Juon Jarlepju in Enjeļ Raan Kein
Iakwe in jota, ro jeiū im jatū jitōnbōro. Ij en̄jake jeraam̧man kōn iien in em̧m̧an n̄an ekōnono n̄an kom̧ jotenin ilo ad keememe e m̧akūtkūt eo eaiboojoj tata ilo bwebwenato an armej—itok eo an Nejin Anij n̄an laļ in. Ļotak eo, mour eo, im Pinmuur eo an Kraist rej menin letok eo an Jemedwōj Ilan̄ n̄an kōjwōj aolep.
Ilo ad keememe e ļotak eo an Kraist ilo tōre in iiō in ekōlan̄lōn̄ tata, iakwe eo an Anij ej wōnm̧aanļo̧k wōt im ejjeļo̧k jem̧ļo̧kin āinwōt ekanooj in ļap an un̄ur jetōb ko ad, jipan̄ kōj ukot būruwōd n̄an baam̧le eo ad, ro m̧ōttad, im ro rūturūd, im jipan̄ kōj an pidodoļo̧k ad jouj n̄an ro me remaron̄ in en̄jake makeļo̧k, ajimakeke, ak ro rej pād ilo aikuj kaenōm̧m̧an im aenōm̧m̧an.
Aolep iien ij bwūlōn̄ bwe, ilo bwebwenato ko an kōn m̧akūtkūt ko rej jepool ļotak eo an Jisōs, Gospel eo an Luk ej kwaļo̧k jejjo waanjon̄ak ko kōn kaenōm̧m̧an im aenōm̧m̧an me kar liļo̧k n̄an ro me kar lo bwe rej ajimakeke ilo jōkjōk kein. Kain waanjon̄ak kein maron̄ loi ke Jemedwōj Ilan̄ eo ej iakwe ekar jilkintok enjeļ ro An n̄an loļo̧k rilale jiip ro rettoļo̧k ejeja armej ie ilo bon̄ n̄an kōjjeļļā kōn ļotak eo an Nejin, im ke rilale jiip ro rekar loļo̧k Meri im Josep, ro raar kōjparok nin̄nin̄ eo ej kab ļotak ettoļo̧k jān m̧weo im̧wer ilo Galilee.
Iaļ eo aitok an Josep im Meri jān Nazaret n̄an Bethlehem n̄an kōm̧m̧an ewwōj ekar jab juon jide, kōnke ium̧win epepen ko, ekar kanaan kake jān rikanaan ro etto bwe Rilo̧mo̧o̧r eo an laļ in enaaj kar ļotak ilo Bethlehem, Jikin Kweilo̧k an Devid.1 Jej lo bwe Jemedwōj Ilan̄ ekar lukkuun in jeļā kake im kar bōk koņaan ilo aolep meļeļe kōn ļotak eo an Nejin Jitōn Bōro Emake Wōt. “Im, ke, rej pād ijo, e jejjet raan ko ej keotak.”2
Ke ikar ļōmņak kōn jōkjōk ko me rilale jiip ro im ripālele eo edik, Meri im Joseph, rekar pād ie, iaar ļōmņak ekōjkan ke ej waļo̧k jarlepju in enjeļ ro n̄an rilale jiip ro ilo meļaaj ko im jikrōkļo̧k eo an rilale jiip ro n̄an ijo Meri im Joseph pād ie ekar bōklo̧k n̄an mour ko aer kajjojo kaenōm̧m̧an, aenōm̧m̧an, im lan̄lōn̄.
N̄an rilale jiip ro, enjeļ ro remaron̄ in kar bōkļo̧k kaenōm̧m̧an eo kar aikuji me Anij ekar jeļā kake kōn er im kar lo aorōk eo ilo er āinwōt rikam̧ool ro m̧oktata kar kāālet er kōn Ļaam̧ eo an Anij ej kab ļotak. N̄an Meri im Josep, rilale jiip ro remaron̄ in kar bōkļo̧k kaenōm̧m̧an eo ekar ļap aikuji me ro jet raar jeļā kōn kabwūlōn̄lōn̄ eo ekwojarjar bwe raar m̧ōttanļo̧k.2
Ejjeļo̧k kajjitōk, ilubwilijid rej rilale jiip ro raan kein—em̧m̧aan ro im kōrā ro me rej jerbal ļo̧k im bon̄ im jibbon̄ tata n̄an kakke mour. Jet iaan rilale jiip rein raan kein emaron̄ koba ri waj ro, rijerbal in aujpitōl im riloloorjake idin̄ ko, rijerbal ro an im̧ōn wia ko rej peļļo̧k aolep bon̄ im im̧ōn ettein̄ kiaaj ko, im kumi in kōm̧m̧an nuuj ro. Jet iien ro rej jerbal in bon̄ remaron̄ en̄jake ettoļo̧k jān ikitōltōl in ippān doon ko ippān ro ekkā aer jerbal in raan. Ilo kakobaba n̄an men jab in, ebarāinwōt wōr Joseph im Mary raan kein me rekar em̧m̧akūt ettoļo̧k jān ļām̧orān eo aer im ro rej kajjieon̄ in kōkarōkrōk n̄an juon mour ekāāl ilo aer keememe e raan ko raorōk āinwōt Kūrijm̧ōj ko, raan in ļotak ko, m̧are ko, im mej ko.
