Pe regalo perfecto
Peteĩ año, mbohapy ára rupi Navida mboyve, Che ména, Rob, imitãrõguare, ojuhu mokõi iñermana tuichavévape ikotypekuérape, oipe’a ñemi hína mokõi irregalokuéra de Navidad. Omaña rire hyepýpe, iñermanakuéra omoĩ jey hyrúpe irregalokuéra, Rob hermana he’i chupe: “Neremombe’úirõ mamáme, rohechaukáta ndéve mba’éichapa rejapova’erã”.
Ipahápe ha’e oñeme’ẽ tentación-pe, especialmente oĩhaguére pe árbol guýpe peteĩ paquete tuicháva peteĩ pelota de basquetbol-pe ojoguáva orekóva héra.
Upevére, Ogueraha ñemi aja ikotýpe, o’extraña chupe pe regalo ivevýi extraño. Oipe’a mbeguekatu ha otopa nandiha; ha katu oĩ peteĩ nota. Pe nota he’ í,“Aikuaa rejapóva hína. Ani rembyai ne Navida. Rohayhu. Mamá” Ha’e o’aprende ilección, ha upe ára ha’e ipaha opesquisaha umi regalo de Navidad rehe.
Pejesareko umi mandu’a rehe, umi escena porãite, umi mba’epu angelical ha tyakuã ñanderesarai’ỹva oúva ñane akãme ñapensarõ Navida rehe. Ikyrỹive jepe ha’e umi mandu’a heta ñande jagueraháva ñane korasõme ñane mitã guive, pe Navida marangatúgui: ñande Salvador nacimiento celebración. Umi temiandu marangatu araka’eve ndoje’íri ñandehegui.
Ñañandu jey jajepy’amongetávo upe pesebre’imi Belén pegua rehe, oñekumplihaguépe heta profesia oñeme’ẽva’ekue siglo rupive, peteĩ pyharegua arapy guýpe henyhẽva mbyjakuéragui: ñande Salvador ha Redentor oúva’ekue ko mundo-pe Rey de Reyes ramo ha Señor de señores.
Py’ỹi ñahendu Navida ha’eha mitãme ĝuarã, ha katu ¿ndaha’éi piko opavave ñande mitã avei ñande pype? Peteĩ ára, peteĩ sy ha imembykuña nueve año orekóva, hembiapo hikuái ojoguávo navidarã. Oho aja hikuái pya’e sección joyería rupi peteĩ tienda-pe, pe imembykuña ohecha peteĩ pancarta tuicha osaingóva vitrina-re. Tuicha letra pytãme he’i :“Pe regalo araka’eve ndoparáiva ome’ẽ”
Pe mitãkuña omoñe’ẽ pe letrero, opensa sapy’ami ha upéi opukavy. Orgullosamente he’i isýpe: “Mamá, che aikuaa mba’épa upe regalo araka’eve ndoparáiva ome’ẽ.”
“Oh, ¿Mba’épa upéva?, oporandu isy oguata pya’e aja multitud apytépe.
Pe mitãkuña he’i inocentemente: “ ¡Ha’e Jesús¡”
Isy ombohovái, jejavýpe: “Nahániri, cariño. Ha’e diamante-kuéra”
Isaias ñanemomandu’a:“…Ha peteĩ mitã opastoreata chupekuéra.”1
Aipurúvo peteĩ motor ojeheka haĝua internet-pe, ajuhu miles umi artículo oñe’anunciáva upe frase reheve “Pe regalo araka’eve ndoparáiva ome’ẽ.” Upevére, ñañeha’ãrõ jepe, ni peteĩ regalo material ñame’ẽkuaáva oduráta tápiate ĝuarã.
Ha katu, pehejami takomparti penendive peteĩ che recuerdo kyrỹi Navida rehegua mokõi persona , chéve ĝuarã, araka’eve ndoparáiva ome’ẽ. Ha’ekuéra ha’e che ru ha che sy, Aldo ha Eleanor Harmon.
Upe año ho’ákuri heta nieve ore tava’ípe, ha katu upéva ndojokói che rupe ogueraha haĝua ore familia-pe oheka haĝua pe árbol de Navidad perfecto. Oĩ rire ógape upe yvyramáta, ha ojepytasóvo peteĩ base-pe, oñemoĩ hakã rehe, mborayhu reheve, umi luces, adornos ha guirnaldas. Ore róga mirĩ oĩmakuri oficialmente listo omoñepyrũ haĝua Navida.
Umi catálogo juguete rehegua oguahẽ correo rupi, ha che ha che hermanokuéra rombohasa kyre’ỹ ipaginakuéra, roipotávo umi tesoro navideño. Pan de jengibre ha pastel de fruta ryakuã omyanyhẽ ore róga, ha diciembre ohasa mbeguekatu pe calendario rupi. Roheja umi sorpresa ore vecino rokẽme ha roñeha’ã rome’ẽ servicio umi familia oikotevẽva michĩmi alegría navideña-gui.
Cada pyhare, añeno rire, che sy ohasa hetaiterei tiempo oñembotývo ikotýpe. Imákina omboyvy haĝua ryapu mante ikatúva ahendu. Ha’e ningo omboyvy jepi heta ore aokuéra, upévare nohenóiri che atención.
