Peteĩ Hueste Angelikál ko’aĝagua
Tapende pyhare porãite, che hermano ha hermanakuéra pohayhuetéva. Ajehovasa oportunidad reheve añe’ẽ haĝua peẽme ko pyharépe, jacelebrávo pe acontecimiento igloriosovéva humanidad historia-pe: Tupã Ra’y ouhague ko mundo-pe. Cristo nacimiento, Hekove ha Ijexpiasiõ ha’e regalo tuichavéva ñande Ru Yvagagua ome’ẽva opavave ñandéve.
Jacelebrávo ñande Salvador nacimiento ko año époka javy’ávape, Tupã mborayhu ñemova’ỹ ha opave’ỹva omyanyhẽve ñane ánga, ñanepytyvõvo ñamboyke haĝua ñane korasõ ñane familia, angirũ ha vecinokuéra gotyo, ha ñanemosensibleve umi ha’eñóva, umi oñemboykéva terã oikotevẽva angapyhy ha py’aguapy ndive.
Akóinte che’impresiona umi ñemombe’u, Jesús nacimiento-pe oikova’ekue rehegua, Lucas evangelio odescribihápe heta ejemplo mba’éichapa oñeme’ẽ angapyhy ha py’aguapy umi hénte oĩva’ekue upe circunstancia-pe. Ikatu jahechakuaa upe ejemplo jahechávo ñande Ru Yvagagua ñanderayhúva ombouha Hi’angekuéra pyharekue ovisita haĝua pastor-kuérape, umi oñemboykéva socialmente, ha oñe’anuncia chupekuéra Ita’ýra nacimiento; ha avei umi pastor ovisitávo Maria ha José-pe, oñatendéva hína peteĩ mitãmi onace ramóvape, oĩvo mombyryete hógagui Galilea-pe.
Ndaha’éikuri peteĩ coincidencia José ha Maria ojapova’erãha peteĩ viaje puku Nazaret guive Belén peve oñe’empadrona haĝua, profetakuéra ymaguare oprofetisamahaguere ojapóma siglos pe Salvador del mundo onacetaha Belén, David távape.1 Jahecha ñande Ru Yvagagua oikuaa porã cada detalle oikóva Ita’ýra Unigénito nacimiento reheve. “Ha ojehu oĩ aja upépe, oñekumpli ára Maria omoheñoiva’eraháme.”2
Apensávo pastor-kuéra ha pe pareja jóven, Maria ha José rehe, añeporandu mboy angapyhy, py’aguapy ha vy’ápa oiméne orrecivira’e en forma individual oje’aparesévo pastor-kuérape ñúme pe hueste angelikál, ha oĝuahẽvo umi pastor ohecha haĝua Maria ha José-pe.
Pastor-kuéra oiméne orrecibi angel-kuéragui pe angapyhy oikotevẽva oikuaávo Tupã oguerekoha chupekuéra presente ha ovaloraha oiporavo haĝuáicha chupekuéra ha’e haĝua umi peteĩha testigo Tupã Cordero onaceva’ekuégui. Maria ha José-pe, umi pastor ikatu oguerúkuri pe tuicha angapyhy oikotevẽva oikuaávo ambuekuéra oikuaaha avei upe milagro divino ha’ekuéra ha’évagui parte.3
Añetehápe, oĩ ñande apytépe pastor-kuéra moderno; kuimba’e ha kuñanguéra omba’apóva tarde peve pyharekue, terã temprano guive pyharevekue ogana haĝua isusténto. Ikatu alguno umi pastor ko’aĝagua ha’e umi guardia de seguridad, personal de emergencia terã hospital-gua, empleadokuéra umi tienda 24 hora-gua, gasolinera terã equipo de noticia-gua. Sapy’ánte umi omba’apóva pyharekue ikatu oñeñandu aislado joaju social-kuéragui umi omba’apóva horario pyharevekuépe ndive. Avei, oĩ umi Maria ha José ko’aĝagua osẽva’ekue hetãgui ha oñeha’ã hína oje’ahusta peteĩ vida pyahúpe imandu’ávo umi fecha importante Navida, cumpleaño, matrimonio ha funeral rehe.
Ko’aĝa oñemo’aĝuívo Navida, añeporandu ikatúpa ñande ha’eve angelkuéra hueste-icha ha jaha javisita umi pastor ko’aĝaguápe jagueraha haĝua chupekuéra umi Cristo rehegua maranduporã, py’aguapy ha angapyhy. Ha añeporandu ikatúpa ha’eve umi pastor-cha ha ñambohovái upe ñehenói javisita ha ñaministra haĝua umi José ha Maria ñane vecindario ha comunidad ko’aĝaguápe ñame’ẽ haĝua chupekuéra pe seguridad Tupã ohayhuha ha ovela ha oñangarekoha hesekuéra.