Ilo ad epaaktok Kūrijm̧ōj, ij ļōmņak eļan̄n̄e jemaron̄ erom̧ āinwōt jarlepju in enjeļ ilo ad loļo̧k rilale jiip ro raan kein n̄an leļo̧k nuuj eo em̧m̧an kōn Kraist, aenōm̧m̧an im kaenōm̧m̧an. Im ij ļōmņak eļan̄n̄e jemaron̄ in erom̧ āinwōt rilale jiip ro kōn uwaake kūr eo n̄an loļo̧k im karejar n̄an Joseph ro im Mary ro raan kein ilo meļan ko im jukjukin pād ko ad n̄an leļo̧k kam̧ool eo bwe Anij ej iakwe er im ej mije im kea kōn er.
Baam̧le eo aō im n̄a ekar wōr am en̄jake ilo jejjo iien ko raorōk im reoktak me en̄jake in kaeņōm̧m̧an ko im aeņōm̧m̧an me juon enjeļ raan kein ekar bōktok. Bon̄nin ikōņaan reilikļo̧k n̄an juon iaan iien ko raorōk. Ilo 2003, jekar em̧m̧akūt jān m̧weo m̧ōm̧ ilo jikin eo am n̄an Utah. Ilo iien m̧ōļo jab eo, ekar juon ļan̄ in sņo ko reļļap ilo Utah ekar waļo̧k ālkin jet iiō ko. Kōmij jan̄in kar lo jabdewōt kain in ilo mour ko am, ke kōm kar rūttoļo̧k ilo mejatoto ko rejjab m̧ōlo. Im̧weo imōm̧ ekar pād ilo juon kona ioon juon bat ilo Bountiful me ekar wōr juon jikin etetal aitok. Ke ekar jino sņo, lio pāleeō ekar peran ilo an kar jino popoikļo̧k sņo eo ilo jikin diwōj deļo̧n̄ an wa im jikin etetal ko kōnke ikar jirilo̧k ioon aij im kar būlo̧k peiū jejjo raan m̧oktaļo̧k ke ikar etetal ilo jikin diwōj deļo̧n̄ an wa eo n̄an loļo̧k ro rūturūm̧. Jirilo̧k jab eo ekar tōprak in juon m̧wijm̧wij im juon korak kileplep ilo peiū ium̧win jet allōn̄ ko. Ke liin ekar jino popoikļo̧k sņo ilo eria eo ej kab kein kajuon ilo mour eo an, lio pāleeō jitōn bōro ekar jab jeļā bwe ej aikuj in kajitļo̧k chute eo ālkin karreoik juon rejet in jikin diwōj deļo̧n̄ an wa eo. Kōn menin, ke liin ekar etal n̄an jait eo juon n̄an karroeiki, ekar ijo me chute eo kajejjetļo̧k sņo ko. Ekar āindein an etal itok, ekar ejjeļo̧k tōprak. Ej juon ettoon ļapļap! Kōnke ekar to an pād ilo m̧ōļo, liin ekar jorrāān lo̧jiln̄in im ekar enan̄in lukkuun in jaron̄ron̄ ium̧win ruo allōn̄ ko. Ilo ejja iien eo wōt ļaddik eo nejū jon̄oul-jiljino iiō dettan ekar jorrāān likūn ke ekar jikāāt laļļo̧k im aikuj in kar pād wōt ilo peet bwe en m̧ōkaj an mour. Kōn menin en̄in ekar kōm, juon ej pād ilo peet, juon ejaron̄ron̄, juon ekorak pein, im kōm aolep kar jab em̧akūtkūt. Ij tōmak kar menin kalimjōk kōm jān ro rūtūrūm. Ilo juon iaan jibbon̄ tata ko, elukkuun in m̧ōļo ilo enan̄in 5:00 awa jibbon̄, ikar ruj kōn juon ainikien juon snowblower itunam̧ōjin wintō eo aō. Ikar reinam̧ōjļo̧k ilo wintō eo im