Menin Letok eo Ewāppen
Juon iiō, tarin jilu raan m̧okta jān juon kūrijm̧ōj ke jej ajri wōt, ļeo pāleeō, Rob, ekar lo an ruo iaan leddik ro jein rerūtto ilo ruum̧ in kiki eo rej ņoje aer rubi keiip ko aer n̄an Kūrijm̧ōj. Innem, ālkin aer kar alimōmō ļo̧k, leddik ro jein rekar bar jino rāābi keiip ko aer. Leddik ro jein Rob rekar ba n̄an e, “Eļan̄n̄e kwoj jab ba n̄an m̧am̧a, jenaaj kwaļo̧k n̄an eok kilen kōm̧m̧ane.”
Ekar lukkuun kijōrjōr, eļaptata kōnke ekar wōr an pākij in jaij in wōt basketball ium̧win wōjke in Kūriijm̧ōj eo kōn etan epād ie.
Ijoke, keiip in ekar lukkuun mera ke ej kotake n̄an ruum eo an. Ekar kadikdik kōpelļo̧ke im ekar lo an ejjeļo̧k kobban, ijjeļo̧k wōt juon no̧o̧t jidikdik. No̧o̧t eaar jeje āinwōt in, “Ijeļā ta eo kwoj kōm̧m̧ane. Jab kakkure Kūrijm̧ōj in am̧. Iakwe, jān M̧am̧a.” Ekar ekkatak jān menin, im ekar jem̧ļo̧k an alimōmōik aer kōm̧m̧ani keiip in Kūriijm̧ōj ko.
Ļōmņak kōn ememļo̧kjeņ ko am̧, en̄jake ko rem̧m̧an ilowa, ainikien enjeļ ro, im nem ko jeban meļo̧kļo̧ki me ej itok ilo kōļmenļo̧kjeņ ko n̄e jej ļōmņak kōn Kūrijm̧ōj. Eļap an em̧m̧anļo̧k ememļo̧kjeņ ko me elōn̄ iaad jej bōki ilo būruwōd jān tōre ko jekar dik kōn kwojarjar in Kūrijm̧ōj—kakemeemej raan in ļotak eo an Rilo̧mo̧o̧r. En̄jake kein reban etal jān kōj.
Jej en̄jake aolep iien jej reilikļo̧k n̄an jikin m̧ōn̄a an kidu ilo Bethlehem ijo elōn̄ kanaan ko, ium̧win bukwi iiō ko, aolep rekar itok ippān doon ium̧win juon bon̄ lan̄ ekar obrak kōn iju ko—ke ad Rilo̧mo̧o̧r im RiPinmuur ekar bōktok n̄an laļ in āinwōt Kiin̄ ioon Kiin̄ raņ im Irooj ioon Irooj raņ.
Ekkā am ron̄ bwe Kūrijm̧ōj ej n̄an ajri ro, ak kōj aolep jejjab ke ajri ilo bōro? Juon raan juon m̧am̧a im leddik eo nejin ruatimjuon an iiō ekar lukkuun boub in kaikujkuj n̄an Kūrijm̧ōj. Ke rej kōkairiir n̄an jikin dede im m̧arm̧ar ko ilo m̧ōn wia eo, leddik eo nejū ekar loe juon banner ekilep ekar etoto ilo juon kein karelel. Ilo juon leta kileplep ebūrōrō, banner eo ekar jeje im kwaļo̧k, “ Menin Leļo̧k eo Me Ejjamin Bōjrak an Leļo̧k.”
Leddik eo ekar riiti jain in, ļōmņak kake ium̧win jejjo iien, innem ettōn̄ dikdik. Ekar utiej buruōn ilo an ba n̄an jinen, “Jinō, ijeļā ta menin leļo̧k eo me ej jāmin bōjrak an leļo̧k.”
“O, ta?” jinen ekar kajjitōk ilo aer em̧m̧akūt ettoļo̧k jān jarlepju eo.
Leddik eo ekar lukkuun jeļā ilo an ba, “Ej Jisōs!
Jinen ekar uwaak ilo an kabōde, “Ejjab, Jitōnbōro. Ej diamond ko.”
Aiseia ej kakeememej kōj, “Im juon ajri e dik enaaj tōl er.”1
Ke ij kōjerbal kein kappukot eo ilo intōrnōt naan in, ikar lo taunij kareelel ko ikkijeen naan in “Menin lelo̧k me ej jāmin bōjrak an leļo̧k.” Aaet kajjieon̄ ilo ad maron̄, jab m̧weik menin leļo̧k ko me jej leļo̧k me ej n̄an indeeo.
