2:3

ຂອງປະທານສີ່ຢ່າງທີ່ພຣະເຢຊູຄຣິດສະເໜີມອບໃຫ້ທ່ານ

ໂດຍ ປະທານຣະໂຊ ເອັມ ແນວສັນ

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເທດສະການນີ້ ຊ່າງເປັນສິ່ງທີ່ລ້ຳຄ່າແທ້ໆ! ເຮົາມັກທຳນອງເພງ “ຂໍເຊີນທ່ານຜູ້ຊື່ສັດ”¹ ແລະ ກະຕືລືລົ້ນ ທີ່ຈະມາເຄົາລົບພຣະອົງ: ພຣະເຢຊູຄຣິດ—ພຣະກຸມມານນ້ອຍອົງນັ້ນແຫ່ງເບັດເລເຮັມ—“ພຣະເຢໂຮວາທີ່ຍິ່ງໃຫຍ່ຂອງພຣະຄຳພີເດີມ [ແລະ] ພຣະເມຊີອາຂອງພຣະຄຳພີໃໝ່.”²

ຄ່ຳຄືນນີ້ ຂໍໃຫ້ເຮົາຈົ່ງພິຈາລະນານຳກັນ ກ່ຽວກັບພອນທີ່ມາສູ່ເຮົາ ເມື່ອເຮົາເອົາໃຈໃສ່ຕໍ່ພຣະຊົນຊີບ, ພາລະກິດ, ຄຳສອນ, ແລະ ການຊົດໃຊ້ຂອງອົງພຣະເຢຊູຄຣິດເຈົ້າ. ຂ້າພະເຈົ້າຂໍເຊື້ອເຊີນທ່ານ, ດັ່ງທີ່ກະສັດເບັນຢາມິນ ໄດ້ເຮັດເພື່ອໄພ່ພົນໃນວັນເວລາຂອງເພິ່ນ, ໃຫ້ “ພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ.” ພອນນັ້ນແມ່ນສຳລັບເຮົາໃນເວລານີ້, ແຕ່ຕື່ມໃສ່ກັບມັນ ໃນທີ່ສຸດຈະເປັນຄຳສັນຍາ, ເຖິງ “ຄວາມສຸກທີ່ບໍ່ມີວັນສິ້ນສຸດ.”³ ໂດຍພຽງກ່າວວ່າ, ຜູ້ຕິດຕາມທີ່ແທ້ຈິງຂອງພຣະເຢຊູຄຣິດ ມີສິດທິພິເສດ ທີ່ຈະປະສົບກັບຄວາມສຸກຕະຫລອດການ ຢ່າງທີ່ບອກບໍ່ໄດ້.

ສອງສາມວັນຜ່ານມານີ້ ຂ້າພະເຈົ້າໄດ້ຖືກເຕືອນກ່ຽວກັບສິ່ງນີ້ ຕອນຂ້າພະເຈົ້າໄດ້ພົບເຫັນທູດອົງໜຶ່ງຊື່ ລີເດຍ. ທູດອົງນີ້ບໍ່ໄດ້ນຸ່ງຊຸດຂາວ, ແລະ ນາງໄດ້ເຮັດໃຫ້ການພົບປະຂອງພວກເຮົາງ່າຍຂຶ້ນ ໂດຍການມາຫາຂ້າພະເຈົ້າຢູ່ຫ້ອງການ. ນາງລີເດຍ ມີອາຍຸໄດ້ 12 ປີ. ນາງເປັນໂຣກມະເລັງຊະນິດທີ່ຮ້າຍແຮງ ແລະ ໜ້ອຍຄົນເປັນ ຢູ່ໃນສະໝອງ.⁴ ນາງມີໃບໜ້າຂອງທູດ ແລະ ວາງຕົວຮຽບຮ້ອຍເກີນອາຍຸຂອງນາງ. ຂະນະທີ່ພວກເຮົາເວົ້າລົມກັນກ່ຽວກັບຊີວິດຂອງນາງ ແລະ ສິ່ງທີ່ຈະເກີດຂຶ້ນໃນອະນາຄົດ, ນາງບໍ່ສະທ້ານຢ້ານກົວ ແລະ ມີຄວາມສະຫງົບໃນຈິດໃຈ. ເມື່ອຂ້າພະເຈົ້າຖາມວ່າ ນາງມີຄຳຖາມຫຍັງບໍ່, ນາງເວົ້າຂຶ້ນທັນທີວ່າ, “ສະຫວັນເປັນຈັ່ງໃດ?” ສິ່ງນັ້ນໄດ້ເລີ່ມຕົ້ນການສົນທະນາແບບເປີດໃຈ ກ່ຽວກັບຈຸດປະສົງຂອງຊີວິດ ແລະ ພອນທີ່ພຣະບິດາເທິງສະຫວັນ ແລະ ພຣະບຸດທີ່ຮັກຂອງພຣະອົງ ໄດ້ສະເໜີມອບໃຫ້ແກ່ຜູ້ທີ່ໃຫ້ກຽດ ແລະ ຕິດຕາມພວກພຣະອົງ.