ikar lo iturejet in iaļ eo juon rūturū, Brother Blain Williams. Epaake jiljilimjuonn̄oul jim̧a iiō dettan, ekar etal n̄an m̧weo im̧ōn emeņeņe, im em̧m̧an im ekar itok ilo an jab ba kake im karreoik jikin diwōj deļo̧n̄ an wa eo waam im jikin etetal eo. Im ilo an kar itok kōn wāween eo eikōn̄ im eļam waan, bar juon m̧ōtta, Brother Daniel Almedia, ekar jedetok n̄an m̧weo imōm̧ bwe en ettōrļo̧k kake n̄a n̄an Salt Lake n̄an jerbal, āinwōt aō kar jab maron̄ kattōr kōn korak kileplep eo ilo peiū. Rekar pād ijo n̄an jipan̄ eo kōn jouj im ikōn̄ aolep jibbon̄ m̧ae iien eo baam̧le eo aō ekar ājmour im kōm kar bar juon alen maron̄ kōm̧m̧ani men ko kōn kōm make. Ilo tōre in Kūrijm̧ōj m̧ōļo eo ilo 2003 eo, enjeļ būratōr rein kar jilkintok er n̄an kōm, ilo ejja wāween eo kar jilkinļo̧k rikarejar enjeļ ro n̄an jerbal in karejar kar jilkinļo̧k n̄an rilale jiip ro etto. Būratōr rein ruo raar ļoor waanjon̄ak eo an Rilo̧mo̧o̧r e im kar ļōmņak kōn aikuj ko am m̧okta jān aer ļōmņak kōn ko aer make.
Rilo̧mo̧o̧r eo eaar waanjon̄ak eo eweppān kōn iakwe im meanwōd n̄an armej otemjej. E ej meļo̧kļo̧k kōn E kōn wōt ro jet. Jerbal ko An me ejjeļo̧k kalijōkļo̧k ie rekar kwaļo̧k kōn aolep men ko E ekar kōm̧m̧ani aolep raan ilo mour eo An im ekar ejjeļo̧k jem̧ļo̧kier n̄an juon jijen eo ak raan ekwojarjar eo emake. Ilo ad ukot buruōd āinwōt kar Rilo̧mo̧o̧r, ij kallim̧ur bwe emaron̄ em̧m̧anļo̧k ad en̄jake lukkuun meļeļein Kūriijm̧ōj. Ilo ad kōm̧m̧ane menin, imaron̄ kallim̧ur n̄an kom̧ bwe jenaaj lo iien ko rem̧m̧an ejjeļo̧k jem̧ļo̧kier n̄an leļo̧k kōj make n̄an jipan̄ ilo ittino im ilo jou n̄an armej ro rej aikuj kōj. Menin enaaj jipan̄ kōj itok n̄an an em̧m̧anļo̧k ad jeļā kōn Rilo̧mo̧o̧r im lo kōn kōj make aenōm̧m̧an ioon laļ ippān armej raņ, eo enaaj, ilo wāween eo eļap tata, kāālet iakwe eo, aenōm̧m̧an eo, im bar kōkāāl kajoor eo me jemaron̄ en̄jake im kwaļo̧k n̄an ro jet. Ilo ad ļoor bun̄tōn ko an Rilo̧mo̧o̧r, ij kōjatdikdik bwe jenaaj kappukot m̧weo im kajoor jān ad Rilo̧mo̧o̧r. Ilo ad kappukot Rilo̧mo̧o̧r ilo aolep komman ko ad, Kūrijm̧ōj eban baj juon raan ak juon tōre ak enaaj juon jōkjōk an bōro im ļōmņak, im lan̄lōn̄ eo im iakwe eo kar en̄jake ilo Kūrijm̧ōj enaaj iien otemjej epaaktok. Ij kam̧ool bwe Jisōs Kraist ej Nejin Anij, nin̄nin̄ eo ekar ļotak ilo Bethlehem, ej ilo m̧ool Rilo̧mo̧o̧r im Ripinmuur eo an Laļ.
Merry Christmas n̄an kom̧ aolep. Ij ba menin kein ilo etan Jisōs Kraist, amen.