Bōktok Kūrijm̧ōj N̄an Mije
Em̧m̧an ippa tōrein ilo ad kuk ippān doon āinwōt baam̧le ko im ro rejitenbōro n̄an keememej lo̧tak eo an ad Rilo̧mo̧o̧r Jisōs Kraist im leļo̧k kam̧m̧oolol kōn mour eo An im en̄taan in pinmuur eo An indeeo. Em̧m̧an ippa ememļo̧kjeņ ko rellōn̄ ilo jijen in ipeļaakin laļ in im maron̄ wōt en̄jake m̧ōņōņō im kōjatdikdik eo an Kūrijm̧ōj jān iien ko ij dik, men̄e rej waļo̧k ilo England eo eļap an m̧oļo ak Arabia ijo eļap an bwil.
Bōlen āinwōt elōn̄ ro jet, wiik eo ļo̧k ikar eotaak ippān tōm̧a in Kūrijm̧ōj ko, mōk in kappukōt ewi wōt tōm̧a eo ekar kōm̧m̧an bwe aolep tōm̧a ko ren jab ebbōl. Ke ikar maron̄ āliktata loe tōm̧a eo im kar jāniji, aolep tōm̧a ko jet rekar ebbōļ, im ekar wōr juon mejaļ jān edodo ekar waļo̧k n̄an n̄a im m̧ōņōņō eo me ekar itok jān juon anjo̧ jidikdik.
Juon iaan men ko rem̧m̧an ippa n̄an kōm̧m̧ane ilo an epaaktok Kūrijmōj ej jijet itūrin wōjke in Kūrijm̧ōj eo ammim, ippānļo̧k ilo an aolep ļait ko kun, im kōm̧m̧an bwe en tab aō erre ilo aō kalimjōk wōjke eo ilo an kalbubu kōn meram in mouj ko reddik. Ilo an meja jab mije, meram eo an kajjojo ļait ko meramļo̧k im kapidodoik an romaakļo̧k ilo kein kattoto būrōrō ko. Jerbal eo eļapļo̧k. Ekkā ad kōjan̄ al in, ej kwaļo̧k “Joy to the world, the Lord is come!”1 im bwe “Etan naaj ān̄inn̄in E, Riwōj, Ripepe Em̧m̧an, Anij Ekajoor Bōtata, Jemān Indeeo, Irooj in Aenōm̧m̧an.”2
Ke mej ko meja rej kōtļo̧k an meram ko itok im mije wōt wōjke eo, iaar bar keememej mijen eo ekwojarjar an ad Rilo̧mo̧o̧r, eo me ej itok ilo an lukkuun mije iien in. Eaar ba, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.”3 Iaar kōļmenļo̧kjeņ kōn bon̄on eo ekwojarjar ke Eaar lo̧tak, kar obrak kōn kam̧m̧oolol kōn menin letok ko an Jemed kōn m̧ōņōņō, kōjatdikdik, im iakwe eo kar jilkintok n̄an laļ ilo Nejin Emake Wōt.4
Ilo tōre in n̄an ļōmņake im antoone emaron̄ in lukkuun jeja n̄an kōjwōj ilo an kōttōpar Raanin Kūrijm̧ōj. Tijem̧ba ej bōktok bade im ikkure in kam̧ōņōņō ko, iien ippān doon ko im menin letok ko. Jikejuuļ ko reobrak, im jet iien kōtmene ko jej iooni ippād make rebōk lan̄lōn̄ eo an jijen in ijelo̧kin ad kakūrm̧ool jijen in.
Kōn menin katak eo an Būreejtōn Nelson eaorōk: “Mōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad. N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Mōņōņō ej itok jān im kōn E. E ej unjen aolep lan̄lōn̄.5
En̄in ej juon tōre eaorōk n̄an ad lukkuun ļōmņake mije eo ad. Ta kōjatdikdik ko am̧ n̄an jijen in Kūrijm̧ōj in? Ta lukkuun ikdeleel ko am̧ n̄an kwe make im ro rejitenbōro ippam̧ ilo ami kuk ippān doon iien in ekwojarjartata ilo raan ko rekwojarjar?
Ilo ruo im jimetan wiik, Raan in Kūrijm̧ōj enaaj tōparaktok. Ļōmņake ta eo epād ilo kōļanta eo am̧ ruo im jimetan wiik jen kiiō. Komaron̄ en̄jake edodo jen kallim̧ūr ko rellōn̄ im men ko aolep im kwoj aikuj kōm̧m̧ani. Epoub ke jikejuuļ eo am̧? Manit ko im iminene ko rej ke kōm̧m̧an bwe kwon inepata im kabweer eok jān būki im antoone lan̄lōn̄ kōn ļotak eo an Kraist? Elmen am̧ maron̄ kapidodoik kaļenta eo am̧ ilo Kūrijm̧ōj in im em̧m̧anļo̧k am̧ karōk e n̄an eo tok juon?
Jej aikuj in lukkuun mejmejkaruo n̄an jab boub im m̧ōk n̄an kajjieon̄ kōm̧m̧an eļap men ko me enaaj kalikjab kōj jan ad mije jijen in n̄an jab bukwelōlō ilo menjer, kabun̄jar n̄an Kiin̄ eo elo̧tak, im bōkļo̧k menin leļo̧k eo ad make n̄an E.
M̧am̧a ro rem̧m̧an ded, im kōjwōj aolep, kom̧ij ke en̄jake ami nijōkļo̧k? Epād ia mije eo ami? Bōlen iiō in kwoban jilkinļo̧k Kūrijm̧ōj kaat ko, ak kwoj bolen kabōjrak jet iaan pija ko rem̧m̧an me rej im̧we kōj me kwoj kōtmene n̄an kwe make. Wōņāān iien ak jāān enaaj bōkļo̧k jet iaan maron̄ ko am̧ n̄an mije Rilo̧mo̧o̧r n̄an en̄jake lan̄lōn̄ eo An ilo Kūrijm̧ōj.