ຂ້າພະເຈົ້າປະທັບໃຈຫລາຍກັບສັດທາຂອງນາງລີເດຍ ແລະ ຄອບຄົວຂອງນາງ! ເຖິງແມ່ນເຂົາເຈົ້າກຳລັງປະເຊີນກັບການທ້າທາຍອັນໃຫຍ່ຫລວງ ກ່ຽວກັບຊີວິດຢູ່ໃນໂລກນີ້, ແຕ່ນາງລີເດຍຍັງເຕັມໄປດ້ວຍສັດທາ. ນາງມີທັດສະນະນິລັນດອນ. ນາງຮູ້ວ່າພຣະຜູ້ເປັນເຈົ້າຮັກນາງ ແລະ ຈະດູແລນາງ. ຄອບຄົວທີ່ອຸທິດຕົນຂອງນາງ ກໍເຕັມໄປດ້ວຍຄວາມສະຫງົບ ແລະ ທ່າທາງແບບມີຄວາມສະຫງົບໃນຈິດໃຈ ຊຶ່ງພຽງແຕ່ການມີສັດທາໃນພຣະຜູ້ເປັນເຈົ້າເທົ່ານັ້ນ ທີ່ສາມາດນຳມາໃຫ້.

ຄວາມຫວັງຂອງນາງລີເດຍ ແມ່ນຢາກພົບປະທານຂອງສາດສະໜາຈັກຂອງພຣະຜູ້ເປັນເຈົ້າ, ແຕ່ ຄວາມປາດຖະໜາ ຂອງນາງແມ່ນເກີນກວ່າປະສົບການພຽງແຕ່ເທື່ອດຽວ ຢູ່ໃນຊ່ວງມະຕະນີ້. ຄວາມປາດຖະໜາຢ່າງເລິກຊຶ້ງຂອງນາງ ຄືການຢາກຢູ່ກັບຄອບຄົວຂອງນາງຕະຫລອດໄປ ໃນອານາຈັກຊັ້ນສູງ. ສິ່ງນັ້ນແມ່ນຮ່ວມທັງຄວາມປາດຖະໜາທີ່ຈະໄດ້ຢູ່ກັບພຣະບິດາເທິງສະຫວັນ ແລະ ພຣະເຢຊູຄຣິດເລື້ອຍໄປ.

ຕາມຈິງແລ້ວ, ຄວາມປາດຖະໜາຂອງເຮົາມີອິດທິພົນຕໍ່ເຮົາແຕ່ລະຄົນ ໃນວິທີທາງທີ່ເລິກຊຶ້ງ, ບໍ່ພຽງແຕ່ຢູ່ໃນໂລກນີ້ ແລະ ໃນເວລານີ້ເທົ່ານັ້ນ ແຕ່ຫລັງຈາກຊີວິດນີ້ນຳອີກ. ໃຫ້ເຮົາມາພິຈາລະນາຄວາມສຳຄັນຂອງຖ້ອຍຄຳຈາກແອວມາ ທີ່ວ່າ: “[ພຣະຜູ້ເປັນເຈົ້າ] ປະທານໃຫ້ມະນຸດ ຕາມຄວາມປາດຖະໜາຂອງເຂົາ.”⁵