Che ha che familia roñandu umi angapyhy ha py’aguapy remiandu ikatúva ogueru peteĩ angelkuéra hueste ko’áĝa gua. Ko pyharépe amombe’use peteĩ umi káso. 2.003-pe, rova ore retãgui Utah-pe. Upe invierno-pe roguerekókuri peteĩ tormenta de nieve ivaivéva oĩva’ekue Utah-pe heta año-pe. Araka’eve ndorohechaiva’ekue peteĩ mba’e peichaguáva, ore rokakuaágui kuri zona oĩháme playa ha palmerakuéra. Ore róga opyta peteĩ yvyty ári Bountiful-pe ha oreko peteĩ acera ipukuetereíva roĩgui peteĩ esquina-pe. Oĝuahẽvo umi nevada, che rembireko oñepyrũ py’aguasúpe omopotĩ pe nieve ore entrada ha acera-gui peteĩ mákina oipe’áva nieve reheve. Pokã ára upe mboyve, che chepysyrỹikuri hielo ári ha ha’a ha amopẽ che pyapy ahávo avisita che vecinokuérape. Che accidente rupi, aje’opera ha omoĩ chéve hikuái peteĩ yeso puku che jyváre aguerahava’erã heta mese aja. Che rembireko oñepyrũvo omopotĩ upe zona mákina reheve peteĩha jave opa hekovépe, ha’e ndoikuaái okambiava’erãha pe pala dirección omopotĩ rire peteĩ lado upe vereda. Upévare, ha’e ombohasa aja pe mákina, oikuaa’ỹre, omoĩ mbaite jey pe nieve ombohasa haguépe. Ha’e oñeha’ã jey jey ha katu éxito’ỹre. ¡Upéva ha’e peteĩ sarambi! Opyta pukueterei haguére pe roýpe, ojagarra chupe peteĩ infección mokõive ijapysápe, ha opyta haimete nohenduvéi mba’eve mokõi mese aja. Upéa aja avei, ore ta’ýra orekóva dieciséis años oñelesiona ilómo oho aja trineo-pe ha opytava’erã tupápe ikatu haĝua okuera. Ha upéicha roĩkuri: peteĩva tupápe, peteĩ ohendu’ỹva ha ambue yeso reheve, ha opavave romanóta ro’ýgui. Aime seguro ore ha’ehague peteĩ espectáculo ore vecino-kuérape ĝuarã. Peteĩ ko’ẽ ho’ysãvaívape, oiméne pe 5:00 de la mañana rupi, chemombay peteĩ mákina oipe’áva nieve ryapu ahendúva che ventana rupive. Amaña ventana rupi ha ahecha che vecino, hermano Blaine Williams, oikóva calle mboypýri. Ha’erõ jepe mayor de setenta año, ha’e ohejákuri hupa aku’asy ha hóga ha discretamente omopotĩ ore róga entrada ha acera, oikuaágui ore ndaikatumo’ãiha rojapo. Ha upeichagua sencillés ha discreción reheve otro hermano, Daniel Almeida, oñepresenta che rógape chegueraha haĝua che trabajo-hápe Salt lake City-pe, che ndaikatúigui amaneha che yeso rupi. Ha’ekuéra mokõi, py’aporã ha discresión reheve, oĩ upépe chéve ĝuarã cada pyhareve che familia ojerrekupera peve ha ikatu rojapo umi tembiapo. Umi Navida ro’ysãme 2003-gua, oñembou oréve umi hermano angelikál, oñembouhaguéicha umi angelkuéra oministra haĝua umi humilde pastor-kuéra ymaguarépe. Umi mokõi hermano osegui pe Salvador ejemplo ha omoĩ ore rekotevẽ imba’ekuéra renondépe.
Hermano ha hermanakuéra pohayhuetéva, ñande Salvador ha’e pe ejemplo perfecto mborayhu ha buena voluntad yvyporakuéra ndive ĝuarãgui. Ha’e akóinte hesarái Ijehegui ambuekuéra rehehápe. Ipy’aporã ojehechakuaa opa mba’e ojapova’ekue opa ára hekovépe ha noñelimitái peteĩ époka térã fiesta específica-pe añónte. Ñambojerévo ñane korasõ ambuekuéra gotyo, ojapohaguéicha ñande Salvador, apromete peẽme ñañandu porãvetaha mba’epa he’ise Navida. Jajapóvo upéicha, apromete peẽme jajuhutaha apyra’ỹva oportunidad ñame’ẽ haĝua ñande jehegui, kirirĩháme ha py’aporã reheve, umi hénte oikotevẽvape. Upéicha, jaikuaaporãvéta ñande Salvador-pe ha jajuhúta py’aguapy ko yvy ári, ha buena voluntad yvyporakuérape ĝuarã, odeterminátava pe mborayhu, py’aguapy ha mbarete pyahu ñañandútava ha ñambohasátava ñande rapichakuérape. Jaseguiháicha pe Salvador guata, tajajesareko Ipy ryapúre, ha tajaheka jajejoko haĝua pe Carpintero po firme rehe. Jahekávo ñande Salvador-pe opa mba’e jajapóvape, Navida ndaha’emo’ãi peteĩ ára añónte, ni peteĩ temporádante, ha katu ha’éta peteĩ ñane korasõ ha apytu’ũ condición, ha akoiete ñañandúta pe vy’a ha mborayhu oñeñandúva Navida-pe. Che atestifika Jesucristo, pe mitãmi onase’akue Belén-pe, ha’e añtehápe pe Salvador ha Redentor del mundo.
Feliz Navida mante peẽme ĝuarã. Ha’e ko’ã mba’e Jesucristo rérape. Amén.