq naqak’ulub’a lix maatan re rahok.
Tz’aama chiru li Qaawa’ naq tatxtenq’a chixraab’aleb’ li ani naraj a’an naq taara, jo’eb’ ajwi’ li ch’a’aj xraab’aleb’. Maare taawaj raj xpatz’b’al re li Dios naq eb’ lix anjel te’b’eeq aawochb’een b’ar toj maji’ nakawaj b’eek.8
Li xkab’ maatan naxq’axtesi aawe li Kolonel a’an li wankilal re kuyuk maak. Sa’ xk’ab’a’ lix tojb’al rix li maak maak’a’ roso’jik xb’aan, naru taakuy xmaakeb’ li ani xe’rahob’tesink aawe ut maajun sut xe’xk’ulub’a li rahob’tesink xe’xb’aanu aawe.
Ink’a’ mas ch’a’aj xkuyb’al xmaak li ani naxpatz’ chi maak’a’ xb’alaq’ ut chi tuulan xch’ool naq taakuy lix maak. A’ut li Kolonel tixk’e aawe li wankilal re xkuyb’al xmaak yalaq ani li xrahob’tesink aawe chi yalaq chan ru. Toja’ naq eb’ lix rahil b’aanuhom ink’a’ chik naru te’xmo’ob’resi laa waam.
Lix rox maatan li Kolonel a’an li jalb’a-k’a’uxlej. Moko natawman ta ru chi us li maatan a’in chi kok’ aj xsa’. Jo’ nakanaw, li Ak’ Chaq’rab’ kitz’iib’aak xb’een wa sa’ li aatinob’aal Griego. Sa’eb’ li raqal b’ar wi’ li Kolonel naxtaqlaheb’ li tenamit chixjalb’aleb’ xk’a’uxl, li aatin li jaltesinb’il ru jo’ “jalok k’a’uxleja’an li aatin metanoeo sa’ Griego.9 Nim xwankil li aatin a’an sa’ Griego. Li xb’een jachal re li aatin a’an, meta, naraj naxye “jalok.” Na’oksiman ajwi’ sa’ kaxlan aatin. Qayehaq, li aatin metamorfosis naraj naxye “jalok chan ru naq wan k’a’ruhaq.” Li jachal aatin noeowan rilom rik’in jun aatin sa’ Griego li naraj naxye “ulul.”10 Wan ajwi’ rilom rik’in junjunq chik aatin sa’ Griego li neke’raj xyeeb’al “nawom,”11 “musiq’ej,”12 ut “musiq’ak.”13
Ma naru too’ok chirilb’al lix nimal ut lix chamal li yoo chixk’eeb’al qe li Qaawa’ naq naxq’axtesi qe li maatan re xjalb’al qak’a’uxl? A’an nokoxb’oq chixjalb’al qak’a’uxl, li qanawom, ut li qamusiq’, jo’ ajwi’ chan ru nokomusiq’ak. Qayehaq, naq naqajal qak’a’uxl, nokomusiq’ak rik’in b’antioxihom choq’ re li Dios, li nokoxk’e chi musiq’ak wulaj wulaj.14 Ut naqaj roksinkil li musiq’ak a’an re k’anjelak chiru a’an ut chiruheb’ li ralal xk’ajol. Li jalb’a-k’a’uxlej a’an jun chaq’al ru maatan. Ink’a’ raj taqaxuwa xb’aanunkil. A’an jun maatan taqak’ul raj chi sa qach’ool ut taqoksi raj—taqak’ul b’an chi anchal qach’ool—wulaj wulaj naq naqasik’ wulak jo’ chanru li qaKolonel.
Lix yuwa’ li rey aj Lamoni kiril sa’ junpaat li te’xk’ul li ani neke’xpaab’ li Kristo ut neke’xtaaqe. A’an kixye naq tixq’axtesi chixjunileb’ lix maak re xnawb’al ru li Qaawa’.15 Li tz’aqal jalb’a-k’a’uxlej moko nab’aanuman ta sa’ jun sut. Rajlal ut junelik yoo chi oksimank. Q’axal aajel ru re xik chi uub’ej ut re xk’ulb’al li tuqtuukilal sa’ k’a’uxlej, li k’ojob’aak sa’ ch’oolej, ut li sahil ch’oolejil.
Li xkaa maatan re li qaKolonel a’an jun yeechi’ihom—jun yeechi’ihom re li yu’am maak’a roso’jik. Ink’a’ yal naraj naxye naq q’axal najt wi’chik li yu’am. Chixjunileb’ te’wanq xyu’am chi junelik chirix li kamk, maak’a’ naxye li awa’b’ejihom malaj loq’al neke’ok wi’. Chixjunileb’ te’wakliiq chi yo’yo ut ink’a’ chik te’kamq. A’b’an li yu’am maak’a’ roso’jik a’an ink’a’ ka’ajwi’ wan rilom rik’in xnumik li hoonal. Li yu’am chi junelik a’an li chaab’il yu’am li wan re li qaChoxahil Yuwa’ ut lix Raarookil Alal. Naq li Yuwa’b’ej naxyeechi’i qe li junelik yu’am, chanchan naq yoo chixyeeb’al: “Wi taasik’ ru xtaaqenkil li Walal—wi wan li rajom aach’ool chi wulak chi yaal jo’ chanru a’an—jo’kan naq sa’ junaq kutan tatwanq jo’ wanko laa’o ut tat’awa’b’ejinq sa’xb’eeneb’ li ruchich’och’ ut li awa’b’ejihom jo’ naqab’aanu laa’o.”