ຄວາມປາດຖະໜາແມ່ນສຳຄັນໃນເທດສະການແຫ່ງການມອບໃຫ້ນີ້, ເມື່ອເຮົາເອົາໃຈໃສ່ຕໍ່ຄວາມປາດຖະໜາຂອງຄົນທີ່ເຮົາຮັກໂດຍສະເພາະ. ລະຫວ່າງເທດສະການນີ້, ຂ້າພະເຈົ້າຂໍເຊື້ອເຊີນທ່ານໃຫ້ພິຈາລະນາກ່ຽວກັບຄວາມປາດຖະໜາຂອງຕົວເອງ. ທ່ານປາດຖະໜາສິ່ງໃດຫລາຍທີ່ສຸດ? ທ່ານຢາກມີປະສົບການກັບສິ່ງໃດ ແລະ ບັນລຸຄວາມສຳເລັດໃນສິ່ງໃດຫລາຍທີ່ສຸດ ໃນຊີວິດນີ້? ທ່ານຢາກກາຍເປັນເໝືອນດັ່ງພຣະເຢຊູຄຣິດຫລາຍຂຶ້ນເລື້ອຍໆບໍ? ທ່ານຢາກອາໄສຢູ່ກັບພຣະບິດາເທິງສະຫວັນ ແລະ ກັບຄອບຄົວຂອງທ່ານຕະຫລອດໄປບໍ ແລະ ດຳລົງຊີວິດເໝືອນດັ່ງພຣະອົງ?

ຖ້າທ່ານຢາກ, ທ່ານຈະຕ້ອງຮັບເອົາຂອງປະທານຫລາຍຢ່າງ ທີ່ພຣະຜູ້ເປັນເຈົ້າສະເໜີມອບໃຫ້ ເພື່ອຊ່ວຍທ່ານ ແລະ ຂ້າພະເຈົ້າ ລະຫວ່າງທີ່ເຮົາມີຊີວິດຢູ່ໃນຊ່ວງມະຕະນີ້. ໃຫ້ເຮົາເອົາໃຈໃສ່ຕໍ່ຂອງປະທານ ສີ່ ຢ່າງ ທີ່ພຣະຜູ້ເປັນເຈົ້າ ໄດ້ມອບໃຫ້ທຸກຄົນ ຜູ້ທີ່ເຕັມໃຈທີ່ຈະ ຮັບເອົາ ຂອງປະທານເຫລົ່ານີ້.⁶

ຢ່າງທີໜຶ່ງ, ພຣະອົງໄດ້ມອບຄວາມສາມາດຢ່າງບໍ່ມີຂອບເຂດ ທີ່ຈະຮັກ ໃຫ້ທ່ານ ແລະ ຂ້າພະເຈົ້າ. ສິ່ງນີ້ແມ່ນຮ່ວມທັງຄວາມສາມາດທີ່ຈະຮັກຜູ້ທີ່ບໍ່ເປັນຕາຮັກ ແລະ ຜູ້ທີ່ບໍ່ພຽງແຕ່ ບໍ່ ຮັກທ່ານເທົ່ານັ້ນ ແຕ່ຍັງຂົ່ມເຫັງທ່ານ ແລະ ໃຊ້ທ່ານໃນເວລານີ້ ນຳອີກ.⁷