Oktan, in kwaļo̧k n̄an eok juon iaan ememļo̧kjeņ ko rem̧m̧an kōn Kūrijm̧ōj an ruo armej ro me, ij tōmak, ej jāmin jem̧ļo̧k aer leļo̧k. Rekar ro jinō im jema, Aldo im Eleanor Harmon.
Ekar lukkuun juon wintōr eļap sno ie ilo juon bukwōn jidikdik ilo iiō eo, ak ekar jab kōbōjrak jema jān an bōk baam̧le eo an n̄an kappukot juon wōjke in Kūrijm̧ōj eo ejejjet. Ke wōjke eo ej pād ilo m̧weo im jutak ilo kein jutak eo an, tōma ko, kein kainōknōk enjel ko an wōjke ko, im kein kattoto ko rekar lukkuun aiboojoj aer eļļaak. M̧weo im̧ōm̧ ekar lukkuun pojak n̄an jino Kūrijm̧ōj eo.
Bok in kein ikkure ko rekar tōpar tok ilo māāl eo, im ro jeiū im jatū im n̄a kōm kar lukkuun kijoroor n̄an ālōkļo̧k peij ko n̄an lo men ko raorōk an Kūrijm̧ōj. Bwiin gingerbread im fruitcake ekar kobrak m̧weo m̧ōm̧, im Tijem̧ba ekar jidik wōt an ettoļo̧k ilo kōļanta in bōnbōn raan n̄an n̄e etōpar lukkuun Kūrijm̧ōj. Kōm kar illik menin leļo̧k ko ilo nabōj in kōjem ko an ro rūtūrūm̧ im kar kajjieon̄ jipan̄ baam̧le ko me rej aikuj jidikin kam̧ōņōņō in Kūrijm̧ōj.
Kajjojo bon̄, ālkin aō kar etal n̄an peet eo, jinō ekar joļo̧k eļap iien n̄an kattoļo̧ke jān kawaron̄ron̄ ilo ruum̧ in kiki eo an. Men eo wōt imaron̄ kar ron̄ ej ainikien mejin in keke nuknuk eo an. Ekar keke bwijin nuknuk ko am ilo jabdewōt wāween me ikar jab ļōmņak eļap an mōk kake.
Ak āinwōt an kar epaaketok Kūrijm̧ōj, jinō ekar lukkuun ļapļo̧k wōt an mōk. Ekar to an nan̄inmej im pād wōt ilo peet eo raan eo m̧okta jān Kūrijm̧ōj. Ke taktō eo ekar ba n̄an baba bwe en aikuj kar pād ippān ilo peet eo n̄an diktata juon wiik, ikar lukkuun inepata—ak barāinwōt būrom̧ōj. Ewi wāween an Kūrijm̧ōj wōnm̧aanļo̧k wōt ilo an m̧am̧a jab pād? Ewi wāween ad nej kar en̄jake ke Kūrijm̧ōj? Im ijjeļo̧kin, wōn en kar kōmat kōjota n̄an Kūriijm̧ōj?
Āinwōt an jema lukkuun iakwe im kea kōn jinō, ekar kile bwe jerbal in kōmat kōjota n̄an Kūriijm̧ōj ekar bun̄ōti. Bar juon alen, ikar inepata! Men̄e juon em̧m̧aan eo emālōtlōt im eļap kapeel ippān, kōmat ekar jab juon men eo me elukkuun tijem̧ļo̧k kake.
Joteen eo m̧okta jān Kūrijm̧ōj eo ikar bukwelōlō im jar bwe jinō en em̧m̧an an mour āinwōt naaj juon menin bwūlōn̄ im bwe jibbon̄in Kūrijm̧ōj eo en āinwōt kar jinoin—baam̧le eo am ekkā aer jepoole wōjke in Kūrijm̧ōj eo. Inepata ekar bun̄ōt kōm ilo jibbon̄in Kūrijm̧ōj eo ke kōm ej lo an jinōm eo ejitōnbōro ippām elukkuun nan̄inmej ej babu ilo peet eo. Ke kōm kar kōpelļo̧ke keiip ko, ikar bwūlōn̄ ke ij loe bwe menin letok eo aō ej make wōt ekar kōm̧m̧an jān nuknuk ko an tole eo me m̧am̧a ekar kiiji n̄an n̄a ilo bon̄ ko rellōn̄ ke ekar emmej ilo Tijem̧ba. Ijjab maron̄ kōttar n̄an aō kōkatkat im erļo̧k peiū im atbokwo̧je. Jon̄an an kar kōjekdoon men otemjej kōn n̄a.