Ha katu Navida oĝuahẽvo , che sy ikane’oiterei. Ára Navida mboyve ha’e ohasa tupápe, hasykatúvo. Doctor he’ívo che rúpe ha’e opytava’erã tupápe jepe mokõi semana rupi, che ajepy’apy, ha katu avei añedesilusiona. ¿Mba’éicha piko Navida okontinuáta mama’ỹre? ¿Mba’éicha jepe ikatúta oñeñandu Navidáicha? Ha avei, ¿máva piko ococináta pe cena de navidad?
Che ru oñangareko aja che sy rehe mborayhu reheve, oñeme’ẽ en cuenta pe cena de Navidad jejapo ho’aha hi’ári. ¡Ajepy’apy jey! Ha’érõ jepe ha’e peteĩ kuimba’e iñarandúva ha ikatupyrýva, ñecocina ndaha’éi peteĩ mba’e ha’e ojapokuaa porãva.
Noche Buena chejuhu añesũvo ajerurévo che sy tokuéra milagrosamente ha Navida ko’ẽ taha’e tapiaitéicha: ore familia ijatývo pe árbol de Navidad jerére. Tuicha pe desilusión oúva oréve rohechávo upe Navida ko’ẽme ore sy rohayhuetéva hasykatuete gueteri, tupápe. Ro’abrívo ore regalokuéra, añesorprende ajuhúvo che regalo especial ha’eha peteĩ colección muñeca ao ojejapóva a mano, che sy omboyvyva’ekue tarde peve opa umi diciembre pyharekue. Naha’arõkuaái añani haĝua hendápe ha añañua atã haĝua chupe. Mba’eichaitépa ha’e ojesakrifika cherehe.
Che ru ahayhuetéva oñeha’ã opáicha ikatumíva Navida ára oñeñandu haĝua normal upe año-pe, normal ikatuháicha mama’ỹre. Ha ha’e ohupyty. Rosena rire, che ru oke silla ári chimenea ykére che añembosarai aja che hermanokuéra ndive ha che muñeca ha ijao pyahu reheve. Che sy ahayhuetéva oñemoĩ porã opytu’u heta rire, ha opa mba’e oĩ porã jey. Che rekovépe, che sy ha che ru ha’e chéve ĝuarã peteĩ regalo araka’eve ndoparáiva ome’ẽ.
Ñakonsidera sapy’ami upe frase. ¿Ndaha’emo’ãi piko peteĩ regalo perfecto upe araka’eve ndoparáiva ome’ẽ? Peteĩha, peteĩ regalo perfecto ohechaukáne peteĩ mba’e upe ome’ẽvagui pe regalo. Mokõiha, ohechaukáne peteĩ mba’e pe orrecivíva upe regalo rekotevẽ rehe. Ha ipahápe, pe regalo, ha’erõ añetehápe perfecto, omantenéta ivalor, ndaha’ei tiempo ohasávonte ha katu tapiaite ĝuarã.
¿Nokumpliri piko ñande amado Salvador, jepe pe yvóra Salvador, umi mbohapy requisito? Pe regalo, Jesucristo nacimiento, iministerio ha isacrificio expiatorio, ¿ndohechaukái piko peteĩ mba’e pe regalo Me’ẽhagui? Heẽ, Añetehápe. “Péichaite ohayhúgui Tupã yvórape, ome’ẽ haĝua Ita’ýra Unigenito-pe.”2 Ñande Ru Yvagagua osacrifika Ita’ýrape Imborayhu porã rupi ñande rehe, Ita’yrakuéra.
¿Ohechauka pe regalo, Jesucristo, ñande Ru Yvagagua oikuaa porãha pe ñaikotevẽva? Jey, peteĩ categórico heẽ! Ñaĩme por naturaleza peteĩ je’a ñeimépe, ha ñaikotevẽ desesperadamente peteĩ Salvador ha Redentor. Nefi ombo’ehaguéicha, Jesucristo “ndojapói mba’eve ndaha’éiramo yvóra mba’e porãrã; Ha’e ohayhúgui yvórape.”3
¿Ha pe requisito paha ha’e haĝua pe regalo perfecto? Omanteneva’erã ivalor tapiaite ĝuarã. Mormón Kuatiañe’ẽ ñanembo’e hesakãporã Jesucristo expiasiõ ha’eha infinito ha eterno.4
¿Penemandu’a upe pancarta rehe, joyería departamento-pe? Upe mitãkuña oikuaákuri instintivamente mávapa ha’e upe regalo añetéva. Ko mundo iñypytũvape, ñamaña umi joya mboypýri, upe Luz del Mundo gotyo. Pe Salvador ombo’e:
“Upévare, pehupi pende resape omimbi hag̃ua yvóra renondépe. Péina ápe, che ha’e pe tesape pehupiva’erã yvate.”5
“Che ha’e pe tesape omimbíva pytumbýpe.”6
Atestifika Jesucristo ha’eha pe regalo perfecto, pe regalo araka’eve ndoparáiva ome’ẽ. Opavave tañañongatu upe añetegua ñane korasõme ko Navida-pe ha tapiaite ĝuarã. Ha’e oikove; Jesucristo réra sagrado-pe. Amén.