ດ້ວຍຄວາມຊ່ວຍເຫລືອຂອງພຣະຜູ້ຊ່ວຍໃຫ້ລອດ, ເຮົາສາມາດຮຽນທີ່ຈະຮັກ ດັ່ງທີ່ພຣະອົງໄດ້ຮັກ. ມັນອາດຮຽກຮ້ອງເຮົາໃຫ້ປ່ຽນໃຈ—ແນ່ນອນທີ່ສຸດຄື ໃຫ້ໃຈອ່ອນລົງ—ດັ່ງທີ່ເຮົາໄດ້ຖືກສິດສອນໂດຍພຣະຜູ້ຊ່ວຍໃຫ້ລອດ ເຖິງວິທີດູແລກັນແລະກັນ ແທ້ໆ. ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາສາມາດປະຕິບັດສາດສະໜາກິດແທ້ໆ ໃນວິທີທາງຂອງພຣະຜູ້ເປັນເຈົ້າ ເມື່ອເຮົາຮັບເອົາຂອງປະທານແຫ່ງຄວາມຮັກຂອງພຣະອົງ.

ໃຫ້ທູນຂໍຄວາມຊ່ວຍເຫລືອຈາກພຣະຜູ້ເປັນເຈົ້າ ເພື່ອຈະໄດ້ຮັກຄົນທີ່ພຣະອົງຕ້ອງການໃຫ້ທ່ານຮັກ, ຮ່ວມທັງຜູ້ທີ່ຮູ້ສຶກວ່າຮັກໄດ້ຍາກ. ທ່ານອາດຕ້ອງໄດ້ທູນຂໍໃຫ້ພຣະເຈົ້າ ສົ່ງທູດສະຫວັນຂອງພຣະອົງລົງມາເດີນໄປກັບທ່ານ ໃນບ່ອນທີ່ທ່ານບໍ່ຢາກເດີນໄປ.⁸

ຂອງປະທານຢ່າງທີສອງ ທີ່ພຣະຜູ້ຊ່ວຍໃຫ້ລອດສະເໝີມອບໃຫ້ ແມ່ນຄວາມສາມາດ ທີ່ຈະໃຫ້ອະໄພ. ຜ່ານທາງການຊົດໃຊ້ອັນເປັນນິດຂອງພຣະອົງ, ທ່ານສາມາດໃຫ້ອະໄພຄົນທີ່ໄດ້ເຮັດໃຫ້ທ່ານເຈັບປວດ ແລະ ຄົນທີ່ບໍ່ເຄີຍຮັບເອົາຄວາມຮັບຜິດຊອບສຳລັບຄວາມຮ້າຍກາດທີ່ເຂົາໄດ້ເຮັດກັບທ່ານ.

ມັນເປັນສິ່ງງ່າຍທີ່ຈະໃຫ້ອະໄພແກ່ຄົນທີ່ສະແຫວງຫາການໃຫ້ອະໄພຈາກທ່ານດ້ວຍຄວາມຈິງໃຈ ແລະ ດ້ວຍຄວາມຖ່ອມຕົວ. ແຕ່ພຣະຜູ້ຊ່ວຍໃຫ້ລອດຈະປະທານຄວາມສາມາດໃຫ້ທ່ານ ເພື່ອໃຫ້ອະໄພຄົນທີ່ໄດ້ເຮັດຜິດຕໍ່ທ່ານ ບໍ່ວ່າຈະເປັນໃນຮູບແບບໃດກໍຕາມ. ແລ້ວການກະທຳອັນເຈັບປວດຂອງເຂົາ ຈະບໍ່ລົບກວນຈິດວິນຍານຂອງທ່ານອີກຕໍ່ໄປ.