Baba ro rem̧m̧an ded, im elōn̄ iaadwōj, ewi ami mije? Bōlen iiō in Kūrijm̧ōj eo am̧ edik im obrak kōn menin leļo̧k ko kar make kōm̧m̧ani im menin leļo̧k ko an jerbal in jipan̄ kōn wōt inepata im jon̄an kajjieon̄ eo n̄an wiaik men eo eļap wōnāān—im ejjab ekkar—enaaj bōk jet iaan maron̄ ko am̧ n̄an mije wōt Rilo̧mo̧o̧r n̄an en̄jake aenōm̧m̧an eo An ilo Kūrijm̧ōj.
Kabun̄jar ilo tampeļ ilo iien Kūrijm̧ōj emaron̄ in juon iien ewōr tokjen. Tampeļ eo ej kajim̧we ad mije, kōļapļo̧k ad lan̄ļōn̄, im kobaik baam̧le ko ijin im ilo turājet in ron̄ōļ in nuknuk eo. Ļōmņake kabun̄jar ilo tampeļ ijelo̧kin bar juon iien Kūrijm̧ōj me emaron̄ jab jipan̄ eok ikdeelel n̄an aenōm̧m̧an ilo Kūrijm̧ōj. Kain̄i kein rekwojarjar—aenōm̧m̧an im kajoor eo an priesthood rej kabwijere n̄an aolep ro rej kam̧ōņōņōik er—rej maron̄ tōprak kōn eo Nejin Anij Jitenbōro Emake Wōt, en̄in “Lamb eo, em̧ōj m̧an E, jān jinoin kōm̧anm̧an laļ,”6 eo elo̧tak jej kiiō kemeeme.
Ilo an Kūrijm̧ōj in epaaktok, jen kōm̧m̧ane men eo eļapļo̧k tokjen im jen men eo ejjeļo̧k tokjen. Jen kappukot n̄an kōm̧m̧ane jerbal ko an Jisōs RiNazareth—ļōn̄aj ro rej būrom̧ōj, kaenōm̧m̧an bōro ko rerub, loļo̧k kalbuuj ko, naajdik ro rekwole, kanuknuk ro rekelwaan, im ņa ainikien ro rejjab maron̄ kōnono, ro ejej bōnbōnnier, ro kowaan er, im ro kōjdāt er.7
N̄an ro im ejerata Kūrijm̧ōj in n̄an er, komaron̄ lo menin letok eo an Rilo̧mo̧o̧r kōn iakwe me ejjejet n̄an eok. Elōn̄ rej, ilo iien in, rej luuji ro rejitenbōro ippāer kōn nan̄inmej, rūttoļo̧k ilo iiō, ak jet ilo itaak in wa. Elōn̄ rej keememej ro jako an me rekar jako ilo iien Kūrijm̧ōj, im menin enaaj emeemļo̧kjeņ eo ekōmetak n̄an eok. Jet rej buromōj kōn kāālet ko ro rejitenbōro ippāer rej kōm̧m̧ani ilo iien in. Jet rej ajimakake, ejjeļo̧k aer baam̧le, en̄jake eļap apan̄, ak jabdewōt un ko rej jelm̧aeiki ilo Kūrijm̧ōj eo eļap an oktak jān kar aer kemeeme m̧okta.
Tōmak bwe ewōr juon menin letok em̧m̧anļo̧k ilo jijen in n̄an eok. Pukot juon jikin elūr, juon iien komaron̄ kōļmenļo̧kjeņ, jar, n̄an en̄jake jouj im iakwe an Juon eo lo̧tak eo an ebōktok jabdewōt lan̄lōn̄ ilo jabdewōt mour. Kallim̧ur eo in bwe juon raan, “enaaj ejjeļo̧k bar mej, re jāmin bar liaajlo̧l, ak jan̄, ak en̄taan.”8 “Re jāmin bar kwole, ak maro. … Bwe Lamb eo Ej eoļōpan tūroon Enaaj naajdik kōj, im Enaaj tōl kōj n̄an unin dān ko dān in mour; im Anij enaaj kōm̧ōrāik dānnin kōmjaaļaļ jān mejād.”9
Bōk jidik iien bōjrak jān jabdewōt men, n̄an emenono, n̄an kōļmenļo̧kjeņ. Reilōn̄ ļo̧k. Mije ilo menin letok eo An eļap—jeļāļo̧kjeņ kōn wōn kwe, im meļeļe bwe apan̄ ko ijin rej an jidik wōt iien im bwe m̧ōņōņō eo ijin rej kab baj jinoin m̧ōņōņō eo ej itok. Keememej, “Lan̄lōn̄ eo jej en̄jake edik jetņakin ilo wāween mour ko ad im aolep men otemjej jej kōm̧m̧ani ilo ad mije mour ko ad.”
“Im kiiō, ikōņaan kōketak kom̧ n̄an kappukot Jisōs in eo rikanaan ro im rijjilōk ro rekar jeje kake, bwe jouj eo an Anij Jemān, im barāinwōt Irooj Jisōs Kraist, im Jetōb Kwōjarjar, ro rekar jeje ļo̧o̧k kōn er, ren maron̄ pād ilo kom̧ n̄an indeeo.”10 Jemaron̄ ba, “Aaet, Irooj, kōmij kautiej eok, rainin elo̧tak jibon̄nin. … O, itok, jen nōbar E.”11
Ilo etan Jisōs Kraist, amen.