Baba jitōnbōro ekar kajjieon̄ e aolep wāween ko rekkar n̄an kōm̧m̧an bwe en̄jake in Raan in Kūrijm̧ōj en em̧m̧an ilo iiō eo, en em̧m̧an jekdoon n̄e ejako jinem. Im ekar lukkuun em̧m̧an. Ālkin kōjota eo am eļam waan, jema eo em̧m̧an ekar mejur ilo jea eo turin wōt jikin kijeek eo ak ij ikkure ippān ro jeiū im jatū im tole eo im nuknuk kāāl ko an. Eo jinō jitōnbōro ekar mour jān an kar kakkije eļap, im aolep men rekar em̧m̧an. Ak ilo mour e aō, ro jinō im jema rekar juon menin leļo̧k n̄an eō me ejjeļo̧k jem̧ļo̧k aer leļo̧k.
Jen ļōmņak kōn naan in ilo iien in. Eban ke juon menin letok eo ejjeļo̧k jem̧ļo̧kin āinwōt juon menin letok eo ewānōk? Kein kajuon, menin letok eo ewānōk enaaj kwaļo̧k juon men kōn rileļo̧k eo an menin leļo̧k eo. Kein karuo, enaaj kwaļo̧k juon men kōn aikuj an armej eo me ej bōk menin letok eo. Im āliktata, menin letok eo, eļan̄n̄e ejjab lukkuun menin letok ewānōk, enaaj dāpij aorōkin ejjab n̄an iien ko wōt rej itok ak n̄an indeeo.
Rilo̧mo̧o̧r eo ad Ejitenbōro, aaet Rilo̧mo̧o̧r eo an laļ in, rej jab ke tōpar menin aikuj kein? Menin letok in ļotak, kwaļo̧k naan, im Pinmuur eo an Jisōs Kraist ej ke kwaļo̧k juon men kōn Rileļo̧k ro an menin leļo̧k ko? Aaet. “Bwe kōn an Anij yokwe laļ, Ear letok juon wōt Nejin Ear keotak.”2 Jemed Ilan̄ ej kaarmejete Eo Nejin kōn iakwe eo erreo n̄an kōj, Ajri ro Nejin.
Menin letok eo an Jisōs Kraist me ej kwaļo̧k bwe Jemedwōj Ilan̄ ekar lukkuun jeļā ta eo jekar aikuji? Bar juon alen, juon aaet eo emeļeļe! Jej wōtļo̧k kōn piktokid, im jej lukkuun aikuj juon Rilo̧mo̧o̧r im Ripinmuur. Āinwōt an kar Nipai katakin, Jisōs Kraist “ej jab kōm̧m̧an jabdewōt eļan̄n̄e e jab n̄an jeraam̧m̧an eo an laļ.”3
Im men eo āliktata emenin aikuj n̄an menin letok eo ewāppen? Ej aikuj dāpij aorōkin n̄an indeeo. Bok in Mormon ealikkar an katakin kōj bwe Pinmuur eo an Jisōs Kraist ejjeļo̧k jem̧ļo̧kin im ej n̄an indeeo.4
Keememej banner eo an jikin dede im m̧arm̧ar ko? Jiron̄ in edik ekajju jeļā ta in m̧ool in menin letok. Ilo laļ in emarok, jej kalimjōk ilōn̄ļo̧k dōkā in eaorōk n̄an Meram eo an Laļ in. Rilo̧mo̧o̧r eo eaar katakin:
“Kōn menin, kotak ami meram bwe en maron̄ kōmeramļo̧k laļ. Lo N̄a ij meram eo kom̧ naaj kotak lōn̄ļo̧k.”5
“N̄a meram eo ej romaak ilo marok.”6
Ij kam̧ool bwe Jisōs Kraist ej menin letok eo ewānōk—menin letok eo ejamin bōjrak an leļo̧k. Jen aolep dāpij wōt m̧ool in ilo buruwōd ilo Kūriijm̧ōj in im n̄an indeeo. E emour. Ilo et eo ekwojarjar etan Jisōs Kraist, amen.