ຂອງປະທານຢ່າງທີສາມ ຈາກພຣະຜູ້ຊ່ວຍໃຫ້ລອດແມ່ນ ການກັບໃຈ. ຂອງປະທານຢ່າງນີ້ ບໍ່ແມ່ນຈະເຂົ້າໃຈໄດ້ຄັກສະເໝີໄປ. ດັ່ງທີ່ທ່ານຮູ້, ສະບັບຕົ້ນຂອງພຣະຄຳພີໃໝ່ແມ່ນເປັນພາສາກຣີກ. ໃນວັກທີ່ພຣະຜູ້ຊ່ວຍໃຫ້ລອດຂໍໃຫ້ຜູ້ຄົນກັບໃຈ, ຄຳທີ່ຖືກແປອອກມາເປັນຄຳວ່າ “ກັບໃຈ” ໃນພາສາກຣີກ ແມ່ນ metanoeo.⁹ ນີ້ແມ່ນຄຳກິລິຍາທີ່ມີພະລັງ ໃນພາສາກຣີກ. ຄຳຕື່ມໜ້າ meta ໝາຍເຖິງ “ການປ່ຽນແປງ.” ເຮົາກໍໃຊ້ຄຳຕື່ມໜ້າຄຳນີ້ ໃນພາສາອັງກິດຄືກັນ. ຍົກຕົວຢ່າງ, ຄຳວ່າ metamorphosis ໝາຍເຖິງ “ການປ່ຽນແປງໃນທຸກຮູບແບບ.” ສ່ວນທີ່ຕໍ່ທ້າຍຄຳເຊັ່ນ noeo ເຂົ້າໃຈວ່າ ຄຳນີ້ໃນພາສາກຣີກ ໝາຍເຖິງ “ຈິດໃຈ.”¹⁰ ມັນກໍຍັງກ່ຽວພັນກັບສັບອື່ນໃນພາສາກຣີກນຳອີກ ທີ່ໝາຍເຖິງ “ຄວາມຮູ້,”¹¹ “ວິນຍານ,”¹² ແລະ “ລົມຫາຍໃຈ.”¹³

ເຮົາສາມາດເລີ່ມຕົ້ນເຫັນເຖິງຄວາມກວ້າງຂວາງ ແລະ ຄວາມເລິກ ຂອງສິ່ງທີ່ພຣະຜູ້ເປັນເຈົ້າໄດ້ມອບໃຫ້ເຮົາແລ້ວບໍ ເມື່ອພຣະອົງສະເໜີມອບຂອງປະທານໃຫ້ກັບໃຈ ແກ່ເຮົາ? ພຣະອົງເຊື້ອເຊີນເຮົາໃຫ້ປ່ຽນແປງຈິດໃຈ, ຄວາມຮູ້, ວິນຍານຂອງເຮົາ, ແມ່ນແຕ່ການຫາຍໃຈຂອງເຮົາ. ຍົກຕົວຢ່າງ, ເມື່ອເຮົາກັບໃຈ, ເຮົາຈະຫາຍໃຈດ້ວຍຄວາມກະຕັນຍູຕໍ່ພຣະເຈົ້າ, ຜູ້ໃຫ້ເຮົາຢືມລົມຫາຍໃຈໄປແຕ່ລະວັນ.¹⁴ ແລະ ເຮົາປາດຖະໜາທີ່ຈະໃຊ້ລົມຫາຍໃຈນັ້ນ ໃນການຮັບໃຊ້ພຣະອົງ ແລະ ລູກໆຂອງພຣະອົງ. ການກັບໃຈເປັນຂອງປະທານທີ່ສະຫງ່າງາມ. ມັນເປັນຂັ້ນຕອນທີ່ບໍ່ຄວນຢ້ານກົວ. ມັນເປັນຂອງປະທານສຳລັບເຮົາທີ່ຈະຮັບເອົາດ້ວຍຄວາມຊື່ນຊົມ ແລະ ໃຊ້ມັນ—ແມ່ນແຕ່ຮັບເອົາມັນ—ທຸກໆວັນ ຂະນະທີ່ເຮົາສະແຫວງຫາທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນ.

ບິດາຂອງກະສັດລາໂມໄນ ໄດ້ເຫັນໜ້ອຍໜຶ່ງກ່ຽວກັບສິ່ງທີ່ຈະເກີດຂຶ້ນໃນອະນາຄົດ ສຳລັບຜູ້ທີ່ເຊື່ອໃນພຣະຄຣິດ ແລະ ຕິດຕາມພຣະອົງ. ເພິ່ນໄດ້ປະກາດວ່າ ເພິ່ນຈະເຊົາເຮັດບາບ ທັງໝົດ ເພື່ອຈະໄດ້ຮັບສິດທິພິເສດ ໃນການຮູ້ຈັກພຣະຜູ້ເປັນເຈົ້າ.¹⁵ ການກັບໃຈທີ່ແທ້ຈິງ ບໍ່ແມ່ນວາລະໂອກາດ. ມັນເປັນສິດທິພິເສດ ທີ່ບໍ່ໝົດເປັນຈັກເທື່ອ. ມັນເປັນ ພື້ນຖານ ທີ່ພາໄປສູ່ຄວາມກ້າວໜ້າ ແລະ ການມີຄວາມສະຫງົບໃນຈິດໃຈ, ການປອບໂຍນ, ແລະ ຄວາມຊື່ນຊົມ.