Eb’ li kaahib’ chi maatan a’in te’xk’am chaq qe li sahil ch’oolejil chi numtajenaq naq naqak’uleb’. Wankeb’ li maatan a’an xb’aan naq li Jehova kixk’ulub’a chalk sa’ ruchich’och’ jo’ li k’uula’al Jesus. A’an kik’iresiik xb’aan jun choxahil Yuwa’b’ej ut jun ruchich’och’il na’b’ej. Kiyo’la sa’ li tenamit Belen sa’ tuulanil. Ilb’il chi rub’elaj lix santil yo’lajik xb’aaneb’ li profeet chalen chaq xkutankil laj Adan. Li Jesukristo a’an li xnimal ru maatan re li Dios—li maatan naxk’e li Yuwa’b’ej reheb’ chixjunil li ralal xk’ajol.16 A’an li yo’lajik li naqaninq’ehi chi sa qach’ool rajlal Ralankil.
Chi jayalinb’il li qak’a’uxl ut li qeek’ahom rik’in laj Kolol re li ruchich’och’, k’a’ru li tento taqab’aanu laa’o re xk’ulb’aleb’ li maatan a’in li q’axtesinb’ileb’ qe xb’aan li Jesukristo? Chan ru naru toorahoq jo’ narahok a’an, tookuyuq maak jo’ nakuyuk maak a’an, taqajal qak’a’uxl re wulak jo’ chanru a’an, ut sa’ roso’jik toowanq rik’in a’an ut rik’in li qaChoxahil Yuwa’?
Li tento taqab’aanu, a’an xk’uulankil ut xpaab’ankil loq’laj sumwank. Laa’o naqasik’ ru yu’amink ut b’eek sa’ lix b’e li Qaawa’ re li sumwank ut kanaak aran. Moko ch’a’aj ta li b’e a’an. A’an li b’e re xtawb’al li tz’aqal sahil ch’oolejil sa’ li yu’am a’in ut sa’ li yu’am maak’a’ roso’jik.
Ex was wiitz’in raarookex inb’aan, li rajom inch’ool jwal nim, a’an naq chixjunileb’ li ralal xk’ajol li qaChoxahil Yuwa’ te’wanq xhoonal re rab’inkil lix evangelio li Jesukristo ut re xpaab’ankil lix k’utum ut naq te’ch’utub’aaq laj Israel jo’ yeechi’inb’il naq taak’ulmanq sa’ roso’jikeb’ li kutan a’in. Ut nintz’aama naq taqapaab’ ut taqak’ul lix rahom li Kolonel choq’ re li junjunq qe. Lix rahom tz’aqal re ru ut maak’a’ roso’jik kireek’asi chixtojb’al rix laa maak laa’ut ut lin maak laa’in. A’an lix maatan—lix tojb’al rix li maak—naxk’e chi uxmank naq taaruuq taqak’ul li xkomoneb’ chik lix maatan.
Sa’ junaq kutan chalel—sa’ li Mil Chihab’ li yooko chixkawresinkil qib’ re ok wi’—“li junjunq xb’een aqej taab’asmanq ut li junjunq ru’uj aq’ej tixch’olob’ xyaalal”17 naq Jesus a’an li Kristo. Ut ink’a’ ka’ajwi’ yooq chixb’ichankil “Aleluya” li Coro Tabernaculo re li Manzana re li Templo.18 Chixjunileb’ li xe’xsik’ ru xtaaqenkil li Jesukristo te’xb’icha ut te’xjap re chixyeeb’al: “Aleluya! Li Qaawa’, li qaNimajwal Dios x’ok chi awa’b’ejink.”19 “Ak xk’ulunk lix awa’b’ejihom li Qaawa’: li qaDios ut lix Kristo te’taqlanq sa’ xb’een li ruchich’och’,”20 “Awa’b’ej sa’ xb’eeneb’ li awa’b’ej ut Qaawa’ sa’ xb’eeneb’ li qaawa’.”21
Ninch’olob’ xyaalal naq yo’yo li Dios. Li Jesus a’an li Kristo—li Mesias. A’an a’in lix Iglees, li naxb’eresi rik’ineb’ lix profeet. Chi tuulan qach’ool, naqab’oq li rosob’tesihom a’an sa’ eeb’een chejunjunqalex, jo’ li rajom eech’ool ut li wankilal re xk’ulb’al chixjunileb’ li maatan naxq’axtesi li Kolonel eere, sa’ xk’ab’a’ li Jesukristo, amen.