ຂອງປະທານຢ່າງທີສີ່ ຈາກພຣະຜູ້ຊ່ວຍໃຫ້ລອດ ແມ່ນຄຳສັນຍາຢ່າງແທ້ຈິງ—ຄຳສັນຍາຂອງການມີ ຊີວິດອັນເປັນນິດ. ສິ່ງນີ້ບໍ່ໄດ້ໝາຍຄວາມວ່າ ເປັນພຽງການມີຊີວິດຢ່າງດົນນານເທົ່ານັ້ນ. ທຸກຄົນຈະມີຊີວິດຕະຫລອດໄປຫລັງຈາກຄວາມຕາຍ, ບໍ່ວ່າເຂົາເຈົ້າຈະອາໄສຢູ່ໃນອານາຈັກ ຫລື ໃນລັດສະໝີພາບໃດກໍຕາມ ທີ່ເຂົາເຈົ້າເໝາະສົມທີ່ຈະໄດ້ຢູ່. ທຸກຄົນຈະຟື້ນຄືນຊີວິດ ແລະ ປະສົບກັບ ຄວາມເປັນອະມະຕະ. ແຕ່ຊີວິດນິລັນດອນ ແມ່ນເກີນກວ່າເວລາທີ່ຖືກກຳນົດໄວ້. ຊີວິດນິລັນດອນຄືການມີຊີວິດແບບທີ່ພຣະບິດາເທິງສະຫວັນ ແລະ ພຣະບຸດຂອງພຣະອົງມີ. ເມື່ອພຣະບິດາສະເໜີມອບຊີວິດອັນເປັນນິດໃຫ້ເຮົາ, ພຣະອົງໄດ້ກ່າວໃນທາງນີ້ວ່າ, “ຖ້າຫາກເຈົ້າເລືອກທີ່ຈະຕິດຕາມພຣະບຸດຂອງເຮົາ—ຖ້າຫາກເຈົ້າ ປາດຖະໜາ ຢ່າງ ແທ້ຈິງ ທີ່ຈະກາຍເປັນເໝືອນດັ່ງພຣະບຸດຂອງເຮົາ—ແລ້ວ ເມື່ອເຖິງເວລາ ເຈົ້າຈະມີຊີວິດ ດັ່ງທີ່ພວກເຮົາມີ ແລະ ອາໄສຢູ່ໃນໂລກ ແລະ ອານາຈັກ ດັ່ງທີ່ພວກເຮົາອາໄສຢູ່.”

ຂອງປະທານພິເສດສີ່ຢ່າງເຫລົ່ານີ້ ຈະນຳຄວາມຊື່ນຊົມມາໃຫ້ເຮົາຫລາຍຂຶ້ນເລື້ອຍໆ ເມື່ອເຮົາຮັບເອົາພວກພຣະອົງ. ຂອງປະທານເຫລົ່ານີ້ຖືກເຮັດໃຫ້ເປັນໄປໄດ້ ເພາະພຣະເຢໂຮວາໄດ້ຍິນຍອມລົງມາສູ່ໂລກ ເປັນກຸມມານນ້ອຍເຢຊູ. ພຣະອົງມີພຣະບິດາທີ່ເປັນອະມະຕະ ແລະ ມີມານດາທີ່ເປັນມະຕະ. ພຣະອົງໄດ້ກຳເນີດຢູ່ໃນເມືອງເບັດເລເຮັມ ໃນສະພາບແວດລ້ອມທີ່ຕ່ຳຕ້ອຍທີ່ສຸດ. ມັນເປັນການກຳເນີດທີ່ສັກສິດ ຊຶ່ງໄດ້ຖືກທຳນາຍໄວ້ແລ້ວລ່ວງໜ້າ ໂດຍບັນດາສາດສະດາ ນັບຕັ້ງແຕ່ວັນເວລາຂອງອາດາມເປັນຕົ້ນມາ. ພຣະເຢຊູຄຣິດຄືພຣະເຈົ້າຂອງ ຂອງປະທານທີ່ເໜືອກວ່າສິ່ງອື່ນໃດ—ເປັນຂອງປະທານທີ່ພຣະບິດາໄດ້ມອບໃຫ້ແກ່ລູກໆຂອງພຣະອົງທຸກຄົນ.¹⁶ ການກຳເນີດນັ້ນເປັນການສະເຫລີມສະຫລອງດ້ວຍຄວາມຊື່ນຊົມ ໃນທຸກເທດສະການຂອງບຸນຄຣິດສະມັດ.

ດ້ວຍຄວາມຄິດ ແລະ ຄວາມຮູ້ສຶກທີ່ເຮົາເອົາໃຈໃສ່ຕໍ່ພຣະຜູ້ຊ່ວຍໃຫ້ລອດຂອງໂລກ, ແລ້ວ ເຮົາ ຕ້ອງເຮັດສິ່ງໃດ ຈຶ່ງຈະໄດ້ຮັບຂອງປະທານເຫລົ່ານີ້ ທີ່ສະເໜີມອບໃຫ້ເຮົາດ້ວຍຄວາມເຕັມພຣະໄທຈາກພຣະເຢຊູຄຣິດ? ແມ່ນຫຍັງຄືສິ່ງສຳຄັນໃນການທີ່ຈະຮັກດັ່ງທີ່ພຣະອົງຮັກ, ໃຫ້ອະໄພດັ່ງທີ່ພຣະອົງໃຫ້ອະໄພ, ກັບໃຈເພື່ອຈະໄດ້ກາຍເປັນເໝືອນດັ່ງພຣະອົງຫລາຍຂຶ້ນ, ແລະ ໃນທີ່ສຸດ ໄດ້ຢູ່ກັບພຣະອົງ ແລະ ພຣະບິດາເທິງສະຫວັນຂອງເຮົາ?

ສິ່ງສຳຄັນແມ່ນການເຮັດ ແລະ ຮັກສາພັນທະສັນຍາທີ່ສັກສິດ. ເຮົາ ເລືອກ ທີ່ຈະດຳລົງຊີວິດ ແລະ ກ້າວໜ້າຕາມເສັ້ນທາງແຫ່ງພັນທະສັນຍາຂອງພຣະຜູ້ເປັນເຈົ້າ ແລະ ຢູ່ໃນນັ້ນ. ມັນບໍ່ໄດ້ເປັນວິທີທີ່ຫຍຸ້ງຍາກ. ມັນເປັນວິທີທາງ ດຽວ ທີ່ພາໄປສູ່ຄວາມສຸກໃນຊີວິດນີ້ ແລະ ຊີວິດນິລັນດອນ ຫລັງຈາກຊີວິດນີ້.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄວາມປາດຖະໜາຢ່າງເລິກຊຶ້ງຂອງຂ້າພະເຈົ້າແມ່ນຢາກໃຫ້ລູກໆຂອງພຣະບິດາເທິງສະຫວັນທຸກຄົນ ມີໂອກາດໄດ້ຍິນພຣະກິດຕິຄຸນຂອງພຣະເຢຊູຄຣິດ ແລະ ເຊື່ອຟັງຕາມຄຳສອນຂອງພຣະອົງ ແລະ ຢາກໃຫ້ອິດສະຣາເອນຖືກເຕົ້າໂຮມ ດັ່ງທີ່ສັນຍາໄວ້ ໃນຍຸກສຸດທ້າຍນີ້. ແລະ ຂ້າພະເຈົ້າປາດຖະໜາວ່າ ເຮົາຈະເຊື່ອ ແລະ ຮັບເອົາຄວາມຮັກທີ່ພຣະຜູ້ຊ່ວຍໃຫ້ລອດມີໄວ້ໃຫ້ເຮົາແຕ່ລະຄົນ. ຄວາມຮັກອັນເປັນນິດ ແລະ ດີພ້ອມຂອງພຣະອົງ ໄດ້ເຮັດໃຫ້ພຣະອົງຊົດໃຊ້ແທນທ່ານ ແລະ ຂ້າພະເຈົ້າ. ຂອງປະທານນັ້ນ—ການຊົດໃຊ້ຂອງພຣະອົງ—ໄດ້ອະນຸຍາດໃຫ້ຂອງປະທານຢ່າງອື່ນໆຂອງພຣະອົງ ກາຍເປັນຂອງເຮົາໄດ້.

ໃນວັນເວລາທີ່ຈະມາເຖິງ—ໃນຊ່ວງໄລຍະໜຶ່ງພັນປີ ຊຶ່ງຕອນນີ້ເຮົາກຳລັງກະກຽມຢູ່—“ທຸກຫົວເຂົ່າຈະຄຸລົງ, ແລະ ທຸກລີ້ນຈະສາລະພາບ”¹⁷ ວ່າພຣະເຢຊູຄືພຣະຄຣິດ. ແລະ ບໍ່ພຽງແຕ່ກຸ່ມນັກຮ້ອງ ແທໂບແນໂກ ທີ່ຍອດຍ້ຽມນີ້ເທົ່ານັ້ນ ທີ່ຈະຮ້ອງວ່າ “ຮາເລລູຢາ.”¹⁸ ທຸກຄົນຜູ້ໄດ້ເລືອກທີ່ຈະຕິດຕາມພຣະເຢຊູຄຣິດ ຈະໂຮຮ້ອງວ່າ: “ຮາເລລູຢາ: ເພາະວ່າພຣະຜູ້ເປັນເຈົ້າ ພຣະເຈົ້າຂອງພວກເຮົາ ຜູ້ຊົງລິດທານຸພາບອົງສູງສຸດ ໄດ້ຂຶ້ນສະເຫວີຍລາດແລ້ວ.”¹⁹ “ອານາຈັກໂລກນີ້ ເປັນກຳມະສິດຂອງພຣະຜູ້ເປັນເຈົ້າຂອງພວກເຮົາ ແລະ ຂອງພຣະຄຣິດຂອງພຣະອົງ, ແລະ ພຣະອົງຈະປົກຄອງຕະຫລອດຊົ່ວນິລັນດອນ,”²⁰ “ຈອມກະສັດ, ແລະ ຈອມເຈົ້ານາຍ.”²¹

ຂ້າພະເຈົ້າເປັນພະຍານວ່າ ພຣະເຈົ້າຊົງພຣະຊົນຢູ່! ພຣະເຢຊູຄືພຣະຄຣິດ—ພຣະເມຊີອາ. ນີ້ແມ່ນສາດສະໜາຈັກຂອງພຣະອົງ, ຊຶ່ງພຣະອົງຊີ້ນຳ ຜ່ານທາງບັນດາສາດສະດາຂອງພຣະອົງ. ດ້ວຍຄວາມຖ່ອມຕົວ, ພວກເຮົາຂໍມອບພອນຂອງພຣະອົງໃຫ້ແກ່ທ່ານແຕ່ລະຄົນ, ຮ່ວມທັງຄວາມປາດຖະໜາ ແລະ ຄວາມສາມາດ ທີ່ຈະຮັບເອົາຂອງປະທານ ທີ່ພຣະຜູ້ຊ່ວຍໃຫ້ລອດສະເໜີມອບໃຫ້ທ່ານ, ໃນພຣະນາມຂອງພຣະເຢຊູຄຣິດ, ອາແມນ.